خالكم (حمزاوي ) قبض عليه متلبسا

خالكم (حمزاوي ) قبض عليه متلبسا


02-11-2007, 09:26 AM


  » http://sudaneseonline.com/cgi-bin/sdb/2bb.cgi?seq=msg&board=266&msg=1188132890&rn=26


Post: #1
Title: خالكم (حمزاوي ) قبض عليه متلبسا
Author: welyab
Date: 02-11-2007, 09:26 AM
Parent: #0

الحضور الان بالمنتدى العام لسودانيز أون لاين دوت كوم 521 شخص » (53 )عضو و (468) زائرا

كان من شوية بين الحضور واختفي فجأة

حد بيعرف عنه حاجة

Post: #2
Title: Re: خالكم (حمزاوي ) قبض عليه متلبسا
Author: ابو جهينة
Date: 02-11-2007, 09:29 AM
Parent: #1

سلام ولياب

تحت تحت كدة ..
المدام حمرتْ ليهو .. مرق من محل الإنترنت و فرتق

Post: #3
Title: Re: خالكم (حمزاوي ) قبض عليه متلبسا
Author: welyab
Date: 02-11-2007, 09:34 AM
Parent: #2

ممكن...

بس الظاهر هو بدأ يذاكر !! عشان يكون عندو خلفية .. ويمارس المهام الـ(خال) بتجرد !!!

Post: #4
Title: Re: خالكم (حمزاوي ) قبض عليه متلبسا
Author: حمزاوي
Date: 02-11-2007, 09:42 AM
Parent: #1


الخال وصل الرياض
وفي معيته اخبار كثيرة ( شمارات والذي منو )
كنت حاقول وفي جعبته بس خايف من ( دكين )
ساعود بعد شوية للتعليق يا ابوجهينة اخوي
شكراً اخي ولياب
الخال المنتخب لعموم البورداب / حمزاوي

Post: #6
Title: Re: خالكم (حمزاوي ) قبض عليه متلبسا
Author: welyab
Date: 02-11-2007, 09:56 AM
Parent: #4

اهلا بالخال ...و (بالمنتخب ) كله!!
Quote: كنت حاقول وفي جعبته بس خايف من ( دكين )


ولا يهمك ... قول في (كنانته)
واخرج من كنانته سهما!!!!!

Post: #5
Title: Re: خالكم (حمزاوي ) قبض عليه متلبسا
Author: abubakr
Date: 02-11-2007, 09:52 AM
Parent: #1

Quote: الخال المنتخب لعموم البورداب / حمزاوي


طلعت خال نص كم ... الخال بقود الكتائب لنصرة غادة نوري .. مش يخلي وشنا اد السمسمة ونحن اخر من يعلم ... اها رجعت الي خيمتك في الرياض ادعو المخللينك الي اجتماع ضروري لامر غادة الامل الاخضر والا اتلقي وعدك ....

Post: #7
Title: Re: خالكم (حمزاوي ) قبض عليه متلبسا
Author: إسماعيل وراق
Date: 02-11-2007, 10:00 AM
Parent: #5

ألف مرحب بالخال حمزاوي
.
.
في إنتظار الشمارات..
سؤال: شماراتك دي بالرطانة ولا العربي... لو بالرطانة والله تعبنا معاك.. بس نشوف لينا مترجم ساكت.. غايتو يحلنا الحلة بله..

Post: #9
Title: Re: خالكم (حمزاوي ) قبض عليه متلبسا
Author: welyab
Date: 02-11-2007, 02:40 PM
Parent: #7

Quote: سؤال: شماراتك دي بالرطانة ولا العربي...

الظاهر سوف نستعين بيك ونستشهد في اول (الشمارات) بعدد يوم الجمعة من (السوداني )
لو تكرمت يا (اسماعيل وراق) اسعفني بالعدد ..




Post: #8
Title: Re: خالكم (حمزاوي ) قبض عليه متلبسا
Author: حمد فتح الرحمن
Date: 02-11-2007, 11:17 AM
Parent: #1

همزاوي التلب
حمدا لله علي السلامة
ان شاء الله جبتا صفيحة من المعلوم معاك





ما تنسي العشا يوم الخميس في جمعيتكم
كتر القراريص

Post: #10
Title: Re: خالكم (حمزاوي ) قبض عليه متلبسا
Author: محمد زمراوي عبدالعزيز
Date: 02-11-2007, 02:46 PM
Parent: #8

مرحب مرحب بالحمزاوي

الحمد الله الجيتنا مداوي
الخرتوم بالتخمة تكاوي
مهما تكون انسان غلباوي
ورغم الحب بتجيكا مطاوي
تقدقد بطنك لبيت الكلاوي
مااظن تاني للرجعة ناوي
اهو السودان للصفر يساوي
ما اظن تاني للرجعة ناوي

عودأ عوداً يا حمزاوي
الحمد الله الجيتنا مداوي

كلام ليس لغير الناطقين::

أليني أوق منجا كديكاجينا تاني قوني
أليني سداقاق جوجقننااااااااا؟؟؟
للذي عايز الترجمة يروح للحمزاوي او الولياب او الريس ابو جهينة

Post: #11
Title: Re: خالكم (حمزاوي ) قبض عليه متلبسا
Author: abubakr
Date: 02-11-2007, 05:30 PM
Parent: #1

Quote: للذي عايز الترجمة يروح للحمزاوي او الولياب او الريس ابو جهينة


اها يالمترجميين الزول دة قال شنو ؟؟

Post: #12
Title: Re: خالكم (حمزاوي ) قبض عليه متلبسا
Author: ولياب
Date: 02-11-2007, 06:34 PM
Parent: #11

مرحب بيك حمزاوي

Quote: أليني أوق منجا كديكاجينا تاني قوني
أليني سداقاق جوجقننااااااااا؟؟؟


ترجمة على السريع(الشريط)

إنهم اليوم يغرقوننا للمرة الثانية

إنهم اليوم يبنون سداً

التحية للجميع

Post: #13
Title: Re: خالكم (حمزاوي ) قبض عليه متلبسا
Author: عثمان سيد أحمد
Date: 02-11-2007, 10:55 PM
Parent: #12

الأخ ولياب


يا هلا وأهلا وسهلا ومرحبا بعودة الخال حمزاوي


والله زمان يا خال ليك وحشة 00 في انتظار حكاوي

السودان 00


مع مودتي 000

Post: #14
Title: Re: خالكم (حمزاوي ) قبض عليه متلبسا
Author: حمزاوي
Date: 02-12-2007, 08:37 AM
Parent: #1


كلكم مسكاقجلو
شقيقي ولياب محمد سليمان
شكراً شكراً
الخوولة اخذت بالتصويت الحر المباشر وسقط العربي ود الذين
ابوجهينة اخوي
قلت لي المدام . . صدقني لو قلت للحاجة ( الولية حكومتنا ) يا مدام كانت حتقول لي يا راجل حافظ على الفاظك . . مرة قلت ليها لمن اتاخرت في طلوع يا حرمة ما تطلعي بسرعة واركبي صدقني كرهتني المشوار كل شويتين تسألني يعني ايه حرمة وانا احاول اقنع فيها بان المرأة في الخليج بيقول ليها حرمة وهي تقول لا لا دي كلمة مش كويسة لغاية ما قربت اصطدم بالعربية من شدة الهول . . قال مدام قال .
ابوبكر قريبي
الخال المكلف من قبلنا لما وراء البحار وجنوب الخليج
آهـ لو كنت اعرف انك في السودان كنت جيت زرتك . . بس المشكلة انا ما كنت قاعد اطلع من الكلاكلة الا نادراً
الابنة غادة نوري في عيوننا ستسمع اخبار مفرحة قريباً ان شاء الله .
الزعيم اسماعيل وراق
الشمارات باللوندي
الشمار الاول قالوا حيعملوا 2 كبري في الدويم واحد من روتو والتاني من مبروكة
حمد فتح الرحمن
وويييي انداندي
بخصوص طلبكم ( التركين ) الطلب محول لصديق الموج للتخصص .
محمد زمراوي . . حفيد جدي زمراوي الولي
الخرتوم بالتخمة تكاوي
في الكلاكلة اللفة في ناس كتار واقفين يعاينوا في السماء سااااااااااااي
أنا يوم مشيت وقفت اعاين معاهم ما شفت شي
غايتو في حاجات ومفارقات في الخرطوم الا تكون حاوي عشان تفهمها
ولياب احمد سليمان
بقيت تمام التمام يا اخوي . . عليك الله ترجم ليهم بس في حاجات كدا ما يكون الترجمة حرفياً
اخي عثمان سيداحمد . . شيخ المسرحيين
مشتاقين . . وما تشوفش وحش ؟ ؟ اقصد صديق الموج

Post: #15
Title: Re: خالكم (حمزاوي ) قبض عليه متلبسا
Author: حمزاوي
Date: 02-12-2007, 12:15 PM
Parent: #1


في السودان حاصل
مال لله لله ومال قيصر لقيصر
يعني
الناس شغالين يبنون مناطقهم ويصلحون احياءهم بلجانهم وانفسهم وبمتابعاتهم الشخصية واذا سألتهم وين الحكومة بيقولوا ليك ديل خليهم يسفوا ويمصوا في دمنا وخلينا نحن نشوف بلدنا ونعمرها وفعلاً الناس شغاله تحاول تصلح ولو جزء من بلدها وناس الانقاذ شغالين سف .

Post: #16
Title: Re: خالكم (حمزاوي ) قبض عليه متلبسا
Author: ابو جهينة
Date: 02-12-2007, 12:37 PM
Parent: #15

حمزاوي العزيز

Quote: ابوجهينة اخوي
قلت لي المدام . . صدقني لو قلت للحاجة ( الولية حكومتنا ) يا مدام كانت حتقول لي يا راجل حافظ على الفاظك . . مرة قلت ليها لمن اتاخرت في طلوع يا حرمة ما تطلعي بسرعة واركبي صدقني كرهتني المشوار كل شويتين تسألني يعني ايه حرمة وانا احاول اقنع فيها بان المرأة في الخليج بيقول ليها حرمة وهي تقول لا لا دي كلمة مش كويسة لغاية ما قربت اصطدم بالعربية من شدة الهول . . قال مدام قال .


إذن خلينا في :

Hoay woa Edain

تخريمة :

ناس كلاكلة اللفة لسع قاعدين يعاينوا فوق ؟ منتظرين هلال شوال ولا Superman ؟؟؟

Post: #17
Title: Re: خالكم (حمزاوي ) قبض عليه متلبسا
Author: ناذر محمد الخليفة
Date: 02-12-2007, 01:42 PM
Parent: #1

!!!!!!!!

معقولة يا خال تسافر بدون ما تودعنا !!
أنحنا هسي إتعشمنا .. كنا دايرنك تصوم معانا رمضان !

Post: #18
Title: Re: خالكم (حمزاوي ) قبض عليه متلبسا
Author: حمزاوي
Date: 02-12-2007, 01:48 PM
Parent: #17

Quote: معقولة يا خال تسافر بدون ما تودعنا !!
أنحنا هسي إتعشمنا .. كنا دايرنك تصوم معانا رمضان !


سـجـمي

Post: #22
Title: Re: خالكم (حمزاوي ) قبض عليه متلبسا
Author: Muna Khugali
Date: 02-12-2007, 06:12 PM
Parent: #18

معقولة يا خال تسافر بدون ما تودعنا !!
أنحنا هسي إتعشمنا .. كنا دايرنك تصوم معانا رمضان !

ناذر كان عايزك تتعذب معاهم!

حمـدلله هلي السلامة..

تحياتي

Post: #19
Title: Re: خالكم (حمزاوي ) قبض عليه متلبسا
Author: صالح عبده
Date: 02-12-2007, 02:08 PM
Parent: #1

همزاوى سكر في
بلد اكون سكر في
ولياب كون سلم

Post: #20
Title: Re: خالكم (حمزاوي ) قبض عليه متلبسا
Author: حمزاوي
Date: 02-12-2007, 02:12 PM
Parent: #1


الكلاكلة هايد بارك السودان
في الكلاكلة مستحيل تنوم قبل الساعة 11 ليلاً ( ممكن يجييك النوم لو كنت أطرش او سكران ) من بعد صلاة المغرب مكبرات الصوت تشتغل وتلعلع بالاغاني النوبية عديل ووووي وسبو ليلي والمشكلة حفلتين او اكتر في الليلة الواحدة والساون يدق في رأسك وجوا الجوا ذي ما قال وردي وانا لي حسع ما عارف وردي يقصد شنو بي جوا الجوا جوا الاولى عرفناها ولكن الجوا التانية دي شنو ما قادر اعرف اها نرجع لي موضوعنا والحفلات أنا قمت سألت حرمنا المصون ( الولية ) في شنو ليه كل ليلة حفلات في الكلاكلة قالت هي يا ود الناس انت ما داير الناس تفرح ولا شنو ( عليكم الله شوفوا جنس الرد دا ) واقعد مصنقر لغاية ما تجي الساعة حداشر موعد ايقاف الغناء في الحفلات وبعد داك اتغطى واشخر واستمتع بالنوم . . والغريبة كل ليلة نحن في الحال دا اصلو معقول كل ليلة عرسين ولا تلاتة غايتو اذا كل حفلة بعرس والله بت تبور في الكلاكلة مافي ها يا البنوت العايزات عرس ارحلن لي الكلاكلة . . ولا يمكن في الطلاق كمان بيعملوا الحفلة .
فعلاً
الكلاكلة هايد بارك السودان

Post: #21
Title: Re: خالكم (حمزاوي ) قبض عليه متلبسا
Author: ابو جهينة
Date: 02-12-2007, 02:26 PM
Parent: #20

حمزاوي

Quote: واقعد مصنقر لغاية ما تجي الساعة حداشر موعد ايقاف الغناء في الحفلات وبعد داك اتغطى واشخر واستمتع بالنوم


تتغطى .. و تشخر .. و تستمتع بالنوم ؟ كل يوم ؟
كدي تاني قول ماشي إجازة...

Post: #23
Title: Re: خالكم (حمزاوي ) قبض عليه متلبسا
Author: welyab
Date: 02-12-2007, 08:39 PM
Parent: #21

Quote: تتغطى .. و تشخر .. و تستمتع بالنوم ؟ كل يوم ؟
كدي تاني قول ماشي إجازة...

هووووووووووي يا قريبي .. انت عاوز تقول شنو....
طيب ماتخلي دكين يختها عديل!!!!!!!

في واحد من اندنا ... لسان الجن شوية ما كان بيعرف يقول اجازة...
ينطقها (اذا جا) !!!!
عاوز تقول (الخال) خلاها خل !! ولسان حالهم (الجماعة) كان بيقول (اذا جاء)
....
( اغالط نفسي بنفسي واقول يمكن انا الـ ماجيت )

Post: #24
Title: Re: خالكم (حمزاوي ) قبض عليه متلبسا
Author: حمزاوي
Date: 02-13-2007, 07:16 AM
Parent: #1

ونحن نعيش ليالي الكلاكلة والافراح والحفلات القلقت منامنا وساهرت بينا صدقوني حفظت كل الاغنيات النوبية وممكن اسمعها لصديق الموج وبالنغمات كمان . . في ليلة كدا وانا منتظر نهاية الحفلة ومصنقر في نص العنقريب فجاة تغيرت النغمة وبدأ الفنان يغني في أغنية ويردد مرات الراجل هلو هلا مرات الراجل هلو هلا وأهي أنا وأهي أنا . . قلت أفا الكلام دخل الحوش الليلة بقت فيها جكيس لي نساوينا قلت للحاجة يا وليه الفنان دا بيتغزل في نساوين الرجال قومي البسي توبك وأمشي زغردي وكشفي للفنان دا قالت هي يا راجل انت ما قاعد تقرأ كلام البيكتبو صاحبك ابوجهينه ليك في البورد ونحن في نقاش والحوار في غناء الفنان ولدي جاء داخل بعدما حضر الحفلة وأنا لي شلاقتي قمت سألت الولد يا ولد الليلة ليه غيرتو السستم قال لي يا ابوي أهل العريس كانوا من عرب الجزيرة وأصروا على الفنان يغني ليهم بالعربي وقام الفنان غنا ليهم مرات الراجل هلو هلا قاموا أهل العريس عرضوا ورقصوا ودقوا بعضهم بالسياط والدماء سالت في ضهورهم ( أهل العوض ) قامت الحاجة قالت الحمد لله الما رحت لي حفلتهم طبعاً انا نقشت السبب هي بتخاف من الدم .

بعد شوية حاحكي ليكم ما حصل لي مع فلوس السودان المتعددة جنية دينار وجينة نيفاشا

Post: #25
Title: Re: خالكم (حمزاوي ) قبض عليه متلبسا
Author: حمزاوي
Date: 02-13-2007, 09:05 AM
Parent: #1


اختي مني خوجلي
مسكاقمي
قولي لي أخونا نازر فال الله ولا فالك
اخوي صالح عبده
مسكاقمي
دار العوضة تحييك / القمح تمام التمام

ابوجهينه وولياب
ايوا ( إذا جاء ) وبجييكم صادي

Post: #26
Title: Re: خالكم (حمزاوي ) قبض عليه متلبسا
Author: حمزاوي
Date: 02-13-2007, 01:05 PM
Parent: #1


فلوس السودان والفئات والتسميات دا حكايتو حكاية التاجر يقول لك رقم مع تسمية تانية وانت تعطيه فئة مع تسمية تانية وحسع بدأوا يكتبوا مبلغ بمسمى جديد ( يعني التاجر يقول يا اخي الحاجة دي بالف جنية تقوم انت تعطيه 100 دينار والبنوك تتعامل بالجنية الجديد ) المقيمين بالسودان بيعرفوا يتعاملوا كيف الكمساري ياخذ كل الانواع ويرجع الباقي تمام التمام وبتاع الدكان والخضار بس البيتلخبطوا هم المغتربين وطوالي لمن تغلط في الحساب بيقولوا ليك انت مغترب ولا شنو انا غايتو حلاً للمشكلة دي قمت عملت علاقة قوية مع بتاع الدكان الجنب البيت وبقيت لمن اكون عايز اي حاجة امشي ليه واشيل منو وهو طلع ابن حلال يوريني اديه كم وياتو فئة مرة المرا طلبت مني اجيب ليها طلح ( للدخان ) وقالت كمان داير حفايظ قمت مشيت لي بتاع الدكان صاحبي قلت ليه يا اخي جيب لي طلبات المرا دوول قال لي الحاجات دي انا ما عندي وما بعرف عنها شئ قلت ليه دبرني عليك الرسول قام مشكور غايتو قفل الدكان وركب معاي ودبرناها . . عندي شافع في البيت مقرم نقش موضوع اني ما بعرف فئات الفلوس بقي بدون ما يرسلوه يجيني يا ابوي دايرين نمشي نجيب العيش وانا اقوم اديه الفلوس شويتين ماشين نجيب طعمية وشويتين عايزين كراس وقلم يوم جاني بعد صلاة المغرب وقال لي عايزين نمشي نجيب زبادي قمت اديتو القروش امه شافت المبلغ وقالت الولد دا انت اديته الفلوس دا كلو لي شنو قلت ليها عشان يجيبوا الزبادي قالت سجمي تديه عشرين الف جنية عشان يجيب زبادي اتضح اني انا بدي الولد ورقتين من فئة الف دينار على اساس انه الف جينة . . عشان كدا المغتربين دائماً مسطحين وانصح اي واحد لازم ياخذ درس عصر في فئات الفلوس السودانية الجنية القديم ودينار الانقاذ وجنية نيفاشا.

حاجي راجع واحكي ليكم قصتي في سوق الجلود بام درمان وعم سليمان وقرب الموية .