Post: #1
Title: ( )
Author: خضر حسين خليل
Date: 04-20-2007, 05:46 PM
Parent: #0
طار قلبي
شكراً إذ إهديتيني من الفرح مايكفي
رافقتك السلامة
................................
أعتقد بأننا سنتحدث يوماً ما ذات تفاصيل بالحيل جميلة عن مساء الامس
عن الرحيل , عن الانسان , عن مشاريع نبتت بيننا دون سابق ترتيب ,
عندها فقط سيجد هذا النداء عزاؤه وربما أمنياته الذي ظل ينتظرها العمر
كله دون أدني شعور بالممل وبيقين لا يحده حدود
سأكون هنا في هذا البوست الذي سأترك لك خيار عنوانه لذا قررت أن يكون
عنوانه بياض نيتك وصفاء سريرتك وبساطتك التي غطتني من الوريد الي الوريد
فأنا يأ أيتها البنت التي .... وجدت فيك ما كنت أبحث عنه بين مشوار أيامي
التي بدأت منذ بدأنا هذا النشيج الذي سيظل أبداً بيننا .
سأحتفي بك هنا بشكل يفوق التصور والجنون .
رافقك التوفيق والامنيات
...................
للقراء والزوار والناس الجميلين ..... الان يمكنني أن أعلن بأنني موجوع
جداً وقاتل الله الشوق .....
هي دعوة للاحتفاء كل بما يملك من محبة وأنا بما أملك من شوق
...................
خضر
|
Post: #2
Title: Re: ( )
Author: عبد المنعم سليمان
Date: 04-20-2007, 05:51 PM
Parent: #1
صديق الزمن الاخضر
خضــــــــــــر
الخميس يوم المهرجان
المكان : جامعة الخرطوم - الميدان الشرقي
احتفالات فوز التحالف الديمقراطي
البتاع من : العزبة بحــــري
ازهري .. وائل طة .. وووعيييييييك
افتقدتك
___
ما عارف البوست ده مناسب لكتابة الكلام ده وللا لا
منعم
|
Post: #9
Title: Re: ( )
Author: خضر حسين خليل
Date: 04-21-2007, 12:45 PM
Parent: #2
يجينا فرح ترفرف
فوقنا نستناك بالموال
والشوق بيني بينك زي
ماتقول مطر هطال
...........
ببعض الغد سنحكي كثيراً
خضر
|
Post: #3
Title: Re: ( سلمـــــــــات )
Author: amara
Date: 04-20-2007, 06:06 PM
Parent: #1
جئت هنا بعيدة من التحالف والمفاصل لأقول لك سلام يا الغالي خضر حسين
مموشي سيدا
عمارة
|
Post: #4
Title: Re: ( سلمـــــــــات )
Author: Muna Khugali
Date: 04-20-2007, 07:08 PM
Parent: #3
عايتو يا حسين كان الطير قلبك ده حب واحدة بت دنيا..ولا حب وطن انت قمت بتأنيثه..
ولا كلام أحلام ساكت..أنا جيت اقول ليك أنا فرحانه لمشاعرك الجديده.. ولفرحك الطير قلبك..
لك كل الحب..
|
Post: #5
Title: Re: ( سلمـــــــــات )
Author: نهال الطيب
Date: 04-20-2007, 07:13 PM
Parent: #4
قلبي مالو اليوم
من جسمي فر وراح
دمت يا محبوبي
ودامت الأفراح
خضر دام حبك ودامت افراحك
تحياتي
|
Post: #6
Title: Re: ( )
Author: خضر حسين خليل
Date: 04-21-2007, 11:14 AM
Parent: #1
العزيز منعم :
إذيك ياخينا .... الخميس كان شاهداً علي عظمة أولاد وبنات جامعة
الخرطوم .... يومها تحدثت مع وائل طه لأكثر من مرة كان قلقاً كعادته
كنت واثقاً من هذا الانتصار المعبر .... هكذا هم المخلصون في هذا الوطن
فشكراً للتحالف ... وتحياتي لصديقي أذهري وقول ليهو يوم شكرك قرب شكلو ؟
فقط لاتغيب .
شكراً منعم
.....................
أخينا لله في لله مموشي
إذيك ياخي إذيك
شكراً لحضورك هنا وأسأل راجي أكيد عارف سر البوست ده
تحياتي لاهلي بعمارة .
.....................
مني خوجلي
إذيك ياجميلة
القومة ليك
سمعتي يامني بجعفر السقيد وهو بقول ( هي الدنيا كلها كام حرف لامين يطول فيها الاسف )
هذا البيت يناسبني جداً علي الايمان يامني . فشكراً لتلك التي في الخاطر بنتاً وطناً حباً
إذدان البوست بحضورك وشكراً علي الملاك .
.........................
نهال الطيب :
يزيد خيرك ياشابة ياجميلة
هي مثلها مثل مجموع العصافير لاترك البتة
حلقت وحلقت ثم طارت بقلبي
....................
كتر خيركم كلكم
خضر
|
Post: #7
Title: Re: ( )
Author: A.Razek Althalib
Date: 04-21-2007, 11:42 AM
Parent: #6
خضر حسين خليل..
تحايا وأشواق نزفها رياحين..
| Quote: فأنا يأ أيتها البنت التي |
القوم هنا سيجعلونها أنشودة تذاع صباح مساء..
لتسير في ركب المشوار الطويل..
خضر يا لذيذ..
أنه الزحف نحو الهدف النبيل..
وغالباً ما يبدأ..
بشذرات زحف أسفيري هكذا ثم يطرح في معمعة الطلب وجدان وجدكـ..
أو قل يا ياحبي..
هكذا تبدأ أشواق النفس بلمسات على الكي بورد..
|
Post: #8
Title: Re: ( )
Author: خضر حسين خليل
Date: 04-21-2007, 11:50 AM
Parent: #7
عبد الرازق
إزيك ياظلامي
شكراً لاحساسك العالي ومرحباً بك شاهدا في هذا الوتر الحساس
بس ماتشبكني الحزب الشيوعي وما أدراك وخلينا ندي الفرح
حقو .
تحياتي للأصدقاء بالرياض
..........
خضر
|
Post: #10
Title: Re: ( )
Author: خضر حسين خليل
Date: 04-21-2007, 05:02 PM
Parent: #8
هنا سيكون مرقدنا لزمن طويل سوف يأتي
............
ساويت هتافك بالنشيد
جات الخلايق من طرف
من وين ووين
كايسين مداخلك
للمروق
وندهتلك
يابت صباحك
لو يجي
ينقذنا من هذا
النزيف هذا التسكع
والضياع
................
( مقاطع من جرح الربابة )
خضر / الخرطوم
|
Post: #11
Title: Re: ( )
Author: aml gadora
Date: 04-21-2007, 05:16 PM
Parent: #10
لك مااردت
لم يكن لليل آخر
لا .... ولا للشوق حد
كان وجهي قمرا يعبر
اوجاع القناطر
والمدى طير جناحاه
على الريح
وقلبي في جناحيه
إلى شطك يعود
لم يكن لليل آخر
صحت ياليل الهطول
دع لروحي ان تقول
كل ماقالته للتربة حبات المطر
لم يكن لليل آخر
لا ...ولا للشوق حد
وردة دقت على شباك داري
فصحا من غفوة النوم نبات الارض
وامتد إلي صوت الكناري
وجع الورد
وناداني إلى لقياك وعد
(للشاعر حسين الغانم)
|
Post: #13
Title: Re: ( )
Author: A.Razek Althalib
Date: 04-21-2007, 05:26 PM
Parent: #11
خضر..
| Quote: بس ماتشبكني الحزب الشيوعي وما أدراك وخلينا ندي الفرح |
ما قلتو كل الجمال..
مالو عيبو شنو..؟
|
Post: #15
Title: Re: ( )
Author: خضر حسين خليل
Date: 04-21-2007, 05:37 PM
Parent: #13
أمسحها في وشي ياعبد الرازق
وقبيل قلت ليك أدي الفرح وكتو
بخصوص الحزب
أهديك كورال الحزب شريط كارب
حيعجبك جداً أخد منها غنيوة عند
اللزوم ومابتجيك عوجة تب .
وركز لي معاك في
عشقاً جواناأتارنك
حزباً في القلب مضارنك
للشمس حتمشي مبارنك
فخراً للشعب السوداني
والطبقة العاملةالثورية
...............
ياعبد الرازق إذيك ياخي
|
Post: #19
Title: Re: ( )
Author: A.Razek Althalib
Date: 04-23-2007, 12:26 PM
Parent: #15
خضر يا من كنت صاحب في الغربة..
أهديكـ كل الجمال..
| Quote: أهديك كورال الحزب شريط كارب |
يا خضر يا قديم..
الـ (سي دي) المدمج أفضل..
أشكـ أن يكون كل أبطال السيمفونية منكم كما هو حال لينين وكارل ماركس معاكم في التغريب..
يا خضر هنا تكمن مأساة السلبطة يا صاحبي..
فنافخ الكير لا يجزيكـ مسكاً..
سمعنا كثيراً من تيارات الإستنارة أن:
الأستاذ/ محمد وردي وارد نفيركم..
والاستاذ/ مصطفى سيد أحمد قلتو تبعكم..
وسيف الجامعة النفر منكم..
جميعهم...
سمعتهم سمع العضان ينفون كل النفي صلاتهم الطيبة بيكم لا بإيدولوجيتكم..
والشينة منكورة..
وحزبكم كل الشناة..
يا خضر قرب تعال..
|
Post: #14
Title: Re: ( )
Author: الشفيع عوض شوشتا
Date: 04-21-2007, 05:33 PM
Parent: #11
غناؤك عذب
نبيذك معتق
غني وشد اوتارك صوب الحبيبة
خضر ...
لك احتمال البنفسج
|
Post: #16
Title: Re: ( )
Author: خضر حسين خليل
Date: 04-21-2007, 05:43 PM
Parent: #14
الشفيع ياشوشتا
يامراحب والله
لك ياصديق المسافات ما تشتهيه جمال لي يوم يبعثون
وحبيبة تساسق غيم الغربة معاك .
ياخ البنات ديل كائنات عجيبة والله
شكيتن للكريم
................
خضر
|
Post: #12
Title: Re: ( )
Author: خضر حسين خليل
Date: 04-21-2007, 05:25 PM
Parent: #1
Quote: وناداني إلى لقياك وعد
|
شكراً للغانم
إذيك يا أمل
هو ذا ما نبحث عنه وسط هذه الحرائق
عندما تستوي قلوبنا سندرك بأنه ماعاد
هنا مذيد من الوقت لنرهقه ببحثنا عن
أشياء لا نحس بها الا عندما نفتقدها
هذه الابيات أستطيع بها أن أقابل بها
وحشة هذا المساء علي أسوأ الفروض
فشكراً وإنت تهديني سواء السبيل
وخليكي قريبة
سلمت أمل
..........
خضر
|
Post: #17
Title: Re: ( )
Author: خضر حسين خليل
Date: 04-23-2007, 11:28 AM
Parent: #12
والحزن في ذاك المساء
كان كصفعة الجلاد
تماماً
يلفنا ونحن نودع تلك
الشواطئ التي لطالما
حاولنا التشبث بنواحيها
أملاً في أمل يلوح
كانت كصارية المراكب الشرعية
تعطي حين هواء يمر
كنباتات الصفصاف
تداعبك متي مررت بالضفاف
والجزائر
وكنت وحدي , أحسست بصفعة الحياة
مسحت ذرات العرق
وهواء الشتاء القاسي يمر علي عجل
ليحيل ماتبقي من جراح القلب
لتفاصيل جرح لا يقاوم
...............
نواصل
|
Post: #18
Title: Re: (تضامن)
Author: محمد حسبو
Date: 04-23-2007, 12:16 PM
Parent: #1
ربنا يخلف عليك بالخير
|
Post: #21
Title: Re: (تضامن)
Author: خضر حسين خليل
Date: 04-23-2007, 12:57 PM
Parent: #18
شاكرين تضامنك ياحسبو
والحال من بعضو
وربنا يصلح الأمور
...................
شكراً حسبو
خضر
|
Post: #20
Title: Re: ( )
Author: معاوية كرفس
Date: 04-23-2007, 12:57 PM
Parent: #1
.
Quote: ياخ البنات ديل كائنات عجيبة والله
شكيتن للكريم |
كويس إنك عرفتَ كدا
سد دي بي طينة ودي بي عجينة
و غمض عيونك
و أنسي طاري السيرة دي .
.
|
Post: #24
Title: Re: ( )
Author: خضر حسين خليل
Date: 04-26-2007, 10:34 AM
Parent: #20
كرفس :
إزيك ياصاحب روحي
| Quote: سد دي بي طينة ودي بي عجينة |
إنت تأمرني بما ليس بالإمكان يا صديقي
سددناها سنينا عددا فبالله عليك كم كان
ناتج الجرح وقتئذ ياصديقي
كان كم يامعاوية
..........
ياخي إنتظرك هذه الليلة جداً
لنحكي ثم مبروك ميدان الناس التحتانية
...........
خضر
|
Post: #22
Title: Re: ( بياض نيتك وصفاء سريرتك )
Author: انعام حيمورة
Date: 04-23-2007, 12:59 PM
Parent: #1
بياض النية وصفاء السريرة الله يديهم الجميع عشان نعرف نحب بصدق دون زيف ...
افتقدك كثيرا .... ومشتاقيييين
الله يجيبها بالسلامة قول آمين
|
Post: #25
Title: Re: ( بياض نيتك وصفاء سريرتك )
Author: خضر حسين خليل
Date: 04-26-2007, 10:37 AM
Parent: #22
إنعام ياحيمورة
مشتاقون جداً يعلم الود ذلك
أنا جالس حيثما تركتني هذه
البنت التي ........... تمتد
في دنياي .... آمالاً ووعداً
والخرطوم بقت مدينة ماسخة لالون
ولا طعم ولا رائحة لها فسبحان
من أضاف لها خواص الماء ياصديقتي
قادر الله
سألت بالكريم أن تتمددي هنا وتستريحي
قليلاً
.....................
مودتي
خضر
|
Post: #23
Title: Re: ( )
Author: د.محمد حسن
Date: 04-23-2007, 01:29 PM
Parent: #1
ونبحث بين ثنايا الانتظار
تفاصيل فرح يشبهنا
تفاصيل فرح بملامحنا
وعرينا
وصدقنا
وسوءاتنا
تفاصيل فرح بسيط كبساطتنا
ونجده قابعا
ركن قصي قرب كومة احزاننا
وانت في انتظارها عنوانا وحقيقة
عندما تحضر
اخبرنا ايها الخضر
|
Post: #26
Title: Re: ( )
Author: خضر حسين خليل
Date: 04-26-2007, 10:44 AM
Parent: #23
إذيك يادكتور
محمد حسن :
شكراً وكتر خير فتيشك المرقك بي هنا
عدت الي هنا بعد ملاواة شديدة مع
الظروف وكرب هذه البلاد التي لاتنتهي
وتفاوضات الاصدقاء بتغيير الوجهة الي
أماكن يعلمون سرها لوحدهم وبيني وبينك
تعيد للنفس البشرية بعضاً من توازنها
الجميل المفقود ( تلك الاماكن يامحمد)
الله الله عليها
غادرتني كخريف البلاد بعد أن أحالت قلبي
لأكبر حديقة في تاريخ البلاد . بنت عادية
أوقعتني في إحداثياتها ( تماماً ) لاصبح
مثل أي ( س / ص ) في أي معادلة رياضية
لايفك طلاسمها سوي النجباء .
لاحولالالالالالالالالا
لكم يشتاقها روحي يامحمد لكم
................
خضر
|
Post: #27
Title: Re: ( )
Author: GamarBoBa
Date: 04-26-2007, 10:53 AM
Parent: #26
خداري
لكم تشتاق الروح
عارف لي كم يوم لافي رايح لي كلام كتير وزهجني الواقع البقراه...
لكم التحايا
|
Post: #28
Title: Re: ( )
Author: خضر حسين خليل
Date: 04-26-2007, 11:00 AM
Parent: #27
موسي
عامل كيف
مع هونكنغ والصينيين أبان عيون صغيرة
والشعب المميز بكترتو .
طبعاً بتكون عامل زي نكته بتاع التاكسي داك
بالله ياريتك تزور تلك الاماكن التي قلتها
لك وسلامي لماو العظيم أينما كان مرقده
موسي ... ياخ حترجع متين ؟
...............
خضر
|
Post: #29
Title: Re: ( )
Author: GamarBoBa
Date: 04-26-2007, 11:06 AM
Parent: #28
خداري لو ربك سهل برجع بداية خمسة
وكلامك ده ما بقوله انا...تعال قوله انت
لك ودي وكل الاهل
|
Post: #30
Title: Re: ( )
Author: خضر حسين خليل
Date: 04-26-2007, 11:34 AM
Parent: #29
حننتظرك ياصديقي علي أحر من الحر
فقط لاتطول في الغياب
...........
خضر
|
Post: #31
Title: Re: ( )
Author: Emad Abdulla
Date: 04-26-2007, 07:39 PM
الولد الصايع ..
سمح المسا البيعاقر شراب العاشقين ..
أبوك سيدي الشيخ طه ( بادي ) قال :
يا علة المعلول تنشاف عيان و بيان ..
ما عرفنا ليك وصول , و ما دنيت أحيان .
عليك الرسول شوف جنس خمج الكلام الفوق خمج الحبيب ..
آمنت بالله .
أركز ..
فوالله إنك لمكابدٌ و مكابد , و واقعٌ على قدّومك حتى تعرف الله واحد ..
النساء النساء يا صاحب ..
( يصرعن ذا اللُبّ حتى لا حراك به ) ..
و أنت من ذوات اللُب ..
فأعمل حسابك من ذوات القتل .
يزيد وجعك السمح ..
قول يامين .
|
Post: #32
Title: Re: ( )
Author: GamarBoBa
Date: 04-27-2007, 09:02 AM
Parent: #31
تسلم خداري
اتوقع ان يكونا اخونا محمد ود الاستاذ قبض (ملايينه) وخلي المس كولات
|
Post: #33
Title: Re: ( )
Author: GamarBoBa
Date: 04-28-2007, 03:39 AM
Parent: #32
قلت لي ركبو اللواري وبحروا...؟
بالمناسبة دي كلم اسامة معاوية يعمل ليك قصيدة...(هو وينه الزول ده)
|
Post: #38
Title: Re: ( )
Author: خضر حسين خليل
Date: 04-28-2007, 10:11 AM
Parent: #31
عماد
أووووه أرورا وتلك الغجرية
القومة ثم القومة ليك ياخي
وأشهد أن لا ود الا لهن ياصديق المواجع
كنت حينها ياعماد مفتوناً بالغزل الصريح
حق الله بق الله رأيت صنع الطبيعة ياصديقي
بين خديها .... جميلة ومدهشة وكلما تونست
معها إذداد عطش شفاهي وهاك ياجري للزير الفي
نص الحوش .....
تمنيتها من القلب فصرعتني في كبدي ياصديقي
وذاك مقتل أولي الالباب .
وأنا والزين وخالد عبد المنعم ذاك الذي قرر الارتحال
وكل صعاليك الحياة ها نحن نحاول أن نجد متسع لافراح
دوماً تخطؤنا وتصيب الاخرين .
عماد ياخي جدع معاي في سيرة البنية الحليب دي
..........................
خضر
|
Post: #35
Title: Re: ( )
Author: Khalid Kodi
Date: 04-28-2007, 04:56 AM
Parent: #1
Quote: للقراء والزوار والناس الجميلين ..... الان يمكنني أن أعلن بأنني موجوع
جداً وقاتل الله الشوق ..... |
والله ياخضر كلنا مزنوقين شوق،
لكن البفرق الله والبجمع الله.
تحياتى لك و لكل من يعترف بالوجع لفراق الحميمين من الصحاب والأماكن العزيزة.
|
Post: #40
Title: Re: ( )
Author: خضر حسين خليل
Date: 04-28-2007, 10:40 AM
Parent: #35
الفنان المحترم
كودي
يسعد صباحك بتوقيت الخرطوم
مرحباً بك في زنة الشوق ياصاحب وزنقة من زنقة تفرق
وربك يفرج الكرب
كربهن كربهن كربهن كرب ياخالد قاتل الله الشوق أينما
كان طاريها .
والله أنا سعيد بوحدة الشوق التي جمعتنا الأن
..........
خضر
|
Post: #36
Title: Re: ( )
Author: Ishraga Haimoura
Date: 04-28-2007, 07:53 AM
Parent: #1
العزيز خدوري
أحييها في غيابها ووجودها... تلك الصبية التي وهبتك الفرح في زمن الحزن والهزائم هذا
أعلم يا صديقي أنك تملك من الحب ما يكفي كل هذا العالم وأن قلبك الندي يسع هذه البنية ومعها كل العالم... ويحتفي بها ما استطاع سبيلا
رد الله إليك فرحك وأعادها نجمة تضيء لياليك وتمنح أيامك بريقها
|
Post: #42
Title: Re: ( )
Author: خضر حسين خليل
Date: 04-29-2007, 12:29 PM
Parent: #36
| Quote: أحييها في غيابها ووجودها... تلك الصبية التي وهبتك الفرح في زمن الحزن والهزائم هذا |
أي زمن كان هذا ياصديقتي زمن عجيب عجيب للغاية يافردة
شكراً لتضامنك الشديد مع الوجع
..............
خضر
|
Post: #37
Title: Re: ( )
Author: Ishraga Haimoura
Date: 04-28-2007, 09:06 AM
Parent: #1
| Quote: شكراً إذ إهديتيني من الفرح مايكفي |
خدوري
أنا على يقين من أن الفرح فعل مقاوم لكل أشكال القبح ... فافرح يا صديقي وأشهر فرحك في وجه كل ما يسوء ولك النصر البهي والحب الأوفى.
|
Post: #41
Title: Re: ( )
Author: خضر حسين خليل
Date: 04-28-2007, 10:47 AM
Parent: #37
حيمورة
الزولة العاملة كيف كيف
جنس حلاة
حميد قال ( ومن فتنتك إستغفر الله العظيم)
أثق جداً ياحيمورة في حلمي ( حيلف يلف يلف
ويجي راجع ) هكذا قانون الاحلام أو هكذا تقول
الاسطورة مافرقت تب .
إن إحببت وحسن حبك سيكون مصيرك الوله
الله إني قد بلغت فأشهد الله فأشهد
والله في
.......
حيمورة بيننا الف موعد ولقاء فلاتغيبي
..........
خدوري
|
Post: #39
Title: Re: ( )
Author: خضر حسين خليل
Date: 04-28-2007, 10:36 AM
Parent: #1
موسي
عصاك رهينة فأصمد لحين ......
إزيك ياوغد ننتظرك بفارغ الصبر وشكراً لحنان النيل
وياريتك تفتش في شرق آسيا عن الزول الاسمو أسامة معاوية
حضوره فقط يكفي خليك من قصايدو ياموسي
ميمي لازال حليفه الليل والميسر ورجس من عمل الشيطان
................
مودتي ياصاحب
......
خضر
|
Post: #43
Title: Re: ( )
Author: فيصل عباس
Date: 04-29-2007, 09:08 PM
Parent: #1
تهيبت الدخول في اول
القوس, لعلمي بانه ربما يكون شركا معدا لوافر الصيد والحيله
وتاكدت عند اول الخطو
ان النهار قصير جدا, والليل تمور به الفجيعه,,
فكنت ان دسست راسي الي شقك الآمن
ورحت في ثبات لا يليق,,
فقط اذكر
انني قد تأبطت ورطتي معي قبل بواكير فجيعة الهطول بيننا,,
وتركتها لك لتقلق هدؤ حرفك
الذي ما عادمتحفزا للاندلاق كما عهدناه عند بديات اللعنه,,
ارجوا ان لا تحسبني مواسيا لك في ورطتك هذه,,
فقط اتيت محرضا
لاهنيها(من جعلت بكاءك مفضوح ومرئي) واشمت فيك تماما
بل واتامر تماما باستجلاب مدرات الدمع والبكاء لك (شطه مثلا)
ومن ثم
انادي كل الاخريات ليحذون حذوها معك (واوعدهن بحافز وهمي)..
وذلك لكتير من الانبهال(الحرفي) الذي اشتاقه عندك..
خضر يا صديق
اتمنى لك مزيدا من الوجع (النسوي)
اتمنى ,,,
واعتقد بل أؤكد لك ان لي في بعض الامنيات نصيب...
وبعدين
(خلي بكاءك عالي عالي النبره) ايها الج..... (ومؤكد ان النقاط لاتحفظ في داخلها
ما تبقى من كلمة الجميل)..
|
Post: #46
Title: Re: ( )
Author: خضر حسين خليل
Date: 04-30-2007, 05:24 PM
Parent: #43
يوم الله يمر
بي صبرو
أحلام باكر
كيف تتأتي
يامغلوبة
وغالبة زمانك
كيف أنساك
محال البتة
...............
علي أشواقنا التدفق يافيصل سأعود لك أرهقتني المشاهد والصور
سأعود الي هنا حالما أفيق
...........
خضر
|
Post: #44
Title: Re: ( )
Author: على بطه
Date: 04-29-2007, 09:56 PM
Parent: #1
خضر اللذيذ
يبدو آنك تمر بايام سايكولجية الفراشة
حاول راجع الاصدقاء بن بن وحيموري لهم وصفات سحرية
تحياتي
|
Post: #45
Title: Re: ( )
Author: مجدي عبدالرحيم فضل
Date: 04-30-2007, 12:42 PM
Parent: #44
الخضر خضر الله لك ميادين فرحــــــك،،
وأنت ترفل بين حُلله زاهيا كماالفراش،،
تسبقك أماني وأحلام ندية في درب الشوق،،
أعشق أيها العاشق ومابك من داء العشق،،
نرجسية المضادات البنسلينية بكامل بياض،،
الوقاية خير من علاج نندم علية أن طال جوي،،
المآقي تزرف شموعها دمعات الأسي الطويل ،،
طول ياليل وما تطول الباعد نحسب النجوم تعداد،،
لك ياصديقي جميل العشق دربا أخضراء. ،،أبوقصي،،
|
Post: #48
Title: Re: ( )
Author: خضر حسين خليل
Date: 05-02-2007, 10:00 AM
Parent: #45
مجدي
إذيك ياخي
مرحب بيك والله في شوق الله والرسول دة
وتشكرات كتيرة علي الامنيات والاحلام
مافي غيرها ... مافي غيرها يامجدي
.............
سلمت
خضر
|
Post: #47
Title: Re: ( )
Author: خضر حسين خليل
Date: 05-02-2007, 07:31 AM
Parent: #44
علي بطة :
صديقنا في أوربا
وحشتنا جداً ياعلي الاصدقاء تفرقو فقط يجمعنا المصائب
هذه بلاد غريبة إذ تفوتك حتي محطات الفرح بهدوء
.......................
خضر
|
Post: #49
Title: Re: ( )
Author: عثمان عجبين
Date: 05-02-2007, 05:16 PM
Parent: #47
خضر حسين ازيك
كنت اعرف هذا الشعور
عبرت الان بأمان
مااريده لك ليس النسيان ....هذا غير موضوعي
مااريده لك الذكري بدون الم
لا تخض حرب ضد ذكراها
خض حرب ضد الالم المصاحب
تذكرها كما تتذكر عزيز مات
حينها ستعبر
صدقني ستعبر
|
Post: #50
Title: Re: ( )
Author: elnadeif
Date: 05-02-2007, 10:15 PM
Parent: #49
عزيزي خضر
وعبورك هنا سيترك الباب مواربا لنسمات الامسيات ،
دونما تساؤب
فالعلاقات في الرصيف شائكة تنحت دمك تنخر حدود العظم ولا تستريح
الان انت مستكين كمن يتكاثف الخمر في وجدانه
اترك الباب مواربا لعبور جديد
وحبها كثيرا
واجعل لها القلب اصيص
|
Post: #53
Title: Re: ( )
Author: خضر حسين خليل
Date: 05-05-2007, 08:11 AM
Parent: #50
النضيف
أبوزر أم نضيف آخر ؟
علي العموم سعيد بحضورك هنا ووين ماتكون
أحاول أن أرسم مستقبل لايجدي فيه ضربة فرشاة
بالتسكع في عيون أدمنتها حد الثمالة
الثمالة تعني فيما تعني الانتشاء
وأنا منتشي بروح القصيد هذه
.......
خضر
|
Post: #51
Title: Re: ( )
Author: خضر حسين خليل
Date: 05-03-2007, 12:47 PM
Parent: #49
عثمان عجبين :
وينك يامان
عبرتها ياصديقي عبرتها منذ أعلنت إنتمائها لجراح الوطن
أنا حالياً أعيد صياغة روحي ولذا تجدني هاهنا أعلن للملأ
عن إحداهن التي دخلت توش بلا إستئذان
فمرحباً بها ومرحباً بالشوق والارق الجميل
عجبين :
نورت والله وحمد الله الف علي السلامة
خضر
|
Post: #52
Title: Re: ( )
Author: محمد حنفي
Date: 05-03-2007, 01:27 PM
Parent: #51
خضر
انت في .؟؟
لو في عوجة مافي
اظهر
|
Post: #54
Title: Re:( )
Author: خضر حسين خليل
Date: 05-05-2007, 12:17 PM
Parent: #52
حنفي ياكابو :
الواحد بقي يشوفك الصحف السيارة أكتر
من الشارع السيار ( الشارع الماشي)
والناس الماشين .....
أنا قاعد ومارق قريب مروق الحنة من ضفر
العروس حبة حبة زي مروق النفس والروح
كابو :
وين لياليكم ياخي ؟
.............
خضر
|
Post: #55
Title: Re: Re:( )
Author: محمد حنفي
Date: 05-05-2007, 01:21 PM
Parent: #54
ازيك ياخضور والله الحال بس هو الداسين ومرحب بيك في ليالينا وما تنقطع
|
Post: #56
Title: Re: ( )
Author: خضر حسين خليل
Date: 05-09-2007, 02:51 PM
Parent: #1
كابو
الخرطوم أعتقد أنها تطردني قسراً من دروبها
خضر
|
|