خروف و جردلين و كانون

الخروف ما إنفك يطلق صرخاته ( صرخات غير معروفة السبب ، أهي إحتجاج على التضحية به ، أم إستغراب لإنتقاله لمكان غير زريبته المعهودة و فراقه لأحبابه من الخراف و الكباش ).

أطفال البيت يدخلون و يمرقون و هم ( يتاوقون ) و يقدمون له أعواد البرسيم
أطفال الجيران ، في مقارنة بين خرفان الأضاحي :
خروفنا أكبر
خروفكم ما عندو قرون و صوفو منتَف
خروفنا من أمبارح أبى ياكل ، بس بيشرب موية و يكورك.

و هو الخروف المدلل ، الذي تربي و ترعرع و تضخم ذيله بفعل ( مشق المريسة ) ، و ينام ( منعنشا ) بعد كل وجبة قرير العين هانيها ، و لكن هاهو يأكل البرسيم.

جردل المخلل ، متروس بالعجور و الباذنجان و الليمون و البنجر و الفلفل الأخضر ، يهمس معلنا نضوجه.
الأم تدخل و تأخذ حبة عجور و تخرج ، و لعابها يسيل و في خاطرها أم فت فت و الكمونية و الشية و الربيت.
الأب يدخل و يغرف قطعة من الباذنجان و يخرج ، و في خاطره الشربوت الذي ضج المطبخ برائحته النفاذة ( فهو قد زاد عمدا كمية من خميرة البيرة كى ينعم بتعسيلة بعد أن يلتهم الكبدة النية ).
البنت تأخذ حبة و تخرج.
و الولد يأخذ حبة و يخرج .
حتى النملة ، أخذت لحسة من السائل على طرف الجردل و خرجت ، و حدثتْ إخواتها.
فدخلت نملة تلو النملة
و خرجت النملة تلو النملة في خط مستقيم و بنظام و بهدوء في إنتظار الغد الذي سيأتي بالخير العميم.
و القطة تموء تستعجل فتات اللحم و العظم ، و تراقب جدران البيت حتى لا يتسلل قط آخر و يفسد عليه العيد بمشاركته في ( كد ) العظم.
( المبْرَد ) و ين يا أولاد ؟ الساطور الكبير أمشوا جيبوه من عند ناس عمك علي ، من يوم الكرامة حقتهم ما رجعوه.
أبوى الخروف قطع الحبل.

نفيسة ، ما تنسي بكرة ناس كلتوم ديل ، السنة دي حزنانين بموت أبوهم ، أول حاجة بكرة قبال نضبح نمشي ليهم ، و ما تنسي الكوم حقهم.

سلام يا ناس البيت ،، حاجة نفيسة ،، القابلة في عرفات.
جمعا يا الرضية
أنا ماشة السوق أجيب البهارات و البصل.
أصبري ، بمشي معاكي . يا الحاج كدي أدني قروش.
إنتي مش أمبارح أخدتي قروش ، و ديتيها وين ؟
أجي يا الحاج ، مش قلت ليك أديت الدلالية باقي قروش الملايات ، و إشتريت جزمة للبت ، و إشتريت جركانة زيت ؟
الحبوبة تحمل المبخرة و تجوب البيت ، تنشر دخان بخور التيمان و هي تتمتم بأدعية و أوراد ، و أصغر الأولاد يتشبث بطرف ثوبها و هو يمص إصبعه فهو يخاف الخروف و لا يجرؤ على الإقتراب منه.

الخرفان تطلق صيحاتها طوال الليل و كأنها تودع عالمها
تباشير العيد السعيد ( الله أكبر ،، الله أكبر ،، لا إله إلا الله ، إن الحمد و النعمة لك و الملك ،، لبيك اللهم لبيك )
دعاء التلبية السرمدي ، منذ أن وضع إبراهيم الخليل عليه السلام لبنة البيت العتيق و إلى يوم يبعثون.
و ينتشر الجزارون ، السكاكين في ( ضراعاتم ) نافرة لي ورا من أكمام العراريق ، و في الأيدي شوالات فارغة ، لزوم الجلود و النيفة ( رؤؤس الخرفان ) .
و تتصاعد وتيرة السواطير و هي تهوي على العظام
أمسك كويس يا جنا ، أوع السكينة تلحس أصبعك
الحبوبة توصيهم بأن لا ينسوا لحمة الربيت ( و خيره ما جاور الشحم )
و يطقطق الفحم مصطليا النار ، و يتطاير الشرر من الكوانين و المناقد
و تخرج الحلل الكبيرة من ( فوق رؤؤس الدواليب ) و من المخزن
و تدمع أعين البنات من تقشير البصل و تقطيعه
و ينطلق صوت الفندق و يد الفندق في تناغم إيقاعي محبب إلى النفس
و تتصاعد رائحة الشواء
و رويدا رويدا ، تهدأ الضجة في البيوت
فذاك قد عمل الشربوت في رأسه العمايل
و تلك متخمة بالمرارة و أم فت فت.
و ذاك قد فعل ثوم المخلل به ما فعل

الكل في تعسيلة قبل أن يبدأ تبادل أجمل جملة :

( القابلة على أمانيكم ).

يا سلام يا ابو جهينة
اذا ما اخاف الكذب لقت اني شممت رائحة شواء لحم ولسعة الشربوت علي اللسان
جد زي الضحينا معاهم في السودان
تسلم ويسلم قلمك
ويسلم خيالك
والقابلة عندك ان شاء الله
والعيد مبارك علينا وعليك

يا ابا جهينة يا ابن بلادي
عيدك سعيد
كل سنة وانت طيب
يا حليل ايام زمان وكوم ناس حجة نفيسه
والله شوقتنا للشربوت وما ادراك ما الشربوت وتوابعه
أبدعت ولا تعليق لنا يا ابن بلادي
وغدا نلتقي

أساسي الحبيب
القابلة على أمانيك ، و ربنا يحققها كلها و يحفظك ذخرا
تسلم أخي العزيز

حمزاوي الحبيب
كل سنة و إنت طيب
إنت معزوم معانا في الدمام
زوج شقيقتي قال عامل شربوت بالبرميل و مكتر الخميرة
شربوت بالبلح البركاوي وارد ( البركل )

يا ابا جهينة
جلال سيد الجلال

طبعا أخوك نباتى ومافى اى علاقة بينه وبين اللحوم

لكن الواحد من السيناريو "الشهى" للغاية الحكيته انت هنا، عربدت بيهو هاجسات الشوق للمة والحبان وكل الطقوس العجيبة الجميلة هناك

مالك علينا بالله يا جلال، يا داب بدينا ننسنا

لكن شكلها كده بايظة بايظة

والعيد مبارك عليكم كلكم

أبوذر

أباذر
المطر النازل في زخات حنينة تصابح الوشيش و تقالد القليب
أباذر أيها الفارس النبيل
و الله و بكل صدق ، كتبتها و في خاطري ( أمي رحمها الله ) و كأنني أسمع حوارها مع أبي ( رحمه الله ليلة العيد
و كأنني أسمع خروف العيد و صوت السكاكين و هي تُشحذ
و عشرات الصور التي تكوِن بانوراما ليلة العيد ، و بانوراما يوم العيد

القابلة على أمانيك أبا ذر أنت و الأسرة الكريمة و كل من يعز عليك
أرقد عافية

يازول جوعـتنى جــــــوعة شـكلى حأقوم أضبـح اللـيلة

عارفك عزابي اليومين ديل و ممكن تعملها يا ساطور.
على كل حال لو ناوي قول لي من بدري عشان أجيك أنا و حمزاوي و حبيب بلدو و معانا ( شربوت و تونيك ).

أبوجهينة..
كل سنة وانت طيب..
ويا أبا جهينة حرام عليك (عوقتنا يا أخي)...
ومن الطقوس ما قتل..ويشكو منزلي قلة النمل..
لا شربوت لا أم فتفت لا كمونية..والشكية لبيدن قوية..
وحتي خرافنا هنا ما بتقول باع.تصدر صوت ما بين الغنمي والبقري.مضقلمة وما عندها ضنب
مليانة صوف يغريك المنظر وما تحت الثياب لا يسر الخاطر ولا الأسنان
طعم اللحم (تفل) وشية الجمر جو البيت بتجيب المطافي..
الله يدك العافية و(إيد مبارك ألينا أليكم)..

ابوجهينة انت زول حلو شديد(وانا بريدك اشدة)
سبحان الله قبل ما ادخل الليلةالبورد كنت انت معلق فى راسى (لى انا ماعارف) ...واول مافتحت البورد لقيتك فى وشى بكل الجهات

كلامك عن الخروف(وكل عيد ضحية) بذكرنى دائماً بعمى صلاح(الوقت داك انا كنت لسه صبى)..مشى اشترى لينا الخروف لعيد الضحية..بعدين الخروف سمح ومدقلب (يعجبك)..قمت قلت ليه الخروف دا سمح شديد..قام قالى , آآى ديل ماخرفان الكمبو (الكمبو حى معروف عندنا بصناعة الخمور البلدية) سمان ورخاص...قلت ليه سألت الناس الاشتريت منهم الخروف كانو بأكلوهو شنو؟؟..قال لى( لِى..لماذا)...قلت ليه ناس الكمبو ديل قاعدين يعملو المريسة وبكونو مأكلين الخروف دا مُشُك ,عشان كدا شحمان والخروف دا معناها ماكل حرام ولايجوز ان نضحى بيهو...قال لى انا مالى بسألهم عن اكله .. المهم لقيت لى خروف سمح وشحمان ورخيص.
قام ضحك وقال لى انت ماتحكها شديد .. انت ما سمعت الرسول(ص) قال : لاتسألوا عن اشياء إن تبدو لكم تسؤكم.

المهندس الفنان خالد الحاج
القابلة على أمانيك كلها محققة بإذن واحد أحد

و الله ضحكت ضحك شديد من وصفك لخرفانكم التي أعرفها ، و التي ذبحنا إحداها في لندن في مزرعة خارج لندن ( مزرعة خيول ) ، فإجتمع علينا الخواجات ينظرون إلينا بهلع و نحن ننتزع الكبدة و نأكلها بالشطة و الليمون.
لا تخف خالد ، سنذكرك عند كل كدة عضمة ، و عند كل تقطيع لشريحة شية
أرقد عافية

أخي العزيز و صديقي الصدوق و أخي الفاضل
عثمان حمد

القابلة على أمانيك محققة و كل سنة و إنت و الأسرة الكريمة بألف خير و عافية.
و الله يا عثمان القلوب شواهد.و ربنا يديم الخوة.
و بمناسبة الخرفان ( تربية مشك المريسة ) ، غايتو نحن في عطبرة خروف العيد كان بيجينا مليان شحم من ستات الإندايات ، بالله الشحم يملا صفيحة كاملة و الربيت داك أسكت خليهو. ربنا يقبل.

تحياتي عثمان و أرقد عافية

استاذنا العزيز ابوجهينة
كل سنة والجميع بالف خير

تفوح من هذا البوست رائحة الشواء المتلئة بابداعك في وصف تلك التفاصيل الجميلة

تسلم استاذنا وكتروا من الدكوة للمرارة
لك تحياتي

مايا
كل سنة و إنت و الوالدين و الأهل بألف خير
كنت قد راهنت على حضورك لمشاركتنا خروف هذه السنة بدكوته و شطته ، و لكن تأتي ( التأشيرات ) بما لا ( تشتهي مايا )
أرقدي عافية

أخي أبو جهينة
كل سنة وانت طيب
أنت توصف ويعجبني وصفك وأعيد قراءتك مرات عديدة ، إلا هذه المرة ،
أبو جهينة نحن في هذه الشقق الضيقة لا نعرف أين نربط الخروف ناهيك عن أن نأتيه بالبرسيم وطشت الماء، ونجعل أولادنا يغازلونه ،، أنا شايل الهم متى أشتري الخروف ، وأين أضعه ، وأين أجد الجزار و الحلال ،،
مشكلة يا أبوجهينة ،، كلامك ده هناك ، ولكن هنا لا .

ود قاسم
كل سنة و إنت و أم طلال و الأولاد و البنيات بخير و عافية

أها : حليت ليك مشكلة الخروف ،، جيبوه هنا عندي ،، في حوش كبير حدادي مدادي ترتع فيه عدة خراف ( نعيمية ) ، و يوم العيد تعال أضبح خروفك هنا و بالمرة كمان نضوق مرارتكم ،، برجاك شايل صحني فيهو الليمون و البصل و الشطة و الملح و الدكوة.
البرسيم و الموية علينا.
طبعا قبال تجيبو ، لو ولدك قاسم عاوز يديه كليقة كليقتين برسيم ، مافي مانع ، و يسمع لو ( باع ) ولا ( باعين ) و يتغزل فيهو شويه مافي مانع.
بس أسرع عشان يمكن الحوش يتملي.

عليك الله يابوجهينة مع كل لقمة شية وللا مرارة وللاجغمة شربوت اكل واشرب لى معاك...باقى انا عيد الضحية دا عندى ذى الحلم حلم..بسمع بيهو هنا بس فى البورد..لا خروف لا برسيمو لا شربوت (الصلاة فى تلتلة)

العزيز أبو جهينة و(أخواتها)..
كل عام وانتم بخير.. والقابلة على أمانيكم بإذن الله..
طبعا هسع لو قلت ليك انا عيد الضحية ده بزعل كيف.. حتقول على زولة "حنكوشة" ساكت.. لكن بأمانة انا بحن على الخرفان..
لما كنا صغار كنا بنصاحب الخروف مدة اليومين ولا التلاتة يوم البيكون مشرفنا فيهم.. وطبعا يصعب علينا اكل "صاحبنا" ولا رأيك شنو..؟
تانيا لما كبرنا.. ما تتخيل صوت الخرفان يوم الوقفة "بيحنني" كيف.. ذنبها شنو..؟
وأتساءل: لماذا لا يضحي الانسان بـ "أسد" مثلا..؟
هسع عارفة حيجوا طايرين ناس الكتاب والسنة ويفحموني ردود.. لكن لسة السؤال مطروح..
حتقول لي: طيب انتي ما بتاكلي لحم..؟
اجابتي: ايوه.. وجربت عدة مرات ان اكون "نباتية" عارف محمد أخوي قال لي شنو لما قلت انا عايزة آكل بس رغيف وزيت وملح..؟
قال لي: طيب الرغيف ده ما قمح دقووووه شديد، ونجضووووه في النار.. والزيت ده ما عصروووه..
لقيت الحكاية خسرانة خسرانة..
لكن برضو بيصعبوا علي الخرفان..
الحل شنو..؟

سلامات يابت يارجاء وكلام كتير سمح

اسى يارجاء لوكنا بنضحى باسد ذى ماقلتى....كان ح تقولى برضو(وآآآى ياخوانى والله صوت الاسود دا يوم الوقفة بحننى)وكان ح تسألى اسى الزول لوكان بضحى بخروف مالو!!

أخوى العزيز عثمان حمد
كل سنة و إنت طيب

قلت لي الصلاة في تلتلة. ؟ كان كدة برضو مع كل ركعة في صلاة العيد حأدعو ليك معاى , زى مع كل حتة شية و جغمة شربوت حأقول ( و دي عشان حبيبنا عثمان.
تسلم عثمان ، و القابلة على أمانيك

أختي الحبيبة رجاء العباسي
كل سنة و أنت طيبة مع الأهل و الأخوان و الأخوات
و سلام كبير أوي أوي للحاجة الوالدة

أما عن ذبح الخروف في العيد ، طبعا أنا عارفك ( حنينة ) و قلبك ( رهيفوني )
و لو ذبحنا أسد ما أظن حتحني عليه ، لأنو صوتو ( نشاز ) ما زى الخروف يقطع نياط القلب
المهم ، أدي الله و أدي حكمتو ، أمر سيدنا إبراهيم و هو نفذ مشيئة الله.
دي ذكرتني بي نسيبنا من ( أهل العوض )
أول مرة يجي العمرة و أدوه موية زمزم و لم تكن باردة
أخد ليهو جغمة و قال : دي موية شنو ؟
قالوا ليه موية زمزم
قال : ما نقدر نقول شي

دحين إنتي كمان أكلي اللحمة و ما تقولي شي ، و إنت بتاكلي اللحمة إتذكري الخروف لما نطح ليهو زول ، ولا لما أكل طرف الملاية ولا الجريدة اللي لسع ما قريتيها.

العزيز عثمان حمد..
سلام وكل عام وانت بألف خير..
والله الأسد ما أظن "يحنني" قدر الخروف السغنتوتي الشايفاهو عيني ده..
لكن نقول شنو.. حكم القوي..

الغالي أبو جهينة..
كل عام وانتم بخير..

Quote: دي ذكرتني بي نسيبنا من ( أهل العوض ) أول مرة يجي العمرة و أدوه موية زمزم و لم تكن باردة أخد ليهو جغمة و قال : دي موية شنو ؟ قالوا ليه موية زمزم قال : ما نقدر نقول شي

ما هو ده زاتو المسكتنا ..

ابو جهينة
بس وصف لى البيت بوين لانو كمان شربوت
كل سنة وانته طيب اعاده الله علينا بنحقيق الامانى
كل عام وانتم بخير

ابو جهينة ابو الولف ذاتو..


الشغلة الفيها شربوت دي ما بتمرق مني ابدا

اخوك انا يا بو جهينة رتجي منك وصف للبيت وبجيك طاير بعد 2
مواعيد سودانيين

ياخي شهيتنا الحلة الله يغفر ليك بس

بلدي يا حبوب
كل سنة و إنت طيب و القابلة على أمانيك

في الرياض الوصف ساهل

و عشان ما تضيع هاك جوالي :
059940015
أرقد عافية

دكين الحبيب
كل سنة و إنت طيب

تعال في أي وكت ، المهم تجينا و حبابك ألف و الشربوت بالبرميل
جوالي في الرد أعلاه لبلدي يا حبوب
تسلم

العزيز ابو جهينة كل سنه انت والجميع طيبين ونحن بي حلال ميت مضحين
وكل بوست ليكم يزيد الحنين فلا تكثروا من اكل السواكني فهي من الخراف المصابه بداء المجانين

عزيزي أبو معاوية
كل سنة و إنتو طيبين و بألف خير

و الله الرياض فاقداك جد كدة.
ربنا يرد الغربة للوطن العزيز.
تحياتي لبنت الخال و العيال

يا أبو جهينة ما قلنا ما في داعي للحندكة
في رمضان ناس سودانيزأونلاين حندكونا بالعصيدة و ملاح النعيمية
و انت حسه جيت تحندكنا(و لو أنك عامل ما قاصد) بالحاجات المجنونة دي
و بعدين دوقت الناس دي كلها من جردل المخلل، الداخل و المارق يكوضم الا احنا
على العموم ، ربنا يسامحك و كله سنه و انت طيب و بكامل الصحة و تمام السعادة

أها قبل ما أنسي عمك حسبو (حسه اتنكر و غير اسمو) و ود الجعلي هم الحندكونا بالعصيدة الحارة و ملاح النعيمية في عز صقيع رمضان، الكلام ده صاح منهم يا أبوجهينة؟

الأخت العزيزة الفاضلة ندى أمين
كل سنة و إنت طيبة و بألف خير
مطولة الغيبات ، عل المانع خير
أنا غايتو مستعد أشحن ليك برطمان كامل مخلل ، عندنا جردل ماكن. أما الشربوت فهو بالبرميل الحجم السوبر عائلي ، برضو برسل ليك كمية ، بس ما يقوموا يفتكروا الشربوت دة سلاح كيماوي و نبقى في
تلتلة.
المهم بعد دة لو عاوزة أي شي قولي لينا و مستعدين.
أرقدي عافية

الوجيهه ندى انتى شفتى حندكه هو بعدين انتو فى فرجينيا بالله ما بضحو والله نحنا هنا ما حصل بنفوت ضحيه والذ حاجه بنمشى قروب نضبح واخوك طبعا اهل عوض علمونا
الضبيحه من المتوسطه اها تسعين فى الميه من الناس المعانا
حناكيش بس كل الواحد ما يستلم خروفو يقوم يجدع المراره
اها انا ومعاى واحد دكتور نلملما ليك ونمشى بيتم والله
ياندى رغم انو مرتو من بنات الخرتوم لكن بتظبط المراره
دى زبط والله مرات بتقعد معانا عشره يوم بعد العيد
والعجب الدكوه بالليمون والشطه لكن شرطا الليمون
يكون اخضر او كما تقول الدكتوره وان جيتى للشيه اسكتى
ساكت واقوليك مبالغه الكانون بنختو فى الباكيارد فوق
التلج من فوق ونظبط الشيه جمرا يطقطق والشراريخلع
اها بعداك نقوم ندخلا جوها ونململا فى الكوه والشطه لمن
نعرق وكان مكضبانى اضربى لى تلفون يوم الاحد زى الساعه
خمسه كدى عشان تشمى عطرابة الشيه بعدين مافى مشكله
هسى امشى اجرى عربيه وتعالى لينا لكن كان جايه لازم
تدينا خبر من هسع عشان نزيدلك خروف براك

العزيز أبو جهينه

العيد يتبارك عليك ..
وجميع أفراد الأسرة الكريمة بألف خير ..
عندنا واحد بحب الكلاوي شديد وبعدين في عيد الضحية ضبح الخروف
الأولاد الصغار حارسين الكلاوي بحبوها زي أبوهم ..
قاموا قالوا لابوهم يابا أدينا الكلوة ..
رد الوالد قاليهم يا أولادي كان الخروف فيهو كلوة ضبحوه ..
ما تنسانا من الشربوت ..
يعيده علينا وعليكم بالخير واليمن والبركات ..

العزيزة ندى امين
انامتين حنتكت بالنعيمية والعصيدة انا لى روحى مشتهيهم...حالى ذى حالك دا وكمان اصعب

انت ماقريتى البوست بتاعى المنتظر فيه الجماعة يرسلو لى المرارة والشربوت بالاميل

اتخيل يا أبو جهينة أنا الشربوت في حياتي ما دقتو حتى لمن كنت في سوداني الجوه وجداني، لاكن شكرا على العزومة اللطيفة
و يا ود الجعلي قايتو انت أصله ما حنقدر عليك، أنا الحالة فرحت و قلت أبو جهينة من غير ما يقصد انتقم لينا و "حندكم" بحاجات الخروف دي لكن باين عليك ما بتلعب بروحك أصله و فعلا بقيت كيمو الجاهز لكل المناسبات، على العموم كل سنة و انت طيب و ربنا يحقق كل أمنياتك على رغم حندكتك المتواصلة لعموم البورداب/ات المغلوبين/ات على أمرهم و أحسن ليك أكل كويس لأنه أنا و الجندريات بنصمم في حملة واسعة النطاق ضدك و حنطالبك بعد العيد بالسحب الفوري لامضاءك والا...

الأخ العزيز معتصم دفع الله
كل سنة و انت طيب و القابلة على أمانيك
أنا في الدمام ،، أصلنا بنسقيك شربوت تمام
أرقد عافية

الخروف ، الجزار ،السكين ..
الدم ، النزيف ، الألم ..
اللحم ، المرارة ، الشية ..
وبقية مشهد المجزرة ..
اننا كل عام نحتفل على مسرح جريمة متكامل التفاصيل ..
كل عام والله يا أبا جهينة أسأل نفسي :
كيف يمكن أن نستوعب هذه الفواجع ؟ وان اتسعت دائرة المباح
اليست لهذه المخلوقات أرواح ؟
ألا تتألم؟
هل ستبعث يوما لتكأفأ؟الحيوانات لا تبعث ماعدا أربعة منها على ما أعتقد
اذن ما ذنبها وهي تتألم؟
أنا أحترم النباتيين لآنهم يحترمون الأرواح ويكرهون الألم ولا يدنسون أرواحهم بالدماء
لست مفتي .. ولكننا يجب أن نفدي هذه المخلوقات كما فدي المولي الرحيم اسماعيل عليه السلام .. مأ أمكننا ذلك
ولله في خلقه شئون ..


وكل عام وأنتم بخير

الأخ العزيز صلاح
كل عام و أنتم بخير و القابلة على أمانيك

كما قالت رجاء العباسي : ندق الصحبة مع الخروف كم يوم ، و يوم العيد ننهش اللحم و ننسى تلك الأيام التي عايشناه فيها .

لله في خلقه شئون
أرقد عافية يا صلاح

EID SAEED ABU JUHAYINA
RABBANA YIHAGGIG AL-AMANI
WILL BE BACK IN ARABIC SOON
IAM THOUSANDS OF MILES AWAY FROM HOME
REGARDS

الأخت حنينة
كل سنة و انت طيبة
و الله قلبي معك
و العيد دة كلو بفكر في بناتنا المغتربات
ربنا يرد غربتكم

ما فيك يا با جهينة تنكر التهمة ...
لو جوك الجماعة لانك سببت في سكر النمل ..
وعباد الله الصالحين ...
علي كل بعيد عنهم ..
مرحي .. بعيد السودان .. وطقوسه الجميلة ..
من شواشي .. شربوت .. عسلية .. مرارة و دكوة ..
و الجيران و الكيمان ..
شكرا علي التواصل والزكريات ..
دوما مبدع ..

عزيزي حامد
كل سنة و انت طيب و القابلة على أمانيك

و الله ما بعيدة يا حامد يتهمونني بالتسبب في سكر النمل و بقية الخلق
لاكين الشلربوت هنا في الدمام مع الأهل و الصحبة له نكهة النوم في الحوش في ليلة صيفية

أرقد عافية يا حامد و ربنا يحفظك

ابوجهينة
بالعربي اخيرا
والله حكاويك ذكرتني ايام الطفولة والفرحة بالخروف
زي ما قلت قبلا..انا بعييييدة حتي عن انجلترا
العيد جليد في جليد
لم يخففه الا وجودي في ضيافة اخوات عزيزات علي من منبرنا الكريم
اما الخروف...فنسيت شكله كيف

انشاء الله العيد الجاي في سوداني الجوة وجداني
قول امين

ااااااخ يا ابو جهينه ما كتلتني عديل كده ,,, ياحليل الشيه و المراره و الكمونيه ,,, انا ضربت لناس بيتنا يوم العيد و سلمت عليهم كلهم , لكن امي كانت اخر زول جاني بعد سالت منها قالت لي يا بتي ما كنت بانضف في الكمونيه ,,, قلت ليها اااه لو ترسلي لي صحن كمونيه تكوني ما قصرتي ,,,,
و كل سنه و الجميع بخير

العيد مبارك عليك يا أبو جهينة
وكل سنة وانت والاسرة والأصحاب بألف خير

معقولة يا أبوجهينة
بكيت وحدي في الغربة وسط خواجات لا يعرفون يا سيدي
المرارة والكمونية والربيت ، فبدل الشاربوت يحتسون
شراب أجارك الله منه في ليالي عطلاتهم الأسبوعية ، وصدقني
لم أجد الي الأن أطعم من عرقي صديقنا جاكوب وعمتنا
تريزا في قنب الحلاويين ..
عذبتني كتابتك كثيرا وأنا مأخوذ بذكريات تأخذ الواحدة
برقبة الأخري لتزيدك في الوحدة بكاء لحد البلل!
ياخي مالك علينا؟
علي الأقل فأنا سأتجاوز محنتي لأني سأكلم خطيبتي بعد قليل
لكني أخاف علي أصدقاء لا ينعمون في الدنيا الا بقليل
القليل ..
لك التحية وأنت تنتزعنا من حياة في غاية السكون
لك مودتي

ابوجهينة والشية..
والمرارة النية...
عملت لينا كية..
ونحنا فى السعودية...
عذابة..منسية..
قلوبنا مكفية..
ما متذكرين بنية..
وعاملين افندية..
وحافظين الالفية..
وما بنملك عيدية..
شقالين وردية..
فى مبنى العقارية

كل سنة وانت طيب..الهنود طبعا بضحوا التيوس لازم يحضروه
قبل ثلاثة ايام وعشان يجرتقوه..وتلقى عيالهم يتنافسون بها
فى السوق وشوارع المدينة...بكرى عيد...يقوم اخنا بكرى يزعل مننا
البكرى هو التيس
ولك ودى

الاخ العزيز ابوجهينه
كل عام انت والاسره بالف خير وصحه
وربنا يحقق كل الامنيات الطيبات

رغم دخولنا المتاخر وبعد 5يوم من العيد
لكن نعشم هل هناك باقى من الخروف والشربوت
حاجه , انشاء الله كمونيه ؟

سلام مربع
الجميل جدا
ابو جهينه

كل سنة وانت طيب
وكل صحبة الورد

حنينة
الحمد لله أن رجع لك الكي بورد ناطقا بالعربية
و كما قلت لك ، قلبي معكن و ربنا يرد الغربة
و لك تحياتي و تقديري

الأخت آمنة شبيكة
كل سنة و إنت طيبة و بألف خير
رد الله غربتك سالمة غانمة

ريحة الكمونية طاقة في البوست دة ، لو كنت عارف عنوانك كنت رسلت ليكي ( بالدي إتش إل )
معليش يا آمنة ، القابلة على أمانيك من ضمنها الكمونية
أرقدي عافية

العزيز أبو قوتة
كل سنة و إنت طيب
أخوك عيد في الدمام ، مع لمة الأهل و الأحباب
ربنا يجمع الشمل يا أبو قوتة و القابلة على أمانيك

الأخ العزيز جدا أنور الطيب
كل سنة و إنت و الأسرة الكريمة بألف خير و عافية
و القابلة على أمانيكم

الأخ العزيز أبو عبيدة الماحي
كل سنة و إنت بألف خير و عافية
و الله ذكرتني أيام الغربة الصعبة في أمريكا و التنقل بين لندن و باريس و أسبانيا ، كنت أشعر بنفس شعورك هذا في رمضان و العيدين
لكن هنا في السعودية الأمر طبعا يختلف
رد الله الغربة
و القابلة على أمانيك

الحاج محمد الشيخ
الحج مبروك
القابلة على أمانيك ( طبعا العروس على راس القائمة )
باقي حبة شربوت في قعر الجردل ( نصو مشق ) ، بس ما حينفع معاك ( ما أسكر كثيره فقليله حرام )
تسلم

الأخت العزيزة الغالية شيري
كل سنة و إنت طيبة و القابلة على أمانيك
تسلمي