صوتك قاعد يفرق يا حمزة سليمان.. من غير زعل

الفنان العزيز حمزة سليمان..
صحيح إنت فنان جميل ،، وباحث ومؤلف موسيقي مقتدر..

لكن يا عمك..
الثقة الزايدة في الأداء قاعدة تخليك تفرق..
صوتك قاعد يجلي عديل كدا مرات..
الكلام الضفاري دا لمصلحتك..
خت الكورة واطة..
والله الليلة في تقاسيم في النيل الأزرق الله ساكت كمل ليك الأغنية بتاعة ليل الشجن وفي حضرة الدكتور أنس العاقب شخصياً...

فعلاً مفاجأة .. بالنسبة لي أنا شخصياً فعلاً كانت مفاجأة غير سارة.. حيث أنني أتوقع منك الأفضل... الأداء الصوتي فارق في كتير من المواقع والخانات... أما الأداء الحركي فكان حاجة لا تتناسب مع الرزانة المفروض إنها موجودة في صوت حمزة سليمان..

من غير زعل...

تحياتي

الأخ محمود استمعت للحلقة المذكورة نعم اؤيدك فى كل ما ذهبت اليه

الشى الغريب كان اطراء ومجاملات أنس العاقب

سلامات يا محمود ....

يا خي والله كنت كتمني أشوف الحلقة دي بس خرجت لظروف طارئة ..

ما ألقى عندك تشجيل للأغنية ولا نكورك لي تمبس ينجدنا ؟!

الأخ أسامة... شكراً على حضورك ومؤازرتك..
رأيك محل تقدير واحترام...خاصة وإنه يصب في خانة من غير زعل برضو..

عليك الله موش صاح؟؟ في نوتات كتار خالص مجليات.. في حتات كدا العازفين المصاحبين بيكونوا سبب في (نشاز الصوت).. لكن حمزة ما وقف على تحديقات الكمنجة ذات القوس المشرتم وثقة عازفها الزايدة عن الحدود وانعدام الثقة أو عدم الحفظ أحيانا عند عازف الأورغن..بل زاد عليها حبتين من الثقة الزايدة عند حمزة نفسه..(ولا شئ شخصي أبداً) على قول أنور كنج..والشباب ما قصروا والله.. عازفين حريفين جداً وإحساسهم عالي وأي حاجة .. لكن تقول شنو؟؟ ما كان يومهم يمكن؟؟

كنت أتمنى أن أرى مداخلة من جانب الأخ الفنان (العضو الزميل) حمزة سليمان..

أقين..ثانك يو فيري ماتش..

ناذر الحبيب.. كيفك يا عريس؟؟

معليش يا ناذر عندي مشكلة كونيكشن..
كتبت ليك رد لذيذ لكن طار بسبب ضعف الكونيكشن..

المهم.. معك نقول عووك لكل الشباب الممكن يرفعوا لينا ملامح من حلقة تقاسيم لمزيد من الإضاءة..

تحياتي مجدداً..

أعلى

اعلى



امتنع عن التعليق

واتمنى انزال الغنا كلو مرة تانى

عشان يكون السمع مرة تانية

الأخوة المشاركون ...
تحياتي..
حقيقة كده الفنان حمزة ما فارق من الليلة ولا من أمبارح حمزة ليها فترة طويلة جداً فارق ولعل أكثرها (فرقة) حلقة كانت عن سودانير وضيوفها من سودانير ..حقيقة تفجأت لما يقدمه حمزة ولصوت حمزة الخالي من التطريب في السهرة بل وللأسف فالأستاذ حمزة كان يفرق ويقطع وزي ما بيقولوا بي الدارجي كان (بيتمها موية) ..
حلقة تقاسيم واصل فيها الأستاذ حمزة رحلة (الفرقة) وحينها تأكد بان الموضوع ليس مصادفة أو أن الحلقة الأولى بسبب التسجيل أو الصوت أو المهندس كما يرمي الفنانون دوماً اللوم عليهم ولكن الحقيقة كانت واضحة بأن صوت حمزة سليمان في النازل..
عارفين كلام زي بيزعل مننا الناس وربما أولهم حمزة ولكن الحق يقال يا حمزة صوتك في النازل وبصورة مخيفة وما تقوم به الان هو عبارة عن شفاعة لتاريخ طويل مع عقد الجلاد وإلا لما سلمت من النقد العنيف ..
حمزة في التلحين قمة الأبداع ولكن في الغناء تكاد تكون ملامح صوتك باهتة ..

http://www.sudaneseonline.com/cgi-bin/sdb/2bb.cgi

Quote: حمزة في التلحين قمة الأبداع ولكن في الغناء تكاد تكون ملامح صوتك باهتة ..

دا كان واضح ( بالنسبه لى ) من اول يوم غنا براه بعد ما ساب عقد الجلاد

الأخوة الأعزاء
أقدر دوافعكم في هذا النقد اللازع
وهي حرصكم على مغني البورد وفنانه الملتزم حمزة بأن لا يظهر إلا بالصورة التي عرفتموه بها
حمزة فنان مبدع مجد ومتجدد وفنان تجريبي منحاز للفكرة التي تعبر عن الهم العام
لكن تجربته مثل أي تجربة جديدة تحمل في طياتها كثير من والإيجابيات والسلبيات كذلك
والنقد الهادف هو الذي يقوم التجربة ويجعلها تأتي أكلها
مسألة الصوت شاهدنا مطربين عديدين، كبار وكبار جداً ، أصواتهم تخونهم بعضهم في بعض الأحيان والكثيرين منهم في معظم الأحيان وهي ليست نهاية المطاف .. ولكنها أيضاً أمرأً لا يجب المرور عليه مرور الكرام
حمزة ما زال ينسج تجربته الفنية يعاونه في ذلك مجموعة من الشعراء المجددين قبلوا التحدي وخوض التجربة معه أمثال حميد والكتيابي وعاطف خيري والقدال وهاشم صديق .. وما زال تجار الكاسيت والمسئولين عن الإعلام المرئي والمسموع يحاصرونه بأن يغني غثاءاً كما الغناء السائد ، وما زال يعاني من تشكيل مجموعة موسيقية لها المقدرة للتعبير عن الشكل العام للتجربة.
لم أستمع للحلقة المذكورة .. ولكن أعلم بأن بعض الملاحظات أعلاه صادقة وأتمنى من الأستاذ حمزة أن يعاود الإستماع لها وأن يقيم أداءه فيها وأن يستفيد من ملاحظاتكم .. وأن يسعى جاهدا لتطوير قدراته في الأداء الصوتي، وكذلك مزيد من التجويد في تأليفه الموسيقي والأهم من ذلك تأليف مجموعه موسيقية متجانسه تقدر أن تحمل معه عبأ وهم فرض غناءاً جديداً شكلا ومضمونا كما كان يفعل الراحل مصطفى سيد أحمد

Quote: دا كان واضح ( بالنسبه لى ) من اول يوم غنا براه بعد ما ساب عقد الجلاد

الأخ يوسف:
عن نفسي وكذزق شخصي حتى في عقد الجلاد كنت أشعر أن الأستاذ حمزة هو الحلقة الأضعف صوتياً وإن كان هو من يمثل (الصوت التخين) في الفرقة زي ما بنقول بي الدارجي..
قارنت قبل فترة وانا أستمع لعقد الجلاد بين ما كان يقوم به حمزة وبينما كان يقوم به لاحقاً ابو ذر فوجدت فرقاً شااااااااسعاً في الاداء ..
حمزة يمتلك ملكة تلحينية فريدة ونادرة وقمة في الابداع وكل الأعمال التي لحنها لعقد الجلاد كانت تدخل قلبي بسرعة البرق وأحفظها في أقل من ساعة ..
حمزة فنان ويعرف طريقه وليس نحن من نوجهه لكنها فقط وجهة نظر نقولها :
على حمزة سليمان أن يتفرغ للتلحين ويبتعد (على الاقل في هذه الفترة) عن الغناء..

الحبيب محمود مصطفى وضيوفه الكرام،

بالرغم من أنني لم استمع للحلقة المشار إليها لكنني في الواقع استمعت لحمزة سليمان في مواقع عديدة

ومناسبات مختلفة تجعلني أختلف معكم فيما اتفقتم عليه..

حمزة رجل يتفوق على عصره في تقديري

ويحمل ملامح فنان لزمن لم يأت بعد

ليس في صوته وأدائه فحسب بل في حسن اختياره للكلمات المتفردة وقدرته الكبيرة على التلحين

وعلى التجديد كذلك

حقيقة يطربني حمزة لأقصى حد

وتمنحني ثقته في أدائه رونقاً خاصاً

ولعله الفن واحتمالات التذوق تجعل قواعد القبول متباينة.

وبالتأكيد لو لم يكن حمزة يشكل حضوراً إبداعياً لما كان هذا الخيط

لكم التحية والمودة والإحترام

ولحمزة فيض من الإعجاب

انا ماشي راجع لي بيوت تفتح لي ادق او ما ادق

اضغط زر التشغيل وطوالي خش

الحبيب عاطف عبد الله

اقبل نقاش التجربة كاملة وليس جزءا منها

انا المؤلف والمغنى والموزع والمنتج والذى اختار قصائدى همى فى طريقى واتعب ايما تعب لاختيار نص
يشفى غليلى لالحنه واقدمه انا كل ذلك وان كنت تجربة احادية لا تحمل فى طيات موهبتها غير الصوت فاليعاتبنى الناس على الهفوات لكنى انا كم والناقش هنا جزء فلذلك لم اعلق او اناقش الاخ كاتب البوست الذى اود منه ان يستمع ثانية للحلقة واتمنى منه ان يشير الى مازورة واحدة فيها شى من ما يقوله

الرجعة للبيت القديم
كلمات محمد الحسن سالم حميد
الحان وغناء حمزة سليمان


انا ماشى راجع لى بيوت
تفتح لى ادق او ما ادق
من غير تقول الزول منو
ولا حتى عل الداعى خير
لا مالك الجابك شنو
لى بيوت بجيهن اى يوم
ان جيتا ليل ان جيت دغش
طوالى ادفر الباب واخش
مرت اضيق اختا الطريق
من بيت لى بيت
فى بيتنا كربش
ذى نسيمه معدى شيمه
لا اش لا كش
لا قطعت نوم النايمين
لا الباريه للحيشان تقش
عند شوفتى تجرى على هدم
فى محلها الشوق يترسم
تنجهنى حتان بالاسم
تندهنى عقبان تبتسم
البيت ده بيتك يا الحبيب
ادخل مخير وماك غريب
انمد فى اقرب عنقريب
مبهول فى حوضو الهمبريب
النيمه يا العنابه ضل
اغشى التكل خرمان فى شاى جيعان اكل
وداك التمر والزير قريب
بايت من البارح ملان
بايت فى صدر الهمبريب
در تقرا ديك كتب الولاد
قلقت او طال الرجا
كورك نقولك هوى بعاد
رسل لنا المرسال نجى
يا روق باحساس المحب
سيد بيت وعننا ما ضهب
الهيلنا هيلك شن ندس
ما طال عمرا ينحسب
يا السمح
يا الفنجرى القدامى
يا المامون
على بنوت فريقو
بهار ملاحن والملح
ما انذكرن لو شلخو كم
ويوماتى بينن منطرح
الدغرى
يا دخرى الطيابه
الماشرب
لا فك ريقه من الغلابه
وكلو صح
الصفا دمك
وكان سبب فى ها الجرح
انشاء الله
لا مسى لا صبح
وان شاء الله
يا بلدى المعمر بالعشم
من سف خيرنا
يكبو مح
وان شاء الله
لا فاق لا نصح
بى الله ينكر العوج
والصاح يصح




الاخ الدكتور معز
الشاعر والانيق

هذا هو نص البيت القديم اغنية بهذا الشعر ايكفى ان اختصرها لوداعى لحنية هذا النص يا دكتور معز تمنيت لو غنيته كله لكن ما لحنته منه بهذا الحجم من الطول وتصور يا دكتور اغنية لا يوجد بها لازمه موسيقية واحدة من تبدا المقدمه الموسيقية الى القفلة الموسيقية تتنقل الالحان فيها تنقل الشاعرية الموجوده فيها لم يقف الغنا من ان يبدأ وينتهى وهنا تتسجد قدرة الموسيقى فى تشكيل اللحن المصاحب للشعر اثناء الاداء فى تشكيل تأليفى جديد فى السودان لاننا تعودنا على مقدمة موسيقية ولازمة موسيقية وتاليف كلاسيكى انا شخصيا متمرد عليه لانى ارى انسياب الشعر يؤدى الى انسياب اللحن حتى لا يكون هناك فصل فى المتابعة لكل مستمع .
تسلم يا دكتور

Quote: اقبل نقاش التجربة كاملة وليس جزءا منها انا المؤلف والمغنى والموزع والمنتج والذى اختار قصائدى همى فى طريقى واتعب ايما تعب لاختيار نص يشفى غليلى لالحنه واقدمه انا كل ذلك

الاخ محمود سلامات
اعتقد ان حديث حمزة منطقي و انا اتفق معه






اما عن نفسي فأجد حمزة فنان ممتاز
صوت و تأليف و صورة كمان
زاملته لسنوات و اعرف ملامح صوته جيدا

تحياتي

بناء على طلب الأخ الفنان حمزة سليمان... نورد هنا فقط (بعض) ما (نظن) أنه يدعم ما ذهبنا إليه:
كما نرجو أن يتسع صدره لملاحظاتنا... ولا شئ شخصي إطلاقاً...

انا ماشى راجع لى بيوت
تفتح لى ادق او ما ادق
(من غير) تقول (الزول) منو... (يلاحظ الفرق في كلمة الزول وهو أوضح في المرة الأولى أكثر منه في الثانية)..
ولا حتى عل الداعى خير... (ولا حتى الداعي....برضها مانضيفة خالص)..
لا مالك الجابك شنو
لى بيوت بجيهن اى يوم
ان جيتا ليل ان جيت دغش
طوالى ادفر الباب واخش
مرات اضيق اختا الطريق..(مرات أضيق...هنا برضو ...) إنت يا حمزة قايلني بكرهك؟؟ أبداً والله...
من بيت لى بيت
فى بيتنا كربش
ذى نسيمه معدى شيمه
لا اش لا كش
لا قطعت نوم النايمين
لا الباريه للحيشان تقش
عند شوفتى تجرى على هدم
فى محلها الشوق يترسم
تنجهنى حتان بالاسم
تندهنى عقبان تبتسم (عقبان)...
البيت ده بيتك يا الحبيب
ادخل مخير وماك غريب
انمد فى اقرب عنقريب
مبهول فى حوضو الهمبريب
النيمه يا العنابه ضل (العنابة)...كيف معاك؟؟
اغشى التكل خرمان فى شاى جيعان اكل
وداك التمر والزير قريب
بايت من البارح ملان
بايت فى صدر الهمبريب
در تقرا ديك كتب الولاد
قلقت او طال الرجا
كورك نقولك هوى بعاد
رسل لنا المرسال نجى
يا روق باحساس المحب (باحساس المحب)...برضها
سيد بيت وعننا ما ضهب
الهيلنا هيلك شن ندس
ما طال عمرا ينحسب
يا السمح
يا الفنجرى القدامى
يا المامون
على بنوت فريقو
بهار ملاحن والملح
ما انذكرن لو شلخو كم
ويوماتى بينن منطرح
الدغرى
يا دخرى الطيابه
الماشرب
------- من هنا ونازل..-----
شخصياً كنت أتوقع أفضل من كدا بكتير...
I mean some clusters consider revision before being broadcasted on TV

أنا بالمناسبة واحد من المعجبين بتجارب حمزة سليمان... لكن الحاجات الفطيرة بتكون ظاهرة...

---------- أسمعها تاني يا أستاذ -------------

لا فك ريقه من الغلابه
وكلو صح
الصفا دمك
وكان سبب فى ها الجرح
انشاء الله
لا مسى لا صبح
وان شاء الله
يا بلدى المعمر بالعشم
من سف خيرنا
يكبو مح
وان شاء الله
لا فاق لا نصح
بى الله ينكر العوج
والصاح يصح
----------

أسوأ حاجة إنه انفعال حمزة من الكلام والذي عنوانه من غير زعل جاء في غاية الغرابة
defensive and aggressive
في حين إننا كنا نتوقع تفاعل إيجابي ..

شكراً..

الاخ محمود
التحية والود
انا ماعارف قصة الصوت يجلى ويفرق دى ليها علاقة بعلم الموسيقى والصوتيات واللا لا .. لكن كمستمع تشكلت اذنه على الاستماع للموسيقى الغربية عموماً بأشكالها المختلفة .. اجد فى صوت حمزة قدرة عالية على التنوع والتطريب .. وبشوف فيهو خروج على المألوف فى الاغنية السودانية الاتعودت على النمطية فى الاداء.
على كل دا رأى واحد مستمع ومحب لوسيقى وغناء حمزة..وشكراً ياحمزة على السهرة الجميلة الممتعة.

الأخ عمر الفاروق...
شاكرين يا سيدي مرورك وجرأتك في تحمل المسئولية...

Quote: حقيقة كده الفنان حمزة ما فارق من الليلة ولا من أمبارح حمزة ليها فترة طويلة جداً فارق ولعل أكثرها (فرقة) حلقة كانت عن سودانير وضيوفها من سودانير ..حقيقة تفجأت لما يقدمه حمزة ولصوت حمزة الخالي من التطريب في السهرة بل وللأسف فالأستاذ حمزة كان يفرق ويقطع وزي ما بيقولوا بي الدارجي كان (بيتمها موية) .. حلقة تقاسيم واصل فيها الأستاذ حمزة رحلة (الفرقة) وحينها تأكد بان الموضوع ليس مصادفة أو أن الحلقة الأولى بسبب التسجيل أو الصوت أو المهندس كما يرمي الفنانون دوماً اللوم عليهم ولكن الحقيقة كانت واضحة بأن صوت حمزة سليمان في النازل.. عارفين كلام زي بيزعل مننا الناس وربما أولهم حمزة ولكن الحق يقال يا حمزة صوتك في النازل وبصورة مخيفة وما تقوم به الان هو عبارة عن شفاعة لتاريخ طويل مع عقد الجلاد وإلا لما سلمت من النقد العنيف .. حمزة في التلحين قمة الأبداع ولكن في الغناء تكاد تكون ملامح صوتك باهتة ..

حمزة قاعد يقرا ومتابع طبعا...

شكراً لكما..

واحدة من عيوب إنتقاد فنان له وزنه أن البعض يتمسك بأشياء أخرى لم نختلف فيها ولن نختلف فيها ويتركون الموضوع الأساسي ..
حمزة سليمان ملحن مافيش نقاش..
حمزة سليمان ينتقي الكلمة الرصينة حلو جداً ..
حمزة سليمان ينتج أغانيه بنفسه قمة الروعة ..
حمزة سليمان لا يغني الهابط جميل خالص..
لكن ده كللللللللللللو ما بيعفي من إنو حمزة سليمان طيلة الفترة الماضية في هبوط صوتي مخيف واداء يشوبه بعض من نشاز ..
حمزة سليمان يمر بمرحلة تشبه للحد البعيد مرحلة الفنان محمد ميرغني وإن كان محمد ميرغني ربما بدأ عامل السن يداهمه في صوته فما هو عذر حمزة ..
مشكلتنا إننا بنتكلم عن ماضي ومرجعية وخلفية سابقة بينما الموضوع الحالي يتحدث عن حمزة الجديد حمزة 2007..
في كثير من الأحيان يغامر الفنان بتاريخه وسمعته الفنية في سبيل حبه للفن والفنان يشبه لاعب الكورة للحد البعيد ولاعب الكورة إن لميختار التوقيت المناسب للإعتزال وواصل اللعب يفقد هيبته وسمعته وإن كان ذكياً وإختار التوقيت المناسب للإعتزال وهو في قمة مجده لشفع له التاريخ ..
فان باست وزيدان أمثلة للاعبين إعتزلوا في قمة مجدهم وبالرغم من ذلك مايزال الناس يذكرونهم بألف خير بينما جورج ويا وأوكوشا فضلوا اللعب ووصلوا لمرحلة اللعب في الدوريات العربية فصاروا نسياً منسية بل وبدأت تخصم من رصيدهم ..

للأسف لا يمتلك الفنانون شجاعة اللاعبين في إتخاذ القرار للتوقف وعند الإنتقاد اللازع تجدهمأكثر غضباً ..
تحياتي..
تخريمة :
أستاذنا عاطف عمر ..ليك وحشة والله ..

تخريمة جانبية للعزيز عمر الفاروق،

أولاً مليون شكر لحضورك الكريم في الرياض في حفل عكس الريح وفي ماريوت

وحقيقي كان مفروض اتصل بيك بعد العودة

لكن يومي الرجعت لقيت الكسر مجبر خطأ وأعادوا فتحه من جديد

ومريت بأزمة طويلة تلاحقت مع سفر آخر عدت منه بالأمس القريب

وانتهت بفجيعة بولتون.. (وجه حزين)..

سلام وتحية خاصة ليك

الأخ يوسف الولي...
نشكرك يا سيدي على مرورك وتسجيل رأيك هنا..

Quote: دا كان واضح ( بالنسبه لى ) من اول يوم غنا براه بعد ما ساب عقد الجلاد

برضو وجهة نظر...

شكراً مجدداً..

يا بروف معز :

زعلان منك ..


























أيوة لأنك ...


















ما قدرت مواكب ريدي ..
ولا قدرت رسايلي الجنّك ..
لا عوافي ولا كيفنك ..



ليك وحشة والله وحمد الله الف على السلامة ..
تخريمة :
أبسط يا عم ريحناك من شروق وقبلنا على أستاذنا حمزة سليمان ..
يحلّو الحلّ شروق

الأخ الأستاذ عاطف عبد الله..

تحيات محترمات تليق باحترام ورصانة كلماتك..

Quote: أقدر دوافعكم في هذا النقد اللازع وهي حرصكم على مغني البورد وفنانه الملتزم حمزة بأن لا يظهر إلا بالصورة التي عرفتموه بها حمزة فنان مبدع مجد ومتجدد وفنان تجريبي منحاز للفكرة التي تعبر عن الهم العام لكن تجربته مثل أي تجربة جديدة تحمل في طياتها كثير من والإيجابيات والسلبيات كذلك والنقد الهادف هو الذي يقوم التجربة ويجعلها تأتي أكلها مسألة الصوت شاهدنا مطربين عديدين، كبار وكبار جداً ، أصواتهم تخونهم بعضهم في بعض الأحيان والكثيرين منهم في معظم الأحيان وهي ليست نهاية المطاف .. ولكنها أيضاً أمرأً لا يجب المرور عليه مرور الكرام حمزة ما زال ينسج تجربته الفنية يعاونه في ذلك مجموعة من الشعراء المجددين قبلوا التحدي وخوض التجربة معه أمثال حميد والكتيابي وعاطف خيري والقدال وهاشم صديق .. وما زال تجار الكاسيت والمسئولين عن الإعلام المرئي والمسموع يحاصرونه بأن يغني غثاءاً كما الغناء السائد ، وما زال يعاني من تشكيل مجموعة موسيقية لها المقدرة للتعبير عن الشكل العام للتجربة. لم أستمع للحلقة المذكورة .. ولكن أعلم بأن بعض الملاحظات أعلاه صادقة وأتمنى من الأستاذ حمزة أن يعاود الإستماع لها وأن يقيم أداءه فيها وأن يستفيد من ملاحظاتكم .. وأن يسعى جاهدا لتطوير قدراته في الأداء الصوتي، وكذلك مزيد من التجويد في تأليفه الموسيقي والأهم من ذلك تأليف مجموعه موسيقية متجانسه تقدر أن تحمل معه عبأ وهم فرض غناءاً جديداً شكلا ومضمونا كما كان يفعل الراحل مصطفى سيد أحمد

يا سيدي يسلم فمك وتسلم إيدك..
كلام زي العسل والله...
شاكرين مرورك وإثراءك لهذا البوست..

بروف معز...
سلامنا وشكرنا وتقديرنا..

Quote: بالرغم من أنني لم استمع للحلقة المشار إليها لكنني في الواقع استمعت لحمزة سليمان في مواقع عديدة ومناسبات مختلفة تجعلني أختلف معكم فيما اتفقتم عليه.. حمزة رجل يتفوق على عصره في تقديري ويحمل ملامح فنان لزمن لم يأت بعد ليس في صوته وأدائه فحسب بل في حسن اختياره للكلمات المتفردة وقدرته الكبيرة على التلحين وعلى التجديد كذلك حقيقة يطربني حمزة لأقصى حد

جميل يا بروف...
لا أدري لماذا أجد في قرارة النفس شئ من قناعة بأن ليس بالإطراء وحده يحيا الفنان... ولعل القليل من التقويم بدافع التقدير والحب مهم وإن بدا قاسياً... بل هو أكثر فائدة من الإطراء الذي ليس آوله ما جاء في حلقة تقاسيم على لسان د. أنس العاقب..وليس آخره ما سطرته حروفك في هذا البوست وهذه المداخلة تحديداً..

لك تقديري..

طارق أبو عبيدة شخصياً؟؟؟؟
يا سلام يا سلام يا سلام...( على طريقة الكروان بادي محمد الطيب..عليه الرحمة)..
يا سلام عليك وعلى حضورك هنا أيها الفنان الأصيل..

Quote: اما عن نفسي فأجد حمزة فنان ممتاز صوت و تأليف و صورة كمان زاملته لسنوات و اعرف ملامح صوته جيدا

ما قلنا حاجة يا طارق.. وعشان أنا واحد من الناس البيعرفو ملامح صوت حمزة بصورة كويسة.. لذلك تجدنا أحرص الناس على تنبيهه إلى مواقع القصور (الفروقات).. طبعاً إنت بتكون عارف قدر شنو المسألة بتكون مزعجة لما واحد يقول لفنان في عينو كدا ياخ صوتك فارق في الحتة دي والحتة ديك وكدا...

الجانب الما عاجبني في ردة فعل حمزة إنه تخيل مجرد خيال..إنه هذا تقليل من (تجربته).. وبدا يدافع ويجيب حاجاته التي أصبحت حاجاتنا شاء أم لم يشأ..
بعدين أنا لو ما حريص على المتابعة الجابرني شنو أصاقر تقاسيم والنيل الأزرق لما تنتهي الحلقة..؟؟؟؟ إنتو قايلين ما عندي ريموت؟؟

لك الحب والتقدير..
أضرب ليك تلفون؟؟

تحياتي مجدداً

الأخ بشرى سليمان..
التحية والتقدير.. وبعد فقد كتبت:

Quote: انا ماعارف قصة الصوت يجلى ويفرق دى ليها علاقة بعلم الموسيقى والصوتيات واللا لا .. لكن كمستمع تشكلت اذنه على الاستماع للموسيقى الغربية عموماً بأشكالها المختلفة .. اجد فى صوت حمزة قدرة عالية على التنوع والتطريب .. وبشوف فيهو خروج على المألوف فى الاغنية السودانية الاتعودت على النمطية فى الاداء. على كل دا رأى واحد مستمع ومحب لوسيقى وغناء حمزة..وشكراً ياحمزة على السهرة الجميلة الممتعة.

ونقول من بعد الحمد لله والثناء عليه:
رأيك على ما فيه من استعلاء غير مبرر ، يظل محل تقدير... ونأسف إن كان وجدانك قد تشكل من موسيقى غربية (عموماً بأشكالها المختلفة)..عشان كدا ما حا تعرف كيف الصوت يجلي ويفرق .. وممكن تكون ما بتعرف الزول الأشتر والأطرق..
نحن يا أخي نحمل وجداناً سودانياً أصيلاً... ونفخر بموسيقانا وأغنيتنا التي اتهمتها بالنمطية في الأداء..

شكراً نبابةً عن حمزة على رأيك ... كلك (ذوق)..
شكراً على المرور ولك التقدير مجددا..

محمود سلامات يافنان
تحسست بين السطور حرصكـ علي حبيبنا حمزة و ده الخلاني ادخل و اصوت لصالح صوت
حمزة موش لانو زميلي او صديقي ابدا وحياة (لقاء)
لانو ببساطة بنفس مستوي امانتكـ في نقدكـ لي حمزة من منطقة حرصكـ عليهو
كمان المعيار الانت استخدمتو معيار غير ثابت
غير ثابت لانو ببساطة وارد الحدوث لان المطرب كسائر الناس يتعرض لمجهود
بدني و ذهني قبل الحفل قد يقلل من مستواه المعروف عنه
جوهر حديثي ان نصح حمزة هنا حتي ولو كان من باب الحرص عليه بتلكـ الجزئية
فيه الكثير من التقليل لقدراته و من حقة ان برفض ذلكـ وده المزعج اكتر من
جوهر النقد نفسو
انا تعرضت لنقد اشد قسوة من نقدكـ لي حمزة قبل كده عشان كده انا متأكد انو
انا اكثر قدرة من حمزة نفسو اسه في الدفاع عن حمزة

Quote: وبدا يدافع ويجيب حاجاته التي أصبحت حاجاتنا شاء أم لم يشأ..

كلامكـ ده اجمل كلام بتقال في البوست ده في تقديري احييكـ عليهو .. ده كلام وضح
موقفكـ كلو و حرصكـ علي حمزة
عندي اقتراح
ياريت بأعتباركـ صاحب البوست ده تستجيب لي رغبة اخونا حمزة و تفتح بوست منفصل
لمناقشة تجربة حمزة كلها و معاها نقدكـ الهنا ده و انا متأكد انو حمزة ما حايتأخر

الونسه معاكـ لذيذة يامحمود و الكلام كتير
والله يديكـ انت و حبيبنا حمزة العافية

تحياتي


منتظر تلفونكـ و برضو عندي بوست بي هناكـ اسمو موسيقا الارشفه
كدي تعال ورينا عملنا حاجة كويسه ولا محتاجين حقنة عضل برضو
عمر الفاروق الحاقد ما تجيبو معاكـ .. زوغ منو .. تعال براكـ

الاخ/ محمود مصطفى
ســـــلامات
اولا انا لم اشاهد او اسمع الاستاذ حمزة سليمان فى تلك السهرة .
ولكن ما اعرفة جيدا عن صوت الاستاذ حمزة صوت جميل ,قوى بما يحمل من تفرد واداء متميز
قد يكون فى تلك السهرة مشاكل فنية فى الصوت وهنا اعنى هندسة الصوت مما دفعك لبناء هذا الراى
وكنت افتكر ان يكون تحليلك اكثر موضوعية كما ذكر لك الاستاذ حمزة بالتركيز على الاشياء التى ترتكز عليها فى تحليلك
مثال انزال الاغنية او السهرة موضع النقاش هنا وبعدها يمكن ان تطرح ما تراه من خلل فى الاداء
ولاشراكنا بى شكل افضل من الاعتماد على سماعك وقد يكون هو الفارق .

احمــد خضــر

مرة اخرى لك التحية والود يا اخ محمود..
بس شايف قصة استعلاء دى كتيرة شوية .. خاصة وللناس اذواق .. وانا قلت (عموماً) ..
وبعدين انا ما بحتاج لى مزايدة فى قصة الوجدان السودانى لأنو أنا برضو بفخر بمساهماتى - على قلتها العددية - فيه .. ويمكن اكتر منك كمان.

ولغاية هسى انت بتلف وتدور فى حلقة مفرغة ، بدل ماتورينا وين فرق وزين جلى .. فبدل الكلام العايم الما مؤسس ، احسن تدخل (تووووووش) وتقول فى الحتة الفلانية حصل كدا .. وفى المقطع الفلانى الصوت كان ضعيف او مجلى ، وفى اللازمة الفرتكانية بقى اشتر ... الخ .

ولايفسد اختلاف الرأى للود ، قضية.

الاخوة المتداخلون وأخص أخى الحبيب حمزة سليمان

لم يكن مبعث مداخلتى فى هذا البوست نقد تجربة حمزة الفنية ولكنى كنت أشير تحديدا للقائه الأخير فلكم طربت لحمزة أيما طرب في غير هذا اللقاء

ليلتها كنت امنى النفس بمتعة غناء حمزة ولكنى لم أسمع حمزة الذي أعرف ومع هذا وجدت له العذر الذى ربما كان أحد أسبابه رهق الحياة

أحى حمزة لك العتبى من أخ يود أن يري حمزة سليمان هو حمزة سليمان الذى ان صدح أعادنا الى أيام الطرب الجميل

أخيرا تذكر أخى حمزة أن

Too low they build, those who build beneath the stars


Osama Siddig

الحبيب طارق أبو لقاء..

آسف عشان كان لازم أنوم عشان أصحى بدري وعندنا عيال ومدارس ومكابسات قبل الدوام..

المهم .. كلامك الجميل دا:

Quote: تحسست بين السطور حرصكـ علي حبيبنا حمزة و ده الخلاني ادخل و اصوت لصالح صوت حمزة موش لانو زميلي او صديقي ابدا وحياة (لقاء) لانو ببساطة بنفس مستوي امانتكـ في نقدكـ لي حمزة من منطقة حرصكـ عليهو كمان المعيار الانت استخدمتو معيار غير ثابت غير ثابت لانو ببساطة وارد الحدوث لان المطرب كسائر الناس يتعرض لمجهود بدني و ذهني قبل الحفل قد يقلل من مستواه المعروف عنه جوهر حديثي ان نصح حمزة هنا حتي ولو كان من باب الحرص عليه بتلكـ الجزئية فيه الكثير من التقليل لقدراته و من حقة ان برفض ذلكـ وده المزعج اكتر من جوهر النقد نفسو انا تعرضت لنقد اشد قسوة من نقدكـ لي حمزة قبل كده عشان كده انا متأكد انو انا اكثر قدرة من حمزة نفسو اسه في الدفاع عن حمزة

شفت جنس الكلام الجميل دا والفهم الراقي دا ،، فعلاً بيخلي الواحد يحب النقاش والبورد ..
ودفاعك عن حمزة ذاتو فيهو جرعات حب لا يلقاها إلا ذو حظ عظيم..

ثم أضفت:

Quote: عندي اقتراح ياريت بأعتباركـ صاحب البوست ده تستجيب لي رغبة اخونا حمزة و تفتح بوست منفصل لمناقشة تجربة حمزة كلها و معاها نقدكـ الهنا ده و انا متأكد انو حمزة ما حايتأخر

يا سلام يا سلام يا سلام يا طارق ياخي..
أنا لكن عندي إنجليزي قدر كدا؟؟
والله ما بكون عندي مانع..لكن حمزة ذاتو قام شبكنا ليك : أنا كل وأنا بطيخ...
يابا لغاية هنا أنا أحسن لي أحافظ على مساحات حمزة في الوجدان..
نسطر هنا للأمانة والتاريخ... حمزة رجل مجدد مجتهد وصاحب تجربة.. كبرت أو صغرت..استمرت أو بدأت في الأفول..هذا ما يجب أن يكون شغل حمزة الشاغل.. والممرات الخشنة زي كلامي دا..بتكون جزء من التجربة.. وعلى الله قصد السبيل..

لك المودة الشديدة خالص يا طارق والاحترام..

الأخ أحمد خضر..

Quote: اولا انا لم اشاهد او اسمع الاستاذ حمزة سليمان فى تلك السهرة .

أنصحك بمحاولة الحصول على تسجيل للسهرة..

Quote: وكنت افتكر ان يكون تحليلك اكثر موضوعية كما ذكر لك الاستاذ حمزة بالتركيز على الاشياء التى ترتكز عليها فى تحليلك مثال انزال الاغنية او السهرة موضع النقاش هنا وبعدها يمكن ان تطرح ما تراه من خلل فى الاداء

في نموذج في نفس البوست دا...فوق شوية بس.. عليك الله شوف وأسمع..

Quote: ولاشراكنا بى شكل افضل من الاعتماد على سماعك وقد يكون هو الفارق

برضو جائز جداً..

كتر خيرك يا شيخ أحمد على الحضور هنا ..

الأخ أسامة صديق..
مرحب بيك تاني ويا سلام على ذوقك ياخ..

Quote: أخيرا تذكر أخى حمزة أن Too low they build, those who build beneath the stars

كلام جميل فعلاً..

حبابك ألف مرة والله.. ونورت البوست

الأخ محمود مصطفى محمود
تحياتي وخالص الود
أذكي أقتراح خدر

Quote: عندي اقتراح ياريت بأعتباركـ صاحب البوست ده تستجيب لي رغبة اخونا حمزة و تفتح بوست منفصل لمناقشة تجربة حمزة كلها و معاها نقدكـ الهنا ده و انا متأكد انو حمزة ما حايتأخر

وياريت عندما نخوض في هذا اليم أن تمسك بالدفة تديرها حتى نصل لبر الفكرة التي يمكن أن تساهم في إثراء تجربة حمزة
صدقني رغم قسوة نقدك إلا أنني شخصياً سعيد به لأنه يحرك ركود التجربة الحمزاوية ويفتح بابها للنقاش بعد أن إستكانت وأصبحت موسمية أشبه بسيارة سباق توقفت عن السير في ساعة زروة إزدحام المرور
وسوف أساهم (لو أذنت لي) بدراسة سبق نشرها في هذا المنبر عن تجربة حمزة الغنائية

الاخ محمد - لك التحية

أنا بحب نوع النقد ده ، لكن ممكن تورينا الحتة الفرق فيها الاخ حمزة ؟ لانو أنا بعرف إنو حمزة حريص جدا فى تناول اشيائه


فلو تكرمت نزل لينا الحتة الفارقة عشان نشاركك ونقول رأينا

ولك كل الود

الأستاذ الجميل عاطف عبد الله

تحية تقدير واحترام شديد خالص...

Quote: صدقني رغم قسوة نقدك إلا أنني شخصياً سعيد به لأنه يحرك ركود التجربة الحمزاوية ويفتح بابها للنقاش بعد أن إستكانت وأصبحت موسمية أشبه بسيارة سباق توقفت عن السير في ساعة زروة إزدحام المرور وسوف أساهم (لو أذنت لي) بدراسة سبق نشرها في هذا المنبر عن تجربة حمزة الغنائية

وأنا سعيد جداً بوجودك هنا للمرة الثانية.. ومساهماتك ودراستك السابقة المنشورة مليون مراحب... والله إنت زول عسل بس..وشخصياً أفوضك تماماً لفتح بوست جديد معتمداً على مرئيات الدراسة السابقة وبالمرة يكون بعيد عن أي ترسبات قد تنجم عن هذا البوست الذي بين أيديكم..

لك كل الحب والتقدير..

سلامات يا محمود
برضو من غير زعل،
تجربة طويلة بذل فيها الأستاذ/ حمزة سليمان جهد سنوات يتم نقدها بهذه الطريقة المخلة بتناول كل التجربة من خلال سهرة لا معروف ظروفها ولا ظروف حمزة فيها.. خطأ كبير في حقك كرجل ليك باع في الموسيقى على ما يبدو من مداخلاتك، وفيها تعميم مخل لم ينصف الأعمال الكبيرة المعروفة التي قدمها حمزة سليمان وابدع فيها ايما إبداع أداءً صوتياً وتلحيناً.

كان في مليون طريقة أحسن من كده تكون مدخل لمناقشة تجربة حمزة سليمان تجعل النقاش أكثر ثراءً وأريحية من جانب العارفين بالموسيقى ومن جانب حمزة سليمان نفسه، بس بطريقتك دي البوست بقة شرك دخولو يتطلب الكثير من الحذر ...
التحية للفنان حمزة سليمان ولا أحتاج أن أقول هي ضريبة الإبداع يا صديقي.

كن بخير أنت ومن حولك
خالص تحياتي يا محمود

شكرا للأخ نادر فلقد كفاني عن بوست كنت قد شرعت في كتابته تحت

عنوان:

محمود مصطفى محمود.. أنا أشك في سلامة ذائقتك الفنية!!!!

يفرق يعني شنو؟

هذا كلام غير مسنود ولا حتى بالذائقة السليمة ناهيك عن العلم.

هاهي ليل الشجن مبذولة في اليوتيوب (لمن كان له قلب أو ألقى السمع وهو شهيد)

الأخ أبو مهيار..
لك التقدير الشديد...
كمان جابت ليها ذائقة حتة واحدة؟؟

Quote: محمود مصطفى محمود.. أنا أشك في سلامة ذائقتك الفنية!!!!

أبشرك يا شيخ أسامة... احتمال أنزل ليك في البوست بتاعك أغنية ليل الشجن بصوتي...

مش عشان ذائقة ولا حاجة... بس آشان تآمنوا وتقتنئوا زاتو...

يخليك لأولادك ويخليهم ليك...

التحية مجددا

الأخ نادر..
تحية واحتراماً..

Quote: كان في مليون طريقة أحسن من كده تكون مدخل لمناقشة تجربة حمزة سليمان تجعل النقاش أكثر ثراءً وأريحية من جانب العارفين

مع تقديرنا الشديد لك.. نود التأكيد من أن هذا البوست لم يقصد لا من قريب ولا من بعيد مناقشة تجربة الفنان حمزة سليمان..

كن بخير خالص..

شكرا لك مجددا

هاكم ليل الشجن
انا اصلو في البوست دا بقيت زي ست الشاي المغلوبة على امرها
يجوا يتونسوا بي شايا وفي النهاية
ما يحاسبوها بكلمة شكرا

ليل الشجن

الأخ الكريم الأمين عثمان صديق محمد
لك كل الود والتقدير والعرفان على ما قدمته هنا...

Quote: هاكم ليل الشجن انا اصلو في البوست دا بقيت زي ست الشاي المغلوبة على امرها يجوا يتونسوا بي شايا وفي النهاية ما يحاسبوها بكلمة شكرا

وقبل ليل الشجن ..جئتنا ..براجع لبيوت تفتح لي ادق أو ما ادق...
لله درك أيها الأمين القوي الفنان..فقد أثريت هذا البوست أيما إثراء..
حرام عليك ياخ...
ست شاي شنو؟؟
إنت ضابح لينا عديل.. ونرجو أن لا ينقص ثناؤنا عليك من أجرك شيئاً...

لك الشكر والعتبى حتى ترضى..

تحياتي مجدداً..

Abomihyar
كيف حالك
في الوقت الانا رفعت الفيديو يبدو انك كنت بتعمل في نفس الشي
وبالتاكيد انت ما لاحظت لي مداخلتي
لاحظ الفرق بين المداخلتين دقيقتين بس



دحين يا اخوي يا تشيل يوتيوبك
يا انا اشيل كبباي شجني

بعدين اخونا محمود من البداية قال بدون زعل
يعني حمزة ما فروض يتضايق من مجرد رأي
و هو المستفيد سلبا ام ايجابا
وكلنا بنحب حمزة

وفي الختام اهدية واهديكم شهادة استاذة

شهادة د0 انس العاقب في اداء حمزة سليمان

لكم التحية والتقدير والاحترام جميعا

العزيز حمزة سليمان...
أما وقد جاءنا منك الورد والزهر... فإليك منا الندى وعاطر الود والترحاب..


إيه رأيك يا حمزة في كليمات أخوك ديل؟؟ دحين ما ببقن غنيوة حليوة كدي؟؟

خلي الحروف تتنفسك..
خلي الخطاوي تروح تجيك
مشتاقة ليك
تحسب رمال السكة
لمتين توصلك...
وتشوف مراتع الروعة فيك
يا دهشتك...
لما الدموع تخذل رموش العين
تسيل في حضرتك
يا فرحتي من دهشتك..

وأتذكرك..
في صدفة أجمل من ميعاد..
في لقيا لا ليل لا نهار..
كنتي الزمن..
تاهت فصول الإنتظار..
ونسى الزمن دقات عقارب سكته..
ما بين شروقك والنهار..
يحسدنا في اللقيا النسيم..
ساعة يلامس خصلتك..
ويعلن رحيل الأمنيات..
وأتذكرك..
نديانة بيك الأمسيات
طربانة بيك الأغنيات
يا كل ممكن ومستحيل..
يا لمحة من لون الأصيل..
خلي الحروف تتنفسك

===
والله تكون كرامة من كرامات المنبر إنه بوست زي دا يتقلب تعاون فني...

لك التقدير الشديد يا حمزة...

ياجماعه توضيح
المشكله الواحد يفرق مره ولايكون فارق طبيعي
والفرقه المره واحده هل هي مشكله
اذا كانت لعوامل الطبيعه
تعلق المشانق
وهل يجب علي الفنان ان يتقبل النقد حين يخطي ويتناقش
ان يلتزم الصمت ام هنالك وسائل اخري
هل كبار الفنانين يعانون نفس الاشكال ولااحد يتعرض لهم
خوفا من مراكزهم الحساسه ام علي التاريخ
هل يجب علي خريجي المعهد العالي للموسيقي فقط ان يحسو تلك الهنات ام هي متاحه للعامه
كيف ولماذا تحدث هذه الاشياء وكيف تعالج

افيدونا يااهل العلم

الأخ / محمود ريحان (شريكي في الاسم)..
تحياتنا ونشكر وجودك هنا ونعتذر عن التأخير وكدا...

قلت:

Quote: ياجماعه توضيح المشكله الواحد يفرق مره ولايكون فارق طبيعي والفرقه المره واحده هل هي مشكله اذا كانت لعوامل الطبيعه تعلق المشانق وهل يجب علي الفنان ان يتقبل النقد حين يخطي ويتناقش ان يلتزم الصمت ام هنالك وسائل اخري هل كبار الفنانين يعانون نفس الاشكال ولااحد يتعرض لهم خوفا من مراكزهم الحساسه ام علي التاريخ هل يجب علي خريجي المعهد العالي للموسيقي فقط ان يحسو تلك الهنات ام هي متاحه للعامه كيف ولماذا تحدث هذه الاشياء وكيف تعالج افيدونا يااهل العلم

أفيدوه بالله ياااااااااااا (أهل العلم)...

أخوي محمود

كتر خيرك على النفس البارد

الطريقة الإنتقدت بيها الفنان حمزة سليمان

فيها إنتقاص من قدراته ولم تقم دليلا على ما قلت.

وأنا شخصيا لا أقبل الطلم والإنتقاص من جهد أي مبدع

ناهيك أن يكون هذا المبدع فنانا مجيدا مثل حمزة سليمان.

تحياتي لك أخي محمود وأشكرك على دعواتك لي وأرجو

الله أن يرزقك مثلهاوأحسن منها.

وياخي بالله سمعنا صوتك فإني أزعم أنني ممن يقدرون الفن الجميل.

وهاك يالنسمة دي عشان تآمن إنت ذاتك وترفع يدك عن الفنان المبدع

حمزة سليمان .. كما أهديها لكل زوار خيطك هذا خصوصا المنكرين.

خلي الحروف تتنفسك..
خلي الخطاوي تروح تجيك
مشتاقة ليك
تحسب رمال السكة
لمتين توصلك...
وتشوف مراتع الروعة فيك
يا دهشتك...
لما الدموع تخذل رموش العين
تسيل في حضرتك
يا فرحتي من دهشتك..

وأتذكرك..
في صدفة أجمل من ميعاد..
في لقيا لا ليل لا نهار..
كنتي الزمن..
تاهت فصول الإنتظار..
ونسى الزمن دقات عقارب سكته..
ما بين شروقك والنهار..
يحسدنا في اللقيا النسيم..
ساعة يلامس خصلتك..
ويعلن رحيل الأمنيات..
وأتذكرك..
نديانة بيك الأمسيات
طربانة بيك الأغنيات
يا كل ممكن ومستحيل..
يا لمحة من لون الأصيل..
خلي الحروف تتنفسك




الاخ محممود
تحياتى
قصيدتك حقيقى رائعه جدا واحساسة عالى
ويمكن تتلحن
واقول ليك قصيدتك حقيقى ما فارقة

وكان البال خلي ومرتاح شايف الآهه ما قدري

فووووووووووووووووووووووووووووووووق لمزيد من المتعة

في إنتظارك ياشيخ محمود

لقد شوقتنا لسماع صوتك ولكنك أطلت الغيبة.

أرجو أن يكون الداعي خير.

مع أطيب أمنياتي.

الأخ محمود
لك التحية

أسمح لي بهذه المداخلة وأرجو أن تضعها فى خانة عدم الزعل..

تقول مداخلتك بأنك ذو معرفة بعلم الموسيقي.. أرجو أن تعرفنا بمقدار حصيلتك من هذه المعرفة حتي يتسني لنا تقييم تقييمك لصوت وأداء حمزه سليمان!!

أما إذا كنت ذواق للفن وقست هذا التقييم علي ذوقك العام فهذا سيذهب بتقييمك الي مساحات ليست مأطره بأطر تحكمها وغير مؤسسة القواعد..

فالموسيقي علم له قواعده وأسسه وحمزه سليمان دارس لتلك القواعد والأسس والتي تتحكم فى كيفية أدائه للنوتات الموسيقية بحذاقة العارف المتمكن..

الصوت آله موسيقة أوتارها الحبال الصوتية . تتأثر كما بقية الآلات بالطقس والجو المحيط بها .. حمزه سليمان مقيم خارج السودان منذ أكثر من عشره سنوات تأقلمت حباله الصوتية علي درجات حرارة معينة طيلة هذه السنوات فعندما يحضر للسودان فقط لكي يسجل لأي محطة فضائية فتأكد بأن منذ لحظة خروجه من باب الطائرة تتأثر حباله الصوتية من أول نسمة هواء تدخل عبر حلقه .. كما أن هناك كم من التأثيرات الإنفعالية التي تصاحب التسجيل تؤثر بشكل عام فى الصوت.

أنا لم أستمع إلا للنماذج التي وردت فى هذا البوست وتابعت اداء حمزة .. كان متفوقا علي نفسه فى أغنية ليل الشجن .. أما البيت الكبير وهي أغنية ذات طابع مختلف عن ما عهدته الأذن السودانية فى شكل التأليف الموسيقي اللحني، فتتابع الأداء دون لزمات موسيقية ((تعريف)اللزمات الموسيقية تعطي المغني راحة يأخذ فيها نفس ويجدد فيها نشاط فكرته للإبتكار وتنويع الأداء ) ولكن!! حمزه لأنه مهموم بالتجديد والتطور والتمرد علي كل ماهو مألوف أتي بهذا اللحن متتابع الأداء وهذا يحتاج الي مقدره فائقة فى التركيز والتحكم فى النفس وإخراجه حتي يكمل المغني النوتات المتصلة ..

ليس معني هذا بأن حمزه سليمان لم يؤدي بشكل جيد أو كانت هناك بعض النوتات غير مكتملة الذبذبات الصوتية بل حمزة كان كما أشاد به أستاذنا أنس العاقب .. كان حمزة مكتمل الحضور بهي الصوت ناضج وجميل الأداء كعهدنا به ..

ليتك أخ محمود تحدثت عن تكنيك أداء حمزه سليمان .. لكان المجال قد إتسع للحديث العلمي والنظري فى ميزات أداء حمزة سليمان .. طبعا لم ولن أتحدث عن المتفق عليه وهو تأليف حمزه سليمان المتفوق فيه علي نفسه وهو تخصصه الذى تخرج به من معهد الموسيقي والمسرح بتفوق، وموهبته الفائقة فى هذا المجال .. والروح التي منحتها ألحانه لمجموعة عقد الجلاد والكم الكبير حبيس مكتبة حمزة الموسيقية لأنه أتي لهذه الدنيا قبل زمانه بكثير..

أخ محمود ليتك حدثتنا عن كبار المغنيين الذين يغيرون فتحت حنجرتهم فى الكلمة الواحدة بعدد حروفهافى الأغنية..وعن هؤلائك اللذين يفلعوننا من داخل الأجهزة الإعلامية بدراب نشازهم وهم يتصورون بأنهم يهرمنون الغناء..

مودتي كاملة
عبدالعزيز خطاب

عزيزنا أبو مهيار..
إن شاء الله تكونوا مبسوطين غادي..

Quote: في إنتظارك ياشيخ محمود لقد شوقتنا لسماع صوتك ولكنك أطلت الغيبة. أرجو أن يكون الداعي خير.

عليك الله أصبر علينا شوية وحياة مهيار...
الدنيا هنا عندنا حج والقصة عايزة ليها جكة وفنيات عشان يا نرفع حاجة تستاهل التاريخ أو ما نرفع بالمرة.. ولا شنو؟؟

شاكر اهتمامك ويبقى الوعد باللفاء...

مودتي مجددا والله

العزيز عزيز خطاب

ياخي لك التحية والشكر على الحضور ..
حضورك الكثيف لم يضف جديداً بكل أسف على هذا البوست...

وحيث أنني أزعم مجرد زعم بأنني من العارفين بإبداعات حمزة سليمان.. لذا جاء هذا البوست الذي أسيء فهمه من العديد من الناس...
وحيث أنني أرجعت السبب في (فرق) صوت حمزة للثقة الزائدة في الأداء..فإنني لا أجد في نفسي حرجاً من أن أعلن على الملأ هنا وفي أي مكان أن ذات الثقة هي التي دفعتك للإدعاء هنا بأنك (سيد العارفين) في مجال الموسيقى..

طلبت وضع مداخلتك في خانة من غير زعل وقلت:

Quote: تقول مداخلتك بأنك ذو معرفة بعلم الموسيقي.. أرجو أن تعرفنا بمقدار حصيلتك من هذه المعرفة حتي يتسني لنا تقييم تقييمك لصوت وأداء حمزه سليمان!! أما إذا كنت ذواق للفن وقست هذا التقييم علي ذوقك العام فهذا سيذهب بتقييمك الي مساحات ليست مأطره بأطر تحكمها وغير مؤسسة القواعد..

ونقول بدون زعل:
إذا كان مجرد الدراسة والتخرج من المعهد العالي للموسيقى والمسرح هو مقدار (الحصيلة) الذي تسأل عنه ، فأنا لم أدرس بالمعهد العالي للموسيقى والمسرح... ولست من الخريجين... ولكنني دارس للموسيقى بالحد الذي يجعلني معتداً بـ(حصيلتي) أكثر من (بعض) الخريجين بدون تسمية...ولا فخر والحمد لله..

بالمناسبة أنا شخصياً استمعت لبعض أعمال عزيز خطاب عبر الإنترنت...وكنت سامع عن عزيز خطاب كتير قبل أن أسمع نماذج لأعماله...وبصراحة وبدون زعل ياشيخ عبد العزيز... أنا مندهش ليوم الليلة ...خاصة أغنية الكابلي... عليك الله ما بتقدر تنزلها لينا هنا بصوتك قبل الأرشفة يوم 21/12/2007؟؟ وأنا أقبل التحدي بأن أقوم بإنزال نفس الأغنية بصوتي ..


ضفاري في التمانيات:
في تقديري الشخصي جداً..معهد الموسيقى والمسرح على امتداد تاريخه قاعد يخرج ناس على مستوى عالي جداً من المهنية والمعرفة وصقل المواهب... ولكن بصراحة شديدة .. لا أرى أن لدى (بعض) الخريجين مجرد الموهبة التي تستحق الصقل والدراسة عشان تجيب ليها أستاذية وحصيلة وبطيخ... عجبي..

الاخ/ محمود
ســــلامات
النقد ما عندك..

Quote: أستاذية وحصيلة وبطيخ... عجبي..

احمــد خضــر

يا شيخ أحمد خضر...
كيف حالك أخوي؟؟

Quote: النقد ما عندك..

القال ليك منو إنه دا نقد أساساً؟؟؟ أصلاً هل من الممكن يكون في نقد (ضفاري في التمانيات)؟؟؟
ياخوي عليك الله ركز معانا شوية...

تحياتي وشكري على الحضور مجدداً..

ننتظر عودة العزيز عزيز خطاب

الحتة كانت عبارة عن تأتأة أو تمتمة بتاعة كونيكشن ساكت... قال (قبل ال%)..بلاي على قول تمبس الجميل..

المهم كلو خير... بس كيف يجي عزيزنا عزيز؟

قبل الطوفان

إن شاء الله بعد العيد السعيد ستكون لنا عودة طبعا بموضوع جديد حيث أن هذا البوست سيلحق أمات طه مع الأرشفة...

تحياتي وكل عام والجميع بخير...

آخر فرصة..آخر رفعة..آخر تكة..

كل عام والجميع بخير...