انت منبع شوقنا..انت،

بعد العذابات والعنا،
اشتياقاتك..غُنا،
والحكايات الكبيرة..برغم بعد الأمكنة،
الكنت تحكيها وتعيدا..عن احتمالات اللقا،
عن ارتحالاتك..هناك..واشتهاءاتك..هنا ،
عن احتمالي،
وكيف بتسأل عنّو..تاني؟؟
بعدما أدمنت ريدك..
القُدرة..جد..غِلبت..تشيل..جوّاها..ليك..الاحتمال،
ماكان عذاب الليل بشيلك،
وليّ بجيبك،
كان بسوقك من حنينك،
في حنينك كنت بخدر،
كان بفوق قدام عيونك،
وفي عيونك..تاااني أغمر،

كان تصحيني وتنادي،
كان تصحيني وبتقدر..
وكان حروف اسمي البتنده بيها انت،
كان بتكتل احتمالي.
وجاي بتسأل عنّو تاني؟؟
لو كنت ببقالك ودادك،
زي كلامك أو سهادك،
ماكان بتديني الليالي..
الفيها برهن..إنشغالي،
ماكان بتديني الطيوف..وانت شخصك..حي..وباقي،
ماكان بتعكس ليّ خيال..وانت صورتك شاغلة بالي،
ماكانت تقرّب ليّ..حزن..سامعو ضحكك في قُبالي،
ماكان بتحكي ليّ حكايتك،من كتاب بشكيلو حالي،
انت بخلان وماني بسأل عنّو..جودك،
لاني بسأل عن مواعين الحنان..الكان بتملاها بوجودك،
وكنّا نغرف،
أيوة..نغرف،
وكنّا ننهل،
احنا..ننهل،وانت تروى،
ماكان بنستغرب حروفك لمّا تطلع في كلامنا،
لابنستغرب ايديك لمّا تحضن طيف سلامنا،
أو حتّى نستغرب مشيك..
لمّا تمشي السكّة..انت،
واحنا نتعب زي كأنّو مشينا إحنا وما....مشيك،
ولو جذور الطيبة مادّة زي تقول جوّانا إحنا،
يبقى ريدك هو السقاية..ويبقى بحرك ليّ وشيك،
أصلو طافح ريدي ليك وفيك..غريق
ولو صحيح ينبوع صفاك طالّي من جوّانا برضو،
يبقى نور الكون ده كلّو..طالّي من فجّة ..وشيك،
أصلو لو داير الحقيقة،
انت منبع شوقنا انت،
وشوقنا صابب في مشيك
موجو كاسر و مشتهيك،
وماسواك ،
الكنّا نهديو كل غُنانا،
ومابراك ،
الكنت مشدوه بالحنين،
وجيت لقيت الدهشة زول،
اسمو مختوت في هواك،
لو قلت ليك بسقيك أنا
أبقى بديك الرهاب،
ولو قلت ليك زمزم شرابك،أبقى ماكفيت وصِف،
ولو كمان زدت الوصِف،أبقى ماوفيت كلام،
ولو كمان وفيت كلام،ببقى ضيّعت الوصِف!

واجعني،
شان بهواك غُنا..
وهواك،
بحوش الليل هناك،
هواك،
بشيل كل النجوم،
مفروش علي دنياك سما ،
لما يغلبني السهر
بجر حنين الليل غُتا،
أبقى متغتغت وحاااسس..
اني عريان من وجودك،
مابفيد الكون ده كلّو،
انت عارف،
سر غتاي طبعاً حضورك،
لمّا تبقى الدنيا..مافي
وأيّ زول معدوم وخاافي
تبقى انت براكَ في،
وزي تقول الكون عدم،
انت سر كل الوجود،
كل الوجود مقصور..عليّ،
حتّة من هذا المكان ..كافية تدّي الريد لقا ،
وجاي بتسأل عن غُتا؟؟

انت ياكل الدفا،
سر حكايات الغُنا،
وكل أسباب الأمان،
أنا مااشتهيتك شان أكون،
مرهونة لي زمن إنصراف،
توعدني بي جواك لقا،
والأماني صحيح رهاف،
أو حتّى ترنيمة صبا، في وتر كاتلو الحنان،
عالية مقام،
بالله لو الريد عذاب،
أو كلمة بنقولا وفراق،
مدفوقة بينات التحكّم وفقدانو حين يلحق رهاب،
حينها بتخلخل حشا،
أنا ريدي كل الاشتها،
للتلاحم والتمازج،مابين كلامك وبين كلامي، خطوة الحرف المشى،
أنا شفت عينيك في عيوني،واصلة حد الانتشا،
أنا كنت ماشة على الخدر،لمّا صوتك ليّ غِشا،
كل شئ منك بدا..
وبرضو..انتهى،
ومنّي باقيلك بعض،
أصلو خيطين الصباح وكتين يبينن،ببقى الوداع طبعا فرض.

ولو قلت ليك زمزم شرابك،أبقى ماكفيت وصِف،
ولو كمان زدت الوصِف،أبقى ماوفيت كلام،
ولو كمان وفيت كلام،ببقى ضيّعت الوصِف!

كل عام وأنت بخير ...

كل عام وانت زايدة حنان،سميّة..

Quote: لمّا تبقى الدنيا..مافي وأيّ زول معدوم وخاافي

أنا بسألك ...
من وين أجُوب الأمكنه
ما أصلو غطاني الفتر
أنا لسـّــه متّهـول معاك
والهول جحيم تعب السفر
قدامي ألوان تشبهــك
يا سمين ، وبرعم سوسنه
الدنيا لسـه محمّداك
لا سبّحت ، لا ربّحــت
ولا البيجــافي بينســـتر
أصل الحديث الشوق جبل
في رشرش العين إرتباك
للبيك وفيك
واللســه فى رحم القوافي بيســـألك ...
ما تجيبي لي سيرة البحر


التعديل لزوم النعاس قمت النوم لقيت الطشاش واقف قصاد العين

Quote: انت ياكل الدفا، سر حكايات الغُنا، وكل أسباب الأمان، أنا مااشتهيتك شان أكون، مرهونة لي زمن إنصراف، توعدني بي جواك لقا، والأماني صحيح رهاف،

راجع للواحة الجميلة حتما



كل سنة وانت طيبة يا خنساء

محمد خليل،
مرحبا وكل سنة وانت كما تتمنّى..


مع المحبّة،

Quote: ما تجيبي لي سيرة البحر

زي تقول..تمنعني سيرتك ماأجيب؟؟
كيفن يغطيني الغرق..ومنّي تتباعد ضِفاف..
أبقى في نصك..غريب
وبرضو حارمني الوصال..
وسيرة الموج والبحر

Quote: وجيت لقيت الدهشة زول

وكلام غزير تريان ونديان من منابع الشوق العميم

ومرور بقامة السماء ..أبو ذر.

مودتي،

يا خنساء يا مبدعه كلمات تتغني لانها جاهزه .... ساحاول.

Quote: أصلو طافح ريدي ليك وفيك..غريق

قمة الروعة والابداع بدون حدود وربنا يديك العافيه بس عندي طلب بسيط لو ممكن

كلمة طافح دي بتذكرني محلية بحري .....بالله شوفي للكلمه دي حل.....!!

طارق ..كل سنة وانت كماتحب..

أها..بحري..وأنا أقول طافح دي أنا جايباها من وين؟؟


لو ماخليتني أربط بينها وبين بحري..كان شلتها..

مودتي،

أنا ريدي كل الاشتها،
للتلاحم والتمازج،مابين كلامك وبين كلامي، خطوة الحرف المشى،
أنا شفت عينيك في عيوني،واصلة حد الانتشا،
أنا كنت ماشة على الخدر،لمّا صوتك ليّ غِشا،
كل شئ منك بدا..
وبرضو..انتهى،

تماضر

رائعة عيديتك كما انت

وتتفتح كل الدروب قدام هواك


وكل سنة ونحن منتشين بي غناك

كلل سنة وحرفك أنضر ويبل الجوف

بنتنا العزيزة

كل سنة و إنت و الأسرة بألف خير

Quote: ماكان بتديني الطيوف..وانت شخصك..حي..وباقي، ماكان بتعكس ليّ خيال..وانت صورتك شاغلة بالي، ماكانت تقرّب ليّ..حزن..سامعو ضحكك في قُبالي، ماكان بتحكي ليّ حكايتك،من كتاب بشكيلو حالي،

يديك ألف عافية ...

كل يوم وانت مخدرة بالكتابة يا تمرا

اشراقة..كل لحظة وانت مشرقة..

حكوا ليّ عن البحر ولمتكم الحلوة ود. محمّد جلال هاشم..من كترة مااتكلم عنّك زولي ده لامن غِرت


بتسوي فيهم شنو الناس دي

Quote: حكوا ليّ عن البحر ولمتكم الحلوة ود. محمّد جلال هاشم..من كترة مااتكلم عنّك زولي ده لامن غِرت

هو انتى اديتينا فرصة يا خنساء؟
ماكنتى معانا، زاحمتينا فى لطافتو وجمال روحه
ضحكنا يازولة ضحك لمن الضحك قال بطنو وجعتو



كانت فرصة انو اعرف الوش التانى لجعفر، زولك الاخدر- ضحكنا بقشفاته وبداهة ردوده الطريفه

قلت ليهو طيب ياخ الدغالة شنو لمن استضافتنى تماضرك فى بيتكم..
اليوم التانى وبعربيتكم الماهلة وسمحة فسحونا وغدونا- مش على سفر كنا..




---
اهمّ من ده كلو اكتشفت انو فى راجل بيموت فى مرتو

الباقى فى التلفون وباقى الصور بالدفع { وش طمعان}

متخيلة قعدتكم وونستكم اشراقة
والقفشات تفوتك تمشي وين بس؟؟


يوم جيتينا آخر الليل وتاني يوم الضهر كان الندوة وفي ناس جاتنا من الصباح
كدي بس قولي ليّ بي وين الطلعة؟؟
هو انتي زاتك البلم فيك بس يقالدك ويقعد بيك يطلع بيك عشان سماحتك تتوزع بين الاماكن
معقولة بس؟؟

قريبي..وأخي في التركين

كل سنة انت وكل حبايبك بخير..

كل سنة وانت وكل الفيك والبجي منك أنضر

كل الحب روزا

رائعة انت دي


منى..

طمطم

كل سنة وانتي طيبة

عارفة بفتش فيك عشان احكي ليك واوريك انو عملنا جلة شعرية في البيت وكانت رهيبة ..

زوجتة عثمان رغيم حكيت ليها بي شعر حنانة وحكت لي بي شعر اختها (امنة)

وعدتني بانو تجيبهم ونعمل جلسة وبالفعل جوا ما شاء الله خمسة ونحن في البيت

حقيقة فقدتك بس حنانة حكت ليهم بيك وبي جلستكم ديييك ..




____________
اول ما تجي نعملها جلسة كبيرة سمح

* اشتياقاتك..غُنا!!

كل عام وأنت بخير

صباحي كل عام وانت كل الحاجات الحلوة

بت حيمورة..و...حنّانة حبيبتي،

ربي يسعدكم وماتفقدوا غالي ..أصلو عارفة أغلى منّي ماف

ان شاء الله أكيد نتلم تاني بس بالله أوع من المكيّف..عشان أكون مصحصحة


_
اشتياقاتي..انتِ عديل كده.

تمااضر...

عيد سعيد
و كل سنة و انت بخير

شكرا للكلااام الشحمان...

تحياات كتاار...


ــــــــــــــــــــ

ود عثمان،
كل سنة وانت أجمل..


لو بتعرف..

Quote: كان بسوقك من حنينك، في حنينك كنت بخدر، كان بفوق قدام عيونك، وفي عيونك..تاااني أغمر،

غمرتينى يا تمرا ياختى...

نفسى اغمر تانى انشاءالله ما اصحى ذاتو..

بتعرفى الموت القصير؟





----
الاجابة مع باقى الصور

يابت يامشرقة

الموت القصير..

كان مابعرفو..كان بتلقيني بغمر؟

طبعا زي ماشايفة الزول ده عيونو ضيقة وكان ضحك بتختفي
لكن معبّرة تصدقي؟؟

أنا كان معاي الأصل ماتحندكينا بالصور

تاني جبتو سيرة البحر ؟

الصحافة،
كان ماجبنا سيرتو ماكان جيت


كل لحظة وانت زي ماتحب

Quote: كانت فرصة انو اعرف الوش التانى لجعفر، زولك الاخدر- ضحكنا بقشفاته وبداهة ردوده الطريفه قلت ليهو طيب ياخ الدغالة شنو لمن استضافتنى تماضرك فى بيتكم..

غايتو يا إشراقة أمانة ما دقستي
يعني كنت عاوزة جعفر ( المسكين ) دا يضحك ويلقي قفشات و ردود طريفة في بيتهم
وخنساء كانت قاعدة ليهو زي ( الألفة ) ؟؟؟

____________________

الحرية له ولسواه

عاطف،
غايتو الحريّة دي احنا بناخد منها الجانب البنفع معانا
الباقي مادايرنّو
مابقعد ليو زي الألفة أسأل اشراقة
النبي ماكنت زي أختو يومتا؟

حتّى أنا واشراقة قفلنا بابنا علينا وضحكنا للصباح..

عاطف شكلك كده محروم من الحرية

Quote: غايتو يا إشراقة أمانة ما دقستي يعني كنت عاوزة جعفر ( المسكين ) دا يضحك ويلقي قفشات و ردود طريفة في بيتهم وخنساء كانت قاعدة ليهو زي ( الألفة ) ؟؟؟

عاطف عمر صباحاتك كلها اعياد، الله يديك العافية ويخلى ليك اسرتك الجميلة ويخليهم ليك يارب

بينى وبينك نحنا ما ادينا جعفر فرصه
قعدنا شوية معاه ومشينا غرفة تانية
نق نق نق وجنس مطر كلام وضحك
جارهم الخواجة قال نحنا اللى بنتساهل يدونا المحكمة الجنائية

يومها قلت فى نفسى جعفر ده مالو مكرضمها كدى ؟

اها لمن اتلاقينا تانى وبالصدفة وقرب يدفق جردل الآبرى اللى مستيناهو الخلوق رمى اول قشفاته

{ياجماعة فاقد مرتى، حبيبتى}

قلت وووب علىّ كدى عديل، اهو فى راجل بيقول لمرتو حبيبتى

اليوم التانى فسحنا وغمرنا بكرمه الفياض
وقال بيتحدى اى زول بيحب مرتو زى ماهو بيحب طمطمو
غايتو مافضل فينا مصران لكن ده كلو كان فاقد تمرا رغم ام محمد وابوه ماقصرو
كدى شوف معاى الوليد ده مش بيملاك رحمة دنيا وعالمين، ربنا يحفظهم، سكينة ومنير وحمودى الحلو




-------
لكن ياعاطف بعيدا عن منابع شوقنا بتاع طمطم دى، ليه انتو كدى؟ ياخ اخدوا راحتكم وبراك قلتها الحرية لنا ولسوانا وكان طبقناها بتروحوا شمار فى مرقة

ماشاءالله ربي يحفظو محمد منير الود كبر من ورانا وبقى ينطط عيونو



مع اشراقة في أخدوا راحتكم
حتى عاطف مايفتكرني ألفة جد

اتدفقوا ماتبقوا رقراق

لكن كمان مالي درجة

Quote: وقرب يدفق جردل الآبرى

أولاً بالتبادي
فاتحة القرآن العظيم
ثم المعوذات
ثم صلاة النبي كاملة كما يحب ويرضى
حصوة في عين المايصلي على النبي
ربنا يحفظوا

ثم بعد ذلك يا إشراقتنا
وحات خوتك
القلتيهو دا كلو كنت متخيلو
الذوق لا يتجزأ
خنساء المليئة جمالاً وذوقاً ، حتماً ولا بد أن يكون ( زولها ) جعفر أو جعفر
وأن يكون بنفس المزايا القلتيها عنو
وما خفى كان أجمل

لكين هل سمعتي قبل كدا بـ ( الريدة أم فاولات ) ؟؟
دي نوع من الريدة ( أخبئه ) لناس عزااااااااز وما بنديها للناس من طرف
ناس يكونوا بس من طينة غاليتنا طمطم دي .
أها ( الريدة أم فاولات ) الزول يعبر عنها كيف ؟؟
الزول يقوم يباري ليك زولو البريدو لحدي ما يلقاهو ( منصوب ) أو ( مقنطر ) - حسب رواية حبيبنا أبوساندرا - زى النصبة أو القنطرة الإنتي بحسن نية عملتيها ليها وختيتيها فوقها
ويقوم تاااااااح يعمل الفاول ( الأمو بت عم أبوهو )
فاول زى الأنا العملتو في مداخلتي الفوق ديك وخلى غاليتنا طمطم تشوت يمين وشمال
ويمين الله أنا من ساعة مداخلة طمطم أضحك براى زي المجنون
وجيتي إنت إشراقتنا وتميتي الناقصة

ياخ القلوب شواهد

__________________

* شن قولك يا دكتورة في الريدة أم فاولات ؟؟
* تاااااني لو لقيت فرصة برضو ما بفوتها

____________________

خنساء

محبتي

غايتو ياعاطف غلبني أرد عليك..
من ساعة كتابتك الرد ده وأنا أخش وأمرق

أهن معزتك دي كتيرة خلاس
وتستلزم الواحد كده يكون قدرها

الخلاصة..


الأرواح جنود مجنّدة،ماتعارف منها ائتلف..وماتنافر منها اختلف.

ربي يديم سماحة مايجمعنا..

ياخي يديك العافية
وكل سنة وانت طيبة

ويديك العافية طارق..
يوفق خطاويك لي قدام
يملاك عافية وفرح

كل لحظة وانت طيّب..

up
مدخل تكتيكي
بسم الله
خشيت بي شوقي اليمين
علبة شوكولا
وباقي حلو مر رمضان
يعني جيتك بي هدوم العيد
مخمخم معاي فرح شفع
وشوية تفاصيل
جيت أبارك ليك الحنين
كل نورة و أنتي طيبة


شكرن كتيرن!

كل حب وانت نورا
ونورا انت
وكل لحظة تزيد محبة
تلقى نورتك زايدة شوق
وكل شوق
تلقى روحك
نورا فيها
ونورا روحك
تبقى بيتها

خناس
كل نورة وانتي واحة
ضاوية بي طلة بدورا
فيها تقدل كل نجمة
فيها أحلي نغم وصورة


شكرن كتيرن


اما قبل
ف مشتاقون
قاعدة تعملي معاي جنس عمايل
أتلومتي و أتكومتي

وانت زايد في السماحة
وكل كلمة تقولا نورا
تبقى في جوّاك واحة
وكل نورا تقولا كلمة
بيها تخدر كل ساحة
كل طفلة تعيش في نورا
في كل بسمة تشيل مساحة
تبقى في جوانا نورا
طيبة شاغلة البال سياحة


حبيبها الشوق مردودو مضاعف،

خناس
قلنا نبعد مرة يمكن
نلقي في السفر السعادة
ما أمرتك أنت تسكن
فيني و تزيد الوكادة
قبل أشوفك كنت مؤمن
وبرضي ليك عابد عبادة

أرررررررررررح

وانا كنت دارس كل دروسك
وكنت شاطر في قرايتك
إلا دايرليّ اعادة
أبقى أدرس تاني وِلفك
وأبقى شايلك في الأماسي
يكون هواك أهمّ مادّة
وأبقى أرسب تاااني برضك
وانت تزعل
وأبقى أوعد
وانت ترضى
اني اقرالك زيادة

أقري مرة ومرة خشي الحصة جوة
المناهج بيكي تفرح
بيكي زايدة دروسنا قوة
انتي للأبداع نموزج
ولو قصدنا المعني هوَ
بي كلامك روحي مرقت
وفيني كملانة المروة
.....!!!!


التوبة يا حبوبة
قطعتي نفسي والله

حبيبها،
خلاس عفونا عنكم

تماضر
كل عام وأنت بخير

ملحمة الأشواق دي يا تماضر
كان تدينا ليها حبة حبة
قطرة قطرة
لأنها ملانة إنسانية
مترعة بالصدق العاطفي
كل سطر وكل فقرة
فيها نبض شاعر أو ذكري موقف أو طيف إحساس
عبر تاريخ الأشواق الإنساني

حتما - إن شاء الله - لي عودة بي مهلة

فضل،
سلامات وين نزل محياك..تحيّاتنا وأمانينا

Quote: زي تقول..تمنعني سيرتك ماأجيب؟؟ كيفن يغطيني الغرق..ومنّي تتباعد ضِفاف.. أبقى في نصك..غريب وبرضو حارمني الوصال.. وسيرة الموج والبحر

أبقي كيف ..؟
قبل التبادي
ووشّـــة الصوت البنادي
حياااا .. حيا على المحال
ما جبت سيرة الموج عجيب
لو قت ليك ...
الريل نفر من الخلا
أو ..
فُــتّ للناس الحوادي
غرقت مشروق بالجمال
وريني كيف المسأله
لوجنبا طاريهو الرهيب


قاصد البحر

تبقى زي كل النجوم
مرّات تبين..مرّات..تفوت
ممتدّة في شارع السما
موعودة بي ضد الخفوت
زي خرز مدفوق هواهو
وشوقك انت بقى الخيوت
الروح بتفرش لون سماك
زرقة للليل البموت
لو مرّة غطاها الصباح
احنا بغلبنا السكوت

قولي واحد

مناظرة / مقاربة / مشاعرة
تماضر

Quote: بعدما أدمنت ريدك.. القُدرة..جد..غِلبت..تشيل..جوّاها..ليك..الاحتمال، ماكان عذاب الليل بشيلك، وليّ بجيبك، كان بسوقك من حنينك، في حنينك كنت بخدر، كان بفوق قدام عيونك، وفي عيونك..تاااني أغمر،

جليلة رضا - من ملحمة شوقية ضارية

Quote: أعطيته ظهري وكم ملك الذي في الصدر من قلب توهج بالدم وخشيت أن أرنو إليه وطالما أغرقت عيني في سناه المظلم

بس المشكلة تماضر بي رضاها
وجليلة غصباً عنها

موفقة دوما يا تماضر في إختياراتك
كان جاك الغلب خليهو بي رضاك عشان تكسب

صدق مجذوب أونسة لما قال أصلو المحبة عذاب

فضل،
واحد:


ووقفت صامتة أحرك في يدي،مفتاح بيتي أو أساور معصمي،
وخشيت أن أرنو إليه وطالما،أغرت عيني في سماه المظلم، ورجعت حتى لو تلمس إصبعي،
لهويت فوق الأرض كالمتحطم، كم أمنيات عربدت في خاطري، لو أنني حققتها لم أسلم،
فلو استطعت علي الخدود صفعته،ثم انثنيت بقبلتين على الفم،
ولو استطعت سخرت منه, شتمته،وركعت فوق خطاه كالمتندم،
يا أنت لا تغتر لست ملومة، أهواك حب الأم لابن مجرم.

كدا يا خنساء

واحد بتاعتك دي طرشقت علي إتنين الكنت لا بد بيها

Quote: وكان حروف اسمي البتنده بيها انت، كان بتكتل احتمالي.

Quote: ورجعت حتى لو تلمس إصبعي، لهويت فوق الأرض كالمتحطم

بس جميل إنك عارفة القصيدة دي
أنا حفظتها سنة 91 من مرة واحدة بس وما فارقت ذاكرتي نهائي
وكم (أي المشاعر ) تدفقت مذ ذاك وحتي عندئذ
ورغم كدا ما أبينا السلام من أي زول / زولة ،،، ما نحن مساكين ساي

أضحك الله سنك،

قلت ليّ ماأبيت السلام؟؟

أي المشاعر في الدماء تدفقت، حين التقينا بعد هجر مؤلم
وأبى السلام أبيته، من قبل أن يدنو يمر عليّّ غير مُسلم
وكذا تشابه في الخصام شعورنا، كأمس في وصل وحب مفعم
أعطيته ظهري وكم ملك الذي ،في الصدر من قلب توهج بالدم

شفت ماتحته خط ده؟؟
أبلغ مافي القصيدة،

شكراً
مداخلاتك .. أسعدتني وصنعت ابتسامي،
مودتي،

يبدو إنك غيمه ماطره
نسمة الريح والعطر
عاينت ليك ..
مستني فجر الضو معاك
داهمني أداني الخبر
قابل أجيك
عجلُت وأصلي على سفر
لو ألقي حجه أطوف مداك
عالجت أشلاء الحروف
رغم الظروف الباديه والجو الخطر ...
برقـــنْ نجوم من غناك
ربك ســـتر ..
غرقانه دلتا الشوق هناك
قلتي السكوت ...!
ككيف ...؟ أضاريك وأفوت
يا موجه هاديه
إذا الضفاف مشروقه بيك
وبرضو البحر

يبدو شوقك انت عابر
زي سحاب الريد مسافر

ماني بمتهن الملام..
لو أخّرك ظنّك شوية..
ولاهو محزون الكلام..
لو بي قساك مُرسَل إليَّ
لكني بشتاقك دوام
وبخبرك حالي العليّ
يوم فارق الليل المنام
والغمضة بتخاصم عينيّ

مبنع الأشواق بحيرات الخــدَر
الدنيا تغدر بالأليف
لحظة يساومني السهر
لا ألقي منبع لا مصب
ألقي العدم ...
والقي المتاريس والتعب
الموج عنيف ..
والضفه ما بتعرف حذر
انا لسه ماقادر اشوف
قاومت سيل حزني الوهم
وندهت قادر يا لطيف
أديني معبر للوصول
زاهي ووريف

منبع الاشواق براك
قدر بنشرب منو شوق
قدر بيأذينا العطش
قدر ننادي عليك هنا
ريدنا يسرع ليك..هناك

الليل هباتو عليك..سهر
والليل هباتو..عليّ..أشاركك في القدر
انت لو لازمك..تعب..
احنا لازمنا الحنين..المنو بتوزّع..تعب،
الموج بجدّع ليك..ريدو..
ضفافو ناشراهو الخبر
ياالله ما تديهو غيم
يكتم احوال المطر

الرائعة شاعرتنا تماضر

عيد سعيد وكل سنة وانتي اكثر روعة

مدثر تيف تيف

Quote: ماكان بتديني الطيوف..وانت شخصك..حي..وباقي، ماكان بتعكس ليّ خيال..وانت صورتك شاغلة بالي، ماكانت تقرّب ليّ..حزن..سامعو ضحكك في قُبالي، ماكان بتحكي ليّ حكايتك،من كتاب بشكيلو حالي، انت بخلان وماني بسأل عنّو..جودك، لاني بسأل عن مواعين الحنان..الكان بتملاها بوجودك، وكنّا نغرف، أيوة..نغرف، وكنّا ننهل، احنا..ننهل،وانت تروى، ماكان بنستغرب حروفك لمّا تطلع في كلامنا، لابنستغرب ايديك لمّا تحضن طيف سلامنا، أو حتّى نستغرب مشيك.. لمّا تمشي السكّة..انت، واحنا نتعب زي كأنّو مشينا إحنا وما....مشيك، ولو جذور الطيبة مادّة زي تقول جوّانا إحنا، يبقى ريدك هو السقاية..ويبقى بحرك ليّ وشيك، أصلو طافح ريدي ليك وفيك..غريق ولو صحيح ينبوع صفاك طالّي من جوّانا برضو، يبقى نور الكون ده كلّو..طالّي من فجّة ..وشيك، أصلو لو داير الحقيقة، انت منبع شوقنا انت،

يا الله ؟؟؟
انها الدهشة التي تصيبنا بالاندهاش ..
انها الكلمات الاحلي من الشهد .. نقف امامها مصلوبين علي
الواح الطرب الاصيل .. شكرا ايتها الجميلة جدا .. ..

سلامات بهاء،
شكراً على طلّتك وكلماتك الطيبات


مودتي،

مدثر،
كل سنة وانت زي ماتحب

كل أيامك عيد..

مودتي،