جمعية محاربة الحركات الغياظة

أكتر حركة غياظة في البورد
لمن الواحد يكتب حاجة و ما تجيب دخل
يقوم جاري ويعمل الحركة دي

Quote: الحضور الان بالمنتدى العام لسودانيز أون لاين دوت كوم 617 شخص » (42 )عضو و (575) زائرا »abazar ali khalifa »Abdul Monim Khaleefa »AL GURAIR »Albino Akoon Ibrahim Akoon »altahir_2 »Amin Elsayed »ASAAD IBRAHIM »Asskouri »bent-elassied »fadlabi »Foetus »haroon asram »HAYDER GASIM »Haytham Abdulaziz »isam ali »ismeil abbas »Mahadi »Mohamed E. Seliaman »Muna Khugali »saif addawla »sourketti »Tagelsir Elmelik »Wathig Makki »أم سهى »ابوعسل السيد احمد »احمد حماد ادريس »الطيب بشير »بكرى ابوبكر »تاج السر حسن »تماضر الخنساء حمزه »حليمة محمد عبد الرحمن »خدر »عبد المنعم سليمان »عبدالعزيز حسن على »عبدالله عثمان »علي عبد القادر »محمد ابو القاسم »محمد ابوبكر عثمان »محمد البشرى الخضر »مصطفي سري »مهدى الصادق السيد »يوسف الولى هذه الصفحة يعاد تحديثها كل 120 ثانية.

ألا يهم هذا الموضوع أحد?

تاني حركة غياظة

الواحد يكتب بوست عنوانه نبذ عديييييل للشيوعيين

لمن يسألوه إنت المزعلك من الناس ديل شنو?

يقول: أبدا و الله ما شغال بيهم الشغلة

فاضلابـــى :

الهموم مختلفة .... !!!

صحي مختلفة
لكن البقنع الديك منو

فاضلابى
انا الفاقع مرارتى نظام الباصات الارضيه القصيره فى وسط الملعب

النصري

الله غالب بالرغم من باصاتهم القصيرة

فاضلاني : كيفنك
ختني في اللجنة التنفيذية لهذه الجمعية..بنفعك .. انا شاطرة في تنفيذ الشعارات.. هاك نماذج لشتارتي في الشعارات الخاصة بتاصيل الاعلانات:


في ورشة الجمال 3

حليمة محمد عبد الرحمن

بآي بآي أيتها الدمامة..!!

ما هي مقاييس الجمال السوداني القديمة؟

الدهب المصرور قديم.. وأزماته المستقبلية..!!

في انتظار ورود الصفات الجديدة بعد التنقيح والتنقية..

أصابنا رشاش من الغرب، حيث إن المواصفات الجمالية قطعت لها هي الأخرى جواز سفر وهاجرت ثم عادت لتحتل تلك الأغنية التي كنا نعتبرها غاية في الروعة في وصف المحبوبة، إلي (جنس تخلف يا أخواني) الرف، كما علقت احدي الأخوات ربيبات المهجر وذلك بعد إيراد ما لزم من الترجمة من العامية إلي اللهجة الوسيطة الخرطومية:

واحدين قالوا ضامر هافا

ما شفتوها يا إخواني

واحدين قالوا شُفْنا الشافا..

-واو هي أصلها شنو؟ مس يونيفرس؟ ما واحدة ممشطة وشعرها مليان ودك ويمكن يكون كمان قطعوا ليها وشها مية وحداشر أو السكة حديد ذات الخط الاحتياطي.. أو ادخلوا بعض معرفتهم باللغة الإنجليزية وعملوا ليها حرف اتش القبيح داك ومعاه كمان سمول واي. بعدين الجاب هافانا للخرطوم شنو؟

ياه..!! الحنكوشة طلعت (...) كمان..!! ربطت ما بين صاحبة ا الهاف في أواسط أفريقيا، وهافانا في أقصي بقاع الدنيا..

لعلها تقصد ما يسمي ب(درب الطير) لدي اهلنا الكبابيش، الذين لم يكتف شلاخهم بتخديد خدود النساء كيفما شاء له الامر وانما استنبط اشياء من بيئته، فاضاف ما يشبه حرف SMALL Y

الي الرقم ثلاثة الروماني المحزوم في الوسط. والغريب في الموضوع أنها لم تكن فقط، صفة تمييزية بين القبائل وانما هي صفة جمالية تغني بها الشعراء مما زاد في رواجها وازدهارها:

الشلوخ مطارق لون البرتكان اللي قلبي حارق.

أي أن الشلوخ مائة واحد عشر.

ليعارض شاعر آخر وينسف معتقدات سابقه:

الذوق والجمال والخدود السادة

ادوا قلبي النار حرقوهو زياد

الا انه يبدو ان شاعراً اخر حاول تلافي الوضع والمواءمة بين الاثنين، وقبول التغيير مع التمسك بالماضي:

خدود في خدود يِضَوَن

وخدود بدون أمارة

اصفر اخضر فاتن يا سمارة

حبيبي اه قلبي تاه في يوم الزيارة

ولعل نتائج مثل تلك المهن، ستعقد من حياة اطباء التجميل وتحكم عليها بالفش الذريع ، ان تعلق الامر بترميم وجوه احدي السيدات السودانيات من ضحايا هذه الممارسات.

إن رؤية المجتمع السوداني الشديد المحافظة علي المعايير الاجتماعية، التيلا تنفصل عن المعايير الجمالية، هي أن تكون المرأة مؤدبة تلزم بيتها ما أمكن ذلك. وهذه النظرة يدعمها بقوة قول مأثور عن الشيخ فرح ود تكتوك في وصف النساء، حيث قال: فيهن ( والكلام عن النساء) خميم فيهن رميم..

فيهن دهب مصرور قديم..

فيهن لفوت ..

ما تسويلك مقوت..

تكمل الخلا.. وترجاك بالبيوت..

صورتان من فاز بالأولي فقد ربح.. ومن ابتلي بالثانية، الله يعوضه الجنة علي صبره..

وينسب إليه أيضا في نفس الخصوص انه قال:

عِز الخيل لِجِم عز الحريم وليان (ولاة الأمر، كالأخ أو الأب..الخ.

عز الرأس دهن عز الجلد قطران (وهذه لا تعنينا كثيراً في هذا الخصوص).

حقيقة لا يتطرق إليها الشك، فان المرأة المصون والجميلة في نفس الوقت، تعتبر مكسباً هاماً من مكاسب الدنيا.. وغني عن القول أن نستطرد فيما يعني الزواج من الثانية..!!

يقول الشاعر العظيم حجاج احمد حسن في نفس المنوال:

ماني الإضينة أب رِوِيحْتـَنْ كَرَتْ

بَصْبُر علي التجيني إن بَرَدَتْ وِن حَرَت

سَمْحَتِـن معاي وفي شينَتِن بَتْوَرَطْ



تأصيل الإعلانات:

عملاً ب(كل زول عاجبو الصارو) سندعو نحن أيضا إلي الدعاية إلي المشتقات الجمالية السودانية ونرفع شعارات العملاق الفتية:

*السماحة واجب أوجب ومن قال أن الدمامة، سائدة فقد كذب..

*كتري من الجرجير يجر شعرك بتحت لي السرير..

*مع مسواك الأراك رائحة الفم الكريهة ما بْ تَـبْراك

*وبكريم ماما الأصيل شعرك يبقي يجر طوييييييييييل..

*وبالفستان الطويل كل من يراك ليك يشيل(أي يعز ويقدر)..!!

*المشاط والماشطات في سلم المجتمع أحسن الدرجات..

*الدلكة والكركم والجردقة والحلبة دوا من الحر والعجاج..وهن ذاتهن أحسن أنواع المساج..

الطلح ساونتنا الأصيلة وقوي العضم بالبليلة..!!*

* والماعندها الدهب ما تسوي الحِد ليها حيلة..!!

شَدَّتْ والرِمة وحراسها وشليل وأم طِويرة ألعابنا الأصيلة*

واحدين يلعبوها عرايا وواحدين بالفنيلة..!!

الدنيا أعَمَاها بقود المَكَسَر وكتري عند الغدا من الكستر*

خلي كلامك طاعم
وصوتك ما تخشنيهو..
هَيْ انتي نسيتي..*
انتي ما من النواعم..!!

*نَجْر الكلام ما بغلبنا.. ياها صنعتنا العليها بنقدر..!!

والجازرلو ديك في الحِلة علينا ما يتشطر..!*

ماني الاضينة ..أنا ألفي المجالس ديشي محكر..*

واعلانك جيبو لا تتأخر..

*عندنا مسيخ كلامك.. يبقي سكر..

*وِنْ دُرْتَ الكعب..طَـلـَقْ منو ماب نتأخر..!

لمزيد من التفاصيل الإعلانية...زوروا:

www.asalatco.com

شعارنا ننزل العصا عشان نرفع العكاز
ويومنا النغيظك ونغيظ اهلك يا هو دا الانجاز
تعالي معانا والينا انحاز
ونحن الكبريتة وحداها (اي الى جانبها) الجاز
اها شن قولك يا فاضلابي
مودتي...
حليمة

حليمة
تم تعيينك سكرتير مالي
قطعتي مصرانا بالضحك
يا زولة رقيناك للمدير التنفيذي

سيليكون
ألا يهم الفوق دي جزء من أول حركة غياظة يعني ما كاتبها أنا

أو تجي داخل تلاقي الناس بيقروا في أمان الله في مواضيع الصفحة الأولى تقوم تمشي تنكت مواضيعك القديمة كلها وترفعها (UP) عشان تجبرهم يقروا ليك.. أمًال المقعدهم ايه..؟
ومرات "بعض" الأقلام الصديقة تقوم بالشغلانية دي.. تلاقي الأسامي مرصوصة تحلف تقول الهكر زارنا..


لووووووووووووول

رجاء غايتو الحركة دي عملتها أنا
أعفي لي غايتو
أظني عملتها معاك ذاتك

يا فاضلابي.. عفيت ليك.. تعرف ليه؟ لأني ما متذكراها.. لكن في تلاتة كده بيعملوها كل يوم مرتين أو تلاتة حسب التساهيل والمشاهدين الغلابة..

أنا مرات الضهر لما اجي بمشي أرد في بوستاتي بلقى برضو روحي عملت كده .. والليلة من الصباح أبيت أرد عشان نريًح المشاهدين حبتين.

Quote: كل يوم مرتين أو تلاتة

.


مع إنها مفروضة عشر مرات ، مرتان مع كل صلاة ، ده غير النوافل بالطبع يا رجاء .


دمتى

فى الصميم ... انا ما مختلف معاك !!

والحركة الغياظة التالتة واحد جديد يفتح بوست عن ما يسمي

بذاءة هشام هباني وابتذال النضال

يا منعم هشام ده الناس ما فاهمينو ساكت

مشكلتو طول في أمريكا و ناس (تبا لك) حقت الترجمة دي

بقى يترجمها جد جد

Quote: ناس (تبا لك) حقت الترجمة دي

.

عارف يا فاضلابى إحتمال ود هبانى راجل محترف و لا يريد أن يغير فى أصل النص أى الـ Source Language
حتى لا تكون الترجمة غير دقيقة أو مخلّة ، و لو كان ذلك على حساب مُدّعو الإحتشام و التهذيب الّلفظى.

دمت يا فاضلابى

تالت حركة الواحد يكتب بوست طولو صفحة واحدة عشان يكتر الردود يكتبو بالطريقة

دي

و يقسمو

لعشرة

ردود

أو خمسمائة

رد ذاتو

Quote: مشكلتو طول في أمريكا و ناس (تبا لك) حقت الترجمة دي بقى يترجمها جد جد

Quote: حليمة تم تعيينك سكرتير مالي قطعتي مصرانا بالضحك يا زولة رقيناك للمدير التنفيذي

فاضلابي والله ما قصرت معاي تب..
اها عشان كدي النفرد عضلاتي سمح..
انا عندي كتير زي ورشة الجمال 3 دي وفي اخواتها اتنين وواحد..
كان درت تشوفهم .. عرج علي..
http://halima.8m.net
تلقاها فوق في استراحة الجمعة
مع تحيات المدير التنفيذي للرابطة المذكورة في الترويسة اعلاه..

من دربي ده ماشي عليها
ما تعليمات المدير التنفيذي كمان

Quote: تالت حركة الواحد يكتب بوست طولو صفحة واحدة عشان يكتر الردود يكتبو بالطريقة

فاضلابي تحياتي
اعلاه دي طريقة زول واحد..وملاسي بالتحديد
ياكافي البلا اربعة سطور التقول شاحدها شحدة..

كريم

ملاسي ده إستايلو كده كعبين التانيين

Quote: حليمة تم تعيينك سكرتير مالي قطعتي مصرانا بالضحك يا زولة رقيناك للمدير التنفيذي

فاضلابي والله ما قصرت معاي تب..
اها عشان كدي النفرد عضلاتي سمح..
انا عندي كتير زي ورشة الجمال 3 دي وفي اخواتها اتنين وواحد..
كان درت تشوفهم .. عرج علي..
http://halima.8m.net
تلقاها فوق في استراحة الجمعة
مع تحيات المدير التنفيذي للرابطة المذكورة في الترويسة اعلاه..

Quote: ما تعليمات المدير التنفيذي كمان

اقرا سمح.. وكان غلبك شئ قول عووووووووك ..
قاموس عون الشريف قاسم "العامية في السودان" بطرفي ..
بسلفك ياهو..
باي ..
النوم وجب.
المدير

حليمة تصبحي على خير يا سعادتك

حاجتين:

الاولي:

يجي واحد داخل ويقرأ الموضوع ويقول " بجيك بعدين برواقة" وتاني ما تشوفو

وهو اصلا ماعندو حاجة ولا فاهم حاجة بس لزوم المنظرة والفشخرة

وبالمناسبة موضوع المنظرة والفشخرة والبوبار دة براهو داير ليهو عدة بوستات

عشان العالم دي تبطل تفكها في خلق الله "عمال علي بطال"

التانية :

جماعة ريا وسكينة وحسب الله وعبد العال

عصابات حايمة في المنبر

ناشرة الخوف والهلع والشقاق

يعني تكون عارف لو اختلفت مثلا مع "ريا" ا أكيد "سكينة "و"حسب الله " و"عبدالعال "يجو ناطين فيك

وعينك ما تشوف الا النور حتي لو "ريا" غلطانة

اللهم ارفع غضبك ومقتك عنا

فاضلابي اسمح لي أسلم على أسعد..

يا اسعد عرفتا هسع بس المسكتك شنو وحاميك تكتب.. أتاريك ماسك في قلبك كتيير وساكت..



أظهر وبان..










فاضلابي.. غايتو حركة كتابة كلمة كلمة في البوست دي قلبتا فيها الهوبة..

رجاء العزيزة سلام .... تعرفي بالنسبة للمنبر دة دخلوه مجموعة جنجويد في السنتين الاخيرتين حولوه الي

ساحة للملاكمة والعك والاستهزاء بخلق الله .

وبالمناسبة ما بقصد بكلمة جنجويد انهم تبع اللحكومة .... لا .... في جنجويد تبع الحكومة .... وجنجويد تاني معارض

وتالت تبع ناس البهجة والمسرة ..... ورابع عصابات كدي والله تحتار في القاسم المشترك بينهم

بس تعرفي انا ما بقيت بزعل من المنبر زي زمان لانو الدنيا كلها بقت غير العك والضرب في الركب ما فيها شئ

الواحد بقي يجي هنا يعاين ويمشي لانو ما ناقص .

تشكراتي

أسعد

يا راجل طلعت مغبون غبينة شديدة خلاص

فرق قول

نحن ناويين نحتو كلو هنا

ما نخلي ولا حتة

Quote: عصابات حايمة في المنبر

.


عشان كده لابد ، زى زولك بتاع الّلستك ده .


بس ما بحلّك ، و زى ما قالت ليك رجاء ... أظهر و بان
لكن هى نسيت أن تكمّل ... عليك الأمان ، عشان كده إتريث
شوية كده ، و قبّل جاى و قبّل قبل ما تخش .

دمت يا اسعد ، و الله يغطى عليك ، زى أبو لِستك ده .

Quote: يجي واحد داخل ويقرأ الموضوع ويقول "بجيك بعدين برواقة" وتاني ما تشوفو وهو اصلا ماعندو حاجة ولا فاهم حاجة بس لزوم المنظرة والفشخرة

أحجزوا لي طوبة لحدي ما أجيكم راجع

UP















































دى كيف?

بلة موسى

دي قالتها رجاء أرح قول تاني

أحمد

حلوة منك

Quote: أحجزوا لي طوبة لحدي ما أجيكم راجع

فاضلابي سووري الخروف ده جاء بوسطك انا ماشي


فتك بعافية يا فاضلابي اخوي

منعم

غايتو يا منعم شكال شكل

خلاص قمت على البوست داير تودي الخور

الواحد يشاكل ضله يا كافي البلا

هههههههههههههههها

فاضلابي ايامك والله

هوي يا رحاب أحسن ليك

أيامك إنتي دي

تقولي لي أنا أيامك?

فاضلابي، لكن دي ما حركه غياظه، دي حركه لذيذه

لذيذة إنتي دي

دى اتنين يافاضلابى

الأولى UP

والتانية واحد يكتب سطر فى راس الصفحة والتانى فى آخرا.

أما الإضافة واحد تلقاه متصور واقف.. طول الصورة صفحة وعرضها نص صفحة وموضوعو ربع صفحة.


____________________________
يافضلابى بالطفل الشايلو دا ذكرتنى الواحد يكون عايز يبشر وخجلان يقوم يشيل طفل يدخل بيهو الدارة وهاك يارقيص بالطفل.

لا يافـاضـلابى ده كـلو مـا غياظ ...
بس اغـيـظ حــاجــه انو الـزول يـملاء ليهـو
بـوسـت كـامـل يالحــاجـات الغـياظــه يعـنى
الزول لـو كـمل البوست كلو ممـكن إنفقـع عـديل بالغـيظ !!!

محمد النعيم

أغيظ منها الواحد ينبذ ليهو محامي مسكين بدون ما يسمع القصة زي الناس

واغـيظ مافى المنـــير الـيوم ده ..انه فى واحــد عامل فيها
المـصـلح المــنبرى و قام عمـل ليهو بوسـتين واحـد لمـكافحة
الحـاجـات الغـياظه والثانى للغــــين والقــــاف ..
-لقـيتنى كـيف يا(سيـبويه)-

ود النعيم لقيتك كده
أصبر لي شوية بلقى ليك حاجة غياظة تانية
كده نمشي على أبحث
نشوف محمد النعيم و نجي راجعين

و الله الليلة جنس خمش
هاهاهاها
خلاص يا زول نتصالح أنا هرشت

Quote: واحد تلقاه متصور واقف.. طول الصورة صفحة وعرضها نص صفحة وموضوعو ربع صفحة.

هاهاهاها دي بعرفعها أيوة كلامك صاح




____________________________________________________________________________________________________
حركة الحفلة دي برضو في ناس برقصوا ساوين الحلاة يعني صفقة خفيفة كده و الأقدام ثابتة
و معاها إبتسامة على الجهة القاعدين فيها النسوان

ماقادر اقول حاجة
لسه بضحك من كلام
الأمين المالي بتاع الجمعية
لكن جاييك
مش حاجة تغيظ
تلقاك قلت
متكمل كلامك هسي
شنو ( لكن جايك )
تجيك الكشة
مش ؟؟؟

أستاذ السني

تجينا الكشة نحنا و جمعيتنا كلها عدا المدير التنفيذي

نحن لاقينك وين نحنا

حلاااااااااتا مدينة ماشاءالله تبارك الله

و ده نسيبك؟؟؟ ولا بسم الله ده باكستاني.

مريم ما بتشوفي أفلام هندية إنتي?

ده البطل شخصيا

أميتاب باتشان

Quote: مريم ما بتشوفي أفلام هندية إنتي? ده البطل شخصيا أميتاب باتشان

يا كضاب !!
دا ما أميتاب بشناب
دا أميتاب بسكسوكة

(أغيز) حركة لما تكون مجتهد في بوست ويجيوا اتنين يدوروا ليك شكلة جواهو

دي بالظبط عاملة زي لما السكارى يتشاكلوا في حفلة ويفرتقوها
المصيبة لو سألتهم العريس اسمو منو يطلعوا ما عارفين

الحركة الغياظة(غياظة كلمة عطبراوية)

لما زول ما بعرفك ولا شافك في حياتو
الله يقدرك تختلف معاه في راي..
يجيب سيرة اهلك ربما حاجات تانية ويقوليك انت "انغاظي" ومن الذين استفادوا
من "الانقاظ" ويديها كوز لو غظتو زيادة يقوليك امنجي كمان
او العينة البتعمل انها شافتك عيانا جهارا ولم يحدث ابدا
وعشان يعمل انه بيعرفك يقوليك لقد زاملتك في المعهد ويكون الفرق بينك وبينه في المعهد
10 سنة او اكثر في العمر..الشاهد بروفايلو..
ويكون من رابع المستحيلات ما تعرف زملاء المعهد الذين يلا تعدون الخمسين..
وكمان يكون متخرج من شعبتك وشعبتك دي في حياتها ما كان فيها 6 طلاب في آن واحد..
ناس تكضب ولا تجيد الكضب دي البتغيظني لدرجة الطرشقة..لانه ما بتكون
هاميها انك تثبت انها كضابة ولا لع بس تسبب السمعة وخلاس..

بيان عليك الله خلي الحركات
إنتي معروووووفة مع ناس الإنغاظ ديل
هسي البغيز شنو?




________________________
عليك الله عطبراوية طلعت, العرق دساس

Quote: بالظبط عاملة زي لما السكارى يتشاكلوا في حفلة ويفرتقوها

كتلتها يا أشرف ياها ذااااتها

فاضلابى يا غياظ....تحياتى

اغيظ شى تكون بتقرأ فى بوست كاتبه محسن خالد والا فضيلى جماع والا تماضر
والا عماد عبدالله و الله واحد من مجانين الحروف ،انت تكون مندهش فاغر الفاه وبتسأل فى نفسك ياربى الجماعة ديل بكتبو بالتمانية وعشرين حرف البنعرفن
والا بغسلوا الحروف قبال يكتبوهم والا ده شيطان الكتب ليهم...
وكان ليك مراد تقرأ لما تموت وانت فى قمة ثمالتك ديك
فجأة تلقى ليك غياظ شليق وخاتى صورتو بالجنبه يكتب ليهم يا رائع..
ياخى ربنا يروعك انت والخلفوك امييييييييييييييييييييييييين،،،
بالله سجلنى نائب لى حليمة،،،

يا موج ما تضحكنا ياخ البوست ده عاملنه للغيظ
هاهاهااااااها يا رايع ها هاهاهاااااا
ياخ دي كعبة خلاص
أكعب من الزول اللمن يكون عامل فيها مسغف يقوم يقول ليك :صباح الأشياء يا إنسان

.
.
أغيظ حركة انو يكون عندك صاحب أوربي من اصول نوبية .
تقول ليه اضرب لي ومشتاقيين وما يشتغل بيك .

ندلف للموضوع . ندلف دي كيف معاك !.

اولاً بالتبادي اغيظ واغرب حركة ،
تلقي الواحد إسمو فلان الفلان ، ويكون اسم كويس يعني ما بخَجل ،
وتلقي مسمو نفسو في الإنترنيت ، بنفسجة و راكوبةوبامبي وبقيع
وجلكسة ومجذوب "إي" أونسة ؟ موش كعبة منو؟

الحركة التانية الغياظة ، لامن تكتب ليك شعر ولا مقطع شعري لي زول عاجبك وإنت
منفعل بيه يقومو الناس يرسلو ليك إيميلات ومسنجرات يسألوك ، مالك ياقرمبوز ،إن شاء الله عافية .


اغيظ حاجة في الحاجات كلهم، تلقي الواحد شاعر وتشكيلي ، لا بكتب شعر لا برسم .

أما ام الكبائر "أم الغيظات " يعني ، انو تكون عينك لي يوتيو "youtub" فاتح
وقاعد ذي مصباح علاء الدين السحري في الوندز الجمبك وفيه مكتبة الدنيا والعالمين
وإنت فاتح سودانييز اون لاين . ذي حالتي دي .

مما تقدم اتقدم بطلب إنضام لجمعيتكم العامرة راجياً قبوله .



ياخ اضربوا لينا ياخ .

عليك الله يا فاضلابي أضرب لإبراهيم ده .














وبعدها أضرب لي قول لي قال ليك شنو !

Quote: وبعدها أضرب لي قول لي قال ليك شنو !

هه هه هه هه ، حاجة عجيبة فعلاً

شماراك حلبي ياطلال ...

يمكن داير اشحدو قروش ؟ كتيرة علي الله ...

دي كيف معاك

المشكلة مافي دي لكن في المحاكاة

قبال سنة ولا زول

هسي الناس جت عليهم

و عارف يا فاضلابى أكتر حاجة "بتفرسنى" و بتخلى شعرى واقف زى كديس الجيران لما يقابل كديس البيت
إنك تختلف إختلاف موضوعى مع أحدهم ، ولحظك السئ يكون هذا الأحدهم من (نجوم ) البورد ، فتتناوشك
سهام (درق سيدو) الكثيرين ، و لا تترك لك جنباً تنام عليه ، و تبقى سيرتك " البجيبوها" بالشر
و الشين و الكعب هى مسار ، و مثار البوست " و إنت متين دخلت هنا ، و يابكرى هزّلت ، فكل من هبّ
و دبّ صار يملك باسوورداً ، و ده طرفنا من حوشك ده " و و و لغاية ما تقول الروب عدييل كده ،
و تانى لما تجى خاشى البورد ...تتلفّت جاى و جاى ، يمين و شمال عشان ما يظبطك واحد من الحرّاس و
أنت تتسلّل إلى البوست لـ( لزق) مداخلةٍ ما ، و يا فكيك بس قبل ما يكتشفوا إنك الله قدّرك و دخلت .

عارف أنا بقترح إن بكرى يكتب أسماء هؤلاء النجوم على أرضية المنبر ، يعنى زى هوليوود كده ، على الأقل
الواحد يميّزهم من بعيد ، و ما يرتكب هذه الخطيئة ، أقلّه ليس على مرأىً من حوائط الصّد ، و مكسِّرات الأمواج
هذه ، بس الخوف تدوس على واحد و إنت غافل ، فيبقى فى هذه الدوسة نهايتك الأكيدة .


بالجنب كده :-

إنت لقيت (نجمنا المحبوب) أميتاب باتشام ده وين ، على رأى ، و بلغة السينمائيين فى السودان ، مش ناس شداد
و الطيب مهدى والمرحوم حسين شريف ، لا ، بل بلغة ناس سينما العرضة ، و كليزيوم و الحلفاية . و ختاماً
الله يغيظك ، آسف أقصد الله يحفظك من الغيظ و الّليز ، و يقطعنى كان بعرف الّليز ده شنو ، لكنها القافية
الّلعينة ، و التى طلّقت إمرأة شاعر من قبل . ( بس قالوا شِعروا بقى مسيخ بعد الطلاق ... )

دمت فاضلابى ، و دام المنجوص الصغير الشايله ده ، و تعيش و تشيل يا يابا .

مودتى

عبدالله إنت البوديك تشاكل النجوم شنو

خليك في الواطا دي

طلعت بتاع هنود

و أفلام هندية

أنا حأكلمك بي سر, بس بيناتنا

أميتاب ده تمثال شمع ساي في لندن لكن أخوك عامل فيها لاقاه بالجد

طلال
المشكلة هو ما بقول ولا شي بس بضحك التلفون كله

يا قرمبوز بضرب ليك ياخ

وحات كتاب المصحف

ألأخ/فاضلابى


ألسلام عليكم.

بصراحه فى أشياء كثيره بتغيظ
مثلآ واحديكتب ويمتلكه إحساس بأنه نجم.

وهناك نجوم بحق وحقيقه لاغبار عليهم .وكل يوم بتزداد نجوميتهم وهم فى تواضعهم وردودهم غاية فى ألأدب.

عفوآ أخى ألفاضل ألفاضلابى.أنا من ضمن ألجضور ألذين إقتبستهم.

والبغيظ كثير .مثلآ واحد يقول المهندس بكرى يعطى ألباص ورد لكل من هب ودب.


سلام

إزيكم،،

سالي

ما فى حركة غايظة أكتر من البسوى فيها دى " لى قرمبوز"













عارف اكتر حاجة غايظانى منكــ

شايل مدينة وحايم بيها ...والعجب خدر كمان حاكاك

" عشان ما عندنا اولاد" ياخى

Quote: واحد يقول المهندس بكرى يعطى ألباص ورد لكل من هب ودب.

التقول هم لا هبوا لا دبوا

أغيظ منها كمان واحدين بفتحوا بوست عنوانه يكون يا بكري أبوبكر لماذا شنو كده ما عارف و ينبذوه يطلعوا عينو

فاضلابى
كيفك

واحد يقول ليك
اسمك منو وشغال شنو وبتعمل شنو
وفاتح المحل لشنو ...

والحريم

وواحدة تقول ليك نزل لى الطقم ده ووزنه كم
وتقوم تمشئ من غير مقدمات .....

نرجع لحركات الشباب بعد الفاصل

Quote: وواحدة تقول ليك نزل لى الطقم ده ووزنه كم

عاصم إنت معانا هنا ولا في مجمع الدهب

دي



وأخواتها

لا حولااا

الناس دي كلها مغيوظة

انتو عايزين ليكم منبر خاص بالأعضاء المغيوظين


أكتر حركة بتغيظني

انه الواحد بدال مايكتب رده في البوست المطروح فيه النقاش يمشي يعمل بوست برده الخاص
ويجيه زول تاني يفتح بوست تالت يرد عليه
وهكذا

لزومه شنو يعني !!

الاخت نهال

Quote: لزومه شنو يعني !!

لزوم حركات ماعندها موضوع
وجد حركة تغيظ

واحد يا فاضلابي يكتب 4 كلمات...
2 للتعليق و2 اسمو!!

فوق
أحمد الريح