Post: #1 Title: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 04:05 PM Parent: #0
الان كنت على مشارف الحى الوح مودعة قطعة من قلبى ستغادرنى الى حيث الناس السمحين سماحتها ستترك لى مساحة من فراغ لن تملؤها كل الاشياء فى هذا العالم لكنها حتما ستعود بالفرح الاصيل اقعدى فى العافية تغتيك وتضاريكى ابقى الف على حب الناس ابقى زى ما قلت ليكى وخلى بالك من زهورك ومن وطن باقيهو عندى ويا ناس الخرتوم اتوصوا بالبنية وتجينى بالامل اليفرح كل زول لك حبى امك سلمى بت الشيخ
Post: #2 Title: Re: بعدك الفريق اصبح خلا ..........عزة بتى يوصلك الله سالمة Author: Nesta Date: 07-21-2007, 04:11 PM Parent: #1
هي بالله بلاد بره دي فيها فرقان وحلال(اللام الأولي دي فيها شدة بالله) ربنا يحفظ البنية السكرية حلاوة عسل ويحفظ التانية الحلوة ديك المعانا في البورد ويحفظ سلمى( الما ظالمة) ويحفظ البقية (لو كان في الكأس باقي)
Post: #20 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 04:46 PM Parent: #10
القرضابى اخوى ياها عوينة ام صالح بتعرفا ؟ والغربة مرات بتخيل ليك انها فيها فرقان وحلال ومرات فيها ناس بنسوك طعم الغربة مرات تحس انك غريب فى بلدك ودا كان (وصفك وكت حسيت بو ) مرة كنت بتلكم مع الاستاذ محمد ابراهيم نقد فى لقاء بيناتنا فى السودان قلت ليهو انى حاسة بغربة فى السودان قال لى بمساختو البعرفا ديك ـ امشى محل ماجيتى ومشيت طبعا
Post: #23 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 04:58 PM Parent: #2
يا نيستا ياخ خجلتنا زاتو شكرا ليك على حفاوتك ومحرية فيكن يابا وحات عمرى النزف يومداك محرية فى كل شباب السودان ورسلت ليك تلفونا فى المسنجر وما تخلوها براها عافية منها وراضية عليها تجيبا سالمة وااااى من الجرسة
Post: #5 Title: Re: بعدك الفريق اصبح خلا ..........عزة بتى يوصلك الله سالمة Author: شمس الدين خواجات Date: 07-21-2007, 04:17 PM Parent: #3
بت الشيخ سلامة ,, ربنا يكتب سلامتها,, وتمشى وتجيك سالمة ,,
Post: #25 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 05:04 PM Parent: #5
يا شمس الدين خواجات عندى زول صحبى اسمه جمعة خواجة(واحد ما كتار ) زول جميل كان ضابط فى الجيش هو من جبال النوبة زول حكاى ووناس بحبه جدا لكنه راح منى فى زحمة الدنيا ودروبا المتعبة شكرا ليك يا فردة على تصبيراتك الله يديك وليدات عشان (تآاااااااامن )
Post: #6 Title: Re: بعدك الفريق اصبح خلا ..........عزة بتى يوصلك الله سالمة Author: على محمد على بشير Date: 07-21-2007, 04:18 PM Parent: #3
سلمى بت الشيخ
ربنا يرجع ليك بنيتك سالمه غانمه والله يكون فى عونك لانى مجرب الحكايه دى ولانو بنيتى ليها شهرين فى الخرطوم كل يوم بسمعا تجرى بى جمبى والا تقول لى يابابا او اسمعا تبكى بالليل والغريبه انا قاعد فى الشقه براى والاصوات دى من حولى ليها شهرين
Post: #26 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 05:11 PM Parent: #6
يا على محمد على اخوى تاريها القصة دى حارة شديد هسى زى الدلقوا فينى نار الدنيا كلها الله يرجع ليك وليداتك بالسلامة ووتكرف ريحتن وتشم طعم الدنيا وروح الدنيا يسلمك من كل بلا ويسلم عمرك اخوى
Post: #11 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 04:28 PM Parent: #3
يا اباذر اول مرة احس انى حزينة بالدرجة دى الضنى غالى يارب تجيبا لى سالمة شكرا ليك
(الأخ) سلمي.... سلامي و بلاش جرسة . و الله البت أشطر منك و بقول الكلام دة (بخشم) مليان لأني بعرفك كويس... بت (عروقها) ممتدة لذلك البعد ما ينخاف عليها. سلامات يا أعز عازة حامد
Post: #28 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 05:35 PM Parent: #22
حامد موسى اخوى انت ماك عارررررف الفراق حار كيفنو ؟ هسى ركبت التكسى خلاس ومشت مودوعة لامين الوادعة وحات الله اول مرة احس انى متجرسة صدقنى فراق صعب لكن شاحدة الله توصل بالسلامة والنسمة ما تعتر ليها وشكرا على الاتصال الانيق والوداع الجميل لعزوز
Post: #32 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 06:08 PM Parent: #7
يا الشفيع يسلم عمرك وشكرا ليك
Post: #31 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 06:04 PM Parent: #4
Alsa7afa_30 كل المنى ان تصل بالف سلامة وتجينا سالمة تعرف البيت هسى صانى مافيهو لاموسيقى ولا (شكلة ) الموسيقى طبعا بتدور من الصباح لمن تطلع المدرسة ولا الشغل والشكلة دى كل شوية انتى ما دفعتى الفاتورة يا ماما خلاص انا بدفعا لكن وتبدا نقارات عجيبة تنتهى بان الغدا جاهز او العشا وما دايرة وماباكل هسى عندى تلفون من السودان وحاجات لذيذة حافتقدا الاسابيع الجاية كلها محبتى لك
Post: #35 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 06:54 PM Parent: #12
صحبى الجميل عارف مرة كنت بسجل مع الاستاذ صادق عبد الله عبد الماجد فى الاذاعة قام بعد التسجيل قال لى ـ انتى من الصباح شابكانى اسئلة وما خليتينى اعرفك اسمك منو حتى قمت قلت ليهو اسمى طوالى راح يغنى (سالمة يا سلامة ) كنت فى الايام ديك بقدم برنامج فى الصباح قال لى لو ماسمعت اسمك ما بطلع ايام وتجى بالسلامة عزوز وتلقى اهلا طيبين ولامين
Post: #42 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 09:08 PM Parent: #18
يا معتصم يا جمام انت قايل المشكلة شنو ؟ المشكلة انى ما قادرة احتمل فكرة السفر ليها براها مش لانها اى حاجة لكن فكرة تكون (اتنين) دى صعبة 0(انا مالى بقيت اتنين) وقعت ليك ؟ لك جزيل مودتى
Post: #40 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 07:53 PM Parent: #14
عوض عكاشة اخوى واشوقى لبلدا بعيد منى عارف فى مرة كنت شغالة فى وظيفة بعد منتصف الليل وحات سيدى مرات بسمع ليك حاجات غريبة كانوا بشغلوا موسيقى للناس فى الشغل كنت بسمع ليك الراب مصطفى سيد احمد وعركى وزيدان وبتكلم عربى مع الناس يسالونى دى ياتو لغة وكون نايمة وواقفة زى الديك غربة عجيبة لكن غربة الروح لمن ما تلقى روحك فى بلدك دى اصعب واحدة
سلمى غايتو وصايه جنس وصا؟؟؟؟؟؟ نتمنى ان يحفظ الله عزوز فى الحل والترحال وان تهنا باجازتها.... وانتى الله يغطى عليك..
Post: #45 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 09:38 PM Parent: #15
صديق ياموج اول حاجة شكرا ليك على الهاتف الظريف لوداع عزة وتانى حاجة انت عارف العيال لمن تسافر وتبقى بعيدة منك اقول ليك ووووووب من فكرة انها تمشى وتخلينى مع انى عارفة انه البنات (ضيفات ) زى ما بتقول امى لكن هسى الصنه دى يسوو ليها شنو ؟ ومافى زول يجيك يقول ليك ـ يا ماما ياخ ولا ـ انتى مش قلتى كده ؟ واكون وحات الله مرات ما قلت لكن باكلا اسوى كيف ؟ ولمن تكون فى بكون مطمنة لكنها الان (مافى وماليه الفجة ) تحياتى
يعني كلو زي ما قلت لي عفراء اختي باقي لي رهاب رهاب،، يعني عااااااااااااادي بعد كم ساعة من الحلم الجميل،،
الذي طالما تمنيته طوال السنين الماضية،،
يجي واحد ماااااااااااااااكن طول و عرض،،
يلبخني بي صفقة شجرة،، يفيقني من حلم طااااااااااااااااااال زمن إنتظاره،،
للضمان :-
عذراً فأنا علي عجلة من امري،،،
سأكتب من ارض الوطن،،
علي حافة الحلم و الفرحة،،
Post: #46 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 09:56 PM Parent: #17
عزوز كونى فى عمق الفرح واحلمى احلمى ما شئتى كون ما اردتى كونى النسمة فى عز الليل وقولى الكلمة كونى ما اردتى دائما تلك الوفية الاصيلة التى تقف فى (الحارة) اضربى عميقا فى روحك وحاسبيها ان اخطات وانصفيها ان احسنت كونى شجرتى التى استظل بها وياقوتتى التى ادخرها لزمن ماكر وابقى الف على المحبة كونى بخير دائما صغيرتى وساكون فى انتظار اوبتك السمحة
Post: #61 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 12:44 PM Parent: #27
يا مهند حيمورة انت زاتك نوع عزة قول لى كيف ؟ هسى بتكون بعيد من والديك وتلقاهم كل ماالقلب (فر) يا ربى مهند مالو ؟ يا برى مهند اتعشى ؟ جا البيت ولا لسه؟ ما قلت ليك يخليك الله ويغتيك وابقى عل روحك عشرة ودعتك الله
Post: #60 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 12:31 PM Parent: #24
محمد على طه الملك هسى لمن اكمل كتابة اسمك تكون الطيارة وصلت اول يوم فى البيت براى من زمن تجربة صعبة شديد البيت صانى وانا متل الملدوغة ادخل وامرق باب الاوضة مقفول كل مرة بتخيل لى بسمع صوت موسيقى اتصنت مافى موسيقى ياربى؟؟؟ غايتو العيال مشكلة لكنهم احلى حاجة فى الدنيا وكل ما طفلك يكبر بتشوف انه لسه الزول الصغيرونى الزماااااااان داك
Post: #48 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-21-2007, 10:07 PM Parent: #21
اولا يا اخى محمد مكى تحياتى لعزوز الصغيرة وتانيا شكرا ليك ياخى والله لولاكم لكنت ميته من الحزن وسؤال عارض اسمك دا ما غريب على طبعا لانه اهلنا ناس الحفير عندهم اسم مكى دا كتيرجدا تكون من اهلنا وما عارفين ؟ يا رب تكون مودتى لك ولعزة
بالسلامة إنشاء الله وعودة بالفرح الأصيل كما تمنيت لها ونتمنى, وسلامى لعفراء وزهورها .
مودتى
Post: #63 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 01:18 PM Parent: #29
ايمن الطيب سلامك وصل لعفراء(انت بتعرف عفراء) دى زولة جميلة(وعمدة المدينة )الله يغتى عليها عارف عزة بتقول :عفراء اختى وهى فعلا اخت وحبيبة تسلم من كل بلا
Post: #30 Title: Re: بعدك الفريق اصبح خلا ..........عزة بتى يوصلك الله سالمة Author: معتصم دفع الله Date: 07-21-2007, 05:48 PM Parent: #1
ربنا يوصلك بالسلامة يا عزوز .. أمنياتنا ليك بقضاء وقت جميل بأرض الوطن ..
تحياتي يا أم عزوز ..
Post: #33 Title: Re: بعدك الفريق اصبح خلا ..........عزة بتى يوصلك الله سالمة Author: بدر الدين الأمير Date: 07-21-2007, 06:13 PM Parent: #30
المقدرة الاخت والصديقة سلمى السالمة وشيخة كما قيل من قبل: لو فهم الناس التلاقى وحسنه لحببو من أجل التلاقى التفرق) اتمنى ذلك لكى ولعزة التى تهويها وطن وبنت
Post: #34 Title: Re: بعدك الفريق اصبح خلا ..........عزة بتى يوصلك الله سالمة Author: مامون أحمد إبراهيم Date: 07-21-2007, 06:31 PM Parent: #33
تسلم عزه , ما دام هى بت سلمى بت الشيخ سلامه, وتسلم أمها من ألم الفراق , والإشتياق .
حأعيش ياسلمى نفس التجربه مع بتى مهاد, وهى حتمشى الجامعه فى الشهور الجايه, ودى أول مره تفارقنا.. وغايتو الله يستر , وكعبه جرسة الرجال !
لكن برضو عزانا إنهم ماشين للبلد السمح وأهلو السمحين .
أتمنى من كل قلبى أن يلتقى هنالك الجميع .
Post: #66 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 02:03 PM Parent: #34
مامون احمد ابراهيم ما تتجرس كان اتجرست اول عيب ولا عيب امى كانت بتقول لينا انتو بتمشو لكن انا البصبرنى شنو ؟ كنت على صعيد شخصى بشيل هم للوداع لمن اجى ماشه لانى اكبر جرسة فى الدنيا اقول ليك قوله (تجرسو يرحمكم الله )
Post: #65 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 01:43 PM Parent: #33
بدر الامير متذكر يوم فى مكتبك وعزة اتصلت شفت البكية ديك ؟ البكية الياها لى هسى لكنها حترجع بالسلامة وترجع ايامنا الجميلة يا سنا الروح يا مداما ويا عواطفنا النبيلة تهدى ليلاتنا ابتسامة من زمان بنقول حليلا يوم رحيلك يا حبيبى شفت كل الكون مسافر لاهزار فى روضة غنا لا زهر عطر دياجير لا تلاقى يروى شوقى لاحديث يجبر بخاطر الشهور ياريتا تجرى وكل يوم ياريتو باكر
Post: #64 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 01:28 PM Parent: #30
معتصم دفع الله الشفيف شكرا ليك كتير وتعود بالسلامة عزوز وتصل بالف سلامة شفت مستعجلة العودة قدمتها على الوصول تحياتى
Post: #71 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 03:13 PM Parent: #38
مجدى عوض صديق اول حاجة مبروك على الجائزة الشايلا فى ايدك دى حقت شنو ؟ واضح انها من الجزيرة ودا لقمان همام مش؟ مبروك وتانى مبروك وعزوز لمن تجيكم فى السودان ما تقصروا معاها لسه ما وصلت بتصل يوم الاثنين وسؤال شخصى يا مجدى محتاجة للفيلم الكان عملتوا عن استاذنا محمد عبد العال محتاجة ليهو كتير والله لانى بوثق ليهو وامكن اسافر اكمل معاهو توتيق فى قطر لانه رسام مهم جدا واستاذ مهم تماما خرج عشرات الناس بل مئات او تزيد لك ودى
Post: #70 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 02:53 PM Parent: #37
العزيز عبد الله وداعة شكرا لجميل دعواتك ومودوع لامين الوداعة يخليك وينجيك ويغتيك يغتيك دى سمحة مش ؟
Post: #69 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 02:46 PM Parent: #36
jini الزول الجميل عارف الاغنية دى زمان كنا قايلين المطربة شادية بتقول (لحسن ) اى ان تلعق او تلحس شيئا وبنعمل نفس الحركة (شششووووووووب )لمن تلحس ليك حاجة حارة ولسانك يحرقك هسى يعنى يا ربى بقدر اغنى االغنية دى غير ما اضحك ؟ وقولو لعين الشمس ما تحماشى (لحسن ) حبيبى القلب صابح ماشى تسلم ود امى
Post: #39 Title: Re: بعدك الفريق اصبح خلا ..........عزة بتى يوصلك الله سالمة Author: أبو ساندرا Date: 07-21-2007, 07:47 PM Parent: #1
عزتنا العزيزة رافقتك السلامة في حلك وترحالك
ويا أم عزة مقدرين ومتفهمين حالتك أرخي دميعاتك وكفكفي ألم الفراق وسيبك من حكاية { يا عزة الفراق بي طال } ده خليهو للغناء وأدي لوعتك للطير
زي مالوعتينا بالأغنية الحنينة
عتاب ولوم: ماكان تقولي ليها أغشي خالك/ عمك بركات ولو ساعات
Post: #72 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 03:26 PM Parent: #39
ابو ساندرا طبعا كانت الخطة انها تمشى الدوحة اول حاجة عشان تلاقى طارق اخوى وحسان اخوى اها الخطة باظت وكنت حاكون سعيدة جدا انها تلاقيكم يا ناس الدوحة الاكثر جمالا وانسانية برضو الفكرة قائمة فى العودة بديكم خبر واقعد عافية وخلى بالك من نفسك ود امى
Post: #41 Title: Re: بعدك الفريق اصبح خلا ..........عزة بتى يوصلك الله سالمة Author: محمد عثمان Date: 07-21-2007, 08:03 PM Parent: #1
الاستاذة سلمى..
ربنا يحفظ عزة و يخليها ليك و يوصلها بالسلاااامة...
يديك العاافية..
Post: #73 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 03:32 PM Parent: #41
محمد عثمان اخوى انت قايل قطع البحر دا ما صعب ؟ والله صعب صعوبية لكن بى جنس دعواتكن ديل بتصل تب يخدر حياتك ويديك وليداتا يسعدوك فى (حيات ) الدنيا قول امين
Post: #43 Title: Re: بعدك الفريق اصبح خلا ..........عزة بتى يوصلك الله سالمة Author: فيصل نوبي Date: 07-21-2007, 09:23 PM Parent: #1
عشان عزوز بت سلمي ما بتجيها عوج تب
ربنا يوصلها بالسلامة و يطمنكـ عليها و يخليكم لي بعض .
Post: #74 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 03:42 PM Parent: #43
واحلالى يا فيصل نوبى كتر خيرك على السؤال لى هسى دمعتى فى عينى جنس حنية عليك واديتا تلفونك واحلالى تانى ما عارفة اقول ليك غير محرية فيك
Post: #44 Title: Re: بعدك الفريق اصبح خلا ..........عزة بتى يوصلك الله سالمة Author: AL BOOS Date: 07-21-2007, 09:33 PM Parent: #1
سلمى بت الشيخ
Quote: الان كنت على مشارف الحى الوح مودعة قطعة من قلبى ستغادرنى الى حيث الناس السمحين سماحتها ستترك لى مساحة من فراغ لن تملؤها كل الاشياء فى هذا العالم لكنها حتما ستعود بالفرح الاصيل اقعدى فى العافية تغتيك وتضاريكى ابقى الف على حب الناس ابقى زى ما قلت ليكى وخلى بالك من زهورك ومن وطن باقيهو عندى ويا ناس الخرتوم اتوصوا بالبنية وتجينى بالامل اليفرح كل زول لك حبى امك سلمى بت الشيخ
والله العظيم الف سلامة لعزووووووووووز وان شاء تكحلي عينك بشوفتا قريب....
عفوا تقاطعت معكـ في بوست سابقا على انك هي.
Post: #47 Title: Re: بعدك الفريق اصبح خلا ..........عزة بتى يوصلك الله سالمة Author: Ishraga Mustafa Date: 07-21-2007, 10:02 PM Parent: #44
سلمى يا بت امى عارفاك كابة الجرسة
ياختى تمشى ةتجى بالسلامة بتنا الحلوة عزوز
وماتنسى ياعزتنا تصحى تشوفى لى شروق الشمس
واجازة سعيدة وعودا حميدا يابنيتى
خالتك، صاحبتك وفردتك اشراقه
Post: #80 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 05:51 PM Parent: #47
اشراق بدون تاء مربوطة او مفكوكة الشمس لمن تطلع بتكون عزة نايمة لانه شمسين ما بتلاقو ( عجبتنى الفكرة دى) كيف حال يا ابوى كيف حال ياخال ؟ بنمسى بيوتنا الكاكية وشقيش ما تقبل يا ابو الحيل فى قلوبنا مواجعك مخفية
Post: #76 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 04:06 PM Parent: #44
AL BOOS هسى قول ليل اتشابه عليك شنو ؟ لمن تقول انك اتقاطعت معاى على اساس انى عزوز بختى كان كدى لو بشبه عزة ما بقيت سمحة تب عارف زمان عميرى (كانوا فى تلاجة البيت عندهم معلقين صورة عزة وهى عمرها شهور ) كل ما نتلاقى يقول لى سلمى الشيخ بتك دى الا تسلحيها علم (شينه ) بعد فترة تانى قام قال لى (وكانت فى صورة جديدة فى نفس باب التلاجة) والله بتك استعدلت ما شه كويس هسى انا ماشه كويس ؟
Post: #100 Title: Re: بعدك الفريق اصبح خلا ..........عزة بتى يوصلك الله سالمة Author: AL BOOS Date: 07-22-2007, 08:54 PM Parent: #76
Quote: AL BOOS هسى قول ليل اتشابه عليك شنو ؟ لمن تقول انك اتقاطعت معاى على اساس انى عزوز بختى كان كدى لو بشبه عزة ما بقيت سمحة تب عارف زمان عميرى (كانوا فى تلاجة البيت عندهم معلقين صورة عزة وهى عمرها شهور ) كل ما نتلاقى يقول لى سلمى الشيخ بتك دى الا تسلحيها علم (شينه ) بعد فترة تانى قام قال لى (وكانت فى صورة جديدة فى نفس باب التلاجة) والله بتك استعدلت ما شه كويس هسى انا ماشه كويس ؟
يا أمة مساءكـِ الله بفرحة اللقاء أعذرني طول عن المكان قد خلط علي الاوراق وظننتها تكتب باسمك. شوقي لـ دهبية زاد الطين بلة. جمعكما الله في الخير دائما وابدا ، سلامي لاختي عزووووووووووووز ذات البريق (قولي ليها عاطف استايل). حفظكما الله ما يحفظ به عباده الصديقين والشهداء
Post: #49 Title: Re: بعدك الفريق اصبح خلا ..........عزة بتى يوصلك الله سالمة Author: محمد علي ياسين Date: 07-21-2007, 11:12 PM Parent: #1
Quote: وما تخلوها براها عافية منها وراضية عليها تجيبا سالمة
تصل بالسلامة يا رب ويكفي رضاك عنها
وسلام
Post: #50 Title: Re: بعدك الفريق اصبح خلا ..........عزة بتى يوصلك الله سالمة Author: هاشم أحمد خلف الله Date: 07-21-2007, 11:30 PM Parent: #49
Quote: الان كنت على مشارف الحى الوح مودعة قطعة من قلبى ستغادرنى الى حيث الناس السمحين سماحتها ستترك لى مساحة من فراغ لن تملؤها كل الاشياء فى هذا العالم لكنها حتما ستعود بالفرح الاصيل اقعدى فى العافية تغتيك وتضاريكى ابقى الف على حب الناس ابقى زى ما قلت ليكى وخلى بالك من زهورك ومن وطن باقيهو عندى ويا ناس الخرتوم اتوصوا بالبنية وتجينى بالامل اليفرح كل زول لك حبى امك سلمى بت الشيخ
العزيزة الغالية سلمي ربنا إنشاء الله يوصلها بالسلامة وربنا يجمعنا بها كمان في السودان , حتي نري
ملامحك البهية علي وجه صغيرتك عزة ونتعرف عليها عن قرب واتمني لها إقامة سعيدة وسط اهلها وبين
اصدقائها والموسم موسم أمطار واكيد الجو جميل وممتع , ربنا يطمئنك عليها كمان وكمان .
Post: #86 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 06:35 PM Parent: #50
هاشم الشاعر الجميل شكرا ليك على جميل حروفك وانشا الله تلاقيها فى السودان لو كنت هناك يا هناها لك ودى
Post: #85 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 06:23 PM Parent: #49
محمد على يسن زمان امى لمن اجى مسافرة بتقول لى عافية منك والكلمة دى او الجملة دى ما هينة لانه رضى الوالدين نعمة ودايما بنقول الله يرضى عنك والديك ورضى الام دا بالدنيا وعافية منها عفويا يغتيها وينجيها ويزح كل عثرة ويقيف ليها سد من كل عوجة كتر خيرك عمر بيتك ويرضى عنك والديك
Post: #51 Title: Re: بعدك الفريق اصبح خلا ..........عزة بتى يوصلك الله سالمة Author: Moawia Mohammed Date: 07-22-2007, 00:02 AM Parent: #1
يا عزه الفراق بي طال وسال سيل الدمع هطال
في أمان الله وتمشي وتجيك بالسلامة يا بت الشيخ
Post: #89 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 07:03 PM Parent: #51
معاوية الفنان طريت برق الفويطر الشال لبس من نارى عمه وشال ولغاية يا زينة ربوع الحى لى دياركم يعود الحى لكنى فى هذه اللحظة اتمثل الفنان ابراهيم عوض احكى الم الفراق واشكى لى مين انا؟ يا روحى ما هذا الصدود ؟ انا دمعى جارى على الخدود وحتى اصل الى رجع البلد والحى مصيرو يلاقى حبابيو لو صادقين واعرف مدى صدقها وستعود بالفرح الاصيل وتسافرى بى فوق وهاد المستحيل وتركى بى فى حضرة الزمن الجميل واحبك تدى لى عمرى الامان
Post: #52 Title: Re: بعدك الفريق اصبح خلا ..........عزة بتى يوصلك الله سالمة Author: الكناري Date: 07-22-2007, 02:11 AM Parent: #1
سلام يا سلمي بت الشيخ سلامة وربنا يوصل عزة بالسلامة ود جيرانكم الزمان حضر عيد ميلاد عزة الثاني وجاب ليها ساعة هدية بالله لو عندك تلفونات مغيرة وأحمد رسليها علي [email protected]
Post: #53 Title: Re: بعدك الفريق اصبح خلا ..........عزة بتى يوصلك الله سالمة Author: الفاتح يسن Date: 07-22-2007, 04:21 AM Parent: #52
سلمى تمشي وتجي بالسلامه
Post: #54 Title: Re: بعدك الفريق اصبح خلا ..........عزة بتى يوصلك الله سالمة Author: salma subhi Date: 07-22-2007, 04:59 AM Parent: #53
الأستاذة سلمى انت سلمى ومعناك السلام وكمان في آخر الاسم سلامة...يارب انت وعزة دائماً في سلام وربنا يوصلها ويجيبها ليك بالسلامة....ولك مني كل الود والسلام
شفت الرد ده كله سلام × سلام كيف
مودتي
Post: #93 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 07:41 PM Parent: #54
الحبيبة سلمى السلام ضراك والامان معناك شكرا ليك على دفع معنوياتى وتسلمى من كل شر
Post: #92 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 07:28 PM Parent: #53
الفاتح الفنان يا فردة شكرا ليك وطالبنك الحان لعزة لمن تجى لانى دايرة (اطلق) الفلس شد حيلك معاى نعمل برنامج مشترك لدفع عزة للغنا
Post: #91 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 07:17 PM Parent: #52
الكنارى يا ود جيرانا زمان احييك وبرسل ليك التلفونات المغيرة بقى عنده تلالته اطفال زى العسل واحمد يا داب عريس وشكرا ليك كتير
Post: #55 Title: Re: بعدك الفريق اصبح خلا ..........عزة بتى يوصلك الله سالمة Author: Aymen Tabir Date: 07-22-2007, 05:15 AM Parent: #1
Post: #56 Title: Re: بعدك الفريق اصبح خلا ..........عزة بتى يوصلك الله سالمة Author: عادل جبارة Date: 07-22-2007, 06:13 AM Parent: #55
نعم سلمى ما أقسى الفراق 00 خاصة فراق الأبناء عندما نودعهم تطير قلوبنا وتجف حلوقنا نجتر الغصة ونزرف الدمع سخينا00 هي سنة الحياة يربي الطير صغاره ويعلمهم الطيران ليفارقوه 00 ولقد فارقنا من قبل والدينا وما كنا نظن أو نعلم أننا فعلنا بهم ما فعله أبنائنا الآن معنا نسأل الله لهم التوفيق والنجاح ، ولا تخافي ولا تجزعي على عزة فهي في حفظ الله ورعايته ثم وسط أهلها وأحبائها
وأسأله تعالى أن يجمعكم جميعا في لحظات خير وحبور وأن يجمع شمل كل أسرة في وطن كله خير بإذن الله
Post: #97 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 08:04 PM Parent: #56
اخى عادل جبارة ما قلت الا الحق فراق الابناء صعب شديد يا داب حسيت بالم امى السببته ليها لكن عشمى ان تسامحنى ويرحمها الله كانت صبورة فلقد تفرقت بنا السبل لزمن طويل والتقيتها قبل ان ترحل عن هذه الفانية لك الود اجزله ودمت
Post: #95 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 07:55 PM Parent: #55
ايمن تابر ود الذين انت لغاية الان مامشيت البلد؟ يا مقطوع الطارى الله يهديك امشى مشتاقة ليك ياخ
Post: #57 Title: Re: بعدك الفريق اصبح خلا ..........عزة بتى يوصلك الله سالمة Author: Ehab Eltayeb Date: 07-22-2007, 06:23 AM Parent: #1
عزوز توصلي بالسلامة لاحضان الوطن ...
ونتمني ليك اجازة سعيدة بين الاهل والاحباب..
لكن ح نفقدك في المنتديات...
وما تخافي عليها يا استاذة سلمي ...
لانها بين من احبتهم واحبوها حتي النخاع
تحياتي,,,
Post: #98 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 08:10 PM Parent: #57
ايهاب الطيب العزيز ما حتفقدا فى المنتديات لانها مسكونة بالنت وهسى كان لقت ليها طريقة فى الطيارة بتكتب شكرا ليك على امنياتك الصادقة ومتاكدة انها حتجى بتجربة جديدة وخبرة كبيرة لانه الوطن دا مافى زيو اقعد عافية
Post: #58 Title: Re: بعدك الفريق اصبح خلا ..........عزة بتى يوصلك الله سالمة Author: بدرالدين شنا Date: 07-22-2007, 06:46 AM Parent: #1
غايتو أنا كان الله راضي علي وداير يفرحني بس الاقيها في السودان وحا يحصل بإذن الله الواحد الأحد
وياربي تديم عليها هذا الحب والود والصداقة التي بينها وأمها
ما إجتمع سلمى وعزَّة إلاَّ بدرالدين شنا ثالثهما
تحياتي
Post: #59 Title: Re: بعدك الفريق اصبح خلا ..........عزة بتى يوصلك الله سالمة Author: nazar hussien Date: 07-22-2007, 07:09 AM Parent: #58
يا سلمي الشيخ سلامة...(الواحد يكتب اسمك...طوالي يسمع هنا ام درمان) وموسيقي الصباح...الحلوة ديك...وازيدك ...كمان ريحة دعاش ومطرة رشاش خفيفة...
يا ربي ما تكون غاشيانا بي جاي...عشان...نسمع فيها صوت سلمي وريحة المطرة..
Post: #103 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 10:38 PM Parent: #59
نزار حسين ايها الحبيب ذكرتنى زمن ما برجع تانى وياريت يرجع بس مستحيل لانه كل شئ تبدل وما قلت لى انت وين عشان نجيكم بالجد ممكن بس ما تكون حته ممنوعة لك مودتى
Post: #99 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 08:20 PM Parent: #58
يا بدر التم ما بدر شنا انت بدر السما فى صفاك قول لى من عينى من خفاك يا حبيبى متى وفاك؟ متى سنلتقى يا بدر ؟ دى كم سنه ؟ اخر مرة اتلاقينا كنت فى الخرطوم فى وكالة سفر وكنت مسافرة تانى الا فى التلفون مش حرام كده؟ هسى انت فى الخرتوم تقوم يا سيدى تمشى باكر البيت تلاقى عزوز بيتنا عارفه ما بغباك وسلم لى على كل ناس بيتكم وبيتنا وتسلم
Post: #67 Title: Re: بعدك الفريق اصبح خلا ..........عزة بتى يوصلك الله سالمة Author: انعام عبد الحفيظ Date: 07-22-2007, 02:10 PM Parent: #1
سلمى يا حبيبة الله يوصلها بالسلامة
ومابتجيها عوجة وسط اهلها واصحابها
Post: #105 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 10:56 PM Parent: #67
انعام عبد الحفيظ الزولة المليانه حنية والق كان بقيتىقاعدة فى السودان خلى بالك من عزوز وامشى ليها اوصف ليك البيت ؟ لا ياخ بتعرفيهو براك
Post: #157 Title: Re: بعدك الفريق اصبح خلا ..........عزة بتى يوصلك الله سالمة Author: انعام عبد الحفيظ Date: 07-24-2007, 08:47 AM Parent: #105
تسلمي يا سلمى
Quote: كان بقيتىقاعدة فى السودان خلى بالك من عزوز وامشى ليها
ويا سلمى انا موجودة في الخرطوم
ما تشيلي هم عزة في عيونا
ح أمشي ليها وألاقيها
وأسأل منها تاني في وصية؟
Post: #68 Title: Re: بعدك الفريق اصبح خلا ..........عزة بتى يوصلك الله سالمة Author: مريم بنت الحسين Date: 07-22-2007, 02:28 PM Parent: #1
عزة بختك، قالوا الخرطوم غيوم كتيره ومطره من امبارح.. بس الله يعينك مع الطين..
تصل بالسلامة ان شاء يا استاذة سلمى، وما تفقديها ان شاء الله وما تغيب..
بنت الحسين
Post: #75 Title: Re: بعدك الفريق اصبح خلا ..........عزة بتى يوصلك الله سالمة Author: حيدر حسن ميرغني Date: 07-22-2007, 04:01 PM Parent: #68
يسلمكن الله
وبعنايتو يرعاكن
Post: #116 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 12:34 PM Parent: #75
حيدر الحنين يسلمك الله ويرعاك يا رب شكرا ليك كتير واتمنى ان تكون عزوز وصلت البلد رحلة تسل الروح طويلة طول قنب عافية
Post: #106 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 11:10 PM Parent: #68
مريم بنت الحسين شكرا ليك لكن مطرة السودان دى ذكرتن زول صاحبنا كان فى اشتوتغارت فى المانيا اول يوم جا السودان السحاب والغيوم بعد شوية طمبجة شديدة فقال من فوق اشتوتغارت ومن تحت عباسية
Post: #77 Title: Re: بعدك الفريق اصبح خلا ..........عزة بتى يوصلك الله سالمة Author: الملك Date: 07-22-2007, 05:27 PM Parent: #1
تصل بالسلامـــة
وما ترجع ذاتو
Post: #78 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-22-2007, 05:41 PM Parent: #77
ناجى الملك يا زول كيف الكلام دا(وما ترجع ذاتو) ما ترجع كيف يعنى ؟ والمدرسة البكملها منو ؟ والوحشة البسد خانتها منو ؟ والوحدة البونسها منو ؟ خليتها ليكم كم اسبوع ما تبقوا طماعين واوعه تسمم ليها (راسا) بى جنس كلامك دا هوى يا ناجى اعمل شخيت واقيف بعيد
Post: #79 Title: Re: بعدك الفريق اصبح خلا ..........عزة بتى يوصلك الله سالمة Author: الملك Date: 07-22-2007, 05:46 PM Parent: #78
سلمى
بطلى جرسة بنرجعها ليكم
... ...
عارفة نظرية اعمل شخيت وأقيف بعيد ما بتنفع معاى انا ذاتى شخيت ;D
Quote: لكنها حترجع بالسلامة وترجع ايامنا الجميلة يا سنا الروح يا مداما ويا عواطفنا النبيلة تهدى ليلاتنا ابتسامة من زمان بنقول حليلا يوم رحيلك يا حبيبى شفت كل الكون مسافر لاهزار فى روضة غنا لا زهر عطر دياجير لا تلاقى يروى شوقى لاحديث يجبر بخاطر الشهور ياريتا تجرى وكل يوم ياريتو باكر
العزيزة سلمى إن شاءالله سوف ترجع عزة بالسلامة و سترجع معاها أيامكن الجميلة ... حفظها الله لك و حفظكِ لها و دمتن في رعاية الله و حفظه من كل سؤ .... و إليك هذا اللحن بس ما تبكي.... أضغطي الزر للتشغيل..... كل الود..... هيثم...
Post: #108 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:37 AM Parent: #81
هيثم عبد العزيز العزيز يعنى تقول لى ما تبكى وتخت لى كل وسائل البكا ؟ بكيت النصيحة لله لكن بكا جميل غسل حزن او بعض حزن اعترانى كنت ما بسمع نادر خضر لكن مرة سمعته وحقيقة ما كنت بعرفو وسمعتو اول مرة رمضان الفات وعجبنى جدا شكرا ليك يا جميل
سلمى اخت الرجال نتمنى لعزة تصل بالسلامة وان يواكبها الحظ والسعد في كل خطوة تمشيها ويتم اللقاء مرة أخرى في داركم العامرة وسط فرحة وأهازيج وترحيب الأهل والجيران
Post: #117 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:05 PM Parent: #82
عمرعبد السلام اخوى كتر خيرك على كل دعوة جميلة وكلمة انيقة وجمايلكم ما بنعرف نردها متين من كترتها يخليكم لينا يارب شكرا ليك كتير ودامى
Post: #156 Title: Re: بعدك الفريق اصبح خلا ..........عزة بتى يوصلك الله سالمة Author: عبدالغني كرم الله بشير Date: 07-24-2007, 07:10 AM Parent: #117
المتعددة، سلمى...
صباح بشوش...
لعزة، تعود عزة
لمريم بت الحسين:
Quote: عزة بختك، قالوا الخرطوم غيوم كتيره ومطره من امبارح.. بس الله يعينك مع الطين
يحن الطين لرجليها، إنها حنة الوطن، لفجره الآتي..
عزة... فلتسعد عينك بالبسطاء، لا شك ذاكرتك محتشدة برؤية شعوب الآخر، ولكنك الآن، وعلى مدى الأفق، سترين بسطاء، بسطاء، بسطاء، كخراف المسيح، المذكورة في الانجيل، وضمائر الشعراء...
الأستاذة سلمى، حمد لله على سلامة وصول عزوز لأرض الوطن بعد طول غياب، والله ياسلمى ماطالباني حليفة، عزوزة دي رغم صغر سنها، أصلو مامفروض تشفقي عليها من السفر وحدها، والله بت عقلها يوزن بلد، وعلى الرغم من إني أنا فى سن خيلانها (سن احمد تقريباً ، وبالمناسبة ألف مبروك لأحمد الشيخ الزواج الميمون) بس كل ماإستشير عزوزة فيهو، ألقى عندها المشورة اليقينة، وربنا يحفظها ويغطيها، وإن شاء ربنا يرجعها ليك بالسلامة، موش وترجع ليك براها وبس، وكمان معها عريسها قولي معاي آمين.
عزوزة، والله فرحي بيك وإنت تطأئين أرض الوطن لايوصف، بعد طول غييييييييييييييييييييييييييييييياب، وإن شاء الله أياكم كلها سعد وهناء، وعليك الله ماتنسي ترسلي لينا رقم تلفونك فى السودان، علشان نهيئك فيه، والكتابة أصلو مابتكفى هذا الحدث المفرح العظيم.
Post: #121 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:39 PM Parent: #88
النذير ود امى انت وين الحى بيك؟ واحد اتنين (وكمان معها عريسها) انت قايل ما متمنية دا ؟ الله يكتلنى متمنياهو زى هلال العيد ويسمع منك ربنا ويجيبا لى عروس وافرح بيها وتفرحو معاى
سؤال جانبى انت وين هسى ؟
Post: #101 Title: Re: بعدك الفريق اصبح خلا ..........عزة بتى يوصلك الله سالمة Author: الملك Date: 07-22-2007, 10:13 PM Parent: #84
Quote: وقولي لي كراكة رايوة حيكتلها الشوق
يا حليلك يا راوية بقيتى تغلطى فى إسمك
... ...
Quote: نجو مشيت وين ياحبيب
الكهرباء قطعت وبرضو حضرنا الكورة فوق رأس الحكومة المعفنة دى
السودان بى جاى فرحان فرح
Post: #127 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 04:15 PM Parent: #101
يا ملك كورة شنو ؟ وكمان فرحانين؟ طيب لو جابوا ليهم (كاس ) تعملوا انقلاب؟ عليك الله كورة السودان دى كورة؟
Post: #111 Title: Re: بعدك الفريق اصبح خلا ..........عزة بتى يوصلك الله سالمة Author: nazar hussien Date: 07-23-2007, 08:36 AM Parent: #84
Quote: نزار حسين ايها الحبيب ذكرتنى زمن ما برجع تانى وياريت يرجع بس مستحيل لانه كل شئ تبدل وما قلت لى انت وين عشان نجيكم بالجد ممكن بس ما تكون حته ممنوعة لك مودتى
برجع الزمن الجميل
يا سلمي ما اظن مستحيل
المكرفون هو المكرفون
وكان طرتي ما بجيب صوت هديل
والرادي بي حجارو القدام مستني بس صوت الحمام
مترجي سلمي الشيخ سلام وتحية من قلبا وفي وعاشق لموسيقي الكلام
(ومن خلف المايكرفون سلمي الشيخ سلامة)
نفديك بالروح يا موطني...
ويا موطني...
لما كل ما انبتّ زهرة برحيق يدمن المخلوق عطره
تكتب فيه للتصدير مجانا
وتهدينا بديلا شوك كتره
(انا في بلاد...من شطها صيدت تلك اللؤلؤة البضة)
ويا مليون مراحب بك
Post: #129 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 04:28 PM Parent: #111
نزار الحبيب احكى ليك (صوت الاستحالة) مرة فى احتفالات المسرحيين بيووم المسرح العالمى السنه الفاتت اتصلوا على ناس اذاعة (اف ام ميه) ضمن مجموعة من المسرحيين على اساس اننا نقول كل واحد كلمة مشيت للاذاعة لمن دخلت الاستديو جانى المخرج معتذرا قال : المدير قال ما يسجلوا لسلمى الشيخ والمدير دا دفعتى اتخرجنا فى يوم واحدمن المعهد واول حرفه طارق البحر طبعا طلعت من الاستديو مرفوعة الراس لانى ما كان ممكن انحنى تانى حاجة اول ما مشيت اجرت الاذاعة معاى لقاء فى برنامج( نادى القصة ) وتانى برنامج اسمه(نجوم بعيدة) لما وصلت الحلقات بتاعة (نجوم بعيدة) الرابعة تم ايقافها والعذر ان السيد محمد حامد ادم قال (انه كتيرة على كم الف بتدينى ليها الاذاعة) ومع ذلك واصلت البرنامج حتى وصل الحلقات سته وكانت مسموعة جدا الشاهد الاخر انه السيد مدير الاذاعة انذاك (عوض جادين ) بفتكر لانى كتبت مقال عن الاذاعة انى (زولة متخلفة ) فقط لانى قلت انه (حرام اننا نرمى تاريخنا للظما ) وبنشر المقال فى يوم ا لمهم بعد داك منعوا دخولى للاذاعة والقصة تطول لذلك مستحيل ان اعود الاذاعة الا فى ظرف احسن يكون فيه العمل الاذاعى عملا مهنيا قائما على احترام متبادل بين المستمع والبرامج وادارتها
Post: #120 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:33 PM Parent: #84
(رايوة ) ازيك ياخ مشتاقين عديل كده وين الحى بيك ؟ لسه فى البلد الجميل؟ هدى كيف ؟ صحبتى جدا طبعا وتحياتى لسارة والوالدة (والمتفرج) والقاعد ساكت المتفرج دى كانت جريدة فى السودان وعزوز وصلت بالسلامة طبعا (مركبة مكنة مغترب) تحياتى
Post: #118 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:12 PM Parent: #83
تيسير الظريفة ياخ انتو ناس لو ما سماحتكم دى الزول كان البكا كتلو عديل لكن الله يخليكم
وبعدين يا الحنينة انا جيت بى وين؟ تقصدى ابوظبى ؟ تجى ولا نجى ؟ دا كلام لى عزوز انا بره
وإنتي الشفقة العليك شنو ماتصبري لحدي ماتصلي السودان
وتلفونك فى البحرين كام؟ والله نحنا شفقانين أكتر منك
Post: #94 Title: Re: بعدك الفريق اصبح خلا ..........عزة بتى يوصلك الله سالمة Author: Raja Date: 07-22-2007, 07:50 PM Parent: #90
سلمى يا حبيبة..
إن شا الله الدهباية تمشي وتجي راجعة بالسلامة
أقسمي معاها الشهادة........ لا إله إلا الله.....................
وربنا يحفظكم لبعض
عزوز.. خلي بالك من نفسك
Post: #123 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 01:54 PM Parent: #94
رجاء الحبيبة انشا الله المقام طاب ليك فى محلك الجديد وربنا يسعدك بت امى ويديك الفى مرادك ويخليك يا زولة يا فنانة وخلينا نسمع منك ونبل الشوق
Post: #96 Title: Re: بعدك الفريق اصبح خلا ..........عزة بتى يوصلك الله سالمة Author: محمد على طه الملك Date: 07-22-2007, 08:00 PM Parent: #90
Quote: هسى لمن اكمل كتابة اسمك تكون الطيارة وصلت
عارفه ياسلمي إسمي ده الفيرست نيم بس نص الإسم .. حالتو كده أنا مختصره علي إسمي وإسم أبوي وإسم العيله .. إسم الجد أسقطه ( طبعا للتكرار كعادة السودانيين ) .. عارفه إسمي ده أنا ما حسيت بى طوله وكرهنى الكتابه إلا لما كنت شغال في القضائيه .. علي زمنا القضاة كانوا هم المشرفين علي التحريات .. ناس البوليس ما كانوا يجوني بيوميات التحري الا بعد أرجع البيت .. كان عزرهم إني بكون أثناء ساعات العمل مزحوم بسماع الدعاوي .. تعالي شوفي إسمي كرهني الكتابه كيف .. بعد كل أمر او قرار اكتبه لازم اكتب إسمي وأوقع ، وإذا القرار إتكتب في عدد من الصفحات ، بكون ملزم أوقع علي كل صفحه بمفردها .. ضيفي علي الكلام ده التوقيعات العملتها في محاضر الدعاوي طوال ساعات العمل .. عارفه اخر توقيعاتي المختصره كانت كيف ؟ حرف م مشقلب ذي علامة @ . عموما أديتك إذن تكتفي بي محمد او ود الملك ذي ما بكتبو الأخوه . ..
إنشاء الله البنيه تعود ليك بالسلامة .. بذكرك ده تار الحجه ربنا يرحمها .. نسيتي لما كانت بتقول ليك ( أنا البصبرني شنو ) عموما بطلي الجرسه واللفيت جو البيت .. هاك أنا بريت ليك القلم ..
Post: #131 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 04:53 PM Parent: #96
الملك محمد او الملك حقا تعرف اسمى برضو فيهو مشكلة لكنها مشكلة طريفة لما اشتغلت فى الاذاعة فى الاوراق الرسمية اسمى طبعا مكتوب رباعى سلمى الشيخ احمد سلامة طويل مش ؟ صلاح الفاضل كان بغنى لى على وزن (مين قساك مين قسى قلبك) بتبقى (سلمى الشيخ احمد سلامة ) مش ؟ قمت قلت ياخ دا اسم طويل لمن يتم بكون برنامج براهو قمت قطعت الاسم بتاع عم احمد زى ما بقول ابوى لابوه بقى الاسم الهسى دا ودا زاتو ما ريحوه عميرى كان بسلم على بقول (سلمى الشيخ سلامة يا بلال على ) وصديقى الجميل الصادق شيخ الدين كان بسلم على (سلمى الشيخ سلامة سر ما بنفهمو ) وزول صديقنا كان معانا فى جريدة الاتحادى فى القاهرة بقول (سلمى الشيخ سلامة وسيروأ) وكل زول بقول اغنية حسب الايقاع اطرف امر فى موضوع الغنا مرة كنا فى اجتماع مع الراحل دكتور جون قرنق فى القاهرة وكان موجود الفنان محمد وردى والاجتماع طال شديد(اكتر من حداشر ساعة ) المهم قلت لوردى تعال نتجادع بى غناك قمت بديت قلت ليهو : ـ بريدك والله بريدك فرد لى ـ لو طلعت القمرة وجيت ولو حلفت برب البيت لئيم مش ؟ لكن ضحكنا كتير وكان حاضرا جمع جميل منهم من قضى ومنهم من ينتظر تسلم يا ملك
Post: #102 Title: Re: بعدك الفريق اصبح خلا ..........عزة بتى يوصلك الله سالمة Author: الملك Date: 07-22-2007, 10:17 PM Parent: #87
عزوز
... عليك الله ما تكوجيها بى شفقتك دى
ـــــــــ النذير حجازى
إنتا ما ياهو مرارة ذاتو
؟؟؟
Post: #109 Title: Re: بعدك الفريق اصبح خلا ..........عزة بتى يوصلك الله سالمة Author: تيسير عووضة Date: 07-23-2007, 05:23 AM Parent: #87
Quote: Hiiiiiiiiiiiiiiiiiiiiiiiii From Bahrain
Will be home soon
بحرين في عينك ماكان تجي معدية بي هنا
لكن ما مشكلة في الرجعة مش يا عزو ؟
Post: #112 Title: Re: بعدك الفريق اصبح خلا ..........عزة بتى يوصلك الله سالمة Author: AL BOOS Date: 07-23-2007, 10:39 AM Parent: #87
Quote: Hiiiiiiiiiiiiiiiiiiiiiiiii From Bahrain
Will be home soon!!
بالسلامة يا عزوز مع انو بعيدين بس متابعين والله
حتى لو بعدين من المنبر بقول عزة تكون وصلت وين يا ربي
Post: #107 Title: Re: بعدك الفريق اصبح خلا ..........عزة بتى يوصلك الله سالمة Author: محمد علي ياسين Date: 07-22-2007, 11:18 PM Parent: #1
Quote: محمد على يسن زمان امى لمن اجى مسافرة بتقول لى عافية منك والكلمة دى او الجملة دى ما هينة لانه رضى الوالدين نعمة ودايما بنقول الله يرضى عنك والديك ورضى الام دا بالدنيا وعافية منها عفويا يغتيها وينجيها ويزح كل عثرة ويقيف ليها سد من كل عوجة كتر خيرك عمر بيتك ويرضى عنك والديك
شكرا استاذة سلمى وعزوز محظوظة انها كسبت رضى والدتها عشان كده ما تخافي عليها سيحفظها الله في كل خطوة ولك ولها سلام وسلام
Post: #110 Title: Re: بعدك الفريق اصبح خلا ..........عزة بتى يوصلك الله سالمة Author: Mohamed Abdelgaleel Date: 07-23-2007, 08:23 AM Parent: #107
قبل فترة طويلة كنت مسافر السودان وكان التواصل بالخطابات .. وجاء المودعون ومليت شنطة جوابات .. واحد من المودعين قال والله ناس الخطوط بشيلو قروش في الوزن لكين لو كانوا بشيلوها في المشاعر قروشنا ما كانت كفت !!!
Post: #132 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 05:01 PM Parent: #110
يا محمد الجليل ياسلام على الجملة دى(والله ناس الخطوط بشيلو قروش في الوزن لكين لو كانوا بشيلوها في المشاعر قروشنا ما كانت كفت !!!) تعرف اجمل حاجة فى الدنيا المشاعر الصادقة مهما كان الزول (مفلس ) ماديا لكنه بكون اثرى من كل اثرياء العالم بالمشاعر ولولاها لما كنا ودا عصبنا البنقيف عليهو وركازتنا فى زمن الموات واللهاث فى درب الحياة الصعب تسلم من كل اذى (ونسمة ما تعتر ليك) دا تعبير خاص بى بالمناسبة وما بمرق الا للناس العزاز
Post: #113 Title: Re: بعدك الفريق اصبح خلا ..........عزة بتى يوصلك الله سالمة Author: فيصل نوبي Date: 07-23-2007, 10:48 AM Parent: #1
Quote: Hiiiiiiiiiiiiiiiiiiiiiiiii From Bahrain
Will be home soon!!
مفرض تكوني وصلتي هسي صاح ؟؟ يا ناجي سوق حجوج و أمشي المطار سريع
Post: #114 Title: Re: بعدك الفريق اصبح خلا ..........عزة بتى يوصلك الله سالمة Author: عبد الدائم سيد أحمد Date: 07-23-2007, 11:06 AM Parent: #1
تمشى وتجى بالسلامة وباين عليك اول مرة تفارقيها
Post: #115 Title: Re: بعدك الفريق اصبح خلا ..........عزة بتى يوصلك الله سالمة Author: Amira Elsheikh Date: 07-23-2007, 11:17 AM Parent: #114
Quote: وخلى بالك من زهورك ومن وطن باقيهو عندى ويا ناس الخرتوم اتوصوا بالبنية
نتوصى بس ياسلمى...؟؟ حتى اتفقنا مع عزة على كم حاجة .. بس هى تصل
وبعدين يا سلمى نهاية اليوم نركب ركشة مع بعض انا انزل محطة 4 وهى تنزل محطة 5
Post: #119 Title: Re: بعدك الفريق اصبح خلا ..........عزة بتى يوصلك الله سالمة Author: Adil Osman Date: 07-23-2007, 01:14 PM Parent: #115
اجازة سعيدة فى ربوع الوطن بين الاهل والصحاب.. وموية المطرة.. ونقيق الضفادع.. اعملى حساب الحيطان يا عزة.. ترجعلك بالسلامة بنتك يا سلمى الشيخ..
Post: #134 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 05:26 PM Parent: #119
يا عادل عثمان كيف ؟ شكرا ليك على الاغنية عندى معاها ذكريات جميلة فى مرة سالت مصطفى عن سرها فقال انه شاعرها حافظ عباس كتبها فى التخشيبة لانه تم القبض عليه فى (كشه) على اساس انه (وافد)لانه ما كان معاهو بطاقة ولما طلع اداها لمصطفى وغناها تصور انك فى بلدك (متهم انك وافد) مش حاجة تكسف ؟
Post: #136 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 05:51 PM Parent: #122
يا دور نقاس اخوى وحاتك اليوم العلينا دا هسى هى فى انبساطة حاسداها عليها والبورداب ملمومين فى حوش بيتنا مشهد فاتنى ناس ابراهيم الجريفاوى ووديدى بحندكوا فينى شفت كيف ؟ وهى تشيل وتبكى مرة اضحك ومرة ابكى ومرة تغلبنى القراية ولما اكتب لك وصية يا صبية الريح ورايا خلى من حضنك ضرايا او كما قال محجوب حبيبنا
Post: #124 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 02:19 PM Parent: #115
امييييييرة شفتى الجرة دى كيف ؟ مشتاقة للبقعة وناس البقعة ومشتاقة للمسرح وناس المسرح واول حاجة مشتاقة ليك اكتر من اى حاجة وقولى لعصام عبد الحفيظ صورنا ما طلعتها العملناها تحت الشجرة فى البيت ومعانا صلاح الزين واكتبى الى وطمنينى عليك وسلمى لى على محمود عبد العزيز وجعفر سعيد ومنعم الطويل وخلى عزة تمشى تتعرف على الناس السمحين ديل كلهم وابقى الف على المحبة
Post: #125 Title: Re: بعدك الفريق اصبح خلا ..........عزة بتى يوصلك الله سالمة Author: Emad Abdulla Date: 07-23-2007, 02:27 PM Parent: #124
تتجرسي و تجرسينا معاك ..
عزة ماشه لحضن أدفأ من حضن البلاد الطيرا عجمي . ما تخافي عليها .. لأنها بت جدعة و راضعة لبن أمها صاح .
هسع الكلام ما على عزة .. الكلام عليكي إنتي دي .. و الخوف عليك من كترة الشفقة و اللهلهة .
أركز يا أخينا . و ربنا يجمعك بيها قريب .. تامين ولامين يا رب .
سلمى إزيك ياخ .
Post: #126 Title: Re: بعدك الفريق اصبح خلا ..........عزة بتى يوصلك الله سالمة Author: Tragie Mustafa Date: 07-23-2007, 02:59 PM Parent: #125
عزوزه يا عسل قطعتي قلب امك
Quote: Hiiiiiiiiiiiiiiiiiiiiiiiii From Bahrain
Will be home soon!!
ناسنا الفيها الايام دي في السودان كان عزمناك عندهم لكن حددي الرجعه واكيد ما بيقصروا.
وعاد عليك الله يا بورادبلاالخرطوم كان ما خليتوا عزوز دي تغني لكم اصلا البت دي صوتها خرافي,انا ماعرفه سلمة لابده بالموهبه دي ليها.
ويا سلمى يا اختي ربنا يصبرك عارفه اول مره ادحل اولادي الديكير وكانت اول مره افارقهم بقيت ماشه اتلفت ..واحس انه ناقصاني حاجه لاني كنت مصاقراهم طوالي. انت حسه اديتيني الاحساس ده. ربنا يغتي عليها وعليك...ويابختك شكلك مرسلها تحضر استعدادات رمضان وتجيب لك الفيه النصيب..ويا بختك يا عزوز بريحة الحلومر. تحياتي لكم معا.
سلامات وحمدالله على سلامة الوصول للابنه العزيزه عزوز ونتمنى لها طيب الاقامه وربنا يطمنك عليها..
Post: #146 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 09:04 PM Parent: #128
ضحية الزول الزعلان من اسمو ياخ اسمك دا فدية كاملة يوم عيد الاضحى الناس كلهم بحتفلو بيك ما جبتو الضحية ؟ جبنا الضحية كمان معرفة بالالف واللام انت اجمل زول واجمل اسم تسلم ونفديك نحنا يا جميل لك مودتى
Post: #139 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 06:18 PM Parent: #126
العزيزة تراجى مصطفى اول حاجة(وعاد عليكم الله يا بورادب الخرطوم كان ما خليتوا عزوز دي تغني لكم اصلا البت دي صوتها خرافي,انا ماعرفه سلمة لابده بالموهبه دي ليها) الكلام دا لى فيهو سنين بحنس فيها واقول ليك سر الفنان محمد وردى مش ما بعجبو العجب ولا الصيام فى رجب وعجبو قاسى مرة كنت معاهو فى كاليفورنيا وسمع صوتا قام ضرب ليها تلفون واداها كلام اخير منه لبيع العصى عن صوتها وجماله لكن مين يسمع لغاية الجيتار اشترينا ومافى زول شغال بيهو الشغلة بعد دا الا اسعى لى كرباج وايدكم معانا دفرة
Post: #137 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 06:05 PM Parent: #125
العمدة الزين ليك وحشة وبالجد ما خايفة عليها لكن داقه جرس عديل امس الليل كلو سهرانه لكن الليلة اتيقنت لمن سمعت صوتها ونصه بكا ونصه سلام لكنها فى ادفا حضن مع اخواتها زى ما بتقول لكن عارف فكرة انها تمشى وما تلاقى امى دى داخلة عليها شديد كانت كل مرة اسمع ليك صوت بكاهافى الاوضة ادخل عليهاتقول لى : ـ امى يا ماما انتى شفتيها وانا ما شفتها واشيب واقلد وامسح الراس وارد مسح الراس يا عماد اخوى ما زال فى القلب شئ من غياب امى لكنها مشيئة الله كنا فى سيرتك امس مع محى الدين الزين الفنان جدا بسلم عليك اقعد عافية ود امى
Post: #133 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 05:18 PM Parent: #114
عبد الدايم ما اول مرة نتفارق لكن دى اكتر مرة حرقتنى عارف من امس مدورة الذكريات ويا عازة الفراق بى طال و(كيف تفارق الضفة) وصوت عثمان مصطفى واصوات الناس هناك تجينى وابكى واتمخت لكن العزاء انها مع اهلها وناسها
Post: #135 Title: Re: بعدك الفريق اصبح خلا ..........عزة بتى يوصلك الله سالمة Author: Nesta Date: 07-23-2007, 05:48 PM Parent: #130
اخيرا يا استاذة .. الان اتحدث مع عزة .. وقالت مشتاقة ليها لمطيرة ..
Post: #148 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 09:12 PM Parent: #130
عبد الله الشاعر الببكينى عارف انه شعرك فيهو حاجة ما بتخلى شعر الجسم كله يقيف اول مرة بكيت فى شعر حق زول كان شعر عثمان بشرى بكيت اليوم داك فى مصر لمن شهقت وبقينا اصحاب من يوماداك كل ماتهف ليهو عصيدة ولا قراصة يجينى هو وطارق محمد عثمان الجميل كانت ايام فى مصر ما بترجع وقرينا شعر الجن كان عندنا شبه ندوة اسبوعية نتقاسم فيها الشعر والغناء بصوت عزة وهيبة العميرى وعلاء الدين ابراهيم وياسر بسطاوى الله على تلك الايام الله يخليك يا زول لينا بشعرك وجمالك والقك
انشاء الله توصل بالسلامة .. ونسمع عنها كل خير .. دعواتنا الصالحات لها فى الحل والترحال..
عوض حمزة
Post: #149 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 10:57 PM Parent: #138
عوض اخوى خابراك تب ما بتقصر ما يقصرن ايامك ويعلى مقامك ياالعديل تلقى مرادك والفى نيتك تنعدل عليك جيهة ما تقبل
Post: #140 Title: Re: بعدك الفريق اصبح خلا ..........عزة بتى يوصلك الله سالمة Author: willeim andrea Date: 07-23-2007, 06:43 PM Parent: #1
سلمي يا اصيله....
ربنا يحفظكم ويخليكم لي بعض كلامك بيطريني الناس الزمان الفيهم كل الحنان والاصاله....... مودتي واحترامي ..........
........ اهو برضو نحن في غربه طويله ومضنيه وخطوات تائهه وزمان سمعناها غنو ... كل الارض منفي ... الله المستعان
Post: #150 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-24-2007, 01:42 AM Parent: #140
كل الارض منفى يا وليم اندريه زمان الفرقة والتبريح بسيبو عشان تشيلو الريح بسيبو عشان صحيح الذكرى بتوه عمرنا صحيح وانتى معاى لابندم ولا بقضى العمر تبريح اصلو العمر كان دربا مشيتو كسيح كان غرسا سقيتو بكى وقبضت الريح لكننا لن نقبض الريح بل الامل دائما هناك امل دائما فى نهاية النفق ثمة ضوء تابع ذلك الضوء وستصل اكيدة من ذلك ولك كل الامل والحياة القادمة
شرم الشيخ سلامة 00 وعزة توصل بالسلامة بدون عنى00آه بدون عنى 00 الصديقة الحبيبة سلمى بطلى جرسة وسيبك من الشفقة الزائدة والخانقة وعزوزة الان كبرت 0 تعرفى اخر مرة شفت فيها عزة كانت قبل نحو 17 عاما سافرنامعا من الخرطوم الى مدنى وكانت برفقة والدها الصديق جعفر نصر وكنت انت يومها فى اثنيا كما عرفت منها 00 شفت الزمن كيفن بسو
عادل السعيد
Post: #151 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-24-2007, 01:49 AM Parent: #141
عادل السعيد مشتاقة ليك عارف شرم الشيخ دى قصة طريفة عندنا بت صحبتنا فى القاهرة يوم جاهم زول متعود يزورهم باستمرار وانقطع منهم فسالته البت المفعوصة قالت ليهو كنت وين انت ماشفناك طولنا قال ليها كنت فى شرم الشيخ قالت ليهو دى اخت خالتو سلمى الشيخ ؟ كيف ايامك وكيف احوالك طمنى عليك ولكل المعاك فى الغربة قاعدين يسلم عمرك عزوز وصلت بالف سلامة وتسلم اخوى السمح
العزيزة سلمى انا زعلانة لانى شفت البوست متاخر وما فات شىء نحن فى انتظارها وعاوزين نشوفها لازم اكتبى لينا عنوانها ضرورى وان شاء الله تكون فى ام درمان تخياتى ام وضاح
Post: #152 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-24-2007, 02:03 AM Parent: #142
ام وضاح يا نور الدنيا عليك طلتك تفرح القلب وتسر العين عزة تلقيها فى امدرمان شايلة منها حته او هى شايلة امدر معاها ونزلت بيها طرف امبدة معظم البورداب بلاقوها وازعم انه التنسيق ما صعب وبرضو برسل ليك التلفون فى المسنجر وتسلمى من كل اذى يا ام وضاح وعزة كمان لك جزيل حبى
Post: #143 Title: Re: بعدك الفريق اصبح خلا ..........عزة بتى يوصلك الله سالمة Author: AL BOOS Date: 07-23-2007, 08:25 PM Parent: #1
يا جماعة البنيه ان شاء الله جمعت
Post: #145 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-23-2007, 08:53 PM Parent: #143
AL BOOS جمعت وطرحت وقسمت الليل بكا وحب وحنية مع اهلها مخاخيت من هنا لى امدرمان ودموع تعزى جنازة واحضان الدنيا كلها وااااااامغستى دا كله فاتنى لك حبى
Post: #147 Title: Re: بعدك الفريق اصبح خلا ..........عزة بتى يوصلك الله سالمة Author: AL BOOS Date: 07-23-2007, 09:05 PM Parent: #145
حمد لله على السلامة يا امة والله يجمعكم دايما في الخير امانة السلام
يا سلام عليك يا اجمل ام ... جرستك حنينه وتبكى بالله ما شاء الله الزوله العسل دى بنتك ربنا يحفظها ويقطيها ليك من كل شر وتمشى وتجيك مليانه حنيه
والله بالرغم من انى حزينه جدا هذه الايام , وما قاعده اخش البورد, لكن حنانكم دا كسر فينى ضلعه وخلانى توشك اخش
ذكرتينى يا سلمى اختى سلوى الحبيبه ما بتخلى اولادها يبيتو فى بيت ناس جدهم لانها ما بتقدر والغريبه هى عندها بتين وولد .. بقول ليها دائما بناتك الحلوات القلاص ديل بعرسو ويحيروك بعدين تعملى شنو
تحياتى ووحمد لله على سلامته حليمه
Post: #153 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-24-2007, 02:20 AM Parent: #1
حلوم الخاتية اللوم حبابك وربنا ما يوريك شين فى حياة الدنيا ويزيل حزنك ويشيل غبنك وعزوز وصلت واتكاملت اهلا يا حليلا وزى مابتقول امى البنات ضيفات قدر من يقعدن برضهن ماشات وشاحدة الله تجى بى ودالحلال الهايش وكباب الدرايش ونفرح بيها كلنا قولى امين اقعدى فى العافية التخدر حياتك وتهنيك وتنسيك الحزن ابدا
Post: #154 Title: Re: بعدك الفريق اصبح خلا ..........عزة بتى يوصلك الله سالمة Author: kamalabas Date: 07-24-2007, 02:28 AM Parent: #1
تمشي وتجي بالسلامة .. وأنشاء تقضي وقت ممتع ومنتج ..وتندغم عزة الانسان في عزة الكبري وتتشرب أصالة بلدها- رغم الاسي المتمدد -في ثناياها وحناياها- أي في حنايا عزةالوطن....ولك -أستاذة - سلمي خالص التقدير وربنا يقدرك علي وجع البعاد- المؤقت- ودمتي كمال عباس
Post: #155 Title: Re: بعدك الفريق اصبح خلا ..........عزة بتى يوصلك الله سالمة Author: nazar hussien Date: 07-24-2007, 06:54 AM Parent: #154
Quote: نزار الحبيب احكى ليك (صوت الاستحالة) مرة فى احتفالات المسرحيين بيووم المسرح العالمى السنه الفاتت اتصلوا على ناس اذاعة (اف ام ميه) ضمن مجموعة من المسرحيين على اساس اننا نقول كل واحد كلمة مشيت للاذاعة لمن دخلت الاستديو جانى المخرج معتذرا قال : المدير قال ما يسجلوا لسلمى الشيخ والمدير دا دفعتى اتخرجنا فى يوم واحدمن المعهد واول حرفه طارق البحر طبعا طلعت من الاستديو مرفوعة الراس لانى ما كان ممكن انحنى تانى حاجة اول ما مشيت اجرت الاذاعة معاى لقاء فى برنامج( نادى القصة ) وتانى برنامج اسمه(نجوم بعيدة) لما وصلت الحلقات بتاعة (نجوم بعيدة) الرابعة تم ايقافها والعذر ان السيد محمد حامد ادم قال (انه كتيرة على كم الف بتدينى ليها الاذاعة) ومع ذلك واصلت البرنامج حتى وصل الحلقات سته وكانت مسموعة جدا الشاهد الاخر انه السيد مدير الاذاعة انذاك (عوض جادين ) بفتكر لانى كتبت مقال عن الاذاعة انى (زولة متخلفة ) فقط لانى قلت انه (حرام اننا نرمى تاريخنا للظما ) وبنشر المقال فى يوم ا لمهم بعد داك منعوا دخولى للاذاعة والقصة تطول لذلك مستحيل ان اعود الاذاعة الا فى ظرف احسن يكون فيه العمل الاذاعى عملا مهنيا قائما على احترام متبادل بين المستمع والبرامج وادارتها
مع احترامي الشديد جدا جدا...لموقفك يا سلمي الشيخ...وأسفي كذلك من موقف دفعتك الأول حرفو طارق البحر...ومن بعده موقف وقرار العوض جادين...
لكن السؤال المحرق روحي...
هو الاذاعة دي بتبث برامجها لطارق البحر ام عوض جادين...نحن وين موقعنا من السمع لو ما روادينا ال في البوادي والخليات...كان عوض او طارق شغلوا ليهم اذاعة..
يشهد الله ان الاذاعة واصوات معينة من الاذاعيين وهم قلة جدا اصبحت بصمة خاصة في اذن المستمعين (وأذن دي قلتها كده لأن كل المستمعين يسمعون بأذن واحدة لسلمي الشيخ سلامة وآخرين قبل ان يطلقوا سعيتهم او ان يسعوا في مناكبها محتضنين متعتهم الوحيدة... هذا الراديو الصغير...
فالأمر ليس مستحيلا...وما تصعبيها علينا...يا سلمي...الناس البتسمع قادرة...تسترجع صوت سلمي...وصوت كل المحبوبين...
ولك ودي الاكيد
( التعديل لمسح جادين)
Post: #158 Title: Re: بعدك الفريق اصبح خلا ..........عزة بتى يوصلك الله سالمة Author: Nesta Date: 07-24-2007, 08:48 AM Parent: #155
Quote: وقالت مشتاقة ليها لمطيرة
كده كويس يا عزة .. أهو الخرطوم غرقت ..
Post: #159 Title: Re: بعدك الفريق اصبح خلا ..........عزة بتى يوصلك الله سالمة Author: سلمى الشيخ سلامة Date: 07-25-2007, 12:28 PM Parent: #158
شكرى موصول الى كل من تداخل معى من الاحباب والاصدقاء والصديقات ولكل من طالع هذا البوست قارئا واسفة ان لم اتمكن من الرد على احد ليس بغرض (التجاهل ) للجميع حبى ولعزوز ان تبقى بين اهلها سعيدة بعد كل تلك السنوات فى الغربة كل الحب مرة اخرى ودمتم ونتلاقى تانى الف مرة كل مرة
