Post: #1
Title: السجل الذهبى (لثقلاء) عموم السودان....
Author: Giwey
Date: 05-24-2007, 04:29 PM
Parent: #0
هم نفر إبتلانا بهم المولى عز وجل....
صحفيون وكتاب ...أدباء وساسة ورجال مال..مجرد
حضورهم فى الزمان والمكان يورث الواحد منّا الهم والغم..
سأفتح هذا البوست لنخرج _جميعنا_ هواءا ساخنا سببه لنا
أولئك الثقلاء ...وذلك لمجرد (التنفيس) عن الهم (وفشّا) للغبائن
فى زمن تكالبت فيه علينا الغبائن من كل صوب وحدب...
أحترم فى ذلك أذواق الناس .. فمن أراه أنا (ثقيلا) ربما رآه
غيرى بلسما ومتكأ...
سأبدأ بالصحفيين ... لأنهم (طالعين فى الكفر) هذه الأيام بتجاوزهم
لإتحادهم (الصنيعة) وثورتهم على القوانين المقيدة للحريات وتضامنهم
مع الصحف المصادرة ... ومن ثم أنتقل إلى قطاعات أخرى تعج بثقلاء
أخر .... وخليكم معاى
لكم الود
عبد الرحمن قوى
|
Post: #2
Title: Re: السجل الذهبى (لثقلاء) عموم السودان....
Author: Giwey
Date: 05-24-2007, 04:35 PM
Parent: #1
فى عيد الحب كتب أحد الأعضاء بوست بعنوان :
فى عيد الحب أنا أكره عبد الرحمن الزومة
وهو الصحفى الذى يكتب عمودا راتبا بجريدة السودانى.. وهو
مع الحكومة (عمال على بطال) ما قرأت له عمودا واستطعت أن أكمله
حتى النهاية .. يكتب بلا موضوعية وبلا طعم ... فهو حقا واحد من (ثقلاء)
مهنة الصحافة فى السودان....
لكم الود
عبد الرحمن قوى
|
Post: #3
Title: Re: السجل الذهبى (لثقلاء) عموم السودان....
Author: Giwey
Date: 05-24-2007, 04:40 PM
Parent: #2
راشد عبد الرحيم
وعمود (إشارات) بجريدة الرأى العام... واحد من أساطين
الكتابة (الماسخة) ... إشاراته بصمات لصالح كل ماهو حكومى...
كل السودان وقف ضد شراء الحكومة لشراء يخت رئاسى (لتفسيح) الرؤساء
الحضور لمؤتمر القمة الأفريقى .. إلا راشد فقد كتب (مادحا) ومغنيا
لهذا اليخت ... ما رأيكم دام فضلكم
لكم الود
عبد الرحمن قوى
|
Post: #4
Title: Re: السجل الذهبى (لثقلاء) عموم السودان....
Author: tariq
Date: 05-24-2007, 06:30 PM
Parent: #1
عبدالرحمن تحياتي ...
السودان ما شاءالله يزدخر بهذا النوع من مورمي الفشفاش وفي مسابقة مشابهة لموضوعك ده فازو بالاول (م) كل من احمد البلال الطيب وكمال حامد (ض)...
ولينا رجعة ...
|
Post: #5
Title: Re: السجل الذهبى (لثقلاء) عموم السودان....
Author: Giwey
Date: 05-26-2007, 03:28 PM
Parent: #4
وبما أننى لست قارئا لصحيفة أخبار اليوم .. لكنها
أحيانا (تقع فى يدى) مصادفة .. فأقرأ (للامع) آخر من
(أولئك) الذين نتحدث عنهم الا وهو الكاتب الصحفى (موسى يعقوب)
فهو (حكومى) لا يرى إلا ما تراه الحكومة .. لا يعرف مبدأ (المناصحة)
للأخ ظالما كان أو مظلوما ....
أخى طارق
تحياتى .. وشكرا للمساهمة .. وهم كما ذكرت كثر .. ولكل واحد
منهم أجندته ومدرسته .. عافانا اللهم ومنحنا نعمة الصبر .. آمين
لك الود
عبد الرحمن قوى
|
Post: #6
Title: Re: السجل الذهبى (لثقلاء) عموم السودان....
Author: Ishraga Mustafa
Date: 05-26-2007, 03:34 PM
Parent: #5
سلامات ياقوى يادفعة
قلت اسلم فى بوست السجل الذهبى لثقلاء عموم السودان...
* أوعى دفعة دى تغيظك
تحياتى للاهل من ابوحراز لامدرمان
اشراقه
|
Post: #7
Title: Re: السجل الذهبى (لثقلاء) عموم السودان....
Author: معتصم ود الجمام
Date: 05-26-2007, 03:41 PM
Parent: #6
اثقل سوداني ....
عمــــــــــــــــر الجزلي ...
|
Post: #8
Title: Re: السجل الذهبى (لثقلاء) عموم السودان....
Author: سلمى الشيخ سلامة
Date: 05-26-2007, 04:00 PM
Parent: #1
وفى الاذاعة ابراهيم البزعى وحنقة
|
Post: #9
Title: Re: السجل الذهبى (لثقلاء) عموم السودان....
Author: Giwey
Date: 05-26-2007, 04:07 PM
Parent: #8
د.إشراقة
أهلا بيك ...
والله طبعا حكاية دفعة دى فيها (قولان) ... عشان كده
حقو نخليها فى السر ... غايتو إنت فى الجامعة كنت الدفعة
(البعدينا) ...يعنى برلومتى ... مرحب بيك والأهل فى ابحراز
وامدرمان بيسلموا عليك ....
لك الود
عبد الرحمن قوى
|
Post: #10
Title: Re: السجل الذهبى (لثقلاء) عموم السودان....
Author: وليد محمد المبارك
Date: 05-26-2007, 04:10 PM
Parent: #9
ما تنسوا كمال حامد بتاع الرياضة
|
Post: #11
Title: Re: السجل الذهبى (لثقلاء) عموم السودان....
Author: صديق الموج
Date: 05-26-2007, 04:21 PM
Parent: #1
قوى...كيفك
وددت ان اضيف امين حسن عمر ونافع على نافع
ولكن اشهد الله ان الزومة هذا ثقالته ونفاقه لهن رائحة
فهذا اثقل من كتب حرفا
حقو البوست ينقفل هنا بس،،،
|
Post: #12
Title: Re: السجل الذهبى (لثقلاء) عموم السودان....
Author: Giwey
Date: 05-26-2007, 04:32 PM
Parent: #11
ود الجمام
حبابك الف ...
وبما إنه الثقالة خشم بيوت .. نرحب بمساهمتك .. وهى
عموما تجد رواجا عند الكثيرين لكنها تبقى فى النهاية مسألة نسبية...
لك الود
عبد الرحمن قوى
|
Post: #13
Title: Re: السجل الذهبى (لثقلاء) عموم السودان....
Author: ALazhary2
Date: 05-26-2007, 05:18 PM
Parent: #1
أخونا قوي
من أثقل الناس :
حمزة عوض الله (المذيع) / ناجي (المذيع)
ثقالة كمياااااااااااااااااااات
وأثقل منهم لم تر قط عيني ** وأسخف منهم لم تلد النساءُ
قال احد الظرفاء في ثقيل : أنت أثقل علي من نصف حجر الرحى (حجر المحراكة المدور) (ما متاكد هي محراكة ولا مرحاكة) .  شهادة عربية وكدا
فقام الناس سألو االزول دا قالو ليه: ليه نصف حجر الرحى ؟ ماحجر الرحى كله؟ قام قال ليهم لأنو حجر الرحى كامل لو دحرجته بدحرج لكن نصفه لا يتدحرج ولا يحمل إلا بجهد ومشقة
وقالوا برضوا الإمام أبو حنيفة النعمان مشى زار الفقيه الأعمش في بيته لما مرض . والأعمش شامي أبو حنيفة شمة السنين وبعد شوية أبو حنيفة قال للأعمش لانكون أثقلنا عليك؟ فردالأعمش : والله إنت ثقيل على قلبي وإنت في بيتك فكيف وانت معي
وبرضو يا زميل في جماعة من أهلناالأدباء العرب زمان عندهم قعدة سكر كل ليلة وفي زول ثقيل متلحهم يجيهم وقت العشاء يسكر ويتعشى لا يدفع ولا علاقته بيهم قوية وكرهم الحياة فقام واحد منهم قال ليهم انا الليلة بجيب ليكم خبروا وأطفشوا ليكم . المهم صاحبنا الثقيل جاهم في الليل كالعادة فقام الزول سألو قال ليه ماذا عنى الشاعر بقوله:
ولقد غدوت بمشرف** مثل الهراوة ماؤه يتفصدُ** ويسيل مع المزاح لعابه** ويكاد جلد إهابه يتقدُ
(طبعاً الزول دا قاصد حاجة ماكويسة) .
قام الثقيل قال ليه دا الحصان.
قال ليه حملك الله على مثله
فضحكوا الناس كلهم والثقيل انحرج وتاني ما جاء.
لكن أنا أخوك الازهري بقول الزول دا لو كان ثقيل ماكان هماه الإحراج
أختم ليك بي بيت الشعر دا في الثقلاء لقيتو في سماحة العلامة أية الله قوقل
ولي صاحبان علي هامتي * جلوسهما مثل حد الوتد*ثقيلان لم يعرفا خفة * فهذا الزكام وهذا الرمد
على فكرة البورد دا فيه ناس ثقالة كميااااات منهمMustafa Mahmoud الزول دا يوم وزعوا الثقالة على الناس كان واقف أول زول في الصف.
الله ينجينا وينجيكم من الثقلاء ببركة من طابت به طيبة وأحيأ أسمه حين يدعى دارس الرممِ
|
Post: #14
Title: Re: السجل الذهبى (لثقلاء) عموم السودان....
Author: haleem
Date: 05-27-2007, 07:18 AM
Parent: #1
أنا غايتو حاجز عمر الجزلي
|
Post: #15
Title: Re: السجل الذهبى (لثقلاء) عموم السودان....
Author: Nasruddin Al Basheer
Date: 05-27-2007, 09:02 AM
Parent: #14
هاك ديل تصبيرة يا عبد الرحمن لغاية ما أرجع ليك
الصافي جعفر
السموءل خلف الله
دكتور التجاني حسن الأمين
دكتور عبد الرحمن إبراهيم
دكتور أحمد عبد العال
صديق المجتبى
بوست رغم إنو عن الثقلاء،
لكن دمو خفيف
|
Post: #16
Title: Re: السجل الذهبى (لثقلاء) عموم السودان....
Author: Giwey
Date: 05-27-2007, 09:07 AM
Parent: #14
بت الشيخ
تحياتى ...
أحمد حنقة دى كانت ظاهرة عليه أيام الديمقرطية ..
كان أكثر ثقلا على قلب رئيس الوزراء الصادق المهدى...لكن والله
البزعى ده ما باين عليه خالص (الراجل منضمة وكلامه كلام حبوبات)
وكلام الحبوبات (ولوف) .... لكن شهادتك يعتد بها ...
لك الود
عبد الرحمن قوى
|
Post: #17
Title: Re: السجل الذهبى (لثقلاء) عموم السودان....
Author: Giwey
Date: 05-27-2007, 09:21 AM
Parent: #16
الوليد
سلامات
مساهمتك يكاد يكون مجمع عليها .. لكن أنا بقول يمكن يكونوا ديل
اخوانا الهلالاب .. المريخاب بيتعاطفوا معاهو شوية وأظننى
واحد منهم....
شكرا للحضور
عبد الرحمن قوى
|
Post: #18
Title: Re: السجل الذهبى (لثقلاء) عموم السودان....
Author: فاروق حامد محمد
Date: 05-27-2007, 09:23 AM
Parent: #16
وذلك الطبيب الذي يقدم برنامج عن الصحة
في التلفزيون بشنبه "اللي مالوش معنى خالص"
هذا أثقل ثقلاء السودان قاطبة وشنبه أثقل منه
|
Post: #19
Title: Re: السجل الذهبى (لثقلاء) عموم السودان....
Author: Giwey
Date: 05-27-2007, 09:35 AM
Parent: #18
أخونا صديق الموج ...
تحياتى ...
تعرف مرة أستاذ الزومة ده كرّس عموده للحديث عن ذلك
(الشافع) الذى داعبه البشير (الرئيس) فأصر الشافع أن يحادث
البشير فى (أضانه) ولقاها فرصة (وعضّ) البشير .. سود استاذ
الزومة العمود مشيرا لأن هذه الحادثة مؤشر على تسامح الرئيس وأريحيته
وأنها لا يمكن أن تحدث إلا فى السودان ولم يتبقى له إلا أن يرشح الرئيس
لجائزة نوبل للسلام .. كتب هنا أخونا ناذر الخليفة أن الزومة فى هذا العمود
قد كرهه جريدة السودانى والجرايد المجاورة ... شفت كيف؟؟؟
أما بخصوص (قفلة) البوست على كده فالزومة مؤهل تماما لهذا المنصب بس المشكلة
إنى حاجز القفلة أو (السدادة) لرجل مجمع عليه (إجماعا سكوتيا) فترقب
الاعلان عنه عندما أمل هذا البوست وأقفله...
لك الود
عبد الرحمن قوى
|
Post: #20
Title: Re: السجل الذهبى (لثقلاء) عموم السودان....
Author: Giwey
Date: 05-27-2007, 12:55 PM
Parent: #19
الأزهرى ...
تحياتى نديات
وشكرا لمداخلتك المطولة حول (الثقالة) والثقلاء ...
أما بخصوص ثقلاء المنبر فذلك باب كبير ... وأخشى
إن فتحناه أن يجر علينا الكثير الذى نحن فى غنى عنه
خاصة فى هذه الأيام والمنبر (علالته رابطة) ....
لك الود
عبد الرحمن قوى
|
Post: #21
Title: Re: السجل الذهبى (لثقلاء) عموم السودان....
Author: Giwey
Date: 05-27-2007, 04:06 PM
Parent: #20
حليم...
أهلا بيك...
بعدين يا أخى الجزلى ده موش محجوز؟؟؟
لك الود
عبد الرحمن قوى
|
Post: #22
Title: Re: السجل الذهبى (لثقلاء) عموم السودان....
Author: الواثق الصادق
Date: 05-27-2007, 04:17 PM
Parent: #21
ما خليتو زول يا ناس
أحمد البلال الطيب
أمين حسن عمر
الصافي جعفر
سلفاكير
الدقير
الزهاوي
و الله الساسة ديل كلهم ثقلاء
مع محبتي و خالص (ثقالتي)
|
Post: #23
Title: Re: السجل الذهبى (لثقلاء) عموم السودان....
Author: Giwey
Date: 05-28-2007, 04:30 PM
Parent: #22
أخونا نصر الدين البشير .. أو (روبش) على ما أظن...
نورت البوست يا حبيب...
وطبعا أنا الآن إكتشفت إنك راجل (ذواقة) .. نعم الإختيار
كل واحد منهم يستحق مقعدا (وهيطا) وسط أولئك العمالقة ...
سأحاول أن أفرد لهم مساحة طيبة فى هذا البوست وربما عدلت رأيى
قليلا لاترك لك مهمة (الغناء) فى هذه المجموعة ....
لك الود
عبد الرحمن قوى
|
Post: #24
Title: Re: السجل الذهبى (لثقلاء) عموم السودان....
Author: Giwey
Date: 05-28-2007, 04:35 PM
Parent: #23
صديق الموج...
قلت لى أمين حسن عمر... عيار (واحد وعشرين)...
ده يحتاج (لمواويل) طويلة ... رقم كبير لا يمكن تجاوزه ..
ولا يجوز السهو فى حقه ... حاضر بكثافة منذ أن هلت (الإنقاذ) فى حياتنا..
يتنقل هنا وهناك ...لكنه موجود (على قلوبنا) قرارا لا محبة ....
والود أرتال
عبد الرحمن قوى
|
Post: #25
Title: Re: السجل الذهبى (لثقلاء) عموم السودان....
Author: Sudnawi
Date: 05-28-2007, 05:55 PM
Parent: #24
قوي..
كلمني لمن تصل الفنانين عشان اقول ليك صلاح إبن الباديه و الخالدي !
|
Post: #27
Title: Re: السجل الذهبى (لثقلاء) عموم السودان....
Author: عماد شمت
Date: 05-28-2007, 06:16 PM
Parent: #25
سلام للكل ...
والله بالغت عديل في الخالدي ياخ حرام عليك الخالدي راجل ظريف ومسكين جدا لحد ما طلعت من
السودان عام1992 وما اظن انه تغير ....
دمتم ودامت معكم العافيه
|
Post: #26
Title: Re: السجل الذهبى (لثقلاء) عموم السودان....
Author: kamalabas
Date: 05-28-2007, 06:14 PM
Parent: #1
قوي تحياتي
ما رأئك في
الجاز/أسحق فضل الله/ غازي صلاح الدين/ علي أسماعيل عتباني
وطبع أتوج أمين حسن عمر كملك للسماجة والبائخة والتنطع الاجوف!!!!!
كمال
|
Post: #28
Title: Re: السجل الذهبى (لثقلاء) عموم السودان....
Author: Adam Omer
Date: 05-28-2007, 09:01 PM
Parent: #26
على العتبانى والطيب مسطفى خال ال.........وفى كتار يكتيبو كانهم يفسون كما قال منصور خالد
|
Post: #29
Title: Re: السجل الذهبى (لثقلاء) عموم السودان....
Author: Nasruddin Al Basheer
Date: 05-29-2007, 11:33 AM
Parent: #28
يا عبد الرحمن الأربعة المذكورين أدناه كنت مخليهم ليك
بمثابة (ديس) رغم إنو ما فيهم دامة
الأول: عبد الرحيم حمدي (مكتشف سياسة تهرير الشعب السوداني)
الثاني: فتحي خليل المزوراتي الكبير (نسأل الله السلامة)
الثالث: اللواء صلاح الشيخ (بتاع الكلام باللاوندي)
الرابع: وده خطير خطير بالجد..
ما عاوز أقول دمو تقيل لكن ممكن تقول دمو (متجمد) ألا وهو
ياسين الحاج عابدين (مدير الكهرباء السابق)
الذي كانت تدعو عليه الناس صباح مساء..
|
Post: #30
Title: Re: السجل الذهبى (لثقلاء) عموم السودان....
Author: ابراهيم محمد الحسن
Date: 05-29-2007, 01:11 PM
Parent: #29
أنا غايتو بأتفق مع الآراء الفوق في ثقالة :
المذيع (ناجي) .. والله بيورم مصراني بخفته وحركاته في الكلام ..
وبرضو السيد الدكتور مامون حميدة مقدم برنامج الصحة في التلفزيون .. ونحن طبعا كراهيتنا ليه مستمدة من سياساتو الطبقها في جامعة الخرطوم عندما كان مديرها ..
|
Post: #32
Title: Re: السجل الذهبى (لثقلاء) عموم السودان....
Author: Giwey
Date: 05-29-2007, 03:42 PM
Parent: #30
فاروق حامد...
تحياتى...
أظنك تقصد د. مأمون حميدة... أو ربما د. عمر محمود خالد...
عموما لكليهما (عشاق) فى هذا الجانب .. فأيهما تقصد فقد بلغت
رسالتك ولم (يطش) سهمك ....
لك الود
عبد الرحمن قوى
|
Post: #31
Title: Re: السجل الذهبى (لثقلاء) عموم السودان....
Author: الطاهر عثمان
Date: 05-29-2007, 03:30 PM
Parent: #1
الاخ عبد الرحمن تحياتي
بالله عليك بعد حماميزو وامين حسن عمر في قفلة اكبر من كده
غايتو منتظرين معاك القفلة
|
Post: #33
Title: Re: السجل الذهبى (لثقلاء) عموم السودان....
Author: Giwey
Date: 05-29-2007, 03:58 PM
Parent: #31
الواثق الصادق...
تحياتى ...
بعدين يا أخى ما كل الساسة (ثقلاء) ..نحن هنا
بنحاول (ننقى) من هو متفق عليه أو شبه متفق عليه ... بس ولأننا
نعيش زمانا (ثقيلا) على قلوبنا فقد كثر فيه الثقلاء فهم يعيشون (أحلى)
أيامهم ... لكن هنالك ساسة خفاف على القلوب لكنهم هناك
فى التخوم أو على خطوط التماس ....
لك الود
عبد الرحمن قوى
|
Post: #34
Title: Re: السجل الذهبى (لثقلاء) عموم السودان....
Author: shammashi
Date: 05-30-2007, 06:34 AM
Parent: #33
Quote: قال احد الظرفاء في ثقيل : أنت أثقل علي من نصف حجر الرحى (حجر المحراكة المدور) (ما متاكد هي محراكة ولا مرحاكة) . شهادة عربية وكدا
فقام الناس سألو االزول دا قالو ليه: ليه نصف حجر الرحى ؟ ماحجر الرحى كله؟ قام قال ليهم لأنو حجر الرحى كامل لو دحرجته بدحرج لكن نصفه لا يتدحرج ولا يحمل إلا بجهد ومشقة
|
الزول دا قاصد ملاســــــــــــــــي عديل.
| Quote: أظنك تقصد د. مأمون حميدة... أو ربما د. عمر محمود خالد... |
حرام عليك ياخي ظلمت الشاعر الرقيق المرهف د. عمر.
والله مأمون حميدة دا مش ممفروض برنامجو دا لعلاج الناس لكن الحاصل إنو الزول دا بيزيد على المرضى آلامهم والأصحاء بيعلهم.
ياخي دا زول حكاية بطالة خلاص.
غايتو مرتو جنتا فاتحة.
ممكن أضيف واحد؟؟؟
ولد الفنان وردي الكان جابوهو "يهنق" مرة مع طارق جويلي وقال بيغني
علي اليمين أنا الفاك المسكني من اليوم داك لأسي ما فكاني.
|
Post: #35
Title: Re: السجل الذهبى (لثقلاء) عموم السودان....
Author: بهاء بكري
Date: 05-30-2007, 06:48 AM
Parent: #1
الكرنكي ياقوي
|
Post: #36
Title: Re: السجل الذهبى (لثقلاء) عموم السودان....
Author: Giwey
Date: 05-30-2007, 03:42 PM
Parent: #35
سودانوى ...
سلامات
اولا خلاص نحن مسألة الترتيب دى خليناها
يعنى خد راحتك ... سياسة ..أدب ... فن .. مافيش مشكلة
ابن البادية ده فعلا واحد منهم بس (نقلع) منو وشوشنى العبير لابى آمنة
حامد وحسنك أمر بتاعة محمد يوسف موسى وبعد كده خد راحتك على الآخر .. يعنى
نضيفو ومعانا (مزيكة الجيش) .. شفت كيف؟؟؟
لكن الخالدى ده غايتو أنا فى رأيى ما معاهم الزول ده مسكين
وغناى وصوته فيهو (بحة) عجيبة ... يمكن يكون ده تحيز ناس جزيرة ساكت؟؟؟
والله يمكن .........
لك الود
عبد الرحمن قوى
|
Post: #37
Title: Re: السجل الذهبى (لثقلاء) عموم السودان....
Author: Giwey
Date: 05-30-2007, 03:50 PM
Parent: #36
عماد شمت
أهلا بيك
وأنا متفق معاك ورأيى قلته فى مداخلة سابقة .. الخالدى ده
فعلا ما معاهم وفى ظنى ياهو ذاته الخليتو قبلما تسافر ...
لك الود
عبد الرحمن قوى
|
Post: #38
Title: Re: السجل الذهبى (لثقلاء) عموم السودان....
Author: Giwey
Date: 05-30-2007, 04:07 PM
Parent: #37
كمال عباس...
تحياتى ....
بالله إنت برضك الناس دى عاملة معاك كده ... متفق عليه...
أما أمين هذا فرجل (سوبر) فى هذا الصدد...
لك عميق المودة
عبد الرحمن قوى
|
Post: #39
Title: Re: السجل الذهبى (لثقلاء) عموم السودان....
Author: د.محمد حسن
Date: 05-30-2007, 04:22 PM
Parent: #1
من الاعلاميين
ولا يعلى عليه
امين حسن عمر
لكن الصحفي الزومة ده فريد عصره
يا اخي ده حير ناس الحكومة زاتهم
|
Post: #40
Title: Re: السجل الذهبى (لثقلاء) عموم السودان....
Author: Giwey
Date: 06-06-2007, 04:33 PM
Parent: #39
أيها الأحباب..
تحياتى ...
وقبلما أعود للتعقيب على الإخوة المداخلين
فى واحد (سوبر ثقيل) كنت ناسيهو تماما وهو كذلك
من الناس (القعدوا فوق قلبنا) كتير ...
إنه د. صابر محمد الحسن (المحافظ) الأعظم لبنك
السودان المركزى ... نموذج حى للإستعلاء والدكتاتورية
ظاهرة عليهو بدون ما حد يقول عليهو كده... ولا رايكم شنو؟؟؟؟؟؟
لكم الود
عبد الرحمن قوى
|
|