معليش..

قالوا لو هدفك سما..
ووصلت لي نُص الطريق حد السماء..
أعرف كمان إنت في نص الطريق للهاوية.

معليش إذا جاوز الاحساس هواك
عدّى فات حد احتياجات الصغار
لي غفلة الام البقت في غفلة من تدبيرا..أم..
خسارة..
ماعِرفت تدارك محنتا..

معليش..إذا سهواً بِقع مِنّي الغُنى
الأصبح ..كبائر..
وكت التلاعب..بالمصاير..
وشاتر زمن لحن الأمان كل الفواصل وبهجتا..

معليش إذا.. خاطرك..بِمُر..عفواً..علي كل البيوتات التغتغت ..بإحتياجك..سُترتا..
والسترة في كل الأحايين..غُطاها..أصلاً فِكرتا.

معليش إذا مِنّي الكلام ..طعمو..الأَمَر..مالِح..عنيد
أصلو الحروف..
وده المؤكد والأكيد
باقية للروح..دمعتا..


أخيراً..
معليش إذا نجمك أفَل..وسط الشموس..الفي كل شارع..إتنين..بيندهو ..عتمتا.

Quote: قالوا لو هدفك سمى.. ووصلت لي نُص الطريق حد السماء.. أعرف كمان إنت في نص الطريق للهاوية.

يا ساتر
لماذا يا تماضر كل هذا التشاؤم
ما أضيق العيش لولا فسحة الأمل


هذا

مع كل إعجابي بالشاعرية المتقدة

عاطف ..صباحاتك خير..

لالا ده ماتشاؤم
الفقرة دي بالذات حقيقة

مودتي..

Quote: معليش إذا مِنّي الكلام ..طعمو..الأَمَر..مالِح..عنيد أصلو الحروف.. وده المؤكد والأكيد باقية للروح..دمعتا..

آمنت بالله خالق الانتشاء....

وآمنت بالحروف الباقية للروح غنا
شمعتها
وصوت انينها ولوعتها
آمنت يوم اشعلها
خلاها تقوم تانى من قبرها

قامت متربة ولابس شوق الحياة طرحتها
والحروف شموع ولعها...
وخيوط شربكة عذابها فتركها
وبقى ليها الجبريل والغنا
وبزر فيها الحروف جنا...


___________________________

بتجيبى الكلام ده من ووين ياخنساء؟

اشراقة
صباحاتك مشرقة زيك كده


الكلام أظنّو بجي من حاجة هبشتك شديد..أسي؟..زمان؟
تلقى روحك بتكتب عنها..بس

كل الحب

معليش
منو الهبش السلالم
شان تقيف بالإرتكاز
مين وتّــر اللحن البيخشك
ويمتحن فيك دهشتك
دون إنحياز
معليش ..
مزاجك منتحر
فى حروف كلامك وحرفتك

معليش لما الأمل يتحول ألم
والفرح يبقى حزن....

لكن الدنيا دوّارة

بكرة حيرجع الأمل
ويسلم الفرح....


كيفك تماضر
كل سنة وانت طيبة

Quote: معليش إذا مِنّي الكلام ..طعمو..الأَمَر..مالِح..عنيد أصلو الحروف.. وده المؤكد والأكيد باقية للروح..دمعتا..

تمام

يسعد صباحك ابو جهينة

بكرة تتحقق أماني

سلمى كل سنة وانت اجمل

محبتي

داش..

وكت اللون بيغرق في رسوماتك..يضيع..
وتبقى الصورة ..أوضح..
تطغى الفكرة..على التفاصيل,,العُزاز
بتأكّد..انا..من وصول المطرة حدّك..قبال أشوف فِعل الرذاذ.

Quote: معليش..إذا سهواً بِقع مِنّي الغُنى الأصبح ..كبائر.. وكت التلاعب..بالمصاير.. وشاتر زمن لحن الأمان كل الفواصل وبهجتا

مرحبتين صباح

أختي الجميلة تماضر
السلام عليكم ورحمة الله وبركاته

معليش..إذا سهواً بِقع مِنّي الغُنى
الأصبح ..كبائر..
وكت التلاعب..بالمصاير..
وشاتر زمن لحن الأمان كل الفواصل وبهجتا..


لما ألمس التشاؤم في قصيدتك الرائعة المملوءة بالشجن الأليم,,,
ربنا يملا حياتك فرح وتفاؤل وجمال بقدر روعتك

نها الحبيبة
ربنا يسعدك بقدر جمال روحك

كل الود

Quote: معليش إذا مِنّي الكلام ..طعمو..الأَمَر..مالِح..عنيد أصلو الحروف.. وده المؤكد والأكيد باقية للروح..دمعتا..

تمااضر..

و يبقى قلبك الملان حنية زاخر يالأمل..

يديك العاافية..

محمّد
تسلم على الطلة السمحة

كل الود

توما حبيبه
المرة دى كلامك كتر بتفرحينا الليله الحصل شنو
حبيبه تانى كل سنه وانتى طيبه ويارب كلو يكون تمام

مجودة ليكي وحشة شديدة

كل سنة وانتي احلى واجمل

دا كلام جديد !

يعني

ماشديد


سلامات حسام
عوافي
وازيك
وكيفنك

كيفك تماضر احلي سلام ليك انت فنانة بجد

مرحبتين زهير

شكرا على الطلة الحلوة

ألأخت/تماضر.......

لم نعهد منك هذه السوداوية فى ألأسلوب..

نرجع نقول معليش والمسامح كريم...

السماحة للقلب واحة..وأنتى قلبك كبير يضم ألف ألف واحة..

يارائعة..كونى زى ماكنتى أول...

ما تدى فرصة للحس والوجدان يتبدل..

إسماعيل محمد احمد عباس.........

رغم جودة السبك العااااالية
إلا أنك تحس بمرارةٍ فاقعة وأنت تقرأ هذا النص بهيج الترتيب والتركيب

ده نضم جميـــــــــــــل

فهل من مزيــــــــــــــــد

فوق

الأخت العزيزة.. تماضر

سلام على روحك الطيبة


"معليش " ، فما بين الاختيار واللااختيار دقّ أوتاد و ارتحالات ، قمة وقاع ، وثمة تسلق و غوص لا يخلوان أبدا من قلق واحتراق أو رجرجات هنا وهناك . لكن الدمع المتراقص في عينين ناعستين رغم كل شيء يبقى بوابة الروح الحالمة دوما بحرفٍ مأواه النور وصمت من يقين يضيء ما يرمم انكسارات السؤال ..
أرتكب خربشاتي ها هنا ، بين أناس معاناتهم لاتعد ولا تحصى حيث المخيلة الحالمة تسكن رمش العين ، يتقاطع فيها النص والصوت والصورة في زمنٍ افتراضي إلاّ أنه يقينا ما عاد افتراض ، نص جميل..جميل