Post: #1
Title: أسماء بين قوسين.. على أصاحبها أن يجمعوا هنا ..
Author: welyab
Date: 02-05-2008, 10:02 AM
Parent: #0
أسماء بين قوسين.. على أصاحبها أن يجمعوا هنا ..
للأسماء دلالات كثيرة .. وكذلك مواقف طريفة!! وأيضا هنالك أسباب قد تكون مربوطة في أن يطلق الأب أو الأم ذاك الاسم أو اللقب ..
وهنالك أسماء في تركيباتها الثلاثية أو الرباعية (من الحفيد للجد) رصة رصينة جميلة اقرب الى معزوفة موسيقية ..
والبعض الأخر و رغم جاذبيتها منفردة، لكنها في التراكيب الثلاثية أو في رصتها تكون غير متجانسة . وبعض الأسماء في تركيباتها تجدها وكأنها مبعثرة تحتاج إلى رصه أو تنسيق وترتيب من جديد !!!
وفقدان التجانس و الرصه الموسيقية المموسقة أكثر من يتأذى بها الجنس اللطيف دون سواهم فقد لا يهتم احمد محمد احمد أو عتريس بخيت عتريس ..أو جمعة خميس جمعة . بتلك الشكلية النمطية المتوارثة أو السائدة في وسط مجتمعاتنا والآتية من إصرار بعض الأسر في أن يلحق الآباء أسماء الأجداد لأبنائهم ( يطلق الأب اسم والده لابنه ) فتبدوا الأسماء في تركبينها الثلاثية كأنها بين قوسين ( بين مزدوجين ) . ولكن الحمد لله الأنثيات في أواسطنا العربية هن أكثر حظا .. أو غير معنيات بهذا الأمر كثيرا !! فلا يترتب على تلك النمطية في إطلاق الأسماء أي تأثير قد تركيب وترتيب الأسماء عند البنات ولا يكون ملموسا في أغلب الحالات .. فالبنت إذا كان اسم أبوها من ذوي القوسين أو المزدوجين وأحست أنه يمكن أن يكون في تناوله بتلك الكيفية أي خلل أو مشكلة في الرصه الهارمونية ستجد من الحيل ما هو شبيه بتلك الكريمات المرطبة التي تخفي بها بعض العيوب !!
اقرب الحلول هو أن لا تصل باسمها إلى الجد الرابع . وفي سبيل " البرستيج " لها أن تحتفظ بحقها في أن تختار الاسم الثالث أو الرابع ..و لها أن تبحث حتى الجد السابع عشر في مشوار البحث عن التجانس والرصة الموسيقية .
وكما تقدم هنالك أسماء لها وزنها الموسيقي وأيضا هنالك مناسبات ومفارقات وأسباب ومسببات في إطلاق بعض الأسماء والألقاب
فهل لي أن استأذن الإخوة أصحاب التجارب او تلك الأسماء والمواقف في الجمع هنا والبوح ببعض منها
سوف يكون لي إضافات لاحقة .. وطرائف وروايات منقولة ..
|
Post: #2
Title: Re: أسماء بين قوسين.. على أصاحبها أن يجمعوا هنا ..
Author: حمزاوي
Date: 02-05-2008, 10:13 AM
Parent: #1
| Quote: هنالك أسماء لها وزنها الموسيقي |
اخونا الصحفي النوبي الهميم الاستاذ
حسين حسن حسين حسن حسين
|
Post: #3
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-05-2008, 10:41 AM
Parent: #2
وقبل أن أعرج بكم إلى حظيرة الممنوعات . استسمج مجازا أصحاب بعض الأسماء التي يمكن أن ترد هنا .. وبدون قصد مسبق في التجريح أو الإساءة . فان ما سيرد من اسماء هو مجرد أسماء في سبيل الاستدلال.
الخال حمزاوي دايما جاهز!!
فجاءت مشاركته قبل الملحق!!
يا خال ما خوفتنا.. وكمان اصلو انا اليومين دول بقيت جبان فكنت حضرت الملحق الاضافي لزوم التجميل والهروب من المسؤوليات والملاحقة القانونية ...
وعاوز اضيف العبارة القانوبية المتعارفه عليها والتي تفيد بان التمهيد أو الملحق يعتبر جزء لايتجزء من اصل الموضوع ... كده تمام !! ومافي حد يقول انا حأرفع عليكم دعوى قضائية ..
اما اخونا الاستاذ حسين حسن حسين رئيس جمعية الصحفيين وعضو المنبر
أنا منزل اسمه في الجوال ( ح ح ح )..
|
Post: #4
Title: Re: أسماء بين قوسين.. على أصاحبها أن يجمعوا هنا ..
Author: sama7
Date: 02-05-2008, 10:53 AM
Parent: #1
سلام
يا جماعة دى خارج النص لكن مدام الموضوع أسامى فسرو لينا
حسنين وعوضين ومحمدين
مودتى
سماح
|
Post: #5
Title: Re: أسماء بين قوسين.. على أصاحبها أن يجمعوا هنا ..
Author: حسن طه محمد
Date: 02-05-2008, 02:26 PM
Parent: #4
حامد شاكر
|
Post: #7
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-05-2008, 04:24 PM
Parent: #5
اخوي حسن طه ..
صاحبك ده أكيد يكون قريب النور ضو البيت
|
Post: #6
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-05-2008, 04:18 PM
Parent: #4
لو سمحتم ياجماعة ادوني فرصة التعليق على واحدة من الستة دول 2(عوض + محمد+ حسن)
يقالّ- لو الواحد بيموت ليها جناها بتسمي اسماء غريبه شوية عشان العيال ما تموت !! وكمان اسم (عوض ) يعني يمكن يكون كلامي غلط لكن دي فرضية..المهم في بعض الاسر يتسمي عوض لاول مولود جاء بعد غياب عزيز في الاسره ليكون عوضا له !! بس عوضين مش متأكد منها..
تخريمة
انا حكاية الارقام بدل الحروف دي فهمتها متأخر شديد يا سماح .. كده الاسم صح ..ولا كمان اكون غلط في قراية الاسم ...
|
Post: #8
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-05-2008, 06:49 PM
Parent: #1
سلام يا ولياب ..
من الاسماء التي قابلتني إسم أخونا ودفعتنا في معهد الموسيقى والمسرح (الحَسِيْن حسين حسن أحمد) ..
ومن دفعتنا في الهند زميلنا (نجيب محفوظ) ، حيث أن أباه إسمه محفوظ وهو إسمه نجيب ، وليس إسم واحد كما يتبادر إلى الذهن ..
أما أطرف الأسماء فليس خافياً أثناء حرب الخليج الثانية أن أطلق عدد من السودانيين إسم صدام حسين على أبناءهم المواليد الجدد ، ولم تفت هذه التقليعة على عمنا في الحي فأطلق على مولوده الجديد إسم صدام حسين ليكون إسم المولود بالكامل هو (صدام حسين أبكر) !!
|
Post: #9
Title: Re: أسماء بين قوسين.. على أصاحبها أن يجمعوا هنا ..
Author: خالد حاكم
Date: 02-05-2008, 07:22 PM
Parent: #8
ولياب... مسكاقمى
فى مدرسة دنقلا الثانوية كان عندنا زميل اسمه( كرار ساتى كرار ) واستاذنا الجليل المرحوم احمد بدر كدوده وبسخريته المعهودة كان بيناديه اختصارا ( كراساتى)
|
Post: #10
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-05-2008, 08:14 PM
Parent: #8
ناذر محمد الخليفة
سلام وتحية ..
| Quote: أطلق عدد من السودانيين إسم صدام حسين على أبناءهم المواليد الجدد ، |
ومن تلك المسميات في العهد المايوي وايام مشروع الوحدة (ناصر.. قذافي ..نميري) لكن انا قابلني اسم ( قذافي نميري ) مش متأكد هل هو اسم واحد مركب ولا الولد قذافي وابوه نميري ...
|
Post: #11
Title: Re: أسماء بين قوسين.. على أصاحبها أن يجمعوا هنا ..
Author: خالد العبيد
Date: 02-05-2008, 11:30 PM
Parent: #1
في السعودية زاملت صحفي سوداني رائع اسمه
السر الخزين
بالله تأمل هذا الاسم
وهنالك روائي شيوعي عراقي اسمه
غائب طعمة فرمان
اسمته والدته غائب لان والده كان غائبا!
|
Post: #12
Title: Re: أسماء بين قوسين.. على أصاحبها أن يجمعوا هنا ..
Author: خالد العبيد
Date: 02-05-2008, 11:40 PM
Parent: #1
استوقفني كثيرا اسم
فضل الله برمة ناصر
الضابط والوزير السوداني المعروف
اهلنا في غرب السودان يسمون برمة ويسمون فضل الله
لكن من اين جاء اسم ناصر هذا؟
|
Post: #13
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-05-2008, 11:43 PM
Parent: #1
واحد بلدياتنا زوجتو وضعت وهو غير موجود ، إتصلت بيهو تلفون وأول بشارة قالتا ليهو كانت : الكريم أدى ! (أعطى) ، وبعد أن حمد الزوج سلامة زوجته أصر عاى أن يطلق على المولودة إسم (الكريم أدى) ..!
|
Post: #14
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-05-2008, 11:49 PM
Parent: #1
حكى لي أحد ممن عملو في الجنوب إبان فترة الحرب أن أحد المتمردين السابقين كان في خضم عمليات حربية ضد قوات الحكومة ، وصادف أنه كان ينتظر مولوداً ، وفي خضم المعركة شاهد عربة تنقل إمداد لجيش الحكومة فصوب نحوها مسدسه وأصابها في إطارها و (طرشق العجل) ، وكان فخوراً بذلك العمل وبعد إنجلاء المعركة جاءه نبأ يخبره أن زوجته وضعت مولوداً ذكراً .. فلم يحتار صاحبنا كثيراً فأطلق على مولوده إسم (أجل هكومة طرشق) !!
|
Post: #15
Title: Re: أسماء بين قوسين.. على أصاحبها أن يجمعوا هنا ..
Author: خالد العبيد
Date: 02-05-2008, 11:50 PM
Parent: #1
ومن الاسماء المتداولة قديما في غرب السودان
قدح الدم
وهنالك مغني اردني اسمه
عبداللات
بجانب :
وعبدالنبي
والرب يجود
ولي عودة لهذاالبوست الشيق
|
Post: #16
Title: Re: أسماء بين قوسين.. على أصاحبها أن يجمعوا هنا ..
Author: mohamed osman bakry
Date: 02-06-2008, 00:12 AM
Parent: #15
بخيتة بخيت
|
Post: #17
Title: Re: أسماء بين قوسين.. على أصاحبها أن يجمعوا هنا ..
Author: Hatim Salih
Date: 02-06-2008, 00:17 AM
Parent: #1
سلامنا وتحياتنا للعم ولياب
طبعاهنالك بعض الأسماء الشائعة في السودان تعتبر غريبة في بلاد أخرى
تذكرت زميل السكن في الجيزة مصر محجوب قمر الدين
عندما فقد محجوب جواز سفره في ذات يوم من أيام رمضان الغائظة ذهب بنفسه لقسم شرطة الجيزة لأستخراج خطاب فقدان الجواز
ظابط القسم: أسم حضرتك أيه
محجوب : محجوب قمر الدين
ظابط القسم: يا نهار أبيض ما تروح يأبني أفطر طالما هو مؤثر فيك للدرجات دي !!
محجوب : ؟؟؟؟؟؟؟؟؟؟
ظابط القسم:ممكن تقول أسمك تاني بصوت عالى كده أهو (الظابط وعليه أبتسامه خبيثة)
إذا بالأخ محجوب ينفجر من الضحك ومعه كل قسم الشرطة بالجد يأبني أنت بتهزر خد القمر الدين أهو وأبقى سلملى على القمر 
|
Post: #18
Title: Re: أسماء بين قوسين.. على أصاحبها أن يجمعوا هنا ..
Author: ود الباوقة
Date: 02-06-2008, 00:21 AM
Parent: #17
ويحب الا ننسى اخي ولياب حيدر بورسودان القضارف وهو فنان مشهور ..
ودالباوقة
|
Post: #19
Title: Re: أسماء بين قوسين.. على أصاحبها أن يجمعوا هنا ..
Author: حمزاوي
Date: 02-06-2008, 05:50 AM
Parent: #1
من الاسماء المتداولة بكثرة في اواسط السودان
خادم الله *** انا نفسي اعرف الولية دي تخدم الله كيف وفي شنو
جار النبي *** النبي عليه الصلاة والسلام مات قبل الف سنة يكون جارو كيف (هيطه بالهيطه)
جار الله *** سبحان الله
دفع الله *** بقي دي انا ما قادر افهمها
|
Post: #20
Title: Re: أسماء بين قوسين.. على أصاحبها أن يجمعوا هنا ..
Author: abuguta
Date: 02-06-2008, 07:51 AM
Parent: #19
انا قابلنى جندى نميرى
| Quote: دفع الله *** بقي دي انا ما قادر افهمها |
عمو حزاوى اسى كلامك دا بتنكرو,,,,
بجيك ابو فتاق وبنزلك فى الدقداق
دفع عنده اكثر من معنى ولكن هنا معناها العطية والهبة
ولياب واحد من بلدياتنا اسمه( محمد الزين محمد الزين) وهذه اربعة اسماء
وقاعدين نقول ليه محمد الزين تربيع
اكيد بكون قابلك الاسم المركرر مرتين او ثلاثة
زمان واحد فى التعليم الفنى اسمه ابراهيم ابرهيم ابراهيم
وللناس فى اساميهم شئون,,
|
Post: #21
Title: Re: أسماء بين قوسين.. على أصاحبها أن يجمعوا هنا ..
Author: Nasruddin Al Basheer
Date: 02-06-2008, 08:01 AM
Parent: #19
| Quote: وهنالك أسماء في تركيباتها الثلاثية أو الرباعية (من الحفيد للجد) رصة رصينة جميلة اقرب الى معزوفة موسيقية .. |
موضوع ظريف ولطيف يا ولياب..
أخوي الكبير اسمو الخماسي أحمد البشير محمد أحمد البشير
جاب ولد سماهو محمد وأصبح اسمو الكامل على النحو التالي:
محمد أحمد البشير محمد أحمد البشير
(وهؤلاء ستة أشخاص مكررين في ثلاثة أسماء)..
شفت الموسيقى والحفلة العندنا في البيت؟
حامد شاكر هو زميلنا في هذا المنبر، له منا التحية..
أما عن الأسماء الغريبة فلم أجد أغرب من عبد رب الرسول..
يعني كان يسموهو عبد الله ويفكونا من التلتلة دي..
|
Post: #23
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 11:01 AM
Parent: #21
سلام للجميع
بالمناسبة انا لقيت نفسي مزنوق زنقة شديدة في الرد على تعليقاتكم الظريفة . و كلما أقرا تعليق اتذكر حاجة قريبه منها.. فاعذروني لو ما وقفت عند كل واحدة !! بس جايكم والجراب مليان .
| Quote: عن الأسماء الغريبة فلم أجد أغرب من عبد رب الرسول.. |
تذكرت بكلامك (عبد الرسول سياف) وزحمة ايام افغانستان. كان الراجل اسمه متصدر نشرات الاخبار ومش عارف قالو الاسم فيه مشكلة فقهية وتحول اسمه من عبد الرسول الى عبد رب الرسول ..
انا ما قادر افهم الحكاية دي مرت ازاي .. يعن السيرة الذاتية بتاع الراجل بتقول انه | Quote: وُلِد في مديرية "بغمان" بولاية كابول سنة 1944م. تخرج في كلية الشريعة بجامعة كابول عام 1967م، وعين بها محاضرًا بعد أن قضى سنة في الخدمة العسكرية الإجبارية. سافر إلى مصر سنة 1971م لمواصلة الدراسات العليا، ورجع إلى أفغانستان بعد الحصول على شهادة الماجستير من قسم الحديث بجامعة الأزهر. |
كيف قدروا يظبطو كل الاوراق دي... من شهادة الميلاد والشهادات الدارسة وثائق السفر وشهادات التخرج ...الخ....
|
Post: #22
Title: Re: أسماء بين قوسين.. على أصاحبها أن يجمعوا هنا ..
Author: خالد العبيد
Date: 02-06-2008, 10:48 AM
Parent: #1
وانا ماشي بعيد ليه
شقيقي الاكبر اسمه
مبارك العبيد احمد محمد
وزوجته عليها رحمة الله اسمها
اميمة العبيد احمد محمد
والاغرب ان امها اسمها مريم وامي اسمها مريم ايضا
تصدقوا !!
|
Post: #31
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 11:40 AM
Parent: #22
Quote: وانا ماشي بعيد ليه
شقيقي الاكبر اسمه
مبارك العبيد احمد محمد |
مشكلة تكرار بعض الأسماء في العائلة مشكلة
الواحد يغلط في اسماء اقرب الناس إليه .
ودي حكاية قريبة من حكايتك يا خالد ..
فبالرغم من أن اسم "أمين " غير متداول في مناطقنا . ولكن جدنا " الله يرحمه" سمي بهذا الاسم أحد أبنائه ... وأيضا ابن عمه كمان اختار نفس الاسم لأحد أبنائه!!! لحد كده ما في مشكلة !!
بس الغريبه بان لكل من هذا الأمين وذاك (ابن عمه) اسماء أطلقوه على أبنائهم فحدث خلط كبير وارتباك في اسماء أبنائهم .. فتجد نفس الاسم مكررا لدى أبنائهم
محمد –احمد- حسن – صالح . حتى اسماء البنات ..
فصار لدينا أبناء عمومه بنفس الاسم .. محمد أمين ..احمد أمين ..الخ... ومشتركين لحد الجد الخامس عشر ..
فكان الحل للتفريق بين هذه الازدواجية الممتدة إلى ما لا نهاية هو إلحاق اسم أم الجد (أحمد هانم) لأحد طرفي النزاع !!!
وحكاية تانية ..
محمد احمد وزوجته زينب
نفس الأسماء والشكلية متكرره
والطرفين لديهم أبناء بنفس الأسماء إسماعيل ومحمود .. يعني حكاية إلحاق اسم الأم ما نفعت !!! بس في واحد منهم عند اسم ولد مختلف .. فكان الحل هو فلان اخو فلان بدلا من ابن فلان..
|
Post: #24
Title: Re: أسماء بين قوسين.. على أصاحبها أن يجمعوا هنا ..
Author: عبد اللطيف بكري أحمد
Date: 02-06-2008, 11:07 AM
Parent: #1
بوست ظريف ،،
(تاجر سكر خريف) الله يرحمه توفى ،،
==
عندنا في الأبيض : ميرغني مكي ميرغني مكي (واحد زعلان منو قال
ليهو عال إسمك زي صوت البنقز كدا)
=
أكتر حاجة زهجتني : أختي سمت ولدها الباشق (تصورو)
هسي بقو يابيشو ويابشبش ،،
|
Post: #25
Title: Re: أسماء بين قوسين.. على أصاحبها أن يجمعوا هنا ..
Author: أبو ساندرا
Date: 02-06-2008, 11:12 AM
Parent: #1
برضو عندي واحد صاحبي إسمو
خالد العبيد
وزوجته إسمها
رقية العبيد
لكن عشان مايقولوا أخته شال الألف واللام
كان عندنا في الطيران المدني أسماء :
- الكلول المنون دفع الله
- آدم حكومة حق الناس
|
Post: #26
Title: Re: أسماء بين قوسين.. على أصاحبها أن يجمعوا هنا ..
Author: حمزاوي
Date: 02-06-2008, 11:16 AM
Parent: #1
اخونا الصحفي الاستاذ حسين حسن حسين حسن
واحد قال ليه يا حسين انت اسمك عامل ذي سورة قل يا أيها الكافرون
|
Post: #27
Title: Re: أسماء بين قوسين.. على أصاحبها أن يجمعوا هنا ..
Author: أبو ساندرا
Date: 02-06-2008, 11:27 AM
Parent: #1
الدمازين
أصلها مسمية على مكتشفها
آدم الزين
|
Post: #32
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 11:57 AM
Parent: #27
Quote: الدمازين
أصلها مسمية على مكتشفها |
سلام ابو ساندرا
ولو اني ما شفت الدمازين ... بس مش قادر استوعب حكاية الاكتشاف ...
يعني اكتشفها كيف ؟؟
هي جزيرة في بحر الظلمات !!؟؟
انا مش عاوز ناس الدمازين يزعلو ..
|
Post: #28
Title: Re: أسماء بين قوسين.. على أصاحبها أن يجمعوا هنا ..
Author: خالدة البدوي
Date: 02-06-2008, 11:29 AM
Parent: #1
الفاضل ولياب
رائك شنو عندي قريبي اسمه
( قمر الدين شمس الدين قمر الدين )
بوست لطيف ،،
|
Post: #29
Title: Re: أسماء بين قوسين.. على أصاحبها أن يجمعوا هنا ..
Author: أبو ساندرا
Date: 02-06-2008, 11:30 AM
Parent: #1
سيد سيدنا
شفتو الإسم ده خطير كيف
سيد سيدنا ذاتو
صاحب الإسم صديق قديم ودفعة ومن بورداب المملكة
وساكن في الإمتداد ومن كباتن الكرة
|
Post: #33
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 12:09 PM
Parent: #29
واحد قريبنا راح زياره لعمه تاجر .. المهم عمه طلع مشوار قريب وقال ليه لو حد سأل علي قول ليه انا قريب وبرجع بسرعة
المهم .. مافي دقائق والا جاء راجل مليان ومتهندم وراكب عربية آخر موديل وسأل قريبنا عن عمه .. الولد وبسرعة قال ليه اتفضل اقعد هو قريب .. لكن الضيف اعتذر وقال لقريبنا قول لعمك " قريب الله " سأل عليك وراح في حال سبيله
الولد قعد مشدوه لغاية ما عمه وصل !!
قال ليه انا يا عمي في راجل جاء وسأل عنك ومن غير ما يقول اسمه كنت عرفتو!! طلع قريب الله !!
|
Post: #30
Title: Re: أسماء بين قوسين.. على أصاحبها أن يجمعوا هنا ..
Author: sama7
Date: 02-06-2008, 11:31 AM
Parent: #1
| Quote: انا حكاية الارقام بدل الحروف دي فهمتها متأخر شديد يا سماح .. كده الاسم صح ..ولا كمان اكون غلط في قراية الاسم ... |
%100
أما قصص ناذر دى دايرة ليها تحقيقات
سماح
|
Post: #34
Title: Re: أسماء بين قوسين.. على أصاحبها أن يجمعوا هنا ..
Author: sama7
Date: 02-06-2008, 12:19 PM
Parent: #1
خالد العبيد
Quote: وانا ماشي بعيد ليه
شقيقي الاكبر اسمه
مبارك العبيد احمد محمد
وزوجته عليها رحمة الله اسمها
اميمة العبيد احمد محمد
والاغرب ان امها اسمها مريم وامي اسمها مريم ايضا
تصدقوا !! |
أخوك دا عرس أختو عديييييييل كدا
دى بالجد غريبة بس فعلا تكرار الاسامى بخلى الناس تتحير
وتبقى الحكاية فى الاسئلة الحتجى ورا بعد ما تقول اسمك زى (العبيد أحمد محمد ياتو فيهم؟؟؟؟؟؟؟)
وتبقى زى قصة الطيب والتمساح
مودتى
سماح
|
Post: #35
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 01:12 PM
Parent: #34
Quote: استوقفني كثيرا اسم
فضل الله برمة ناصر
الضابط والوزير السوداني المعروف |
وبالمناسبة دي!! من الاسماء ما يمكن ان يكون مهضوما لفترة..بس مش ممكن يستمر مقبولا طيلة العمر .. بعد ان يتجازو صاحبة الستين أو السبعين !! ذي ( صغيرون الزين) ممكن يكون صغيرون .. وزين .. لحد متين ولكام سنه ..
واحد مسطول وقف امام لوحة معلقة على باب بيت مكتوب عليها (كوكو سمير كوكو)
قال يا حرام.. الود ده مزنوق شديد!!
|
Post: #37
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 01:26 PM
Parent: #35
من الشائع أن يطلق اسم عزيزة على السيارات
وانأ كنت تركت العمل لدى جهة وبعد فترة جاء احد الزملاء لزيارتي بنفس السيارة التي كنت استخدمها ..
جاءت مداعبتي بتلقائية
دي مش عزيزة ؟؟
فكانت المفاجأه في احابته ....
حيث اجاب .. وبكل عفوية .... لا أبدا ..
دي أختها!! بس في شبه شديد !!
وبدون مقدمات نادى على زوجته وقال لها :-
زميلنا ولياب طلع بيعرف اختك عزيزة !!
|
Post: #36
Title: Re: أسماء بين قوسين.. على أصاحبها أن يجمعوا هنا ..
Author: عبد اللطيف بكري أحمد
Date: 02-06-2008, 01:14 PM
Parent: #1
يسلم بن سالمين (الأستاذ المصري قال ليهو يابني دا فعل موش أسم)
==
طالع سلم نازل العتيبي (( الطالب كاتب أسمو كدا في
الكراس ، الأستاذ المصري : دي كراسة مين اللي حاطي وصف بيتهم هنا))
|
Post: #54
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-07-2008, 01:16 PM
Parent: #36
| Quote: (الأستاذ المصري قال ليهو يابني دا فعل موش أسم) |
وعن الاساتذة المصريين وتعليقاتهم
استاذ مصري رجع من السودان وبيحكي لزملاه ...
اطول شارع في الخرطوم اسمه شارع الحرية بيوديك للسجانه !!
|
Post: #38
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-06-2008, 02:54 PM
Parent: #1
سماح ...
Quote: أما قصص ناذر دى دايرة ليها تحقيقات
|
ثقة مافي ولا شنو يعني
يا ولياب ..
أخونا عضو المنبر إسمو (مطر قادم) كنت لفتكر لحدي وكت قريب إسمو واحد وما مركب لكن لمن قابلتو إتضح إنو إسم والدو (قادم) وإسمه هو (مطر) وبالتالي إسمو صار (مطر قادم) ..
|
Post: #39
Title: Re: أسماء بين قوسين.. على أصاحبها أن يجمعوا هنا ..
Author: عبد العظيم احمد
Date: 02-06-2008, 04:05 PM
Parent: #38
سلام للجميع
خالد العبيد
مبارك العبيد والمرحومة اميمة دفعت بغداد
والتحية لزهير دندراوى
من القاهرة سلام
لى زميل جنوبي اسمه
ماريو حسن تعبان
,,,,,,,,,,,,,,,,,,,,
فليب عباس
,,,,,,,
بعض اسماء نساء
فرع الزين
راجنو
خترنا
عجب سيدو
عشمانة
|
Post: #41
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 05:15 PM
Parent: #38
| Quote: أخونا عضو المنبر إسمو (مطر قادم) كنت لفتكر لحدي وكت قريب إسمو واحد وما مركب لكن لمن قابلتو إتضح إنو إسم والدو (قادم) وإسمه هو (مطر) |
صدقوني !!انا لغاية ما قرأت مداخلتك ياناذر كنت اعتقد انه مجرد Nickname .. كده اخونا الباشمهندس بكري أبوبكر تعبان مع اسمانا .. تعب شديد...
بس ما يمنع هو ذاتو يقول لينا بكري ابوبكر مين .. لان الاسم كده باين عليه ( من ذات الرصة الرصينه)
واحد من اولادنا شغال في مؤسسة صاحبها اسمه شتوي الشتيوي
واحد من الجماعة قال ليه الواحد لما يعرف اسم كفيلك بيبرد !!!!
|
Post: #40
Title: Re: أسماء بين قوسين.. على أصاحبها أن يجمعوا هنا ..
Author: حسين محي الدين
Date: 02-06-2008, 04:23 PM
Parent: #1
حسين محي الدين حسين احمد حسين
|
Post: #42
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-06-2008, 05:45 PM
Parent: #40
| Quote: حسين محي الدين حسين احمد حسين |
الظاهر جدك كان عاوز يطلع بيكم من الرصة
لكن الوالد .. طلع راجل اصيل ورجع بيكم تاني ..
اها المشكلة بقت عندك !!
تسمي محي الدين ...أو أحمد؟؟
|
Post: #44
Title: Re: أسماء بين قوسين.. على أصاحبها أن يجمعوا هنا ..
Author: elsawi
Date: 02-06-2008, 06:42 PM
Parent: #42
شكرا ياولياب على البوست اللطيف
من الأسماء الغريبة ايضا اسم النائب البرلماني في فترة الديمقراطية السابقة جبر الله خمسين .. ومن الطرائف التي تحكى عنه انه ايام دراسته الأوليه كان استاذ الدين بيقعد تحت الشجرة في حوش المدرسة وينادي الأولاد للتسميع بالدور وكانت اضان الأستاذ تقيلة شوية ومع كل ولد يجي يسمع السورة بيدور الحديث التالي
الأستاذ: اسمك منو؟
الطالب: محمد عبد الله
الأستاذ: محمد منو؟
الطالب: عبد الله
الأستاذ: طيب سمع السورة
وبعد التسميع يطلب الأستاذ من الطالب ان ينادي طالب آخر وهكذا حتى يسمع كل الطلبة في الفصل .. فجاء دور جبر الله خمسين في التسميع ودار الحوار التالي
الأستاذ: اسمك منو؟
الطالب: جبر الله خمسين
الأستاذ: جبر الله كم؟
|
Post: #43
Title: Re: أسماء بين قوسين.. على أصاحبها أن يجمعوا هنا ..
Author: ابراهيم عدلان
Date: 02-06-2008, 06:27 PM
Parent: #1
موضوع لذيذ يا ولياب
من الاسماء الغربية العجيبة كاسبار واين بيرقر
طبعا الجماعة فكوا القوس كاس بار واين بيرقر ( قعدة بي مزتها)
ايام التدريب العسكري كان معانا واحد اسمو قطية عيسي قطية ( التعلمجي قال ليهو اسمك دا هسه يكتبوا والا يرسمو )
خال العبيد تتذكر الطريقة الكان اخونا كمال مصطفي المهدي بينطق بيها اسمو
|
Post: #45
Title: Re: أسماء بين قوسين.. على أصاحبها أن يجمعوا هنا ..
Author: Sayed Bekab
Date: 02-06-2008, 06:52 PM
Parent: #43
Quote: قطية عيسي قطية ( التعلمجي قال ليهو اسمك دا هسه يكتبوا والا يرسمو )
|
الرتنية بت إبراهيم كيروسين كان اسم زميلة لنا فى الجامعة اسم مميز
|
Post: #46
Title: Re: أسماء بين قوسين.. على أصاحبها أن يجمعوا هنا ..
Author: خالد حاكم
Date: 02-06-2008, 10:05 PM
Parent: #45
عندى ناس قرايبى وهم اسرة تتكون من 3 اخوان واخت واحدة وابوهم اسمه خليل , بعد وفاة ابوهم اتزوجت الاخت اول وجابت ولد سماهو خليل على اسم ابوها ومن ثم اتزوج اكبر الاخوان وايضا جاب ولد وسماهو خليل وجاء اتزوج الاخ الوسط وايضا جاب ولد سماهو خليل , وعندما جاء دور الاخ الاصغر رفض تسمية اسم خليل على ابنه بحجة انه يوجد اكثر من خليل داخل الاسرة الواحدة , لكن اخوه الوسط مارس عليه ضغوط كبيرة وهدده على انه سيوقف مساعداته التى يقدمها له من السعودية اذا لم يقم بتسيمة ابنه خليل , واتضح فى النهاية سر هدفه من هذه الضغوط فى تسمية اسم خليل , وهو رغبته فى مكاتبة اخوه المتواجد بالسودان من السعودية كالاتى
الاخ ابن خليل
ابو خليل
خال خليل
عم خليل
المحترم
تحية طيبة وبعد
والكلام ده زمان يا جماعة قبل التلفونات...
|
Post: #47
Title: Re: أسماء بين قوسين.. على أصاحبها أن يجمعوا هنا ..
Author: عبدالرحمن الخليفة
Date: 02-07-2008, 03:18 AM
Parent: #1
الاستاذ/ ولياب
لك التحية
اهمية ما طرحت يذكرنى بمصادمة الدكتورة نوال السعداوى بسعيها لغير المتعارف علية بنسب اسم المولود للام بحسبان شراكةالانتاج وطبقتة عمليا فى شخصها وابنتها . وانا شخصيا لاامانع ان احمل اسم والدتى بجانب والدى ولها من العظمة ما يكفى .
اماتساؤلك فى معضلة عبدالرسول سياف .ان تغيرمن الناحية القانونية فى غاية السهولة باعتبار اسمك الاول هو الملكية الوحيدة المطلقة المؤكدة وبمكانك بشاهدين واقرار من اى محكمة مدنية ان تصبح من فلان الى فلان وبعدتتغدل المستندات السابقة.
اما من طرافة التعسف فى الحق فى اختيار الاسم للمولود القادم وترك الحريةالمطلقة للوالد حسب الظروف والملابسات الراهنة كان بيننا رجل بسيط وساخر جدا لة من البنات خمسة ويسمى[بلة] و عندما حلت السادسة سماها زاد الطين فاصبحت [ زاد الطين بلة ] ولاادرى الان ماذا حل بهذة البريئة والتى قدمت الىالدنيا بعنوان غلط لاشك تاثير كبير جدا فى مستقبلها
ووشكرا على هذا البوست الشيقا الهادف الجاذب
|
Post: #52
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-07-2008, 12:51 PM
Parent: #47
| Quote: اهمية ما طرحت يذكرنى بمصادمة الدكتورة نوال السعداوى |
عزيزي عبدالرحمن الخليفة مع خالص المودة..
تخيل انا يوم امس كنت بقول ان كل المتداخلين اخذو الطرح من جانب واحد .. وقلت حتى ما في حد اتكلم في الجزئية التي تخص (الانثيات ) واضيف عبارة الفضليات عشان ما حد يتهمنا بالتقصير او التفرقة !! .. رغم اني مهدت السكة بطريقة غير مباشرة وقلت:- وفقدان التجانس و الرصه الموسيقية المموسقة أكثر من يتأذى بها الجنس اللطيف دون سواهم فقد لا يهتم ( احمد محمد احمد أو عتريس بخيت عتريس ..أو جمعة خميس جمعة .) بتلك الشكلية النمطية المتوارثة أو السائدة في وسط مجتمعاتنا والآتية من إصرار بعض الأسر في أن يلحق الآباء أسماء الأجداد لأبنائهم !!!
وكمان قلت انو البنت :- ستجد من الحيل ما هو شبيه بتلك الكريمات المرطبة التي تخفي بها بعض العيوب !!
..واقرب الحلول هو أن لا تصل باسمها إلى الجد الرابع ..
وكما أضفت ايضا
ولها أن تبحث حتى الجد السابع عشر في مشوار البحث عن التجانس والرصة الموسيقية .
حتى كده ما قدرنا نحرك فضولهن .. ... شوفوا الرجالة دي .. !! كده يا بلاش . مش تقولي نوال السعداوي .
بس عشان الموضوع ما يطلع من سياقه نرجع لحكاية نوال السعداوي بعدين
و لك خالص المودة
|
Post: #48
Title: Re: أسماء بين قوسين.. على أصاحبها أن يجمعوا هنا ..
Author: haroon diyab
Date: 02-07-2008, 05:53 AM
Parent: #1
ولياب
صباح الخير
ومن اكثر الذين عشقوا شخصا فسموا ابنائهم بهم
الشاعر الكبير ابو امنه حامد....
فقد سمي ابنه / جمال عبد الناصر ابو امنه حامد
وفي حب يااخوانا اكتر من كده ......؟
التحايا
هارون دياب
|
Post: #50
Title: Re: أسماء بين قوسين.. على أصاحبها أن يجمعوا هنا ..
Author: Sidig Rahama Elnour
Date: 02-07-2008, 09:43 AM
Parent: #48
Quote: ومن اكثر الذين عشقوا شخصا فسموا ابنائهم بهم
الشاعر الكبير ابو امنه حامد....
فقد سمي ابنه / جمال عبد الناصر ابو امنه حامد
وفي حب يااخوانا اكتر من كده ......؟ |
يا حبيبنا هارون دياب بل سماه (جمال عبدالناصر حسين) أبو أمنة حامد أمعاناً في التشدد والحب وعشان تعرف في حب أكتر من الأنت قاصدوا
ويا عزينا ولياب
أنا زيك كنت فاكر (مطر قادم) أسم حركي يحدي ماجاء ناذر وقال كلامو دا وإن شاء الله ناذر ما يطلع بهظر عشان نحن قرطنا على كدة   
زميلنا مختار محمد مختار كان الأستاذ يناديه أوضة برندة أوضة ، فحرّفها الزملاء ل(فول عدس فول) على وجبات اليوم الورتينية
|
Post: #49
Title: Re: أسماء بين قوسين.. على أصاحبها أن يجمعوا هنا ..
Author: ناهد علي
Date: 02-07-2008, 07:58 AM
Parent: #1
بالامس كنا نتحدث في نفس الموضوع حينما اختار ابن خالتي اسم لمولودة الجديد فصاراسمة
حسن عبد المجيد حسن عبدالمجيد حسن عبد المجيد
قلت لية والله دة محتاج لي مظلة في النص الواح يرتاح فيها ويقوم يواصل في المنادة
|
Post: #51
Title: Re: أسماء بين قوسين.. على أصاحبها أن يجمعوا هنا ..
Author: فايزودالقاضي
Date: 02-07-2008, 10:03 AM
Parent: #1
ولياب .. سلامات . ..
انا اخدت لي فترة شغال في ادارة في السعودية بطبع رخص قيادة وكانت بتجيني اسماء ماانزل الله بها من سلطان ..
فمثلاً من الاسامي وبصدق ...وهي اكثر اسماء البدو ..
عريميط ..
شليويح
محيليص(او محيليس )
دغيليب
حنـــــش
والله ياولياب مرة جاني واحد اسم جدو شريميط .. تخيل !!!...
ده غير اسم رجاء ، واقبال بيسموا بيهو رجال ....
فايزودالقاضي ..
|
Post: #53
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-07-2008, 01:09 PM
Parent: #51
الاخوة المتداخلين
بصراحة انا ذي ما قلت ليكم ما قادر اضيف الردود على هذا الكم الجميل والرائع من التعليقات ..والاشادة بالبوست .. وكل اضافة او مداخله في هذا البوست بتذكرني باضافة جديدة.. وكده تبددت الاضافات التي كانت في دماغي ..
وقبل ما انسى!!!! بمناسبة اسم زميل البورد " مطر قادم " واعتقادي وبعض الاخوه بانه مجرد nickname اقول ليكم عن .. رفيق الحريري ..
في واحد قال عندما سمع خبر تفجير سيارته .. افتكر ان رفيقه هو الذي مات .. وكان أخونا منتظر الحريري يطلع في التلفزيون ويشجب الجريمة..
|
Post: #55
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-08-2008, 10:20 AM
Parent: #53
| Quote: من الاسماء الغربية العجيبة كاسبار واين بيرقر |
وايضا اجد لاسم فاليري جسكار دستان شي من تلك الرصة الرصينه
|
Post: #56
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-08-2008, 11:35 AM
Parent: #55
Quote: اخونا الصحفي الاستاذ حسين حسن حسين حسن
واحد قال ليه يا حسين انت اسمك عامل ذي سورة قل يا أيها الكافرون |
الخال حمزاوي
وتعرف ياخال حمزاوي ان (ابو الحسن) اسم ولده "حسن" وبكده يكون ضرب الرقم القياسي !!
حسن حسين حسن حسين حسن حسين
واحد من جماعتنا سمى ولده حسين .. قرايبوا احتجوا ونبهوه وقالو ليه لو ناديناك (ابو الحسين ) ما تزعل ....طبعا من السائد عندنا اسم الثعلب ... ابو الحسين
|
Post: #57
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-08-2008, 04:23 PM
Parent: #1
سلام صديق ..
| Quote: أنا زيك كنت فاكر (مطر قادم) أسم حركي يحدي ماجاء ناذر وقال كلامو دا وإن شاء الله ناذر ما يطلع بهظر عشان نحن قرطنا على كدة |
أبدا والله ما هظار ..
قابلته في المسرح القومي قبل فترة ومعه الصديق محمد عكاشة وتحدثنا حول إسمه وأنا نفسي لم أصدق وكان الفيصل جواز سفره الذي كان يحمله معه وأراني إياه ..
وصراحة أعجبني الإسم .. فهو جميل ومميز ..
|
Post: #58
Title: Re: أسماء بين قوسين.. على أصاحبها أن يجمعوا هنا ..
Author: AnwarKing
Date: 02-08-2008, 06:46 PM
Parent: #1
| Quote: والله ياولياب مرة جاني واحد اسم جدو شريميط .. تخيل !!!.. |
|
Post: #59
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-09-2008, 02:24 PM
Parent: #58
التحية للجميع
طبعا الواحد ما مخيّر في اختيار اسمه
ولكن يجب على من سنحت له فرصة اختيار الاسم (الامهات والاباء) ان يتخيروا من الاسماء ما هو مقبول ومتجانس .. عشان على الاقل الابناء يكونو راضين .
وانا كنت اتوقع ان تكون هنالك اضافات عن بعض ما نقل من اسباب في اطلاق الاسماء
المهم انا كان من المفترض ان يطلق عليّ اسم جمعة لان تاريخ ميلادي صادف يوم الجمعة.. ولكن الوالد رفض ذاك الاختيار !!
اما زوجتي وانا كنت اول المتفاجئين عندما علمت بان اسمها في السجلات الرسمية "عرفات" لانها مولودة يوم عرفه..
وبفرضية نوال السعداوي (الحاق اسم الاب والام للأبناء) زايد فرضية او مقترح الوالدة رحمة الله عليها (اطلاق اسم يوم الولادة ) كان حيكون عندي أتنين اسمهم
جمعة جمعة عرفات ..
|
Post: #60
Title: Re: أسماء بين قوسين.. على أصاحبها أن يجمعوا هنا ..
Author: عصام علي أحمد
Date: 02-09-2008, 04:43 PM
Parent: #1
كما قال الزميل فايز ودالقاضى
الخليج به اسماء غريبة جدا وبالذات من البدو
واحد اسمه سريع دعس بريك المري
|
Post: #61
Title: Re: أسماء بين قوسين.. على أصاحبها أن يجمعوا هنا ..
Author: ناذر محمد الخليفة
Date: 02-09-2008, 06:57 PM
Parent: #1
حتى الان لم أجد من بين السودانيين الكثير ممن يحمل إسمي (ناذر) سوى شخص واحد إسمه (ناذر رحمة الله) درس معي الإبتدائية قبل سنون بعيدة !!!
والغريبة أن إسم ناذر موجود بكثرة عند الهنود ولكن بطريقة تركيب مغايرة تماماً !! إذ لا يأتي الإسم لوحده (ناذر) بل يكون ملحقاً بأخر ، صادفت الكثير من الهنود يحملون الإسم (ناذر الرحمن) ، (ناذر الدين) ، (ناذر الرسالة) وهكذا !!
أما لماذا إختار لي الوالد إسم (ناذر) فهذه قصة أخرى !!
|
Post: #62
Title: Re: أسماء بين قوسين.. على أصاحبها أن يجمعوا هنا ..
Author: حسين حسن حسين
Date: 02-09-2008, 07:37 PM
Parent: #1
أنتو جايبين في سيرتي وانا مش عارف..
ابني حسن سألته واحدة مصرية: اسمك إيه يا شاطر.
ردبسرعة وبانفعال: حسن حسين حسن حسين حسن حسين
تخيلته منزعجًا من السؤال، فقالت: يا ابني متزعلش.. مش حاسال تاني.
قال لها: دة اسمي.
ردت: يا ضناي.. أبوك عمل فيك كدة ليه؟
****
ابني آخر العنقود اسمه خلاد..
سألني قريبي (تربية مصر): إيه دة انتو بيتحيبو الأسماء الغريبة دي منين.
رددت: خلي بالك يا سمعة (اسمه إسماعيل) دة اسم صحابي.
رد بحركة مصرية (مصدرًا صوتًا): اللا هو صحابي جديد والا إيه.
****
مدرس الإنجليزي المصري يسأل في مدرسة عبري المتوسطة: ما اسم اختك..
الطلبة على التوالي: سكينة.. بخيتة.. ستنا.. بتول
أحدهم: نجوى
المدرس: يا حلاوة عليك يا ابني.. طلعتني من المدبح.. شغالين من الصبح سكاكين وبلط ومطاوي.. حتى الخيال ما عندكمش يا ولاد سكينة جنح..
فوتكم بعافية.
|
Post: #63
Title: Re: أسماء بين قوسين.. على أصاحبها أن يجمعوا هنا ..
Author: عبد العظيم احمد
Date: 02-11-2008, 03:47 PM
Parent: #62
حسين حسن حسين
سلام
انت ماشي بعيد لية
حسنين
2 hassan
|
Post: #64
Title: Re: أسماء بين قوسين.. على أصاحبها أن يجمعوا هنا ..
Author: welyab
Date: 02-12-2008, 06:51 PM
Parent: #63
ومن الطرائف ان هنالك بعض الافراد يكون لديهم اسم رسمي.. واخر شعبي
ويكون ابناء الحي ينادونه باسم.. (شعبي) وزملاؤه في مقاعد الداسة يتعاملون معه بالاسم الرسمي ..
هنالك حكايات وقصص
|
Post: #65
Title: Re: أسماء بين قوسين.. على أصاحبها أن يجمعوا هنا ..
Author: خالد حاكم
Date: 02-12-2008, 11:14 PM
Parent: #64
عندى واحد قريبى اسمه عبد العزيز , لكن مشهور بقروندى .. واحد تمبساوى ساله انت اسمك منو ؟ قال ليه انا اسمى قروندى , التمبساوى افتكره بيهظر وقام قال ليه انا كمان اسمى كمننودى!
شرح ما تحته خط
1- قروندى معناها التور
2- تمبساوى منسوب الى تمبس وتمبس هنا ليس علاء الدين تمبس عضو البورد انما قرية فى منطقة المحس .
3- كمننودى معناها ذكر الجمل
|
Post: #66
Title: Re: أسماء بين قوسين.. على أصاحبها أن يجمعوا هنا ..
Author: حسن طه محمد
Date: 02-13-2008, 05:34 AM
Parent: #65
الأخ ولياب
سلام
هل سمعت بالمذيع التلفزيوني : توفيق فائق موفق ؟؟؟
|
|