Post: #1
Title: زاي ذال قاف غين همزة
Author: fadlabi
Date: 03-02-2007, 00:53 AM
Parent: #0
ديل مساكين مسكنة في البورد ده
|
Post: #2
Title: Re: زاي ذال قاف غين همزة
Author: Raja
Date: 03-02-2007, 01:05 AM
Parent: #1
زينا كده..
|
Post: #3
Title: Re: زاي ذال قاف غين همزة
Author: fadlabi
Date: 03-02-2007, 01:12 AM
Parent: #1
رجاء
ياريتهم زيينا
نحن بنقدر نتكلم على الأقل
|
Post: #4
Title: Re: زاي ذال قاف غين همزة
Author: Raja
Date: 03-02-2007, 01:20 AM
Parent: #3
تعرف يا فاضلابي.. لو الكلام المكتوب سمح وزين، والله ما مهم الفرق.. فاللغة هي الأهم ما أدواتها..
لكن إتخيل شمطة أو دشمان وكمان فيهم الحروف دي..
|
Post: #5
Title: Re: زاي ذال قاف غين همزة
Author: fadlabi
Date: 03-02-2007, 01:28 AM
Parent: #1
يا رجوية
ما هو ده المارضنا و مطلع عينا
تلقي الواحد متفلسف ليك و بقول في كلام المفروض إنو عضم
و بعد ده
المساكين ديل مخرمج عيشتم خرمجة جد
|
Post: #6
Title: Re: زاي ذال قاف غين همزة
Author: Raja
Date: 03-02-2007, 01:44 AM
Parent: #5
في الكلام الشين حتى الحروف الساهلة بتبقى مخرمجة..
تعرف شئ يا فاضلابي.. أنا مستغربة ليه لغاية هسع إحنا السودانيين ما عملنا لينا (الفابت) خاصة بمشكلتنا دي.. يعني في اللغات الأوروبية تلاقي التراكوة والألمان وغيرهم بيصرف الـ U ، وفي مرات بينطقوا الـ C كاف وبيكتبوها K
يعني ممكن برااحة نعمل لينا حرف كده زي بتاع حمادة أخوي لمن كان صغيروني (كان عندو عدد زيادة مخترعو من راسو إسمو تلعتاشر كان بيختو بين الاتناشر والتلتاشر).. وكان لما بنساعدو في الهوم ورك بتاعو بنعرف نتفاهم معاهو كووويس.. مثلا لو الإجابة 12 او 13 وهو متردد نقول ليهو شنو الجنب تلعتاشر.. طوالي بيعرف الإجابة..
هسع أملنا في علماء اللغة..
|
Post: #7
Title: Re: زاي ذال قاف غين همزة
Author: altahir_2
Date: 03-02-2007, 01:46 AM
Parent: #5
معذورين يا صديقى فاضلابى
هم قالوا لا هى لغتهم ولا بحبوا اصحابها
فكيف يستقيم ان يخرجوها بشكل صحيح
تحياتى
ولسه فى انتظارك
يا ساكن الفجر البعيد
ضياء الدين ميرغنى
|
Post: #9
Title: Re: زاي ذال قاف غين همزة
Author: fadlabi
Date: 03-02-2007, 01:56 AM
Parent: #7
يا سيدي ما حتنتظر كتير
بعدين ده براه وده براه
يعني لو ما خواجة ما مفروض تتكلم إنجليزي?
|
Post: #8
Title: Re: زاي ذال قاف غين همزة
Author: fadlabi
Date: 03-02-2007, 01:53 AM
Parent: #1
تلعتااااااشر دي حلوة حلاة
هااااااااي هاهاهاهاهاااااي
والله يا رجاء صلحتي اليوم
|
Post: #10
Title: Re: زاي ذال قاف غين همزة
Author: bayan
Date: 03-02-2007, 02:49 AM
Parent: #8
سلام
الهمزات دي لانها غاطسة في الكيبورد
والغالبية لا تعرف وضعها خاصة الذين يستخدمون كي بوردات
ملصقة او فيرشوال..لآن لا تداخل اللغة الام ولا العامية في نطقها
وهي واضحة جدا وقاعدتها معروفة وساهلة..
فهي لا يمكن تكون من الحروف التي تقلب الى الصوت الذي يشبهها
حيث لا صوت يشبهها نوعها يحدد بحالة اعراب الحرف الذي تليه
الى ان ارسل لي كيبورد عربي حتى عرفت مواقعها...
وبعدين ايضا هناك الكتابة بالعامية او لغة الكلام
ولكن لا عذر ان هي كتبت في بحوث او مقالات معدة للنشر الورقي او مقدمة
في مؤتمرات..
ايضا هناك من اللغة العربية هي ما لغة الام بالنسبة لهم
بحيث كثيرا ما يصعب استخدام الغين والقاف..لهذه الفئة
حرف الزاي والذال
هي من مواطن الصعوبات لان اللهجة العامية لا تفرق بينهما
فكلاهما ينطقان من ذات المخرج..
في كل المجلات ودور النشر هناك وظائف
محرر ومدقق لغوي.. لأن الاخطاء تحدث. وهذا لا يدل على جهل او عدم معرفة..
|
Post: #11
Title: Re: زاي ذال قاف غين همزة
Author: fadlabi
Date: 03-02-2007, 03:30 AM
Parent: #10
لا لا لا
ده منو السرق الباسورد حق بيان ده
الليلة يا دكتورة ما عرفتك 
طيبة طيبة و حلوة حلاة
يا زولة كلامك في محلو
لكن مثلا قبال يومين في بوست إسمه (المراءة) عدييييل كده ده عذرو شنو يا بيان
و تلاقي الزول متفلسف كدي و يقول ليك مثلا (المراءة زلك المخلوق القامض)
و الله زي ده ما عنده أي عذر
خلي الطيبة دي و رجعي لينا بيان صاحبتنا بالله
|
Post: #14
Title: Re: زاي ذال قاف غين همزة
Author: fadlabi
Date: 03-02-2007, 05:00 AM
Parent: #12
يا هندسة
المصيبة إنو مصر
|
Post: #13
Title: Re: زاي ذال قاف غين همزة
Author: bayan
Date: 03-02-2007, 04:51 AM
Parent: #11
| Quote: المراءة زلك المخلوق القامض |
لا تعرف اصعب همزة هي الهمزة دي اذكر زمان لما اجي اكتب تتجزأ
اصلها ما بتجيني بس بقيت اكتب تتجزء اها واحد مافون
نقز بها زمن انو ما بعرف اكتب وارتكب اخطاء املائية..
المفروض يجردوني من شهادتي..برضو كلمة تأريخ
دي في زول فتح بيها بوست لي..
انا هنا بوري انه المسألة كلها الهمزات ديل غاطساااات..
اسع صاحب المراءة دا بتكون غلبتو العصاية ام همزة..
بالله اكثر من راجل المرة؟
|
Post: #15
Title: Re: زاي ذال قاف غين همزة
Author: fadlabi
Date: 03-02-2007, 05:03 AM
Parent: #13
نحن ناس مرة الراجل يا دكتورة
أها الهمزة عفيناها الباقي دي ما بحرق الروح
هسي إنتي بترضي يقولو عليك قامضة
|
Post: #16
Title: Re: زاي ذال قاف غين همزة
Author: bayan
Date: 03-02-2007, 05:33 AM
Parent: #15
| Quote: نحن ناس مرة الراجل يا دكتورة |
تعرف يا فاضلابي الايام دي انا وعشة المبارك
متذكرين ايام الشباب والثورات المضادة والتمرد
قمنا كتبتا "غصيدة" سميناها
مرة الراجل حلوة حلاة
وغنيناها "سنائي"
احتمال كبير ننشرها في يوم المرأة
| Quote: هسي إنتي بترضي يقولو عليك قامضة |
تعرف كمعلمة لحمد لبد لغير الناطقين لردح من الزمان اي حاجة
بترضيني.
مرة جيت المكتب لقيت لي رسالة من بت..
Quote: الى
حطرة المحطرمة الاستاذة المعلمة ...... انار الله قلبها وعقلها
تحية الاسلام الخالدة اي السلام عليكم..
انا زهرية بنت عبدالله
اود ان اعلمك ان بطني قد اسقطت اليوم بنتا*. سامتحن في مكان المرضى.
ابتك وتلميذتك
زهرية بنت عبدالله
مادة الكتابة المتقدمة سكشن 2 |
مرة ولد كتب لي في موضوع عن الام
الام لظيظة وجميلة وحلوة في كل احوالها لما ظننت الموضوع دا عن
الباسطة..
المهم البكتب قامضة دا بيكون من غير الناطقين اكيد
خف على الجماعة..انا الا ارسل ليك كراسات الانشاء حقت اولادي عشان تآمن
بعدين ياخي الموضوع دا عامل لي حساسية لانه طوالي في ناس هنا
بقولو اني ما بعرف اكتب وكدا
بانين كل موضوع انه انا جاهلة على الاخطاء الطباعية..
او الاخطاء الناجمة عن قلب الاصوات في الكتابة بالدارجي..
مطلعني امية..
* لو كتبها شاعر نثري لفرحت بها..
|
Post: #18
Title: Re: زاي ذال قاف غين همزة
Author: fadlabi
Date: 03-02-2007, 05:40 AM
هسي يا بيان النسألك
إنت بتقدري كيف تشاكلي ليك زول هسي دي
وتجي تقطعي مصرانا
بدون فرقة في النص
راسك ده مقسمة فيهو الهارديسك ولا كيف
|
Post: #19
Title: Re: زاي ذال قاف غين همزة
Author: bayan
Date: 03-02-2007, 06:08 AM
Parent: #18
| Quote: إنت بتقدري كيف تشاكلي ليك زول هسي دي |
يا فاضلابي انت فاهمني غلط انا اصلي ما قاعدة اشاكل
انا بس برد العدوان لما يفوت حده..
لكن في الغالب زولة طيبة جدا..
راجع الارشيف شوف كل زول بيان اتشاكلت معاه
شوف بيان دي سكتت كم شهر عن هجوم الزول دا. وصبرت
بعداك لبست الكبك ابو شلاخات.. ونزلت دافوري..
مشكلتك بتكون خشيت بوست الشكلة يعني القلم قبل النهاية..
الفلم بيكون بادي من بدري مقدمات وكلايماكسات
بس لما يصل النهاية انا بكون شوفتا لازم الزول دا يتختا في علبو..
عمري ما بغلط في زول..لكن الناس هنا فاشين غضبهم على الانقاذ وخيباتهم
في الحياة وفشلهم في حياتهم علي انا
انت تاني من تشوف زول مطاردني وانا ساكتة تعال حذرو
قوليه يا زول كلامك عوج شديد..ولو الزول خلاني والله
ما عندي اي رغبة اني اكون شرانية..بخليه طوالي
بس الناس تسكت لما الفاس يقع في الراس يحنو على المعتدي
ويتحول بقوة قادر لضحية..
وبعدين الناس ديل انا بس بدقل بيهم ما قاعدة اشاكلهم
انا لو شاكلتهم بالجد بينتحرو..
نرجع لموضوع البوست نحنا مرة فكرنا نجمع نكات من الناطقين بغيرها
لقيناها دمها خفيف شديد..
واحد من ناس العلوم الشرعية من الناطقين بغيرها
جا قال لصاحبنا: ايها الاستاذ اريد مفتاح بيت الخلاء..
بعدين صاحبي واحد مشى السوق الشعبي لقى اتيتن من طلاب المركز متشاكلين
مع سوداني.. اها السوداني ما خلا ليهم صفحة وهم بس شغالين ليه
الويل لك ايها اللعين قبح الله وجهك ايها اللعين الويل الويل الويل
قمنا قلنا انه حكاية تدريس اللغة المؤدبة دا حاجة
ما صاح فاتخيلنا لو عملنا دروس للغة الشتم والهتر..
وعلمناها لطلبتنا ديل موش بيكون احسن من اللغة المصتنعة دي...
اذكر مشينا في الموضوع دا كثير
وعشان يكون مقبول قدمناه بدراسة مستوى الخطاب الاخر لطلاب اللغة العربية للناطقين بغيرها
وتم استهجانه تماما
انت رايك شنو؟
|
Post: #20
Title: Re: زاي ذال قاف غين همزة
Author: fadlabi
Date: 03-02-2007, 06:21 AM
Parent: #19
يا بيان أنا أول حاجة إتعلمتها بالنرويجي الشتيمة
عشان ما تبقى علي حكاية الويل دي
ولا تبا لك البكتبوها في الترجمة
لقيت ليك الناس ديل مهذبين خلاص
يعني الزول كان زعل خلاص بقول ليك إذهب إلى الجحيم جد جد ما حقت الترجمة ديك
غايتو الشتيمة المهذبة دي أنا ما من أنصارها بتخلي الزول عبيط
لكن إنتي خلي المجاملات بتاعتك دي و ما يحننوك طلبتك ساي الناس الهنا ديل عاملين فيها إنتلكشوال و كده عشان كده مافي رحمة
بعدين يا بيان
إن شاء الله ما نشوفك بتشاكلي
|
Post: #17
Title: Re: زاي ذال قاف غين همزة
Author: saadeldin abdelrahman
Date: 03-02-2007, 05:40 AM
Parent: #1
انتا يا فاضلابي المعاك انت و مدينة دا اميتاب بوشناب
-------
اقعد صحح في الناس دي لمن يلحقوك ملاسي هههه
One love
|
Post: #21
Title: Re: زاي ذال قاف غين همزة
Author: fadlabi
Date: 03-02-2007, 06:25 AM
Parent: #17
أنا تاني يلحقوني وين يا سعد
ما خلاص ريد و إنتهى
بعدين أميتاب ده مغشوش حق شمع ساي ما تكلم زول أخوك قاشر بيه
عندي صاحب هندي هنا بحترمني شديد خلاص بسبب الصورة دي
|
Post: #22
Title: Re: زاي ذال قاف غين همزة
Author: عبدالمنعم الرزوقي
Date: 03-02-2007, 06:28 AM
Parent: #17
السلام علي من اتبع الهدى
دى طبعا هي التاعباك الفوق دى وكدي وريني (قامضة )دى وين ولو ما جبته
الرابط وجبتة الكلمة تكون كذاب
|
Post: #23
Title: Re: زاي ذال قاف غين همزة
Author: fadlabi
Date: 03-02-2007, 06:30 AM
Parent: #22
يا منعم ما تجيبو لي روحك ساي
بتضحك الناس عليك
|
Post: #24
Title: Re: زاي ذال قاف غين همزة
Author: عبدالمنعم الرزوقي
Date: 03-02-2007, 06:49 AM
Parent: #23
السلام علي من اتبع الهدى
اذا كذاب
|
Post: #25
Title: Re: زاي ذال قاف غين همزة
Author: Albino Akoon Ibrahim Akoon
Date: 03-02-2007, 06:52 AM
Parent: #1
فاضلابي
نعمة لكم وسلام من الله ابينا والرب يسوع المسيح.
انت عارف السبب الخلاني اعرف شوية عربي هو ذي كلامك دا لانو كل يوم اتحرج فيهوا اتعلم كلمة جديدة او النطق بصورة افضل !!!
وصدقني لحدي هسع اخوك ما بيعرف يفرق في النطق بين الحاء والهاء!!!
بس الحمد لله بكتبها احسن ما النطق !!!
وعلي كل حال لو عجزت من اي كلمة بمسك قوي في المقولة:
سين بلال عند الله صاد!!!
كتر خيرك لانو عرفت الفرق بين المرأة والمراءة
بس باقي لي السؤ والسوء.
وياريتك تتطرق لكل الاخطاء عشان نعدل حالنا مع العربي !!!!
وليبارككم الله ابينا والرب يسوع المسيح.
امين!!!
|
Post: #29
Title: Re: زاي ذال قاف غين همزة
Author: fadlabi
Date: 03-02-2007, 07:08 AM
Parent: #25
ألبينو إنت أنا ما لايمك خالص
أنا زعلان من القايلين روحهم عرب ديل
أنا زيك واحد
أمي من حلفا
و حبوبتي لغاية ما ماتت بتقول لي يا مهميد
إنت تستحق الإشادة لأنك فايتني بلغة
|
Post: #26
Title: Re: زاي ذال قاف غين همزة
Author: fadlabi
Date: 03-02-2007, 06:56 AM
Parent: #1
السلام على من يستحق
طيب يا دكتور هاك تصحيح الإنشاء بتاعتك
Quote: صدرت الاف الكتب تنقب سبر غوار المراءة لكنها فشلت في معرفة هذا الكائن
البشرى المحير وقد كان لكثير من الادباء والشعراء والفلاسفة اراء خاصة
ومختلفة حول المراءة وايضا العامة فمنهم من سخر منها ومنهم من اعطاها
حقها لكنها تظل لغزا غامضا
ومن الاقوال المأثورة عن المراءة
افعي حية شيطان جسد فتنة اغواء
وفي السودان يقولون ( المرة كان فاس ما بتقطع الراس )
وعن الزواج يقولون ( شر لا بد منه )
وفي اقوال مشهورة
( اذا تشاجر الزوج وزوجته فإما ان تنتصر هي او ينهذم هو )
( الزواج كالجلوس فوق ظهر سفينة في بحر هائج كلاهما ينبقي ان تفعله
بحزر )
اشتهر عدد من الفلا سفة والادباء والشعراء بعداءهم الظاهر للمراءة منهم
( تستطيع ان تكره المراءة وتستطيع ان تحبها لكنك في كل الاحوال لا تستطيع
ان تعيش بدونها )
الشاعر كيتس
(لا تتزوج حتي تدرس علم وظائف الا عضاء حتي تعرف سـر هذا الكائن الغريب )
انوريه دى بلزاك
( العشق اسهل من الزواج فالعاشق ليس مطالب بان يكون رقيق المشاعر من
حين الي اخر عندما يلتقي عشيقته اما الزوج فهو مطالب ان يكون لطيفا
طوال اليوم )
بلزاك
( الفقراء يتزوجون لانهم لا يملكون اجر خادمة واواسط الناس يتزوجون لاانهم
لا يقدرون علي تكاليف العشيقة اما الاثرياء يتزوجون لا نهم لا يجدون وسيلة
لشراء وريث يرث ثروتهم )
برنارد شـو |
|
Post: #27
Title: Re: زاي ذال قاف غين همزة
Author: عبدالمنعم الرزوقي
Date: 03-02-2007, 07:02 AM
Parent: #26
السلام علي من اتبع الهدى
وين الخطأ يا سيبويه غير ( المراءة )
|
Post: #28
Title: Re: زاي ذال قاف غين همزة
Author: fadlabi
Date: 03-02-2007, 07:04 AM
Parent: #26
Quote: الاف
غوار المراءة
اراء
المراءة
اعطاها
ومن
الاقوال
المراءة
افعي
اغواء
وفي
وعن
وفي
اقوال
( اذا
ان
او ينهذم
ينبقي
ان
بحزر
اشتهر
الفلا سفة والادباء
بعداءهم
للمراءة
ان
المراءة وتستطيع ان
الاحوال
ان
الا عضاء
اسهل
بان
اخر
اما
ان
لانهم
اجر
واواسط
لاانهم
اما الاثرياء
لا نهم
|
|
Post: #31
Title: Re: زاي ذال قاف غين همزة
Author: عبدالمنعم الرزوقي
Date: 03-02-2007, 07:14 AM
Parent: #28
السلام علي من اتبع الهدى
كل الاخطاء دى باستمعمال كيبورد سودانييزاونلاين واذا كدة كتابات كل
البورداب غلط
يا سيبويه قارن كتابتك بكتابتي
|
Post: #30
Title: Re: زاي ذال قاف غين همزة
Author: fadlabi
Date: 03-02-2007, 07:11 AM
Parent: #1
كده كويس يا من إتبع الهدى
كان في داعي يعني
|
Post: #32
Title: Re: زاي ذال قاف غين همزة
Author: fadlabi
Date: 03-02-2007, 07:16 AM
Parent: #1
(وش حاني عليك شديد)
|
Post: #33
Title: Re: زاي ذال قاف غين همزة
Author: عبدالمنعم الرزوقي
Date: 03-02-2007, 07:20 AM
Parent: #32
السلام علي من اتبع الهدى
غلطات املائية يا سيبويه
|
Post: #34
Title: Re: زاي ذال قاف غين همزة
Author: سفيان بشير نابرى
Date: 03-02-2007, 10:47 AM
Parent: #1
سلام يا صاحب
سلام يا أبوالحروف
وسلام علي كل الجمع معاك
والله الحروف ياها الحروف ومرات كتيره أنا هنا بقرأ البورد ده زي البحضر
لي في مسلسل اطفال لغة عربية تكتل بالضحك (وقد ذهبنا يارجل - وماذاك بعمل )
يازول ها والله بكنش عديل كده (واخوك شغال في محل انتر نت) اقرأ واضحك والزبائن
مستعجبين (يازول اقول ليك حاجه) اها زبايني ديل بيجوني هبطرش وماشايفين ليهم
محل نت (اضحك من ده) وكل يوم (الحمد لله بيزيدو) لانهم لسع ما عرفوا البضحك شنو
اها مرة كده في زمن قالو :- أنتخابات رئاسة الجمهورية ديك وكان فيها :- ناس جحا
وسمؤال وكيجاب وأبو ضفيرة ، كنا تاكلين في مسطبة الفرنسي شلة شباب وشابات يجيلك
كيجاب ومعاهو (كورجة من الحِسان والحسِين) يلا الشباب بقوا يشاغلوهو وين يارئيس اها
البرنامج كيف ؟؟ زولك ولا كضب قاليهم شوفوا هنا أول حاجة اعمله بطلع حرف الشين ده
بره لانو هنا في السودان اي حاجة كعبة بتبدأ بالحرف ده مثلاً :- شينه وشين وشلوت وشلوفه وشروم
و....... و...... و...... المهم شي صاح وشي سربعه ما خلي كلمة ما عدده فجأة كده قال ليهم
بس بخلي حاجه واحده بس قالو ليهو شنو ؟ قال :- شيراك (شفته السياسة دي بت ستين كلب كيف).
غايتو ما فاز وحرف الشين عايش يرزق .
ياجماعة بوستيكم (زين) بس الله يستر عليهو
انا يا محمد قصدي ش (شريف)
|
Post: #35
Title: Re: زاي ذال قاف غين همزة
Author: Salah Abdulla
Date: 03-02-2007, 12:29 PM
Parent: #34
فاضلابي
سلام
الحمد لله لقيت لي زوب ( ممـقـوس ) زيي ..
عماد اخوي بنتو الصقيرة إسمها يارا كانت بتزهج جداً من مذيعي تلفزيون السودان ومقدمي البرامج فيه ، وتسأل أبوها ، ليه يا بابا ديل بيقولوا ( الى اللغاء في الحلغة الغادمة ) ؟؟..
شاب ظريف أنيق ( مكرفت) يعني لابس كرافته ، وبيقدم برنامج إسلامي كل جمعة في تلفزيون السودان ، ياخ ده بيعمل في القاف دي عمايل ، وحالتو حافظ للقرآن!!!
ده غير رجال الفن والأدب والسياسة ، وغيرهم .
أما هنا ، فده موضوع تاني ..
تصدق أول ما أقرأ لي خطأ زي القلتوه فوق ده ، بطلع قبلما أتم الموضوع ، ولو كان الكاتبو ( منغطها) عديل ..
أما أخونا عبدالمنعم ، فلا أجد له عذاراً ما دام قد أفلح في كتابة كلمة ( المأثورة ) أدناه ، يعني عارف دروب الكي بورد..
| Quote: ومن الاقوال المأثورة عن المراءة |
سلام .
|
Post: #36
Title: Re: زاي ذال قاف غين همزة
Author: محمد سنى دفع الله
Date: 03-02-2007, 12:54 PM
Parent: #35
فاضلابي
قالو لي قريبتي وقريبتك
بتعرفي الدهشة
قالت ليهم إيوه
الدهشا بت الحمار
زاي ذال غينقاف همزة ها حا خا
|
Post: #37
Title: Re: زاي ذال قاف غين همزة
Author: وليد محمد المبارك
Date: 03-02-2007, 03:00 PM
Parent: #36
يا جماعةالوش الخجلان بسوه كيف ؟
|
Post: #38
Title: Re: زاي ذال قاف غين همزة
Author: عبدالمنعم الرزوقي
Date: 03-03-2007, 06:06 AM
Parent: #37
الاخوةالمتداخلون ارى أن لغتكم قد تحولت إلي دارجية قحطة هل هذا خوفا من الغلطتات الاملائية
ام النحوية
انتم لا تعرفون هذا الفخ الذى اوقعكم فيه صاحب البوست وما كنت اريد
الخوض في هذا الموضوع ولكن
عزيزى صاحب البوست
السلام علي من اتبع الهدى
اتدرى لماذا انت مشغول بي
انني لا ادعي علم الغيب ولا الفراسة ولكن من خلال الجـهد والـكد الذى بذله
علماء النفس لسبر غوار نفوس من هم امثالك
شخصية مهزوزة تتخبط في غياهب الظلام تبحث عن كوة تخرج منها تهديك الي
السراط المستقيم
نفس مريضة بالجهل (وهنا الجهل بالحقيقة ) والحرمان من حلاوة الايمان
والاعتقاد
لكل ذلك اثر فيك قولي ( السلام علي من اتبع الهدى ) وقد عنيتها كي تستيقظ
فيك البقعة الكامنة في ظلمات نفسك التائهة علها توقد لك سراج نورها
من ظلمات اعماقك الحالكة الدجي فتخرج من عزلتك وتتزوغ حلاوة الايمان
اذا فلا تشغل نفسك بغلطاتي الاملائية واشغل نفسك بنفسك لعلك تجدها
الان ايها الاخوة قد اتضح لكم ما كان يرمي له حول صراعه مع نفسه وصراعه
مع همذاتي
واذا لم يكفيك هذا فلدينا المزيد
بسم الله الرحمن الرحيم(ويقولون بافواههم والسنتهم ما ليس لهم به علم
يحسبونه هين وهو عند الله عظيم )
صدق الله العظيم
|
Post: #40
Title: Re: زاي ذال قاف غين همزة
Author: fadlabi
Date: 03-10-2007, 08:43 AM
Parent: #39
الغريبة يا قريبي مافي زول رد
أنا كيف ما شفت البوست ده ما عارف
أييييييه
السكة طويلة
المشكلة ما بعرفو إنجليزي
و لا بعرفو يكتبو اللغات المحلية
نعمل إيه
|
Post: #41
Title: Re: زاي ذال قاف غين همزة
Author: welyab
Date: 03-10-2007, 09:10 AM
Parent: #40
| Quote: الغريبة يا قريبي مافي زول رد |
اكيد يكونوا هم الخسرانين على الاقل كنت قلت ليهم اين كان موضع النقاط !!!
Quote:
يقال أن احد الملوك بعث برسالة سرية لأحد الولاة مفادها طلب تنفيذ حكم الإعدام في حامل الرسالة. - الرسالة مفادها (العفو عنه مستحيل يُعدم) - فأضاف حامل الرسالة وبذكاء نقطة واحدة في فحوى الرسالة ونجيَّ من حكم الإعدام !!! يا ترى أين وضعها؟
ويقال أيضا أن تلك النقطة- في موقع آخر- كانت سببا فيما لا يحمد عقباه.!! ففي رسالة شهيرة تقول فحواها (أحصي عدد العبيد وابعثهم). سقطت( نقطة لعينة) سهوا. وفعلت فعلتها المشينة!!. وأين سقطت نلك النقطة اللعينة. ؟ |
|
Post: #42
Title: Re: زاي ذال قاف غين همزة
Author: fadlabi
Date: 03-10-2007, 09:18 AM
Parent: #41
غايتو التانية دي لو زيادة نقطة أنا عرفتها لكن إنت قلت سقطت
كدي ورينا
|
Post: #43
Title: Re: زاي ذال قاف غين همزة
Author: welyab
Date: 03-10-2007, 09:57 AM
Parent: #42
ماشي عشان خاطرك يا قريبي
الرسالة مفادها (العفو عنه مستحيل يُعدم) - فأضاف حامل الرسالة وبذكاء نقطة واحدة لتقرأ ( العفو عنه . مستحيل يُعدم ) لتفرق النقطة بين الجملتين قبل ان يفرق بين راسه وجسده
اما الثانية
النقطة اللعينة سقطت فوق الحاء لتقلب خاءا ... لتقرأ ( أخصي العبيد )
ونقول اخصي عليهم وعلى النقطة اللعينة!!! تسببت في فقدان العبيد ذكوريتهم
|
|