غنيوة حب لإنسانك أو لزول الناس محجوب شريف

سلمت حلمت
حلمت سلمت
بفجر العالم
طيب وآمن

مقاسك من مقاس وطنك
ضراعك من حلم فاسك
همومك من دموع ناسك
وناسك من ضراع بأسك
فياالمحجوب سلم رأسك


وعافيتك


سنينك عمرو ما كليت
ولامليت من الحوبات
أناشيدك عصافيرك
تفكها من زمن تاتيت
نباريها
نغنيها
غنيوة الواجب اليومي
مشاويرك
بتطلع من شقوق أرضك

نغنيلك

نغنيلك أماني (أماني) ماجايات
(والجايات يسنن سن)
تغني أحلامنا بي عمرك
ونغنيلك
غناياً جد
يفوت الحد
بصوت الشارع اليهدر
وكت يكسح متاريسو
يخت المدفع الخازوق
مكانو(الصاح)

ونغنيلك

تجيك الطبقة
بالابرول
بالازميل
بالمنجل
وبالاشواق

(لتاخدك) إنت يالمحجوب
بالاحضان

نغنيلك
تجيك مريومة أم الكل
يجيك ألماظ
يجيك ترهاقا بي نفسو
يجيك (جوزيف ) يجيك أوهاج
يجولك جملة الشهداء
وتبقي المحضر المفتوح
بدل نقطة

لانك سيدي (المحجوب)
كتابة الشارع المافيش
مدادك من دموع الكل

ونغنيلك

بتستاهل
وتستاهل بتستاهل

بتستاهل مكانك
إنت ما المشفي
لا المنفي
لاشالا ولاكوبر
مكانك سيدي المحجوب
مكانك إنت يا محجوب
مكانك في حباب العين
مقرك في قلوب الناس
فيا إنسان
نعزك نحنا
بالعندك
وبالمافيش
نغنيلك
واغنيلك واغنيلك
واغنيلك


خضر

الخرطوم

10/5/ 2006 م

صديقي العزيز خضر

Quote: لقيتك فى طشاشى دليل وفى حرّ الهجيره مقيل ركزت على رضاكِ عصاى لقيتك فى حياتى جذور بنيّه اتلفّحت بالنور مهجّنه من غنا الأطفال.. ومن سعف النخيل والنيل ومن وهج الشمس موّال وان اخترتينى إنساناً.. عزيزَ النفس بتمنّى.. وبسيط الحال علىَّ حرَّمت زرعاً ما سقيتو حلال ومافصّد حصادو قفاى وبينى وبينك الضحكه.. ورحيق الشاى وطعم الخبز والسُتْره.. ومساء النور وعمق الإلفه.. بين النهر والنخله وغنا الطمبور وصدق العُشْره بين الأرضِ.. والإنسان وبيني وبينك الفكره.. وجمال الذكرى والنسيان وحسن الظن ومشوار الحيا اليوماتى ما بين الجبل والسهل.. ما بين الصعب والسهل عزّ الليل.. وفى سكّه مطر بكّاى فلا هماً تشيلى براكْ ولا جرحاً أعانى براى ولانا على بعض نمتن

هذا هو محجوب شريف فلنرفع الأكف ضراعة لأجله

اشراقة
يا أخت دمي


تري كم تبلغ المسافة أشواقاً بين الخرطوم ولندن . محجوب غادرنا وحتما سيعود حينها سنغني
سنغني حقاً لهذا الوطن بعافية محجوب .

شاكرين جميل حضوركم

خضر

أناشيدك عصافيرك
تفكها من زمن تاتيت
نباريها
نغنيها
غنيوة الواجب اليومي

التحيات الطيبات
تحياتي يا خدر ،
أعرف مثلك تماماً ،
من هو محجوب شريف .
من هو الذي بني ذواتنا "النذيهة" بحمده
الصامدة باشعاره واحلامه المشروعه
من علمنا الحب والغني والمشي بمهابة
من علمنا حب بيوتنا، أوطاننا ، عشة وميري
وغني تلميذة صباح الجُمعة وأم بتهبب نار الشاي
من علمنا ان لا نسرق ولا نكذب ولا نهادن ولا نبيع ولا نلين...

قربما
اذيك ياقرمبوز

لمحجوب بيت شعر كبير في معانيه يقول فيه (الباع همومو سرق)
علمنا الكثير ياصاحبي ولاذال علمنا كيف يعيش الانسان من أجل الاخرين
علمنا الي جانب كل ماذكرت معني التضحية . ياقرمبوز الزول ده عجيب
وكفي بالله وكيلا .

خضر

This is nice Khider. Mahjoub deserves it and more

خضر حسين الراجل الجدع

غادرنا شاعر الشعب محجوب شريف للعلاج



نتمني لة الشفاء العاجل


فيصل محمد خليل

Quote: لانك سيدي (المحجوب) كتابة الشارع المافيش مدادك من دموع الكل ونغنيلك

وياخـضـر يا أصـيل.... قلبـك وروحـك اتغـذوا مـن قلب وروح محجـوب شـريف..
سـكن القلـوب بصـدقـه وقنـاعته وحبه الذي لا يعرف الحـدود للوطـن..

Quote: بالابرول بالازميل بالمنجل وبالاشواق (لتاخدك) إنت يالمحجوب بالاحضان

حـبـك للسـودان ياخضر...للمسـاكين ...لللأرض ولعم ابراهيم...كـبير زي حـب محجـوب شـريف...
كـثرا ياخضـر ماحلمت وانـا هنـا بإني حـايمة وسط أهلي الطـيبين..... ابحث في وجـوههم المتعبة عـن أيام ضـاعت مننا ومنهم..عـن حـنين قـديم لوجـود صـار أمـل مستحيل...

Quote: نغنيلك تجيك مريومة أم الكل يجيك ألماظ يجيك ترهاقا بي نفسو يجيك (جوزيف ) يجيك أوهاج يجولك جملة الشهداء وتبقي المحضر المفتوح بدل نقطة

يخجـلني أو يـؤلمني أن كـلماتي لاتشبه كـلماتك وكلمات الآخـرين في التعبير والحب لمعلم حب الوطـن..

Quote: بتستاهل وتستاهل بتستاهل بتستاهل مكانك إنت ما المشفي لا المنفي لاشالا ولاكوبر مكانك سيدي المحجوب مكانك إنت يا محجوب مكانك في حباب العين مقرك في قلوب الناس فيا إنسان نعزك نحنا بالعندك وبالمافيش نغنيلك واغنيلك واغنيلك واغنيلك

ولكـن ياخضـر العـزاء فيما تقـوله انت ويقـوله الآخـرون مـن كـلمات عميقة له....

نتمـني شـفاءا مـريحـا لمحجـوبنا..

وتسـلم ياخضر ياقلب الطين والخضـار..

مـني

وطنا..

الباسمك كتبنا ورطنا

أحبك

مكانك صميم الفؤاد

وباسمك اغنى..

وتغنى السواقى

خيوط الطواقى

سلام التلاقى

ودموع الفراق

واحبك ملاذ

وناسك عزاز

أحبك حقيقه..

وأحبك مجاز

وأحبك بتضحك

وأحبك عبوس

بعزة جبالك ترك الشموس

وما بين ظلالك

افتش وأكوس

أفتش طفولتى وملامح صباى

بناتك عيونن صفاهن سماى

وهيبة رجالك بتسند قفاى

صحى بتملا عينى..

وتشّرف غناى

بحضرة جلالك..

يطيب الجلوس

مهذب أمامك يكون الكلام

لأنك..

محنك

عميق الدروس

مجيد المهابه ومديد القوام

شبابك..

تشابك

شديد الزحام

أراهم..

وراهم

غبار الحياه

مداين..

تعاين

كأمّ العروس

تهلل..

تكلل

جبين الإمام

رزازاً يبلل أغانى الخليل

أصدق كلامك حقيقه وبخاف

أخاف الطريق..

اللى ما بودى ليك

وأعاف الصديق

اللى ما بهم بيك

معاك انتظارى..

ولو بالكفاف

وعنك بعيداً

أبيت الرحيل

وبيك اعتزاز الصباح الجميل

جميع الأغانى اتكالن عليك

عزيزي كامل
تحياتي الحارة

وبأسمك اغني تغني السواقي شكراً لمحجوب شكراً لحضورك هنا كامل

خضر

مني خوجلي
الباحثة عن العدالة والحب والخير .

منذ الامس وأنا احتفي بحضورك البازخ
محجوب شريف ده يامني زول عجيب يمشي ومابطاطي يحوم ماشاء له الدرب من المشي بجلبابه الابيض في حواري امدرمان يصور حينها مايصور من المشاهد ليصيغها لحكم تمشي بيننا بسفره خيم إحباط كبير علي قلوب العديدين من الاصدقاء والصديقات ومافي ونسة بلا المحجوب هنا دعاء شعبنا كله موجه لشفاء هذا البني آدم .
عم ابراهيم حدثته هذا الصباح عن سؤالك عنه كان يحمل في يمينه كباية الشاي وفي اليد الاخر (رغيفة) هو يهديكي الرغيف والدموع سيدتي وكثير السلام . هكذا بلغني بلغته البسيطة ( قول ليها اول ماتجي انا عازمك شاي بي رغيف بلدي) أخشي عليه من السفر ايضاً السفر يامني سفراً بلا ميعاد .
شكراً صديقتي وبيننا الف موعد .

خضر

عزيزي فيصل
تحياتي الحارة

امنيات لاتحد لملهم شعبنا محجوب سيعود حتما لهذا الشعب سيعود يافيصل
لينتقي صدر السماء لشعبنا .
تحياتي لقلبك الاخضر

خضر

ناصر

تحياتي الحارة

بيستاهل بيستاهل ياناصر .


خضر

بالسلامة تعود

لشاعر الشعب المحبة وعاجل الشفاء

خضر

...

سلام استاذ خضر... كلماتك جميله مثل من حكت عنه وخاطبته..

Quote: محجوب شريف ده يامني زول عجيب

هو فعلا عجيب...ساحر...ادهش الكلمات نفسها قبل ان يدهش السامعين...


وباسمك اغنّي..
تغني السواقي...خيوط الطواقي...
سلام التلاقي... ودموع الفراق...



الف سلامه ليـــك يا ساحر الكلمات..

عزيزتي نجوان
تحيات المحبة والسلام
شاكرين كلماتك ولنغني لمحجوب وندعوا له بعودة قريبة وشفاء عاجل

محبتي نجوان

خضر