من أم عطية إلى بكري أبو بكر و عموم ناس البورد

كما قلت من قبل ، فإن أم عطية تعلم بأنني أحكي قفشاتها و حكاويها لأصدقائي ، و لكنها لا تعلم بأنني أنقلها عبر شيء إسمه البورد
أحد الظرفاء قام بخبث مقصود بعمل فتنة بيني و بينها و شرح لها بأنني أكتب عنها في شيء أشبه بالصحف و أن أخبارها ملأت الدنيا و أنها أصبحت مشهورة
ما أن إنفتح الباب حتى وجدتها أمامي متحفزة و السفة الماكنة مستقرة على جنب
يا جنا إنت ما قلت لى بتتكلم عني مع أصحابك بس ؟ الجرايد كمان شنو ؟
قلت لها و أنا أحاول أن أعانقها و هي تتملص لتعرف إجابتي
أصحابي بقوا كتار يا حجة ، كتار زى الناس البيقروا جرايد
دي ياتو جريدة يا جنا البتكتب فيها؟ أوعك تكون الجريدة الكتبوا فيها موت ناس حلتنا الغرقتْ بيهم المركب سنة ما جانا الأزهري ؟
لا يا حاجة ، دي جريدة شكل تاني ، صاحبها إسمو بكري أبو بكر و بيقروها في شاشة كدي زى حقة التلفزيون. شفتي كمبيوتر عادل ولد عطية المنشغل بيهو كل يوم ؟ أها زيو
قالت و هي متحفزة : و صاحب الشي دة بنعرفو ؟ أظنو جعلي ، الجعليين بيحبو إسم بكري دة. زى ناس الجزيرة ، الما بتعرف إسمو قول ليهو يا الصديق ، تلقاهو طوالي رد عليك
قلت لها : بكري دة قاعد في أمريكا. أها و الناس كلها ملمومة عندو ، و نحن بنسميهو حوش بكري ، لأنو لامي الناس كلها ، من الشرق و الغرب و الجنوب و المسلم و المسيحي. يعني بكري دة عامل حاجة كدة زى ديوان العمدة زمان ، الناس فيهو ملمومين يتونسوا و يحلوا مشاكلهم
قالت و عيناها تلمعان و كأنها وجدت شيئا ضائعا :
يعني مشكلتي حسع بكري دة الفي أمريكا ممكن يحلها لينا ؟
قلت و أنا أحاول أن أداري ضحكتي : إنت عندك مشكلة ؟
قالت و قد إرتفعت و تيرة صوتها و بحدة و غضب : الراجل القصيروني داك أبو صاحبكم ، أنا قبال دة ما قلت ليهو تاني ما يجي يسلم علي ؟ لسع النص متر قاعد يداغل و يجي يسلم علي ناس البيت ، و أنا ما بمرق أسلم عليهو ، مما أسمع صوتو بقعد بطن أوضتي، لاكين هو بي طول حسو يقول يا ناس جوة سلام. أها ناس جوة ديل ياني أنا ، بيقصدني أنا الغتيت دة. الزول دة جاب لي العصبي و داير يتور علي الظيران. حسع لو في طريقة أدني بكري دة أكلمو ، لأنو إنت و عطية ما دايرين تتحرجوا معاهو عشان ولدو صاحبكم
حاولت أن أشرح لها ، فقالت بعصبية و إنفعال : أدني بكري دة صاحب الحوش ، لو هو ما حلاني من اللصقة دة و الله أسافر البلد و ما تشوفو وشي تاني. بسيب ليهو البلد. داير مني شنو الراجل الشايب دة ؟
إستغرقت وقتا طويلا و أنا أهديء من ثورتها و إنفعالها
أم عطية ، لسبب ما ، لا تحب هذا الرجل و تتضايق من إهتمامه الزائد بها ، و هو رجل طيب و حنون و يهتم بكل معارفه، و رغم أنه يعرف هذا الشعور فيها ، إلا أنه لسبب أو آخر يصر على زيارة بيت عطية ، ربما لا يعرف تماما، أو ربما يؤمل أن تغير رأيها و يستمتع بونستها مثلنا.
جلست أشرح لأم عطية بطريقة مبسطة حوش بكري حتى أمتص غضبها ، و أشرح لها المواضيع التي يتحدث فيها الناس ، و الإختلاف و الزعل و المصالحة و الحرد و العودة و الإعتذار ، و بعد شرح طويل و بإسهاب إقتضته ضرورة التعامل مع عقلية أم عطية ، قالت ببساطة :
بري بري من صاحب الحوش دة ، بالو سلبة و صبرو صبر أيوب زى طه الجرافي
قلت لها ، منو طه الجرافي دة ؟
قالت : طه الجرافي دة من كترة ما بالو سلبة و صبور، قالوا مرة المركب غرست بيهو نص البحر في رملة ، و الدنيا صيف، و الوكت كان وكت قيالة ، الشياطين ما بمرقو فيهو ، عشان ما يهجر الناس في الهجير داك و يمرقو المركب و يقطع عليهم قيالتم ، قعد لغاية العصر في المركب لغاية ما الناس المرقو لي حش القش شافوه و مرقوه. جاهم غمران من الحر. دحين بكري دة و الله دة ما زمنو ، لأنو الزمن دة الناس كلها معصبة و جاهزة للشكل و ما عندها صبر و طايرين بالريش الدقاق
دخلت أم عطية غرفتها ، ثم عادت و هي تقضم الإسنكرز عشقها الأزلي ، و قالت و هي تناولني أصبعا من الشوكولاتة :
و الله يا جنا بكري دة أجرو عند الله. أها الحوش حقو دة ملك ولا إيجار ؟
ثم قالت و هي تقرطع الماء من كوز ألمونيوم ، فهي لا تشرب أبدا من كأس زجاجية أو بلاستيكية ، تقول أن هذه الأشياء تذكرها بالمستشفى :
سلم لى على بكري دة الفي أمريكا ، و قول ليهو أم عطية بتسلم عليك ، و قالت ليك يا العمدة ، عموم أهل السودان فيهم خصلة أنا عارفاها كويس و جدودك و كبارك عارفنها كويس ، تلقى دة من قبيلة و داك من قبيلة ، و كت تجيهم عصبية القبيلة الشينة ديك ، الواحد ينقز لافوق و يسل سكينو و يتلافى عكازو ، و العيون تبقى حمرا و و شرارة ، لاكين وكت الحارة يا حشاى ، أسمح من منظر السوداني يقالد السوداني مافي ، و الله المنظر دة في التلفزيون دة مالاقاني ، مش زى سلام ناس البلد دي ، بري بري يا جنا ، الرجال قداديمم مادنها طول اليوم يبوسوا في بعض بي هنا و بي هناك ؟ أتقول فاقدين حنان ، أها شفت كيف وكت السوداني يقالد السوداني و يطبطب ليهو فوق كتفو ؟ و الله الزعلة لو كانت بي سبب رقبة ، تروح الزعلة و تنتهي. أها و قول لي ود أبوبكر دة ، مادام روحو سلبة كدي و مستحمل العكات اليوماتي دي ، اليرسل لي واحد يشوف لى الراجل القصير دة و يقطع رجلو من هني. و قول لي بكري ، الأولاد ديل القاعدين في أمريكا ديل ، يخلوا بالم كويس من أولاد و بنات الحرام ، الدنيا ما متل زمان. و قول ليهو في الختام أرقد عافية إنت و أهلك ، و بس

ثم قامت بهدوء لتتخلص من سفتها التي تزحلقت حتى طرف فمها من كثرة الكلام
قلت لها : خلاص ، مسامحاني عشان بكتب عنك ؟
قالت و هي تضحك ضحكتها المبحوحة : مسامحاك ، بس ما تخت شمارات من عندك علي كلامي
قلت لها : إن شاء الله دعيتيلنا في العمرة ؟
قالت : دعيت ليك و الله يا حشاى ، و دعيت ربنا يوفق حكامنا و يخلوا السودان بلد رايق ما فيهو مشاكل و الناس تبقى مبسوطة
بس يا حاجة الناس مختلفة و البلد ماشة في طريق الله يعلم بيهو
قالت : التوفيق من عند رب العالمين ، أهم شي الناس تخلص النية و النيات تبقى صافية. سودانا دة الخير الفيهو يكفينا و مدفق لاغادي
يحكي حفيدها الذي رافقها للعمرة ، أنها رأت موريتانية في سوق مكة ترتدي ثوبا بطريقة سودانية و ملامحها سودانية ، فهرعت إليها أم عطية و عانقتها و إنهالت عليها بالتحايا السودانية بسيل لا ينقطع من الأسئلة : كيفنك ؟ الجيتي منهن ؟ لعلك طيبة ؟ عمرة مقبولة ؟ جيتي بالبحر و لا بالطيارة ؟ خريفكم قالو زينة ساكت السنة دي
و المسكينة مذعورة تتململ و لا تستطيع الفكاك من قبضة أم عطية ، و عندما إنتهت أم عطية من سلامها المكثف ، برطمت الموريتانية بلهجتها التي لم تفهمها أم عطية ، فقالت أم عطية : سجمي إنتي ما بتعرفي عربي ؟ إنت من وين يا بنيتي؟
فقال حفيدها : حبوبة دي موريتانية
قالت و هي محرجة : القبيلة دي ساكنة وين في السودان يا جنا ؟ غرب ولا شرق ولا شمالية ؟ بري من السودان دة ، قبايلو ما عندها حد ، في قبايل لسع ما عرفناها لي حسع ، اليعيش ياما يشوف
يحكي حفيدها ، أنها رأت سودانيا يلبس عراقيا و سروالا طويلا و طاقية و يجلس على الرصيف ، فإقتربت منه و قالت له : يا جنا إنت قايل روحك في حواشة أبوك ؟ وكت ما جاي عمرة ، ليش ما لبست ليك جلابية و لفيت ليك عمة متل رجالنا المحترمين ؟
يقول حفيدها ، حاولت أن أشدها من يدها ، و هي تسترسل في إنتقاد الرجل ، فوقف الرجل و قال لها و وجهه محمر من شدة الغضب : يا حاجة إحترمي نفسك و روحي من قدامي
أنا أحترم نفسي يا المبهدل ؟ دة منظر واحد قاعد برة بلدو ؟ و وين ؟ في مكة ؟ كمان زهجان ؟
فإلتف السودانيون حولهم ، و حاولوا تهدئة أم عطية ، فقالت و حفيدها يشدها من يدها : بالله العراقي ما عندو لون من شدة الوسخ ، يقولوا علينا شنو الناس ؟
يا حبوبة ، نحن مالنا و مالو ؟
كيفن نحن مالنا و مالو ؟ مادام سوداني ، اليبقى سوداني

الأخ ابوجهينة
اسمح لى اقول ليك انه مدخلك(الأبروتش يعنى) بتاعك على الخالة ام عطية كان غلط.كان ممكن تقول ليها انتى حتبقى زى شريهان او ليلى علوى او بالميت كدة زى جواهر
بعد داك شوف النتيجة وايدك على الحلاوة

قلقو الحبيب
تحياتي
شريهان و ليلى علوي حتة واحدة ؟ يمكن يا قلقو تقوم تطالبني بحقوق النشر و بعدين أبقى في اليحلني منها.
تسلم

الاخ ابو جهينة
سلام تاني لام عطية القعدة جوه
لكن بالغ الراجل ذاتو يعني هي ما عاوزة تديهو وجهة نظر
وهو يصر اصرارا ويلح الحاحا
تسلم ام عطية الغير عادية

بنتنا العزيزة مايا
تحياتي لك و للأسرة
بالفعل ، هي إذا لفَتْ رقبتها ، تاني ما ممكن زول يعدلها ، و ما بينفع معاها لا يلح و لا يصر
تسلمي مايا

ام عطية تلك الشحصية الفريدة الجميلة
تذكرني بجارتنا الحلفاوية التي تسمى فاطمة وينادوها حسب طريقة الحلفاويين ( ابا) فذهبت لناس اللجان الشعبية لاثبات حقها في امتلاك قطعة ارض باعتبارها ارملة فلما رفضوا قالت ليهم بكل عفوية الناس الكبار : انتوا كيف ترفضوا تدوني قطعة ارض انا اذا كان اسمي مذكور في القران ، فدهش الكيزان اهل الجنة الشعبية لهذا الكلام الخطير ، كيف يا حجة ووين؟ فالت ليهنم مش ربنا سبحانه وتعالى قال : وفاكهة وابا
تسلم ابا وام عطية

مايا العزيزة
بسرعة أديني عنوان الحاجة دي. يمكن نطلع منها ببوستات جديدة تشابه بوستات أم عطية .
بالمناسبة ، هناك الكثيرات من أمثال أم عطية في كل مناطق السودان ، و ها هي الحاجة أبا كمثال آخر.
تسلمي مايا

عمنا العزيز ابوجهينة
يا ريت والله لو عندي عنوانها بس هي في السودان
وزي ما قلت عندنا ثروة تتركز في هؤلاء النساء الحكيمات وما اجمل الحديث معهم
وتحياتي لهم مرة اخرى

التحية لك يا مايا
و تسلمي للطلات الجميلة. و يا ريت كل واحد عندو كبير زى أم عطية و أبا يسرد لينا حكمهم و قفشاتهم
تسلمي

يا سلام عليك
وعلى ام عطية كلن يشغلوها فى مطار الخرطوم
عشان تتكلم مع الناس المبهدلة
والله كلامها مع الراجل صاح
الله يديها العافية
بالله اديها سلام منى خاص
ودامت لنا ام عطية

دكتورة بيان
السلام الوف
مش مطار الخرطوم و بس ، لو شفتي الباخرة في ميناء عثمان دقنة ، حاجة ما بقدر أوصفها ليك بالظبط. يعني أم عطية معاها حق فهي إذا شافت شي ما بتقدر تسكت ، و أظنها لو سكتت بتطرشق
تسلمي دكتورتنا