Post: #1
Title: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 10:41 AM
Parent: #0
لون ( أغنية عن الرسم)
يا طين اللون المحتار .. يا مزيين شعر الأشجار
و أنا ساكن ناديتك مني
و حقنت وريدك بالأسرار
يا النوبتك جواي بتغني
وغاباتك .. و لو قادت بي نار
درويشك في الجوف مستني و بي نارك
حيشد الطار
لو عنك قرب أو عني
عصفورك غرب في ظني
إتشاقى و من شباكك طار
أنا تايه في عتمة لونك بس رسل لي روحي الأمطار..
زمان كتبت هذه الأغنية و تطاولا مني على الموسيقى لحنتها و لست ممن يجيد الغناء سوى في الحمام.
كنت وقتها طالبا بجامعة النيلين بسنتي الثانية و بجامعة السودان بسنتي الأولى
كتبتها في أستديو التلوين و في الطريق بدأت أدندن لحنها بعدها جلست على سلالم المركز الثقافي الفرنسي و غنيتها بصوتي الأجش لنجلاء
التوم فضحكت على صوتي..
أصدقائي غاندي أحمد و عماد ببو و المرحوم يوسف بشارة و محمد أبو عركي البخيت و منعم شو و محمود و عثمان كانوا قوام فرقة ماجيك
ميوزيك باند
آنسوا فيها لطفا فوزعوها و أدوها ..
و عندما غناها صاحبي محمد عبد العزيز إستحالت الى سحر..
الآن أهديها لكم و لهم و للزمن الجميل
|
Post: #2
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 12:28 PM
Parent: #1
مع السلامة
أداء محمد عبد العزيز و ماجيك ميوزيك باند
كتبتها بعد شاكوش خفيف كده
مافي داعي لذكر الأسماء
غايتو البنات ديل بعملوا حاجات
|
Post: #3
Title: Re: أغاني كتبتها و حكاية كل منها( أعمال موسيقية نادرة)
Author: نهال الطيب
Date: 06-02-2007, 07:06 PM
Parent: #2
أبو مدينة المبدع
فاضلابي
غايتو أنا مع السلامة دي
مش عاجباني
دي مكسراني عديل كده
وأصلها الشواكيش بتطلع الحاجات السمحة
ولمن يغنيها شبكة بزيد من عذابها
ممكن لنك الحفظ
مودتي
|
Post: #4
Title: Re: أغاني كتبتها و حكاية كل منها( أعمال موسيقية نادرة)
Author: طلال عفيفي
Date: 06-02-2007, 07:28 PM
Parent: #3
نادره شنو يا فاضلابي ياخ .. إنت هتعمل لينا شيطان ،
ما الكلام ده سمعناهو وإتكيفنا منو منذ أمدِ بعيد !!
كلام حلو ونادر لأنو ما بيشبه حاجة تانية ..
حالة جميلة وصادقة شديد ..
أقول شنو عاد ؟
أعتقد إنك من كتاب الأغنية المميزين ..
|
Post: #6
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 09:07 PM
Parent: #4
طلال يا ود عفيفي عندك جنس حركات
يعني البوست يحنكوا الناس يقروهو كيف لو الواحد ما من النجوم زي حلاتكم 
لازم نادرة دي
بعدين النادر جاي إنت كان صبرت
و ما عافي ليك شعراء الأغنية دي كلو كلو إن شاء الله يقوم ليك شاعر أغنية في
راسك و يكون بتاع غنا بنات كمان
بعدين عارف إنه و تيمنا بالمذهب الطلالي العفيفي أنا خليت الموبايل لأنه طلال يضربوا ليه ذاته ماف ..
و مشتاقين يا سيد إنت ياخي
جد و الله
|
Post: #7
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 09:08 PM
Parent: #3
نهال
الله يسلمك من مع السلامة
إن شاء الله تشوكشي و ما يشوكشوك
قولي يامين
|
Post: #5
Title: Re: أغاني كتبتها و حكاية كل منها( أعمال موسيقية نادرة)
Author: abubakr
Date: 06-02-2007, 07:41 PM
Parent: #1
فاضلابي.. انت جميل وبتكتب جميل .. وفي زمن يتكاثر فيه القبح التجميل واجب مقدس ...
حاشية :شكرا علي صورة صحبي الراحل حمزة وهو يبدع قفزا
|
Post: #8
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 09:09 PM
Parent: #5
قريبي أبوبكر
الله إنت الجميل يا سيدي
و شيخنا حمزة علاء الدين ده جميل عموم فناني السودان
و نحنا بنتمنى تنولنا بركته و يهبشنا السحر المعطون هو فيه
|
Post: #9
Title: Re: أغاني كتبتها و حكاية كل منها( أعمال موسيقية نادرة)
Author: طلال عفيفي
Date: 06-02-2007, 09:26 PM
Parent: #8
| Quote: و ما عافي ليك شعراء الأغنية دي كلو كلو إن شاء الله يقوم ليك شاعر أغنية في راسك و يكون بتاع غنا بنات كمان |
يرضيك يا فاضلابي أمشي في الشارع وبدل ما أكون علم على رأسه نار ، أصبح علم
على رأسه شاعر غنا بنات ؟؟
إتق الله فيني يا رجل !!
بيني وبينك أنا فكرت في حكاية كاتب أغاني دي ، لقيت ما فيها عيب ولا مشاكل ،
بل العكس .. خصوصاً إنو من المسائل الصعبة تلقى نفسك منداح ومنسجم مع كلمات
أغنية ..
الشعر موجود ، لكن وين الشعر الممكن يتلحن ويتعجن بالموسيقى من غير ما الكلام
يكون عندو نتوءات وما إليه من مشاكل الغناء ..
كنت عايز أقول ليك يا أيها الشاعر ويا صديقي إني بستمتع بشعر وهو مخبوء في
الأغاني زي ما بستمتع بيهو مشرور ومفضوح في حكاياتك ..
كلام جانبي ( بس ما جانبي شديد ) ..
راعني ولفتني في حمزة علاء الدين أثناء أداءه لمقطوعة الساقية صوت بيطلع
من قلبه زي الأنة ، زي البسموها انة المجروح على قول المرحوم أبو دوود ..
الأنه دي لمت وإختزلت لي تاريخ كامل من الأحزان والفقد والوحشة ، حاجة زي
الطلقة ..
وأهدي السلام والكلام الجميل إلى الخال أبوبكر قاطن الإمارات إلى حين ومحب الناس
الرجل السكر زياده والذي سنحبه إلى يوم الدين ..
وإلى مدينة ، والأهل
والإخوة والأخوات ، بعموم جميع أنحاء العالم والدول المجاورة ..
|
Post: #10
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 09:33 PM
Parent: #1
عندما أتذكر تلك الأيام لن أتوقف عن ذكر الأسماء
لستة طويييييييلة:
الفاتح البنا
أسامة عباس
بهنس
إدريس و عمر حراس الفرنسي
الفرنسي ذاته
مختار المصوراتي
نجلاء
ببو
غاندي
الزول بتاع الكافتيريا الشنبه زي هتلر داك( راجل طيب لكن نسيت إسمه)
الشوافه
عمر خيري
أفلام الفرنسي الغير مقطعة البوس ( علما بإنه أنا ما بعرف فرنسي)
معارض الرسم في جوته و البريطاني والفرنسي
شبكة
فالكاو
و ناس كتاااااااار
كان وقتا مناسبا للنبؤات عندها كتبت طال الشتاء و لحنها غاندي أحمد و غناها صاحبي الجميل قصي مختار عجوبة
|
Post: #11
Title: Re: أغاني كتبتها و حكاية كل منها( أعمال موسيقية نادرة)
Author: نهال الطيب
Date: 06-02-2007, 09:37 PM
Parent: #10
فاضلابي
الله ما بلى ليه زول بشاكوش
وأختار الاجابة التالتة
لا أشوكش ولا أتشوكش
مودتي
|
Post: #13
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 10:00 PM
Parent: #10
طلال الله يجازي محنك
هسي علم على رأسه نار دي أترجمها كيف للخواجية ?
مصرة تعرفني بضحك على شنو و أنا شابكها ليك :flag with a fire on it's head
فاهمة يا مرة?
عارف يا طلال حمزة عنده غنية بقرب يبكي فيها و هو بشحد عرافة تقرا ليه الجاي شنو
ما تتخيل كيف بتعب في الغنية دي
هسي الجاي شنو يا ود عفيفي ?
نحن ما سطنا الدنيا دي سواطة.
|
Post: #12
Title: Re: أغاني كتبتها و حكاية كل منها( أعمال موسيقية نادرة)
Author: وليد محمد المبارك
Date: 06-02-2007, 09:47 PM
Parent: #1
هل في امكانية لزر حفظ ؟
ولا فيها WIPO وكده
|
Post: #14
Title: Re: أغاني كتبتها و حكاية كل منها( أعمال موسيقية نادرة)
Author: fadlabi
Date: 06-02-2007, 10:04 PM
Parent: #12
وليد و نهال
أنا شبه أمي في النت و تقنياتها
وروني لنك الحفظ بعملوهو كيف بسويهو ليكم
|
Post: #15
Title: Re: أغاني كتبتها و حكاية كل منها( أعمال موسيقية نادرة)
Author: وليد محمد المبارك
Date: 06-02-2007, 10:31 PM
فاضلابي
بعد ما ترفع الغنية في السيرفر
في نص الكلام المكتوب بكون في المسار حق الاغنية زيادة عليها الدرايف بتاع وسيط التشغيل الميديا ولا الريل
المسار بكون على الشكل ده
http://www.sudaneseonline/wwewe.mp3
او حاجة زي كده
انسخو من نص الكلام الكتير دام
وختو لينا هنا بي ضبانتو
اعمل زي العاوز تعدل في مداخلاتك الرافع فيها الاغنيات بتلقاه
وانسخو لينا
|
Post: #18
Title: Re: أغاني كتبتها و حكاية كل منها( أعمال موسيقية نادرة)
Author: وليد محمد المبارك
Date: 06-02-2007, 10:45 PM
Parent: #17
الداير يحفظ وما عارف
كلك يمين في السطر حق مسار الاغنية
تظهر قائمة الخيار الثالث يها
Save Target AS
اختاره
بفتح ليك محتويات جهازك
اختار عاوز تحفظها وين
وبث
|
|