حبيبتي آية ...

آية ...
و ما أشبه الليلة بالبارحة ..

أول الكلام : كلام حبوبات :
الملايكة ما بتدخل بيتا مافيهو شفع .. ( دة كلام حبوبتي فاطنة خليل الصواردابية رحمها الله ) ..
يا ريتها حضرتْ زمنك دة يا آية .. كانت حتغني ليك بي صوتها الجميل ..
أجمل دندنة سمعتها في حياتي كانت دندنة حبوبتي فاطنة خليل ..
تدندن و هي بتكنس الحوش .. و هي بتعوس .. و بتطبخ و تنفخ في النار .. و بتعوس في الكسرة و هي بتشيل البيض من ( القوقا ) خُنْ الجداد .. و هي بتقطف الملوخية من الحوض قدام البيت .. و نازلة بالصفيحة عشان تملا الموية من النيل ..
كانت لا تكل و لا تمل من الدندنة .. و المديح ..

حبيبتي آية ...
خليني إتونس معاك..

أها الكلام الجاي دة ما ونسة .. دة كلام مع نفسي :

أن تستقبل أول طفل لك .. هو شعور كإنسلاخ جزء منك و كإنشطار الخلايا من نفس الفصيلة و الجنس حفاظاً للنوع و إمتداداً لعملية التكاثر ..
و هو شعور مليء بالفرح .. مشوب بدفء غريب .. شعور أقل ما يوصف به هو أنك تنتمي إلى هذا الكون ببصماتك و بصمات أولادك تدبون على أديم الأرض تتنزل عليكم شآبيب رحمة الله يومياً بشتى الضروب ..
كما هو شعور بأن جسدك قد نبتتْ له أوتاد تثبت أركانك كراسيات الجبال ، و تُلْقي في نفسك بإحساس أنك لن تميد إلى أي جهة .. و أن ظهرك مسنود بشيء محسوس و ملموس.


آية ..
و ما أشبه الليلة بالبارحة ..
فيوم مولد أمك محفور في الذاكرة .. بل هو غائر في سِفْر تاريخ الأسرة ..
فأمك أول حفيدة في بيتنا.. و أنت أول حفيدة ..
يوم مولدك .. مر شريط طويل أمام ناظرى ..
شريط مليء بالأفراح .. و محطات أحزان ..
تذكرت أمي عندما إستقبلتْ أمك و هي طفلة في المهد ..
كانت فرحة أمي عارمة .. رحمها الله ..
ففي بيتنا كان آخر طفل مولود هو أصغر أعمام أمك ... طال بهم الأمد منذ أن سمعوا ضحكة طفل أو صراخه.
لذا فقد تركنا أمك عندها لترشف من نفس المعين الذي رشفنا منه .. و نِعْم المعين.
ثم ماذا يا آية ؟
تتوالى الأيام ..
و أنفلتْ أنا من السودان إلى دنيا الله الواسعة ..
متسكعاً من بلد إلى بلد ..
و أمك مى .. تكبر و تكبر ..
و أيام الغربة تسرق مني أياماً جميلة في الوطن .. تلك الأيام التي شب فيها أولادي بعيداً عني ..
تلك الأيام لم تكن وسيلة الإتصال بسهولة يومنا هذا ..
يأتيني شريط مسجل بعد عدة شهور .. فتكون أحداثه قد مر عليها شهران أو ثلاث ..
هل تعرفين يا آية ..
تابعتك يوماً بيوم إلى أن دخلت أمك المستشفى ثم أسمعوني صوت صراخك على الهاتف..
زمان .. بعض الآباء كان يأتيهم خبر الولادة بعد السبوع .. و يمكن بعد الأربعين..
و بعض الآباء يا آية .. رجعوا من غربتنا دي و ما شافوا أولادهم إلا بعد ما دخلوا المدرسة.
و هناك بعض الأحفاد وُلدوا هنا في الغربة و ما شافوا حبوباتهم و خالاتهم و عماتهم لي يوم الليلة..

أما شريط أحزاني المرتبطة بفرحتي بك ..
كنت بتمنى أبوى و أمي يشوفوك .. و يفرحوا بيك ..
ناس كتار ماتوا في الأسرة ..
ناس كانوا بيتمنوا يشوفوا أمك كبيرة و دكتورة قدر الدنيا ..
و يشوفوها أم بتربي أولادها زي ما ربوها تمام ..
ناس زى عمتك الأستاذة نعيمة ..
و عمك المهندس حسن ..
و علوية بت خالتك ..
و ناس كتار .. كلهم كانوا بيحبوا أمك ..
جا واحد من السودان .. و حب يغيظني و قال لى : شفت آية قبال تشوفها إنت ..
و حب يوصف لى شكلك ..
طلبت منه أن يصمت .. لأنني أريد أن أبلور صورتك في خيالي حتى أراك و أقارن بين خيالي و الواقع .. لأرى إن كنت أملك نفس القدرة القديمة أم أصابها الزمان بالإهتراء .
ثم أتيت للسودان ...
إختزلت سلامي لسكان البيت .. سلمت عليهم بسرعة و أنا بفتش عليك ..
متلهفا رؤيتك ..
وداني صوتك لمحلك ..
لن أستطيع مهما أوتيت من بلاغة أن أوصف شعوري و أنا أحملك بين يدي ...
و لكن شعرت بشيء يشدني بقوة إلى الماضي و الحاضر و كأنني أقف في برزخ عريض ..
شطآنه من جهة أمي و أبي و إخوتي و حياتنا الجميلة في عطبرة ..
و من جهة أخرى .. أسرتي هذه التي إزدادت واحدة بمولدك ...
زخم من الذكريات مر أمام عيني ..
و أغرورقتْ عيناى بدمع عصي ..و أنت تنظرين إلى لا شيء .. و أنا أقرأ فيهما الكثير و الكثير ...
ناموس الحياة الذي لن ينتهي إلى حين يرث الله الأرض و ما عليها ...
...
عفواً آية ...
و أنت الآن بين أحضان والدك في دبى ..
أعرف شعوره و هو يستقبل باكورته ..
سؤال : ألا زلت إلى الآن ليلك نهار و نهارك ليل ؟؟
أرقدي عافية و تحياتي لأمك و أبيك و عبدالواحد و خالدة..

تخريمة : رغم إنك كنت مزعجة .. إلا أنو أنا و ياسمين و هند مشتاقين لإزعاجك ..
نشوفك على خير ..
واصلي إزعاجك .. مطولين من إزعاج جنس دة

الرائع جلال داؤد
التحية لك ولآية.
نقول جدو ولا شنو..
أفصح وبان، ليك الأمان.،

سأعود لهذا البوست بهدوء تام..

أبو محمد الوراق

تحياتي

Quote: نقول جدو ولا شنو..

إنت لسع ما قلت ؟؟؟
نحجز لمحمد ولا حجزوه بهناك ؟؟؟
في إنتظارك

استاذي ابو جهينة
إستقبال المولود الأول شعور لا يضاهيه شعور (رغم أني لم أجرب)
كنت قبل سنوات مع صديق لي وكانت باكورة إنتاجه طلفة جميلة
أصابها شي من المرض وذهبت برفقته وزوجته للطبيب وبالعيادة سألت موظفة الإستقبال بالمستشفى عن إسم الطفلة لتسجيل بيانتها ذكرت الأم إسم الطفلة مقرون بإسم صديقي
إخذني جانباً وقال لي (والله المرة دي لما قالت إسم البت دي مع إسمي حسيت إحساس غريب وجميل ما بقدر اوصوفوا ليك) يضاهي ما ذكرت:
هو شعور مليء بالفرح .. مشوب بدفء غريب .. شعور أقل ما يوصف به هو أنك تنتمي إلى هذا الكون ببصماتك و بصمات أولادك تدبون على أديم الأرض تتنزل عليكم شآبيب رحمة الله يومياً بشتى الضروب
وإنشاء ربنا يجمعك بيهم ويتلمه الشمل

الأخ العزيز خالد أحمد عمر
تحايا و سلام و مودة

Quote: وقال لي (والله المرة دي لما قالت إسم البت دي مع إسمي حسيت إحساس غريب وجميل ما بقدر اوصوفوا ليك)

معاهو حق ..
لأنو شعور بتعيشو و لكن من الصعب وصفو وصف دقيق ..
ربنا يسعدك و تفرح بأولادك و ذريتك
أرقد عافية

العزيز
ابوجهينة

إنشاء الله العديد من آيات الحياة
فى حياتكم

دمت ودمن وداموا جميعا طيبين

الشاعر الأديب أباذر المطر

تحايا بالكوم

Quote: إنشاء الله العديد من آيات الحياة

و عقبال عندك يا أباذر ..
بارك الله فيك و جعل البركة في ذريتك ..
تسلم

أستاذنا أبوجهينة ..

ربنا يحفظ آيه وأم آيه ..
ويجمعك بيهم على خير ..
جميلة دائماً حروفك ..

دم بخير ..

رئيس العصابة معتصم
حفظك المولى و سدد خطاك

شوف يا معتصم
حنديك فرصة في إجازتك المزمع القيام بها قريبا .. لو جيتنا بدون دبلة في إيدك اليمين .. حنضطر نستعمل المواثيق البوردابية و نعمل اللازم ..
الكلام ليك يا المدلدل إضنيك ( تمبس و شتات و ود الشيخ و دكين و من لف لفهم ) ..

شكرا على الدعوات الطيبات.

ربنا يحفظ ليكم آية ياأبو جهينة
ويديكم الصحة والعافية وتعيشوا وتشوفوا
آية أم ومربية...

الأخ العزيز بدري
تحايا و سلام و مودة

شكرا على المرور الجميل

Quote: وتعيشوا وتشوفوا آية أم ومربية...

آمين و عقبال ما تفرح بأولادك و ذريتك
تسلم

ابوجهينة
ربنا يحفظهم ، ويجعلهم صالحين ، ويديك العافية عشان تشوف جنا الجنا ، وأحفاد الأحفاد ... وتكتب لينا بهذا الجمال عن التجربة وعن المشاعر وعن الأمل ...

يا ريس ..
ربنا يحفظها ليكم ويجعلها آية على آية جماله..
لكن يا ريس والله تحيرو
انا جدي لحدي ما مات الله يرحمو كنت بقرا ليهو الجريدة انــا
وبشغل ليهو اشرطة المديح العصريات .. وخدر بشير في فترة المغربية
جدود الزمن الفات يا ريس ليهم الله..
اما جدود الزمن ده مع الوندوز اكس بي والسيرفس باك تو
عادي جدا ممكن تلقى فيهم الهكرز .. وتلقى فيهم اصحاب المواقع

الله يخلي آية ويخلي امها ويحفظهم ويتربو في عزك

عضو العصابة تمبس

Quote: جدود الزمن الفات يا ريس ليهم الله.. اما جدود الزمن ده مع الوندوز اكس بي والسيرفس باك تو عادي جدا ممكن تلقى فيهم الهكرز .. وتلقى فيهم اصحاب المواقع

ذكرتني بواحدة عجوز بتنق مع زوجها الأعجز منها :

كتر خيري أنا و الله .. لو ما دلكتي و كبيسي ليك كنت حسع تنش الضبان بي لسانك .

قريت في مجلة إنو الجد قاعد مع حفيدتو في مدرج كلية واحدة ..
تخيل يا علاء أنا ما متذكر جدي من أبوى و لا من أمي .. رغم أنهم عاشوا لغاية عمر التسعين .. رحمهم الله

شكرا على المداخلة الحلوة

أبو طلال
شكرا على الدعاء الطيب
و بما أنك على الدري سائر قريبا بحول الله فمن حسه أضبح ليك بوست حنيذ عن ملرحلة ما قبل الجدودية
تسلمِ

اهلنا المصريين بيقولوا
أحلى من الولد ولد الولد
قريبي ابوجهينة
مسكاقمي
جدو
تشيل اولاد اولادهم
عافيلقو سلاملقو

الحبيب ابو جهينة

ما احلي من الجنا
علا جنا الجنا

ربنا يخليكم لي بعض

سي جي العزيز

و ربنا يوريك جنا جناك و تفرح بيهم كلهم و يديك العافية و الصحة

إبن عمي حمزاوي

تحايا و سلام

Quote: أحلى من الولد ولد الولد

و كمان أحلى من البنت بنت البنت
شكرا للدعوات الطيبات و عقبال عندكم

شقيقي الودود جلال داؤود
مليار التحايا ومبروكة آية

Quote: رجعوا من غربتنا دي و ما شافوا أولادهم إلا بعد ما دخلوا المدرسة

يخلوهو وحم يلقوهو يترسل للحم

Quote: إختزلت سلامي لسكان البيت .. سلمت عليهم بسرعة و أنا بفتش عليك ..

أنا طبعاً حصلت لي في ولادة الصغيرة (ربى) حينما حاولوا يضعهوها مع أكثر من طفل ويشوفوا هل أتعرف عليها أم لا؟؟؟ لكنني خزلت توقعاتهم وعرفتها بسرعة (رغم جمالها) ههههههه

معادلة
إذا كان بدر شقيق جلال وجلال جد آية
فما علاقة بدر بآية

العزيز

ابوجهينة


ربنا يحفظ آيـة ويخليها لوالديها,,,

آيــــــــة مــن الجمــــال

بالمناسبة يا ابوجهينة
آية من اجمـل واحـب الاسماء إلى قلـبي
فليحفظها الله ذخـــراً لكــم .. يا جـدها
وما بنديها للعزابة ديل .. تلقاهم قدموا ورقهم
وضربوا خمساس في سداس .. والله طريقة واسطة مافي
قلنا مافي .. قدحــها راجـيها


خالص ودي ومحبتي،،

العريس أب ريش وليد

مادام حجزتها .. إدفع بالتي هي أحسن مقدما نيابة عن المدفوع عنه ..

Quote: آية من اجمـل واحـب الاسماء إلى قلـبي

المعنى في بطن الشاعر ..
شكرا على الدعوات الطيبات ..

بــــدري

Quote: معادلة إذا كان بدر شقيق جلال وجلال جد آية فما علاقة بدر بآية

العلاقـة انو فولــه* وانقسمـت نصـفين ...

وآيـــــة النصـف الحلــو

هامـش،،

الفولــه ليس لها أدنى علاقة بفول على الحلاوي في بوسته ( صباح الفول .. عليك يا قدور)

الجميل ابو جهينه
الف مبروك لقدوم اية
دمت لهم ودامو لكم

عزيزي لإيهاب
لك الود

شكرا على المداخلة الأنيقة
دمت لنا
تسلم

صديقي اللذيذ جداً وليد399
سلام يحمل كلام مضمونو حبي

Quote: العلاقـة انو فولــه* وانقسمـت نصـفين ...

وأنا يا حبيبي دايما (بتفاول) بي كلامك الجميل دا
لك خالص حبي

شقيقي النبيل بدر الجميل

Quote: يخلوهو وحم يلقوهو يترسل للحم

هو في لحم ؟؟؟

Quote: معادلة إذا كان بدر شقيق جلال وجلال جد آية فما علاقة بدر بآية

علاقة جد ( ثاني ) بحفيدته الإسفيرية ..
عقبال عندك يا أبوالبدور تفرح بأولادك و زواجهم و تكون جد
أرقد عافية

العزيز ابوجهينه
اولا فليحفظ الله هذه الايه
ثانيا ما احيلى كلماتك هل تصدق احسست بمعانيها
رغم انني لا املك ولدا ولا ولد الولد
مما جعلنى اتشوق ان اعيش هذه المشاعر الفياضه
ابوكيفو

الأخ العزيز محمد آدم

تحايا و سلام و تقدير

Quote: هل تصدق احسست بمعانيها رغم انني لا املك ولدا ولا ولد الولد مما جعلنى اتشوق ان اعيش هذه المشاعر الفياضه

لا يحس بهذه المشاعر الإنسانية إلا إنسان مرهف مثلك يا محمد .. و دعواتي الصادقة لك بالذرية الصالحة و الزوجة الصالحة و التوفيق في حياتك ..
تسلم أبدا

عزيزى ابوجهبنة

الف مبروك قدوم الامورة الجمبلة أية
جعلها الله قرة عبن لكم .

خالص مودتى
أحمد داود

الأخ العزيز أحمد داود

تحياتي لك يا إبن عمي العزيز

شكرا على المداخلة البهية و الدعوات الطيبات ..
عقبال عندك يا أبوحميد و نشوفك جد .
عافاك الله
و دمتم

الخال العزيز " جدو " جلال

اول شي ربنا يخلي ليك ايه و امها و يخليك ليهم يا رب ..

تاني شي عذرا لعدم مقدرتي علي الرد في بوست حنين .. و ده بسبب مشاكل في الجهاز .. الف شكر علي تهنئتك الرقيقه .

افرحتني جدا هذه الكلمات و الإنطباعات .. الأطفال ديل اجمل حاجه في الدنيا .. و الله مع السهر و التعب لكن بسمتهم او نظرتهم ليك جوه عيونك تنسيك تعب السنين

Quote: و هو شعور مليء بالفرح .. مشوب بدفء غريب .. شعور أقل ما يوصف به هو أنك تنتمي إلى هذا الكون ببصماتك و بصمات أولادك تدبون على أديم الأرض تتنزل عليكم شآبيب رحمة الله يومياً بشتى الضروب .. كما هو شعور بأن جسدك قد نبتتْ له أوتاد تثبت أركانك كراسيات الجبال ، و تُلْقي في نفسك بإحساس أنك لن تميد إلى أي جهة .. و أن ظهرك مسنود بشيء محسوس و ملموس.

الله الله .. احساس رائع ...

Quote: و أغرورقتْ عيناى بدمع عصي ..و أنت تنظرين إلى لا شيء .. و أنا أقرأ فيهما الكثير و الكثير ...

شفت يا خال النظره دي حلوه كيف . ؟ ربنا يحفظها .

Quote: سؤال : ألا زلت إلى الآن ليلك نهار و نهارك ليل ؟؟

هههههه ... و الله قايله حنين براها حاميانا النوم يا خال الحل شنو ؟

ختاما لك تحباتي

بنت أختي العزيزة سكتاوية

شوقي كبير ..
أرجو أن تكوني و الأسرة بخير و خاصة حنين

Quote: و الله مع السهر و التعب لكن بسمتهم او نظرتهم ليك جوه عيونك تنسيك تعب السنين

إنت كدة إختصرت كلامي كلو في سطر واحد ..
ربنا يحفظكم ليها و يحفظها ليكم ..
تحياتي لزوجك و قبلة على جبين حنين

تحياتي

جدو.. أبو جهينة

لك التحية والود
وحفظك الله لهم وحفظهم لك..
وأسبل عليكم جميعا ثوب العافية

وتحية للأمورة آية

عزيزي عبدالله العقيد

تحية و سلام

شكرا على الدعوات الطيبات
عقبال عندك تفرح بأولادك و أحفادك .. آمين
شكرا و تسلم

ياحافظ ياحفيظ

ربنا يديك العافيه ياابوجهينه
ويديم عليكم الافراح يارب

زول ساكت
تحياتي لك و للأسرة الكريمة

شكرا على الدعوات الطيبات و عقبال عندكم
سلمت

العزيز / ابوجهينة

لك التحية


وربنا يحفظهاوعمر مديد انشاء الله


( سالم سليمايتاني بتاني تنقوقوني حضرجامي ارون )


ودمت ياعزيز

ود المايقوما
تحية و مودة و تقدير

Quote: سالم سليمايتاني بتاني تنقوقوني حضرجامي ارون

ترجمة لغير الناطقين بها :

تشوف جناها و إنت طيب و سالم

دعوة حميمة و جميلة يا إبن عمي العزيز .. شكرا كتير
و عقبال عندك إن شاء الله ..
دمتم

استاذي العزيز

لك الف مليون تحية
وهنيئا والف مبروك بقدوم الحفيدة
وعقبال ما تفرح بيها باذن الله
وربنا يديك الصحة والعمر المديد
وارقد عافية كما تقول
تحياتي ،،،
خالد

جدو


بآية فال عدت يا جدو


وان شاء الله تكبر...في عزكم وعز والديها....وتفرح بيها
يا جلال...في كل لحظات حياتها...الغضة النضره..

Quote: سالم سليمايتاني بتاني تنقوقوني حضرجامي ارون )

يا سلام....

سمره زوق انقي... سمره اكّا اللون

كير مس كيسا سوكا
ماس كيسّي

كيرا سوكا

اكا قونجا مس كيسّي


تعيش في عزكم تاني يا ابو جهينه....عجبني الكلام الفوق دا لقيتو
بنفع بداية غنا...بالرطانه...


قلت أرطن

اسيب خطواتي

لي زولا...

سمح زيك...

وبراي شاكّي في ان الرطانتين هنا مختلفات...وفي ظني اني خلطت دنقلاوي علي
محسي...

عزيزي و صديقي نزار حسين
تحايا و سلام

Quote: تعيش في عزكم تاني يا ابو جهينه....

و يدوم عزك يا نزار

Quote: يا سلام.... سمره زوق انقي... سمره اكّا اللون كير مس كيسا سوكا ماس كيسّي كيرا سوكا اكا قونجا مس كيسّي عجبني الكلام الفوق دا لقيتو بنفع بداية غنا...بالرطانه... قلت أرطن اسيب خطواتي لي زولا... سمح زيك... وبراي شاكّي في ان الرطانتين هنا مختلفات...وفي ظني اني خلطت دنقلاوي علي محسي...

كلام سمح جدا .. و أجمل حاجة فيهو إنو خليط بين اللغتين ..

أشكرك كثيرا على المداخلة البهية و الأنيقة .. و عقبال ما تفرح بأولادك و أحفادك ..
دمتم

الإبن العزيز خالد جمال
لك التحايا النواضر و المحبة و المودة
شكرا على الدعوات الصادقة ..
و ربنا يفرحك دائما و عقبال تفرح بأولادك و تشوف جنا جناهم .. آمين
تحياتي للأهل و من معك
أرقد عافية

مشاعر مشاعر.. يا "أبو آية"!.

البرنس الأمير عبدالحميد

أدعو لك صادقاً بأن تهنأ دوما بمثل هذه المشاعر الفياضة .. و حتماً سنهنأ يوما بقراءة جميلة منك عندما تصب في نفس المجرى ..
شكرا على المرور الذي أسعدني

والله يا ابو جهينة كلامك دا
ما تعمل بيهو ليلة ثقافية للعزابة
امكن يحسوا شوية .. !

حميدة
سلام ماكن

Quote: ليلة ثقافية للعزابة امكن يحسوا شوية .. !

ما ظنيت يا حميدة ...
لأنو مرت عليهم ليالي (أثقف) من ليلة ثقافية عادية .. و لكنهم سادين دي من طين و ديك برضو من طين .. لأنهم ما عندهم عجين العزابة المدمنين على العزوبية ديل ..

يمكن جنس كلامي دة شوية يؤثر على روحهم المعدنية