سلمى الشيخ سلامة...." العيـد أمبــارك عليــكي"

كنت شافع قليّص.. وديمة مشعّف... وهابش... هباشة نشفت ريقي امي... وجننت حبوبتي الديمة دايحة وحايمة وكايسة لي....اول عيد تظكرو في حياتي... كنا في البلد .... يوم الوقفة....بلدنا جنب البحر في الشمالية... نحن بدو وقدر ما حاولنا نبقى مزارعين ونتسغف بساغافة المزارعين قلبنا... طب...بتظكر يوم الوقفة واخر يوم من رمضان... حلتنا كان فيها راديين .. رادي عند امحمد سيد الدكان ... والتاني هيل ناظر المدرسة.... كنا نسمع صوتن في الليل والغنا يجينا من بعيد:

بوبا علي تقيل
القمر بوبا....
عليك تقيل
الرقيبة قزازة عصير
الزراق فوقا تقول حرير
.......توب الزراق طوالي يظكرني ميمونة بت الخدر كانت سمحة وزينة....وتوب الزراق يخلوهو ليها. وكانت لما تمشي البحر تجيب الموية بتسوقني معاها ...تشيل جردل الموية فوق راسا تدفق الموية من الراس تنزل علي السدر...سدر مرسوم عليها رسم...يظهر لي عيان وبيان... ما قلت لك انا كنت شافع هابش وقليّص....ومتشوّبر...؟؟؟ قبال كدي حكيت في المنبر دا قطع رحط ميمونة دي.....وكيفن كنت قاعد عند كرعيها وهي ترقص..وانا فاتح خشمي بين نايم وصاحي...ولما وقعت فوقي وهي كانت دايرة تجيب قون... تظكري اقوان قطع الرحط يا سلمى؟..........
مناي كان يكون عندنا رادي ... وكل يوم اقول لامي " يمه ابوي قاعد في اتبرة.... لشنو ما يجيب لنا رادي؟"... تقول لي" ادمس نوم.. بيجيبو ليك.... يا الغبيان انت قايل الرادي هين؟ ابوك يجيب لو خمطاشر جنيه من وين ويسويهن في رادي؟ وانت واخوانك حفيانين وعريانين فوق لحمكم؟" سوعال يوماتي.. وانا يوماتي ادمس انوم... بعد ما اسمع شرح وافي من امي عن الحالة الاقتصادية ابوي.. يا سلمى كانت ماهيتو اربعة جنيه وربع عشان يشتري رادي داير لو ماهية اربعة شهور ..ما قتلك انا كنت قليّص وكمان بوبار ؟داير يجيبو لينا رادي عشان اتفلهم علي ناس بله ود العوض ما يجيو يسمعو عندنا الرادي..
متعود بعد صلاة المغرب اقعد جنب حبوبتي فوق التبروقة... العب بسبحتا واقعد اتسلى بتجاعيد ضراع ايدا والولحا.. واسعل وانا اهز فيهن" حبوبتي دا شنو؟".. تقول لي دا الكبر والعُجُوز" .. انتي عارفة؟ يا عاجبلك انا تربية حبوبات....
كنت مكجن المسوح... والحمام... ويوم الوقفة دا بشيل لو هم عشان الاتنين ديل...الحمام مكجنو عشان صابون الفنيك البيدخل لي في عيوني وفي نخريني مرات كتيرة.... اما المسوح يتوارا لي سمح انو ح اقع ازلق من العتنيبة...الفوق العنقريب... كنت لتمنى رمضان دا اصلو ما ينتهي....كمان كنت بدورو عشان جلابية العيد...الترزي في البلد قال ما بيخيت لنا الجلاليب بالدين.... حبوبتي مشت لو اقنعتو " الوليدات دايرين يفرحو بالعيد مع رفاقتن؟ وابوهن يا اخوي حسي يرسل القروش ونديك حقك... ابوهن يا اخوي شغال في اتبرا .. والله يسعلني عندو بنطلون وساعة يد..." بعد ما يسمع الترزي النضم دا والضمانات القالتن ليهو حبوبتي من الماهية القدر الهجمة دي وبنطلون وساعة يد... يقبل ويخيت لنا الجليليبيات....... كانت تقول لي وقت اقعد اهرج واجوط واقول ما داير استحما " كان ما استحميت .... ما بتلبس الجلابية الجديد".. اما المسوح كنت بقبل اتمسح عشان بخاف من التبانة... تقول لي حبوبتي " التبانة بتتبن الزول الحاف.. والبتلقاهو ما متمسح...وما بتحوم التبانة علا يوم الوقفة" ... كنت قايل التبانة دي واحدة من فصيلة السحاحير....وانا والله ما فايق تاكلني سحارية يوم الوقفة قبال البس جلابيتي الجديدة واضوقا. جلالبية بوبلين... قماش البوبلين كان مارق جديد......امحمد سيد الدكان عشان مشترين منو قماش الجلاليب بالدين برضو... قطع لنا من اول الطاقة مكتوب عليها"made in England"........الكتابة دي بعد الترزي خيت الجلابية وقعت في جلابتي وفي ضهر الجلابية.... عارف يا سلمى الكتابة دي مسخت علي العيد شوية... والترزي قال خلاها في الضهر عشان ما اشوفا واتحرق.. لكن ماس بله ود العوض كل مرة يكاوني يظكروني ليها عشان ازعل.. عليكي الله ما لي حق كان احميتن يسمعو في رادينا؟........
قلت يوم الوقفة... امي بعد ما جابت الطشت وحممتنا انا واخواني وانا اسب والعن في الزول المضر الاخترع الضابون دا وحبوبتي مسحتنا بدهن الكركار.... امي مشت علي الخُس" المتبخ"..وقعدت تعوس في اللقيمات.... وتنقنق اظنها كل مرة تحرق منها لقيماتاية... اصلها اللقيمات جات جديدة في البلد وامي شافتن اول مرة في اتبرا عامنول...شافت سواتن عند ام الحسين الشايقية..... وما اظنها قبضت سواتن سمح....نسيت اقول لك.. سرقت لي حبة حلاوة" ريا" من السندوق الجابتو حبوبتي بالدين برضو... سرقتها العصر ودفنتها في ركن الحوش عشان في الليل اقوم اقول داير ابول وامشي وابحت واشيلها واجي اتغتى بتوب الدمورية واكلها....نان انتي قايله شنو ؟... اليوم داك قدر ما كست للحلاوة ديك ما لقيتا...اتفتحت الواطا وبلعتا.... لكن قلبي حدسني وقال لي تكون شالتا حبوبتي واكلتا بالدس... ما قلت لك كنت قليص؟ وبعد مرات ماعندي ادب حتى لو في السر.....

ان دُرتي احكي لك يوم العيد سويت شنو؟ ادني خبر......

..و العيـــد أمبـــارك عليــكم كلـــكم

اها سويت شنو يوم العيد؟
وراجياك بحكاية حبوبة بخيته بت كبورة
دى يا سجيمان قصتا طويلة
لكن النحكيها ليك
اولك يا بادى
كانت متزوجة ليها زول اسمه امين التركى
ابياااااااض وهى زرقة لمن كحلية
اها يا سيد امك وابوك
قام عمك امين دا توفى
واتارينو عندو خزاين قارون
قومى يا حاجة بخيته اورثى امين التركى
بيوت ما بيوت ودهب ما دهب
الدهب دا كان بتعاروه منها النسوان فى العرس وهى العويرة تديهم ياهو
سرقوا دهبا ما خلوا ليها التكتح الا كان شوية دهيبات
بقت تشيلن فوق راسا داخلة مارقة
اها البيوت ما كتيرات
كتبت لمن ايدا وجعتا لاولاد اخواتا
والباقى دى قصة تانية
وما قلت ليك كانت مرابية ليها ضل
برضو قريشاتا اكلوهن المسلطين المابخافو الله
اها يوم حبوبة بخيتة دى ماتت (شوف رغم العز الكانت عايشة فيهو لكنها بتلبس الشقيانه ، وتوب الزراق ووكتين خلاس يعنى تتبرمك بتلبس توب الدمورية )
اها يوما الماتت دا نحنا نبكى ونضحك
لانه النرفعو كلو يجينا متخرت نازل شى تياب ابوقجيجة وشى رسالة لندن ، والنعلات المن لندن والمن الفاشر نرفع نحنا وتقع الحاجات ، والعناقريب يخربن خراب ابوى الا كان الخشب الحبال موية وسالت ، المرتب القطن براهو والدمورية المنجد بيها براهو ، وعييييييييك )
المهم يا زول حاجة بخيته الله يرحما يوم جابت لينا كعك
تشوف الكعك تقول دا مافى زيو ، العلبة الكبير حقت سعد الفوقا الزهور الكبار ديلاك ولونا اسود مدورة ومليانه ستف
لكن يا سجيمان الحق وضوق ليك كعكة واحدة ما بتجرى الحمام صوف
الله يرحما حاجة بخيته قربت تطفشنا من اكل الكعك لكن ربك ستر وخلانا دنييين
اها النوريك دراما موت حاجة بخيته
يوم قامت تمشى الحمام بالليل وتبنت البقجة البتختها تحت راسا الصارة فوقا الدهيبات
ورا قدام مافى فوق تحت مافى
بس يا سيدى جاها الله يكرم القارئين اسهال لمن ماتت
ربنا يرحما حاجة بخيتا لكن خلت لينا قصة ممتعة جدا
كل سنه وانت طيب وشكرا ليك نعمنك فقدتنى فى العيد

سلمي
سجيمان
كل عام وأنتم
والبلد
وناس البلد
وحكاويهم
بألف خير

سمية الحسن طلحة

Quote: سلمي سجيمان كل عام وأنتم والبلد وناس البلد وحكاويهم بألف خير

`وانت يا سمية والناس المن تالاكي....بالف خير ونعمة

اها... كب

فوق

&*

بجيكم صادي

هاكي...........

والله يا جماعة حيلنا اتهدا من الرفع.....

*

اها النشوف الخبر شنو؟؟

*

*

*

اها يا سلمى جيتك

خيرنا جانا وجاكي

اكل عشانا وعشاكي........ عشانا اريتو عشا اليابا... البوش.... خمسة رغايق نقطعن وما يجن في قعر الصحن...يا سلمى انا طالب الحكومة سعرات حرارية كتيرة خلاص حوامة ودواحة وخوف من المعايش وقطع قلب محقت سعراتي الحرارية القاعد الملما من البوش دا...وكبيبية الشاي اللت الصباح.. تاني يبقى لي السم... ..موية الفول يا الله سيد الدكان زادا لينا... يا سلمى اختي موية زمزم ما بيسو فيها كدي.....
ارجع لي نضم العيد الزمان...... قلت لك بعد ما يحمموني ويمسحوني غصبا عني... وبعد كواسة حبة الحلاوة والحسرة الفي قلبي اانتبه لي حبوبتي تصلي في العشاء وانتهت منو وقعدت وتدعي في ربنا وهي كل مرة تشهّق....: ربنا يغتي علي ويحفضني ويحفض وليداتي... بركة من صلى وقال يا الله....يا دايم تحفض النايم من خلقك الحايم"........نسيت اقول لك.. اشترو لي شبط شدة جديدة.... واكتر حاجة عاجباني فيها دربا... امشي واقعد اعاين للدرب وانا مبسوط منها....لبستها بعد المغرب وقلت لامي شيلي الفانوس وامشي وراي.. عشان اشوف درب الشدة... وقد كان.. حمت الحوش كلو وامي مسيكينة وراي بالفانوس..... لحدى ما ارضيت غروري.. ما قلت لك كنت شافع قليّص... ومتفلهم فلهمة شترا...وبوبار.....


يتبع......................

دكتور مصطفى محمود

كل سنة وانت طيب

الأخ الـحـبيب الـحبوب،
سـجيـمان،

تـحـية طـيبة،
وبـمناسـبة عيـدالفطـر أتقدم لك بأطيب تـمنياتي القلبية، مـتمنيآ ان يعيـده الله تعالـي عليكم وعلي أسـرتك ألـموقرة باليـمن وألافراح.
ولك الشـكرعلي رسالتك الرقيقـة.

وأنتهـز هـذه الفـرصـة وأبعث لأخـتـي الـحبيبةالـحـبوبة
سـلـمي ألشـيـخ باطـيب تـمنياتـي الـحـارة وأقول لـها كـل عام وانتـي فـي تـمام العافية وعـيد مبارك عليكـم.

أكرر مـودتـي لكـما.

أخونا الحبيب الظريف سجيمان

كل عام وأنت بخير ، وكل
سنة وأنت طيب ، والعيد
أمبارك عليك وعلى كل أحبابك
وأهلك والحواليك ..
سألت الله أن يسعدك دنيا وآخرة
مثلما أنت تسعدنا بهذه
الحكاوي التي تقطع المصارين
من الضحك ، وتذهب عنا بعضاً
من رهق ومآسي الغربة .
شكراً ليك يا دكتور الضحك
والفرفشة ، وزيدنا كمان ياسيدنا
الشيخ من قلاصتك وشقاوتك زمن
الجهل ، حتى تحفز أختنا سلمى
للمزيد من حكاويها والتي لا تقل
أبداً روعة وألقاً من حكاويك .
ربنا يحفظها لينا برضو ويسعدها
ويوفقها في كل خطوة تخطوها في
حياتها والتي نرجو أن تكون سعيدة
دوماً .

أختي سلمى الشيخ ،

كل سنة وإنتي طيبة وعيد سعيد
عليك وربنا يحقق أمانيك ويديك
الفي مرادك أيتها الأديبة العزيزة .

محبتي لكما ،


( ليمو )

سجيمان و سلمى
كل عام وأنتو بخير ، وكل
سنة وأنتو طيبين ، عيدسعيد

سيجمان
سلمى
العيد مبارك عليكم
محبتي
مودتي
ومشاعري
ليكم هدية

السنى الجميل صحبى فى الزمن الصعب
كيفنك
طاب معناك البلا ماجاك
متذكر يوم العيد فى الجيزة
ديك ايام بطعم الابرى الفى الجك الفيهو التلجة قاعدة بى فوق واللون خاتف لونين
ايام كان محمد حامد شداد يلهبنا بكلامه الجميل حول الصوفية والبراءة
والباقر موسى يشعلنا باغنياته الجميلة
وترانيم العود وتقاسيمه يهدينا اياهاسيف الجامعة
ايام كان الضحك عنوان هو بيتك
وبيتك كان مهبطا للجميع يغشونه فى الرايحة والجاية
يجيئون من كل حدب وصوب
لا تمل صحبتهم وتباشرهم بابتسامتك الجميلة
يوم العيد ذاك حين (خبزت )لنا خالتى ستونه ذلكم الخبيز الفريد
وتلوته بخبيز اسعد اصحابك وخاصة صاحبك الذى اصر اننى لا يمكن ان اكون صانعة لخبيز او طبيخ
وتحديته ونزلنا الى سوق الجيزة وجلبنا كل مواد الخبيز و(شاله ) معه الى الاسكندرية
وبت اخبز لكل من ياتى الى بيتك الذى اتمنى ان لا تنطفى ناره
ولك حبيب الروح كل المنى ان تكون سعيدا دائما

ملحوظة
الف مبروك على فوز برنامجك الاذاعى (عندما كنت صغيرا )
وبالحق استمعت لحلقة مع الاستاذ الخاتم عبد الباسط او عبد الباسط الخاتم
وكانت حقا حلقة ممتعة
دائما من نجاح الى نجاح

لكن خلينى ازعلك منى
ما عجبنى مسلسل جارو لانصا ولا محتوى
لانى استمعت اليه خلال رمضان
ولم يكن فيه ما يلفت سوى المحاولة الخائبة لشاذلى عبد القادر ان يقول انه كاتب كوميدى
عموما لك التجلة مهما كان الامر فانت قامة فى التمثيل اتمنى ان تجد النص الذى يعبر عنك روحا واداءا
ولك تحياتى وحبى

محمد السني دفع الله شخصيا؟؟؟؟

حبابك... حباب الزول الاملنا فيهو كبير... في الدراما.... الزول الراجنو يمرقنا من جحيراتنا... انت والاستاذة فايزة عمسيب

كل سنة وانت بخير والدراما بخير طول ما انت حاديها

Quote: اكل عشانا وعشاكي........ عشانا اريتو عشا اليابا... البوش.... خمسة رغايق نقطعن وما يجن في قعر الصحن...يا سلمى انا طالب الحكومة سعرات حرارية كتيرة خلاص حوامة ودواحة وخوف من المعايش وقطع قلب محقت سعراتي الحرارية القاعد الملما من البوش دا...وكبيبية الشاي اللت الصباح.. تاني يبقى لي السم... ..موية الفول يا الله سيد الدكان زادا لينا... يا سلمى اختي موية زمزم ما بيسو فيها كدي.....

الله البوش ده لذيذ جدا..لكن المشكله انك بس تاكل فيهكتير وبعدين تحس انك مليان خالص..
أنا بحبه من غير زيت سمسم وممكن لو لقيته آكله كل يوم..بس يشرط ما أنا الأعمله زول تاني يعمله..يخيل لي لو عملته بيكون ناقص طعم..

لكن هو ليه سموه بوش؟؟

منى خوجلي

Quote: لكن هو ليه سموه بوش؟؟

انا والله الليامات دي ماسكاني حنكشة...نسيت البوش.. كدي اسعلي سلمى دي

محمد صباحي
ود اخت بكري
هيع....

انت برضك هيع معاهو

Quote: سجيمان و سلمى كل عام وأنتو بخير ، وكل سنة وأنتو طيبين ، عيدسعيد

كل سنة وانت والمعاك كلكم طيبين يا حمادة

عبد الحليم التلب

شكرا للنضم السمح

واهلنا بيقولو النضم الحلو بخور البطن

وانت بخرت بطنا طب

كل سنة وانت طيب والمن تلاك طيبين

بكري الصايغ

كل سنة وانت طيب

وربنا يحقق الاماني كلها

*

عصام الصايغ
سجيمان مالك بقيت تطربق ميمونة دى لحست راسك مش؟
الكاتب بكرى الصايغ ود امى
حلاوة ميمونة دى فيها شنو؟
كدى شوف لينا القصة دى قبال ما الزول دا يزعل ويحرن
وعصام الصايغ دا دفعتى فى المعهد

وطبعا كان صديق عميرى شديد وبعد داك بقينا اصحاب (لزم)
المهم يا سيدى (الفا الشمس قبال تغيب )

الاستاذ بكري الصايغ اعذرني عليك الله

شكرا سلمى

انتي عارفة يا سلمى..... قبال ارقد وانوم ليلة الوقفة.. جبت الشدة والجلابية الجديدة وحشرتهن تحت العتنيبة ورقدتا فوقنا....وكل مرة ارفع العتنيبة واعاين لهن... واخد لي ضحيكة ما جاتا شي...وانا متكيف طب....صحيت الدغش مع البياح....والضو يا دوب يوريني تحت كرعي..... حبوبتي اتكفلتت ومشت الزريبة تحلب النعيجات لشاي الصباح...لحقتها في الزريبة بعد ما اطمنت علي الشبط الشدة والجلابية البولبين الجديدة..ولقيتا زي كل مرة تحلب وتهرج وتنضم مع النعجة البرقا و كل مرة تديها رصعه في صفحتا" انتي... انتي.. طق طق... الله يازاكي يا المطلوقة".... اصلها كانت نعجة برضها ما عندها ادب.... اول ما حبوبتي تقعد في الواطا وتحلب باقي النعجات تجي النعجة البرقا وتلحس راس حبوبتي .... لي حسي انا متمحن العاجب النعجة دي في راس حبوبة شنو؟...مليان شيب وشعيرات مكوفتات...ومغزوزة في نصهن شوكة تمر...اصلها قالت الشوكة دي بتطرد بسم الله من جنبها....برضي ماني عارف بسم الله داير منها شنو؟؟؟.......حكت لي قصة الشوكة دي...سعلتها" يا حبوبة بسم الله دا داير منك شنو؟. اكان مو صوبو هافي عليهو؟........ يخلي ميمونة بت الخدر ويجيكي؟" رصعتني فوق ضهري وقالت لي" الله يجازيك انت يا المطيميس".....ما قلت لك يا سلمى انا كنت شافع قليص.. ومطيميس برضو

النضم لسه ما كمل

لذيــــــــــــــــــــذ لذييييييييييذ يا سجيمــــان !!!
الله يديـــك العـــافي .

محمد البيلي

Quote: لذيــــــــــــــــــــذ لذييييييييييذ يا سجيمــــان !!! الله يديـــك العـــافي .

ويعافيك..... يا البيلي

كنا واقفين وين يا سلمى؟؟؟؟؟

اهاااااااتك.......

بعد ما جبنا اللبينة..من الزريبة.... جينا لقينا امي علبت النار بالقشقش...وشدت الكفتيرة فوق النار...اللدايات كان من دراب تلاتة درابات.... وقعدت حارسة الشاي يفور... شاالت اللبينة من الكادق وفورتا في حلة براها.... وبعدين بدت تكب لنا في الشاي..... وانا مستعجل خايف العيد يفوتني.... واكورك فوقا" انتي ديمة تتاخري كدي يا اخي...... حسي العيد يبقى فاتني".....عاينت لي وقالت لي " كدي انت حسي امشي غسل وشيك دا"... اهرج واقول لها" البارح دي ما غسلتو... ساعتي الاستحميت".... تجرني وتتلني من ايدي وتوديني علي الزير وتنشق لها كوزين فوق وشي وتمسحو لي بطرف توبا....البس جلابيتي الجديدة واتقشط في الشدة الجديدة برضو... ويجو ناس بله ود العوض يكوركو لي... عشان نمشي محل صلاة العيد...صلاة العيد يا سلمى يا اختي كانت جنب المقابر.... في طرف المقابر الغربي....نتلملم نحن ...ونحن ماشين فوق الدرب كل شاقع مننا يقطع لو عصاية سلم.. ويشيلها في يدو....العصي عندنا كانن بيزيدن الوجاهة والسماحة...وصلنا بكان الصلاة... الناس البيجو من بكنات بعيدة بيجو راكبين حمير... الامام بعد ما اتوكد انو الناس كلها جات بدا في الخطبة...نضمن نحن شايفنو لا في السما لا في الواطا... وانا كنت مستعجل متين الامام ينتهي... انت قايلة عشان شنو؟... عشان انزل الحلة وامشي اعيد علي ميمونة بت الخدر... شفتي الطمسة دي عليكي الرسول؟.....انتهى الامام ونزلنا وانا مشيت دخلت بيت ناس ميمونة شافتني من بعيد وضحكت وقالت" صلاتي علي النبي يا سجومي..... سماحة السرور واريتو زي الوليدات" باقي انا كنت نضيف ومستحمي.. وميمونة طولت ما شافتني مستحمي...." اريتو زي الوليدات..كدي ..كدي... صلاح بن البادية يقصر"..تقصد يعني انا بشبه صلاح بن البادية..... يا عاجبلك انا لما كنت صغير في جهلي الناس لي حدهن قاعدين يقولو بشبه صلاح بن البادية...علا حسي اسختا واتبشتنتا...امشي علي ميمونة وانا ضاحك فاتح خشمي للاخر وتسلم علي في جضمي وتبارك لي العيد.... وحات الله يا سلمى اسمح شي في العيد داك كان سلام ميمونة لي في جضمي.... ما قلت لك انا كنت شافع قليص ومطيميس؟


يتبع.....

سلمي
عادل
كل عام وأنتم

الدكتور عادل سجيمان
والرائعه سلمى

كل سنه وانتوا طيبين وكمان زوار بوستك الجميل دا
والله يجازى محنك يا سجيمان .. غايتو انتا فى البوست دا متجلى
على الاخر وبحس بيك انو بتكتب وانتا فى مزاج عال العال

Quote: اشترو لي شبط شدة جديدة.... واكتر حاجة عاجباني فيها دربا... امشي واقعد اعاين للدرب وانا مبسوط منها....لبستها بعد المغرب وقلت لامي شيلي الفانوس وامشي وراي.. عشان اشوف درب الشدة... وقد كان.. حمت الحوش كلو وامي مسيكينة وراي بالفانوس..... لحدى ما ارضيت غروري..

يحي بن عوف

Quote: سلمي عادل كل عام وأنتم

وانت بخير يا يحي

قعدنا اترصينا فوق عنقريب في دانقة ناس ميمونة بت الخدر... وانا اصلي عيني دي ما نزلت منها.... دخلت علي العوضة وجابت لنا صندوق الحلاوة....كانت تشيل حبة وتدي واحد واحد في ايدو...باقي نحن كنا شفعن طبعنا كعب.... ان قالت شيلو براكم نقعد نتخاتف فيها ونشيلها كلها.... ادت الوليدات كل واحد حبة حلاوة واحدة....علا انا ادتني حبتين حبة زيادة..... خلي بالك يا سلمى ميمونة دي كانت بتريدني علا ماها قادرة تبوح....وشايفاني صغير عليها علا انا كنت بقول في سري "والله انا لا صغير لاشي ..بس كدي هي كان مرا تفتخ خشما" ما قلت لك انا كنت شافع قليص وما عندي ادب؟....اكلت حبة والتانية حفضتها... ومشيت دسيتا عند اهلنا....والمرة دي اتاكدت انو حبوبتي ما شافتني دسيتا وين.... قلت لك انا شاكي هي الشالت الحلاوة يوم الوقفة.... تظكري؟؟؟.....خمسطعشر يوم وحبة الحلاوة ديك في جيبي ..حلاوة ميمونة ما بتشبه حلاوة باقي الناس...وحات الله طعما كان براهو..مع انها كانت حلاوة "ريا" زي اللتنا.... اللتنا بقت لي كعبة وما عندها طعم ضُمة....
مرقنا من اهل ناس ميمونة...وانا مرقت اخر زول...ماني داير امرق بي هينة....بله ود العوض منعامنو مكجني وحاسد...مرقتنا قعد يكاوي فيني.... ويقول لي" ويييييييي.....المرا سلمت عليهو في جضمو"..... انتي قايلة شنو؟....السلام في الجضم كان عندنا فيهو راي..وراي كبير...الولد البتسلم عليهو مرا في جضمو ..خرب طب..وبقى ما فيهو فايدة.... انا اتحرقت وزعلت... واعكل بله في كراعو وارميهو في الواطا...ونتخانق زين.... علا هو قطع لي جلابيتي جنب الرقبة.. وخرب الخياتة... وانا قعدت ابكي واكوريك" شرطت الجلابية يا ود الغلفا؟....والله الليلة ما اخليك"...جانا عمي جاد السيد حجزنا من بعضنا...وقشط كل واحد قشطتين بجريدة تمر......

يتبع.............................

عاد يا سى جى حقك غلب وقطع السلب وقلة ادبك ما شفت زيها
لكنها قلة ادبا سمحة تب الخلتك تكتب
اكتب وقول خسمتك
وراجياك وحكاويك ما بتكمل للحول
اقعد عافية

سلمى كل سنة وانتى طيبة

بعد ما اشكلنا انا وبله واتعفسنا وادمسنا واتملينا واطا...مشينا كلنا كل شفع البلد... وانا لحسي متحرق في جلابتي الشرطا بله.. مدخل ايدي في جيبي وكل مرة ادي حبة الحلاوة اللت ميمونة تبنة.. واتظكر وشي ميمونة ساعة ادتني ليها وهي مدنقرة وكيفن انا لما مديت ايديا وشبيت اشيل الحلاوة ضفايرا وقعن فوق راسي... كانن شبال بلا صفقة وبلا دلوكة.. شبال جاني هوبلي....النوصفك ميمونة يا سلمى .. لاها الطويلة العوقة ولا القصيرة المعولقة.. لا صعيفة ولا غليدة..ضمير زي حجاب الملبسنو لاختي الصغيرة مع الدريسة..الكرعين كضاب اليقول فيهن عرقوب واللا عضيم شيطان واللا ركبة..تقيلة رزينة ان دخلت عليكي دخول الضل من القيف لي حجرة البحر....وان نضمت تشحدي الله وفقرا الدنيا لحدهن ما تسكت.. وان سكتت صورة تقعدي تعايني فيها ما بتشبعي..الونسة مقعدة..لا شليقة لا لفيفة لا خفيفة... النضم كلمة كلمة .. يدخل جوفك زي نقيط الدريب يرد العافية...نضمن حلاتو علا فيهو ان نضمت تقولي لي ناس السكري يا ناس هوي اطعنو حقن الانسولين قبال ما ميمونة بت الخدر تنضم...السدر مجوز قطاطي السكة حديد..الرقبة لا محزحزة لا فيها عرقن بين ولا عصبتن مفندرة.. مساوية بي مسطرينة....وان قبلت وادتك ضهرا... تحلفي تقولي مافي ضهر كتف وكفل بس...هضليم شعرا يمسح الفنايد بشويشي..موجة ضحوية شتاء في البحر الشرقي...عليك الرسول يا سلمى عايني جنس النضم دا؟. باقي لك انا خاتي كان حفضت حلاوتها خمسطعشر يوم؟؟...ما قلت لك انا كنت شافع قليص و ما تشوفيني كدي امانه مو فنجري؟...

ترويحة

كل سنة و إنت طيب يا سجمجم..
كل سنة و إنتي طيبة يا سلملم..

ربنا يحقق أمانيكم

أها...
تموا نضمكم السمح دا...

يا الناس الحلوة كل سنه اونتو طيبين
غايتو دى حكاية متل حكايات شيخى سجيمان


الشيخة
البنية الخديرا ومشلخة منو ليك فى الاهل ؟
والراجل اللسانو الدغ وبنطق الراء زى الميم بتعرفيهو ؟
قبل تلاته شهور كنتو فى الكنيسة ؟
الكجور ما قدر يعمل ليك حاجة ؟
ساجورك عاصى يا بت امى لكين بمرقوا ليك
امراة فى بداية العقد الخمسين من عمرها ،بتحاول تخفى سنها اصلا ما بتتكلم عن الزمن العاشتو ، ولا كانت مع منو ، لكنها تصر ان العمل موجود ، العمل عمل رب العالمين يا بنية قالت لى :
( تعرفى لمن بديت الشغل دا وبقيت اداوى الناس ، ما زمن بعيد )
لكين يا الحنينة الله ما قال كدى يعنى الدجل ما قدر كده لاحظ انها متعلمة ودارسة لكين يا قول امى القلم ما بزيل بلم المهم انها قالت بتعرف ما فى الصدور ، ودا شيتا رب العالمين البعرفو ، صحى بتقول ليك حاجات فعلا حصلت لكنها ممكن تحصل لاى ابن ادم وحوا فى الدنيا دى ، العرس والطلاق ، الخطوبة ، الولادة دا كلو من رب العالمين لكين القصص البتحكيها تشيب الراس ، ما لانها مستحيلة لكين لانو فيها خيال عالى يعنى كان كتبت لينا دراما بالخيال دا ما كان بقينا منتجين من البتسوى فوقو دا ؟

سلمى يا سلام انا منك اه

Quote: غايتو دى حكاية متل حكايات شيخى سجيمان

شيخن قوي وسرو باتع لميتي فيهو... امسكي قيهو

ممنكن

Quote: كل سنة و إنت طيب يا سجمجم

وانت طيبة... والقابلة زي ما داير

الاخ عادل ( سجيمان)
والاخت سلمي الشيخ سلامه
وكل ناس البورد وكل السودان

مكى العزيز ياخ وين عيديتك لى ؟ يا ولد دحين فى الحسبة كدى ما خالتك ؟
منتظرة منك عيدية
كل يوم وانت طيب

كل سنة وانت طيبة أيتها القديرة الشفافة...

الأستاذه سلمى لك تقديري دوماً ومودة لا تقاس بمكيال


أطيب التحايا أخ سجيمان
وكل سنةوانت طيب

Quote: الاخ عادل ( سجيمان) والاخت سلمي الشيخ سلامه وكل ناس البورد وكل السودان

`مكي كل سنة وانت طيب

قلت لك....مرقنا من بيت ناس ميمونة... وبعد الشكلة.. حمنا فوق بيوت الحلة جت...ما خلينا بيت...وعيدنا عليهم لحدهم...ومشينا محل الحيقلو... والحيقلو اصلها" الحق له"....ودي محل مديح.. ناس يتلمو يقعدو يمدحو... بالطار والطبل...والنوبة....جيتنا ووقفنا... جانا المقدم.. المقدم دا يا سلمى نائب الشيخ الجعلي قي بلدنا.... انتي عارفة نحن كلنا قاعدين نريد الشيخ الجعلي وما بنرضى فيهو نضم...تب... والينضم في الشيخ الجعلي الله قال بي قولو... انضمي في الله زي ماكي دايرة علا الشبخ الجعلي اوعك تطريهو...المقدم جانا وقال لنا" يا جنون اقعدو عاقلين... اوعكم تلخبتو المديح.. البي يلخبت المديح الشيخ الجعلي بيسختو.... " علي طاري الشيخ الجعلي..... اتظكر سافرنا فينا كمين من ولد لبت لكدباس ونحن صغار...كل واحد شايل لو قلم رصاص في جيبو.. عشان الشيخ الجعلي يقرا عليهن..عشان ننجح... ونبقى شطار وكبار...مشت معاي حبوبتي... هي اصلها باقية فيني عشرة.. ما قلت لك انا تربيت حبوبات...قالت لي وقت ندخل علي الشيخ الجعلي اوعك تطلش وتسوي متل نضمك الزي خياتة القرعة والقحف دا...وتسكت ساكت.. ملصت نعلاتا.. وانا ملصت نعلاتي ودخلنا.... علي الشيخ.... وحات الله يا سلمى انا زي الاكني داخل لي انترفيو... ارجف وخايف من راسي لي كرعي...قلت لي حبوبتي انتي كمان اوعك تشتكيني للشيخ الجعلي وتقولي لو الولد دا هابش ولفيف وواقف علي حيلو...لكن حبوبتي حدستو الشيخ عاين لي ومعطني سوطين في راس قنوني.... مرقت منو وشاكلت حبوبتي قالت لي من صحها" هو دقاك فوق راسك عشان يمرق الجن الفي قنيقينك دا"....عارفة كدباس يا سلمى قدر مافي مجنون علي ضهر الدنيا كان فيها.... علا يا سلمى الشيخ الجعلي كان ماسك كترت ناس عييييييييك....وكلهم يكل فيهم...لكن فيهم ناس كتار مكتفين... بجنازير... قالو اصلو الجن بكيتفوهو ويدقوهو... يشدو المجنون علي شعبة...ويكتفوهو بجنزير.. والشيخ يجي ويقعد يقرا عليهو ويمعطو بالسوط....... يا خير وبقى نصيح يا جنا بي زمانو...لقيت لي واحد منهم ماشي ناداني وقال لي" امسك العناق النمشطا ليك " العناق يا سلمى هي الغنماية الصغيرة دايرين اجيب لو العناق عناق يتحكر ويتقلقل في الواطا ويقعد يمشط فيها.... شفتي الجن الكلكي دا؟.....حبوبتي مشت سلمت علي واحدة مرا مكتفة برضو وشعرا منكوش... وقعدت تنضم معاها وهي تبكي....اتاريها دي واحدة تبقى لينا جنت يوم عرسا يا كافي البلا... قالو اول ما دخل العريس عليها.. قلت لها ياحبوبة هو راجلا كان منو؟....قالت لي كان البشعة التوم ود نفيسة.....نان التوم يا سلمى توم السيح والريح.....شين شناة الحطبة... وحات الله يا سلمى يطلقوهو في الخرتوم دي علا يجننا كلها....قالت حبوبتي العروس ما كانت دايراهو ودعكت ايدا في الواطا دي ..منو.... علا ابوها واخوانا جبروها عليهو...ويوم قطع الرحط ابت ترقص.. مشو حدسو اخوها الكبير اخوها قال لهن حدسنها ان ما رقصت بيجي يكسر لها رقبتا..... مسيكينة رقصت.لكن رقيصن بلا نفس لخبتتو كلو... والبنوت قعدن يغنن لها الغنا كلو...والتوم فرحان هايش ويبشر....التوم دا عرس لو واحدة تانية... لكن تشبهو وباقي لي لنهاية السنة دي واحد فيهم قطع شك يجنن التاني......ماقلت لك كنت شافع قليص وما عندي ادب ضمة..



يتبع......

قاااااادر الله

سلمى...

الانجما شوية... وبجيكي صادي

تسلم يا سى جى

وتسلم سلمى

وكل سنة وانتوا طيبين

تحياتى

مهيرة

Quote: تسلم يا سى جى وتسلم سلمى وكل سنة وانتوا طيبين

تسلمي انتي يا مهرة خيل القبيلة

يا اصيلة....

وكل سنة وانتي طيبة

ونحن ماشين علي بكان الحفلة " الحقلو".. ومن دوب ما وصلنا انا والجنون المعاي... نحدسك شوية وقت اصلنا جبنا سيرة الشيخ الجعلي والفقرا..اهلنا كانو يا سلمى بيعتقدو في الفقرا عقيدة قوية.. الفقرا الحيين والميتين... مافي زول ينضم فيهن مافي زول يقول فعلتن وتركتن.. عندنا زوارة ونحن صغار.. كل ناس بيت عندهم فقير ميت بيمشو يزوروهو ويقعدو عندو ويضبحو الضبايح.. كانت اغلبيتها عتان جمع عتوت..ويسو ليهو بليلة بليلة عيش... بليلة تكافي البلا...ويقعدو ياكلو ويندهوهو وينضمو معاهو تحلفي لما تشوفي المرا تنضم فوق القبر تحلفي تقولي قاعد يرد عليها...نحن يا عاجبلك من زمان عارفين طريقة النضم في الموبايلات.. تراهو من نضم اهلنا مع قبور الفقرا...اها نحن عندنا فقير قاعدين يزوروهو اهلنا من جدودنا... قبرو المدفون فيهو مسافتو خمسة وعشرين كيلو من اهلنا.. يعني نقوم الدغش ونصلو نصت النهار .. بالحمير..ساقوني ليهو .. قمنا الدغش انا ومعاي اخواني اتنين صغار مشينا مع اعمامنا اتنين فوق تلاتة حمير...حبوتي وامي سون لنا قراصة بلح في الليل.. الصباح شليناها لفيناها في كورية بدلقان ومشينا...وصلنا الفقير دا... ونزلنا عندو...اعمامنا حلقو لينا كل واحد صلعة.. دقلشونا دقليشة سمحة...والكبير في اعمامنا قعد نضم مع الفقير فوق القبر ويسعل فيهو يحفضنا ويغتي علينا من كل شر..وانا كنت اعاين لو واعاين للقبر وبيني وبين نفسي قلت عمي دا ظانيتو مو نصيح...شالو الشعر الحلقوهو من روسينا وختوهو فوق الفقير ومعاهو قراصة التمر ومعاهوشلن ابخمسة...وانا نويت علي الشلن... خليتهم مشو يشدو السروج فوق الحمير وشلت الشلن ودسيتو في تكة سروالي.اخوي الصغير شافني وكان داير يحدسهم علا انا براحة قلت لو اسكت اسكت بديك تعريفة... نان انتي قايلة شنو؟؟؟ لي يومك دا ما اديتا ليهو........ما قلت لك كنت شافع قليص وما عندي ادب...؟؟.. كان عندي ادب بسرق زوارة الفقير؟؟؟

قيلولة

سلمى

دقيقة.. ابصق السفة دي واجيكي صادي

هسة عليك الله بس السفه دى ماكان ممكن ترميها قبل ماتجى
تحياتى لك وكل عام وانت وسلمى الحبيبة بخير

ماجدة العزيزة القصة سمحة وراها ما وراها
مستمتعة جدا بالحكى
وحات شيخك يا سجيمان كان قعدت فى الواطة دى وانمهلت
دى رواية سمحة سماحة وما بجاملك
وانت عارف
منتظرة التمومة

up

Quote: ماجدة العزيزة القصة سمحة وراها ما وراها

ماجدة العزيزة..وخليكي وراي

اها يا سلمى......
جيتك

نسيت اقول لك بعد وصلنا بكان الحفلة قلت لك...لقيناهم قاعدين حلقات حلقات فوق البروش... عشان الفطور قرب... جانا المقدم متحزم بعمتو في نصو...وقعدنا علي حلقتين كنا شفع كتار.... قال لنا" يا جنون براااحة اوعكم تتخاتفو في اللحم"...انتي عارفة يا سلمى كنا اللحم دا بعد مرات نشوفو ونضوقو في الشهر مرتين بالكتير.... في بلدنا يومين للسوق ..سوق السبت وسوق التلاتاء...كل سوق الجزارين يجيو يضبحو.. ويبيعو اللحم... كانت حبوبتي بتشتري لينا ربع كيلو بس... عشان نقول عندنا لحم ...ربع الكيلو يحوق في منو .. والبيت مليان ناس... تجيب ربع الكليو امي تتبخ الحلة في الراكوبه جنبها؟ انتي قايله لشنو؟؟ عشان انا ما اعقبا علي الحلة واحتّل اللحم واكلو,....لكن اكتشفت طريقة بت كلب في سرقة اللحمة وفك الحصار الضارباهو امي علي الحلة....بقيت لما اعرف انو اللحم خلاص نجض وممكن يتاكل... اسوق اخواني ونمشي نلعب برا الحوش تحت ضل تمرة.... اسوق اختي الصغيرة معانا كان عمرها سنتين... اول ما نصل بعد خمسة دقايق اقرص اختي قرصة شديدة.. عشان تسرخ شديد.. واجري علي امي واقول لها" يمه... يمه.... البنية قاعدة تبكي ما بعرفا القرصا شنو؟؟" امي تقوم مخلوعة وتجري برا... تكون افتكرت انو قرصتا عقرب ....وانا بسرعة جدا استغل الفراغ الامني دا وافتح الحلة واسرق لي كعبور لحم غليد... وامشي ادسا .. واقعد اكل فيهو.... المسعلة دي اتكررت تلاتة اربعة مرات لكن ...امي جندت كل طاقة الاستخباراتية واكتشفت الحيلة.. وبقت تعلق الحلة مني ومن الكديسة في المعلاق..المكربوط في المرق الفي نص الراكوبة.... وانا ما زلت افكر في طريقة جديدة لاختراق الطريقة دي..... ما قالت لك انا كنت شافع قليص وهابش وما عندي ادب؟

سلمى

وين انتي يا زولة؟؟


عليكي الله ما تخليني وتمشي واقعد انضم براي زي الما نصيح

سلمي ارفع البوست دا عشانك انا وانتي المساكين ديل...

سلمى اريتو طنيّش السواد والرماد

جابو الفطور.... كان فطير بي سليقة....مرشوش بيها.. وفوق للفطير كانن في اربعة لحيمات ومصيرين مضفر...وحتة فشفاش وحتيتة كريشة....ونحن يمكن كنا اربعطاشر شافع..... اها عليكي الرسول دي ما فتنة عديل؟؟.... اربعة لحيمات لاربعطاشر شافع؟.. مو اياهم دايريننا نتخاتف ونتكابس فوق اللحيمات ديل....اول بالتبادي انا كفكفت ايدين جلابيتي...واتشمرت ووقفت علي حيلي وكلنا وقفنا.... دخلنا ايدينا كلنا قبال القدح يختوهو في الواطا وهاك ياختف.. والمقدم يكورك فوقنا" يا جنون براحة براحة"نان قايلة في زول قال لو انت بتقول في شنو؟....انا مسكت لي لحيمة ما عندها عوجة وسط الايدين ديك.... وجريتا لقيت في زول بي يجر معاي عاين لو لقيت اللمين ود ناس تور الخلا... لقيتو يجر ويبكي ويقول لي " فك... فك....فك... ووواع..... فك....ووواع".... وقت مرقن ايدينا انا وهو من القدح يا سلمى اختي اتاريني كنت بجر في اصبع اللمين اللليل ايدو الكبير..وكان وارم منعامنو ضربو فيهو مقداف المركب قبل الوقفة بيوم... وقت مشو هو وابوهو يجيبو القش من جزيرة للبقر الللاتن... انا اجر في اللصبع وقايلو لحمة يا سلمى اختي....شفتي الحظ الكعب دا؟.... جريت اصبع اللمين الوارم اريتو كان اصبعن عديل و لبابة..... ما قلت لك انا كنت شافع قليص وشليق... وبختي زي سجمي؟....اللمبن جرى علي ابوهو حدسو .. واللبو جا جاري علي.. متحمي وزعلان" كيفن تجر اللمين من اصبعو"... انا طيرت عويناتي خايف وايدي في الفطير بالسليقة ومشلق اعاين لو قلت لو ..." وحات الله ووحات الشيخ الجعلي انشا الله يسختني ويقلبني جُضُول وما اقوم من بكاني دا يا عمي انا قايلو كعبور"

هسى مالك ما تميت القصة ومشيت تتشاكل مع اولاد الجيران فى البوستات ؟
انت الشلاقة دى ما بتخليها ؟ ما كتبو ليك فى قاموسك الشلاقة دى ضارة بالصحة ؟
اها و(بعدن) ما مسكت الكعبور
عارف كعبور دى اول مرة اسمع بيها
عليك جنس الفاظ
وبالمناسبة الخلانى ما دخلت ليك الشديد القوى
كنت صايمة الستوت وحات الله والصيام تارينو بعد رمضان حار خلاس
لكن الليلة تميتن تب
عيدت عديل وجيتك
يلا احكى لينا

سلمى

Quote: كنت صايمة الستوت وحات الله

انتي تعالي....الستوت دا هنا غير النسوان مافي زول صايمو... انتي الشغلة دي اللت حريم؟

الواحد قدر ما يجي للبوستي دا وبقول ينضم ويفتح خشمو.... يلفاهو مافي... علا امشي اجيبو واكرو من نص الحلة

Quote: الواحد قدر ما يجي للبوستي دا وبقول ينضم ويفتح خشمو.... يلفاهو مافي... علا امشي اجيبو واكرو من نص الحلة

بوستيــك ده زى الحمـــار الضكــر القاطع حبلو ( مع احترامى ) .. لأنو سيدو وكتــين يبقى مارق مشوار يحوم الحلة رجل كلب عشان يقبضــو
وصيتـــى ليك يا سجيمــان بوستيك ده تربطــــو .. أو .. تشوف ليهو انتــــايى فى المنبر ده تحرسو ليك .. لأنو زى ماك شـــايف بوستات اللنـــاتى ما قع تحوم كتيــر !! تقعــد فى الصفحة الأولى خمسطعـــشر يوم زى الأعلان المدفـــوع الأجــر.

البيلي

Quote: تشوف ليهو انتــــايى فى المنبر ده تحرسو ليك ..

تراني محرسو سلمى دي..... وهي ماها فايقة.....

وحات الله البوستي دا جاب لي فلايت

انا كنت واقف وين يا سلمى اختي؟

يا عاجبلك انا كبرتا والخرف دخل

وحات الله الجضيمات اطفقن والكريعات منو وليهن يسكسكن بلاسبب.. والسمع تقيل اللضينات قام صوف في فتحاتن..... غايتو بعد دا اخير نتوكل

سلمى

كدي النشوفك انتي فالحة وعينك نجيضة؟؟؟

الوليّد المن جاي دا.... بتعرفيهوووو؟

غايتو اول حرف فيهو سين

Quote: غايتو اول حرف فيهو سين

سلفــــــــــــــــاكير

Quote: سلفــــــــــــــــاكير

صباحات الله بي خيرا

*

سجيمان الحكاية جاطت
جابت ليها حمير
لا والله زعلانه منك حد الزعل
ناس تجيب ليهن الصور السمحات وناس تجيب ليهن الحمير
الفيك انعرفت
وكمان حمار زعلان وعاير
اديهو سوط

سلمى

دا حماري قاعد احوم بيهو البوستات.....اها قام رماني وقعد يدردق هنا

*

*

عودة لسلمى

يا سى جى انت دحين العيد ما مشى ؟
الله يجعل ايامك كلها عيد
وتسلم يا زول يا جميل
وخسمتك كان ما كملت الحكاية

Quote: امي بعد ما جابت الطشت وحممتنا انا واخواني وانا اسب والعن في الزول المضر الاخترع الضابون دا وحبوبتي مسحتنا بدهن الكركار.... امي مشت علي الخُس" المتبخ"..وقعدت تعوس في اللقيمات.... وتنقنق اظنها كل مرة تحرق منها لقيماتاية... اصلها اللقيمات جات جديدة في البلد وامي شافتن اول مرة في اتبرا عامنول...شافت سواتن عند ام الحسين الشايقية

وبعدين يا سيجمان يا فقري

سمح... يا سلومة اديها صنة

سجيمان
كل سنه وانت طيب
العيد التانى جا و(القثة لثه ما خلثت) ،دى باين عليها
الحب فى زمن الكوليرا