ووقفت بين عينيك مسافة ..!

وإبتديت أحلم معاك
غفوه فى الزمن الرهق
نكسر متاريس الطريق
نرسم اللون الوصول
توب بيتوشَّح سماك
مابين تباريح الظلال...
ودفْ ألوان الشفق....
ساعة غروب المستحيل
سمَوهو..
بعض الناس أفول !


****

تقرا فى خاطرى السؤال
جوابو حيفاجئك جرح
تقدر تبدِّل لوعتو
ونهاية العشق السرح
لو بس لقيتك أوَّلو
كنا صادفنا الفرح
إنتَ الجمال بتكمِّلو
يابلبل الدوح الصدح


****

أوَّل كلامنا الشوق
وآخرو أضعاف أوَّلو
ماقلنا سمُّوك.. الفرح
ماصدفه يالأصلك حلو
لاجينا فاجأنا الحنين
وكتين عيونك إحملو
تشواقنا لى زولاً ولوف
قاصدين نحسو ونوصلو


****

لميت رياحين الكلام
قُت ليها قلبك فرِّشى
يبقى للزول البريدك
بيت أزاهر وأنعشى
أديو أريجك والمشاعر
أسقيو رحيقك وإنتشى


******

ووقفت بين عينيك مسافه
مرَّات إتعبنى الهيام
ومرَّات إودرنى المشى
لانى قادر أوصلك
لانى بقدر أبتعد
مكتول قليبى ومنتشى
إلا بس غالبنى ريدك
شاعلنى حد الإبتسام
سالب فؤادى وكل شئ


*****

دربين َمفرَّع إتجاهن
النهايه لى ذات الوشى
إن كان مشيت حد السعاده
جد بلاك ناقصنى شئ

الحبيبة تماضر

ما أجمل انت تكتحل اعيننا بحروف من نور ونحن نستقبل العيد

دائماً جميلة يا تماضر

كل عام وانتي اروع واجمل وابهى

لك عميق محبتي


همسة :-

نشوفك بهناك حاجزة المقعد جنب نبوعة

Quote: الحبيبة تماضر ما أجمل انت تكتحل اعيننا بحروف من نور ونحن نستقبل العيد دائماً جميلة يا تماضر كل عام وانتي اروع واجمل وابهى لك عميق محبتي همسة :- نشوفك بهناك حاجزة المقعد جنب نبوعة

نانا حديثك عن تماضر أروع وهي شاعرة كالشلال (ما شاء الله)!
ولكن هل تعلم تماضر أنك قريبتي جدا؟

تخريمة:
يا تماضر قصيدة أطربتني حتى الثمالة!

زمراوي ..
أنابرضو قريبتا جداً
شفتا الصدف دي ؟؟
أكيد إحنا قرايب

تسلم زمراوي على رقيق العبارات ..
أسعدني مرورك ..
كل سنة وأنت كما تشتهي ..
كل الود ..

قريبي العزيز جداً عبد الإله

كل سنة وانت والأسرة الجميلة بألف خير

وحقيقةً يا قريبي تماضر دي كاسرة فيني ضلعة

فهي تغزل قصائدها بخيوط من نور موشحة بأروع الزهور

ولا أقوى الا ان اهيم بما تكتب

لكما ودي عميق محبتي

نانا..
كل سنة وإنتي أسعد ..
ربما نلتقي قريباً...

نانا !!
وأنا أقول الخط ده ماغريب عليّ
كل سنة وإنتي جميلة كدا
ومقعدي معاكي مامعا نبوعة

دنيتنا ضيقة:

تسلموا وكل عام وانتم ونحن والوطن وكل من نحبهم بألف ألف خير!

ويا للمصادفات الجميلة!

كل عام وأنت كما تشتهي زمراوي ..
كل الود ..

الشفيفه تماضر
دائما تكحلين عيون البوست بحروفك الدافئة
مابين تباريح الظلال ودفء ألوان الشفق

كل يوم وأنت بألف بخير
تحياتي
نورالهادي

سلامات نور ..
عيد مبارك ..
شكراً لمضاعفة الفرح بمرورك العّذِب ..
تحياتي ومودتي..

كل عام وصباحك خير

تعود الأيام وأنت تماضر الخنساء حمزة

وأنت بصحة وعافية

تحياتى للأهل

رأفت

وتعود الأيام رأفت وأنت بهذا الجمال ..
أمنياتي بعام جديد أكثر سعادةً وإنجازاً ..
كُن بخير ..

يا خنساء سلامات وكل سنه وانت بالف خير

Quote: ووقفت بين عينيك مسافه مرَّات إتعبنى الهيام ومرَّات إودرنى المشى

ننتظر زمنا آت لا محالة تحكم فيه هذا الكون (الشاعرات) !
دون شك سوف يتحول الى حدائق مزهرة
وعدل ومحبة وتسامح.

سلامات تاج السر ..
كل سنة وإنت طيِّب..
شكراً على المداخلة العيدية ..
كل الود..

تماضر
كُلّ سنة وإنتي طيبة
وربّنا يحقّق أمنياتك

أنتِ إضافة خير حقيقيّة لهذه الدّار
لكِ التّحيّة والوُد





مودّتي

سلامات لؤي ..
شكراً على إحساسك الجميل ..
وعلى ماتنثره من نغمات ودوزنات على صفحات ذكرياتنا الدافئة ..
كل الود..

تماضر

كل عام وانت الرونق

شكرا جزيلا يا انيقة على حرفك الباهى الشجى

مموسقة تلك الكلمات ... بتشبهك يا تماضر

ادينا من عبقك رحيق ..

ومنتظرين نشوف الالق بين عيونا منك

سلامات الفاتح ..
شكراً على رقيق العبارات ..
كل سنة وإنتا طيب ..
كل الود..

جبت ليك السماح دة

من سقط لقط!!!!
ناس الشناة
مرقوهو في
بلاداً
اصلو ما معروفة
وين!

وجبتا ليك الريد ..مكاني..
تقدر تشيل خطاويك..المسافة ؟؟

كبي موية النيل علي الجمر الكواني
شيلي المشاوير البخـافة
زيدي دقات الدقـايق والثواني
خليك علي أحزاني آفـــــة
أجمل خبر و أجمل أماني
نلقـاكي في أخر المســافة!

توعدك عينيّ تجيكا..
وتقرا في جوّاي خرافة..
وقصة الزول المُفارق..
ماأتعبت شوقو المسافة..
ولهفة الريد المسافر..
بين دواخلك ..والرهافة..
كلمة الوعد المعلقة..
بين شواطينا ..وحافة..
ماميّل التحقيق..مظنة..
قدسيتو في لوح الشَرَافة..
لسه مختوت في ..محاية..
ماعِرف لونا ..المخافة..
بنبونة ..معطونة ..بمحبة..
عرجونة ..معجونة بظرافة.

Quote: ووقفت بين عينيك مسافه مرَّات إتعبنى الهيام ومرَّات إودرنى المشى لانى قادر أوصلك لانى بقدر أبتعد مكتول قليبى ومنتشى إلا بس غالبنى ريدك شاغلنى حد الإبتسام سالب فؤادى وكل شئ

سالب فؤداى وما عليك
انا لىّ روح مفتونه بيك
لا ادرى كم من الاغانى ذكرتنى
هذه القصيدة
ولسه بيناتنا المسافة
وتباريح الهوى
وكانك اختزلت جميع مشاعر الاغانى
فى واحدة
كم انت مدهشة ايتها العزيزة تماضر الخنساء
سلمت وسلمت حروفك
ضياء

الأخت / تماضر الخنساء

تحياتي

اعجبتني الحتة دي

وقصة الزول المُفارق..
ماأتعبت شوقو المسافة..
ولهفة الريد المسافر..
بين دواخلك ..والرهافة..
كلمة الوعد المعلقة..
بين شواطينا ..وحافة..
ماميّل التحقيق..مظنة..
قدسيتو في لوح الشَرَافة..
لسه مختوت في ..محاية..
ماعِرف لونا ..المخافة..
بنبونة ..معطونة ..بمحبة..

انت شاعرة متمكنة جدا جدا واصلة لقدام

سلامات ..شكراً على مرورك العَطِر ..
سلِم إحساسك الجميل..

سلامات ضياء ..
حبك للناس ..خلاني ..أحبك تاني..

العزيزة تماضر الخنساء حمزة

طالعت هذا النص مطالعة سريعة بقصد الإستمتاع . أؤكد انني سعدت كثيرا بالقصيدة. ولي ملاحظات انطباعية يمكنك ألا تأخذيها محمل الجد..الخصها سريعا في الآتي:

* أول ما لفت انتباهي سلامة أوزان شعرك وأناقة اللغة دون تكلف. فالعامية لغة الشعب ، وأداة تخاطبنا اليومي. وأي محاولة لتضييق أو تحوير ماعون التخاطب والخروج به عن المألوف لن يصيب الهدف. وأنت أحسنت انتقاء المفردة وصياغة الجملة بطريقة مبسطة لكنها استوعبت مضامين الكلام بصورة جميلة. أعجبني من قولك صياغة فيها شيء جديد مثل:

Quote: نكسر متاريس الطريق نرسم اللون الوصول توب بيتوشَّح سماك مابين تباريح الظلال... ودفْ ألوان الشفق.... ساعة غروب المستحيل

أو أن تقولي في موضع آخر:

Quote: لميت رياحين الكلام قُت ليها قلبك فرِّشى

والصورة الأجمل كانت في الختام:

Quote: إن كان مشيت حد السعادة جد بلاك فاقدني شي

تلك كلها صور جميلة وتوليف العبارة فيها جاء بعيدا عن التكلف والقسر.

لكن لم تخل قصيدتك الجميلة في نظري من خدوش طفيفة أرجو التنبه لها. من ذلك إقحام مفردات قليلة أحسست أنها "ضرستني". وتخيلت هذا النص الجميل في يد ملحن بارع..لا ..بل ذهب خيالي أبعد من ذلك .. صورة لحفل والفنان ذي الصوت العذب يغني كلامك الجميل على الجمهور ، فيردد:

Quote: وإبتديت أحلم معاك غفوه فى الزمن الرهق

فالرهق نابية .. بل فصيحة قح وسط دارجة سودانية غاية في الفصاحة. كذلك نفرت من عبارة:

Quote: جوابو حيفاجئك جرح

فهي أشبه بالكلام العادي بين إثنيت (بتونسو)..والشعر - حتى وإن جاء في لغة مبسطة لكنه بكل صوره الجميلة ومضامينه الراقية ليس "ونسة" ..إنه أرقى من مجرد دردشة عابرين.

أختم بتأكيد فرحي بقصيدتك.. أعجبتني بحق. واصلي الكتابة وراجعي كل ما تكتبين. كوني الناقد لعملك قبل الآخرين.

أكيد محبتي وتقديري.

سلامات ..
أسعدني مرورك ..وأسعدتني أكثر ملاحظاتك..
أنا حقيقي عندي مشكلة إني بكتب الحاجة وبنزلا من دون تنقيح..وبرضك ماعندي معرفة كبيرة ببحور الشعر ..ولو إني بحس إني مع كل نص جديد كتابتي بتتحسن ..ولامن ألقى من هو بقامتك وينبهني لأشياء قد تخل بالمعنى أو الوزن فده شئ يسعدني ويساعدني كثيراً ..
لسه بقرا فيها ..بي إحساسي بيها زايد ملاحظاتك ..أحبها تكون خالية من الخدوش ..

شكراً على إهتمامك..أرتقي حتماً بمرورك..

Quote: أختم بتأكيد فرحي بقصيدتك.. أعجبتني بحق. واصلي الكتابة وراجعي كل ما تكتبين. كوني الناقد لعملك قبل الآخرين.

الاستاذ فضيلي .. لا اعرف كثيرا في تنمييق الكلمات واعشق تواصل يتجاوز المحسنات البديعية فيكون "سلك" بين القلب والقلب... عنوان لقصيدة لها شد انتباهي فنظرت ووجدت كلاما سلك السلك الي قلبي فتمترست هناك اراقب ما تاتي به .. فعجمة في لساني وكل من يتحدث بغيرها تجد في كلام جميل سلس كالذي تكتبه تماضر راحة فليس هنالك بحث عن قواميس وتشكييل ...انها تترجم حديث القلوب ...وحديث القلوب لا يخلو من خربشات ووجود نطاس بارع رقيق مثلك يداوي الخربشات جميل لا ننساه لك ...قامات مثلك ونسمة كتماضر تجعل لوجودنا معكم في عالم واحد القا وبهرجة ...

لكما مودتي
ابوبكر سيد احمد

أبوبكر ياجميل الروح..
شكراً لأنك ..قريب..

Quote: أبوبكر ياجميل الروح.. شكراً لأنك ..قريب..

"نحن ساكنين سكنة"
من القلب الى القلب
كلماتك صفاء الروح وبقاء الأمل
لأبو بكر فى قلب الصحراء المكيفة
وأنا فى وسط الجليد المدفأ

وتجعلين الغربة أكثر قربة
ويعود للشيب الشباب

ملا حظات الأستاذ سرتنى وجوده يعنى الجودة فإلى الأمام

ودى

رأفت

ووقفت بين عينيك مسافه
مرَّات إتعبنى الهيام
ومرَّات إودرنى المشى
لانى قادر أوصلك
لانى بقدر أبتعد
مكتول قليبى ومنتشى
إلا بس غالبنى ريدك
شاعلنى حد الإبتسام
سالب فؤادى وكل شئ

كلمات مشحونة بالشجن والوجانيات.. فيا لله!!

أختي العزيزة تماضر .. أنت شاعرة ممزوجة بالذوق الرفيع ، معجونة بروح الفن والشعر ، أنت شاعرة لا ملء أهدابك فقط بل أنت ملء الأبعاد.. أنتِ بنت الحياة فقد أثبتِ وجودك في دنيا الكلمة النغم .. كلمة مكسوة بالجمال، نتذوق رحيقها ونشتم ضوعها الجذاب وتعلوها بسمة رقيقة.. الشعر الجميل جزء من الحياة والوجدان

سلامات أبوبكر ..أجدني دائماً في حيرة أبحث عن ردود مناسبة ..تختلف عن _شكراً_ تعوَّدت ردودنا عليها..
تخونني العبارات غالباً..

كُن بخير..

سلامات رأفت ..
ربي يدفي غربتك ويردك لي بلدك وأنت بما_وكما_تشتهي..
طلتك تدي القرب معاني أجمل ..
أبقى عافية..

الصديق أبوبكر سيد احمد

شكرا على خطابك المترع بالأدب والتواضع الجم. كلنا يا أخي الحبيب نتعلم في هذا المنبر..نأخذ ونعطي. والكتابة نفسها مران لا ينتهي. شكرا لك وشكرا للشاعرة تماضر الخنساء التي هيأت لنا فرصة التواصل.

شكراً لأنك ..هنا..

ووقفت بين عينيك مسافة ..!
تماضر هذا تواضع
فأنت تختزلين أيما مسافة
ومنزلتك البياض من السواد
وينال الرمش منك جفو إبتعاد
ولاأزيد ففي حضورك يمتنع الكلام

أكيد إنبهار
كثير مودة
إمتثال الطوع
والطوع إرتهان

نورالهادي

دائماً تحفني بما يجعلني أتوه بين كلماتي ..
شكراً لأنك هنا..

Quote: لأبو بكر فى قلب الصحراء المكيفة

اها في دي كمان ؟.. كان مكيفة ليه جوتة ظهر عندكم وهنا تابط شرا ؟
بعديين كيف انا ببني بنايات .. بالرموت كونترول ؟
انا ما عندي الراين هنا وفلهارموني ولا اي لوصت ماي هارت ان هايدلبيرج ؟؟

up

be right back

يا تماضر يابتي المسافة طولت .. ما شايفة صحبي الجالس "جلسة ملوكي " منتظر وانا منتظر كلامك البعدو الكلام بيقيف ....
في الانتظار

ماأنا رديت وهو السواها ليّ بي رايت باك وزاغ
شفتا كيف ؟؟

من عندك يبتدئ الصباح

تسلم ..نور..

ووقفت بين عينيك مسافة
قلت أبعد
من ديارك
قالوا لي حلمك خرافة

أوعاكا من قول العوازل ..
أو تقول الريد..خرافة..
إحنا بشقينا البعاد..
وجد بتتعبنا المسافة..
يا..تشيل الشوق ..تجينا..
أو نجيكا بدون..مخافة
أصلو باين ديمة ريدنا..
ماهو من أفعال ..بخافا..
زي عيون النور تشوفو
موية ..تحضن في ضفافا
برضو أخدر من زرعنا
جاي تعلن يوم جفافا ؟؟