مرسال بهجه و جمال من ابوذر المطر ..لحمزه سليمان..عاجل

المطر .... سخى
خير سحابو طايل عيون كل البشر
البتشعر بالجمال و بتتمنى انو يكبر و ينتشر
المطر ... فرحنا بى اصحابو .. شتات .. اللملم شتاتنا فى زمنا قبيح ولئيم ... و جورج الكفو صارت ضريح لعاشقى الحياه/النبل و محبات جمال الانسان/العدل/ والحريه للجميع.
المطر فك لى الاشاره ... وصلت مكانا .. رفعن نخلات الانتباه حواجبن و اتشهدن ... وبعد ما فقت من صدمة وقع الكلام/الحب ... باقى لى انقل الدين والرجاء لدرويشا تانى من دراويش الجمال والحب والحياه ... مطرا تانى سحابو اسمو عود و كمنجه و حبال حلق تربط مابينا كلنا ... و كلنا رجا...
اتمنى اكون اديت الامانه حقها...

Re: جورج -- دى كفك ولا غيمه

Quote: تعرف يا مراويد كلما ألقاك، بتخيل العيون الحلوة، الواسعة زى إشتهاءتنا المقيمة، وبالمناسبة دى اتذكرت قصيدة، للرموش والعيون العاجبا سيدا، وتعرف نفسى فى شنو نفسى والله تعجب الزول السمح "حمزة سليمان" ويشوفها كان عجبته، يمكن يلقى فيها طريقة موسقة كدى شوفها إنت أول شى سمحة ولا ما نافعة، ونهديها لأسياد العيون الحلوة كلهم مدى ضل رمشك مرافى لونى شعاع الأمانى عشان اجيك استقبلى الشوق الهدير اندهاش اللحظة بى شوفة عينيك وانبهار اللقيا بالريد الخرافى ومدى ضل رمشك مرافى جاييك على ضو الأغانى متوهط الوجع الكبير رهق المسافات والمنافى مشدود متل وتر المعانى خطوة فى الزمن الودار فكرة فى الخاطر الكسير دمعة فوق خد القوافى نجمة دساها النهار انشده وأنا جاى ليك وينقطع نفس الثوانى وأجيكى حافى ومدى ضل رمشك مرافى جاى ليك ارسم ملامحك ارتعاشات فى الحروف تنتهى الضلمة وتفوت وابداكى تانى يتلاشى وجع الليل يموت وابداكى تانى ارسم ملامحك طيبة زى فجر الجروف نفحة من طيب البيوت وابداكى تانى ينهزم هم التجافى ومدى ضل رمشك مرافى دوى صمت الليل هواجس شال كلامى وفتح أبواب السكوت ضج ضيك فى مسامى زغردت قمراة نشيدنا وفرهد الفرح البموت خليهو حزنك لا تهمى ولا تخافى بس مدى ضل رمشك مرافى أبوذر

مراويد سلام
والله لي زمن ما بعمل لوج أون وبكتفي بالقراية
لكن القصيدة دي جرتني جر.. وأخوك مكتول في قصايد أباذر
وغايتو يا أستاذ حمزة سليمان جاتك تتقدل أتحفنا بيها

أححي انا من الكلام دة

Quote: جاى ليك ارسم ملامحك ارتعاشات فى الحروف تنتهى الضلمة وتفوت وابداكى تانى يتلاشى وجع الليل يموت وابداكى تانى

بالجـد يالومببـأ سحـر المطـر لايقـاوم..
وياحمزة انا والله عجبتنـي والكـلام (مموسـق) اتحفنـا بيـه واكيد عجبتـك..
التحيـات الشوامـخ مراويـد

اكيييييييييييييييييييييييييييييييييد يا ملكة سبأ
قصيدة رائعة

بلقيسنا

وبيك يكتمل الجمال
ترقص حروف الروعة
يتهادى المقال
ينضح شعاعك بالسنا
ما اللقيا بالناس العزاز
طعم المنى
روح الوصال

دوما تتعطر ساحات الفرح فى دواخلنا، بى كلماتك الحدائق يا ملكة

الشكر براهو بكفى يا ربى؟

ما أظن

حبيب نورة

وحبيبنا

فى حضرة وجودك فى أى مكان، تشلع بروق المحبة وتخضر أغصان الولف الجميل

شكرا ليم يا أخضر

لوممبا
اقرا المطر كتير و زور بوست الكف/الغيمه طمام البطن بروح و ابعد من الناس البتسد النفس .

بصراحة
يامراويد
المطر دا لما القاه فى بوست
بتذكر ايام الصباولحظاتى التى كنت فيها لا اعير اهتماما للبس القميص
ولا ارتداء البنطال ..اتذكر انى امى دائما تدقنى وانا جائى ملطخ بالطين وقد ضيعت الشدة وتركت قميصى فى قوز الرملة عند اكواخ الطفولة التى كانت تهدمها الرياح ونحن نضحك على منظر الخراب اللذيذ
فانت بجد يامراويد مبدع لانك دخلت الى عالم الوحل الذى يسببه المطر فلا عربة ستخرج ولا تركترات...والمطر لما تلامس كلماته الحان المبدع حمزة سليمان..دا كمان وحل تانى زى ترع ابقوتة فى موسم الخريف...فياله من منظر بوكسى غاطس فى الطين وحسناوات يقفن حيارى خوفا على جليدهن الناعم...وشاب يريد ان يثبت رجولته فى دف ذلك البوكسى..المتلاشى بعضه داخل الارض...فهذه هى حالتى لما ادخل على قصائد المطر
لك الود

شكرا لكم جميعا هنا
من وهبتم لى جمال فى لحظة كنت احتاج لها حقيقى
يا مراويد لك الحب
ذى مرافى الرموش
ويا مطر
جاييييييييييييييييك وح احكى ليك عن ذاتى لما اكون فى حضرة رموش ساعة تحضن سواد العين
حقيقى قصيدة رائعه جدا
وانا لها وللعيون
ولك حبى يا مطر لكونى مررت بخاطرك
حمزة

مراويد:

وانحنا راجين الفرح..

جورج الخريف

الفرح يفوتك إنت يمشى وين

وكل أفراح الجمال، ياكا عنوانها

حمزة سليمان

الزول الفنان

سمعت يا حمزة أغنية العاقب البقول فيها "جابتنى المحبة ما جيتك بإيدى"، ده والله ياهو حال الأحاسيس، وشغف الأمنيات، وأكيد القصيدة حتلبس "هدوم عيدا" وتطلع فى ساحة الضوء وتبقى قمر الكلام، لمن إيديك ترويها بى عطر النغم وتسقيها بى موية الموسقة الإبداع، ده لو كانت فعلا قابلة إنها تتموسق، وفوق ده كله، حتعلا هاماتنا بيك والله ونزهو ونعتز بيك، كل الزهو وكل الإعتزاز

Quote: والمطر لما تلامس كلماته الحان المبدع حمزة سليمان..دا كمان وحل تانى زى ترع ابقوتة فى موسم الخريف...فياله من منظر بوكسى غاطس فى الطين وحسناوات يقفن حيارى خوفا على جليدهن الناعم...

عارفين البوست دة أستوائي للحد البعيد ,, شكلوا
كدة الشمس بتتعامد عليه مرتين في السنة ,, كلو
خريف ودعاش وطين وخصوبة وأرض النيل فيه من ذوات
الطمي !!! ربنا يجود عليكم بالخير و أجيد ليكم
بالمطر ,, هكذا كانت تقول حبوبتي النصف سودانية
ولم تتحد الجينات المستوردة علي الحبل السرّي
البسقي أصالة الانتماء فيها ,, كانت تقول أجيد
ليكم بالمطر حين الهطول ,,,طيب الله زكراها وزكري
المدعو المطر ,,, ولي قدام عشم ممدود قدح كسرة
حلم بنوتنا بالسترة كلام ناساً حنان بالحيل ولي
قدام أشوفكم حلم,,,, وأكيد راجعين لو بقينا نصاح

نوره وحبيبها

الإتنين، أشهى من الفاكهة الإستوائية

وأغزر عذوبة، من نداوة نسمات خريفية إستوائية

التقدير والمحبة يا حبيب نورة

أبوقوتة

تعرف يا أحمد أنا كمان لما ألقاك
تبقى الخضرة سيدة الموقف، أشم ريحة الخضرة وأتذوق طعم النسمات، أتخيل الوقت أصيل "عصرا هالك" وشويه طيور جايه راجعة لى بيوتها، بعد رحلة حب قصيرة، وشوية ناس قاعدين عناك فى طرف حوض برسيم، والحب والصفاء، تالتهم ورابعهم

تحياتى ومعزتى كلها ليك يا زول يا جميل

العزيز لوممبا

الأشواق والمحبة

حروفك قلائد، نختها على جيد القصيدة، تتزين بيها المعانى، ونفرح بيها نحن

ليك المحبة كلها وليك السلام، ودمت كريما وطيبا

مراويد
ألوان بريقك
من بعيد
لوحت
كتبت تواريخ المنى
ورسمت صباح العيد
قطرات رحيقك
نقطت
سقت النهار
خمر النشيد
حرفك رفيقك
وصبوة الحزن السعيد

يا مراويد، ما زلت "تكحل" أجفان الفرحة فى عيون اللحظة، الأجفان القاعدة زى ضفاف نعسانة بتغازل أمسيات المنى، بالليل، وبتداعب ضوء البهجة بالنهار

خليك جوه العيون، تانى برجع ليك