دكين ......... غيابك طال

يارفيق الصمت في زمن الضجيج ..
اكتب و اكتب ثم اكتب ..
ان لم يكن للبوح بمافي ذاتك من شجن وألم وأمل، فان لنا عندك حق الاستمتاع
فلا تحرمنا هذا الحق الاصيل ..
اكتب ياحبيب .. للشتاء أصدقاء ... وفي الخاطر بعض الهتاويل ..و هناك حكايات تفاصيلها الحسناء تنتظرك في محطات السرد الانيق ...
اكتب ..
فان لمدادك حديقة ذات ظلال وارفة يجري من تحتهاالابداع ،ويراع وسامته فارعة وفارهة ..
قل ما في خاطرك .. أو قل سر الصمت ، كل الآذان في حضرة حروفك تتقن حسن الاصغاء و كل الافئدة تشرئب الي سماوات كلماتك لتروى عروقها .. فلا تخيب ظن الانتظار ولا تقتل عشم الترقب ..

أو هكذا الرجاء ...

الحبيب دكين

اعرف انك غارق حتى اذنيك فى البحث عن ذات الضمبر

وانا اوصيك بذات الضميرين

ابحث عنك

ويجب أن اراك قبل 30 نوفمبر

أنور الشيخ

اللذيذ انور

مؤخرا لاقيت اربعة بورادب..
تخيل نفس الفكرة بتاعة وراق فيهم..

الظاهر المسالة دي عندها علاقة بي حزب الامه..



عن يوم الخميس..
وحاتك من جيت من الخبر الموبايل ده ماشحنتو ..

ومفلس وعلى ابواب عرس..
فاعذرني على قلة حيلتي وفلسي بين الخلق..
الهناي خليهو معاك لحدي مانلقى لينا طريقة نلاقيك بيها قبل 30 تموز..
ـــــــــــــــــــــــــــــــــــــــــــ

ود الخليفة..

الله يطراها بالخير
لو كانت قاعدة لحدي هسي ..كانت تكون عملت بورداب اورشليم..

ــــــــــــــــــــــــــــــــــــــــــــــ
دومة

ياخي بتك دي اخر مرة شافت صورتي ..
بالالماني.: ليه هو عامل كده ياماما؟؟
تقول انا خلقتني..


خليني النشوف لي واحدة بتعرف الُتمنة ام ضبان..
بتك دي انا اعرسها تفتكرني خاشي على طمع..(وجه باسم)
ـــــــــــــــــــــــــــــــــــــــــــــــ

بت ابوالشام..

الفيك اتعرفت يا رعديدة ..
الفقر ماعيب..
العيب انك تبيع الزول لامن تلقاهو مقطع ساي زينا كده..
بس الله غالب..
بجي الخريف يا عزوز..



من ناحية تانية..

صحبتك الدنقلاوية السمحة ديك ما تعال نتوسط ليها عند بكري يعمل ليها باص ويرد..
لو ابى انا بضحي ليها بي باص ويردي..


ـــــــــــــــــــــــــــــــــــــــــــــــ

محمد البشرى
عميق امتناني ومعزتي..
بس البنية لومالاقيتها كان اخير..

في ناس بعد تلاقيهم تقول : بلاهي دي هسي انا لاقيتها لي شنو؟؟
ويجيك الشيطان الشايل حربة اب تلاتة سنون ديك يقول ليك:
لي كربتك..

اها سنوية دي انا لاقيتها لي كربتي بس..
تخيل لو كنتا بس بدرتا جيتي الجامعة اليوم داك نص ساعة ما كان حصل الحصل..

مع محبتي..

أمكن متوقف عن الكتابة تضامناً مع (أم ضراع) !!

Quote: اعرف انك غارق حتى اذنيك فى البحث عن ذات الضمبر

والله بحث دكين عن ذوات الضمائر كالحرث في البحر ابدا ما جايب تعبه لو كف عن البحث وقبل بي بتي كان احسن

دكين
حردان!

أو بيتحيرد، كما قال احدهم!


عد يا بني ودع عنك ما لا يفيدك

الطاهر امبس

نحنا ياسيدي ممتنون لي السؤال والصدفة الجمعتنا بيك..

البورد لم يتغير كثيرا عن ماضيه..
اذا فليس السبب حال البورد..

بس انا اظني كملتا العندي..
ياخي انا كسرت ليها تلج هنا ..
كسرت ليها تلج في السودان ..
وربطا ليها كعاشق في المسنجر..
وربطا ليها كهمباتي طرف شجرة مهوقني في الجامعة..
انا الوحيد العاينتا ليها وهي ماشة مشيتها الاخيرة ومدياني ضهرها ..
انا العلقت صورة جزمتها الاديداس بذهنه حتى اليوم من بين تلاتة انفار تعلقو بها وبكل مابها..
تلاتة انفار تفرقنا في امصار الارض..
انا اخرهم ..
واولنا مهندس مساحة اتخذ بعدها مكانا قصيا في منطقة سرجاس في جنوب البلاد..
اوسطنا لم ُيغادر مكانه ولكنه عاقر الخمر من يومِه ذاك طرف نفس الشجرة ومافاقَ الى يومِ الناس هذا..
انا من راها اولَ مرةٍ عند الاكزامهول، فقال: سناء..
فقالوا : ويحك.. كلها سناء..

انا القتا ليها انتي مابتشبهي الناس ..مالك مع الناس؟؟
(كنت حينها احرك يدي في شكل دوائر )
انا من وصف للمارين عصرِئذ بكل دقة تفاصيل حواِجبها ..
انا الكل ما اقول ليها شي ..
تقول لي : loooooooool ماتبالغ..

انا من جعل من آثار قدميها يومئذٍ مكانا لشتلة جهنمية ُتزهر الان في جامعة الخرطوم بإذن الله..
نصبُ ُ من الازهارِ لزهرة..
جهنميةُ ُ يمرُ بها المارون لايعلمونَ لِـمن ازهرت الجهنميات..
انا من جعل من المِرفق العام ساحةُ ُ لشجني وازهاري..
بناءها كتنشر ليتعلم منها من يتعلم ..
فجعلتُ منها رافداً لمحبتي وعيوني..
شتلتُ فيها ماشتلت..
ثم مضيتُ .. ومضت لحالِ بهائِها..

والذي بعثكم ُكتابا في هذا المكان وفي صحافةِ السودان..
اني قط مارايتُ مثل حاجبيها..
ولا بهاء وجِـهها..
even
ولا طيب لِـقائها..

اما وبعد هذا الفشلِ الذريع في ساحةِ سناء

الآن وكما قال مروان العبادي قدس الله سره..
يمكنني أن اهاجر لزيارة مساجين الرأي في حجرهم القرمزية..
وان التقيهم في الصباح –واقيل معهم ، ثم نسهر معهم في مرقص قريب نستمع فيه لفنان ( حليق) له أغنية وحيدة لا يحفظها جيدا ونحن نداري عليه بالسكوت ..

الآن يمكن للتراب أن يعلونا وان ننزوي في سرادق الوعود وحفلات نادي الضباط..
الآن ننهك عواطفنا بالذكريات المجبولة ونطمئن لليد العليا..

المتعبون وحدهم يعرفون حتفهم.
وحدهم يحترفون الغرق يصدحون بالشهوة في حِجر الأمهات إذ لا يرجون إلا الله

سبحان الذي جعل في حزنك فرحا لنا
وفي ألمك متعة
ومن دموعك مدادا لإبداع قلمك
اكتب ياخي اكتب فمن حقنا عليك الا تتوقف
فلمثل هذا جئنا

لك الود كله

يا دكين..

Quote: انا من جعل من آثار قدميها يومئذٍ مكانا لشتلة جهنمية ُتزهر الان في جامعة الخرطوم بإذن الله.. نصبُ ُ من الازهارِ لزهرة.. جهنميةُ ُ يمرُ بها المارون لايعلمونَ لِـمن ازهرت الجهنميات..

تذكرني جهنميتك هذه بمدني الحنينة وشجرة كانت تزهر في الخريف..

وكانت شجرة ضخمة بفروع وجذع يميل للون الاصفر واوراق

موغلة في الخضرة وازهار حمراء قانية..كانت شجرة تحفة!

تحتها شربنا شاي اللبن مع الاصدقاء في جامعة الجزيرة..

تناقشنا وتحدثنا في ساس يسوس..واشعار ادونيس..

وما خلينا سيرة زول!

لا يدري المارين لمن تزهر جهنميتك ولكن يكفيك شجنا درايتك!

مرحبا دكين
إفتقدتك إنت وصحبتى
والبلوزة البرتقاليه تشهد

تماضر

سلامات يا ام بلوزة برتغالية..

وجيتك سرتنا.. وجهرت عيونا..
كما وتقبلي اشواق صحبتي ..
اشواق كده بدون اي شروط..

دكين
انت بدسدس مالك ؟
ما تحكي ليهم عديل انك كنتا في الصويدرة





عموما
حمدا لله علي السلامة
انكتب لك عمر جديد يا فردة

حمد امبس
وييينك غاطس؟؟

Quote: تحكي ليهم عديل انك كنتا في الصويدرة

الناس دي تقوم تفهم الصويدرة دي فهم برتكاني وتقول صويدرة تصغير صدر ودكين كان لابد ليهو فوق صدر ادمية سغيرة..

يخوانا دي حِلة..
حِلة الله لا وراكم ليها..







فالح ياحمد تضرب وكت الصلاة وتقعد تتفولح مع الخونة وتقول ليهم (بيتحيرد)..


انشالله ادوك دبورة؟؟

يا الطاهـــر ساتي ...
الزول ده لما ما تلقــاهو هنــا بيكون .. ( مقرش ) ..
ما بجي البورد ده إلا يكون ضارباهــو ( فلسه )..
إذا ظهر دكين في البورد معناته مفلس ، دايرو يكون هنــا انا برسل ليك ( رقم حسابي )

تامبا

Quote: دايرو يكون هنــا انا برسل ليك ( رقم حسابي )

عايزتغنى من وراي ؟؟
ابشرك ياحبيب
تاني لافلس ولا فلاس..

انا بديت في الخطة (x) المسماة( life is shot)

في الخطة انفة الذكر ياتامبا القروش ماعندها اي قيمة..
مجرد اوراك بنكنوت لن تغير من طبيعة الاشياء عندي..


انا فكرتا وقتا
وكت القروش دي ابتنا ..ليه ما اباها انا ذاتي..

الان انا في مسالك الخطة المذكورة..
قريبا لن تجدني احتاجني الى هللة..





اخوك لن تغلبه هذه الحياة..
ومالمثل هذا الفقر ُخـلقت..

يادكتورة رشا ..


تعرفي ..القصة ليست في شجرة ولا في مكان معين..

القصة انو الشجرة والمكان المعين في اجواء معينة ولحظات بعينها بتتشكل وتبقى كل شي..

وردة جهنمية قد ُتذكرك بمنظر باب في حلتهم ..لتبقى الجهنمية ابدا تحمُـل ذكرى تلك الحلة..

زنقة مطرة في كلية العلوم قد ُتذكرك بوجودك معها منفردا في نهار غائم ..ليبقى المطر ابدا يحمل رائحة عطر حبيبة لاوجود لها إلا في خيالك الذي فاح نهارئذ..

كبري الحديد بتاع بحري قد وقفت عليه وانا انظر الجامعة واقول (ياربي هسي هي وين في مساحات الجامعة الممتدة قدامي دي؟) ليبقى كبري الحديد ابدا مسيطرا على حالات الشجن عندي..

موسيقى مقدمة برنامج اسماء في حياتنا قد ُُتذكرك بحاجبيها طرف الاكزام..ليبقى صوت عمر الجزلي ابدا ُيذكرك بان هنالك لحظات عصيةً على الخيال تكاد تطل من بين الساكسفون بتاع زامفير...

يارشا
قد يهون العمر إلاساعةً وتهون الارضُ إلا موضعاً..






نهايتو..

انا وعادل بلوتاريا* اتفقنا اننا لن نعول كثيرا على مستقبل ايامنا القادمات...

فقد عشنا الايام الجميلة كما يجب..






















*عادل بلوتاريا..
ُمهندس مساح وصديق عزيز من مواليد ابروف.. درس الثانوية في امدرمان..ثم جامعةُ الخرطوم ..
كان كادرا في الحركة الاسلامية ثم خرج عنهُـم في سنين الجامعةلاسباب غير عقاِئدية.. وعاد اليهم عقِب قعقعات السيخ في اواخر سبتمبر 98 ..ثم خرج مرة اخرى ُمحبطا ُمبعثر يقِـينه ما بين خيبةِ الآمالِ في القيادة وبين رفاقٍ مضوا في تطـُرفِ المليشيا واحتفالات الرصاص..
عمل دهرا بالمصالح الحكومية ثم غادر لايلوي على شي.. كان راسه لا يأبى إلا الدوران..
شجيا احب الجمال ..وشهدت له بذلك اختياراته العاطفية ..واشهد انه كان محدثا بارعا ولايزال ويدري كيف ُيدير كارثة الغربة ليجعلها اقل وطأةً ومتعددة الاحتمالات..
اولئك الذين يأخذهم الحديث فياخذهم الشجن والبلاغة فيوغلون في الياسمين..
عادل من ضمن مجموعة صغيرة مختلفة الامزجة اُخِـتيرت بعناية تامة ليظلوا اصدقاء حتى اليوم..







ـــــــــــــــــــــــــــــــــــــــــــــــــــــــــــــــــــ
التوضيح اعلاه لا ُيعتبر سيرة ذاتية لصديقي عادل.. انما هو مجرد توضيح

دكين .. فارس الحوبة وعاشق كبري الحديد ..

Quote: قد يهون العمر إلاساعةً وتهون الارضُ إلا موضعاً..

ويهون الناس إلا أصدقاء الحارة ...


وجودك يحفظ توازن البورد في حركة عدم الإنحياز ... " ما تقولوا لي اشرحي"

وبعض الشرح يفسد المعاني ..

تحايا..

دكين

ازييك ..

بالله ما لاقي الا الطاهر ساتي صحبي دا يفقدك في المنبر الكبير دا كله ..

ابشر بقصر عمر يا دكينا ..

كسره : اها البت عرسوها ولا لسه ..


ليكن شعار المرحله ( دوما دوما)

تحياتي

منعم

منعم

Quote: بالله ما لاقي الا الطاهر ساتي صحبي دا يفقدك في المنبر الكبير دا كله ..

الطاهر فيهوالخير..
اخ كريم وبن قريب كريم..


جدو لي ابوهو كان شيخ كبير وفقير ليهو حظوة عند اهل السماء..

اهو انا كده اقدر اقول انو سال مني اهل الصحافة السودانية..


تاين مافي زول يستهتر بي مشاعرنا دي...
بالطريقة دي قريبا ساكتب عن سناء في الوان..



كسرة:

ياتو بت فيهم؟؟

يعني خلاص
مافي اي رجعة عن القرار ده













عموما،،،
لازم الاقيك قبل التنفيذ
يمكن ...

الطاهر سايتي،
ازيك؟ لعلك طيب ..

شفت الصيوان قلت انشوف الحاصل شنو بعد ما وريناكم انو الأمر وما فيه مجرد حردة لا اكثر لا اقل...
هاتروك المودوع اكبر من كده بكثير!!!

اسمح لي بكلمة مع مع اخوك حمد ومن خلاله لدكين عشا البايتات

عارف يا حمد، لو اوكلنا مآل حياتنا لشلهتة مؤقتة تمسك بتلابيب أحلامنا لتلقيها أرضا كلما اقتربت من مسارات (الحدوث) لما ظلت تلابيب لتمسكها وتشبعها كرفسة لنفردها بيد (الصبر) ونشد الأطراف --وان قصرت الأطراف لتكشف عن ساقين أضعف من تحمل ما تبقى من فتات جسد و روح مشلهته – المهم كرعين وشايلينا وشايلين همنا معانا ...

اها طيب، والعمل يا بني آدم؟

مد لحافك على قد السما الي قدامك و اعتبر حدود قدميك هو كل أفق لم تطأه بعد, وقس على ذلك عشمك في بنت (الإيه دي)، و اجري!
وفي طريقك لهناك،التقط ما يمكنك حمله وغلا ثمنه من لحظات عمرك واختصر كل الفرح في ضحكة بس و اختزل الحزن في تنهيدة آولها (أه) وآخرها يا رب الهمنا الصبر!
وما تبقى، تصدق به شكرا لنعمة (الحياة) بغض النظر ما تؤول له لحظاتك التاليات....
في يوم، وفي منتصف الطريق بين منتهى (القرف) و سدرة هناءك، اقيف ونشف عرق ايامك و عاين وراك وشوف اللي مر لأنو، وحياة عيوني الصغار وضفايري، الجاي ده لو بقى جنة عديييل كده حتفضل تبكي على ما فات لانو بتعاين ليهو بعيونك حسي ما بعيونك وقتها! ونتيجة المعادلة أعلاه، الليلة حيبقى ليك احلى بعدين، وعلشان يبقى احلى جد جد، عيش يومك لحظة لحظة و ما تخلى دقيقة تعتب عليك!

Quote: لازم الاقيك قبل التنفيذ

المهم لا تنفيذ ،
لم اوافق بعد ولن اوافق في يوم ما على حسب علمي بي،
لذا، دعا مالا يفيد وانطلقا لطرق حديد الزمن وهو ساخن ...

الكريم ساتي الطاهر

والرقيق كسار الثلج دكين

سؤالات كتارات علي قول حبيبتي نورا

بس الباقي في الحلق وبنشرب عليهو موية

انت مفلس توجد هنا وانا الفلس بطيرني منا هنا

العلاقة عكسية طردية انفلاتية فلسية

يازول ح اقول ليك سر بس غمضوا كلكم

3 بنات صحباتي من المتصفحات مراسليني بكسريهم في المدعو دكين

وانا اقول ليهم شنو العاجبكم في النمر ولا القرد الشايل ليهو سكسفون ولا ترمبيت

ودي حسادة مني وبطير فيهم عشان انا زاتي بذات الزوارق المشرعة فرحا بك والثلج راقد في الشتاء

المهم القصة شنو مع ساتي وليه ساتي بسال منك شخشيا؟؟

اللعبة شلليات وناسات وساتي دا ماشايفة ليهو شلة واضحة

نقول واحد

وايدك والخشب

الدكين الذوق

سلامات

اظهر وبان وعليك الف امان

______________________________
اوف ريكورد

تقول مرسل لي حاجة واديك النفاج وتنسي

الفيك اتعرفت بس النفاج مفتوح

بت ابو الشام

انا مافهمتا من كلامك الدراب ده أي شي..

لاني صراحة مابقدر اعمل حاجتين في وكت واحد..
ما انتي كمان ما ممكن تنزلي موضوعين في وكت واحد..
صورتك وكلامك


بالرغم من مصابكم القادم فينا..
بس انتو كنتو محظوظين اكتر من ناس خميس مشيط وحوطة بني تميم والهفوف وسيهات ..
tفأن بها رجالاً ونساءً مارأينني قط..
احمدي الله انتي وحمد وقولوا ( منو العوض وعليهو العوض والتكلال)

مصطفى سند قال:

لا تاسى لمن فاتوا ..
فبعضُ مدائنِ تبقى وبعضُ مدائنِ تنأى فتُـنديها المسا فاتُ..

عزاز
طبعا انتي مصطفى سند ده ماسمعتي بيهو..
ولا حتسمعي ذاتو..


اهو زي ماشايفة لاخر اللحظات بنحاول نسمو بي فكركم وثقافتكم ومستويات الادارك عندكم..




سودانية
ياخي نفاجك ده ديقتال اكتر من الحاجة العايز ارسلها ليكي..
يعني انا عايز شي اكثر بداوة اتعامل معاهو...
فاكس مثلا...
مسالة اني اكتب لي كم صفحة A4 دي بصراحة- مع غلاوتك عندي- مابقدر عليها ...


بالدس كده:
صحبتك التركية ديك من ضمن صحباتك ديل؟؟
بعدين ياخ انا الوحيد الكتبتا ليها بالتركي..
ولا عبرتـنيش...




مع سلاماتي لي صحباتك المغشوشين فيني ديل..

Quote: انا مافهمتا من كلامك الدراب ده أي شي..

أقول بس.. انـ ....

حتفضل طول عمرك كده !!

مهما تجيك السوانح، تصر انك ترفسها وتسدر في غيك المبين لا تلوي على شيء إلا سناءك و المحيط ...
فضلنا على من فضلنا ربك عليهم كبير ورؤيتك لم تأتي ضمن اللائحة، بل بها تساوينا في و اتلاحقت الكتوف انا زي زي زهرمان؟ انت خلاص طشيت يا جنى!

حمد،

الرجاء الاطلاع والإفادة في أمر مكفولنا
و عمل ما يلزم لترحيله خارج مملكة رضانا

تحت توقيعي
انا

نقلا عن جريدة الرياض
العدد 13456 الاربعاء 1 ذو القعدة 1427 هـ
الاعلانات المحلية


بهذا تعلن مؤسسة عزاز بنت محمد شريف الشامي للترقية و التطوير و التهذيب ( لامثال دكين )
عن منح مكفولها دكين الحسن عشا البايتات سوداني الجنسية جواز رقم 14123 ام درمان
حامل اقامة رقم 2145241132 صادرة من جوازات الصويدرة بتاريخ 24 ربيع الاول 1422 هـ
تاشيرة خروج نهائي و ابعاد من رحمة الكفيلة الي الابد .
و علي كل من لديه متعلقات تجاه المذكور مراجعتنا خلال 15 يوما من تاريخ نشر الاعلان
و لاخلاء مسؤلية المؤسسة جري النشر .




حمد بن فتيح الضنقل
معقب اول المؤسسة ( حاليا )
رقيب جوازات متقاعد
توكيل 546354 كتابة عدل الصويدرة

ازاز
او كما ينطقونها
هل قلت ان الحياة اقصر من ان نمل بعضها ؟
لم يجانبك الصواب يا عزيزتي
فهي اقصر من ان تضيع فيها لحظة لا تستغل فيما يسعد
قد يكون ما يسعد حب ، مطلق الحب ، لام ، لاب ، لاخت ( كم احب اخواتي )
او حبيبة ، وطن ، اهل ،
او ان يكون ما يسعد فيها عبادة رب خالق ،
قد يكون ما يسعد تضحية ولو صغيرة ،
و حتي الصدق يا عزيزتي مما يسعد ، و اكثر يجمّل حياتنا الصدق .
عموما يا ... عزاز
هناك مليون باب يفتح فيُسعَد ،
و هناك باب واحد يفتح فيُشقي ، فلندعه و نستمر ...

قلت له ذات مرة :
اظل احمد لك شيئين يا صديقي
الاول انه من ساعدني علي احتمال غربتي او كما يعلم كيف تم ذلك ، و الاخر انهما من يعلمانه وحدهما ، فو الله انه اعذب ما سلكت رغم عذابه .
اجمل ما في اخي
صدقه
برغم بعض اكاذييه الجميلة
اجمل ما في اخي
حساسيته تجاه الجمال
و اجمل ما فيه اجمل اللحظات


لذا وجب علي ان الاقيه
فلا قرار بعد قرارك .
علم و ينفذ .

Quote: سودانية ياخي نفاجك ده ديقتال اكتر من الحاجة العايز ارسلها ليكي.. يعني انا عايز شي اكثر بداوة اتعامل معاهو... فاكس مثلا... مسالة اني اكتب لي كم صفحة A4 دي بصراحة- مع غلاوتك عندي- مابقدر عليها

خلاص عفيناك يا دكين

الايميل ما نفع تبقي انت بتحجج ساي

تسلم