Post: #1
Title: واجعنى برضو كمان ...
Author: تماضر الخنساء حمزه
Date: 11-27-2006, 09:07 AM
Parent: #0
واجعنى برضو كمان
وقوفى فى سكة هواك
أترقَّب أحلامك تقيف
وأحلامى تشتاقك براك
ومرَّات بيغلبنى الكلام
لمّا من لحظة سكون
ألقانى زى بركض وراك
ويسابق الإحساس خُطاى
وأنفاسى تتوسَّد شذاك
وتقرِّب الخطوات كتير
لحظة ..وتقابلك حِداك
باللهفة تتعثر ..وأقع
وإنتا تتباعد ..خُطاك
الريد بيسندنى وأقيف
وأشواقى تتلفت هناك
إنتا مابتشفق عليو ؟
المابيعشق زول سواك
أو حتَّى تتمهَّل شوية
ساسقنا مافرقت معاك
بس برضو بنريدك زيادة
مهما إتعالت سماك
وماحيفتر يوم دعانا
إنو تنظرنا فــ علاك
مالسه شوقك فى الأرض
وصلاتى تتردَّد هناك
أتوسَّد إحساسك سجود
وسلامى بيسبِّح رضاك
***
ما أصلو حال زولاً بريد
أشواقو سموها العناد
ماشفتا لي زولاً عِشِق
إلا باراهو البعاد
وزى تقول إنو الوجع
لازم تشيلو مع الوداد
جاييكا ياسيدى الصباح
تفرش على الحزن السواد
وتلبس الفرح الموشَّح
بالزغاريد ..توب حداد !
***
وأباهى بيك الإنتظار
وكتين تطل آخر مطاف
وبباهى بيك حتَّى الوجع
ماإنتا ..طيَّبتا الجراح
وبباهى بيك.. ليل الحزن
ياماشى بى سكة هواك
أنا بيكا أعلنتا الصباح
ورسمتا فى كل الخُرط
مدينة من شوقك براك
تعرف ؟؟
فينى كمَّلتا البراح
وصلتا بي حد الوريد
والشهقة لامست الغيوم
إحساس بيعلن بى صراح
الدهشة حين ألقاكا فينى
حققتا معنى الإحتمال..
والمستحيل فى لحظة راح
أصلى مولودة عِشِق
جواكا لفَّانى الحنان
وعرفتا بيك معنى السماح
|
Post: #2
Title: Re: واجعنى برضو كمان ...
Author: abubakr
Date: 11-27-2006, 11:28 PM
Parent: #1
Quote: وأباهى بيك الإنتظار
وكتين تطل آخر مطاف
وبباهى بيك حتَّى الوجع
ماإنتا ..طيَّبتا الجراح
وبباهى بيك.. ليل الحزن
ياماشى بى سكة هواك
أنا بيكا أعلنتا الصباح
ورسمتا فى كل الخُرط
مدينة من شوقك براك |
تسلمي...........
|
Post: #3
Title: Re: واجعنى برضو كمان ...
Author: عبد المنعم ابراهيم الحاج
Date: 11-28-2006, 00:35 AM
Parent: #2
Quote:
أنا بيكا أعلنتا الصباح
ورسمتا فى كل الخُرط
مدينة من شوقك براك |
ورسمتي في الروح الكلام
وكتبتي في الشريان حنين
ختيتي فيها حلاة مدن
من شوق يتاوق من سنين
|
Post: #4
Title: Re: واجعنى برضو كمان ...
Author: تماضر الخنساء حمزه
Date: 11-28-2006, 02:09 AM
Parent: #2
سلامات أبوبكر ..
وصباحاتك خير ..
تسلم كتير .
|
Post: #5
Title: Re: واجعنى برضو كمان ...
Author: تماضر الخنساء حمزه
Date: 11-28-2006, 02:20 AM
Parent: #1
Quote: ورسمتي في الروح الكلام
وكتبتي في الشريان حنين
ختيتي فيها حلاة مدن
من شوق يتاوق من سنين |
شلتا من قلبى الملام
ياسيدى ليه دايماً ضنين
فارد مساحاتك شجن..
مابوجعك مرَّة الحنين !
شيل خطاوى الريد تعال
خلِّى أشواقك تبين
|
Post: #6
Title: Re: واجعنى برضو كمان ...
Author: ابوبكر يوسف إبراهيم
Date: 11-29-2006, 02:34 AM
Parent: #5
الأخت تماضر
حتى وأنت تبوحين بوجعك وسره تصورينه بمذاق فني حلو مستساغ مستطاب.. وجعك باقة من أحساسيس وجدانية فيها من بديعات الجمال وفيه قصائد داخل كل شطر من بوحك .. تلك هي روح الشاعرة تخاطب ذاتها ، توهجت فيها العاطفة أكبر ما تتوهج .. ورقة إحساسك بالحياة توج قصيدك بنغيمات حالمة حتى حلقت بي في آفاق الأخيلة الرحاب .. رفّ تعبيرك نغماً جميلاً يترسل على مسامعي كأنه رقيةُ ساحرة ..بوحك هو هتاف باسم الحب والصبابة والوجد.. زيدينا منه فالنفوس ظِماء.. أحسنتِ
ابوبكر يوسف
|
Post: #7
Title: Re: واجعنى برضو كمان ...
Author: تماضر الخنساء حمزه
Date: 11-30-2006, 08:35 AM
Parent: #6
سلامات أبوبكر يوسف ..
هى ( شخبتات) على حافة الكتابة ..وتعبير عفوي عن أحاسيس ربما يتشاركها البعض ..
لك تحياتى وأنت تتابع خطوي وجميل الشكر على رقيق كلماتك ..
|
|