Post: #1 Title: في السُّكات بسمع..غُناكــ Author: تماضر الخنساء حمزه Date: 04-08-2008, 11:15 AM Parent: #0
نص قديم\جديد
أنا في السُّكات بسمع غناك بسمع تراتيلك تَهِش جوّاي تباريح الغرام وخُطاك في قلبي بتمش ترسم على البعد الحرام تصاوير إقترابك ليّ تَحِل ألقاني عايشاك في المباحات الحلال ألقاني راسماك في البراحات الهناك ألقاني شايلاك في قليبي أظن رآك..
نبضو إرتعش.. أسرع ..وِقِف..
فاقد حِراك.
أنا في حِداك بالحيل سمح.. قلباً بيلبس فال جديدو وحريرتو لو تعرف..دماك
! الله عليك يازول رزين قدر ماتسد عويناتك غيوم قدر ماتشيل وتتعبّى بهموم نلقاك هنا دافق حنين نلقاك هناك موسم ربيع ريحة شذاك صوتك..نداك وإنتا في الآخر خلاس تعب الوصف إمكن ملاك؟؟ جاي وفي إيدو الخلاس إمكن رسول؟؟ من الخواطر والشعور كِملوا الرسل! تاهت معاك برضو الحروف.
ياسلام! علي حسّك براك.. هوَّ الصباحات كل الشموس هوَّ المساحات دفقت كؤوس سكت الكلام! مامن قلّتو.. لامِن معانيهو الشوية.. لكنّو شايف في الملام.. مكتوبة ضاعت روعتو لو جات تقيس الروعة فيك مكتوبة تاهت غنوتو لو جات تغني الشوق إليك وفي آخر سطر بعد الملام مكتوب عليّ ما ألتقيك! أصلي جوّاك مِن زمن.. داير.. أجيك..وأسند همومي علي كتوف العافية فيك.. أجدع حكاياتي الزمان ..عنّك ..عليك..
في بالي إنت ..متكوِّع عدييييل في بالي راسم أمنياتك زاهية بي فال العديل في بالي شوقك ..وإشتياقي.. في بالي..مشهد من حضورك فيهو حيران التلاقي.. في بالي..تايه في وجودك إنت لا تطراو صدودك لا تعيش من غير وصالنا المحبّة الفينا ..زادت.. ياخي عدَّت بي هناك فاتت حدودك!
الفكرة إنك ماتغيب الفكرة تنبت من لقاك خليني أتوسّد مجيك.
وأقعد كمان .. قيِّل علي مسارب الروح وبيت أسري جوّاة الوريد أدفق الشوق الوشيك خليني أرتاح بين تفاصيل الملامح في وشيك أصلي من حسيت مجيك.. إرتعش فيني الكلام والشهقة لامست الغمام وزفرة في صوت الكمان
أعلنت..موسم غرام.. كانت فواصل الأغنية رنّة وتر.. فيهو الصوابع ماسهت شالت حنينا..وإتّكت بسراع مشت بين النغيمات الدّغش وأنا حالي ..مابعرف أصِف حالي لسع مرتعش يلاك نمِش حدّ الغيوم..نمسك رذاذ اللهفة بي كف الغُنا ينزل حنينك ينهمر.. نرقص على لحن المطر.. أنا والقمر وإتنين من نجيمات السما تجي ياأنا ؟؟
Post: #12 Title: Re: في السُّكات بسمع..غُناكــ Author: تماضر الخنساء حمزه Date: 04-12-2008, 08:12 AM Parent: #8
عماد..صباحاتك خير.. شكرا على القراءة..
كل الود
Post: #13 Title: Re: في السُّكات بسمع..غُناكــ Author: Mohamed Ahmaed Olyesh Date: 04-12-2008, 08:42 AM Parent: #8
ياعماد سلام من خلال تماضر الخنساء لكن الموضوع مرتبط مع بعض....كيف؟؟ اشرح ليك.. انت عملت رواية وطبعت بمصر بدار الحضارة مع الفنان الهامي بولس وانا بقترح لي تماضر انو ممكن ننتج وننفذ كل الشعر الموجود والماموجود في نفس المكان ولا شنو؟ عليك اللع وريها ياعماد كيف الراجل ده طيب وخلوق وممكن يعمل ديوان محترم يليق بمكانة (تماضر) انا جاهز غايتو تماضر معليش اقتحمت البوست لكن ؟......... ولا شنو؟ عليش
Post: #10 Title: Re: في السُّكات بسمع..غُناكــ Author: د.محمد حسن Date: 04-09-2008, 06:30 AM Parent: #1
Quote: تجي ياأنا ؟؟ !
معقول ما اجي
صحافة الجميل
دائما مرورك ميز
Post: #15 Title: Re: في السُّكات بسمع..غُناكــ Author: ابوبكر يوسف إبراهيم Date: 04-12-2008, 10:20 AM Parent: #10
الأخت العزيزة / تماضر
سلام على روحك الطيبة قلبك الأخضر به مرايا الشعر التي تعكس كل إعتلاجاته.. بهذا النظم الجميل الرقيق رفعت نفسك فوق هودج الشعر.. تذهبين مع قوافل الليل في عبقر.. تسمعيننا صوت حدائك .. نمر كلماتك مر السحاب على أرضنا الجديبة فتحيي موات شواقها.. تحفرين الليل بالمنغم النظم ، وتهمسين له حتى ينكسر الصدى.. أمنِ كم تنصح قلبها ليفسح مكاناً برحاً لأشواقها.. أن الأشواق والهيام يضغطان قلبك حتى تنز الشرايين قصيداً متوهج الحلرف متألق ومتأنق الحرف .. أبدعتِ أختى
[ وأقعد كمان .. قيِّل علي مسارب الروح وبيت أسري جوّاة الوريد أدفق الشوق الوشيك خليني أرتاح بين تفاصيل الملامح في وشيك أصلي من حسيت مجيك.. إرتعش فيني الكلام والشهقة لامست الغمام وزفرة في صوت الكمان]
Post: #21 Title: Re: في السُّكات بسمع..غُناكــ Author: تماضر الخنساء حمزه Date: 04-13-2008, 11:00 AM Parent: #15
Post: #31 Title: Re: في السُّكات بسمع..غُناكــ Author: د.محمد حسن Date: 04-18-2008, 12:37 PM Parent: #18
Quote: أسي انت الناداك منو؟ ¿
نا داني الهوى النديان مشا
والناس نيام
الزم علي الوضو من القمر
والركعاين اصل الصيام
ناداني حرفك والقصيد
حلو الكلام
ناداني قلبي المشتهى
لمة حنان
الفة
وصفا
ونفوس تمام
وبس
Post: #27 Title: Re: في السُّكات بسمع..غُناكــ Author: ابوبكر يوسف إبراهيم Date: 04-13-2008, 02:32 PM Parent: #10
الأخت الشاعرة/ تماضر الخنساء
سلام على روحك الطيبة
حين تقولين أنه نص قديم جديد أقول لك:
كيف للزاجل الآن أن ينطلق بالرسائل المتأخرة..وللقلب أن يفك عروق الذهب..كي يقرأ ثباتك.. وهذا الكائن يرتجف كسعفة حاصرتها رياح اللهفة والشوق..وحفرت فى نسغها مالا تقدر على الوصول إليه..ولا هو بكاشف جرحه عليك.. ها أنا الآن كقاريء في شراكهمع الحرف .. لم يبق مني شىء إن كانت قراءتي له قديمة.. ولكني أثير يترصد النجوم.. أنهكتِه فواصل الإنتظار .. فسدَّ شق القلب بالتوسل.. وأغمض عين الشق بالرجاء.. وما بينك وبينه إجترار المعاني ..أتختارين العضَّ على خبزك نيئا..وتعرفين طعمه اللحظة...على أن الحرف في صبرٍ يتحّرق.. وأنا كقاريء وأفكر بطعمه حين ينضج ولو بعد سنتين ...فلنرفع صبرنا الآن إلى معجزة تأتي..فتفصل ما بين الإبداع والجنون....وأماحديد حكمتك في مرفأ الصبر فهذه هي بالضبط المسافة ما بين الشوق والشوق..وما بين الصبر...والهوى.. إن كان هذا قديم فأقول لك أنه ما زال يبرق تحت وطأة الزمن .. تحياتي
Post: #14 Title: Re: في السُّكات بسمع..غُناكــ Author: محمَّد زين الشفيع أحمد Date: 04-12-2008, 10:05 AM Parent: #1
Post: #24 Title: Re: في السُّكات بسمع..غُناكــ Author: تماضر الخنساء حمزه Date: 04-13-2008, 11:06 AM Parent: #19
محمّد خليل..مرحب بيك وبي عودتك
مودتي..
Post: #23 Title: Re: في السُّكات بسمع..غُناكــ Author: تماضر الخنساء حمزه Date: 04-13-2008, 11:05 AM Parent: #16
Quote: ده قطع شكـ صاحبي العميان جعفر
قال ليك ماتبهتني ساكت أنا صحي بشوف طشاش طشاش لكن ماعميان
خدر..
Quote: كتابه جميله يا تمادر
جميل انت ده.
Post: #22 Title: Re: في السُّكات بسمع..غُناكــ Author: تماضر الخنساء حمزه Date: 04-13-2008, 11:02 AM Parent: #14
سلامات محمّد..
شكرا للدواخل التي حوت بوحاً ..يلازمه الشجن..
مودتي.
Post: #20 Title: Re: في السُّكات بسمع..غُناكــ Author: محمد البشرى الخضر Date: 04-12-2008, 09:26 PM Parent: #1
Quote: الله عليك يازول رزين
اسي شايل طوبة و الباقي لي بعدين
Post: #25 Title: Re: في السُّكات بسمع..غُناكــ Author: تماضر الخنساء حمزه Date: 04-13-2008, 11:08 AM Parent: #20
Quote: اسي شايل طوبة و الباقي لي بعدين
البشرى طوبة واحدي بس؟؟
غايتو جنس بخل هو
لو طوبة (مربوع) مابناباها
Post: #28 Title: Re: في السُّكات بسمع..غُناكــ Author: محمد البشرى الخضر Date: 04-13-2008, 03:03 PM Parent: #25
Quote: لبشرى طوبة واحدي بس؟؟
مش دا كلامك
Quote: غايتو جنس بخل هو
ها وتاني قامت جابت سيرة البحر اقوم ادور اسي
Quote: لو طوبة (مربوع) مابناباها
مربوع امي ... مربوع
Post: #29 Title: Re: في السُّكات بسمع..غُناكــ Author: تماضر الخنساء حمزه Date: 04-18-2008, 10:11 AM Parent: #28
Quote: مش دا كلامك
ده كان يومتا..أسي لا
Quote: مربوع امي ... مربوع
لا خلاس كده مابناباهو
Post: #26 Title: Re: في السُّكات بسمع..غُناكــ Author: هاشم أحمد خلف الله Date: 04-13-2008, 11:08 AM Parent: #20
Quote: أنا في السُّكات بسمع غناك بسمع تراتيلك تَهِش جوّاي تباريح الغرام وخُطاك في قلبي بتمش ترسم على البعد الحرام تصاوير إقترابك ليّ تَحِل ألقاني عايشاك في المباحات الحلال ألقاني راسماك في البراحات الهناك ألقاني شايلاك في قليبي أظن رآك..
نبضو إرتعش.. أسرع ..وِقِف..
فاقد حِراك.
أنا في حِداك بالحيل سمح.. قلباً بيلبس فال جديدو وحريرتو لو تعرف..دماك
! الله عليك يازول رزين قدر ماتسد عويناتك غيوم قدر ماتشيل وتتعبّى بهموم نلقاك هنا دافق حنين نلقاك هناك موسم ربيع ريحة شذاك صوتك..نداك وإنتا في الآخر خلاس تعب الوصف إمكن ملاك؟؟ جاي وفي إيدو الخلاس إمكن رسول؟؟ من الخواطر والشعور كِملوا الرسل! تاهت معاك برضو الحروف.
ياسلام! علي حسّك براك.. هوَّ الصباحات كل الشموس هوَّ المساحات دفقت كؤوس سكت الكلام! مامن قلّتو.. لامِن معانيهو الشوية.. لكنّو شايف في الملام.. مكتوبة ضاعت روعتو لو جات تقيس الروعة فيك مكتوبة تاهت غنوتو لو جات تغني الشوق إليك وفي آخر سطر بعد الملام مكتوب عليّ ما ألتقيك! أصلي جوّاك مِن زمن.. داير.. أجيك..وأسند همومي علي كتوف العافية فيك.. أجدع حكاياتي الزمان ..عنّك ..عليك..
في بالي إنت ..متكوِّع عدييييل في بالي راسم أمنياتك زاهية بي فال العديل في بالي شوقك ..وإشتياقي.. في بالي..مشهد من حضورك فيهو حيران التلاقي.. في بالي..تايه في وجودك إنت لا تطراو صدودك لا تعيش من غير وصالنا المحبّة الفينا ..زادت.. ياخي عدَّت بي هناك فاتت حدودك!
الفكرة إنك ماتغيب الفكرة تنبت من لقاك خليني أتوسّد مجيك.
وأقعد كمان .. قيِّل علي مسارب الروح وبيت أسري جوّاة الوريد أدفق الشوق الوشيك خليني أرتاح بين تفاصيل الملامح في وشيك أصلي من حسيت مجيك.. إرتعش فيني الكلام والشهقة لامست الغمام وزفرة في صوت الكمان
أعلنت..موسم غرام.. كانت فواصل الأغنية رنّة وتر.. فيهو الصوابع ماسهت شالت حنينا..وإتّكت بسراع مشت بين النغيمات الدّغش وأنا حالي ..مابعرف أصِف حالي لسع مرتعش يلاك نمِش حدّ الغيوم..نمسك رذاذ اللهفة بي كف الغُنا ينزل حنينك ينهمر.. نرقص على لحن المطر.. أنا والقمر وإتنين من نجيمات السما تجي ياأنا ؟؟
