الجهوية.. والعنصرية والمسميات إياها ..

الجهوية.. والعنصرية والمسميات إياها .. سوف تنقرض لوحدها ...فهيه ذاهبة الى الزوال بمحض ارادتها.. واعتقد جازما بان الخريطة المستقبلية او السياسية او الجغرافية المتوقعة دولة وادي النيل !!!

الكل متيقن تماما ان هنالك جهات اربعة ولا خلاف في ذلك ..
بدا الصراع في الجنوب ... ثم في الغرب .. وتلتها الشرق ... والكل يسعى ويجاهد لتقاسم السلطة والثروة..
اها يا اخوانا دي مش جهات جنوب ... وغرب...وشرق..
وفي الجنوب هنالك قبائل والحكاية مش هاوزة جدل ومفاصلة ... والغرب بدا فيه الصراع وايضا بالقبائل .. وكانت القبائل ليها دور معلن ... والان نسمع عن البجة في الشرق وعن الاسود الحرة ..و..الخ.. وطبعا مافي حد يقدر ينكر ان هنالك انتماءات قبلية مشاركة وبوضوح في الصراع ... حتى الحركات القامت تفرفر في الشمال (مناصيرو ونوبيين ) يعني القصة ما خالية من القبلية .. والجهوية .. مش دا سودانا .. ودي هي قبائنا المعروفة ودي الجهات المعروفة ...
طيب لو كلنا عارفين الحقيقة دي مالنا نجقلب ونقول نبذ القبلية والجهوية ....
مين ال مطالب بنبذ الجهوية والقبلية ... اعتقد الناس المقصودين والمطلوب منهم نبذ القبلية والجهوية يكونو ا المساكين .. الساكتين والى ما حملوا السلاح .. وما طالبوا بتقسيم السلطة والثروة .. سبحان الله !!!
هل هنالك جهة بقيت غير الشمال .. وهل هنالك قبائل باقية غير قبائل الشمال..
طيب القسمة المطلوبة بين مين ومين ..
لو افترضنا جدلا ان هنالك جهة وبالمقبل جهة فيكون الجنوب اقتسم مع الشمال .. باعتبار الشمال مجازا كل السودان (ما عدا الجنوب)
طيب هل اهلنا في الغرب طالبوا الاقتسام من اهل الشرق .. وهل اهل الشرق طالبو التقاسم مع اهل الغرب طبعا هنا القسمة او الجهة المعنية بالتقاسم اصبحو هم اهل الشمال ... يعني الشمال .. او الوسط دائما مطالب بالتقاسم مع الجهات التانية ..
بعد ما تقاسم الجنوب مع الشمال ما بقي للشمال تقاسمه مع الغرب !!! وما سيتبقى من تقاسم الغرب للشمل سيتقاسمة الشرق.. واهل الشمال لهم ان يتقاسموا (لو فضلت حاجة ) بيناتهم .. بس من دون قبلية ولا جهوية .. ما اصل الجهوية حتكون انتهت لوحدها ...

لذا فعلى اهل الشمال (البقية الباقية ) عليهم ان يدركوا تماما ان لتلك الاطراف المتصارعة ان تهدأ يوما ما اذا لم تجد من تصارعه.. والا سوف يكون التنازع والصراع بينيا .. والاحتمال الثاني ان تكون هنالك جهات متحدة .. او ولايات متحدة (الولايات السودانية المتحدة) اسم يعجب المفتونين بالولايات المتحدة!!!
اذا لم يكن هنالك ولايات سودانية متحدة اذن سيكون هنالك دولة وادي النيل .. فعلى المعنيين ان يتدارسو الاستراتيجيات المستقبيلة بهذ المنظور ...
والله يكضب الشينه...

الأخ ولياب

شكرا علي هذا التحليل الواعي ولنقول بملء أفواهنا
لعنة الله علي العنصرية والقبلية والجهويةالمتخلفة وخاصة الحركات
التي تحمل السلاح من منطلقات جهوية أوعنصريةأو قبلية فالمسميات يا أخوي
كثيرة لكن يبقي المعني الذي يؤطر هذا الداء اللعين واحد

عزيزي فيصل
دامت المحبة
تصدق انني اندهشت ووقفت عند عنوان البوست .. وقلت العنوان مش غريب علي..
مش عارف ليه كان عندي احساس بان عنوان البوست الولايات المتحدة السودانية!!
طبعا كتبت الموضوع من غير تركيز واسترسلت في الشطح من زهجي من الحالة الى احنا فيها.... نسيت العنوان الذي اخترته..

نرجع بعدين ونكمل لان الموضوع عاوز شوية تركيز ..

انت عارف يا ولياب فعلا حتكون فى ولايات سودانية ولكن لن تكون متحدة بسبب هذه الجهوية والعنصرية والقبلية والتعصب .. والسودان ماشى للانقسام الخطير الى دويلات مفككة يسهل التهامها من قبل الدول العظمى .. واذا لم تكن هناك يقظة ووعى من الحادبين على امر السودان فعلى السودان السلام