Post: #1
Title: خطة
Author: fadlabi
Date: 06-03-2006, 05:31 PM
Parent: #0
هذا الشارع البعيد جدا عن البيت
في عيون أطفاله الزرقاء
لون الملاءة في غرفة ضيوف أمي..
هذه خطتي لمجابهةالوحشة..
ربما
قتلها.
غدا عندما ألتقى الناس
لن أبصرهم بقلبي كالمعتاد.
أجيبهم فقط
إن سألوني عن أرواح الموتى في أشجار اللبخ في كلية الهندسة.
...
ما بين حي و حي
خيط من روح شفيف.
ياريت يا حبيبي
ليهو في يوم تشوف.
...
البارح و روحي تقيلة و أعرج حالي
زي عادة النسيم
فتح الجروح في بالي.
مر علي لطيف.
و جاب طيف بعيدا غالي.
و مكان الفرح في قلبي خلفوا خالي.
...
...
مرات يختلط الحق علي
و مجاز
و الوجع الحرام
في مرة مرة يجاز
يقعد جمرو جواي
و شوقي يلهبو جاز
...
حدايق القلب أصبح موت ورودها وشيك
حشايا من الوجع ماأظن يفكو فكيك.
و نيل أفكاري فكرو من العليهو ركيك.
و ليه يا خوف
محل قبلت ألقى وشيك
....
أعضاي تالفة
بينات الضلوع تقابة
و الأفكار طيور و الروح مشربكة غابة
الذكرى اللئيمة تصيدني بي نشابا
و سمح الذكريات..
العرفة في تتغابى!
...
بين نعسان و نايم
شفت صورة زهرة
و فجأة من العرش طلعت قصادي القمرة.
و زي درويش غرق بين الطبول و الحضرة.
رفعت الكاس
نظرتو بحب
جرعت الخمرة.
...
بنادي العارفين* و السر
و بينا عهود
مدد يا غاندي
يا ود طه يا محمود
يا Noam Chomsky
يا Bob Marley
يا ود شمة يا أب عود.
مدد .
ــــــــــــــــــــــــــــــــــــ
*العارفين
كيف عرفوا ?
لما الأسئلة
كلما تلاقي البسألا
جواها بتزيد و تنقسم لأسئلة
و السائل أصلا
مسألة!
|
Post: #2
Title: Re: خطة
Author: عصمت العالم
Date: 06-03-2006, 06:17 PM
Parent: #1
الفاضلابى.الشاعر..
لعل للخطة مسارات النزع ..لاحتواء متاهات التوقع الرؤياا..ولعلها امنيات تسعى لتلاحق زمن وشخوص.قد عبروا الى عوالم اخرى..وهى ترتيب مشاهد للوحه يتفاوت فيهامدى الاستيعاب و زمن التداخل والايقاع ما بين النشوه والصبوه..وحالة النزع وخروج الروح..لتبقى الاحلام هى الحظوه..فى صراعات زمان قد غير فى مسيرته كل توقع واتى بما يحير ويخلق الذهول..ليعاد الاجترار بما يطفىء لهيب الحريق ..ويعيد التبصر على شتات الذكرى.. لان الواقع قد اسرج ركاب رحله وتنوع بما يقلب كل الموازين..ويفقدها قدرة التوازن ويسرح بها فى زلزلة الارتجاج...
ولعل طلب المدد.هو تلك المناجاه لبلوغ الغايات..للوصول ..والنزول..على ترف متكأ.يريح ويمسح اجيال الوجع ..ويعيد ثبات احساس الذات..ويغسل بطل نداه كل التراكم المنى..والاحباط...ولعل لتشكيل مشاهد اللوحه له دلالاته ..المعايير
الشاعر الفنان فاضلابى..
انها خطة.رسمت بحذق.وترصد...وقصد فيها تمويه تداخل زوايا إلتقاط المشهد..لتتاح المجالات الى براح.سريالية التوغل..زوالانتشار...فى عدة مناحى...ونواحى
انا لست بناقد.زلكن لى معابر رؤيتى..
و.لكنه راى ...وقراءه من زاويه مختلفه. من معبر. الرمزيه...والحوجه لدفء الحنين
عميق ودى
|
Post: #3
Title: Re: خطة
Author: fadlabi
Date: 06-04-2006, 05:49 AM
Parent: #1
يا عصمت يا عالم
شكرا ثلاث
شكرا لمرورك
شكرا لقرائتك المتأنية
شكرا لتحليلك الشخصي و الجميل
عندما يقتطع الواحد من وقته على الأرض ليحدث آخر و يفاكره فهو كرم عظيم.
|
Post: #4
Title: Re: خطة
Author: Bakhaf
Date: 06-04-2006, 09:49 AM
Parent: #3
الله معاك
وهاك
|
Post: #8
Title: Re: خطة
Author: fadlabi
Date: 06-05-2006, 02:37 PM
Parent: #4
بخاف
الله يسامحك
مالك علي
الحاجات كلها سوا و معاها الله كمان.
|
Post: #5
Title: Re: خطة
Author: Ibrahim Algrefwi
Date: 06-05-2006, 01:05 PM
Parent: #1
حدايق القلب أصبح موت ورودها وشيك
حشايا من الوجع ماأظن يفكو فكيك.
و نيل أفكاري فكرو من العليهو ركيك.
و ليه يا خوف
محل قبلت ألقى وشيك
يا سلام يا سلام يا سلام ...
محمد ، الشاعر البعيد ، الرسام ...
لو سمحت اكتب لنا عن هذا النص ؟ الدارجي الاثر العجيب ؟
تاريخه ؟ وحكايتو ، ولحظة الكتابه ؟
...
...
تعرف يا محمد يابو مدينة
لو كنت في الخرطوم ورأيت كيف تمشي أغنية كل ما نقول
بلحن شريف الجميل بين الناس وتطربهم فيرقص القلب قبل الايادي
لبكيت من مكان لمكان واستغفرت الله العظيم...
|
Post: #7
Title: Re: خطة
Author: fadlabi
Date: 06-05-2006, 02:34 PM
Parent: #5
يا إبراهيم
يا صاحب روحي
عن ماذا أكتب لك..
عن كل شئ.. هكذا في المنبر يا راجل?
عن أحوال القلب بعيدا عن الخرطوم و فيها.
يا صاحبي
(كبرنا و كبرت أحزاننا)
كل ما نقول كملنا الليل, حارقني جدا ما أسمعها معاكم و أتفشر عليكم و أتنفخ كده و أحكي ليك عن تاريخ عقد الجلاد الأنا جزء منو!!!!!!
ديناااااك يا قرمبوز
عقد الجلاد غنو لي
بعد ده أحج و أموت.
|
Post: #6
Title: Re: خطة
Author: Dia eldin khalil
Date: 06-05-2006, 01:35 PM
Parent: #1
alshooog
|
Post: #9
Title: Re: خطة
Author: fadlabi
Date: 06-05-2006, 02:39 PM
Parent: #6
الضو
حايم في النت شايفك
التقول ما عندي صورة ممكن أنزلا هسع 
|
Post: #10
Title: Re: خطة
Author: Bakhaf
Date: 06-06-2006, 05:43 AM
Parent: #9
كل ما
دي ياها ولا ما ياها يا جريفاوي
هدية للجمهور
كل ما نقول خلصنا الليل يطلع باكر ليلاً اطول
كل ما نقول كملنا الشيل تطلع شيلة باكر اتقل
بس نتحمل ونصبر ونأمل انو الجاى صباحاً اجمل
لكن كيف وطعم الريد جوانا اتحول
مره تشيلك فوق الفوق
مرات تملاك فاقه وضيق
تلقى الدنيا تلم فى همومك
تفتح جرحك وانتا تضوق
انسى واقول ما منها منى
دايماً بحلم وانا ممحوق
قلنا كتير الشارع بيقصر و لمن نصبر نكون
ولما الزول فى يوم يتعتر
بكره القاسى الشافو يهون
وبكره بنمشى الخطوه الاولى
التانيه
التالته
الرابعه
الخامسه
وفجأه...
نلقى الشارع قسى واتحجر نلقى الحلم الفينا اتكسر
ويبقى الزول.....
مسجون مجنون مغبون بالهم مسكون
منحوس معفوص جواو محبوس
ويكوس ويكوس ويكوس....
هسى الشارع ماشى لى وين
لينا عليهو سنين وسنين
نمشى كاننا ما ماشين
نفتح سكه تنسد اتنين
هووووى يا شارع ماشى لى وين؟؟؟؟؟؟
|
Post: #11
Title: Re: خطة
Author: نجلاء التوم
Date: 06-06-2006, 06:04 AM
Parent: #10
محمد
السلام عليك
يا أبا مدينة
وبعد
فيها حاجة لو قت ليك مشتاقة ليك رغم ما انت عليه من الطول
وبعدين حكتب ليك بالدارجي بس
انتا وبهنس
الدنيا يا خوي ما مضمونة ونساوينكم ديل قادرات وبكونو بعرفو عربي تحت تحت
اها انا قت احسن اللهجات المحلية
تحسباً لولا انكم انتو برضو ما مضمونين
يعني عااادي ممكن تكونو فتحتو مدرسة اسمها عبد الكريم ابوسن للاقليات الفوق بطانية !!
طيب يا فاضلابي
ده كلو بره الموضوع الاساسي
طيب الموضوع الاساسي شنو؟
اعتقد انو بهنس اشعل موجة من الحنين في بوست " حال البريد "
وانا منذهاعلى حال من الطفو
وغالب ما كتبته بعدها كان تحت وطأة ذلك
الفقد
يا محمد
يا صحبي برضو شديد
وكيف يعني يكون عندك بت وانا ما بعرفها؟
ودي حتكون عاملة كيف بت الفاضلابي دي ؟ وهو نحنا عرفنا نقعدك في حتة لمن كمان تجيب لينا بنية ؟
لكم يروق لي الامر
بجيك تاني
|
Post: #12
Title: Re: خطة
Author: fohamer
Date: 06-09-2006, 02:52 PM
Parent: #11
يا فاضلابي ,
" غدا عندما ألتقى الناس
لن أبصرهم بقلبي كالمعتاد."
وبعدين بالمناسبة
" الافكار طيور والروح مشربكة غابة "
ومسألة الأسئلة دي
في انتظارك برضو ..
والحروف دي سمحة ..
|
Post: #16
Title: Re: خطة
Author: الفاتح وديدي
Date: 07-09-2006, 02:17 PM
Parent: #10
....
هووووى يا شارع ماشى لى وين؟!
|
Post: #13
Title: Re: خطة
Author: Ibrahim Algrefwi
Date: 07-08-2006, 04:16 PM
Parent: #1
" الافكار طيور والروح مشربكة غابة "
|
Post: #14
Title: Re: خطة
Author: إيمان أحمد
Date: 07-09-2006, 06:02 AM
Parent: #13
يا محمد بتعجبني كتابتك بكل اللغات
ومشتاقين
ايمان
|
Post: #15
Title: Re: خطة
Author: Ibrahim Algrefwi
Date: 07-09-2006, 11:29 AM
Parent: #1
" الافكار طيور والروح مشربكة غابة "
|
|