سلامات...!!

نادانى صاحبى
طلب منى إنتفاضه..
كيف نصمت ..
قد سرقوا كل شئٍ
ثم باعوا حلمنا
وتاجر بعضنا
بماتبقى من ..
بضاعه !!
إنهم أس الفسادِ
وكل مننتقصٍ..مُعاد
إخترعوا لنا
إسم الوضاعه !
خرجتُ ..أهتف خلفه ..
ثم كان السجن
كالعاده المصير
لم أجده..
يالهف قلبى ..إنه ليس أسير
سألت الشرطى جزعاً:
هل قتلتم صاحبى ؟؟
قد كان يهتف جانبى !
علَّمنى كيف أسمو بالقضيه
كان الرد..
ضربةَ بندقيه
ودرساً فى مهاراتِ الأيادى
وتهديدا بالتأدب
حين أذكر إسم
من يرأس بلادى !

سلامات ..
أتمنَّى أن أفيد وأستفيد
رمضان كريم..
مازلتُ أتحسس خطاى بينكم ..
تحياتى للجميع .

سأكون اول المرحبين بك

اسمك جميل يا جميل

الف مرحب

تسلمى تماضر على حفاوة الترحيب ..
عيونك الحلوه

الأخت / تماضر الخنساء حمزه رمضان كريم



ملايين مراحب شرفتي الدار حتماً ستكونين إضافة حقيقية للمنبر..

Quote: الأخت / تماضر الخنساء حمزه رمضان كريم ملايين مراحب شرفتي الدار حتماً ستكونين إضافة حقيقية للمنبر..

أسعدنى مرورك العَطِر ..
تحيات تأخذ روعتها منك .

Quote: أتمنَّى أن أفيد وأستفيد رمضان كريم.. مازلتُ أتحسس خطاى بينكم ..

مرحبا ربما نجد نحن مواقع لخطانا فيما تقوليين فكلنا اجيال تتحسس الخطي

Quote: علَّمنى كيف أسمو بالقضيه

تماضر بنتنا الجميلة

مرحب بيك ومنورة

شكرا لنا بك وبحضورك الجميل وكلماتك الرائعة

سننتظرك كل يوم هنا

فلا تبخلي بالحضور

فارسمي قصيدتك على جسد الوطن وتمددي حنين

شكرا لنصك الرائع وتسلمي

عبدالله

Quote: يالهف قلبى ..إنه ليس أسير سألت الشرطى جزعاً: هل قتلتم صاحبى ؟؟ قد كان يهتف جانبى ! علَّمنى كيف أسمو بالقضيه كان الرد.. ضربةَ بندقيه

يا سلام يا خناس
الف مرحب بيك
وانت تدخلين بهذه القوة..
جميلة جدا قصيدتك
ورمضان كريم

Quote: مرحبا ربما نجد نحن مواقع لخطانا فيما تقوليين فكلنا اجيال نتحسس الخطا

شكراً تساب على الترحيب..
كلى ثقه أن الجميع يمكنه تشارك الكلمه إن صدقت..
تحياتى سيِّدى .

Quote: قد سرقوا كل شئٍ ثم باعوا حلمنا وتاجر بعضنا بماتبقى من .. بضاعه !!

يا مراحب..


ضربة موفقة..

لاجيال الكتابة القادمة..

منعم ابراهيم

Quote: تماضر بنتنا الجميلة مرحب بيك ومنورة شكرا لنا بك وبحضورك الجميل وكلماتك الرائعة سننتظرك كل يوم هنا فلا تبخلي بالحضور فارسمي قصيدتك على جسد الوطن وتمددي حنين شكرا لنصك الرائع وتسلمي عبدالله

شوقى ..
تقديرى لك بلا حدود..

Quote: يا سلام يا خناس الف مرحب بيك وانت تدخلين بهذه القوة.. جميلة جدا قصيدتك ورمضان كريم

سلامات بيان..
أسعدنى ترحيبك
ورقيق عباراتك
تحياتى لكِ ..
الله أكرم .

مرحب بالاخت تماضر الخنساء حمزه

الكلمات جميله

والبدايه قويه

اتمنى ان تواصلى بنفس الروح

كل التوفيق ... وسلامات

عوض حمزة

Quote: يا مراحب.. ضربة موفقة.. لاجيال الكتابة القادمة.. منعم ابراهيم

سلامات منعم..
شكراً للمرور العطر
تحياتى .

مرحب تماضر

منوره البورد

Quote: نادانى صاحبى طلب منى إنتفاضه..

اعجبتنى هذه الافتتاحية جدآ. وظننت الرد يكون (اسفة والله. انا لا انتفض!).
مرحب بك يا تماضر الخنساء.

Quote: مرحب بالاخت تماضر الخنساء حمزه الكلمات جميله والبدايه قويه اتمنى ان تواصلى بنفس الروح كل التوفيق ... وسلامات عوض حمزة

لترحيبك طعم الإلفه..
شكراً على دعمك الجميل
تحياتى .

يا هلا ومرحبا بك تماضر


ونسأل الله أن يكون مقدمك ميمونا على البورد وتحسسي خطاك بحذر


فالمنبر ملئ بكل ألوان الطيف السياسي والاجتماعي الذين


يمكن أن ترينهم في الشارع السوداني !!!!!!!!!!

Quote: مرحب تماضر منوره البورد

ياهلا بيك
منوِّر بوجودكم
تحياتى .

Quote: اعجبتنى هذه الافتتاحية جدآ. وظننت الرد يكون (اسفة والله. انا لا انتفض!). مرحب بك يا تماضر الخنساء.

سلامات ..
تأتى أحياناً هكذا ردود..
فتنتهى القصه بسطرى المناداة والأسف !
لن أتأسف لأنَّ الرد خيَّب ظنَّك ..
فأملى كبير بقصص تآلف طويله ..ونهايات ..أجمل
تحياتى ومودتى .

Quote: سألت الشرطى جزعاً: هل قتلتم صاحبى ؟؟ قد كان يهتف جانبى ! علَّمنى كيف أسمو بالقضيه كان الرد.. ضربةَ بندقيه ودرساً فى مهاراتِ الأيادى وتهديدا بالتأدب حين أذكر إسم من يرأس بلادى !

رغم الأسى يبقى الأمل بكم ولكم

مرحب بدرة بلادى ولا تبقى خنسـائه بل صانعته

لك الود كله


رأفت ميلاد

Quote: يا هلا ومرحبا بك تماضر ونسأل الله أن يكون مقدمك ميمونا على البورد وتحسسي خطاك بحذر فالمنبر ملئ بكل ألوان الطيف السياسي والاجتماعي الذين يمكن أن ترينهم في الشارع السوداني !!!!!!!!!!

سلامات ..
شكراً على النصيحه الغاليه ..
جئتُ ..لأشارك فى لوحة تلاقى وساحة إبداع ..
إن لم أستطع أن أفيد ..تأكَّد لن أزرع شوكاً
شكراً مره أخرى ..
تحيات وطن مُعافى .

Quote: رغم الأسى يبقى الأمل بكم ولكم مرحب بدرة بلادى ولا تبقى خنسـائه بل صانعته لك الود كله رأفت ميلاد

سلامات رأفت
شكراً على عطر الترحيب
لك من الودِ أصفاه ..
تحياتى .

مرحـب تماضر وشكرا علي القدوم الجميل..

مني

شفتَ بذرات الأمل
ترحل تهاجر أرضها
مشتوله بين هجره
وعذاب
مقلوعه من جوفنا
إغتراب
محنى طولها ومنكسر
رغم إنو مصيون ..عرضها !
هاجرتَ..
لاك مغصوب تعود
لاك راتى ياريدى الوراك
إلا الحنين واقف معاك
أرجع تعال ..
سقينا شتلات العشم
يمكن حصادنا من العدم
يملا أشواق الصوامع
ريدنا يتفتَّق سنابل
زرعاً حلال
حدو ملصوق بالسما
وجذرو ثابت بالرضا
مكسى هيبه
ولون جلال
ألياف حريره
ثمار هلال

Quote: مرحـب تماضر وشكرا علي القدوم الجميل.. مني

شكراً على المرور الأجمل منى
تحياتى ومودتى .

العزيزة الخنساء

مرحب بك
مدخل مفرح يوحي بمزيد من الجمال

Quote: العزيزة الخنساء مرحب بك مدخل مفرح يوحي بمزيد من الجمال

مرحبا نصَّار
شكراً تساب على مرورك الكريم

نور الكلمات و نور الطلة.

والعيون النوركم يجهرا..


وحبابك ومرحبا..

أقـرانـى مـنـك وأبـتـديـك
صفـحـه مليـانـه بـكـلام
فرحانـه فيـك كـل الحـروف
متماسكـه بـى كـل إنسـجـام
متراقصـه زى مـوج البـحـر
متناغمـه زى نـغـم الخـتـام
أقـرانـى مـنـك وأنتهـيـك
قـصـه محبـوكـه بـوئــام
قـصـه مابتـعـرف نهـايـه
أبطالـهـا زى بــدر التـمـام
أقـرانـى مـنـك وأرتضـيـك
رفـقـه تديـنـى الـســلام
أقرانـى منـك وبيـك بـكـون
ببقـى فيـك شبـهـك تـمـام
تلقانـى فيـك عينـك بـصـر
تهدينـى بيـك لمسـة هـيـام
أقـرانـى مـنـك وإبـتــدئ
أعشـق معـاى كــل الأنــام
وأحضـن معـاى حُلـم اللقـاء
غتـيـنـى بـى حـبــك دوام
أقرانـى منـك وتـوه كـمـان
جوايـا وإستعصـى الـمـروق
أقرانـى فـى كـل الخـواطـر
اللامعـه زى ضـو الـبـروق
تلقانـى فيـك ساكنـه الأنــا
مبديـه زى لحـظـة شــروق
أقرانـى بـى صـوتـك نـغـم
وأسمعنـى بـى حسـك تـروق
ألقانـى فيـك شهقـة فــرح
بنبـض معـاك جـوه العـروق
أقـرانـى ياسـيـد الـمُـنـى
أملكنـى ياصاحـب الحـقـوق
أقرانـى فـى كـل الـحـروف
شوفنـى غيـر كـل الخـلـوق

أقرانى بوضوح حتى فـطلاسم
مكبوتـه فـى الجـوف الدفيـن
وحـرر معـاى كـل الأمـانـى
المطبولـه زى مذنـب سجيـن
أمــلأ دنـيـاى بـالـوثـوق
وأطرد معـاى شكـى الضنيـن
أقرانـى ماتنسـى الفـواصـل
الجوَّاهـا ضيعـنـا السنـيـن
أقرانـى ماتنـهـى الفـصـول
بى جفـوه بـى لحظـات أنيـن
أقرانـى مـع شـاى الصبـاح
أقرانـى ساعـة النـوم يحيـن
أسمعنى زى جـرس المـدارس
قدسنـى زى قـسـم اليمـيـن
أنسـانـى جــواك بالـدهـور
أرسمنـى فـى لوحـة السنيـن
أقرانـى بـى صـوت الكنـارى
أعزفنـى بـى لحـن الحنـيـن
أقرانـى فـى كــل المـلامـح
كبّـر معـاى أملـى الجنـيـن
أقـرانـى مـنـك وإعـتـلـى
قمـم الولـه وأنبـض حـنـان
أقـــرأ جـوايــا الأمـــل
شوفنـى زى حـور الجـنـان
أنـسـى أحـزانـك مـعــاى
نسينـى كـل الجـاى وكــان
أقرانـى بـى رقـه وسـكـون
أكسـب معـاى جـن الرهـان
أقرانـى مـن قـبـل البـدايـه
أنهينـى جـواك فـى الكـيـان
أقرانـى بـى قامـوس محنـه
إتصفحنى بـى رحمـه وبيـان
أقرانـى منـك وأشهـد علـى
بحبـك أنـا وبحسـك أمــان
قـرانـى مـنـك زى نشـيـد
فرحانـه فيـو كـل القـوافـى
رسينـى فـى جـواك بـكـون
سفـن بتحضـن فـى المرافـى
ذيعنـى فـى دنـيـاك عـلـن
أكشـف المجـهـول وخـافـى
أقـرانـى مـنـك وإرتـحــل
جوايـا بـس ماتبقـى جـافـى
قربـنـى مـنــك وإبـتـعـد
فينـى فــى بـعـد المنـافـى
أقرانـى منـك وعيـش معـاى
فى عش جميـل ناضـر ودافـى
أقرانـى منـك وفيـض كمـان
خضـر معـاى كـل الفيـافـى
أقرانى منـك وفسـر حروفـى
بـى شـرح واضـح ووافــى
أقرانـى منـك وأحلـم مـعـاى
نتلمـه فـى أجـمـل وطــن
أمسحنـى بـى كـف الــوداد
وأزرعنـى فـى عُمـق الزمـن
أبعدنـى مــن دنـيـا الألــم
وأرحمنـى مـن ولـه الشجـن
أقرانـى منـك بــس بــراك
بـى فرحـه نسينـى المـحـن
أقرانـى منـك فيكـا تهـطـل
أمطـارى مـن أكـرم مُــزن
أقرانـى منـك وأفـرد مـعـاى
كــل صـبـاحـات الـسـنـا
أقـرانـى ياحـسـى الجمـيـل
وردد هـواك بـعـد الـصـدى
أقرانـى فـى ساعـة الشـروق
نورنـى فـى ساعـة المـسـا
رافقنـى فـى كـل الــدروب
لازمنـى زى أم لــى جـنـى
غيبنـى فـى جـواك حضـور
أفــرد شـراعـات الـمـدى
أرضانـى فـى نفسـك قناعـه
أجعلنـى ليـك أجمـل قـضـاء
أقـرانـى مـنـك وإكـتـفـى
منـى بــى لمـحـة ضـيـاء
أقـرانـى مـنـك وإنـــزرع
جـوايـا ياشـتـل الـمُـنـى
ماتقـرأ أحـرف لـى ســواى
أقرانـى بــس إنـتـا وأنــا
أقـرانـى مـنـك وإرتـحــل
جـوايـا مــع أول صـبـاح
أسكنـى زى نبضـى وتـمـام
إتوسدنـى بـى كـل إرتـيـاح
أحملنـى فـى دنيـا الخـيـال
أبقالـى زى طيـر بـى جنـاح
أقرانـى منـك وفيـك ولـيـك
فـى حبـى ناضـل بـى كفـاح
حـرك أوراقــى وغـصـون
رقصنـى بـى أجمـل ريــاح
أقرانـى منـك وأكتـب معـاى
فصـول مـن القـول المـبـاح
أقـرا جـواى اجمـل معـانـى
وأبلـغ أوصـاف فـى هــواك
أعــزف أوتــارى وكـمـان
جايـه الأزاهـر تـعـزف وراك
أقرانـى منـك وفيـك بضـيـع
بلقى جواك هُـدى مـن ضيـاك
أجمعنـى بيـك قبـل الـفـوات
أرفعنـى فـوق لـى سـمـاك
أحرقنـى بـى وهجـك بعيـش
مضيئـه بـى أنـوار سـنـاك
أقرانـى منـك ومكتوبـه فيـك
تلقـانـى فرحـانـه بـرضـاك
أقرانـى منـك وأنسـى بــى
كــل حكـايـات الـضـيـاع
أوجدنـى فـى جـواك محـنـه
أنهيـهـا لحـظـات الــوداع
أقرانـى مـن كفـك خـطـوط
حروفـا لـى حضنـك جـيـاع
أقرانـى بـى صوتـاً جـهـور
حبـى ليـك ماأصلـو شــاع
أقـرانـى مـنــك بـالـوفـا
صاينـى قلبـك ماظنيتـو بـاع

أقرانـى منـك وفيـك بهـيـم
روحـى لـى روحـك تـلاقـى
أقــرا جـوايــا الـفــرح
وعـمِّـر أيـامـى البـواقـى
أقرانـى فـى النـوم والصحـو
أغسلنـى بـى دمـع المـاقـى
أقرانـى منـك وفيـه فـيـض
أروينـى يامـويـة السـواقـى
ألقانـى بــى فـرحـة لُـقـا
ممهـوره بـى لحظـة عـنـاق
أقرانـى بـى مهلـه وأقـيـف
عـنـى ماتخـشـى إفـتـراق
أقـرانـى مـنـك وإتـوســد
معاى كـل سحابـات الخريـف
وقـف معـاى ظلـم الـزمـن
أنهـى الصراعـات والنـزيـف
أوجدنـا فـى الزمـن السـلام
ضيِّـع معـاى زمنـى المخيـف
أقــرا جـــواى الأمـــل
أحلـم معـاى حلمـى الرهيـف
أقـرا أطفـال فــى عيـونـى
محرومه من بيت مـن رغيـف
أديهـا مـن حضنـك بـيـوت
أديهـا مــن زادك وأقـيـف
أرسـم الفرحـه فـى عيونهـم
زِّود امـالـهـم وضــيــف
أقرانـى منـك مــن وطــن
ضايـع بفتـش فـى الحضـور
أولادو شهـداء فـى سبيـلـو
وأمـات بتحضـن فـى القبـور
حكامـو فـى دمــو غـراقـى
وإيدين بتقبـض فـى الإجـور
أقرانـى مـن زغـروده طالعـه
مـن قليـب مليـان ســرور
شوفنـى فـى كـل المشـاهـد
أقرانـى علـى مـر الـدهـور
شوفنى فى الفـارس البحـارب
أقرانـى فـى محبـوب غيـور
أقـرانـى مـنـك يـاوطــن
ممـدوده فيـو منـى الجـذور

أقرانـى إستقـرار فـى قليـب
ساكنـه فيـو مابيـه الرحـول
أقرانـى فـى ثقتـك أســاس
بجـرجـر الـشـك الـذيـول
إتلقـانـى عـلـى زرعـــك
بطـول بنسـى أيـام الـذبـول
ثبتنـى فـى أفـقـك سـحـاب
يتـعـب المـطـر الـهـطـول
أقرانـى منـك مــن كـتـاب
فيـهـو تتـراقـص فـصـول
أقرانـى فـى ريـلاً جــزوع
ليـهـا تتسـابـق خـيــول
أقرانـى زى وطـنـاً مُـحـرر
وإنـتـا فــى راس الفُـلـول
أقرانـى فـى قـمـراً مُـضـئ
فـى صباحـو مابطـرا الأفـول
أقرانى فـى شمـس الضهيـره
كان جا الغروب تابـى الميـول

أقرانـى فـى الزمـن الجميـل
أقرانـى فـى شيـب الشيـوخ
فـى وشيـش حبوبـه باسمـه
فيـهـو تتـراقـص شـلـوخ
أزرعنـى فـى طـيـن الأرض
أدفنـى فـى جـوه الـشـروخ
سكنـى فـى الوطـن الـسـلام
علينـى فـى وطـن الشمـوخ
سـكـت أصــوات البـنـادق
كـسـر القـنـا والـسـيـوخ
أقرانـى بـى همسـك بــدوب
وبـى عطـر نفسـك بــدوخ
أقـرا جـواى كـل الشـهـور
ومـجـد إكـتـوبـر تـعــال
ذكرنـى بالقـرشـى ورفـاقـو
الدمهـم مـن بــدرى ســال
سـطـر الـحـريـه لـونــو
وصــرخ يـابـلادى قـــال
حقـق أحلامهـم فـى بـلـدى
أطــرد الـوهـم الـضــلال
أقرانـى مـن واقـع حقيـقـه
أشـطـب الكـذبـه الـخـيـال
إستسهـل المـوت الصعـيـب
كـسـر أســوار الـمـحـال
أهتفنـى بـى صوتـك ورسـخ
فيـنـى شـهـداء كالـجـبـال
مارضـوهـا للبـلـد المـذلـه
نبضهـم مـن روحهـا شــال
جــــدد الــذكــرى وردد
بـلـدى يـابـلـد الـنـضـال
إكتوبـر يـا كــل الشـهـور
القـرشـى يافـخـر الـرجـال
أقرانـى فـى جنحـات طيـور
ريشاتـا تعبـت مـن رحـيـل
أقرانـى فـى شمـس الصبـاح
ونسنـى فـى ضـل المقـيـل
أبـدانـى مــن أول حــرف
للنهـايـه ماتلـقـى السبـيـل
أقرانـى فـى تعـب الغـلابـه
أرسمـنـى للرحـمـه دلـيـل
أرفعنـى بـى إيــدك عـلـم
أغرزنـى بيـن قيفـك ونـيـل
أقرانـى منـك ومــن بــلاد
صباحـا هــازم كــل لـيـل
أقرانـى منـك مـن حــروف
منسوجه مـن وهـج الشمـوس
أنشرنـى فـى روحـك سـلام
نقيـهـا أوســاخ النـفـوس
أقرانـى فـى جرتـق ولـمـه
وزغروده فـى بيـت العـروس
أطبعنـى فـى ورق الحقيـقـه
رسخنـى فـى لُـب الـرؤوس
ذودنـى بـى ثقـتـك ســلاح
أدينـى مـن طهـرك تـروس
أقرانـى مـن حـيـرة يتـيـم
عيونـو لـى أمـو بتـكـوس
أقرانى منـك حتـى فـرياضـه
أجعلنـى فيـك لاعـب أساسـى
أنـقـد ارائـــى وحـــاور
حللنـى يـا أعظـم سيـاسـى
أشرحنـى فـى قلبـك مـسـره
بــدل الـزمـن الـمـاسـى
أحكمنـى بـى رحمـه ومـوده
أملكنـى يـا أجمـل رئـاسـى
مابتضـيـق دنيـاكـا بـــى
مظبوطه بى حجمـى ومقاسـى
أقرانـى فـى كـل الشـواهـد
أدينـى مـن وهجـك قـبـس
إنــوّر أحـلامـى القـبـيـل
تضـوّى فـى ليلـى الشمـس
تدلـى مـن سقفـى النـجـوم
تبقـى لـى دربــك أســس
تـدى لــى دنـيـاك حنيـنـا
يـبـدا جـوانــا الـغــرس

الشاعرة الجميلة والاصبلة تماضر الف مرحب بيك

وقريت تفاصيل الكلام

وميزان حروفها المنتشي

فيهن معاناتك هيام

وخطاها هدّاها المشي

ليل السهد وجمر الغرام

سهّر نجيمات العشي

والكون ودر بين الزحام

طافشات عيونو من الوشي



مرحبا بك مرّة اخري

وشكرا لهذا الاندياح

Quote: أقرانـى منـك وفيـك بهـيـم روحـى لـى روحـك تـلاقـى أقــرا جـوايــا الـفــرح وعـمِّـر أيـامـى البـواقـى أقرانـى فـى النـوم والصحـو أغسلنـى بـى دمـع المـاقـى

تماضر الخنساء..

اسم جميل وحروف اجمل..

دمتي ومرحب بيك يا تماضر..

الأخت العزيزه / تماضر الخنساء
الف مرحب بيك بين اهلك وناسك
حبابك عشرة
وإلى الملتقى

اهلا وسهلا بيك
اشاءالله يطيب بيك المقام

Quote: نور الكلمات و نور الطلة. والعيون النوركم يجهرا.. وحبابك ومرحبا..

النور غمرنا بى جيتك
تسلم كتير .

Quote: الشاعرة الجميلة والاصبلة تماضر الف مرحب بيك

شكراً على حفاوة ترحيبك
تحياتى ومودتى .

Quote: وقريت تفاصيل الكلام وميزان حروفها المنتشي فيهن معاناتك هيام وخطاها هدّاها المشي ليل السهد وجمر الغرام سهّر نجيمات العشي والكون ودر بين الزحام طافشات عيونو من الوشي

ووقفت بين عينيك مسافه
مرَّات إتعبنى الهيام
ومرَّات إودرنى المشى
لانى قادر أوصلك
لانى بقدر أبتعد
مكتول قليبى ومنتشى
إلا بس غالبنى ريدك
شاعلنى حد الإبتسام
سالب فؤادى وكل شئ

Quote: الأخت العزيزه / تماضر الخنساء الف مرحب بيك بين اهلك وناسك حبابك عشرة وإلى الملتقى

شكراً لمرورك الكريم
ورقيق ترحيبك
تحياتى ومودتى .

Quote: اهلا وسهلا بيك اشاءالله يطيب بيك المقام

تسلم كتير
وجودكم يعطى المكان أريحيته..
تحياتى .

تماضر
اهلا بيك يازوله ياكتابه قدر ما تقدري اكتبي ونزلي
ابقي عافيه

Quote: أقـرانـى مـنـك وإبـتــدئ أعشـق معـاى كــل الأنــام وأحضـن معـاى حُلـم اللقـاء غتـيـنـى بـى حـبــك دوام

و

Quote: مازلتُ أتحسس خطاى بينكم ..

عجبي..
يا بنتي/اختي الا تسمعيين ضجيج من لا يعلم من الذين يرصون الحرف كالطوب بلا روح وانت حرفك روح..!

مودتي
ابوبكر

Quote: تماضر اهلا بيك يازوله ياكتابه قدر ما تقدري اكتبي ونزلي ابقي عافيه

كلماتك تُعطى شعور العافيه ..
تحياتى .

Quote: ووقفت بين عينيك مسافه مرَّات إتعبنى الهيام ومرَّات إودرنى المشى لانى قادر أوصلك لانى بقدر أبتعد مكتول قليبى ومنتشى إلا بس غالبنى ريدك شاعلنى حد الإبتسام سالب فؤادى وكل شئ

يسلم قليب الزول سلام

كاتم مشاعرو وما بيشي

Quote: تماضر الخنساء.. اسم جميل وحروف اجمل.. دمتي ومرحب بيك يا تماضر..

ياهلا رشا
تسلمى على العبارات الحلوه
تحياتى .

Quote: عجبي.. يا بنتي/اختي الا تسمعيين ضجيج من لا يعلم من الذين يرصون الحرف كالطوب بلا روح وانت حرفك روح..! مودتي ابوبكر

سلامات ..
شكراً على الإحساس الذى سكن الأحرف فوصلك
شكراً تساب
تحياتى .

Quote: أقرانـى فـى كـل الخـواطـر اللامعـه زى ضـو الـبـروق تلقانـى فيـك ساكنـه الأنــا مبديـه زى لحـظـة شــروق أقرانـى بـى صـوتـك نـغـم وأسمعنـى بـى حسـك تـروق ألقانـى فيـك شهقـة فــرح بنبـض معـاك جـوه العـروق

بقراك في سر النجوم

في عتمة الليل السرح

بين اندهاشات الغيوم
شرحت معاني الكون فرح

فشّت سهاريج السموم
وسر الخواطر انجرح

Quote: يسلم قليب الزول سلام كاتم مشاعرو وما بيشي

يافرحه ممزوجه بأمل
بالله يأسك طنشى
وشيلى ريدك بوحى بيهو
ياخى أوعك تختشى
أحكى للزول البريدك
عن مشاعرك فتشى
أبديهو أوَّل صارحيهو
بالهمسه برضك حرِّشى
وغيبى عنُّو فى عيونو
كان تغيبى بتوحشى
وريهو وين السكه ليك
وإنو دربك بتمشى

سـلامات

Quote: يافرحه ممزوجه بأمل بالله يأسك طنشى وشيلى ريدك بوحى بيهو ياخى أوعك تختشى أحكى للزول البريدك عن مشاعرك فتشى أبديهو أوَّل صارحيهو بالهمسه برضك حرِّشى وغيبى عنُّو فى عيونو كان تغيبى بتوحشى وريهو وين السكه ليك وإنو دربك بتمشى

دربين علي نار السهام
يقسن علي ساعة المشي

في الجوف بيشتعلن ضرام
ما من قليبي المختشي

هي تمرينات للكتابة

الطازجة لك التحية

علي هذه الملكة

وهذا الايقاع الموتور

الذي ينشأ في

الروح ..

يسمم العالم بالجمال

وبالموسيقي الحية

Quote: بقراك في سر النجوم في عتمة الليل السرح بين اندهاشات الغيوم شرحت معاني الكون فرح فشّت سهاريج السموم وسر الخواطر انجرح

تقرا فى خاطرى السؤال
جوابو حيفاجئك جرح
تقدر تبدِّل لوعتو
ونهاية العشق السرح
لو بس لقيتك أوَّلو
كنا صادفنا الفرح

صادفني فيك حرف الجمال

مليان مشاعر تجترح

موسيقي شلالات وصال

عالم يواجهك منشرح

سلامات رأفت
ياسلام على إبداعك
رغم مأساة الصوره والحرف
تتبيَّن فيها جمالية أحاسيسنا ..وإن كانت مؤلمه ..
تحيات سمان كده

Quote: دربين علي نار السهام يقسن علي ساعة المشي في الجوف بيشتعلن ضرام ما من قليبي المختشي

دربين َمفرَّع إتجاهن
النهايه لى ذات الوشى
إن كان مشيت حد السعاده
جد بلاك ناقصنى شئ

Quote: هي تمرينات للكتابة الطازجة لك التحية علي هذه الملكة وهذا الايقاع الموتور الذي ينشأ في الروح .. يسمم العالم بالجمال وبالموسيقي الحية

شكراً لسماحك لى برفقتك فى هذه التمرينات ..
تحياتى .

انتي ابوكي كان بيعرف انك حتكوني شاعرة عشان كده سماك لاروع الشاعرات؟

مرحب بيك وبدعاش كلماتك المموسقة

Quote: انتي ابوكي كان بيعرف انك حتكوني شاعرة عشان كده سماك لاروع الشاعرات؟ مرحب بيك وبدعاش كلماتك المموسقة

شكراً على الدعم المعنوى ده
تحياتى .

Quote: صادفني فيك حرف الجمال مليان مشاعر تجترح موسيقي شلالات وصال عالم يواجهك منشرح

إنتَ الجمال بتكمِّلو
ماصدفه سمّوك بالفرح
آخر كلامنا وأوَّلو
دنيانا بيكَ بتنشرح

حين جاء ..
بعد غيابٍ دامَ ..
حكومتين ..
وإنقلاب..
سألته : أين كنت ؟؟
أجاب :
كبَّلوا حريتى بعلمى ..
لستُ مثلكم ..
مُكبَّلٌ بالخفاء !
أوهامى بفكِ القيودِ ماء ..
وحلمكم سراب !

يايمَّه ليك طارين
كيف الأهل بحداك ؟؟
مستوره رضيانه الخلِق ؟؟
إقيف الجواب مشنوق
جثه تهمد فى الحلق
وألقى البديل بسراع
حالاً بالفرح ملصوق
والله مستورين
أبوك شوي مديون
لى ناس فى طرف السوق
ناساً وشوشا دقون
بيقولوا أصحاب دِين
والدَّين سلف ممحوق
أخوك كمان بحداى
بيقول عملنا إضراب
شان حقنا المغبون
جامعتو مى هى حقوق ؟؟
بس برضو مستورين
شايفين مصايب الغير
ديل وقعت بيوتاتم
حامدين علينا شقوق !

رمضان كريم
مرحب بك يا خناس
مرحب بك بقدر روعتك وروعة اشعارك الجميلة
بحجم وطن نحلم به بلا حدود
طله حلوه وحروف احلى
واكثرى من التحف
تحياتى
محمد المختار الزيادى

Quote: رمضان كريم مرحب بك يا خناس مرحب بك بقدر روعتك وروعة اشعارك الجميلة بحجم وطن نحلم به بلا حدود طله حلوه وحروف احلى واكثرى من التحف تحياتى محمد المختار الزيادى

الله أكرم محمد
شكراً على الطله الحلوه
تحياتى .

كنا ثلاثة
إفتقدنا رابعاً
حلمنا يوماً ..بوطنٍ مُعافى
تشاركنا المشاعر
سألنا فى الشوارع..
و..
فى المخافر ..
الآن إلتقيناه..
صرنا أربعه ..
تشاركنا كالسابق..
وإن تغيَّر المُسمَّى
إلى : المقابر !

Quote: دربين َمفرَّع إتجاهن النهايه لى ذات الوشى إن كان مشيت حد السعاده جد بلاك ناقصنى شئ

بس اتجاهن في الغنا

سرحن مع الزول الشقي

بيك السعادة بتكتمل
ولي رفقتك احسن مشي

في حضرة الشعر الجميل
لي روحي دايما تنعشي..

Quote: بس اتجاهن في الغنا سرحن مع الزول الشقي بيك السعادة بتكتمل ولي رفقتك احسن مشي في حضرة الشعر الجميل لي روحي دايما تنعشي..

لميت رياحين الكلام
قُت ليها قلبك فرِّشى
يبقى للزول البريدك
بيت أزاهر وأنعشى
أديو أريجك والمشاعر
أسقيو رحيقك وإنتشى

Quote: إنتَ الجمال بتكمِّلو ماصدفه سمّوك بالفرح آخر كلامنا وأوَّلو دنيانا بيكَ بتنشرح

آخر كلامنا الشوق
وآخر نا اصلو سمح

تريانة بي جيتك
طينة الجروف بالصّح

فيها السنابل طوق
عيش ريف شعير وقمح

للغاشي والماشي
و للساري ليلو صبح

مسك الدروب تايه
بين الشعاب الشّح

لوحتي بي حرفك
راياتو كيف تصلح

Quote: آخر كلامنا الشوق وآخر نا اصلو سمح

أوَّل كلامنا الشوق
وآخرو أضعاف أوَّلو
ماقلنا سمُّوك الفرح
ماصدفه يالأصلك حلو
لاجينا فاجأنا الحنين
وكتين عيونك إحملو
تشواقنا لى زولاً ولوف
قاصدين نحسو ونوصلو

شلتا الهموم ومشيت
ياربى العلينا شكيت
غاب الضمير فينا
إتهدَّ ركن البيت
كترت مآسينا
أصبحنا حيرانين
بين الجرح ودواه
وإن كانوا إتنينم
سلاح فى إيد السيد !!
ياربى يامولاى
إن جيت أعيد شكواى
ألقانى جد زازيت
أصلى ناقصه فروضى
قصَّرتا ماوفيت
لكنى ماهميت
أتذكَّر أبوابك
الديمه مفتوحه
إن تبتا وإستهديت
صرخت جراحاتنا
نزفت ظلم ودمار
حزنت سقوف البيت
جبروها تتهدَّم
تكسر ضلوع طفله
غناها متوضِّى
حروفها بتصلِّى :
" فرحانه بالدنيا
من قمتا من شبيت
ماشفتا غير ربى
وقدرتو العاليه
فى ملامحى بتزغرِّد
آمالى فى بلادى
باكر حتتحرَّر
بى دمى تتطهَّر
وماتبكى يامبانى
مقهوره عارفاكى
غتونى بى طوبك
فى كل طوبايه
آياتى ومعانى
باكر حتتكلِّم
كل حجاراتك
بالفوقا أنا ختيت
من كل عذاباتى
من دهرنا الأوَّل
وزماننا الآتى
وهى حتحقِّق
آمالى وأمانى
عجز فى تحقيقها
مية رئيس عربى
ومليون لبس حربى
شفتى يامبانى ؟؟
بالله ماتبكى
إنهدِّى فوق ليَّه
أحضنى ضلوعى
ماتنسى همساتى
وروحى بتسافر
لى عالماً تانى
لكنو جد أروَّع
كتير كمان أنضف
أبويا قدامى
وأمى بتلولى
....
فى حجر تانى !!

على بساطِ الغيوم ....يسكبُ النجوم..وثوبنا سماء
نشوة الزفافِ
همسه صخب...عوالم إندهاش ..
أحبه مرافئ..نسمةٌ تُعافى..
حنانه مطر
فاجأ الخريف
موسمَ الجفافِ
يُخدِّر الوجع..ألبسُ إرتعاش..
فكيفما يكون..جنونه يُداعب..برقةٍ ضفافى
دونه الجمود..لكنه إنتعاش
يلبسُ البرودَ..قناعه التجافى
أسكنُ المنافى
أعرف الطريق
همسةٌ ولمسه
تهزمُ الجليد
تكسر القناع
يهرب الصديق
لوننا جنون
طعمنا ..حريق !!
أحبه ..سكن... يحبني ..وطن
نغوصٌ فى الجنون
وكلنا غريق !!

**

عيناه منبع الدهشةِ
ومن كلِ حرفٍ للنداء تكوَّنت
والصوت يخلق الطرب
يُرقصُ الروح والعصب
وكل مدائنى الهشَّهَ
للحرائقِ أعلنت
حروفه إن قلت كالحروف
فحاتم ..أنكر الضيوف !!
يامنتهى الرعشه
ذات ليلٍ ناشدت
أشعة الشموس
والشهد والرحيق
الشوق والشذى
جميعها تسارعت
تحفه هوَّ

**

حروفه الدفيئه..تُلهِبُ السمع..نبرةٌ وجع ..لكنها إرتياح !!
حبيبى...
منابعُ الجمال ..أسرارُ إختراق..في همسة إشتياق..يُذيبنى حديثه
أعيشُ فى إحتراق
مسيطرٌ وطاغى...حضوره كليلٍ..
يُداعبُ الصباح
يلذُ إحتواء.. في صوته إرتواء..نشوتى طقوس
إشتياقه مُثير..حضوره يُغيِّب ..غيابه ..حضور !!
يكتسحُ فى جنون....
قاسٍ
وربما حنون !!
..يا حبذا الجنون
..ولا جنون !!

**

عيناك
حقاً مرفأى
وإشتياقى
شهقةٌ تطفو
وحيناً تغرقُ !!
نُحلِّقُ فى التأوّهِ هائمين..
ترتوى الآفاقُ منَّا
وماإرتوينا
والمُنى تتدفقُ !!
ننزلقُ إلى الأعلى
لا يملُّنا الصعود
والكلُ حولنا
ليتَ ..
وليتنا..
وهل يتحقق ؟؟

**

حبيبى ..
أحرف الحقيقه ..
أحبه معانى
بطهرها لصيقه
أحبه ..ليالى
دفؤها وجودى ..
ونارها حبيبى
ثقابه التواضع ..
ونبرةٌ تعالى
لمساته الرقيقه ..
همساته نغم ..
أُحسها ..تغنى ..
وتارة تُمَنِّى
وعوده توتر
وأعينٌ تُكسِّر
موانعى و لائى ..
:-
مُشرعةٌ أبوابى ..
وليتنى وليت ..
أصيرُ فى دقيقه..!!

حبيبى ..
سيدٌ مُطاع
رغبةُ التسامى
وِجهةُ الشِراع ..
داخلى يُبحر..
رحلةٌ وداع
لغيرى من بحور
لتبدأ الصراع !!
حسرةٌ تلفها ..
أميرنا النقاء ..
تخيَّر الوطن
داخلى أنا ..
عرشه بقلبى
يلذُ إجتماع !!

Quote: إشتياقه مُثير..حضوره يُغيِّب ..غيابه ..حضور !! يكتسحُ فى جنون.... قاسٍ وربما حنون !! ..يا حبذا الجنون ..ولا جنون !!

الله عليك
ومرحبتن حبابك
يا جيم الجنون

Quote: الله عليك ومرحبتن حبابك يا جيم الجنون

أهلين عصام ..
تسلم على المرور العطر ..
تحياتى ومودتى .

يامسجون..
بينى و..بينى
كيف أديت السور الفُرقه ؟؟
وكيف لميت أشتات الهم
ختيتو فى غصه
تسافر عابره عيونى
تتوهَّط جوَّه الحلق !!
كيف سكَّنت الحزن الدم
ناثر
برَّه مداينو سعاده
شالت وكفَّت كل الخلق
كِملت عندى
وبدا يمتدَّ
جوَّه حدودى الغم
مين أداك القدره
تَكسِر لونى
تخلق طيفك
لون يديك الحق
ظلالو تشكِّل
إسمى ورسمى
وقفل أبوابى
مين أداك القدره
تخُش محرابى
ظلَّك
يحرق
نور قُدسيتو
همَّك يعصف
يكسر لوحو وسعنو
الكان بيشبِّع
كل مدينتو
مين أداك الحق
ذاتك تسكن روحى ؟؟
مين أداك الحق
تبقى جروحى ؟؟

مين سوّاك.. الساكن...
قلبى ؟؟
خاتى السوَّى
وسكَّن روحك
وروحك ضجه
ضجه بتصنع
بينك وبينى كل الفرق
يامسجون
بينى و..بينى
براك بنيت السور
وبرضك
ساجن روحى معاك
وبراك
هديت السور
مدينه بترقص إستقلال
حريّه بتشهق
ياخى بتزفر
راحه
بلاك !!

وإبتديت أحلم معاك
غفوه فى الزمن الرهق
نكسر متاريس الطريق
نرسم اللون الوصول
توب بيتوشَّح سماك
مابين الظلال...
ولون الشفق....
ساعة غروب المستحيل
سمَوهو..
بعض الناس أفول !

أتأمَّلك دنيا إرتياح
وأتوسَّدك...
لحظة بتشرق...
تهدى عالمنا الصباح
مابين مسامات الضلام
وبين تباريح الوجع
ألقانى برسم فى شمس
ماخده من ضيَّك كتير
النور تفاصيلك ..
مساحاتك ..
وأنا ..
مكسيه بى طهرك وشاح
والباقى من ضيَّك بزيد
داخرنو لى باكر سلاح
إهزم متاريس الحلم
الأدَّى واقعنا إستحاله
تحقيقو مكسور الجناح
ماشفتا ذى ضيَّك شعاع
سكَّن أحلامنا الرياح
خلاها تفرح بالرحيل
تعشق السفر المواسم
تسرى جواة الوريد
تنثر الحب السماح

حدَّثتنى أنَّ الجمالَ منابعى ..

والسحر بعض مواهبى ..

والشمس ..ظلى ..

والليل ... التوشّح..

وإرتداء مواجعى ..

خبَّرتنى ياسيِّدى ..

أن اللقاء حقيقة ..

وأصررت التواصل عامداً ..

جهراً ..كسرت صوامعى ..

أنت إدَّعيت ..نبوءتى ..

قاتلت دين نقائضى ..

وحملت ألوية التمسُّكِ كلها ..

آمنت بى ..

أديت كل شرائعى ..

شهدت ..

ألا معشوقة

غيرى أنا..

ثم أرتددت ..

أعلنتها جهراً ..

هدَّمت كل جوامعى ..

وسمُ الصلاةِ على جبينك لم يزل ..

يشهد بأنى قِبلة ..

والوعدُ منك ..

سننٌ تليت ..

ألحقتها بفرائضى ..

لم أقتحم ..أنت الذى عمداً ..

أذبت صرح موانعى ..

الآن

بعد أن زال الرحيق

ألبست أشواقى التمزُّقَ

و الحريق

الآن ..

الآن تعلنها على ملأ العهود ..

على كل المواثيق ..

أنِّى لم أكن ...

غير إدّعاء ..نبوءةٍ ..

وأنَّك صابئٌ ..

أغوته سوء ..دوافعى ؟؟

أينَ ..مارددت..

ماقدَّست..

من قسمِ الوعود ؟؟

إخترت أنت تواصلى

ماكان حد العشقِ

على القلوبِ

وماهمستُ

أن هيت لك ياسيِّدى ..

هيا معى !

الآن أعلنها أنا ..

متأخره ..

بعد إرتدادك غادراً ..

أنا لم أزل سحر الجمال وسره ..

صدق النبوءة ..أعينى ..

لم أنكسر ..فأنوثتى ..بمدامعى !!

أيتها الخنساء .. الأخت تماضر
عيد سعيد وكل عام وكلماتك يضوع عبقها الأعياد
ويحي أيتها الشفيفة لقد أنخت عزمي حتى إنسقت وراء البوح المنمق المرسل الجميل .. يهدهد الروح ويحملها إلى عوالم الماوراء باجثاً ولآهثاً عن ترجمات لتلك العبارات الأنيقة الجملية .. فعجز معجم العبارات حتى قال أن أصدق الهمس والبوح ما يخرج من حواء لأنها عاطفة متكاملة فإن ولجت عبقر سجدت لها جنيات الشعر والنثر والنميق والبوح والسرد وانقادت طائعة.. تأسرني العبارة الأنيقة وتسكنني معانيها الجميلة .. واصلي.. تهنئة من القلب
ابوبكر يوسف

عيد سعيد أبوبكر ..
أشكر لك مرورك العَطِر ..ورقيق كلماتك ..
سعيده أن أعجبك ماخططت ..
لك منِّى كل الود .