انا ..... زول منحوس

اكبر نحس فى التاريخ الحديث
وقصص نحسى ما عندها حد ولا عد

لا لا لا مستحيل.

اوريك عينه من نحسى
كنت فى القاهرة بالصدفة اتعرفت على زول اسمه جمال كوامى نكروما ابن الرئيس الغانى السابق وهو عندو علاقات كبيرة طبعا ، اها قام جاب لى بواسطة زولة زميلتو طلب لاذاعة البى بى سى القسم العربى ، امتحنت الامتحان الاول ، حق الصوت ، نجحت ، امتحان الترجمة نجحت ، ولمن بقيت على السفر قام جا الاستاذ اسماعيل طه المذيع هناك ، كلم ناس الاذاعة قالو ليهو الزولة دى اتاخرت ليه ؟
وكانوا رسلو لى لغاية مرتبى كم ، احى من الوجعه ، مرتب سبعة الف جنيه استرلينى ، عليك الله يا زهير ما نحس ؟ وفتشت الورق المفروض امشى بموجبه للسفارة وحاتك سلقط ملقط مافى
فى نحس اكتر من كده؟
هسى كان شادية الطيب كتبتنى مع الناس المشهورين الما بعرفوهن ديل
مغسة تهد الجبال ولليوم حاسة انى لو ما كنت منحوسة كان بقيت مذيعة (بكسر الميم)فى البى بى سين

اولن تبرى يا سلمى يا بت امى من النحس

اما من جيهة المغسة ان شاء الله حال عدوك (ان وجد و ما اظن )

و يا عاملات نسيبة صاحبتى امكن حظك مردم و راجيك قدام !

عزيزتنا / سلمى

طبعا كلنا حصلت لينا حاجات كثيرة وقتهاالواحد بنصف نفسه ما زول منحوس اكثر منه لكن والله تعرفى
لو الواحد فكر بشوية تعمق بتجدى الواقع افضل بكثير .
يعنى ( عسى ان تكرهوا شيئا وهو خير لكم وعسى ان تحبوا شيئا وهو شرا لكم والله يعلم وانتم لاتعلمون )
فاحتمال يكون التوظيف فى هذه الاذاعة سبب فى اشياء كثيرة لا تعلميها وربنا اراد يقيك منها بعدم التوظيف .

طبعا انا ما انتظرتك تكملى باقى قصصك ، ما شفقة منى لكن عشان تهونى على نفسك فى سرد باقى القصص الجاية .



ويا الشيخ سلامة سلامة ( على قولكم )

أحمد العمار

سلمى المنحوسة اللى اتلمت على خايبة الرجاء اللى هى انا

شوفى يازولة انا مافى جن احمر ولابنفسجى بينافسنى فى النحوسة
اتخرجت يوم29 يونيو/ 30 يوينو انقصمت رقبة منايا
يوم واحد يوليو مفروض ابدأ شغلى فى واحدة من الصحف/ فى ذات اليوم حلوا كل الصحف
......
.........
.......
......
..
.

بعدد النقاط دى مضروبة فى دشيليون ده نحسى
آخرها عارفة شنو؟
مرات بضحك من المغسة
الاسبوع الفات وضمن محاولاتى اعادة شرتى الاعلامية اتنشر لى نص فى الصفحة الثقافية لجريدة السودانى
بيومين بس وقفوا الجريدة

ما احكى ليك كتير فى الجانب ده عشان تتشحعى تشترى كتاب حياتى
قال منحوسة قال...

تعالى نكون جمعية المنحوسات احتمال نلقى حل

اختك المنحوسة
اشراقه

التعديل: كتبت من غير نطارة الكبر، لمن لبستها لقيتنى عملت الغين قاف والكاف ظاء

اشراقة اتفق معاك ومن الليلة اليوم دا نسوى الجمعية مش جمعية منظمة (المنظمات فيها جهات مانحة امكن ينفك النحس )
قدر ما حاولت اعاين للنص الفاضى للكباية ما قدرت
القاهو مشحون نحس
مشيت السودان
قالو لى لازم تدفعى اقامة
وتحت تحت الاقامة دى زاتانحستنى
دفعت دم قلبى عشانا
رجعت البلد الهايف اهلها
قلت العب اللوترى
حلف ما يمشى معاى
الناس كلهن بشترو اللوترى حتى الصغير
بتجى حاجة تفرحن
لكن بت الشيخ حتى اللوترى ابى لى
الشغل
كنت بدرس مرات فى الجامعة فى برنامج اسمو (ادب الكتاب الرحالة )
لقيت البرنامج دا وقف
كان بطلع للواحد كم ملين كدى
ولقيت نفسى ابو النحس الدولى
والقصة طويلة
(حتى الحب )فيهو نحس تصدقى
اى زول احبو ( بطفش )
ويخلى لى البلد
اقبل وين ؟

الاخ العزيز احمد العمار،اها واحدة تانية من نحوساتى مشيت قطر قمت اشتغلت فى جريدة الشرق القطرية وقالو لى الشيخة موزة ( تلحقنا وتزلقنا)قالت دايرة زولة عندها مواصفاتك يعنى يحولونى من الجريدة لمحل الشيخة وبعد دا كللو سيد المقة قال لى انتى ما مؤهلة ؟؟؟
، اها لى يومى ويومك دا لا لحقتناالشيخةموزة لازلقتنا واشيل واحرس وارجا يوم خلاص قالو لى عينوك فى محل الغاز مرتب كبييييير فرحت بعد كم يوم قالو لى لانك ( ارميكية ) ما بنديك اكتر من خمسة الف ريال !!!! هاهاهاها ، وكان مرتبن الاول خمسة وعشرين الف ريال شفت النحس على اصولو كيفن
تقول لى مامنحوسة هو النحس دا الا يعملو ليهو (بورى )

اها النحكى ليك نحسى يا نادية اختى
تانى يا بادى الزول مش شغال كويس فى مصر فى جريدة الاتحادى وحاتك ولا فى بالى اسافر اى حته غير ارجع السودان ، شابكننا ليك ( اجتثاث النظام من جذوره ) ونحنا نشيل ونصدق ، قومى يا الجريدة قفلى ولى هسى زول عارف قفلوها مالا المسكينة مافى ؟
ولا فى زول داير يقول بى وش البيت الجريدة قفلت سببا شنو
الحكاية ممغسانى مغسه ، واذاعة التجمع برضو قفلت(قفلت قفلت قفلوها )ولى هسى ما قالوا الحكاية شنو؟
مشيت السودان ( تنكرش تنكرش وصلت السودان وفرحانه انه فى حالة جديدة من الانفتاح ، وحاتك قفلوها فى وشى حتى الاذاعة ما فتحت ، والادهى انه واحد زميل من ناس المعهد طردنى من اذاعة(ابوه) وقدر ما قلت يا نحس الجن تخلينى ما داير
مشيت اذاعة الامم المتحدة قالو لى بعد ماعملو المعاينة اتصلت عليهن حلفوا قالو لى ورقك يعمينا ما شفناهو
شفتى كيف ؟

Quote: كنت فى القاهرة بالصدفة اتعرفت على زول اسمه جمال كوامى نكروما ابن الرئيس الغانى السابق

ياسلمي يا صحبي ... جمال ما زال يكتب لللاهرام جازيت وكنا في زمن ما قريبيين من بعض نتحاور في امور افريقية كثيرة فهو واخته ما زالا نشطيين في الشئون الافريقية ولهما احترام كبير وسط المهتميين بالشان الافريقي احترام مبعثه والدهم نكروما ..

اما ما حصل فهو ليس نحسا انما فرصة لم تتحقق وليست كل الفرص في الحياة تتحقق وليس بالضرورة انها كانت ستكون خيرا ومقابل ان ذهبت عنك تلك الفرصة اكيد اتتك اشياء كثيرة جميلة لكنها كذلك ليست بالضرورة مثل تلك شكلا وموضوعا ...You shall definitely get more of your stars one day

مودتي

ابوبكر

اها يا صحبى ابو بكر صدقت انى منحوسة ؟يا ابو بكر زول اسمو السنى قال فاتح ليهو بوست اسمو سلمى النحس اقصد سلمى الشيخ ، تعرف البوست دا حلف بالتقطعو ما يفتح اها النحس دا كيفنو يا اخوانا (المنحوس للنحس ما بكوس النحس براهو بجيهو يكوس ) مثل جديد لنج
شنو ليك

تعرف يا صحبى جمال نكروما دا زول جميل جدا ، هو وسامبة وتحية والدتهم كنت بمشى ليهم فى فندق قاعدين فيهوفى وسط القاهرة
(حجة تحية شافتنا متباريين قالت لى :
جمال ما ممكن يتزوج واحدة الا من غانا
هسى الجاب سيرة العرس منو ؟
قالت لانها هى اتالمت من زواج اجنبى
وانا القال ليك بعرس اجنبى منو ؟
جمال زول جميل شديد
وكريم جدا
واخلاقو عالية
ولو ما كنت منحوسة كان عرستو

Quote: تعالى نكون جمعية المنحوسات احتمال نلقى حل اختك المنحوسة

لا ...
الله يخليكن لا ...
ما منحوسات .. طاقات والق وشباب ( ما في واحدة منكن تقل بغم في دي ) واهم شيئ "انسانية " ( ودي برضو بالدليل : كتابات سلمي لسه موجودة عن زملاها الاحياء والذين رحلو وكتاب اشراقة الاسابيع الثلاث الماضية ) ... يعني مؤهلات لاجمل من الفرص التي تفتكرن انكن فقدتهن ...
وجودكن في زمن صعب تكثر فيه الشينة لا يعني انكن منحوسات ولكن انكن اقدر علي هزيمة الشينة ...
ارجوكن ابقن شعلة الامل قايدة فانتن للكثيرين من اجيال في عمركن واصغر ممن يحبوكم يقدروون اسهامكن امثلة يحتذونها ...

رجاء

لكن مودتي
ابوبكر

يا صحبى انت زول جميل وترى الوجود جميلا ،
لكن عليك الله من الصباح ما كتبت ليك وقلت ليك البوست ابى يفتح ؟
مشيت كومبيتر تانى (تنكرش ) فتح معاى
الا كومبيترى المنحوس (وجسمى المنحوس يا مليح الزى )
ما تقول ما منحوسة والله نحس دولى
حتى الكومبيتر بقى زى ستو
وا انارى المابقيت سواق
اطلع العالى وانزل الدقداق
وادق الارض بنعالى لمن تنهز واقيف وسط البلد واهتف
( منحوس يا ناس حد يكتب لى محاية لازالة النحس )

غايتو يا سلمى

Quote: وكانوا رسلو لى لغاية مرتبى كم ، احى من الوجعه ، مرتب سبعة الف جنيه استرلينى

النصيحة ليك يا الله
انت منحوسة !!!
بالمناسبة انا محظوظ جدا
وما حا اجيب امثلة عشان ما تنحسيني !!

تسلمي يا سلوم

Quote: اها واحدة تانية من نحوساتى مشيت قطر قمت اشتغلت فى جريدة الشرق القطرية وقالو لى الشيخة موزة ( تلحقنا وتزلقنا)قالت دايرة زولة عندها مواصفاتك يعنى يحولونى من الجريدة لمحل الشيخة وبعد دا كللو سيد المقة قال لى انتى ما مؤهلة ؟؟؟ ، اها لى يومى ويومك دا لا لحقتناالشيخةموزة لازلقتنا واشيل واحرس وارجا يوم خلاص قالو لى عينوك فى محل الغاز مرتب كبييييير

في بتاعة قطر والغاز دي بصراحة ياسلمي انا ما شفت زول (منحوس) نحسة تاريخية زي حقتك دي..
وياخي دي كانت وظيفة مقنطرة قنطيرة السنين لو عملتي (اووووووف كده) كان حسي الدولارات محل سوميتا
تكبها ما تلقاها..

...
...
ولكن نظل نردد دوما بان الكاتبها الله بتقوم في الزلط والله كريم ياسلمي

يا كيكى يا ظريف انت قايل قطر دى مشيت منها ساكت ما ممغوسة لمن دايرة انفقع ،
الاستاذ جعفر عباس يقول ليك انتظر وعم الراجل يقول ليك ما بعرف (يصير خير )
وفى النهاية مشيت مع السنى لسفارة السودان (الشقيق)
وسافرت بى (صمة نحسى )
شفت كيف ؟
عصام حسين والله عربيتو شكت وبكت منى لانى معنقلة فيها اليوم كلو
نفتش لى وظيفة
مرات ابكى ومرات اضحك من (نحسا بقى ملازمنى )
و(هردت لهاتى بالبكا من تالا الشغل فى قطر الجن )
وفى الاخر لقيت انه اخير امشى السودان
مشيت السودان
قفلت ( جوكر ما يفتحا )
ورميت (البت )
الزول التانى (فتح)
وفتحت للبلد البحبو
وجيت اطمش فى بلاد العم سام
وترانا راجين (الفرج )
او الافراج (انشا الله مؤقت )
سلام يا صحبى

خالد العبيد عليك الله ان ما وريتنى امكن ابقى ما منحوسة ،
(ما بكلم زول )
تعرف نحسى قدر كيف ؟
وحات ابو ادريس لكن ما تسالنى منو ابو ادريس دا
المهم يوم انا وعزة اشترينا عربية جديدة
طالعين من المدرسة
ماشين وين؟ التامين
نعمل تامين للعربية
المطرة قالت يا واحد
عزة بتتعلم جديدة فى السواقة
العربية جديدة بنات عمها ما سمعن بيها
قومى ياالبنية (تررررررررااااااااااخ) ضربت العربية القدامنا
العربية من محلها داك على (الحوش القديم )
ولى هسى بدفع فى الغرامة للزول الضربناهو

سلمى إزيك
هذه إذا نظرت لإنجازاتك من زاوية نصف الكوب الفارغ لكن الرجاء النظر اليها من زاوية نصف الكوب الملآن.أنت يا سلمى كاتبة وصحفية ولديك موقفك السياسي وفاعلة في قضايا المراة وإنسان السودان ورأيتك في القاهرة على صلة وثيقة بالكتاب المصريين هل تذكرين لقاءنا في القاهرة ايام المسرح التجريبي .كان الاستاذ جمال الغيطاني قدطلب من الاستاذة عبلة الرويني إجراء حوار معي وتصادف أن جئت بدعوة منها للمسرح التجريبي فوجدناك وكانت تعرفك وكان معظم من صادفت من ادباء مصر يعرفك .أنت لديك حيوية فائقة فلماذا النظر إلى نصف الكوب الفارغ .تكتبين القصة والشعر والمقالة وكنت عضواً باللجنة التنفيذية بإتحاد الكتاب السوداني وجميع زملائك في معهد الموسيقى والمسرح لهم معك ذكريات طيبة تنم عن الإعزاز فلماذا النظر الى نصف الكوب الفارغ.
وأخيراً فأنت عضو باتحاد الكتاب الكنديين وPenانترناشونال وبهذه المناسبة فأرجو ان تطلعي لي منهم عشرة ألف دولار حجبوها عني فقد خاطبوني عام 94 وقالوا لي بأنهم سيقيمون ليلة عن الYبداع السوداني للتضامن مع الادباء السودانيين المسجونين Hوالمحالين للصالح العام,;وكنت من هؤلاء الأخيرين .اقاموا الليلة ووعدوني بإرسال شريط فيديو عنها .منحوا محجوباً عشرة الف دولار ومنحوا شخصاً آخر لكن لست متأكداً عن المبلغ الذي استلمه أما انا فلا شريط ولا مليم .سالت محجوب مرتين في التسعينات يا محجوب هل اعطوك عشرة آلاف فقال لي واشتريت بيها نص بيت في الثورة وفي عام 2002م سألت محجوب السؤال نفسه وقال لي الإجابة نفسها .في جدة حين عدت ضحكت من الحاحي في سؤال محجوب غه الحسد من جانبي بعينه لكنه يتخفى في صيغة سؤال. .
راسلتهم وراسلتهم دون جدوى واسم منسقة برنامج فريدوم تو رايت كوميتي التابعة لإتحاد الكتاب الامريكيين وقتها لاميا متى
أكتب لك هذا ولانك عضوة في هذا الغتحاد الدولي عساك تطلعي هذه الاموال وخذي نصفها. هل تعتقدين أن السبب يعود إلى النحس ؟
لا هناك بلا شك سبب موضوعي .ويوما ما سأعرفه.بالنسبة لموضوعك مع البي بي سي يمكنك الإستفسار مباشرة عن السبب إذ ربما في الامر حركة من جهة ما لا ترغب في تعيينك أو أي سبب موضوعي آخر غير النحس.
تحياتي لعزة بنتك واين انت الآن؟ التقينا في مركز عبدالكريم ميرغني في لقاء خاطف فاعذري انصرافي وقتها دون السؤال عن الأحوال.

شفتى يا سلمى كلام دكتور بشرى الفاضل ده أطبعيه فى ورقة ولفيها أعمليها زى الحجاب وأحفظيها فى مكان أمين تانى عمرو النحس ما يجى بى جمبك

يا زول يا نبيل وحات سيدى على فتيل الريحة كلام بشرى الفاضل دا سمح تب
لكن النحس العامل معاى (كونتراتو دا اوديهو وين؟)
تعرف لقيت شغل فى اذاعة هنا فى البلد دى اذاعة بتاعة افريكان امريكان
لكن عشان اوصلا محتاجة منى ( سواقة خمسة واربعين دقيقة)
مفروض بس اقدم اغنيات ( سودانية )
هسى ما عندى لا عربية ولا ترتارة حتى
شفتنى وانا منحوسة ( اجنن وانا منحوسة )

بشرى الفاضل فى بيتنا اذن قل للنحس وداعا
لكن يا سيدى انت ما شايف براك ؟
اول حاجة ناس البى بى سى ديل كل ما اشوف عمر الكعكى بتجينى مغسة
لانه كان فى الدفعة هسى هو وين وسلمى الشيخ وين ؟
تانى حاجة كان ما الكتابة كان انفقعت من الغيظ
مرة كا معانا بروفسيور القدال فى القاهرة مشى معاى البوسته
رمينا جواب لى للخال صلاح احمد ابراهيم
كان بيناتنا مراسلات لطيفة
بعد كم يوم جانى القدال معزيا فى وفاة الخال
قام قال لى لمن اصلك (نحس كده) ما تكتبى جواب لزول تانى عشان امكن يموت
اها القصة حقت عبلة الروينى ومسرح القاهرة والله كان ما الناس ديل يا بشرى اخوى كان ما قدرت اقعد فى مصر ولا يوم
لمن قلت ليهم انى مسافرة قالوا لى نمشى لوزير الثقافة عشان يعمل ليك جنسية الوكت داك كان الموسيقى سليم سحاب اخد الجنسية المصرية واتحمسوا ناس امينة النقاش ومستجاب وصنع الله للفكرة
بقينا نمشى للوزير كل يوم يقولو الوزير مسافر وهو ما بعرفو كان كضب كان صح مسافر لكن النحس يا بشرى اخوى
والقصة دى معروفة فى مصر من دكتور جابر العصفور لحدى الناس القلتهم ليك
( نحس بس )
تانى ناس اتحاد الكتاب الامريكان ديل (اخير منهم ناس اتحاد الكتاب السودانيين) مقطعين وليهن (خرتايات) ومنكشين وكتاب جميلين ما اكتر
اهو مرات بنادونا نقرا شعر فى جامعة يقومو يدوك (ميه وخمسين دولار ) ما كعبة لكن ما بتاكل عيش
وناسك القلتهن ديل الا كان اتحاد جهبوز ( خارج دائرة نحسى )
لك حبى واكتب لى العنوان برسل ليهم وشيتا فيها يا قول صاحبنا منعم شتلى ( ملخة ) (النلفاهن تب )عنوانى [email protected]

Quote: مشيت كومبيتر تانى (تنكرش ) فتح معاى

اهاياسلمي زي ما قت ليك في التلفون بيفتح في جهاز تاني مش لانو جهازك منحوس الا انو زعلان من كترة ترديدك لكلمة "منحوسة " ّّ واها بشري الفاضل طلع حاجات كتيرة عندك اهم من فرصة البي بي سي وجريدة الاتحادي والعربية .. كمان اهو راضي بالرغم من عشرة الف دولار ( بحساب اليوم مع التضخم ووو تساوي حوالي 25 الف ) فضلت انو ما تطلع من امريكاالي جيبو ربما لانها اتحولت الي اشياء اجمل عندو ..