الشاي

Post: #1
Title: الشاي
Author: mohammed alfadla
Date: 12-04-2003, 05:35 PM
Parent: #0

داير أصحى عليك
أصحى و ألقاك سويتي الشاي
أسمع صوت نفسك نايمة
و قبال ما أرقد أغطيك
وألعب بي شعرك في الليل
أمشي المكتب متأخر
و أرجع بدري
ونتغدا سوا
ونتفرج سوا في التلفزيون
و أغسل ليك العدة
و أموت بالشوق لمن تمشي الجيران
ونتشاكل ساكت ونتصالح
ونتونس
عن أي بلاد
وعن أي مطر
داير أصحى عليك
أصحى وألاقي عيني في عينيك

محمد الفاضلابي
أوسلو

Post: #2
Title: Re: الشاي
Author: ASAAD IBRAHIM
Date: 12-04-2003, 05:44 PM
Parent: #1

الاخ فاضلابي
جيتا جيت
تعرف بطريقتك دي حتقعد معاها بالبيت طوالي، يعني حيرفدوك من الشغل.
عندنا واح كان بيقول لما يسمع كلام زي ده ( والله ديل هم الخلو البنات يطلوا لينا في رسيينا)
لك مودتي وحبي

Post: #4
Title: Re: الشاي
Author: mohammed alfadla
Date: 12-04-2003, 05:47 PM
Parent: #2

thanx saad
لك مودتي وحبي

Post: #3
Title: Re: الشاي
Author: Ibrahim Algrefwi
Date: 12-04-2003, 05:45 PM
Parent: #1

هوي يا ناس البورد

بختكم ..................وكدي انا بمشي وبجيكم هنا اوريكم الحنك شنو..........................

قرمبوز

Post: #5
Title: Re: الشاي
Author: mohammed alfadla
Date: 12-04-2003, 05:47 PM
Parent: #3

أها ورينا سريع ياخ

Post: #6
Title: Re: الشاي
Author: esam gabralla
Date: 12-04-2003, 05:51 PM
Parent: #1

يا ود يا بديع
شايك كده...قهوتك كيف؟؟

ملاحظه غير جاده
Quote: أمشي المكتب متأخر
و أرجع بدري

هل هى دعوه للزوغان من الشغل؟؟ كده بتضعف الانتاج,انحنا ما ناكل مما نزرع و لا شنو يعنى؟؟

اخرى جاده
Quote: و أغسل ليك العدة

العده حقتا هى و لا حقتكم الاتنين؟؟

ارقد فرح

Post: #7
Title: Re: الشاي
Author: mohammed alfadla
Date: 12-04-2003, 05:56 PM
Parent: #6

يا عصاااااااام
مشتاقين زاتو
العدة حقتا هي أنا السويت الغدا مالك

Post: #8
Title: Re: الشاي
Author: الجندرية
Date: 12-04-2003, 06:07 PM
Parent: #1

يا سلام

شكلي حبيع ناس كتااااااااااااااار
واشوف لي فكي يخليك تستنى هبة بتي
شاياً زي دا وقت فات امها ما بهون علي بتي ما تستمخ بيه
عصام جبر لفحت الكلام من تحت لساني زي ما بقولوا
شوف ليك حل يا فاضلابي لـ
Quote: و أغسل ليك العدة

Post: #9
Title: Re: الشاي
Author: mohammed alfadla
Date: 12-04-2003, 06:10 PM
Parent: #1

يا جندرية ما قلنا ليك أنا السويت الغدااااو
شنو ظلم ولا شنو

Post: #10
Title: Re: الشاي
Author: esam gabralla
Date: 12-04-2003, 06:16 PM
Parent: #1

يا دكتور انت زعلت و لاشنو؟؟
الشاى و الغدا و العده كلو حقها؟؟ ان شاءالله تخليها بايته للصباح

ده كلام لذيذ

Quote: أسمع صوت نفسك نايمة
و قبال ما أرقد أغطيك
وألعب بي شعرك في الليل
......
ونتشاكل ساكت ونتصالح

لو عارف محل المفاتيح ارفعا لى فوق,ياخى ما تعملا بي صوتك الخايف عليهو !!!!

صدقنى انت شعار جدآ,و مشتاااااقين

Post: #11
Title: Re: الشاي
Author: mohammed alfadla
Date: 12-04-2003, 06:19 PM
Parent: #10

والله يا عصام أنا في الكمبيوتر ده ضعيييييف تقنيا
عشان كده ما قادر أعملا بي صوتي
لكن تستاهل يا منقة
المفاتيح والصوت وأي حاجة ذاتو

Post: #40
Title: Re: الشاي
Author: Rawia
Date: 12-06-2003, 04:04 PM
Parent: #10

يبيتها لي الصباح كيف يا عصام يعني انت ما عارف
الماعون اللين غسيلو هين
(حكمه صينيه قديمه)

Post: #47
Title: Re: الشاي
Author: mohammed alfadla
Date: 12-07-2003, 07:18 PM
Parent: #40

صدقتي يا راوية

Post: #43
Title: Re: الشاي
Author: mustafa mudathir
Date: 12-07-2003, 06:15 PM
Parent: #10

مفاتيح شنو يا عصام?
لكن عدتك و عدتها ضحكتني شديد
يالمناسبة غسيل العدة المنزلية اضيف الى قائمة مخففات
الStress ضغط نفسي!! بس مايكون فيها حلة مسكت
و دايرة ليها كرش بليفة سلك لانو دا الStress ذاتو!
قلت لي أوسلو يا فاضلابي?
ياخي واصل أوسلو شعرك ظريف
مصطفى مدثر

Post: #48
Title: Re: الشاي
Author: mohammed alfadla
Date: 12-07-2003, 07:20 PM
Parent: #43

(أوسلو )الحكاية شنو ياخ

Post: #12
Title: Re: الشاي
Author: esam gabralla
Date: 12-04-2003, 06:23 PM
Parent: #1

الفضلابى انا هين بتقدر على,شوف الجاتك ده منو,بقية الكتائب الجندريه (الندايات و طماضر محطرمونا) بكونو فى الطريق,الحق غير القصيده,اقترح عليك تكتب :
وانا غسلت الهدوم و كويتن, و قشيت الحوش و جبت الخدار و قطعت السلطه و حلبت الغنم...و...و...
و لا شنو رايك يا تراث !!!!!!
جندريه مره اخرى خلى روحك رياضيه
سلام للكل

Post: #13
Title: Re: الشاي
Author: mohammed alfadla
Date: 12-04-2003, 06:30 PM
Parent: #1

والله صحي أنا مالي ومال الشعر من الأول
الله يستر من الجاينا
الغريبة الكلام ده لمن قلتو ليها أنبسطت
أنعل أبو لعولمة ياخ

Post: #14
Title: Re: الشاي
Author: Nada Amin
Date: 12-04-2003, 07:51 PM
Parent: #1

يا عصام جبر الله خليه ما تخوفه ساي الزول باين عليه ظريف gender friendly و البركة في غسيل العدة، الليله مزاجنا رايق شوية على غير العادة و ما حنتفلسف نعكره ساكت.

Post: #16
Title: Re: الشاي
Author: abuguta
Date: 12-04-2003, 08:51 PM
Parent: #14

فاضلابى
كلام ظريف انت من شلتنا اظاهر عليك تحلم بوطن تانى
كنا زمان بنتناقش ونحن طلبة فى الهند
ممكن الواحد يتزوج هندية واحد اخونا
رد على انا ما ممكن اتزوج خدامية
تقد شنو يعنى الهندية ما بتشاكل تطبخ تغسل تكوى تربى الاولاد
تمسح البت والموتر والسيارة وتودى العيال المدرسة
تسوى كل شى وممكن تاخر عليها ما تسالك ليش تتاخرت
قال انا عاوز مرة اتشاكل معاها وتسالنى لما اتاخر وتصرخ فى
لو ما ساعدتها فى عمل البيت
والناس مزاجات
وتسلم ياوطنى

Post: #51
Title: Re: الشاي
Author: mohammed alfadla
Date: 12-07-2003, 07:30 PM
Parent: #16

يا أب قوتة أنا من زمان معرووووف في الشلة دي
ياخ أنا لاقي صحبتكم وين

Post: #15
Title: Re: الشاي
Author: الجندرية
Date: 12-04-2003, 08:39 PM
Parent: #1

الملحق التفسيري البرا النص دا ما بحلك
في النص قلت
Quote: ونتغدا سوا

نتغدا سوا دي ما في اي ضمانات انك عملته
شوف ليها حل

Post: #17
Title: Re: الشاي
Author: Nada Amin
Date: 12-04-2003, 08:52 PM
Parent: #1

أها يا الجندرية رأيك في دي شنو كمان؟
Quote: أصحى و ألقاك سويتي الشاي

شوفتي صيغة الأوامر و التهديد دي كيف، يعني سيادته عاوز يصحى من النوم على راحته و هي تقوم من دقش الرحمن تجهز ليه الشاي. يار بي نقوم نشاكله و لا نخليه؟ قايتو خلوه ود الفاضلابي بس اردموا ليه العدة عشان يتعذب شوية.

Post: #52
Title: Re: الشاي
Author: mohammed alfadla
Date: 12-07-2003, 07:40 PM
Parent: #17

والله ندى والجندرية ديل متلقين حجج كيف
ياخ أنا والله آسف ذاتو
أسمعوا سارة أختي بقول ليها أها الجكس كيف
قالت لي مافي أمل
قلت ليها كيف الكلام ده
قالت لي
ياخ شغالة تنازلات عشان ألقى هسع وصلت مسلم ذكر بس
لووووول
تقول لي غسيل عدة والله دي الجنة عديل
بعدين على قول سرورة أختي
الموية غرف
و الرجال ختف
ما تبطلوا الشكل ده أنتو قايلننا ما بنعرف
(هوي أقسم بالله العظيم ده هظاااار)
هسع بكرة نلقى مظاهرات في البورد
لكم الحب

Post: #18
Title: Re: الشاي
Author: Ibrahim Algrefwi
Date: 12-04-2003, 09:28 PM
Parent: #1

صديقي محمد

اامتلاءت به حتي افاض علي وجهي ودمي ونشيدي

محمد يمذ موده( علي حد قول فؤاد نجم) وانا امذ شوقا اليه باحجام الالوان

تعرف يا فاضلابي لامن لقيت النص اتشربك الهواء في الشجر ...
فبعد الشاي ده من منا بمقدوره ان يقاوم النجوم وحده!!!!!!!!!1

فهو صاحب هذا الشاي وهذه الدروب الحالمه اللطيفه الموغله في الحنيـــــــــن

لم اري في حياتي رجلا موغلا في الحياه كما هذا المحمد البشر هذا الصديق الاسمر الذي هو

ولاننا نحب الحياه سنحيي محمد الذي وهبنا الشوق الذي لاينتهي الا بمذيد من الشاي والحب والكتابه

يالله كيف ستقتلني بهذا الصديق الدسم... الحنين ود القبائل سيد الرأي والفهم

http:// أموت بالشوق لمن تمشي الجيران
واحنا ديل ديل يا محمد المشيت مننا محل الناس العيونهم زرق ....نسوي شنو
..................................

لاكن رايكم شنو بامانه في الود ده موش مدرسه .. اسه ده الحاله ما عرس

عندي صاحبتي اسمها سحر في المزاد لامن سمعتو بقراء النص بتاع الشاي ده قالت: أحي انا

لاكن ما احي انا جدجد مع الاماني لامن تكون نظيفه وطيبه وشاعريه

ولامن يكون شاي ومحمد وهي والعده عدتهاوالغداه ذاتو طموح ونشط يا محمد يافذ

بس معليش ما حنقعد معاكم شويه _نضايقكم_ مسافه نشرب شايكم الاحمر ده كان فاتنا مع عبدالكريم ميرغني ضغناهو عن شريف الله يعليك لي مراتبهم

...........................

بعدين ياناس دايركم تحنسوه معاي ينزل الشعر ده اوديو يعني بيصوتوا وانعل ابو الما بقول احينا

...................

اللهم احفظ محمد من البرد والحسد وشر الطفابيع وهبه وطنا كما يحلم واعده شمبات سالما

سمينا امينا يحمد بحمد البلاد ونشرب شايهو ونسمع ونسته... ياااااا ونستوووو الاحلا من شايهو

Post: #19
Title: Re: الشاي
Author: omer ibrahim
Date: 12-04-2003, 10:14 PM
Parent: #18

قرمبا خيط اللمبة

لمبة..يرجع الفاضلابي و انا ذاتي
الشاي في بيتنا
والجماعة ديل كلهم الفي البوست دا معزومين
اها النشوف الوقت داك في زول حا يتجندر و يقول السوي الشاي دا راجل ولا ما راجل ولا العمل الكيك امرأة ولا راجل؟
دي الحتة الوحيدة الحا يكون الشاي مافيهو اثارة لي جندر ايشو.
جبرالله
شايف القصيدة دي خلتك تفك آخرك؟ انا كلموووني
فاضلابي
عارف نكتة الشركة الما بشغلوا فيها الا الرجال البكتبوا قصايد زي الشاي؟؟
كان ما عارفا افتح المسنجر

قرمبا

Quote: اللهم احفظ محمد من البرد والحسد وشر الطفابيع وهبه وطنا كما يحلم

اللهم آمين
و ربنا يستجيب لدعاك

واذا ربنا استجاب لدعوتك دي تحديدا

Quote: واعده شمبات سمينا

معناه فاضلابي مفروض يرجع حسسسسسسسع دا

Post: #39
Title: Re: الشاي
Author: Ibrahim Algrefwi
Date: 12-06-2003, 03:50 PM
Parent: #19

عمر وييييين يا حبه يا حبتين

ما في اي مشكله

لمبه ترجع شمبات وانحنا كلنا نجي نشرب الشاي الجندري الطيف عندكم

_ومعانا محمد يكون غسيل العده طلع روحه_ نقول ليك غني لينا ما

تعمل لينا فيها لمبه ..مكسب ...

انت محمد ده بقي سمين ولا شنو؟؟؟ هه هه هه هه فضحنا فضيحه الود ده

اسه انت ما يوم عشرين........ اقول ولا ما افتن

وانت ياخ احسن زول بعدين ربنا اديك الفي مراضك يا ابو الصحب

Post: #49
Title: Re: الشاي
Author: mohammed alfadla
Date: 12-07-2003, 07:23 PM
Parent: #19

هوووي يا عمر السمين الله عارفو

Post: #20
Title: Re: الشاي
Author: esam gabralla
Date: 12-04-2003, 10:56 PM
Parent: #1

فى زول كان كلية الاداب اسمو الخزين برضو كان شعار(بتشديد العين) خلاص زى محمد ده,فى زول عارفو وين؟؟
عندو مقدمه لقصيده او قصه قصيره قال فيها:
على حائط منزلنا كتب احدهم "احب حنان"
و على حائط احد المراحيض كتب احدهم شيئآ لا اتذكره الان.....

صور الزول ده بذكرنى ليها صور الفاضلابى الساهله وجميله و يوميه و مفرحه دى...
يا فاضلابي اكتب وانا بجى اعمل ليكم الشاى و اغسل العده,و صدقنى الناس النقزت هنا دى كلهاحتجى تتحكر وتقرطع "الشاى" وتابا تكسح على قول شيرى...
يا الجندريه و ندا ما تخوفوا الولد خلوهو يمرقنامن القرف الحاصل,واحد "اخينا " قال كل ما الواحد يفتح خشمو يقولوا ليك دى ما بوليتكالى كوريكت ولا sexist و لا..ولا..,انحنا ما نتونس و لا شنو؟؟

عمر بالله السر فى بير رغم انى ما عارف الموضوع شنو!!!

17 ديسمبر ده ود عم 11 سبتمبر
عوافى

Post: #21
Title: Re: الشاي
Author: MUNA OBIED
Date: 12-05-2003, 01:18 AM
Parent: #20

فاضلابى سؤال
هو الشاي ده ساده ولا بلبن

Post: #22
Title: Re: الشاي
Author: إيمان أحمد
Date: 12-05-2003, 02:41 AM
Parent: #21

فاضلابي يا ماساهل

واحد شاي وصلحو! والله دي ما جندرة

إيمان

Post: #23
Title: Re: الشاي
Author: nada ali
Date: 12-05-2003, 02:28 PM
Parent: #1

شكرا يا فاضلابى على القصيدة و لك التحايا و مزيد من غسيل العدة و البقية تأتى

عصام جبر الله
" الحق غير القصيده,اقترح عليك تكتب :
وانا غسلت الهدوم و كويتن, و قشيت الحوش و جبت الخدار و قطعت السلطه و حلبت الغنم...و...و..."
Loooooooooool

يعنى الحكاية خوف؟ ما
Gender sensitivity?

، ويا ندى و ايمان والجندرية

انا من فترة عاوزة اعلق على مقطع من قصيدة رائعة تانية للفاضلابى "نفسى ف بلد"
البيت البيقول "تغلبها بالمال تغلبك بالعيال" بس شايفة أخونا يحيى فضل الله عضو فى المنبر و خايفاهو يقوم يشاكلنى تانى (مسألة حرية التعبير فى الفن و كدة) ، لكن قلت ما دام المناسبة جات الواحدة تنتهز الفرصة

ندى

Post: #24
Title: Re: الشاي
Author: Tumadir
Date: 12-05-2003, 03:16 PM
Parent: #23

فاضلابى...

انت مش براك قلت حبيتنى انا؟؟

بس خلاص القصيده دى انا متشبكه فيها وما بخليها لاى زول...لانها حنينه وانا فاقدة حنان وبغسل عده كل يوم...وما بقرا شعر بض...وبتذكرنى بى شعر سعد الدين ابراهيم ومحجوب شريف المضلل وناعم ووواقعى ومقيل فى برندات العنب

وعندى راجل اختى سمع على السقيد بغنى اغنيه كاتبها سعد الدين ابراهيم وفى آخر بيت بردد

عليك الف نور...عليك الف نور

قال قايلو بقول : عليك الهدوم..

يعنى نفس فكرتك دى... ومن هسه عليك غسبل العده والهدوم...

جميل شعرك با فاضلابى ةاجمل منه حب اصحابك ليك..بنم عن شخص جميل...

خالتك عبد الرحمن مختار

Post: #27
Title: Re: الشاي
Author: omer ibrahim
Date: 12-05-2003, 04:50 PM
Parent: #23

Quote: انا من فترة عاوزة اعلق على مقطع من قصيدة رائعة تانية للفاضلابى "نفسى ف بلد"
البيت البيقول "تغلبها بالمال تغلبك بالعيال"

ندي علي
انا بصفتي الراعي الرسمي للمقطع اعلاه بطلب منك التعليق عليهو ونشوف بعد داك البحصل شنو.
كيف اقتراحي دا معاك؟

Post: #25
Title: Re: الشاي
Author: nada ali
Date: 12-05-2003, 03:20 PM
Parent: #1

مختارة يا تماضر
و
loooooooooooooooooooooooooooooooooooooooool
ندى

Post: #26
Title: Re: الشاي
Author: Imad El amin
Date: 12-05-2003, 03:45 PM
Parent: #1

عزيزنا فاضلابي
ياسلام علي الشاي بطقوسه السودانية الله يسترا من العولمة وتضيف ليها ماتنقص منها اقصد الطقوس السودانية
بالمناسبة ليه الشعر السوداني محتفي بالشاي ـبالذات شعراء المركز والعديد من شعراء لهامش شان ما ينطوا ناس السودان الجديد ويقولوا في بعض الثقافات استبعدت
لكن اعتقد انو الغالب الاعم بحتفي بالشاي
ودي دعوة لذكر نماذج
محجوب شريف شاعر الشعب
يا تلك الترامس وينو الصوتو هامس

كالمترار يلامس يمشي كما الحفيف

كم في الذهن عالق سرسرة المعالق والشاي اللطيف

تصطف الكبابي اجمل من صبايا

بينات الروابي والضل الوريف

احمر زاهي باهي يلفت انتباهي

هل سكر زيدة ام سكر خفيف

and

اسمعنا ياليل السجون نحن بنحب شاي الصباح والمغربية مع العيال الزوجة والام الحنون والاصدقاء والي اللقاء
ايضا
الطارق مين قاسم امين
اتفضل جاي اعملك شاي

بدل ساهيك اشرب دم اذا قلت الكلام الني

بالمناسبة الانتباهة للشاي في شعر محجوب شريف صديقنا حاتم النورـمن سودانيي 1989/الداخل ـليهو فيها حكاوي وده كما يقولون غيض من فيض ياحبيب وممكن تزيد
عموما انتباهتك للشاي السوداني جزء من محبة كبيرة للبلد وانشاء تكبر انت وتكبر محبتو معاك ياسوداني
وللتوثيق كده انشاء ضيفـــــــــــك عزمتو شاي ولو سالتني ليه شاي ح اقول ليك ســـــاااااي

Post: #28
Title: Re: الشاي
Author: Nada Amin
Date: 12-05-2003, 04:59 PM
Parent: #1

أيوه يا ندى علي بقول ليكي علقي و بضم صوتي لعمر ابراهيم ، بالمناسبة سيد البوست مشى وين باين عليه زاغ من سواة الشاي و غسيل العدة.

Post: #29
Title: Re: الشاي
Author: omer ibrahim
Date: 12-05-2003, 05:04 PM
Parent: #28

مشي يجيب حبهان

Post: #30
Title: Re: الشاي
Author: الجندرية
Date: 12-05-2003, 05:31 PM
Parent: #1

لووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول @ خالتك عبد الرحمن مختار
والله يا تماضر ختيتها بالواضح
نحن قعدنا لنف وندور وندرق في البنية

Post: #31
Title: Re: الشاي
Author: mohammed alfadla
Date: 12-05-2003, 10:50 PM
Parent: #1

الجندرية
تماضر حبيبتي(خديجة بنت خويلد)
عمر صاحبي
قرمبوز أخوي
أيمان
منى عبيد
ندى و ندى
عصام جبرالله
أب قوتة
من أين يدخلني كل هذا الحنين
من أين أبدأ
و أين سأنتهي
السماوات عامرة بوجوهكم الحبيبة
بابتسامتكم
بتعليقاتكم الحبيبة
أطفئوا هذه النار فأنتم من أوقظها
والله العظيم أنا مشتاق ليكم واحد واحد
ياخ أنتو لي شنو عاملين كده
ياخ حلوين تشهوا الزول في الأصحاب
الله يخليكم
الله يخليكم
الله يخليكم
الله يخليكم
الله يخليكم
الله يخليكم
الله يخليييييييييييكم لي شديييييييييييييد

Post: #32
Title: Re: الشاي
Author: ASAAD IBRAHIM
Date: 12-05-2003, 10:55 PM
Parent: #31

الاخ محمد
تحياتي
كل كلامك جميل بس رجائي لا تقحم اسم كاسم السيدة خديجة بنت خويلد في اي تشبيهات، زوجة الرسول صلي الله علية وسلم.
مع ودي لك

Post: #33
Title: Re: الشاي
Author: mohammed alfadla
Date: 12-05-2003, 11:08 PM
Parent: #32

يا زول عليه الصلاة والسلام
لكن الما عارف يقول عدس

Post: #34
Title: Re: الشاي
Author: ASAAD IBRAHIM
Date: 12-06-2003, 00:36 AM
Parent: #33

اخي محمد
رجاء بدون تريقة واعتبرني جاهل ممكن تشرح لي بهدؤ
ما معني ان تكتب اسم شخص وبعده بين قوسين اسم السيدة خديجة بنت خويلد رضي الله عنها زوجة الرسول صلي الله علية وسلم
وبرضو مش عدس.
مع الشكر

Post: #35
Title: Re: الشاي
Author: dreams
Date: 12-06-2003, 08:54 AM
Parent: #34

بينى وبينك الضحكة

ورحيق الشاى

وطعم الخبز والالفة

ومساء النور

مش محجوب شريف قال كده برضو؟

يا فاضلابى

والله كلامك يهبش فى النخاشيش

بالضبط زى سنبلاية محجوب شريف

تسلم

Post: #50
Title: Re: الشاي
Author: mohammed alfadla
Date: 12-07-2003, 07:28 PM
Parent: #35

محجوب شريف عديل
يا زول أنت دايرنا ننسخت
الأسياد ديل ما تهبشم
شكرا يا دريمس
وبنتلاقى

Post: #36
Title: Re: الشاي
Author: almulaomar
Date: 12-06-2003, 09:53 AM
Parent: #1

الأخ الجميل الفاضلابي
والله ده كلام جميل جداً وأتمنى أن نعمل به جميعاً فلا عيب في أن نتقاسم ونتشارك العمل في البيت مع نساؤنا أياً كان موقعهن من الإعراب ، وإن كان واقع حالنا يقول غير ذلك. بل تذهب بعض عاداتنا البالية وتقاليدنا التي تحتاج إلى ثورة تجزها جزا وتجعلها جزازا أو تهوى بها في مكان سحيق. يرى البعض أن مجرد دخول الرجل للمطبخ عيب كبير تصوروا ناهيك عن غسيل العدة أو عمل الشاي وملاح التقليه.
ولأن الغربة أقسي نضال علمت الكثير من رجال السودان المغتربين وهم السواد الأعظم كيف يطبخوا ويعوسوا ويعملوا الشاي ويغسلوا العدة بمزاجهم أو بغير ذلك ، وأطرف الحكم التي وجدتها في معلقة في جدار مطبخ أحد بيوت العزابة في دوله من دول المهجر
الماعون لين غسيلو هين
ربما لا يروق هذا الأمر أقصد أمر مشاركة الرجل للمرأة في المطبخ للكثيرين من أهلنا الطيبون لكن التغيير قادم لا محالة شاء من شاء وأبي من أبي فالذي جعل أهلنا في الريف يرتدون الجينز والتي شيرت بقادر على وضع الأمور في نصابها الصحيح. وأصبروا شويه

Post: #37
Title: Re: الشاي
Author: DKEEN
Date: 12-06-2003, 02:07 PM
Parent: #36

تغسل العدة ؟؟؟؟؟

ده عمارك مع الرجال ؟؟؟

دي البرد والصقيع يافاضلابي .. صدقني

لن تفلح ان يممت شطر امرأة ...

دع عنك نداء القلب
و
ثم دخن عليها تنجلي ...

اقرا قرايتك وتعال راجع الخرطوم امشي من مكان لي مكان وابكي جدا واستغفر الله وشوفوا كان يغفر ليك يا غبي وبطل خيابة

اخوك الداير صلاحك
دكين ضحوي عشا البايتات حسن عبد الرحمن

Post: #38
Title: Re: الشاي
Author: ملكة سبأ
Date: 12-06-2003, 03:03 PM
Parent: #37

Quote: ونتشاكل ساكت ونتصالح

Quote: قال انا عاوز مرة اتشاكل معاها

ودا قصدوا يشاكلها
انتو بالله الشكل دا زيادة ريدة اصلو؟؟
ايوااا
فى مثل بقول (كترت الريد دعا وقميد)

Post: #53
Title: Re: الشاي
Author: mohammed alfadla
Date: 12-07-2003, 07:42 PM
Parent: #37

هوووي يا دكين
هوووي

Post: #41
Title: Re: الشاي
Author: Ibrahim Algrefwi
Date: 12-06-2003, 04:43 PM
Parent: #1

يلا يا فاضلابي تم لينا النص

بلاش حركات معاك

Post: #42
Title: Re: الشاي
Author: Tumadir
Date: 12-07-2003, 05:45 PM
Parent: #41

دى همسه فى اذن الذبن اتعدمت عندهم روح القكاهه ولم تعد النكنه تضرب عندهم حجر دغش من جراء ضغوط الحياه امكن او شح الملكات الخلاقه ا و قتامة قلويهم او لمجموع الثلاثه اسباب السابقه

اقول لهم انه لاتربطنى بالشاب الموهوب محمد الفاضلاب(و الذى الدو فى اخر بطانى)، الا هذا التذوق الذى ترونه متنبادل بيننا و عميق الاحترام واريتو ولدى . و اننى لا اعرض نقسى للزواج منه...ولا تربطنى صله مثيله باى عضو من اعضاء المنتدى .... واتمنى لكم حياه مليئه بالاهتمامات الجاده الخلاقه...واوصبهم بالبعد عن خصوصبات الآخرين...لان حياتهم ، كما هو واضح لى تستدعى الكثير من الانتباه... والتغيير

Post: #45
Title: Re: الشاي
Author: ASAAD IBRAHIM
Date: 12-07-2003, 07:15 PM
Parent: #42

الاخت تماضر
تحية وبعد
اذا كنت تقصدين مداخلتي للاخ محمد وكلامي له حول ذكره للسيدة خديجة بنت خويلد بعد اسمك وفي قوسين فانا لم اتطرق لك بصورة مباشرة او غير مباشرة، كل ما اردت قوله انه ليس من الصحيح اطلاق هذه التشبيهات التي سوف يسأل منها يوما ما، وبخصوص زواج او خلافة لم اذكر ذلك ايضا، ولم اتكلم في خصوصيات احد.
اما ما ذكرتيه من نصائح فاذا كانت موجهة لي فاشكرك عليها.
ضغوط الحياة موجودة عند الكل ويمكن سببها الغربة، اما شح الملكات الخلاقة فلا تعني ان يشطح الانسان في تشبيهاته، اما قتامة القلوب فلا تعليق لي عليها الا انه لا يعلم ما في القلوب الا الله سبحانه وتعالي وعليها ايضا اشكرك.
ساحول ان تكون حياتي ملئة بالاهتمامات الجادة الخلاقة، ومن منا لا تحتاج حياته للكثير من الانتباه؟؟؟
اكرر لك الشكر

Post: #46
Title: Re: الشاي
Author: mohammed alfadla
Date: 12-07-2003, 07:15 PM
Parent: #42

دينااااااااك
شاكوش يا تماضر
في البورد و قدام الناس
؟؟؟؟؟
لووووووووول
ده منو القليل الفهم والذوق وعديم المسؤلية الزعلك ده
غايتو البزعل ست البنات
أنا ما بريده
ويا تماضر بينناالأحترام
والتفاصيل الما بقدرو عليها المطفحين فوق ديل
وجوة عين أي زول
بينا الحب
الحب
الحب
الحب
الحب
الله يقدرك وتستحمليه براك

Post: #44
Title: Re: الشاي
Author: مراويد
Date: 12-07-2003, 07:03 PM
Parent: #1

معقول بس
انا اسف يا تماضر ويا فاضلابى ويا كل الناس الحاسه وفاهمه و عارفه,و معليش ديل فى اى حته موجودين العندهم حول فى الروح و ارتجاج فى خلايا المرح و سرطان كبت و تجلط فى اوعية الحياه
اسف لجميع من يملك القدره على التمييز
و نمشى فى كرنفال جعل الارض مكان اجمل ..نمشى

Post: #54
Title: Re: الشاي
Author: mohammed alfadla
Date: 12-07-2003, 07:48 PM
Parent: #44

ياخ مش أنتو ديل في
يا مراويد
مافي عوجة تب
اللهم أنر القلوب بنورك
وأرزقنا السودان الذي نشتهي

Post: #55
Title: Re: الشاي
Author: ASAAD IBRAHIM
Date: 12-07-2003, 07:57 PM
Parent: #44

الاخ مروايد
رجائي قبل سرعة الرد واطلاق الفاظك الحلوة ان تحاول معرفة الحقيقة وهل ما ذكرته الاخت تماضر صحيح ام لا ؟ وهل هنالك من اتهمها بما ذكرت؟
الاخت محمد الفاضلابي: اعلم انني كنت اخاطبك جادا صادقا وسالتك سؤلاء محددا ولم تجب عليه حتي الان، اما بالنسبة لقولك المطفحين فوق وخلافه فاذا كنت تعننيني فلك الشكر.
اعود واسالك مجددا: هل يحق لك تشبيه اي شخص معاصر اليوم بالسيدة خديجة بنت خويلد حتي ان كان هذا التشبية يتوافق مع موضوع عبد الرحمن مختار؟؟
ولك الشكر

Post: #56
Title: Re: الشاي
Author: Tumadir
Date: 12-07-2003, 08:25 PM
Parent: #55

اسعد انا لم اعنك بقولى هذا فهون عليك...

ولم اعن اى من المشاركين فى هذا البوست...هذا كلام حمدو فى بطنو ...

الفاضلابى يؤسفنى ان اشوكش سبادتكم فى عز الجليد...
ورجو من مراويد المساعده فى علاج الحاله وبراى مغيوظه...
وكمبيوترى مكر على وبقى ما بكتب عربى ...وجيت مخصوص عشان اطمن a سعد ما بشيل فى خاطرو

اسعد بعد كتبت الكلام الفوق دة بكل جهد خارق...جيبت لقيتك ...خاتى السؤال الغريب دة..هل فى زول اتهمها ام لا...

ما بقدر اكتب اكتر من كده وبخلى الموضوع لامانتك...بتفتكر شنو؟؟

Post: #57
Title: Re: الشاي
Author: ASAAD IBRAHIM
Date: 12-07-2003, 08:39 PM
Parent: #56

الاخت العزيزة تماضر
تحياتي وحبي
اختي: الكبير يظل كبير وانت كبيرة( عقلا وليس عمرا)
لا يسعني الا ان اقول انا متاسف جدا لو سببت ليك اي ازعاج وربنا معاك.
اكرر اسفي
وربنا يحفظك
مع شكري

Post: #58
Title: Re: الشاي
Author: Tumadir
Date: 12-07-2003, 08:55 PM
Parent: #57

never mind

Post: #59
Title: Re: الشاي
Author: 7abib_alkul
Date: 12-07-2003, 10:41 PM
Parent: #58

عزيزي وصديقي الفاضلابي
عندما قرأت ما سطرت ونظرت الي صورتك الجانبية فجاء خطر ببالي فطومه والبت الحديقه وشجر الابيض والدرب ساساق بين علوم وقانون وبين القانون المدني والقانون العام
لو شاطر اعرفها براك لوووووووووووووووول

Post: #60
Title: Re: الشاي
Author: مراويد
Date: 12-07-2003, 11:25 PM
Parent: #1

تماضر..فاضلابى والناس الناس
مافى عوجه تب....

الاخ اسعد,سلام اولا انا من حقى افهم كلام تماضر بالطريقه التى اشاء (و عشان ترتاح لم افهم انك انت او احد المشاركين فى البوست هو المعنى),ثانيآ ياخى ريح نفسك شويه من دور ناظر البورد الانت خاشى فيهو ده لانو الناس التانيه عندها عقل برضو وبتعرف تميز بين الصاح و الغلط,انا لا اعرف تماضر ولا هى تعرفنى شخصيآ لكن بالحس الانسانى السوى ومن خلال مشاركاتا هنا بقدر احكم على صحة الكلام القالتو,اضافه لكد انا سودانى و راجل و عارف كتير من العقليات بتحكم على نساء زى تماضر وغيرا كيف...
لك التقدير

تماضر ...حمدو فى بطنو..ما تخلى غيظ الطحالب يفسد توهجك...
فاضلابى ما تدينا قهوه
فرررررررررح

Post: #61
Title: Re: الشاي
Author: ASAAD IBRAHIM
Date: 12-08-2003, 00:04 AM
Parent: #60

الاخ مراويد
السلام عليكم
اخي الكريم لست ناظر البورد ولا يحق لي ان اكون ناظرا في بورد به هذا الكم من الاساتذة والمفكرين والمبدعين يا دوبك انا واحد مسكين واقف في اخر الصف.
هدي من روعك اخي فلم اقل انك لست سوانيا ولست رجلا.
وايضا حتي لو قاصدني او قاصد غيري عيب تشبية الانسان الذي كرمه الله تعالي بانه طحالب.
ولك شكري يا راجل يا سوداني.

Post: #62
Title: Re: الشاي
Author: Muhib
Date: 12-08-2003, 00:27 AM
Parent: #61

وين الفاضل سعيد دا?
اولا احبائي..الونسه ظريفه هنا وعايز كوبيه شاي علشان عايز اتشكل مع تماضر ومع الفضلابي او الفاضل
سعيد..ليه ياحلوين تزعلو الراجل الجميل اسعد...والله
لااعرفه ولكنه انسان قمه التهذيب من خلال كتابته..علي
العموم لو في مشاكل لازم تكون معاي انا..ومن الان انا
مهزوم...يلا صافيه لبن ياحلوين...وين الشاي

Post: #63
Title: Re: الشاي
Author: ASAAD IBRAHIM
Date: 12-08-2003, 00:35 AM
Parent: #62

الاخ محب
تحياتي يا امير، والله ما في زعل بس سؤ فهم مني انا .
كيف اخبار الطقس عندكم.
مع حبي

Post: #67
Title: Re: الشاي
Author: mustafa mudathir
Date: 12-08-2003, 01:44 AM
Parent: #61

خلاص يا أسعد ايه رأيك تخش تغير....صورتك دي؟

Post: #68
Title: Re: الشاي
Author: ASAAD IBRAHIM
Date: 12-08-2003, 02:14 AM
Parent: #67

اخ مصطفي
سلام
هل تقصد صورة الطفل الشروم دة؟
مع حبي

Post: #64
Title: Re: الشاي
Author: مراويد
Date: 12-08-2003, 00:36 AM
Parent: #1

الاخ اسعد
تحياتى
كلنا ناس مساكين واقفين فى اخر الصف,يعنى الحاله واحده,وبكلمة راجل سودانى قصدت انى رجل من مجتمع اعرف كيف ينظر كثير من الرجال للنساء فيه,يعنى انا جاى و عايش فى نص القصه دى عشان كده ما بستغرب انو ممكن يحصل سخف زى ده على تماضر او غيرا,برضو فى نساء يقمن بهذا الدور لسبب او اخر
افتكر احسن نتجاوز القصه دى كلها لحاجه افضل و مصائب زى دى ماحتنتهى,تماضر و صويحباتها ما عاوزين راجل يحميهم هم بعرفوا كويس يختوا كل زول فى محلوا بس محتاجين زينا كلنا للانسان/ه البقول ايوه انحنا معاك وجنبك و فاهمنك صاح
سلام

Post: #65
Title: Re: الشاي
Author: ASAAD IBRAHIM
Date: 12-08-2003, 00:41 AM
Parent: #64

الاخ مراويد
تحياتي واشكرك علي حسن تفهمك وسعة افقك، والرجاء المسامحة
الاخ محب ربما استطيع مساعدتك في موضوع الكيبورد العربي، ما هو نظام التشغيل لديك.
مع الشكر

Post: #66
Title: Re: الشاي
Author: Ehab Eltayeb
Date: 12-08-2003, 01:13 AM
Parent: #1

الاخ العزيز الفاضلابي:
لقد استمتعنا كثيرا باحتساء اكواب الشاي التي قدمتها لنا..
ونسبه للرواج الكبير لموضوعك هذا اقترح عليك فتح قهوة بالبورد..
واقتراح ثانى اجمل ان تقدم اول فنجانين قهوة للاخ اسعد والاستاذه تماضر,
وفي انتظار مزيدا من الشاي والقهوة.
مع خالص ودي لجميع ..

Post: #69
Title: Re: الشاي
Author: Muhib
Date: 12-08-2003, 02:35 AM
Parent: #66

Dear Assad ..I’m using windows 2000.

Post: #70
Title: Re: الشاي
Author: omer ibrahim
Date: 12-08-2003, 10:39 AM
Parent: #69

والله يا فاضلابي الشاي بتاعك بقي كوبيا في نهاية البوست دا.
وتقول لي داير اصحي عليك واشرب شاييك وكلام لذيذ زي دا.
دعوة لي مراويد اسعد وكل المتناقرين هنا.
والله لو واحد فيكم ابتدأ يقرأ البوست دا من البداية للنهاية..ستصاب ابتسامته بالاضمحلال شيئا فشيئا الي أن تلحق امات طه.
ياخوانا شاي فاضلابي دا مش مفروض يكون واحة ننجم فيها شوية. ولا انا غلطان؟
عمر

Post: #71
Title: Re: الشاي
Author: Tumadir
Date: 12-08-2003, 12:07 PM
Parent: #70

Sorry, shabab
May be, I shouldn't bring up this issue, over here.

It was my fault.
please, forget this and enjoy your cup of tea.
I appreciate your support Maraweed and all.

I love you all.

Post: #72
Title: Re: الشاي
Author: معتصم ود الجمام
Date: 12-08-2003, 01:21 PM
Parent: #71

شايكم عينه
البوست ده بوست الاصدقاء
فاضلابي
عمر عبد العزيز
قرمبوز جيلي انا
كيف حالكم
اقول ليكم
زمان كان مكرفون الدعايه للمسرحيه الفاضل سعيديه بقول تلاته ساعات من الضحك المتواصل لكنا ادمنا النكد المتواصل الفرح بقى يكوس للقدود عشان يصل لقلوبنا
اصدقائي حبو غنو الدنيا ما زالت نديه
الفاضلابي اكتب بعمق الفرح الجواك يمكن الدنيا تبقى صباح ونرجع تاني نتلاقى ونغني ونمشي في الشوارع الحميمه
ونسمع شاديه تغني
شاقي روحك ليه ايه الزعل بجدي
ولا ما كده ياعمر عبد العزيز يا جميل
معتصم سيد احمد
ود الجمام

Post: #74
Title: Re: الشاي
Author: omer ibrahim
Date: 12-08-2003, 01:45 PM
Parent: #72

ود الجمام
بجيك هسي ارجاني ..
ما تعمل لي فيها سعودية ولا كفيل معاك.

عمر

Post: #108
Title: Re: الشاي
Author: tmbis
Date: 12-11-2003, 10:24 AM
Parent: #74

عمر .. شاقي روحك ليه من شادية
يلالا نرقص خطوة واحده .. في مركز شباب امدرمان بالعصر
أخر مرة بالمركز الثقافي الفرنسي .. بي يميني كان ببو .. وبي الشمال كان ( كيج ) ومجموعةو كواتو جو طالعين من جوة .. وقبل شوية غنت امال النور ومستر اولفيه بتاع الساكس عامل عمايل .. وعبد المحمود باص جيتار .. وغاندي (فلوت) علينا بكره
انا قاعد اتذكر فيك والا انا مالي ؟؟

Post: #109
Title: Re: الشاي
Author: omer ibrahim
Date: 12-11-2003, 06:51 PM
Parent: #108

استغفر الله العظيم

تمبس ... تراكا دا انت؟؟؟

و انا اقول..

اسمعني ...هو ... انت ... كيف ... وين ... ولا متين

ولا دا شنو ياخ.

ياخ عاين .. مسنجر .. كيف معاك؟

نرجع لي الشاي

قلت لي كم ملعقة؟؟

Post: #80
Title: Re: الشاي
Author: omer ibrahim
Date: 12-08-2003, 03:54 PM
Parent: #72

ود الجمام
....
يا عميان و مفتح

مد رجليك علي قدر الشوف

دي الضلمة (بالمصري) وضل كرعيك

عقارب زمنك

يا عميان و مفتح
....

معتصم يا ايها الجمامي الجميل المليان ضو

والله

كتابتك بتجيب ريحة رمضان و نادي العباسية و رذاذ و أشياء أخري مفيدة.

طلقت المسرح خلاص ولا الحاصل عليك شنو في مملكة آل سعود؟

بوستك جميل ... عليك الله ما تحرمنا منك.

من يوم قلت للموصلي انا حا أنزل شغل للصافي وانا تاااااكل .. راجيك و تراني قاعد لي يوم الليلة.

انت ما عارف الزول دا الحححححن زول؟

بوظت لينا اعصابنا زاتو.

اسمع ماتقعد تلاوز لينا يا نزل الشعل دا ولا بلاش تصريحات معاك.

اما الغنية فهي كدة و نص وخمسة واما اجمل و اجود من غناها فقد رحل .... أحمد ربشة.

بعدين عمر عبد العزيز دي كويسة خلاص منك ..

و الله ذكرتني اسمي القربت أنساه داك.

Post: #78
Title: Re: الشاي
Author: Ibrahim Algrefwi
Date: 12-08-2003, 03:36 PM
Parent: #70

ده شنـــــــــــــــــــــــــــو ده

الشكله شنو يا عمر

والله دي مشكله الواحد ما ينوم ولا شنو؟؟

Post: #82
Title: Re: الشاي
Author: omer ibrahim
Date: 12-08-2003, 04:10 PM
Parent: #78

قرمبا يا خيت اللمبة

شفت الشكل الهنا دا كلو منك انت دا.

شابكني خلي الفاضلابي يسوي لينا الشاي و حركات معاك.

اسمع أنا مش صاحبك بتعمل لي حركات مالك يوم عشرين و بتاع ,,

ماتهظر

لقيتني كيف في الشكل؟ عجيب صاح؟

Post: #83
Title: Re: الشاي
Author: Ibrahim Algrefwi
Date: 12-08-2003, 04:48 PM

عمر الاضعف من شبكه شويه

اهــــــــــــــــــــــــــــــــــــا كيف

اسه انا عملت ليك حركات ياخ... انا قلت عرس ولا خنه ولا حبيبتك

انا مـــــــــــــــو ش ساكت ساي

بعدين انا لو ما ناس اسعد وشنو كان قلت ليك بريدك لاكن اسكت ساي

ما يسمعـــــــــــــــونا يعملوا لينا فيها لمبه

وخلي الود ده .. يكمل الشاي ده ياخ

عمـــــــــــر ما دايرين شكل ياخ

Post: #73
Title: Re: الشاي
Author: nada ali
Date: 12-08-2003, 01:38 PM
Parent: #1

:""انا من فترة عاوزة اعلق على مقطع من قصيدة رائعة تانية للفاضلابى "نفسى ف بلد"
البيت البيقول "تغلبها بالمال تغلبك بالعيال"

ندي علي
انا بصفتي الراعي الرسمي للمقطع اعلاه بطلب منك التعليق عليهو ونشوف بعد داك البحصل شنو.
كيف اقتراحي دا معاك؟""

الأخ عمر ابراهيم و الأخت ندى،
سلامات و اسفة لتأخير الرد
قصدت من هذا أن هذه المقولة (المستخدمة بكثرة فى ثقافة الشمال)، تكرس للأدوار النمطية للنساء (انجاب الأطفال و الأدوار المرتبطة بهذا) و الرجال (العمل المدفوع الأجر خارج اطار المنزل). أيضاً فى خطاب النوع و التنمية
Gender and Development
يتم انتقاد مقولات كهذى باعتبار انها تشجع على تكوين أسر كبيرة (بها عدد كبير من الأطفال) و لذلك تتناقض مع مشروعات "تنظيم الأسرة".

لكم التحية

ندى

Post: #76
Title: Re: الشاي
Author: omer ibrahim
Date: 12-08-2003, 02:25 PM
Parent: #73

ندي علي
سلامات.
اولا بالتبادي والله انا يا ندي يا أختي الالقاب كالأخ و الأستاذ وماشابه ذلك بتعمل لي......
كاروشة.
اها دحين عمر ساي ما بطالة.
اها انرجع ليك وللمقولة التي تكرس للأدوار النمطية علي قولك.
المقولة في سياق الشعر ربط لي انا شخصيا بثقافة اقوال سودانية متعارف عليها تنشد التفاؤل للمقبل علي الزواج مجسد في المال و البنون ولا تكرس أو تشجع بصورة استثنائية لحصر دور المرأة العظيم في الانجاب فقط أو الرجل في جلب المال.
العبارة في نظري البسيط و غير الجندري -في معناه الحقيقي- هي أفق فأل جميل وأكبر من معناه المباشر.
عموما انا بفتكر انو التشجيع علي تكوين اسر صغيرة كانت أو كبيرة تدعمه عوامل أقوي من العبارات المتداولة كهذه.

احترامي

عمر

Post: #75
Title: Re: الشاي
Author: ali othman
Date: 12-08-2003, 02:03 PM
Parent: #1

الأخ الفاضلابي
والله أنا شاييك ده لاعندي فيهو ناقة ولا جمل ومن ماقمت ماضقت لي كباية شاي بس قلت اتاوق لي ودبحري ده ..
بالجد شاييك كيفني وعدل نافوخي .. بس غسيلك للعدّة هيّج على الولية وقالت لي من بكرة اعمل حسابك ح اعمل ليك الشاي دغش ...
الأخ عمر ابراهيم تسلم ودي امنياتنا كلنا

Post: #77
Title: Re: الشاي
Author: nada ali
Date: 12-08-2003, 03:27 PM
Parent: #1

عمر ابراهيم (ساكت علشان ما تجيك الكاروشة"، كتبت

"اها انرجع ليك وللمقولة التي تكرس للأدوار النمطية علي قولك.
المقولة في سياق الشعر ربط لي انا شخصيا بثقافة اقوال سودانية متعارف عليها تنشد التفاؤل للمقبل علي الزواج مجسد في المال و البنون ولا تكرس أو تشجع بصورة استثنائية لحصر دور المرأة العظيم في الانجاب فقط أو الرجل في جلب المال.
العبارة في نظري البسيط و غير الجندري -في معناه الحقيقي- هي أفق فأل جميل وأكبر من معناه المباشر."

تحية و سلام, نعم, هذه المقولة فى بعض ثقافاتنا، تبدو و كأنها "أفق فأل جميل" كما تفضلت، لكنها تؤدى، مع مكونات أخرى لثقافاتنا، الدور المنوط بها ألا و هو تعيين دور المرأة "انجاب الأطفال" و الرجل "توفير المال", و حصر الاثنين فى هذه الأدوار. فاللغة كما ت/يقول ما بعد الحداثيين/ات و غيرهم/ن و كما كتبت الجندرية فى بوست اخر، ليست بريئة.

ندى

Post: #79
Title: Re: الشاي
Author: Ibrahim Algrefwi
Date: 12-08-2003, 03:38 PM
Parent: #1

مــــحمد وعمر

عليكم الله ارح ياخ

وانت يا فاضلابي بطل الشطاره بتاع الاوربيين دي وتم لينا القصيده

تم النص ده شنو يعني حمبكه

يلا

وهوي يا ناس الشكــــــــــله خلونا نتم الشاي ده

Post: #81
Title: Re: الشاي
Author: Ibrahim Algrefwi
Date: 12-08-2003, 04:02 PM
Parent: #1

اوعه امشي واجي القا في شكله

بعدين فلنتمترس جميعا صفا واحدا من اجل اكمال القصيده

فلنفــــــــــــــوت الفرصه عليه

Post: #84
Title: Re: الشاي
Author: omer ibrahim
Date: 12-08-2003, 04:58 PM
Parent: #81

قرمبا

أقول ليك سر؟

Post: #85
Title: Re: الشاي
Author: omer ibrahim
Date: 12-08-2003, 05:16 PM
Parent: #84

انت أحسن زول

Post: #86
Title: Re: الشاي
Author: مراويد
Date: 12-08-2003, 05:21 PM
Parent: #1

عمر ابراهيم
كتر خيرك....طلعتنى بتاع مناقره
وظاهر عليك ما قريت كلامى او مافهمتو
الله يخلى لى الفاضلابى وتماضر الفهمونى
و برضو يا فرمبز عاوزين الفاضلابى يتم القصيده
الولد ده بلد الترك بوظتو !!!

Post: #87
Title: Re: الشاي
Author: omer ibrahim
Date: 12-08-2003, 05:37 PM
Parent: #86

يا مراويد
والله انا فاهم كلامك وقاريهو كويس جدا جدا
انت الفي حاجة ما فهمتها وفهمتا خالتك تماضر.
انا قاصد انو مشاكستكم انت و اسعد جلبت جو ما لذيذ للبوست دا ياريت لو ما كان طغت ... دي كل الفكرة.

انا في حاجة وااحدة ما فاهما

انت دا؟ لكن صدقني بعرف

احترامي

Post: #89
Title: Re: الشاي
Author: ASAAD IBRAHIM
Date: 12-08-2003, 05:43 PM
Parent: #87

الاخ عمر ابراهيم
حقيقة اعتذر لك ولكل من تضايق من ردودي في هذا البوست ولم اتوقع ذلك.
علي العموم حصل خير واكرر اسفي.
لك مودتي

Post: #88
Title: Re: الشاي
Author: mohammed alfadla
Date: 12-08-2003, 05:43 PM
Parent: #1

في الشارع سهو و ضو
وحمام سارح
في السما والناس
في الشارع ناس
لو عرفوا بحبك كيف
بستغربوا كيف
عايش للآن
جمب الدكان
أولاد الحلة
أتمنيتم لو عرفوا بحبك كيف للآن
جمب بيتنا طيور
وعمود النور واقف سرحان
في البيت
البيت ما زي ما كان
حسيت بالزير صافي و نديان
وملاياتنا لوننم رويان
والرادي حنين و مذيعة بقول هنا أمدرمان
و أنا
كنت غريب
مما حبيتك و لحدي الآن
منتظرك تطلعي لي في الليل
تطلعي من ركن ما في الأوضة
تفتحي أيديك على قدر أساي
وتطفيني في نيل نهديك

في الشارع كنتي معاي
ونسيتي الباب فاتح جواي
خليتي حنين الشارع كلو يخش
مما حبيتك
حدي الآن

وأنا مشتاق ليك
داير لو يوم أنا أصحى عليك
داير أصحى عليك
أصحى و ألقاك سويتي الشاي
أسمع صوت نفسك نايمة
و قبال ما أرقد أغطيك
وألعب بي شعرك في الليل
أمشي المكتب متأخر
و أرجع بدري
ونتغدا سوا
ونتفرج سوا في التلفزيون
و أغسل ليك العدة
و أموت بالشوق لمن تمشي الجيران
ونتشاكل ساكت ونتصالح
ولمن أبوسك
تنتظر الجنة خيول دمي
و طيور دمك
وتفتح نجمات سرية الضوء
في رئتينا
ونتونس
عن أي بلاد
وعن أي مطر
داير أصحى عليك
أصحى وألاقي عيني في عينيك

Post: #90
Title: Re: الشاي
Author: إيمان أحمد
Date: 12-09-2003, 04:14 AM
Parent: #88

فاضلابي يا جميل

اغمس رأسك في النيل....

بلل شعرك...

خلله بي إيدينك..

انتر مويته..

اتنفس..

وواصل!

إيمان

Post: #91
Title: Re: الشاي
Author: Outcast
Date: 12-09-2003, 09:03 AM
Parent: #1

كلامك سمح بالحيل ..وراااقى .. هل هناك عشق كهذا .. ملئ بالصدق والرغبات الانسانيه البسيطه وعميقه فى نفس الوقت ..
غايتو شعرت بنسيم نااااعم هب علي مما قريت الكلام الحلو ده ..حاجه تهدهد الروح والوجدان
واصــــــل.
غايتو ما عارفه البوست ده مفتوح للكل وللخاصه, لكن لقيت كلام عجبنى ورديت

Post: #92
Title: Re: الشاي
Author: Ibrahim Algrefwi
Date: 12-09-2003, 01:40 PM
Parent: #1

بـــــــــــــس خلاص

أنا اسه عندي الشجن ,,, حا اسكت ســــــــــــــاي

Post: #93
Title: Re: الشاي
Author: mohammed alfadla
Date: 12-09-2003, 04:24 PM
Parent: #1

i have a problem writing in arabic now
but i''l be right back
thanx for all of you
you are realy motivating me
to write
and write
bless

Post: #94
Title: Re: الشاي
Author: hala guta
Date: 12-09-2003, 04:27 PM
Parent: #1

الفاضلابى

Post: #95
Title: Re: الشاي
Author: mohammed alfadla
Date: 12-09-2003, 04:57 PM
Parent: #1

hala

Post: #96
Title: Re: الشاي
Author: hala guta
Date: 12-09-2003, 05:01 PM
Parent: #1

الفاضلابى
ما فى كلام يتقال
الصمت فى حرم الجمال.....

Post: #97
Title: Re: الشاي
Author: haneena
Date: 12-09-2003, 06:42 PM
Parent: #96

اللللللله يا الفاضلابي
شايك مظبوط تمام
يدغدغ الروح ويحرض العقل للاستسلام

واصل الشاي ما تخلي نار المنقد تنطفي

وكفي

Post: #98
Title: Re: الشاي
Author: mohammed alfadla
Date: 12-09-2003, 09:34 PM
Parent: #97

SAMI7

Post: #99
Title: Re: الشاي
Author: salam
Date: 12-09-2003, 09:42 PM
Parent: #1

يا الفاضلابي
انا معزومة معاكم في الشاي دا ؟؟؟!!!

لكن ما تشهي الشاي و الشاربو

و تسلم على الكلام الجميل دا

لقدام
و تقعد عافية

Post: #100
Title: Re: الشاي
Author: mohammed alfadla
Date: 12-09-2003, 09:44 PM
Parent: #99

معزومة؟؟؟!!!
معزومة و معزومة ومعزومة ومعزومة

Post: #101
Title: Re: الشاي
Author: salam
Date: 12-10-2003, 02:17 PM
Parent: #1

اها

Post: #102
Title: Re: الشاي
Author: salam
Date: 12-10-2003, 02:18 PM
Parent: #1

وردة

Post: #103
Title: Re: الشاي
Author: Ibrahim Algrefwi
Date: 12-10-2003, 04:14 PM
Parent: #1

والله الواحد سكن سكنه في بيت الشاي ده

بالمناسبه يا محمد سعيده قاعد تتذكرها

Post: #104
Title: Re: الشاي
Author: mohammed alfadla
Date: 12-10-2003, 06:08 PM
Parent: #103

سعيدة
التي تخلط نعناهابالسكر القومي و الونسات المثقفة؟
طبعا

Post: #105
Title: Re: الشاي
Author: 7abib_alkul
Date: 12-10-2003, 07:29 PM
Parent: #104

الفاضلابي الفنان

كم اشتقت اليكم جميعا
اسره القانون المدني

Post: #106
Title: Re: الشاي
Author: mohammed alfadla
Date: 12-10-2003, 09:57 PM
Parent: #105

بالأكتر يا منقة

Post: #107
Title: Re: الشاي
Author: dreams
Date: 12-10-2003, 10:45 PM
Parent: #106

دى على راى الحزين

"كباية شوق احمر"

Post: #110
Title: Re: الشاي
Author: mohammed alfadla
Date: 12-12-2003, 09:43 PM
Parent: #107

الله يواليه بالعافية