Post: #1
Title: الزمبعور
Author: العوض المسلمي
Date: 08-23-2009, 11:20 AM
|
Post: #2
Title: Re: الزمبعور
Author: haroon diyab
Date: 08-23-2009, 11:22 AM
Parent: #1
بقت لي زي
الصمرقع....!!!!
|
Post: #3
Title: Re: الزمبعور
Author: العوض المسلمي
Date: 08-23-2009, 11:26 AM
Parent: #2
لا يا هارون اخوي , الفرق كبير جدا بين الصمرقع والذي هو مرض في اغلب المراجع ياتي نتيجة تصرفات الصغار تجاه اعمامهم الكبار ,,
او كما قال ,,
اما الزمبعور فالمعني مختلف جدا وغير ,,
|
Post: #4
Title: Re: الزمبعور
Author: محمد عبد الماجد الصايم
Date: 08-23-2009, 11:34 AM
Parent: #3
إن شاء الله ما يكون شامبيون جديد
القديم ما كفاكم ولا شنو؟
اللهم إنكـ صائم!
|
Post: #5
Title: Re: الزمبعور
Author: haroon diyab
Date: 08-23-2009, 11:39 AM
Parent: #4
ياعمكـ
شامبيون شنو.....؟
ده علي راي المسطول السالتوا حبيبتو عن
الببغاء الاهدتوا ليهو في عيد الحب ...
(مابطااااااال لكن طعمه زي الجداد واااااحد....!!!!)
|
Post: #6
Title: Re: الزمبعور
Author: حمزاوي
Date: 08-23-2009, 11:46 AM
Parent: #5
أخي ودالباوقة
أفتنا
في الزمبعور
أخوي العوض
مسكاقمي
كل سنة وانت طيب
وشهر مبارك
|
Post: #21
Title: Re: الزمبعور
Author: العوض المسلمي
Date: 08-24-2009, 12:11 PM
Parent: #6
حباب حمزاوي ورمضان كريم
ياخال الزمبعور ده مصطلح سوداني زيه وزي سماحة جمل الطين ,,
|
Post: #7
Title: Re: الزمبعور
Author: محمد الجزولي
Date: 08-23-2009, 11:58 AM
Parent: #4
سلام من الله على الجميع
ورمضان كريم للكل ..
النصيبة الزمبعور * ده لو كان حا يتم إستخدامه {لايك} الصمرقع !
فتمانيني لله يجعل المستخدم يأجلو لحين إنتهاء رمضان المعظم !!!!!
ــــ
وعلى ( ممثلينا)! في الخارج مراعة وقت الجهجهة
|
Post: #8
Title: Re: الزمبعور
Author: haroon diyab
Date: 08-23-2009, 12:03 PM
Parent: #7
العوض اخوي
يعني يمكن يكون زي الراجل
الجا شايل كيس الخدار خفييييييييييف
المره قالت ليهو....
ياهو ده ....زمبعورك.... مع الرجال....؟
|
Post: #9
Title: Re: الزمبعور
Author: mayada kamal
Date: 08-23-2009, 12:34 PM
Parent: #8
دا منو الزعلك دا بس يا شيخ بورداب الخرطوم
تخريمة :
كلمة الزمبعور اعتقد مافي زول سمع بيها وهي كلمة اطلقها الأديب الروائي محسن خالد..
يقصد بها الشخص النكره الذي لا مكانة لها..
((
(إحداثيات الإنسان) التي لم تمت (لهم) ولم تنقضِ عجائبها –ولن،..
مُهداة إلى (تيم الأشرار) من الطيب مصطفى وإسحاق فضل الله وعلي يس وحتى آخر زمبعور وزمبعورة بكتبوا معانا هنا في البورد،..))
وفي رواية اخرى قاصد بيها الكيزان
هذا والله أعلم
ما اكون ظبزت البوست
|
Post: #11
Title: Re: الزمبعور
Author: Elawad Eltayeb
Date: 08-23-2009, 01:03 PM
Parent: #9
الزمبعور* كلمة مركبة فنخشارياً من جزءين هما:
زمبور، و عور
والزمبور العور هو حشرة طائرة قارصة خفيفة الرأس تطير على غير هدى وتقرص بغير هدف.
* المعجم الفنخشاري طبعة 2011م
حاشية:
أورد الإمام الذهبي رحمه الله في سير أعلام النبلاء في سيرة إمام المحدثين محمد بن إسماعيل البخاري رحمه الله القصة التالية /
وقال محمد بن أبي حاتم دعي محمد بن إسماعيل إلى بستان بعض أصحابه فلما صلى بالقوم الظهر قام يتطوع فلما فرغ من صلاته رفع ذيل قميصه فقال لبعض من معه انظر هل ترى تحت قميصي شيئا فإذا زنبور قد أبره في ستة عشر أو سبعة عشر موضعا وقد تورم من ذلك جسده فقال له بعض القوم كيف لم تخرج من الصلاة أول ما أبرك قال كنت في سورة فأحببت أن أتمها.
http://majdah.maktoob.com/vb/majdah10364/
أول قصة أشارت للزمبعور، هي التالية:
موقفان.. الأول محرج.. والثاني مرعب
عثمان حسين داؤود
{ في حياة كل منا مواقف لا تنسى.. بعضها طريف وبعضها مخيف.. والبعض الآخر محرج (يدخلك في أضافرينك).. وبعض المواقف تعطيك نوعاً من إحساس زول (عاملها في نفسو) حيث تراه مطأطأ الرأس.. مضطرب الخطوة يمشي خجلاً.. والموقف المخيف كالذي يجعلك تسير في عتمة ليل بهيم وأنت تقطع فلاة خالية من البشر تحسب فيها كل (كشكشة) من حولك صادرة من (بعاتي) أو (شكلوتة) وأنت تحاول تشجيع نفسك بالغناء بصوت عال.. نظام أنا عنتر وما خايف من حاجة وكدا.. زي أخونا الختمي الكان ماشي في الضلمة وبشجع في رقبتو بالغناء بصوت عال وهو يردد- سيد الاسم تررم.. سيد الاسم وفجأة عفص ليه كلب راقد قدامو والكلب وقّف قلب صاحبنا بنباح مفاجيء.. فاذا به يتحول من (سيد الاسم) (سيدي الحسن)!!- أما الموقف المرعب فهو الذي يعطيك الإحساس بالموت خنقاً من كابوس مزعج تصحو منه وأنت تبحث عن أنفاسك.. وذلك ما حدث لي بالضبط.. { وابتداءً أحكي لكم عن الموقف المحرج الذي كنت قد وقعت فيه عندما كنت طالباً مبعوثاً من قبل رئاسة الشرطة لدراسة علوم الطيران بمدينة ويلاند التي تقع على بعد عشرة كيلو مترات إلى الجنوب الغربي من مدينة نياقرا الحالمة ذات الشلالات المعروفة باسمها حيث كنت أذهب لقضاء صلاة الجمعة فيها برفقة زملائي الخمسة من طياري الشرطة.. وذات جمعة تجهزنا لاداء الجمعة بأحسن ما لدينا من ثياب.. (وعلى التعترني) فقد إرتديت في ذلك اليوم جلباباً أبيض فضفاض واعتمرت عمامتي الناصعة واديتها(كوز) بارتداء عباءة بنية اللون حوافها مطرزة بخيوط ذهبية لامعة كان قد أهدانيها المرحوم بإذن الله أحمد محمد يعقوب، جد أولادي.. كان شكلي أبهة.. وبدوت كشيخ (شاب) يتدفق الاسلام من على جبينه.. وكانت (الطبزة) الثانية أن جلست في أول صف بالمسجد.. تحت (كرعين) الامام طوالي.. وكان ابن المهندس حسن كراتشي، الذي كانت صلاة الجمعة تقام في صالون منزله الفخيم، هو من يقوم باداء الأذان كل جمعة.. وحتى تكتمل حلقات المطب حول رقبتي لم يحضر الولد (المفعوص) للصلاة ليه أنا ما عارف.. وخلاصة الحكي.. جاء الإمام د. شاهين وحال وقوفه أمام المصلين نظر إليّ وخاطبني قائلاً(make azan please).. أخذت على حين غرة.. وضربت لخمة.. معقولة يا أهل الله.. أنا حلفاوي (الإقامة) براها بتجهجهني.. كمان يقولوا لي أذن.. والحكاية جاطت في رأسي.. الأذان مع الإقامة.. وقفت على حيلي والركب سايبة.. دي مصيبة شنو الوقعت فيها يا عثمان يا ود طاهرة.. وتلعثمت وتلجلجت.. والعرق جاري جداول تحت العمة.. وبدأت الأذان بصوت خجول فإذا بالامام يصححني بقوله (No.. No.. make azan not iqama) وخلاصة الحكاية اتبرجلت مرة واحدة.. بقيت ما شايف قدامي وقد غشيني ما غشيني.. وبقى قلبي يدق زي الكأنو إيداهور إنفرد بالمعز.. والاخوة الطيارين من حولي خجلانين (للزمبعور) الواقف يمثل السودان أسوأ تمثيل قدامهم وهم بعاينوا لي بنظرة (شرطت عينا قدام الأجانب).. وعندها ادرك د. شاهين حرج موقفي فانحنى قليلاً للأمام وراح يمليني الأذان بصوت خافت وأنا أردد خلفه بصوت مضطرب حتى انتهيت وجلست.. تاني الخطبة أنا فهمتها! ولا الصلاة عرفت فيه حاجة!! عمة وجلابية وعباية كمان الود ولا ترباس ذاتو وما بتعرف تأذِّن.. النفخة طلعت أي كلام.. وخرجت بعد الصلاة مطأطأ الرأس كسيف الخاطر.. خجلاً من خيبتي.. غايتو موقف الله لا خت فيه حبيب!! ده الغرق في شبر مويه!! { أما الموقف المرعب فقد حدث لي عندما كنت ضمن سرية شرطة الاحتياطي المركزي التي أُرسلت لتأمين احتفالات عيد الوحدة في مارس من عام 1977م بمدينة جوبا في حضور الرئيس المرحوم جعفر نميري.. وكانت هنالك أقوال تسري في المدينة بتوقع حدوث تمرد في يوم الاحتفال حيث كانوا يقولون (يوم تلاتة شهر ثلاتة تسمع جيم تلاته) وكان جيم تلاتة هو السلاح المستخدم بواسطة القوات المسلحة في ذاك الزمان.. خلاصة الحكي، أنه في صبيحة يوم تلاتة تحركت من فندق جوبا في رفقة كل من المرحوم النقيب سر الفتوح وعبد الرحمن والملازم أول علي سر الختم إلى نادي البوليس حيث كان الجنود في انتظارنا وحال وصولنا لاحظنا بأن هناك توتراً غير عادي حيث أخبرنا الرقيب عبد القادر، صف الضابط المسؤول بالسرية، بأن العسكري (جيمس فنيك) كان قد خرج من نادي البوليس وعاد مخموراً وحمل سلاحه وأصر على أن يذهب مع زملائه لتأمين المطار استعداداً لوصول طائرة الرئيس. ولان (البلاوي) في العسكرية بتدحرج من فوق لي تحت وجهني النقيب بالتعامل مع الأمر بينما ذهب هو والملازم على رأس فصيلتين على أن ألحق بهما بالفصيل الثالث إلى رئاسة شرطة الأقليم.. { دلفت العنبر حيث كان العسكري جيمس فنيك والذي كان قد عين ضمن الرياضيين بشرطة الاحتياطي بخبراته في الملاكمة وقد كان رجلاً عملاقاً قوي البنيان.. ولمحته في آخر العنبر وهو متكيء على بعض المراتب والاغراض المكومة في مؤخرة العنبر وبيده كلاشينكوف ولما قربت منه نظر إليّ بعينين محمرتين نصف مغمضتين.. فقلت له (صباح الخير يا جيمس)فرد عليّ (أيوه يا أوسمان هِسين آوز شنو) فقلت في نفسي (اوسمان هِسين حاف كد من غير سيادتك ولا جنابو) معناها الشغلانية بايظة خالص.. فقلت له(إنت الظاهر عليك تعبان يا جيمس.. أديني بندقيتك واخد راحتك لغاية ما نمشي ونجي) فقال لي بصوت مخمور(أنا ما بدي بندقية بتائي لراجل) فقلت له (خلاص جهز نفسك وتعال برة).. وادرت له ظهري وما ان خطوت الخطوة فالثانية فاذا بي اسمع صوتاً لتعمير السلاح.. يالله.. الزول ده خت طلقة في الماسورة.. لم إلتفت للخلف حتى لا أثير حفيظته..ومشيت أول مشوار في عمري.. ووراي زول سكران وفي يدو بندقية معمرة وعنبر السجم ده ما داير ينتهي.. المهم بعد فترة خلتها دهراً وصلت الباب وتنفست الصعداء وقلت للرقيب عبد القادر ركب العساكر في اللوري وما عايز زول بيني وبين جيمس لما يجي مارق.. وعمرَّت سلاحي وانتظرت وقد وطنت نفسي على إطلاق النار عليه اذا بدت منه اي حركة (مش هي).. وعندما ظهر جيمس من باب العنبر خاطبته بلهجة آمرة: (عسكري جيمس ثابت عندك!) فوقف.. الله أكبر.. العسكرية اشتغلت- (إنتباه) فوق في وضع الانتباه.. وتحركت نحوه آمراً (سلم سلاحك) فما كانه إلا أن سلم سلحه لي بكل انضباط.. سبحان مغير الاحوال من حال إلى حال.. وتركته يركب العربة مع زملائه- وفي رئاسة الشرطة طلبت من الرقيب عبد القادر ان يشغل جيمس بالحديث وأتيت من خلفه واحطته بذراعي فلم يقاوم ووضعت قدمي اليمنى أمام رجليه ودفعته للامام فسقط على الارض زي أي شوال سكر رامينو من لوري.. اتاريه سكران لط.. وما فيه حيل.. فقيدناه ورميناه.. ولسان حالي يقول (الله لا تريحك يا جيمس قومت نفسنا في الفاضي).. ومن يومها أخوكم عندو حساسية من صابون (الفنيك) ولي هسي!
نقلا عن آخر لحظة
http://www.sudanforum.net/showthread.php?t=67822
هذه مشاركة فنخشارية زمبعورية.
العوض رمضان كريم، ومبروك الجمعية.
|
Post: #12
Title: Re: الزمبعور
Author: mayada kamal
Date: 08-23-2009, 01:07 PM
Parent: #11
دا مووش حلفاوي مننا !!!!!!!
|
Post: #24
Title: Re: الزمبعور
Author: العوض المسلمي
Date: 08-27-2009, 08:26 AM
Parent: #11
العريس عوض الطيب حبابك .
كنت متوقعك تكون من الذين يعرفون معني هذه الكلمه ,,
رمضان كريم
|
Post: #23
Title: Re: الزمبعور
Author: العوض المسلمي
Date: 08-27-2009, 08:24 AM
Parent: #9
حباب مياده كمال ورمضان كريم
والله يا مياده مافي زول محدد ,, زكمان البوست ليس له علاقة بالزعل ,,
ولكن الزمبعور كلمة سودانيه تطلق علي الرجل والمراءة ,
لو قلنا الرجل فلها مناسبات تقال فيها ومن هذه المناسبات ان تجدي الرجل في قمة ابهته لبس
وشكل ومنظر ولكن عندما يفتح فمه فانه يقول كلام الطير في الباقير ,,
ورجل اخر ينتظر الناس حضوره لما عرفوا عنه من جمال منظر ووجاهة شكل فعندما ياتي يقول كلام لامعني له ,,
ويطلق عليه الزمبعور ,,
اما من النساء فاترك لك الفرصه لاتحافنا بامثله ,,
|
Post: #22
Title: Re: الزمبعور
Author: العوض المسلمي
Date: 08-25-2009, 10:20 AM
Parent: #7
استاذنا محمد الجزولي رمضان كريم وما تنسانا من دعوة الافطار ,,
| Quote: فتمانيني لله يجعل المستخدم يأجلو لحين إنتهاء رمضان المعظم !!!!! |
الزمبعور متواجد في كل زمان ومكان ولا علاقة له بالصيام ,,
وكلامك ده بوديك لبوست سؤ الظن عند الكبار ,, او كما قال
|
Post: #10
Title: Re: الزمبعور
Author: العوض المسلمي
Date: 08-23-2009, 12:38 PM
Parent: #4
| Quote: إن شاء الله ما يكون شامبيون جديد |
الزمبعور يا عمك مصطلح سوداني صرف يطلق من علي المراه زمبعوره , وعلي الرجل زمبعور ,,
قول ساااااااهي ما بفطر ,,
|
Post: #13
Title: Re: الزمبعور
Author: osman righeem
Date: 08-23-2009, 01:09 PM
Parent: #10
اخونا العوض تحياتي
وتصوم وتفطر علي خير
أول مرة سمعت كلمة الزمبعور كانت في الستينات
في سوق تنقاسي الكبير وظلت متداولة حتي منتصف السبعينات
وفعلا تطلق للرجل زمبعور و المرأة زمبعورة
لكن لوعايز المعني عندك في الكرين كم واحد من ناس السوق
الكبير اسألهم عن المعني واعمل حمد لبد
وارشح ليك حسين عبد الرحمن
واللهم اني صايم
|
Post: #14
Title: Re: الزمبعور
Author: ود الباوقة
Date: 08-23-2009, 01:16 PM
Parent: #13
Quote: أخي ودالباوقة
أفتنا
في الزمبعور |
حمزاوي ..
اعتقد انه من فصيلة الحيوانات
ونحن نطلق عليه ( المكادي او الدبزاوي )
وفي احتمال تاني يا خال يكون الزول ( الفطقة )
|
Post: #15
Title: Re: الزمبعور
Author: Dr. Ahmed Amin
Date: 08-23-2009, 04:29 PM
Parent: #10
| Quote: الزمبعور يا عمك مصطلح سوداني صرف يطلق من علي المراه زمبعوره , وعلي الرجل زمبعور |
رهيبة لكن ده يا ريس .... هههههههه
والطفل الصغير زميبعير...
رمضان كريم يا ريس
|
Post: #16
Title: Re: الزمبعور
Author: طارق ميرغني
Date: 08-23-2009, 09:46 PM
Parent: #15
Quote: ونحن نطلق عليه ( المكادي او الدبزاوي )
وفي احتمال تاني يا خال يكون الزول ( الفطقة ) |
كده كوس يا شيخ العوض تخلي ود الباوقه يتكلم معنا بلغة زمبعوريه بالشكل ده
بسرعه راجين الاجابه قبل ما النظريات تزيد...
|
Post: #17
Title: Re: الزمبعور
Author: MOHAMMED ELSHEIKH
Date: 08-23-2009, 09:58 PM
Parent: #16
| Quote: الزمبعور يا عمك مصطلح سوداني صرف يطلق من علي المراه زمبعوره , وعلي الرجل زمبعور ,, |
و و يطلق على الطفل الزميعبير
اما الفطقة فهو الزول الطنقة
و المعني واضح ان شاء الله يا ود الباوقة
|
Post: #18
Title: Re: الزمبعور
Author: عبداللطيف حسن علي
Date: 08-23-2009, 11:45 PM
Parent: #17
Quote: .. وتركته يركب العربة مع زملائه- وفي رئاسة الشرطة طلبت من الرقيب عبد القادر ان يشغل جيمس بالحديث وأتيت من خلفه واحطته بذراعي فلم يقاوم ووضعت قدمي اليمنى أمام رجليه ودفعته للامام فسقط على الارض زي أي شوال سكر رامينو من لوري.. اتاريه سكران لط.. وما فيه حيل.. فقيدناه ورميناه.. ولسان حالي يقول (الله لا تريحك يا جيمس قومت نفسنا في الفاضي).. ومن يومها أخوكم عندو حساسية من صابون (الفنيك) ولي هسي!
|
والحياة نفسها لحظة ساخرة يا اخ العوض !
|
Post: #19
Title: Re: الزمبعور
Author: حمزاوي
Date: 08-24-2009, 08:36 AM
Parent: #18
| Quote: وفي احتمال تاني يا خال يكون الزول ( الفطقة ) |
أنا ظاااااااااطو كنت قايلو ماشي السوق
|
Post: #20
Title: Re: الزمبعور
Author: عبدالمنعم الرزوقي
Date: 08-24-2009, 08:53 AM
Parent: #19
الاخ المسلمي
سمعت بهذه الكلمة في نهاية السبيعنات في المرحلة الابتدائية من الاستاذ
السر الشهير بالزنبعور والان علي ما اعتقد في سلطنة عمان
كان اذا اراد ان يوجه سؤال الي طالب يقول
( انت زنبعور ركن هناك ) سقيا لها ايام
|
|