كيف تفرق بين المعارض والحكومي

من
اسهل الاتهامات في البورد هو
انت كوز او عميل
انت جبهجي او حركه
انت مع المعارضه او مع الحكومه
لكن
كيفيه اثبات ذلك فصعب جدآ
لان
كثيرا ما ينفي احدهما اتهام الاخرين بانتماءه لجهه ما
قائلآ: انني ليس كوز او جبهجي او مؤيد للحكومه لكنني لا احب المعارضه...انني سوداني غيور لوطنه
فيرد اخر قائلآ: انني اكره الحكومه ومن يؤيدها لكنني ليست مع الحركه او التجمع..انني سوداني غيور لوطنه
لذلك كثيرآ ما اتسائل
لماذا دائمآ يتم تصنيف اعضاء البورد الي:
حكومة او معارضة
انقاذ او حركه
مسلم او كافر
هلال او مريخ
وما هو المقياس لتحديد ذلك..هل هي المواقف في الردود ام الاراء في الكتابات ام شيئآ اخر
لماذا لا يتم التعامل مع الاخرين علي اساس
ان رفضك لبعض سياسات الحكومه لا تعني انك مع المعارضه
وان عدم قناعتك لافكار التجمع لا تعني انك تؤيد افكار الانقاذ
وان كرهيتك لاستغلال الدين في السياسه لا تعني كفرك بالله او عدم الايمان
اخيرآ
ليس كل من يقيم في السودان مع الحكومه
ولا
كل من يعيش خارج السودان معارض

الأخ بلير الحبيب

كالعادة تأتينا بالمواضيع المفيدة و دائما تتخير الأوقات المناسبة لها

موضوع جميل و أجمل ما فيه أسلوبك الهادئ في طرح المواضيع الهادفة و أتمنى أن يحافظ هـذا البوست على هدؤه الذي بدأه به صاحبه و كل خوفي أن تنتقل أو ينقل له مهاترات و ملاسنات المتداخلين

أخي كما ذكرت سـواء المعارضة أو ناس الحكومة يصنفون الناس إما معي أو أنك ضـدي أي أنهم شطبوا غيرهم من الوجود فالذين ينتقدون الحكومة فهم معارضة و الذين ينتقدون المعارضة فهم تبع الإنقاذ أو كيزان أو ظلاميون و كثيرين صنفوا هذا التصنيف و هم أبعد ما يكونو عن ذلك


و في رأي أن كـل من يصل مع أحـد إلى المكان الذي لا يقدر على مجاراته في الحـوار و الإقناع يرميه بهذا الإتهام


لك تحياتي و لك تقديري و إحترامي و لك شكري

ابوحسين
شكرآ لروعة كلاماتك
انا ما عارف ليه لازم تكون يا معارضه او حكومه...هلال او مريخ
في ناس عايشين لا عندهم موضوع بالسياسه ولا بالكوره
ياني الواحد لو سالتو وزير الداخليه منو يقول لك ماعارف..او ما بهمني اعرفو
لو قلتو ليهو الهلال والمريخ لاعبين الليله ..يقول لك ..المواصلات حتكون زهمه
زي دا لو قال ناس المعارضه ما بينفعو البلد...نصنفو من انصار الحكومه
ربنا يسهل

عارف اكتر حاجه ربنا ح يسال فيها الكيزان شنو؟ , (طبعا بعد ان يسالهم عن ظلمهم للعباد) , هى انهم كرهوا (ضعاف النفوس ) فى الدين .
و ده واضح جدا فى البورد.
الكثير من الناس ( و ما عاوزه اقول السطحيين ) بقى الدين عندهم كلمة مرادفه للكيزان. و اسهل حاجه انك تقول على احدهم فى البورد انه كوز عشان تقلب عليه الراى العام فى البورد.
فى البورد ده لازم تكون مع الجماعة هذا هو المقياس . اى حاجه عملوها الكيزان غلط فى غلط . و اى حاجه بتعملها المعارضه صاح ١٠٠٠٪ . و كده تكون وطنى . و اى حاجه ليها علاقة بالدين ممنوعة . لو قلت الحمد لله , انت كوز . لو قلت للناس ده عيب او حرام (فى الدين الاسلامى على الاقل) , فانت كوز او ظلامى. لو كنت غيور على دينك الحنيف و الانبياء الكرام فانت دكتاتور و لا تصلح لان تكون فى بيئة حرة ديمقراطيه ذى البورد ده.

smart ana
تعرف استعمال الدين احسن وسيله تفرمل بيهو اي انسان مسلم..دا الاكتشاف الخطير الاتوصلو ليهو الاخوان المسلمين وباستعملو لمصلحتهم وعند الضروره
في البورد الغالبيه بره السودان لفترات متباعده ولهم علاقات مع المعارضه عشان كده الصوت المعارض اعلي
اما الاتهامات والتصنيفات التبادله فهي جزء من الحرب الاعلامي بين الحكومه والمعارضه
لكن
المشكله في ناس مصنفين مع المعارضه او الحكومه وهم بعيدين كل البعض منهما
ديل الضحايا
اما
حكايه ديقراطيه البورد دا فما موزونه لان البعض بشوفو انو هم ما يكتبو ديمقراطيه لكن ما يكتبه غيرهم دكتاتوريه...ودا ظلم