Post: #1
Title: شئ عجيب ! بوست خالي مسؤولية !
Author: خضر حسين خليل
Date: 03-18-2009, 10:17 AM
Parent: #0
انه وبعد :
تجي من الصباح فرتقك فرتقك فرتقك
تقرأ نفس كلام أمس !
تقوم تمرق تجي بعد ساعتين تلات اربعة
تجي تقرأ نفس الكلام القبل ساعتين تلاتة اربعة
تقوم تجي بالليل
برضو تجي تقرأ نفس الووك ورورووك
زمان لمن كنا طلبة (الكلام دة قبل تلاتين أربعين سنة) بلغة المنبر طبعاً المهم الواحد كان عندو طموح
إنو ممكن يعمل شيتاً عليهو القيمة لدرجة كان من الممكن انو الواحد يفقد روحو عديل في سبيل قناعاتو
قناعاتو دي طبعاً زاتها خشم بيوت في زمنا السجمان داك .
يعني تلقي واحد قناعاتو حبيبتو
وتاني تلقي زول قناعاتو الهلال
وواحد تاني قناعاتو الأمل عطبرة
وواحد تاني قناعاتو كباية عرقي
وواحد قناعاتو الهجرة يعني بالعربي كدة يتفكفك بأي طريقة انشاء الله بي (سمبك)
الي جانب انو في ناس تانين اهتماماتهم كانت سياسية
نحنا ديل طبعاً كنا مصنفين ضمن القناعاتهم مرحلة التطور الوطني الديمقراطي وهو في تقديري برنامج
متكامل لكن لسوء حظوا بفقد في أدواتو يوم ورا يوم ! أدوات التغيير وكيفيتو وامكانيتو ودة (نقاش طويل
حيكون برعاية صديقنا محمد حسبو أو حسبو كما نسميه) بس لسه ربكم رب الخير ما سهل لينا في تساهيل الكتابة .
المهم في حالة بتاعت قرف عام وزهج واحباط ودبرسة وتلقي اي زول مركب ليهو وش كرتون ! اختفت حاجات كتيرة
لكن أكتر حاجة ألمتني هو كلام قالو لي ماسا صاحبنا في التلفون قبل يومين . قال لي يا خضر نحنا بقينا
نتلم كلنا وبنقعد نعاين لي بعض يعني مالاقين شيتاً يقولوه ! الونسات طبعاً كملت ! الضحك والقرقراب ديل
مشوا بعدلهم ! ولأكثر ما أعجبني تعليق لصديقي قرمبوز انو الناس تخت علم قبلما يبدوا يتكلمو !
ياخوانا نحنا ماشين وين بالضبط ؟ طاحونة البلد أم مقنيتة رامية طوالي دي لمتين حتظل تطحن أحلام الناس
ثم ياخ الناس الفي بلاد (برة) علي قول ميمي صاحبي حيرجعوا ولا عاملين خروج نهائي وتذكرة اتجاه واحد
أنا غايتو واحد من الناس البقيت بدخل المنبر دة أفتش فتيش علي أمل باقي في النهاية بتخارج بي دربي
لأنو كان قعدت شوية ممكن أصاب بحالة بتاعت فقدان وعي . وأنا الشهادة لله الي جانب (أعوذ بالله من كلمة أنا)
ماناقص فقدان وعي !
البوست دة ذاتو مافي زول يتوقع مني رد لأنو بي صراحة أنا مافتحتو زاتي عشان ارد علي زول أنا فتحتو عشان
أثير أسئلة يعني العايز يجي يكتب فيهو يجي وهو عامل حسابو انو هو برضو صاحب (حلال) زي ما بقولو أخوانا
الخليجيين ! آسف كفلائنا الخليجيين ! هسي بالله دة اسمو كلام زول عندو بلد مليون ميل مربع ذابحو النيل من
الوريد للوريد يكون شغال موظف بمهنة (عامل نجار مباني) طيب علي الاقل حقي الاكاديمي دة ياخي انصروهو
ينصركم الله !
وأقول قولي هذا واستغفر الله العظيم لي ولكم ! قومو الي حاجاتكم وتصاريفكم وارزاقكم يرحمكم الله !
انتهي وكذلك الصداع هالكني !
|
Post: #2
Title: Re: شئ عجيب ! بوست خالي مسؤولية !
Author: khatab
Date: 03-18-2009, 10:52 AM
Parent: #1
نادر جداً .. تلقى ليك نفاح ضوامرقك من , الحاله المنبريه المعاشه
ودى حاله معبره جداً عن ..مايعيشه السواد الاروع منا .. والداير اعرف
مدى بعده اوقربه من .. الحاله المنبريه دى .. اسأل نفسو الاسئله دي
.
عندى حاجه معينه
غير ..بوستى اوبوست صاحبى اوبوست الزول الانا
وصُحبانى
مناقرنو !!
.
هل عندى موضوع اصلاً ولا جاي ساي
فتاح يا عليم رزاق ياكريم .!
.
مداخلتى فى موضوع معين لاي مدى ممكن تكون ايجابيه
.
ويمكنكم اضافة ماتودون من اسئله
.
خدر يا صاحب
( حلال ) نمره واحد , مزيد من الاسئله
.
؟
.
|
Post: #3
Title: Re: شئ عجيب ! بوست خالي مسؤولية !
Author: خضر حسين خليل
Date: 03-18-2009, 11:14 AM
Parent: #1
بمناسبة حلال
طولنا ماسمعناأخبار عن (حلال للنقل) !
المشروع دة أمموه ولا خصخصوهو ولا الحاصل شنو ؟
طيب ضف لذلك انو الواحد عايز يقدم مقترح
يعني مثلاً بدل ما تقول لي زول شنو شنو شنو من المفردات ديك
نقوم نخصص (ايكونات) يعني مثلاً يا زنديق نرمز ليهو بالرقم (101)
يا تافه يامنحط يا حقير يا يا يايايا نرمز ليهو بالرقم (100)
يعني تجي خاشي بوست مثلاً لي زول مغيوظ منو
بدل ما تكتب كلام فارغ ومسيئ ليك انت في الاساس الاول
تقوم تخت ليهو رقم من الارقام الفي القائمة أدناه
لأنو بالجد المسألة دي بقت مكررة شديد مع ملاحظة امكانية اضافة ارقام
فالارقام كتيرة والحمد لله في حالة اضافة اي مفردة جديدة للقائمة !
يا مناتل = 17
مناضلي كيبورد= 12
امنجي = 20
ياجميلة وكل ما يدرج تحت هذه التوصيفات = 1
يا جميل وكل ما يدرج تحت هذه التوصيفات = 6
يا عوير ويا بتاع وياشنو ماتعرف = 107
وهكذا دولايك ولا كواديك ماعارف !
|
Post: #4
Title: Re: شئ عجيب ! بوست خالي مسؤولية !
Author: هيثم درار
Date: 03-18-2009, 11:50 AM
Parent: #1
| Quote: وواحد تاني قناعاتو كباية عرقي |
انا دايرك تفند لى الفقرة دى ، يعنى زى منو ديل ؟ أشكالم بتكون كيف قبل وبعد؟والعدد بتاع الكبابى كم يعنى كباية ولا اتنين ولا تلاتة ولا تلطاشر
ما تجى تقول واحد قناعتو كباية عرقى
الصداع راح ولا لسة؟
|
Post: #5
Title: Re: شئ عجيب ! بوست خالي مسؤولية !
Author: فيصل محمد خليل
Date: 03-18-2009, 12:11 PM
Parent: #4
6
|
Post: #6
Title: Re: شئ عجيب ! بوست خالي مسؤولية !
Author: Osama Mohammed
Date: 03-18-2009, 12:23 PM
Parent: #5
6
|
Post: #7
Title: Re: شئ عجيب ! بوست خالي مسؤولية !
Author: خضر حسين خليل
Date: 03-18-2009, 12:24 PM
Parent: #5
كباية واحدة = 7
7 ياهيثم
|
Post: #8
Title: Re: شئ عجيب ! بوست خالي مسؤولية !
Author: خضر حسين خليل
Date: 03-18-2009, 01:46 PM
Parent: #7
66 = نتلاقي بعدين
|
|