Post: #1
Title: رسالة للموتى
Author: fadlabi
Date: 02-01-2005, 01:23 PM
Parent: #0
لكل الماتو
شان حق أو باطل
خير أو شر
جد أو كضب
قرش أو حزب
جيش أو طيش
صعب أو ساهل
للمات بالجوع والمات بالفكرة
للخلدوا إسمو
و للميت نكرة
للمات للدين
والمات للأرض
للمات لي مال
أو مات لي عرض
لي كـــــــل الماتو لأي سبب في الآخر ماتوا
هذا المكتوب
....
أما بعد
كيف طعم الموت
و هل فعلا بعدو في جنة ونار
و منو الكان صاح??
أنا هسع أسلم ولا اتنصر
ولا أسيبهم كلهم أكفر
بي عيسى و موسى وبوذا وآمون رع ??
يا كل الماتو
أنا بكتب ليكم هسي من العالم زي ما عارفين
بن لادن لسع ما قبضوه
و أمريكا بخير
لسع بترسل يومي
المايكروسوفت
و تمص النفط
و بتزيد في كومكم كل سنة
أما السودان
أخبارو معاكم طبعا
يوميا منو بجوكم ناس
كبار وصغار .. شهدا وأبطال..نسوان ورجال .. نجوس و أنذال .. شرفا وكيزان
وغيرهم
وغيرهم
وغيرهم
أنا بسأل فيكم
لأنو مفكر أجيكم
لكن متردد حبة
عاوز أحسم بس حبة حاجات
أفكار جايطات
و خايف وشايف العالم كيف
عارفين ??
أنا هسي بحب
لاكين حتى الأحضان
والكلمة الطيبة
ما بتمسك دمعة.. حليلو زمان
هسي الحاجات زي ما حاجات
الناس بتعاين ليك في عينك
وتكضب
تطعن في ضهرك
وتبكي
و الساسة
وناس (بل قيتس)
بتدسوا ورا البدلات
و ورا الكلمات
زي البهتموا عشان الناس
والناس
طمعانة في حق الناس
و أنا ذاتي
بكضب
أكتر من ما كنت زمان
بضرب و أهرب
وأعمل زعلان
وفي الآخر بكتب
للعالم نفسو المنو شكيت
أكتب في الحب
و في عاش الحزب
و ف نفس الدايرة بدور
هسع يا الماتوا
يا كل الماتوا
لأي سبب
أنا بسأل فيكم
وداير أجيكم
لاكين متردد
وخايف
من العالم
و من الموت
|
Post: #2
Title: Re: رسالة للموتى
Author: سلمى على محجوب
Date: 02-01-2005, 03:12 PM
Parent: #1
الموت ان جاءني بالملائكةالطيبين
بقول حباب بالموت وعزرائل
العقب الوراي بيقروا ياسين
وانا بكون متطمانة من منكر ونكير
سوالون سهل باحيل
بجاوب برتياح وقبري مضوي باليل
يجيني العمل الصالح ويدافع علي في الحين
|
Post: #3
Title: Re: رسالة للموتى
Author: وانجا
Date: 02-01-2005, 03:51 PM
Parent: #1
فاضلابى ..
لا بُد لنا ان نبقى على قيد الحياة ..
إبق معنا ..
لا تذهب ..!
|
Post: #4
Title: Re: رسالة للموتى
Author: خضر حسين خليل
Date: 02-02-2005, 01:35 AM
Parent: #1
Quote: أما السودان
أخبارو معاكم طبعا
يوميا منو بجوكم ناس |
فاضلابي
في شنو
غير اني اصبحت ايقن بان اؤلئك الناس العجيبيين قد نالو منا
الواحد بعد الواحد .
Quote: أنا بسأل فيكم
لأنو مفكر أجيكم
لكن متردد حبة
عاوز أحسم بس حبة حاجات |
خدني معاااااااااك
احسم حاجاتك وهيا ياصديق بلا (أرف) علي قول المصريين
|
Post: #5
Title: Re: رسالة للموتى
Author: أيزابيلا
Date: 02-02-2005, 02:09 AM
Parent: #4
يأأأأأأأأأأأأأفاضلابى
..........
..........
(ومت أنا
...
وأمتهنت أنكفاء القبور
وصادقت
تحت التراب
أغتراب الجذور
....)
ثم
ماذا بعد الموت
(عايزين نطلع من ربكة السؤال)
بس تعرف يا فاضلابى
(لا بد أن
وراء النهاية
شيىء
ليس بوسعه
أن ينتهى....)
ثم....
(حنشوفك متين؟)
وقرمبوز
وطلال
وضياء
يقسمون أن الأمسيات هنا
تفتقدك....
أكاد أقسم انها تفعل.
|
Post: #6
Title: Re: رسالة للموتى
Author: وليد محمد المبارك
Date: 02-02-2005, 02:43 AM
Parent: #5
Quote: يا كل الماتو
أنا بكتب ليكم هسي من العالم زي ما عارفين
بن لادن لسع ما قبضوه
و أمريكا بخير
لسع بترسل يومي
المايكروسوفت
و تمص النفط
و بتزيد في كومكم كل سنة
أما السودان
أخبارو معاكم طبعا
يوميا منو بجوكم ناس
كبار وصغار .. شهدا وأبطال..نسوان ورجال .. نجوس و أنذال .. شرفا وكيزان
وغيرهم
وغيرهم
وغيرهم
|
ومن سيكون الشاعر ان لمن تكن انت
اوعك تموت تخليني
او تموت تخلي زاتو
اما انحنا
فميتين من زمان
من زمن الترابي نصب نفسه مكان عزرائيل
ومعاه ملائكة بساعدوه لابسين كاكي
يا عزرائيل ابود دقن
او عزرائيل اللابس كاكي
شيل كل الارواح
واقعد في الدنيا براك
ما تخلي التكتح بوراك
ربيها شرورك
غتي عليها ..حاحي وكاكي
بس عند النفخة الاخيرة
اوع تموت
ولو مت ما تقيف لحساب
قدام العادل
حانكون في رجاك
شايلين اوراق
ممضيه بخطك
مختومه بختمك
مكتوب في الاخر اسمك
ونصفى حسابنا
ويكون ولدونا يادابنا
|
Post: #7
Title: Re: رسالة للموتى
Author: Muna Khugali
Date: 02-02-2005, 06:50 AM
Parent: #6
ليس بأيدينـا
أن نمـوت اليـوم او غـدا...
ولكـن بأيدينـا أن نتـرك ذكـري جـمـيلـة عـنـدمانـذهـب
ذكـري تفـرح الـذيـن يناضلـون وتخـيف المجـرمـون..فهـل هـنـاك
أجـمـل مـن نضـال مـثل ذلك حـتـي ونحـن غائبون عـن هـذه الدنـبـا?
لك المـودة أخـي
مـنـي عوض خـوجـلـي
|
Post: #8
Title: Re: رسالة للموتى
Author: bayan
Date: 02-02-2005, 08:02 AM
Parent: #7
الموت له حرمات... وقداسة....
يالى فجيعة الموتى والاحياء فى بلادى...
يا محمد أحمد انت ميتا وحيا عورة
ينتهكها الجهال واصحاب المرض والغرض....
يقيمون المهرجانات لموتك البائس
ولا أحد يحفل بك حيا....
لا تصلح والا أنت مضرجا بالدماء....
يعدون مسرحية موتك البائس
وعندما تموت...
يتحول موتك الى مهرجان
ودمك الطاهر.. فرجة
يمصمص المتفرجون شفاههم المنافقة
ويتحسرون عليك و هم قاتليك...
من ادخل الثعلب فى قفص الدجاج؟
والفاتنات يلبسن صورتك االمضرجة
للفت النظر الى فتنتهن..
تموت غير ماسوفا عليه
الا من من انجبك
و عرفك......
للموت حرمات وقدسية الا موتك
|
Post: #9
Title: Re: رسالة للموتى
Author: وانجا
Date: 02-02-2005, 04:39 PM
Parent: #1
فاضلابى ..
ألا زلت على قيد الحياة ..؟
أوعك تموت !
|
|