Post: #1
Title: بعد الـ 60×60 دا...
Author: welyab
Date: 03-25-2009, 07:20 AM
Parent: #0
سن التقاعد مشوار وهاجس يراود الكثيرون ..
وبعد سن التقاعد يبدأ مرحلة اجترار الذكريات ...
عشان كده خلوني ابدا بدري (قبل سن التقاعد) ونأخدها واحدة واحدة ...
1×6 :
** اول سلمة تتخطاها ليبدا معك مشوار التعلم من الاخرين ... وقتها بجانبك من يحمل عنك الهموم
2×6 :
*** بدايات مراحل الشباب والطموحات ... والتمرد ...
3×6 :
**** بدايات اتخاذ القرارات وتحديد المسارات ..
4×6 :
***** بدايات مشوار الحياة العملية
5×6 :
****** بدايات مرحلة ( ضرب الاخماس في الاسداس ) وتولي مسؤليات الغير
6×6 :
****** ضرب الستات ممنوع .. دع القيادة لهن ! اذا اردت الاستمتاع بالرحلة ...
6×7 :
****** انت ومراتك وكام عيل (في حدود خمسة) لو ماوصلت للرقم سبعة عليك بالزواج .
6×8 :
****** انت ومراتك والعيال..يزيد عليهم واحد لو محظوظ يكون ابوك او امك.. مش حماتك!!
6×9 :
****** حساباتك لو سليمة تكون جهزت لنفسك حاجة لبقية عمرك ..مافي وقت بدل ضايع..
6×10 :
****** سن التقاعد ..وفي 60 داهية ياحبيبي. احسن تسمعها من جهة العمل مش من ام العيال
قلنا نأخدهم مع بعض واحدة واحدة ... مستعدين ...؟؟؟
قبل الارشفة ...
اعلان للجميع:ارشفة المنبر العام الحالى للربع الاول لعام 2009 يوم 31 -3- 2009
والله يا بكري حكاية الارشفة دي مزعجة..كل مرة افكر اكتب بعد الارشفة
|
Post: #2
Title: Re: بعد الـ 60×60 دا...
Author: عزام حسن فرح
Date: 03-25-2009, 07:59 AM
Parent: #1
welyab
سِن الستين دي عملوها علشان الواحِد يكتِب < مُذكِراتو >
علشان يبدأ يتعلم قُعاد الضُل تِحت الشِجِر ويتَونس ويِعرِف
حاجة ... علشان يِوصل بِبسمتو الكان بِجود بيها إلى
مرحلة القهقهة ويجوز التِدِردِق في الواطا كمان ...
عُمر الستين ده بِخليك تعايِن لأول مره للآخر بِعين غير
عين < الألفا > ... بخليك تصاحِب ناس < الملجه > و
< النُقُلتِية > ... بِخليك تعمل حاجات مُفيدة في البيت
كُنت بِتترفع عنها زمان أو ما فاضي ليها أو ما شايِفا
أصلو ...
ليك طول العُمر والصحة يا سري وقريبي ،،، العُمر في
القلُب يا زول وإن خذلك الماعون ... إن هشر الكانون
|
Post: #3
Title: Re: بعد الـ 60×60 دا...
Author: welyab
Date: 03-25-2009, 11:11 AM
Parent: #2
| Quote: سِن الستين دي عملوها علشان الواحِد يكتِب < مُذكِراتو |
قريبي عزام
شكرا ليك كتير على الكلام الجميل
بس الحكاية وما فيها ..
تخليت وانا قاعد في ساعة صفا .. كم كبير من الدكاترة اساتذة الجامعات عندنا ..
الواحد فيهم ضيع كل الستات المذكورة آنفة الذكر في التحصيل ..
ووقت ما يجي ساعات العطاء... يكون على اعتاب الستين !!
هو بيلقى ليه ظل شجرة يستريح فيها !!
لكن الخسران الاكبر مين ؟؟
أكبد المجتمع هو الخسران ..!!
نواصل
|
Post: #4
Title: Re: بعد الـ 60×60 دا...
Author: عزام حسن فرح
Date: 03-25-2009, 11:34 AM
Parent: #3
Quote: لكن الخسران الاكبر مين ؟؟
أكبد المجتمع هو الخسران ..!! |
سِن السِتين مِن < مُكر الله > وحيلة < الخِدمة المدنِية >
كراسي الخِدمة المدنِية < 20 >
والقاعدين < 20 >
والجايين < 20 >
يبقى شيل ده مِن ده ... يرتاح ده على ده
يُفترض الواحِد يخلِص الجامعة في سِن < 21 >
والدِراسات العُليا في < 4 >
ويتَوظف وعُمرو < 25 > سنة (+ زوجة)
ويكتسِب خِبرة مِن عملو في < 5 > سنوات (+ أرض سكنِية)
ويعلِم غيرو < 30 > سنة (ويبني فيهُم بيت ودُكان ناصِية)
وبعدين في عُمر الـ(60) سنة يِفتِش ليهو عن ضُل نيمه
يِخُت تِحِتا عنقريب هبابي وتيبار (زير) وكوز طلِس وهبابا
ضُبان وقلم وورقة ... ويكتِب ويكتب ويكتِب حتى يصبح عِند
الناس كاتِباً ...
يُفترض كِده ... وده الكان بِيحصل حتى 1980م
هسِع الواحِد لو ما < مؤتمر وطني > مِن يتخرج مِن الجامعة
بِفتِش ليهو ضُل نيمه وكيس تُنباك ومُغترب يِكتب ليهو ...
والليل طوييييييل ... وجمييييييل ... وكِده
|
Post: #5
Title: Re: بعد الـ 60×60 دا...
Author: welyab
Date: 03-25-2009, 11:54 AM
Parent: #3
وخد دي.. في سبيل الترويح عن النفس...
واحد مثقف من اصحاب البدل القيافة وارث ...و دارس... وحاصل على شهادات عالية من الخارج ,,
اتوظف في مصلحة حكومية براتب يعني... هو غير مقتنع بيه ..
اول يوم عمل راح المكتب بسيارة فارهة ... عاوز يوقفها في مكان نظيف ..
جاءه ولد شماسي شايل جردل وفوضة في يد ..
وجوال عينة في يدو التانية ..
وعرض عليه خدماته ..
زولنا الارستقراطي قبل العرض وساب العربية لصاحبنا الشماسي يغسلها ويلمعها ..
آخر اليوم نزل يحاسب الشماسي .. ودفع مبلغ ما هين ..
قام سأل الشماسي :-
تعال انت بتغسل كام عربية في اليوم ؟
أجاب الشماسي :-
ارزاق يا عم .. يوم كده ويوم كده يعني من خمسة لعشرة عربات .....
اخونا ابو بدلة قيافة حسبها مع نفسه ... وقال يعني ايرادك الشهري اكثر من راتبي وبــ كام مرة !!
ده اسمو كلام ... انا جاري وراء الشهادات والدراسات العليا ... وانت لا قراية ولا تعليم.. ودخلك اكبر من دخلي ..معقولة.....؟؟
الشماسي قال ليه :..
نعمل لك ايه يا ريس!!!
سيادتك ضيعت مستقبلك .. في الفاضي!!!!
احسن تنزل معاش بدري وتشوف مصالحك .
|
Post: #6
Title: Re: بعد الـ 60×60 دا...
Author: welyab
Date: 03-25-2009, 04:19 PM
Parent: #5
|
Post: #7
Title: Re: بعد الـ 60×60 دا...
Author: welyab
Date: 03-29-2009, 07:04 AM
Parent: #6
الرابط الفوق دا ..... راح وين..
انا كنت نزلت رابط لموقع جريدة ما متذكر اسمها كتبت عن رفع سن احالة اساتذة الجامعات..
افتش عليه في النت وارجع لكم تاني
|
|