شكرا بكرى ... اشراقة وعجب الفيا

أجيؤك فى المساء المخضل بالرعشات
محمولا على جنح الوسامة
هذا زمانك أن تظل حبيس من تهوى
وبينكما علامة
أن تنبضا وجدا وتحراقا ومسغبة
تمد جذورها عمقا الى يوم القيامة

مقطع لشاعرنا القامة عالم عباس استهل به نصه الافريقانى (ماريا وأمبوى) تعويزتى السحرية وجواز مرورى الى وجدان من أحب وهذه الاشراقة ما فتئت تطوقنى بالجمائل والجمال ...أهدتنى أولا مقالها المنقوع فى النوستالجيا ...الآن ينصهر حزنى ..دمى وحبر الذاكرة ...وهاهى ذى تقيم لأجلى عرسا ومهرجان ...تفرش الارض وردا وتستقبلنى عند مدخل هذا المنبر وتمنحنى هذا المقعد الذى كنت اشتهى لها ولكم القلب قبل التحية ... قبلها كان الاستاذ راهب المعرفة المثابر الصديق عبد المنعم عجب الفيا قد نال ( البرنجية ) وهو يوجه نداء للاستاذ بكرى مطالبا بتسجيلى عضوا بحوشكم العامر بأنفاسكم ...وهأنذا الآن بينكم سعيد برفقتكم وآمل أن تكون فى هذه الرفقى إضافة نوعية لهذا المنبر الذى أعشقه ...المنبر الذى صار وطنا موازيا لوطن اضعناه ...فيه الكثير من ملامحه بتنوعه الفريد تقرا فيه لاصحاب اللغة البالغة (الحنية) إشراقة مصطفى ...ميرفت ...السمندل ...آش ...هدهد ...ولاصحاب اللغة الاكاديمية (الناشفة) د.أبكر آدم اسماعيل (فى دراساته) ...عجب الفيا ...الجندرية ....عشاق السياسة بكل تفاصيلها فتحى البحيرى ..عادل عبد العاطى ...اصحاب الملحة الراقية والدم الخفيف ...شيرى ..بت قضيم ...بدر الدين شنا...كل هؤلاء صاروا جزءا من التفاصيل اليومية ..أفتقدهم حين تحول المشاغل والشواغل من الولوج الى هذا الحوش البديع ... وأود فى هذه الاطلالة الاولى أن أحى الاحباب والاصدقاء الذين يزينون بابداعاتهم هامة هذا البورد والذين جمعتنى بهم الدنيا يوما وفرقتنا بعد ذلك ايدى سبا لهم التحية وهم يغسلون عن أرواحنا وعثاء المنافى وأوجاع السفر فالتحية لاشراقة ومنعم والتحية للشاعر الرائع ابن القضارف تلك المدينة التى تسكن ذاكرتى قدمته مرة فى ليلة شعرية مشهودة وجهيرة السيرة بنادى المصارف بالقضارف اظنها المرة الاولى التى يرتاد فيها المنابر بمدينته كان أنذاك طالبا جامعيا و ..جلاتيا اين انت ..والزمان يمارس الترحال فى شخص الذى سواك ازميلا وأذن بالجميع الى الصلاة.له التحية تاج السر جعفر الخليفة ...والتحية ايضا لشقيقه طه فقد التقيته كثيرا ولكن من بعيد لبعيد عموما اواصر قوية كانت تربطنى باسرتهم قبل ان يرحل والدهم الصديق وييممون الوجوه شطر عمان ...تحية للاساتذة الكبار رموز حوشكم وأقطاب منتدى جده د.بشرى الفاضل الرجل الموغل فى الجمال ..البالغ الاريحية ...والشاعر ( الرهيف) محمد مدنى ...والفتى (الطاعم) عزت الماهرى ...هذه هى اطلالتى الاولى عليكم وآمل ان يكون وجودى بينكم خفيفا عليكم..وسالتقيكم دوما فى دهاليز وباحات هذا المنبر ...و..لئن كنت كما انت عبق ...فاحترق
عبد الرحمن حمد النيل قوى

يسعدنا وجودك بيننا
ويا مراحب

عادة لا ارحب بالقادمين الجدد لا غتاتة مني (وإن كنت املك الكثير منها) لكن لإحساسي ان البيت بيت الجميع وأن الترحيب يعطي الإنطباع بالضيفنة،، الضيفنة يعني ضيوف
لكن اسمك لفت نظري
قدر ما حاولت اقوله بالعربي استصعب عليا
ممكن تكتبه بالعربي عساني اقدر اقرؤه؟؟
اكون شاكرة جدا
دخلت اقول الكلام ده ،، ثم وجدت اسمي من ضمن من ذكرتهم
انبشكت كثير

أهلاً بك جداً
وشكرا لذكر اسمي
سلمت

الاحباب ابا شكرا جزيلا على الترحيب..بت قضيم شكرا على الترحيب الذى جاء استثنائيا باعتباره خروجا منك على المألوف ..اما بالنسبة لموضوع الاسم فلو نظرت التوقيع على زيل النص لكفاك عبء السؤال يبقى التوضيح أكثر فالقاف مكسورة والواو عليها فتحة والياء ساكنة (قوى) اظنه صار واضحا ...ولك الود من قبل ومن بعد

الليلة يستقبلني اهلي
ارواح جدودي تخرج من
فضة احلام النهر،ومن
ليل الاسماء
تتقمص اجساد الاطفال
تنفخ في رئة المداح
وتضرب بالساعد
عبر ذراع الطبال

الاخ العزيز عبد الرحمن الف الف مرحب بيك وحمدالله علي سلامة الوصول
ونتمني ليك اقامة سعيدة بين اهلك البورداب

الأخ الكريم
عبد الرجمن حمد النيل قِوي
ألف مرحب بيك
و
بعضٌ منك لا يلقاك
إلا في المداد
هيا أرنا
مجدد الترحيب بيك يا عزيز

الاحباب
عبد المنعم عجب الفيا ...طالما احببتك
واحببتك قبلك كردفان ...نفحتنى دائما
بالصداقات المتينة ...عبد الرحمن عبد القادر
طارق منوفلى ...وغيرهم
الطيب برير ...شاعر تستنطق الحرف العصي
اتابع كتاباتك دائما واذكر اننى التقيتك مرة
فى دارنا ...لك الود ...وشكرا للترحيب ..وليتنى
أسمو الى قاماتكم

آل البورد
لهم عظيم الشرف بدعوة سيادتكم لتناول أمر وطننا هماً وشجناً
الزمان : ساعة اللقيا بكم تتجدد أشراقة شمس غد
المكان : بورداً وطناً
توجد مواصلات بعد العرض

العاقبة عندكم في المسرات


أبنوسي

الاستاذ / بكرى
سلام وتحية
شكرا على الترحيب وشكرا من قبل
على هذه الاريحية وانت تستضيفناضمن
هذه التوليفة العجيبة فى حوشك (الممهول)عسانا
نكون فى قامة تلكم النخلات
تبلدى ..نلتقيك اليوم يا وطنى..لقاء الاوفياء
لك الشكر اخى على كلماتك الطيبات

الاستاذ / بكرى
سلام وتحية
شكرا على الترحيب وشكرا من قبل
على هذه الاريحية وانت تستضيفناضمن
هذه التوليفة العجيبة فى حوشك (الممهول)عسانا
نكون فى قامة تلكم النخلات
تبلدى ..نلتقيك اليوم يا وطنى..لقاء الاوفياء
لك الشكر اخى على كلماتك الطيبات

الاخ عبدالرحمن

مرحبتين فى المنبر ومساهمتك تعنى ان المنبر تشرف باحد الاقلام المميزه فى نشر الوعى واهلا وسهلا بقدومك

الاخ الشريف
شكرا جزيلا على كلامك الجميل
وانت تشد من ازرى وانا قادم
جديد لهذا البورد ...آمل ان
أكون بقامة كتابه

ياقوى

وكت انت فيك حمد نيلا فى اسمك ، اظنك بتبقى لى


وجبت سيرة القضارف كمان؟؟؟


المهم لك الترحاب فى وطنك الممتد، البورد، وهو طبعا وطنا البديل

حللت اهلا
ونزلت اثيرا

ألف ألف مرحب بيك يا عبد الرحمن حمد النيل قِوَىْ. اسلوبك يبشر بميلاد عضو جديد متفرد في هذا التُكُل متعدد الدُّواك .. الدواك دي جمع دوكة حسب كلام بت قضيم

ما عاوز ازاحم تماضر في حكاية النيل وحمد ديل .. والقضارف برضو .. بس حمد النيل قِوَيْ دي ذكرتني منطقة معينة في غرب البطانة .. الاسم ده موجود فيها بحالو دي. يازول انت ود حمد النيل قوي؟ أها قال أيوه. طيب معناها انت من جيهة رغوة أو ضحوي أو واحدة من المناطق دي. يا زول خلينا في القضارف ودوكة .. وللا حلة حكومة .. المهم انت ابقى داخل واشرب ليك شوية قهوة من صاحبي عبد المنعم ود عجب الفيا ده .. وخلي اشراقة مصطفى تقطع قلبك بالبكا

مرحب بيك تاني

الاستاذه / تماضر
بصمتك على هذا البوست تكريم ويوسف ابوشراء وغيرهما
والشيخ حمد النيل الموجود ضريحه بامدرمان من عندنا
ولوجود ضريحه بامدرمان قصة ساذكرها يوما ان سنحت
الفرصة ...اما القضارف فقد قضيت بها أج
اشكرك عليه ...وحمد النيل ماركة مسجلة
لاهلى العركيين وأنا طبعا من ابوحراز ..واحدة
من أكبر معاقلهم فى السودان ..شهيرة بقبابها
ومشايخها ...دفع الله المصوبن مل أيام العمر...بدات
حياتى العملية فيها موظفا بالبنك الاسلامى السودانى او ( سيدى بانك) كمايقولون ولى فيها الكثير من الاقارب والاحباب
الاخ شنتير
شكرا جزيلا على الاطراء...وآمل ان اكون اضافة
حقيقية ونوعية لهذا البورد...اما بالنسبة للاسم فانا وكما
ذكرت من ابى حراز يعنى لى علاقة بالبطانة من اطرافها والمناطق
التى ذكرتها اعرفها وعلى ايام تتلمذنا كان ابناؤها يدرسون المرحلة
المتوسطة معنا بابى حراز يعنى ان ذلك مجرد تشابه اسماء
ودمت

مرحب بك كثيرا ، أخي قوى
قناديلك وشت بها اشراقة
فادخل بالوميض
واشعل العتمة
ـــــــــــ
السمـــندل

القوى

تلحقنى وتنجدنى

انت يا خالى ، ياود خالى

كأنى اسمع صوت حبوبتى التاية بت ابو البشر هنا


.....


شرف الله قدرك

ومرحبتين تانى

السمندل
الف شكر ...والترحيب من قلم احترمه
تماضر
شكرا يا بت عمتى
ردى عليك اصابته بعض العيوب الفنية
ارجو ان يكون مفهوما برغمها

الأخ عبد الرحمن حمد النيل القادم بقوة ، إثراء حقيقي للبورد ألف مرحب بيك كأضافة للأقلام النيرة وشكرا أشراقة وشكرا عجب الفيا هكذا عهدناكم كنافخي المسك لا تأتي منكم إلا الريح الطيبة

الاخ / عاطف عبد الله
تقريظك ينفخ منى الاوداج
شهادتك تاج يزين هامتى
لك الف شكر على المجاملة وسلمت يا أخى

مرحب بيك يا ود حمد النيل يا ود الأوليا الصالحين.....دعواتك

بالمناسبة هل المبدع أبو الأمين من أندوكم...لأن جده حمد النيل(محمد الأمين حمد النيل) ومرة أخري حبابك عشره

الزول الجميل عبد الرحمن حمد النيل
يااااااااااااااااااااه ما احلاها طلة ... والف مرحب بيك في بيتك .. وشكرا لبكري الذي ظل كل يوم يلملم شتاتنا ... ويجمعنا من منافينا وزحمة مطاراتنا وينتزعنا من بين حقائبنا ويجمعنا في هذا الحوش الذي ظل يتسع كل ما ضاقت مساحات الوطن .. وشكرا لانك استطعمتني ... ولكنك ستكون فاكهة هذا الوطن -البورد- نزلت سهلا فسيحا ... وهذي الفلاة ليست جديبة .. وبك ستخضر اكثر .. وتعال انا مبسوط بجيتك .. ويا ريت يجونا كل الذين زينوا منتدى جدة الادبي بحضورهم الباهي
لك كل الود

الف مرحب يا ابو عبده

الف مرحب بك

سلامات
مرحب بيك استاذ قوي بيننا وكلماتك تزح فينا زحا وتبشر باضافة جميلة
اعجبني اسلوبك ياقوي ونتمني ان نقراء ونقراء ونقراء لك دائما فلا تكن بخيلا
ومرحب بي احبابنا الصوفية العركيين والمصوبن وقباب ابحراز
الف مرحب بيك وانشاء الله مايجف نبعك

الأخ عبدالرحمن
سلامات
اسعدتني طلتك الجميله
وانت تلج من اجمل الأبواب
لك الود عزيزي
والدار فاقداك

لجوه

الاستاذ / اسامة ميرغنى
شكرا للترحيب وكتر خيرك
استاذنا الهامة الموصلى شكرا للترحيب
وانت كما عهدناك دافئ قبالة القادمين الجدد
لك التحية
عزت الماهرى...الف شكر ايها الحبيب ..كنت اخشى انك لا تذكرنى
نسبة لقلة اطلالتى على المنتدى ..نكرر شكرنا الجزيل لبكرى
الذى اختزل كل هذه المسافات ليجمعنا تحت هذا الظل الوريف
عزت اخونا الشفيف مجدى شبندر الا يستحق مقعدا فى هذا البورد
منعم ...ودرملية..هوبلس
شكرا على ترحيبكم وكلامكم الطاعم الذى
سيدفعنى دوما للتواصل معكم عبر هذا البورد
ودمتم

العزيز عبد الرحمن
كيف لا اذكرك ، تلك ايام لا يمكنني نسيانها وكل الوجوه حاضرة ، فأنا لي ذاكرة غريبة ... انا بتذكر طفولتي اشياء لما اذكرها لامي تتعجب وتقول لي مستحيل تكون متذكر !!
مجدي شبندر يستحق منبرين في هذا المنبر .. اين هذا الرجل الاليف .. هذا المبدع والمثقف الناضج .. اين اخي مجدي قبل فترة ذكرت في ردي على بوست عن الحنين احاديث بيننا ومجدي عن الحنين هل ما زال مسكوننا بحنينة للسودان .؟؟
اعتقد سيظل كذلك ولكني ادعوه للأنضمام لهذا الوطن البديل علّه يجد اتني بديلة
لك الود

العزيز ...عبدالرحمن
الف مرحب بيك ...سننتظر ابداعاتك
دعنا نطالع طلتك البهية
لك الود
ميرغنى حمزة

الاخ / ميرغنى
لك الف شكر
وربنا يقوينا
وان شاء الله نتواصل
مع محبتى

مرحب يا قوي
قلت لي لغة ناشفة
عديناها يا عم
بس شوف تمبس كاتب لغة رقيقة وكلها حنية
عارف عدينها لشنو
عشان انت سمي جدنا
قوي دا جدنا
الف مرحب

الاخت الجندرية
حبابك عشرة
وصفى للغتك وعجب الفيا ود.ابكر آدم
اسماعيل هو وصف للغة فى بوستاتكم التى يغلب عليها
الطابع الاكاديمى وهى ( حفريات ) اكاديمية
رائعة وهذا لا ينفى وجود لغة اخرى ( سوفت ) اضبطها فى بعض مساهماتكم
ومداخلاتكم الاخرى ...الجندرية ليتك تعلمين كم احب
مساهماتكم فانت فى نظرى واحدة من رموز
هذا البورد ..لا استطيع تجاوز أى بوست يظهر
عليه اسمك او اسم الاخوان الذين ذكرتهم برفقتك
احبكم جميعا
ولكم الود من قبل ومن بعد

فوق ولنا عودة