أنا محبط إحباط شديد من أمريكا .. بعد دا إلأ الواحد يهاجر للقمر عدييل!

أمريكا بدل تزيدنى لحستنى خلتنى فى السهلة .. هل تصدقوا إننى كنت فى أروبا وطالب ودخلى لا يعادل 1 من عشرة من دخلى فى أمريكا .. وكنت أملك دخل فى حساب توفير لم أستطع أن أعمله الأ فى السنة الأولى فى أمريكا .. وبعد داك قبلت على (أرميكا) لحستنى حتى مرحلة الأفلاس ..

يا أخوانا وأخواتنا ما تنغشوا ساكت .. أصبروا إينما كنتم يأتيكم الفرج بإذن الله.

تجربة جد طعمها كالعلقم .. علما إننى تركت دكتوراه مكتملة ومصححه من قبل اللجنة المشرفه وقلت ليهم الله معاكم ربنا فتحها بأمريكا

خشمى ملح ملح ..

بريمة

علما أن دخلى يزداد كل عام .. ولكن تزداد المصائب التى تأكل تلك الزيادة باضعاف مقدار الزيادة.

وفى النهاية أصبحت ذى الجماعة .. نشيل طاقة مشكلة نلبسها لمشكلة أخرى.

فى بعض الأحيان يضحك الأنسان من بليته وشر البلية ما يضحك !

بريمة

بريمـة
ربنا يرد غربتك للوطن قرييييب .!!

ولا أدرى هل التجربة خاصة بى أم كل ناس أمريكا يحسون نفس المشكلة ... قروش كأنها قروش حرام تخرج من حيث أتت .. فواتير تلخم الراس .. من كل صوب ..

أكثر ما يزعجنى فواتير التأمين .. تأمين علاج .. وتأمين عربة .. وتأمين حساب .. وتأمين على التأمين .. تصدقوا .. تأمين التأمين!

نواصل ..

بريمة

خيرى

Quote: بريمـة ربنا يرد غربتك للوطن قرييييب .!!

أمين يا رب .. يا أخى أما حكاية .. !!

بريمة

و

اصبر شوية يا بريمة

عبدالمجيد

Quote: اصبر شوية يا بريمة

دى ما ينفع معها أى صبر .. المسألة شرك أم جيجى .. كلما حاولت تتوحط تغرق بالزيادة ..

بالجد أناأتحدث بصدق وأنا أخذ مرتب زول مهندس بروفشنال .. يعنى أى زول ما برفشنال يكون داقى الدلجة بغادى لى.

بريمة

بريمة
سلامات

فى ارميكا ليك اجر المناوله
تستلم بى يد وتسلمه بى يد

صدقت يا أحمد

Quote: بريمة سلامات فى ارميكا ليك اجر المناوله تستلم بى يد وتسلمه بى يد

واحد حبشى تربى فى السودان .. قال لى يا بريمة من جيت البلد دى جيبى ذى المقدود .. حاجة تثبت مافى!

بريمة

Quote: علما أن دخلى يزداد كل عام .. ولكن تزداد المصائب التى تأكل تلك الزيادة باضعاف مقدار الزيادة.

ماننكر ان المال عصب الحياة .. بس المال وصخ الدنيا ..
اهم شي الصحة والعافية والانسان يكون مستور .. وهل ممكن تشترى الصحه والعافيه يابريمه ...

يا بريمة احبطه كمية من الشباب البيفكرو يسافرو ل امريكا

اصبر شوية كان الازمة المالية دي شوية تنزاح والبلد امريكا ترجع زي ما كانت اول

عبدالمجيد

Quote: بريمة محمد

يا زول انت ياكا ظااتك بريمة محمد آدم؟؟
اسمك ده كشّ كدي مالو؟؟
اتأثر بالازمة المالية العالمية دي و للا شنو؟

أخونا بريمة
السلام عليكم ورحمة الله وبركاته
الأزمة أثرت على كل أنحاء العالم .....
بس ماتنخدع برضو فى السودان ..... ماتشوف الكذب فى التلفزيون السودانى .... كتار منا مشوا السودان وسمعنا العجب ..... البترول أستأثرت به قلة من البشر والباقى فى الحافة ......
أمريكا بتتعدل .... البعدل السودان شنو ......
بلدآ لافيها موية وشاقيها أعظم نهر وكهرباء معدومة ..... وتموت فطيس

تحياتى

واحد محبط من السودان

الاخ بريمة ما ممكن تصدر حكم بعدم الهجرة الى امريكا بسبب فشل تجربتك الشخصية ملايين البشر و من مختلف الاجناس تحققت امالهم و طموحاتهم في امريكا من تعليم و مال و كذلك هناك من فشل
يعني المشكلة ما امريكا

سلام بريمة

نفس الشعور هنا في NJ الدخل = المنصرف تماما

كثيرين من أصدقائي يعتريهم نفس السؤال

هل بحضورنا هنا كسبنا أم خسرنا علما بان الاعلام السوداني مخادع
كما قال الأخ يسري

بعدين اليوم كلو شغل وعلى ما تصل البيت الساعة بتكون 7-8 وبعديها بي ساعة
المحلات كلها قفلت ....نومة ....ونستعد ليوم جديد من الشغل

غايتو لو صبرنا بحالتنا دي بنخش الجنة لأنو مافي وقت للمعاصي والنميمة والقيل والقال

يا سلام يا شباب والله كده أنزلتوا مننا أطنان من الهموم ..

سوف نأتى ..

بريمة

ناجى
سلامات

Quote: الاخ بريمة ما ممكن تصدر حكم بعدم الهجرة الى امريكا بسبب فشل تجربتك الشخصية ملايين البشر و من مختلف الاجناس تحققت امالهم و طموحاتهم في امريكا من تعليم و مال و كذلك هناك من فشل يعني المشكلة ما امريكا

أولاً يا ناجى أنا ليس فاشل .. والله هذه حقيقة .. شخصى قاربت أن أحقق الحلم الأمريكى بمواصفات الأمريكان .. يعنى أنا جئت هذه البلاد ومع علمى المسبق أن الأنسان لابد أن يعيد الكرة من الصفر .. غيرت مجالى إلى مجال يلائم مطالب الوظائف الأمريكية .. والحمدالله الأمر ضبط كما خططت له .. فى زمن وجيز .. مقارنة بالأخرين قياسى ..
لكن لازم يعرف أى إنسان أن الأمريكى إنسان مفلس بطبيعة الحال .. حيما حضرت كنت أقرأ عن متوسط إدخار الأمريكى .. متوسط الأدخار ألفين وخمسمائة دولار .. ألفين !! مش مهزلة .. يعنى القروش الجيت شايلها فى جيبى أكثر من ذلك .. 7 من كل عشرة أمريكى مدان أكثر من 10 ألف دولار لشركات كروت التأمين ..
وأن الحلم الأمريكى هو أن تكن لك وظيفة وزوجه وأطفال وعربة ومنزل بغض النظر عن كمية الديون التى يردمها نظام الأستدانه على ظهرك المنحد .. والحمدالله متزوج ورزقت ولدى وظيفة وعربية والبيت بطريقتهم بتاعت "الكرديدات" لو عايز أعمله اليوم بعمله ..

لكن هل هى كل القصة كما شارف أن يقولها صديقى عبدالمحسن .. !! هذا هو السؤال وهذا هو الخداع الذى أحبطنى.

بريمة

عبدالمجيد
سلامات ..

Quote: يا بريمة احبطه كمية من الشباب البيفكرو يسافرو ل امريكا اصبر شوية كان الازمة المالية دي شوية تنزاح والبلد امريكا ترجع زي ما كانت اول عبدالمجيد

عبدالمجيد أنا واحد من الناس لم يتأثر كثيراً بما يجرى من أزمة مالية .. والسبب إننى فى داخل التخصص بتاعى بحاول أحفر فى حتات تعتبر "بيت كلاوى" .. ومعرفة "بيت الكلاوى" دى مهمة جداً فى أمريكا تحصنك بصورة ما عادية من الزعزعة الحاصلة ..

لكن يا عبدالمجيد أن الحلم الأمريكى ليس هو الحلم السودانى .. نحن نحلم بشيئ أشبه بالخم ب "الكوريك" .. تجئ تحوشها بسرعة وترجع أهلك قبل أن يمس السوء شعرة من جلدك .. لكن وين يا صحبى .. صدقونى هذا الحلم يجب أن يضعه أى إنسان تحت حذاءه .. وصية أخو ولله.

بريمة

أهه يا حاتم

Quote: سلام بريمة نفس الشعور هنا في NJ الدخل = المنصرف تماما كثيرين من أصدقائي يعتريهم نفس السؤال هل بحضورنا هنا كسبنا أم خسرنا علما بان الاعلام السوداني مخادع كما قال الأخ يسري بعدين اليوم كلو شغل وعلى ما تصل البيت الساعة بتكون 7-8 وبعديها بي ساعة المحلات كلها قفلت ....نومة ....ونستعد ليوم جديد من الشغل غايتو لو صبرنا بحالتنا دي بنخش الجنة لأنو مافي وقت للمعاصي والنميمة والقيل والقال

دا ما المجنن بوبى ذاتو .. يا أخى أنا لا أعرف أى فواتير ولا أعرف كيف تأتى لقمة العيش ذاتها فى السودان .. من الجامعة وللبادية .. أحمل عصى غليظة وأتوشح كلاش وتجدنى حايم ما بين الأبيض شمالاً وبحر أبيض جنوباً.. أكل لحم طرى من دجاج برى وغزال وأرنب وغيرها ..

وأخيراً الأحباط .. أمريكا تدخلك فى جهر ضب خرب .. ولا تستطيع أن تخرج منه .. هناك من يموتون حتى يتعفون فى شققهم .. مافى زول جايب ليهم خبر .. صلواتنا فى تلتله .. أولادك تشوفوهم إلا بالليل .. وأنت تصحى من طيور الليل كطائر السقد وتدخل منزلك باليل ..

دا شنو دا .. النظام الرسمالى أستعباد للبشر لا يدانية أى نظام أستعبادى فى الأرض.

بريمة

يسرى
سلامات

Quote: أخونا بريمة السلام عليكم ورحمة الله وبركاته الأزمة أثرت على كل أنحاء العالم ..... بس ماتنخدع برضو فى السودان ..... ماتشوف الكذب فى التلفزيون السودانى .... كتار منا مشوا السودان وسمعنا العجب ..... البترول أستأثرت به قلة من البشر والباقى فى الحافة ...... أمريكا بتتعدل .... البعدل السودان شنو ...... بلدآ لافيها موية وشاقيها أعظم نهر وكهرباء معدومة ..... وتموت فطيس تحياتى واحد محبط من السودان

أصبر فى سودانك .. أفضل يا يسرى .. على الأقل رؤية الوالدين والأصدقاء ..
جدى كان حكيم زمانه يقل لى .. لا تفكر فى لقمت عيشك فقد أعدها خالقك منذ أن خلقك وأنت أربعين يوماً ولم تخرج للحياة بعد .. فإن ما كتبه الله لا يمحاه الدهر .. إيمان فطرى صادق .. وحمد وقناعة لا تدانيها قناعة ..

نحن جيل جشع .. وأظن هذا ما قادنا لكل هذه المآسى.

بريمة

Quote: نحن جيل جشع .. وأظن هذا ما قادنا لكل هذه المآسى.

هذااصدق كلام يا بريمة تحياتي



خالد العطا ــ مكة المكرمة

الاخ بريمة
صباحات الدوام
نحن مثلك تماما فى الخليج ,,بنصحى مع صلاة الفجر وبنرجع صلاة المغرب
المساجد راقدة,,والامن مستتب ومستمتعين فى القنوات دورى سعودى,,اسبانى وابطال

لكن الراتب بكمل يوم خمسةفى الشهر ,,,واحد اخونا بقول لقروش المملكة ,,مال الملك والما بتملك

انتو قروشكم قروش اوباما تقعد ليوم القيامة,,يعنى اسى لو واحد راتبو الفين دولار
بياكل الف وبوفر الف,,وصلاتو كاملة المساجد,,,لو حصل لوترى مايجيكم ولا كيف,,

بعدين انت يابريمة شغلنا البنسويه فى الغربة دا,,,لو اشتغلنا ربعو فى السودان
لتطورنا,,,لكن نحن شعب كسالى نعتمد على رب الاسرة فقط,,,

عموما ربنا يحل كربتكم,,,,لكن السودان حار وطبعو حار, ما بتقدرو عليه

سمعت اخر خبر... قالو رجعو الضرائب تانى والتحويل الالزامى,,والاعلان عن العملة
داخل خارج
تحياتى

الأخ abuguta
سلامات ..

Quote: يعنى اسى لو واحد راتبو الفين دولار بياكل الف وبوفر الف,,وصلاتو كاملة المساجد,,,لو حصل لوترى مايجيكم ولا كيف,,

قسما يكون غلطان لو جاء ..

واحد صديق لى .. وجاء قريبه من أبوظبى وكان يخدم فى الجيش .. ومهمته أن ينفخ صفارة البروجى .. تروت تروت .. كل صباح وأنتهى دوامه .. ويتعاطى راتب قدره ألف وخمسمائة دولار ..

جانا فى أمريكا .. وترك أولاده هناك حتى تتصلح أحواله هنا .. قال له صديقى أرجع لأولادك .. وألزم وظفيتك .. هناك لديك سكن وعندك ميز وإيجار مدفوع وعلاج مجانى .. والحاجات دى هى مشكلتنا فى أمريكا .. حلف له صديقى قائلاً له: هنا مع ألتزاماتك الأسرية لو تصفر فوق وتحت ما تطلع ألف وخمسمائة.

رفض الرجل .. وجلس معنا فى الحلم الأمريكى .. بعد 5 سنوات الراجل غالبه يفرش شقه عشان يحضر أولاده .. يطفق يد بيد حسرة.

صدقنى .. تطلعات الناس بتختلف .. هناك من كان همه لقمة العيش وهناك همه غير كده ..

أفضل إنسان فى أمريكا إنسان إما يأتى بأموال جاهزة للأستثمار .. أو ليس لديه أى إرتباط أسرى .. والأخيرة صفة خاصة بالأحباش ..

بريمة

ومفارقة تانية محبطة هى أن مستوى الدخل لا فائده منه فى أمريكا ..

يعنى زول بأخذ 10 دولارات فى الساعة
وزول يأخذ 40 دولار فى الساعة

يكون بتاع ال 40 دولار فى الساعة، مديونيته .. ذى الأخر تماماً .. وكاره اليوم الذى جاء به إلى هنا ..

وهذه المفارقة قارنتها بين أصدقاء فى طرفى المعادلة وشخصى تدرج أيضاً من جرمندى إلى مهندس برمجة

ليس هناك أى تغيير بل يزداد الحال سوءاً ..
والسبب وسائل الأغراء تفوق التصور .. كلما أرتفع دخلك يأتونك بعربة مرسيدس أو ب أم دبليو .. من أحدث طراز .. وبأقساط شهرية معقولة ..

وتروح تاخ .. وغداً تلفزيون يملئ نصف الحائط .. أقساط شهرية مغرية .. وتروح تاخ

وغداً كمبيوترات ماكنتوش صيحة .. تاخ ..

وحتى الأن لم استطع تحديد سقف مالى مقنع بأن ييسر كل أمور الأمريكى .. لا يوجد سقف تتخطاه تشعر فيه بالراحة .. وهذا غير ما يوجد فى أوروبا أو بلدان العالم الأخرى ..

وكلما زاد دخل الفرد تزداد الضرائب .. حتى تبتلع 33% من دخل الفرد .. يعنى هناك زيادة ورايحة فى ستين داهية.

بريمة

Quote: : اصبر شوية يا بريمة

سيدنا أيوب مات من صعقة كهربة؟؟

بريمة إتخارج!!

Quote: أصبر فى سودانك .. أفضل يا يسرى .. على الأقل رؤية الوالدين والأصدقاء .. جدى كان حكيم زمانه يقل لى .. لا تفكر فى لقمت عيشك فقد أعدها خالقك منذ أن خلقك وأنت أربعين يوماً ولم تخرج للحياة بعد .. فإن ما كتبه الله لا يمحاه الدهر .. إيمان فطرى صادق .. وحمد وقناعة لا تدانيها قناعة .. نحن جيل جشع .. وأظن هذا ما قادنا لكل هذه المآسى. بريمة

ألأخ/بريمة السلام عليكم.....

يا أخى ربنا يبارك لك فيما عندك يارب..ويطرح عليك الصحة والبركة فيك وفى مالك ...

نسأل الله ان يفرج عليكم...

ما شاء الله كلامك ده واضح وصريح وجميل ومفيد لغيرك....وجدك حكيم................إسماعيل محمد احمد عباس....

بريمة محمد
ياخ السلام عليكم بالعربي
واهو الاسم الجديد عرفنا عليك زيادة

يا بريمة يا اخوي أنت قالو ليك امريكا دي دخلت حرب طويلة المدى مع الدب الروسي ده من فراغ ؟!
يازول صراع الانسانية ده صعب بالحيل واليقين في الانسان اصعب انواع الصراعات .
للضمان كده يا بريمة كلامك الكاتبو ده كان جاك ماركسي مكرب وموهط بيشطف ليك البوست بتاعك ده
وبيديك سيك في قبولك والدنيا ضو.
كلمتك اعمل حسابك ياخ .

بالمناسبة الدكتورة الخليته وراك كانت في شنو ؟
والهسي بتعمل فيها دى في شنو ؟

مع امنياتى لك بالتوفيق .

سفيان

بريمة
والله صدقت
أشك أحيانا إن البلد ى قروشها حرام
تجرى جرى الوحوش
وما فى أى حاجة ظاهرة
صديقى قبل فترة
إتخذ قرار شجاعا
وعاد إلى السودان
كان معى فى بالتمور
وتوجه فور عودته للسودان للعمل فى دارفور !
الآن إشترى عربة جياد ( ليس بالكردت بل كاش ) ومبسوط أكتر منى عشرة مرات
المشكلة هنا إنو الناس عارفين إنهم إتغشوا
بس غالبهم يعترفوا وخجلانين يرجعوا
تحياتى

يا بريمة سلامات
والله كعب العدم , وأحمد الله على ما انت فيه
الدنيا دى كلها مصائب وتذكر فى ناس ما لاقيه
ولا صفر فى المئة مما عندك .
والله زى ما قال ليك واحد من الاخوان فى الخليج
نفس الحالة , طول الوكت عمل فى عمل وفى النهاية
صفر اليدين وديون , على الاقل انت فى أمريكا لاقى من
يقدر مجهودك ويضعك فى مكانك الصحيح .
بس نقول شنو يا أخوى الصبر أحسن .

يا أخى مأملين على اللوترى مالك عايز نا نغير راينا.

مكاوى

Quote: سيدنا أيوب مات من صعقة كهربة؟؟ بريمة إتخارج!!

وهذه غير وارده فى الحالة الأمريكية .. ممكن فى أوروبا .. وشفنا الكثير هناك ..

المشكلة الأساسية هنا الوهم .. أنت ساكى حاجه يمكن تتناولها ..

قصة البقارة وصيد الفيل .. الفارس يجرى قدام الفيل بحصانه ويلجمه حتى يلامس خرطوم الفيل شعر ذيل حصانه ..

ويطمع الفيل .. ويطمع الفيل فى أصطياد الفريسة

ومن الخلف الفرسان يلحقوا الفيل ويوسعوه ليك طعن فى العصبة الشداده حتى يطرحوه أرضاً ..



أها لو عرفت نحن الفيل ذاتو .. والفارس قايد الفيل هو الحلم السودانى (ليس الأمريكى)
والفرسان الذين يطعنوا الفيل هى الرأسمالية .. أنت جارى جرى الوحوش وتكون الرأسمالية نحرتك ووزعت كرامتك.


------------------------------
قصة دواس الفيل لدى البقارة موثقة فى أحد بوستاتى السابقة
Re: البقــــــــــــــارة: الأثنوغرافى، الجيوغرافى والج...هور مصطلح دولة البقا

بريمة

الأخ الأستاذ إسماعيل
سلامات

Quote: ألأخ/بريمة السلام عليكم..... يا أخى ربنا يبارك لك فيما عندك يارب..ويطرح عليك الصحة والبركة فيك وفى مالك ... نسأل الله ان يفرج عليكم... ما شاء الله كلامك ده واضح وصريح وجميل ومفيد لغيرك....وجدك حكيم................إسماعيل محمد احمد عباس....

شكراً ياأخى على الدعوات الصالحات .. ونسأل الله أن يجعلها فى ميزان حسناتك .. ويبارك لك فى أهلك ومالك ويرد سالماً غانماً.

يا رب.

بريمة

الصبر واكثر من الاستغفار وشوف شغل اضافي
ربنا يكون في العون

بريمة

قول بسم الله.

وتوكل على الله.

والزارعها ربنا في الحجر بتقوم.

والشجرة الكبيرة ولا العرداية لسع موجودة والبهائم بقيلن في ظلها.

وقصة دواس الفيل ظريفة وحقيقية وتلخص لك حالة الدنيا فالناس فيها طالب و مطلوب.

وأبشر بالخير.......

لنا وطن بكل مشكلوا احسن وطن ... مليان خيرات بس عاوز البقتنع بيهو

وطن غالى رغم كل شئ ...

سياتى يوم يدخل فيهو هذا الكلام إلى قلوب الكثيرين من الداخل و ده ما بعيد قريب ....

العبوا غيره يا بريمة ويا ناس امريكا ..
عارف زمان قبل ما نجي السعودية كانوا الأخوان السبقونا شابكننا البلد دي إنتهت والحالة بقت صعبة وهلم جرا ..
جينا وجربنا وأهو الحال ماشي وشايلانا وشايلاهم ولسة الطوابير متواصلة على شباك السفارة ، إنتو شوفوا لينا
طريقة الجية هناك والباقي خلوهو علينا .. كل زول بصير على روحوا والله ما شق حنكاً ضيعوا والحشاش يملا شبكتو

lool@ Bakri Ismael
___
Braima, Stop complaining man, and remember people who cannot afford to have one meal a day..

الأخ الفاضل بريمة، كنت أتمنى لو أكملت - أو تكمل - الدكتوراه، مستهدفا مجال التدريس الجامعي، وتأتي بها إلى الخليج، عندها سيكون وضعك أفضل بكثير، سواء من حيث بيئة العمل أو التوفير أو الاستمتاع بالحياة. كل من التقيتهم ممن قدموا من الغرب عموما والولايات المتحدة خصوصا، عبروا عن ارتياحهم عن وضعهم المالي الجديد وإدارتهم لوقتهم من حيث العمل والترفيه.

رجع إسمك زي ما كان
Biraima M Adam

و أقرأ آية الكرسي 150 مرة
و بطل أكل الأنجيرة و شرب العبابير

تتفتح عليك زهور و ورود

الاخ \ بريمة ,,,, تحياتي

تجربتي الخاصة,,,,

عملت بالخليج 21 عاما في وظيفة محترمة,, وايضا زوجتي

حصلت علي الاقامة الدائمة عام 1999وكنت اذهب سنويا لامريكا

في الاجازة,, الاولاد كبروا ,دخل ابني الاكبر الجامعة 2006ثم

تبعته اخته 2007 وبالتالي استقلنا انا وامها وذهبنا لامريكا

دخلت امريكا بمبلغ محترم .اجرت وفرشت البيت من افضل ما يكون

دخلت كورس HAA,,وبعد شهر تقريبا استلمت وظيفتي, بعد الضرايب

شيكي الاسبوعي 650$ , و لدي شغلة اضافية 400$ في الاسبوع

يعني الدخل الصافي اكثر من 4000$ ايجار وفواتير في حدود

2100 والمعيشة مهما كلفت لاتتعدي 900$,,سايق عربية والله

عايش في رفاهية,,وما كملت سنتين لسه, استلمت من شهرين

راجع الضرايب اكثر من 6000$, الحمد لله كثيرا,

العاوز يشتغل ويجتهد في امريكا بيعيش , لكن في ناس

ليهم اكثر من 20 سنة ولسه زي ماهم يا بريمة اتعب

بتجني ثمار تعبك. انا عندي 4 اطفال 2 في الجامعة

1 في الثانوي والاخير في الصف السابع مسسسسسسسستورة

والشغل موجود والعاوز يشتغل مرحب بيه, وحاتك بدات

احضر كمان... التعب حاصل لكن في فايدة,,, ربنا يديم

علينا نعمه ظاهرة وباطنة ,,لك الحمد يا ارحم الراحمين

معزتي

يا بريمة انت ما سمعت المصري قال شنو؟؟

يا عمي أمريكا ايه؟؟

دي كلها بلات(bills) ده حتى رئيسهم

اسمه بل كلينتون.

الجماعة عرفوها من زمن كلنتون لمن كانت

فيها رقشة.. انت متأخر يا صاحبي.

الاخ بريمة ..
المثل البيقول "القناعة كنز لا يفني" يا دوب و قع لي مما جيت امريكا .. و زي ما بقولوا اهلنا ..البني آدم ما بيملي عينه غير التراب .. وهكذا نحن جميعا .. امريكا او السودا ن لا يهم
اعتقد ان مشكلتنا هنا بالتحديد هي بعد المسافة بيننا و بين اهلنا فى الوطن ,, وكذلك التعود على الحياة المادية بيجعل والانسان منا لديه احساس بفراغ نفسي ..
---------و احساس دائم بعدم الامان
الاخ سيف الدولة كامل :

Quote: يعني الدخل الصافي اكثر من 4000$ ايجار وفواتير في حدود 2100 والمعيشة مهما كلفت لاتتعدي 900$,,

وين دة فى امريكا ؟؟ عليك الله ورينا الولاية عشان نجي بهناك..
دخلنا الاسري يتعدى ذلك بكثير .. لكن برضو حالنا زي حال بريمة .. كلها رايحة فواتير

سيف
سلامات .. يا حبوب ..

Quote: الاخ \ بريمة ,,,, تحياتي تجربتي الخاصة,,,, عملت بالخليج 21 عاما في وظيفة محترمة,, وايضا زوجتي حصلت علي الاقامة الدائمة عام 1999وكنت اذهب سنويا لامريكا في الاجازة,, الاولاد كبروا ,دخل ابني الاكبر الجامعة 2006ثم تبعته اخته 2007 وبالتالي استقلنا انا وامها وذهبنا لامريكا دخلت امريكا بمبلغ محترم .اجرت وفرشت البيت من افضل ما يكون دخلت كورس HAA,,وبعد شهر تقريبا استلمت وظيفتي, بعد الضرايب شيكي الاسبوعي 650$ , و لدي شغلة اضافية 400$ في الاسبوع يعني الدخل الصافي اكثر من 4000$ ايجار وفواتير في حدود 2100 والمعيشة مهما كلفت لاتتعدي 900$,,سايق عربية والله عايش في رفاهية,,وما كملت سنتين لسه, استلمت من شهرين راجع الضرايب اكثر من 6000$, الحمد لله كثيرا, العاوز يشتغل ويجتهد في امريكا بيعيش , لكن في ناس ليهم اكثر من 20 سنة ولسه زي ماهم يا بريمة اتعب بتجني ثمار تعبك. انا عندي 4 اطفال 2 في الجامعة 1 في الثانوي والاخير في الصف السابع مسسسسسسسستورة والشغل موجود والعاوز يشتغل مرحب بيه, وحاتك بدات احضر كمان... التعب حاصل لكن في فايدة,,, ربنا يديم علينا نعمه ظاهرة وباطنة ,,لك الحمد يا ارحم الراحمين معزتي

ركزوا معاى فى كلام الأخ سيف .. الراجل عنده سنتين فقط فى أمريكا ..!!!!!

وأنا ببكى على شنو يا سيف .. ما قلت ليك أمريكا لحستنى ..

فى السنة الأولى جمعت مبلغ لم أجمعه حتى اليوم .. وأخوك صدق وأمن .. وتعال شوف الحصل!!
أمريكا لحستنى لما بركتنى فى الواطا ..


أنتظر تشوف أمريكا لو ما لحستك .. أكون أنا ما ود راجل.

أحد الأصدقاء حضر ومعه 80 ألف دولار .. أتلحس ورب الكعبة.

بريمة

سلامات....
بريمه عاوز يقول ليكم انه مهما الدخل زاد فى امريكا....بتزيد المنصرفات....الليله زادو ليك الماهيه 5000 دولار فى السنه...بكره مشيت عملت دش عربى و جناينى للحديقه...و اشتريت عربيه جديده...يجى نهايه الشهر تلقى تلقى ال5000 دولار بعد الضرائب و التامين بقت 200 دولار بس زياده فى الشيك . وتلاقى روحك دخلت فى اللتزامات ب 500 دولار زياده فى الشهر.
____________________________________________________________________
{والمعيشة مهما كلفت لاتتعدي 900$$}
كيف الكلام ده????انا عندى بند وووواحد فى ميزانتى الشهريه ب 1200 $ .....ده حضانه طفلى اللى ما دخل المدرسه....بيمشى يلعب بس.*
ايجار اقل شقه باكتر من 900 $.....تامين العربات بحوالى 150 $.
_________________________________________
* طب مامون حميده السنة فيه ب 6000$ ...طفلى بيمشى الحضانه ب 12000$ فى السنه....البلد دى فلمها هندى

Outcast
سلامات ..

Quote: دخلنا الاسري يتعدى ذلك بكثير .. لكن برضو حالنا زي حال بريمة .. كلها رايحة فواتير

شايف يا أوتكاست .. دى بلد أهلها مفلسين .. كيف الأمريكان مفلسين إذا أى زول يجئ ويغنى بين ليلة وضحاها ..

معروف أن 5% فقط من رأسمالييى أمريكا يمتلكون أكثر من 95% من أجمالى ثروة أمريكا ..

والباقى 95% من الشعب الأمريكى .. مدان لشركات كروت الضمان المالى ..

بريمة

أسمارت أنا

سلامات ..

Quote: {والمعيشة مهما كلفت لاتتعدي 900$$} كيف الكلام ده????انا عندى بند وووواحد فى ميزانتى الشهريه ب 1200 $ .....ده حضانه طفلى اللى ما دخل المدرسه....بيمشى يلعب بس.* ايجار اقل شقه باكتر من 900 $.....تامين العربات بحوالى 150 $. _________________________________________ * طب مامون حميده السنة فيه ب 6000$ ...طفلى بيمشى الحضانه ب 12000$ فى السنه....البلد دى فلمها هندى

الحبوب سيف .. ما نبوظوا عليهو سعادته .. أنتى عارفه .. شهر عسل أمريكا "سووون ويل بى أوفر".


بالجد، لم أجد بلد فى حياتى مادى أكثر من أمريكا .. هواء الله ساكت لو قلت تتنفس وتملء رئتيك فى زول يجى يقول ليك أخذت أكثر من حقك
وتدفع قروش ..


بريمة

الاخوة \ المتداخلين


انا عايش في نيويورك وساكن في افضل احياء بروكلين


بدفع ايجار 1500$ كهرباء وغاز 150,, 3 موبايل 140

نت كيبل و تلفزيون و تلفون ثابت 140, تامين سيارة 130

افتكر ده حساب واضح,, ويا بريمة لم اصرف من مدخراتي بعد


ما اشتغلت,,, بل وفرت اكثر من 10000$ ورونا ولاية اغلي من


نيويورك؟


قد اختلف فقط في بند الاطفال,,,,,

وبعدين معانا ناس دخلها 2000$ عايشة كويس جدا,,

ما تكبروا الموضوع وعملوا هيلمانة يا اخوانا,,, اذا

عندكم منصرفات تانية معليش

سيف
حلو .. نبدأ معك من الثابت .. كما قلت أنت ..

Quote: الاخوة \ المتداخلين انا عايش في نيويورك وساكن في افضل احياء بروكلين بدفع ايجار 1500$ كهرباء وغاز 150,, 3 موبايل 140 نت كيبل و تلفزيون و تلفون ثابت 140, تامين سيارة 130 افتكر ده حساب واضح,, ويا بريمة لم اصرف من مدخراتي بعد ما اشتغلت,,, بل وفرت اكثر من 10000$ ورونا ولاية اغلي من نيويورك؟

لم تذكر أى تأمين .. صحى .. يعادل 423 دولار
وفواتير علاج جارية كل شهر تعادل حوالى 500 دولار .. (الكو بيمنت + علاجات أخرى)
فى المدرسة فطور الشفع 200 دولار كل شهر ..
مدرسة الشفع بتاعت العربى والقرأن .. 80 دولار
بنزين العربية حوالى 72 دولار فى الشهر
سداد ديون دراسبة 307 دولار فى الشهر
سداد قيمة العربية 205 دولار
أنترنت وغيرها 129 دولار
تأمين عربية 143 دولار

مصروفات منزل ..
كرتونة الدايبر 40 دولار كل أسبوعين
كرتونة دجاج 50 دورا كل أسبوعين
لحمة وخضار 170 دولار كل أسبوعين
عيش حوالى 40 دولار كل أسبوعين

كل أسبوع وجبه أسرية 70 دولار
حلاقة (شخصى والأطفال) 60 دولار كل شهر ..

الملابس ..
مصاريف المدام .. غير محدودة (تشترى ليل نهار)
مصاريف الأتارى والألكترونيات للأطفال (غير محدودة) فى شهر واحد 850 دولار ..
ملابسى بتاعت الشغل وملابس الأطفال .. (شاحنه كامله ما تشيلها)

جوال 60 دولار

---------------------------
لاحولة ولا قوة الله بالله ..

وين الأيجار والكهربة .. وفطورى فى الشغل ..

والكتب التى أشتريها بمعدل خرافى
ومصاريف الأهل (6 أسرة) ..


عيييييييييك !!

بريمة

عزان سعيد:

Quote: صديقى قبل فترة إتخذ قرار شجاعا وعاد إلى السودان كان معى فى بالتمور وتوجه فور عودته للسودان للعمل فى دارفور ! الآن إشترى عربة جياد ( ليس بالكردت بل كاش ) ومبسوط أكتر منى عشرة مرات

إلا بريمة ....
حتي و لو قدم إسترحام ...
حتي و لو قام و جاب شاي ....

يا بريمة اغاناك الله بمال الحلال


يعنى حسي الواحد كم فكر للجية ما يجى




ــــــــــــــــــــــــــــــــــــــــــــــ
طيب كيف الدراسة هناك

عائزين علم

الاخ \ بريمة ,,, تحياتي

انت ود راجل ورجال ان شاء الله ,,,, لكن انا بتحداك

انا مافي شهر عسل انا شغال ومبسوط عن قناعة والزرق

من عند ربك وربك بيبارك. وبالمناسبة يا بريمة حديثي

عن المعيشة, لايدخل فيه يند مامون حميدة و1200دولار حضانة

دي معليش فنكهة,,, عندنا بدايل ارخص,,, ويا بريمة

سجل التاريخ وانا بذكرك,, افتكر غربة 28 سنة خبرة

لا باس بها,

الحبيب \ بريمة ,,,,, اذا كان اتاري والكترونيات للاطفال ب 850 دولار


انا عاوز ناس امريكا يعلقوا علي الكلام ده,,,ليه يابريمة

وما لازم تكره ابو امريكا اذا كان ده منصرف اتاري

بريمة عيش الواقع,,عندنا اكس بوكس,, وعندنا عجلات

وحاتك ما فشفرة كمبيوتر دسكتوب و4 لابتوب ,,ما عندنا

ديون عربية .. ملابسنا زي الناس ,,العلاج مجاني

المساهمات 5 دولار فقط عند زيارة الطبيب.. بريمة

انت عايش فنكهة سسسسسساكت يا اخوي ,,نظم نفسك

سيف
سلامات

Quote: انت عايش فنكهة سسسسسساكت يا اخوي ,,نظم نفسك

والله ضحكتنى .. وأنا أبكى وأقول أتلحست أنت مفتكره ما صاح!!

بخصوص الألتكرونيات فى البيت .. وحياة النعمة لليله مكنكش فى الفواتير ..
ومستعد أعمل أسكنق وأنشرها هنا لمدة العام المضى كله ..

يا أخى الرأسمالية ذبحتنا ذبح عدييل كده.

بريمة

ذواليد
سلامات

Quote: يا بريمة اغاناك الله بمال الحلال يعنى حسي الواحد كم فكر للجية ما يجى ــــــــــــــــــــــــــــــــــــــــــــــ طيب كيف الدراسة هناك عائزين علم

أنت لو لقيت فرصه جرى تجى أمريكا ..
جنيات الزغاوة تجار محترفين وعينا باردة عليهم فى جمع المال .. اليهود لو دسوا القروش فى عيونهم يلطعوها منهم ويحفظوها ..
أما نحن جنيات البقارة .. اليهود يدونا القروش بيد ويستلموها بيد تانية ..
شايف محمد سليمان .. راقد فى حنبول قروش ما ليهو حد.

بريمة

الاخ سيف كلامك منطقي جدا....المسالة في امريكا محتاجة تفكير ووزن معادلات.....و تعاون الزوجة...والتفكير في مهنة معينة والتركيز عليها. طبعا حكاية jack of all trades ما بتنفع.....انا فعلا شفت ناس نجحوا نجاح خرافي.....وطبعا الثقافة هنا قياس النجاح بالفلوس....لا ادري ان كان ذلك مبدا صحيح......اخيرا لا اعتقد ان الحياة في السودان احسن.....هنا: الدراسة ، العلاج، النظافة ، الفرص، امان الجواز الامريكي....سهولة ايجاد عمل في اي وقت ........اضافة الى تعليم الاولاد احسن تعليم ، ربما منحة كاملة طبعا......ومستقبل مضمون دون جهجهة او بشتنة.

الاخ الحبيب \ بريمة ,,, تحياتي


معليش يا بريمة علي كترة المداخلات


انا في منصرفات عندك غبر موجودة في بند صرفي وهي:


450 تامين( انا شغال في شركة تامين صحي)

ولدي فاملي بلان مجان

205 قسط سيارة ( اشتريت سيارة علي قد الحال)

كاش
500 مساهمات علاجية والله ما عندي

307 قسط دراسة ما عندي( بدفع كاش)

40 دايبرس

60 حلاقة عندنا ادوات وبنحلق لبعض ما للتوفير للحرص من ادوات الحلاق

850 الكترونيات اطفال,

يعني يا بريمة انت عندك 2400 دولار منصرفات انابعيد عنها

عندي ولد وبنت بدرسوا في جامعة نيويورك المدينة مجانا بالاضافة

كل سيمستر الواحد بيقبض شيك التاب حوالي 1500 دولار افتكر بتصرفهم

يا بريمة منصرفاتك الجانبية قدر مرتبي الاساسي اصحي يا بريش, اقصد

يا بريمة ,,, المدام ماسكة مصاريف البيت وعندها ديبت كارت وبتقوم

بالواجب,, في نظام يا بريمة,,اطفالي جو كبار عربي لبلب وقران حافظين

كويس ( اولاد مدرسين),, ويا بريمة انا بعرف ناس في نيويورك بنو بيوت

مش بيت واحد,,اعمل جدولة في الميزانية حا توفر 1500دولار في الشهر,

الله يديك العافية ويخلي ليك اولادك

عماد
سلامات ..

Quote: .....و تعاون الزوجة

زوجة تتعاون!! .. زوجة تتعاون إلا تكون خواجية.

أسمع منى .. نسوان حلتنا يجتمعن مرتين فى الأسبوع ..
أكثر من 20 إمرأة .. وكل واحد تدفع 20 دولار .. الجلسة ..

يعنى 40 دولار فى الشهر ..
وجزء من القروش تعود لواحده منهن كل أسبوع .. يعنى 500 دولار تستلمها واحده كل أسبوع ..
دا غير صندوق 100 دولار .. وباقى أخر الجيب ..

وأنظر .. مش مفروض المدام أستلمت 500 دولار .. المرة القادمه تدفع حسابها ..

تكون غطست حجرها فى حته غير معروفة .. وتانى تجيك بفاتورة 40 دولار ..

تقول لى المرأة السودانية متعاونة !!

عفواً .. مياده وأسمارت أنا ..

بريمة

سيف

ليه يا أخى ما علقت على الحته دى ..

Quote: ومصاريف الأهل (6 أسرة) ..

وهذه يعملوا ليها شنو؟

بريمة

أها نسيت .. فاتورة البتزا .. والماكدونالندز ..

اللبن وين .. والكورن فلكس .. والمربات ..

الماكينه بتاعت الموية .. عايزه موية 33.50 دولار شهرياً ..


صدقونى .. الواحد يذهلل من الفواتير ..


بريمة

أميمة
سلامات ..

Quote: الصبر واكثر من الاستغفار وشوف شغل اضافي ربنا يكون في العون

الصبر والأستغفار .. لكن شغل إضافى لا ينفع ..

أذكر كنا نشتغلوا دوامين فى اليوم .. 16 ساعة
ولدينا نصف ساعة راحة للفطور ..
كنا وصديقى .. نوزعوها 15 دقيقة للأكل .. و5 للذهاب للحمام والصلاة
والباقى نجوا جوار البوابة التى نشتغلوا فيها فى مطار ريغان فى واشنطن عشان نأخذوا غفوة سريعة.

ولاحظوا الغفوة مدتها بالكثير 7 دقائق .. ولازم ننوموا فيها نوم يبطل الوضوء .. يعنى لما تشخر أخخخخخخ والرياله تسيل ..

وشخصى طبعاً أبو الهم .. يعنى أكون نايم وحاسب ضربات الدقائق فى أضانى ..
وأول ما أصحى من غفوتى أصحى صديقى: قوم قوم ..
ذات يوم صحيته ومازال هناك دقيقتين .. صاحبنا هاج فينى .. أنت الأستعجال ليك شنو .. فاضل لينا دقيقتين تصحينى

والله هذا ما حصل .. شكل فى دقيقتين نوم ..

أتذكر فى كردفان .. نقضوا شهور وأيام .. ما عندك أى حاجة غير مطاردة الأفراح ..

هذه هى أمريكا يا ناس ..
بريمة

العزيز \بريمة ,,,, ده اكبر مشكلة ,,يكون عندك ناس بتصرف عليهم

البند ده انا برضو معفي منه,, اخوي ميسور الحال ,اختي صحفية

وزوجها ميسور الحال ,, الوالدين لهم الرحمة الاقارب القريبين

حالهم ميسور,,,, انت البقارة ديل ما يبيعوا بقرتين تلاتة ويتصرفوا.

الله يكون في عونك

لكن راجع حساباتك ومنصرفاتك في امريكا

أها يا سيف
أنا كتب فى مداخلة سابقة

Quote: أفضل إنسان فى أمريكا إنسان إما يأتى بأموال جاهزة للأستثمار .. أو ليس لديه أى إرتباط أسرى .. والأخيرة صفة خاصة بالأحباش .. بريمة

أنت يا حبيب معفى من أكبر فاتورة .. وهى هم لأكثر من 90 % من سودانيى الشتات ..
للعلم .. الخالة وبت الخالة والعم والجده الفلانية .. والعم العلانى كلهم ليس فى المجموع الأسرى.

لو معفى مثلك أبوس يدى بالمقلوب ..



تحياتى ..

قبل ايام دخلت دكان Dollar Store في فرجينيا ، اول ما لفت انتباهي وجود سيدة بجانب الرجل الجالس على الكاشير وبجانبها طفل و هما منهمكان في عمل الhomework، يعني الزوج على الكاشير والزوجة معه و معهم طفلهما. كانوا في قمة الانس والانسجام ثلاثتهم طبعا....تعاون الزوجة ضروري و تمردها يجعل المسالة تصبح سباحة ضد التيار....الرجل و المراة كلاهما يحتاجان الى دعم وتشجيع بعضهما البعض واعتقد اننا نفتقد كثيرا من ذلك في اميركا.....لكن اميركا فعلا is the land of opportunity.... المطلوب خارطة طريق وplan وطبعا hard work على شوية معنويات عالية وهمة.....اذا طلعت من امريكا ببيت اكتملت دفعاته وبيت اخر في السودان فانت قد حققت اكثر من الحلم الاميركي.
عماد

الحبيب \ بريمة,,,, ربنا يجبر بي خاطرك ان شاء الله

والله يا بريمة ضحكتني لمن جاني ابو العشريق..

اول ما جيت امريكا اشتغلت محاسب في شركة يمتكلها ايراني..

ومجرد ما استلم الراتب احول شئ السودان وشئ الهند وشئ السعودية وشئ مصر ومرات لروسيا..

الايراني قال لي انت قايل نفسك Jesus -

امريكا ليست دولة اغتراب بل هجرة - اذا كان هدفك فيها جمع المال فقط يمكنك ذلك - اذا كان هدفك التطور المهني يمكنك ذلك

اذا كنت قاصدا العلم فلك ذلك..

شعوب العالم تاتي اليها بثقاقاتها المتعددة و تستطيع تحقيق اهدافها..

في شعوب هدفها جمع المال -كون افرادها ثروات طائلة
وشعوب همها الرفاهية والاستمتعاع فامتلكوا اليخوت والسيارات الفارهة
وشعوب تاتي للعلم فينال افرادها الشهادات العليا.. الخ الخ

السوداني داير يكون عندو قروش كتيرة و شهادات عليا و يكون عايش في رفاهية و كمان يعيش اهلوا في رفاهية ..
بصراحة كدة كتير على امريكا - نحن دايرين خاتم سليمان عديل كدة..

تحياتي

Quote: يعني الدخل الصافي اكثر من 4000$ ايجار وفواتير في حدود 2100 والمعيشة مهما كلفت لاتتعدي 900$,,

كما قالت سمارت - انا : مصاريف ال daycare فقط تتعدى 1200 دولار وهذه ليست للفنكهة لاني ارى ان طفلي يستحق ان يلتحق بحضانة على مستوى معقول من المسئولية و النظافة تعلمه الانضباط و اشياء اخرى مهمة .. و ارى ان كثير من السودانيين هنا فى سبيل الاقتصاد يضعون اولادهم مع مربيات لا يحملن ترخيص او تكون صاحبة شقة متر فى مترين و كل ذلك في سبيل توفير المزيد من المال ,, و انا شخصيا لا استطيع ان افعل ذلك بطفلي ......يعني الاستاندرد بتاعك ربما يفرض عليك مصاريف زائدة .. لكن على الاقل بيرضي ضميرك تجاه ابنك او بنتك و انت مطمئن بانهم على الاقل يتعلمون الكثير فى غيابك عنهم ......
نحن الان نسكن فى بيت قسطه فقط حوالي 2400 دولار (و هذا يسد الفائدة الشهرية فقط و لا شيء تجاه الاصل.. يعني من المفترض ان ندفع اكثر من ذلك )
قبل ان نشتري المنزل كان أيجار شقتنا 1900 دولار (غرفتين و حمامين) .. ضرائب المنزل تتعدى ال 6000 دولار فى السنة ,, و طبعا مثلنا كمثل غيرنا هنا .. افتكرنا ان البيت سيكون استثمار جيد للمال بدلا عن دفع الايجار فى لا شئ .. لكن طبعا حصل الانهيار فى اسعار البيوت ,, و عارف براك الورطة التي وقعنا-ووقعت فيها الكثير من اهل البلد -فيها بسبب الانهيار هذا ....
ابني حينما كنت اعمل قبل سنتين كنت ادفع 570 دولار للنشاط بعد المدرسي لابتنتي و 1200 دولار لحضانة
يعني فى الشهر فقط 1750 دولار فقط لاستطيع ان اجد مكانا يلم اولادي حتى استطيع ان اعمل ..
اما المصاريف الاخري من diaper و formula و مستلزمات الاطفال فلا يمكن حتى حصرها

اما التامين الصحي فتقريبا ما ذكره بريمه ينطبق علينا .. و المشكلة انه دخل الاسرة لا يجعلنا من المستحقين لاي مساعدة من الدولة فى شكل تأمين صحي او غيره .. و في بلاد العم سام دي .. ميليم واحد ما اخدناهو من الحكومة .. اي شي من جيبنا.. و دي ايضا مشكلة فى هذه البلد حيث تحرمك الحكومة من كل استحقاق اذا كنت مجتهدا و لديك دخل اسري معقول (حسب راي الحكومة)
--
الاخ بريمة .. خف على المدام شوية .. هي برعايتها لاطفالك فقط توفر لك الكثير .. صدقني ... بعد ان ادفع حق الحضانة للاطفال .. (و لدي اكثر من واحد الان) لم يتبق الكثير الذي يجعلني اصر على مواصلة العمل .. تضحية جسيمة و محبطة .. لكن نعمل شنو .. بالاضافة الى ان الحضانات ماهي الا مصانع للجراثيم .. كل يوم طفلي راجع بي حمي و التهاب فايروسي و غيره رغم حرصي على ان يكون بدار حضانة نظيفة .. لكن الاطفال فى العمر الصغير (اقل من 4 سنوات) هم دائما عرضى لتلك الجراثيم بسبب احتكاكهم اليومي ببعضهم البعض...
غايتو .. تربية الاولاد زي ما بقولوا زي كد الحجر :-)
و رغم ذلك .. غير مقتنعة بان السودان هو الحل .. لان الرأسمالية ايضا قد تحكمت هناك ,, و المشكلة انها راسمالية تنتمي للقرن التاسع عشر .. حيث كان استغلال الانسان على اشده ...

الله يهون القواسي ,, وبرضو نقول شكرا لي الله .. غيرنا ما لاقي اللقمة لابناءه...
----
عدل لتصحيح بعض الاخطاء المطبعية .....

اهداء خاص ليك با بريمة من محنتنا الابدية فى السودان الى محنتك الابدية فى المهجر :-
اهلا وسهلا
انتا مين ؟
لما عاينتا فى مرآية
ما عرفتك
انتا مين ؟ يا وش حزين
عاملة ايه فيك السنين ؟
مركب تودى .. التوديك ما بتجيب
انتا مين ؟
يا زول مداقش فى دروب الهجرة
فى جيوب البنطلون شايل حنين
درباً بوديك .. البوديك ما بيجيب
...................
...................
ضيعتا وشك يا غريب
ضيعتو فى زحمة رصيف
وصرختا فى الوش البديل
- منو انتا ؟ انا شايفك كتير .
انتا مين ؟
يا الماشى حفيان فى الطريق
شاكيك شوك درب المسير
وين الجناحين شان تطير ؟
لا راحة فى الوطن الاساس
لا راحة فى الوطن البديل
....................
....................
مكتوب عليك الاندهاش
مقسومة ليك سكة سفر
شنطك مستفة للرحيل
موعود تكون فى الغربة يا بحار غريب
يا غربة فى الوطن الاساس
يا غربة الوطن البديل
...................
...................
وشك صرخ فيك
- انتا مين ؟ .
رديت
- غريب , داير استريح .
وشك قفل باب وشو فى وشك
وبقيت براك
انسان وحيد .. مهجوم من الامطار .. حزين
موعود تكون فى الغربة يا بحار هجين .

......
شاهين .. القاهرة , يوليو 2004

بريمة
تحياتي

رد الله غربة الجميع

Quote: ولا أدرى هل التجربة خاصة بى أم كل ناس أمريكا يحسون نفس المشكلة ... قروش كأنها قروش حرام تخرج من حيث أتت .. فواتير تلخم الراس .. من كل صوب .. أكثر ما يزعجنى فواتير التأمين .. تأمين علاج .. وتأمين عربة .. وتأمين حساب .. وتأمين على التأمين .. تصدقوا .. تأمين التأمين!

الحال من بعضو في كل المهاجر الآن

تخريمة : صاحبك في أريزونا إبتدأ التحضير للماجستير

Quote: بريمة انت عايش فنكهة سسسسسساكت يا اخوي ,,نظم نفسك

الاخ بريمة كلامك , انت اتخزت امريكا موطنا لك يعني اخدت الموضوع هجرة وليس اغتراب

حرااام عليك تشتري عربية بالتقسيط يامان ودي اكيد عربية اخر موديل وعلي الزيرو لما

اشتريتها شووف يامان اول حاجه تعملها تتخلص من كل الكردت كارد وتحتفظ بواحد فقط وده

تشتري به البنزين فقط ونصيحة لك حاول تتجنب المدن الساحلية وخاصة فرجينيا وكلفورنيا

وتعال داخل جوة علي ولايات الوسط فهي ارحم بكتير من فرجينيا ونيويورك وكلفورنيا.

حاليا ممكن تشوف لك شغل اضافي في الوويك اند وبراحة ممكن تعمل لك 400 دولار في الاسبوع

واسال طارق حبة حبة او احمد خضر وهم بمسكوك الدرب

بالتوفيق يامان .

أخ الفاضل بريمة .. أمريكا لحستني ذكرتني بأغنية الدنيا ظلمتني التي حورناها لتلائم حالتك أخي الحبيب .... عندنا في هذه الدنيا نبي واحد .. وربنا سبحانه وتعالى نزل لينا بإسمه سورة في القرآن وقال فيها ...
سورةلقمان (آية:34): ان الله عنده علم الساعه وينزل الغيث ويعلم ما في الارحام وما تدري نفس ماذا تكسب غدا وما تدري نفس باي ارض تموت ان الله عليم خبير) صدق الله العظيم
فلماذا تشغل تفكيرك في شيء تعلم تمام العلم أنه ليس بيدك ولا بمقدورك أن تعدله أو تغيره أو حتى تتنبأ به. يا مواطن يا أمريكي ... هنا في الدول العربية ذات ا لدخل المحدود تجد حالة لمغترب خامي شهادات الدنيا والعالمين وحينما تقارن دخله بشخص أكمل ثالث كتاب بجهد جهيد ولكنه يعمل في عمل حر وموفق ودخله قد يساوي دخل الآخر أربع مرات ... الحكاية من ربنا أقسام وأرزاق - أسأل الله أن يفتح عليك فقط ... يكفي أنك تتمتع بكامل صحتك ولا يوجد أثمن من الحرية يا بريمة ... الواحد في بلده من بوابة تفتيش لأخرى وصنف من العسكر همه اللبج والنظرة الدونية القاصرة تجاهك وإذلالك و هكذا تكون في حالة من الترقب والجزع لحين مغادرة بلدك ... وهكذا في كل دول العالم العربي .. لاتخلو من المتسلطون أصحاب العاهات النفسية دول القمة والتسلط ... مالك يا خي أحمد ربك وعش مسروراً أو أرجع لبقرك ... وأهديك الأغنية أدناه ...
باي ذا وي ....
لدي صديق عزيز .. بحديثك هذا بدات أخاف عليه - سافر قبل 3 شهور لوتري ... يحمل مؤهل دكتوراة - كان يعمل بوضع لا بأس به - يعني ألان أمام معمعة الأزمة الاقتصادية والصرف الذ عكسته لنا بهذه الصورة - نقول ليه أرجع وخاصة أنه أخذ أسرته معه - ووضعه غير مستقر - نسأل الله أن يفتح على الجميع .... استمتع بهذه الأغنية

أمريكا لحستني
فرقتنا يا بقري
انا بكيت على حالي
الكاتمو في قلبي
يا ناس تعبتا خلاص
و احتار دليل قلبي
دي أمريكا قاسية يا ناس
فرقتني من بقري
دنيا .. دنيا .. دنيا

ما قادر انسى بقري
و ابكيك احلى أيام
بقري انت الريدة
مهما طالت الايام
حكم الدنيا علي قاسي
و فراقك انت حرام
دنيا .. دنيا .. دنيا

بقري ليه تقسى
خليك في مكاني

حرام عليك تنسى
لو كنت تنساني
بهجرتنا لأمريكا رضيت

بعدت في ثواني
دنيا .. دنيا .. دنيا
ع

Quote: بريمة إتخارج!!

بريمة الحبيب وينك
ياخي لينا زمن .ماكان اخير ليك ناسك الكنت معهام
وجيرانك الطيبن .
ياخي البلاد كلهايبسة حتي الخليج
يبس بس اسكت ساكت

..
,

شوف يا خال
ورينى تحت تحت السيفنغ بتاعك كم ؟
بنوريكـ تعمل بيهو شنو ؟ ونوع البزنيس المتوفر ومتاح
حسب المبلغ ؟؟ والانكم منو فى الشهر كم هنا فى السودان ؟؟
بس ما تقول لي السخانه والكتاحة وما بقدر .. والشوارع
والاجراءات .. والضرائب !! دايره صبر وعلاقات وتفتح عينك تأكل ملبن

او ورينا الشهادات شنو والمؤهلات شنو ؟؟
ونوريك محل تقدر تدخل وتتبحبح هنا ولاالخليج
وما تقول لى وساطات ولا مافى وظائف .. وخصوصا الخليج
لا ضرائب لا تأمين ..
وحسي لو اطابقت شهادتك فى وظائف هبطرش فى دبي
فى محل بريحك للاخر ..


___________

المشكلة الاحباط عندكم ما مادى وبس
بقي ثقافى واجتماعى .. حسب تقاريرنا من
مراسلينا هناكـ .. اقعدوا هناك لمن تفقدوا هويتكم
لا نحن نرضى بيكم ولا امريكا تمتعكم
وتبقوا ( بدون )

Quote: اهداء خاص ليك با بريمة من محنتنا الابدية فى السودان الى محنتك الابدية فى المهجر :- اهلا وسهلا انتا مين ؟ لما عاينتا فى مرآية ما عرفتك انتا مين ؟ يا وش حزين عاملة ايه فيك السنين ؟ مركب تودى .. التوديك ما بتجيب انتا مين ؟ يا زول مداقش فى دروب الهجرة فى جيوب البنطلون شايل حنين درباً بوديك .. البوديك ما بيجيب ................... ................... ضيعتا وشك يا غريب ضيعتو فى زحمة رصيف وصرختا فى الوش البديل - منو انتا ؟ انا شايفك كتير . انتا مين ؟ يا الماشى حفيان فى الطريق شاكيك شوك درب المسير وين الجناحين شان تطير ؟ لا راحة فى الوطن الاساس لا راحة فى الوطن البديل .................... .................... مكتوب عليك الاندهاش مقسومة ليك سكة سفر شنطك مستفة للرحيل موعود تكون فى الغربة يا بحار غريب يا غربة فى الوطن الاساس يا غربة الوطن البديل ................... ................... وشك صرخ فيك - انتا مين ؟ . رديت - غريب , داير استريح . وشك قفل باب وشو فى وشك وبقيت براك انسان وحيد .. مهجوم من الامطار .. حزين موعود تكون فى الغربة يا بحار هجين . ...... شاهين .. القاهرة , يوليو 2004

شكرا يا شاهين

ويسلم يراعك ..

جيلنا .. هذا الجيل يجب أن لايحلم بأى شيئ ..

نحن خرجنا لهذه الدنيا ومكتوب علينا الكفاح الأبدى ..

هذه التجربة وثقتها لتكن من باب الذكرى .. فى الغربة جميع السودانيين فى الهم سوى.


تحياتى

Quote: الحال من بعضو في كل المهاجر الآن تخريمة : صاحبك في أريزونا إبتدأ التحضير للماجستير

يا سلام .. والله خبر سار .. وبالتوفيق بإذن الله ..
مرتضى إنسان خلوق ومثابر ..

شكرا با أبوجهينة للخبر

تحياتى

بريمة

Quote: أمريكا لحستني فرقتنا يا بقري انا بكيت على حالي الكاتمو في قلبي يا ناس تعبتا خلاص و احتار دليل قلبي دي أمريكا قاسية يا ناس فرقتني من بقري دنيا .. دنيا .. دنيا ما قادر انسى بقري و ابكيك احلى أيام بقري انت الريدة مهما طالت الايام حكم الدنيا علي قاسي و فراقك انت حرام دنيا .. دنيا .. دنيا بقري ليه تقسى خليك في مكاني حرام عليك تنسى لو كنت تنساني بهجرتنا لأمريكا رضيت بعدت في ثواني دنيا .. دنيا .. دنيا

عثمان يا حبيب

والله إبداع ..

نظام الأقتصاد الرعوى نظام إقتصادى متكامل .. الناس ما قاعده تصدق .. وح تشوف يا عثمان لما أنزل المعاش .. أرجع وأعيش عيشة الكاوبويات .. فى هدوء تام .. ما عايز أسمع إلأ صوت ضباناية أم بنق .. ضبانة البقر ..

بخصوص صديقك لا تقلق عليه بإذنه تعالى تتيسر .. وارسل لى معلماته فى الماسنجر ..

بريمة

Quote: الاخ بريمة كلامك , انت اتخزت امريكا موطنا لك يعني اخدت الموضوع هجرة وليس اغتراب

بخاف

سلامات ..

أنا أفتكر العكس هو الصحيح .. أنا أخذت الموضوع إغتراب .. ومفروض الواحد يأخذه موضوع هجرة ..

أنا لو مفكر بأسلوب الهجرة كنت مرتاح البال.

بريمة

Quote: بريمة الحبيب وينك ياخي لينا زمن .ماكان اخير ليك ناسك الكنت معهام وجيرانك الطيبن . ياخي البلاد كلهايبسة حتي الخليج يبس بس اسكت ساكت

الأخ باسط المكى

شخصيا .. كيف العقب الوراك .. الحلة المجاورة

مرحبك بك ياأخى ..

بريمة

If America like what you said it would;t be the greatest country in the world


any there is a very easy way to solve your proplem

just get the hell out of it

go back to Sudan or any where in middle east where human are valueless

just make sure you pay your bills before you leave

Thanks

الاخ الفاضل بريمه .
انا متابع معاك كويس بس فى نقطه هامه ما تفوت عليك من كلام Outcast وهى

Quote: يعني الاستاندرد بتاعك ربما يفرض عليك مصاريف زائدة

يعنى نحن ما نفكر فى اللوترى ثانى

يا بريمة بس في حاجة واحدة ما أضفتها في اللستة بتاعتك الفوق دي

بتدفع كم شهريا في:

إستنشاق أريج الديمقراطية و الحرية

Quote: او ورينا الشهادات شنو والمؤهلات شنو ؟؟ ونوريك محل تقدر تدخل وتتبحبح هنا ولاالخليج وما تقول لى وساطات ولا مافى وظائف .. وخصوصا الخليج لا ضرائب لا تأمين .. وحسي لو اطابقت شهادتك فى وظائف هبطرش فى دبي فى محل بريحك للاخر ..

ول أبا تبلدينا أنا جاييكم فى الخليج لكن أدونى لنهاية العام ,,, الموضوع ليس وظيفة وراحة .. الموضوع تربية أولاد عدييل ..

موضوع تربية الأولاد أنا لو فتحت فيهو إلا يقنع أى زول عنده أولاد جاى بهم أمريكا ..

Quote: شوف يا خال ورينى تحت تحت السيفنغ بتاعك كم ؟ بنوريكـ تعمل بيهو شنو ؟ ونوع البزنيس المتوفر ومتاح حسب المبلغ ؟؟ والانكم منو فى الشهر كم هنا فى السودان ؟؟ بس ما تقول لي السخانه والكتاحة وما بقدر .. والشوارع والاجراءات .. والضرائب !! دايره صبر وعلاقات وتفتح عينك تأكل ملبن

طيب .. أفترض أنا أستلفت مبلغ 50 ألف من كروت التأمين بعائد فائده يعادل 6.75%

هل بتجيب حقها وبتستر الحال .. !!

أما بخصوص الإحباط الثقافى والإجتماعى .. إجتماعيا نساءنا فى أمريكا .. أحسن من أى بلد أخر .. حلتنا الذكرت فيها أكثر من 20 أسرة لا أعرف ولا نصف الرجال .. أما النساء يعرفن حتى الأطفال .. وعايشات بمزاج .. وتجاربهن جيده وسعيدة

أما نحن الرجال معصورين عصر يطلع زيت السمسم.

بريمة

يا بريمه ما اشتغلت بي الشغله
البركه في محمد سليمان

ول ابا
ما معقول ياخي..

امريكا دي بلد بس تقرا وتفك البيرق...
`ذي ما عملنا سنة 1989
بعدين الناس البتقوليك الجواز الامريكي بدي امان
ممكن نعرف كيف الجواز الامريكي بيديك
امان
والزنوج ديل عايشين في الوضع السئ دا.
وهو عندهم جوازات امريكية بالميلاد وكابر عن كابر..
قدلة على الجيتو تدي ربك العجب..



تحياتي يا بريمة وربنا يديك العافية,,

..
.
الخليج ا يا بريمة ما قسم معانا
انحنا ناس سخانة وكتاحة .. بس بنوريكـ الدرب ..

Quote: الموضوع ليس وظيفة وراحة .. الموضوع تربية أولاد عدييل .. موضوع تربية الأولاد أنا لو فتحت فيهو إلا يقنع أى زول عنده أولاد جاى بهم أمريكا

والله الموضوع دا انا بتمنى تفتحو ..
( المسكوت عنه فى تربية النشء فى امريكا )
امس القريب دى كنت بتناقش مع صديق .. فيهو
وعن اختلاف الثقافات .. والحياة الإجتماعية ..
ولمن تقول كلمة حق يشبكوكـ انت عشت فى امريكا ؟؟ وشن عرفكـ
وانحنا ؟ وانتو بقرانين ؟؟ ودايرين تجوا وما لاقين ؟؟
كلام الطير .. فياريت تديهو مساحة هناك او فى موقع اخر ..

Quote: طيب .. أفترض أنا أستلفت مبلغ 50 ألف من كروت التأمين بعائد فائده يعادل 6.75%

بتجيب حقها ونص وخمسة
وتستر حالك لكن انا متأكد لا انت لا لوليدات
جونا دا ما بتتحملوا ..

__________
انت امريكا دى ما فري كنتري
نسواكم ديل ما يتعصرن معاكم فى الشيرنغ
بتاع المصاريف دى .. غايتو انحنا هنا دا
بقت لو ما شغاله ما بتقسم ولو كانت نؤوم الضحى
ما بتغطى وعاطله ما بتجيب حقها .. معادلة ثابته

Quote: يعنى سمعنا من ناس ارميكا نفس كلامك وكلام Outcast وافتكر ده عين الحقيقه وافتكر انه كلام منطقى شديد .

بالجد يا محسن تجربة الأخت أوت كاست تجربة حقيقية ويعايشها الجميع ..

والمدام قرت كلامها وعلقت .. بأن الأخت أوت كاست تعرف القيمة المادية لبقاء السيدات فى المنزل مع الأطفال .. لاحظ غير التربية والرعاية ..

وتجربة أمريكا تجربة مفيدة فى جوانب كثيرة ولا يمكن قياسها قياس كامل من وجهة واحدة .. هناك جوانب أخرى .. لا يسع الحديث لذكرها .. أهمها وجود بوادر الأمل .. Hope ..

على وجهة البسيطة لم أجد دولة يكون الأنسان فيها يمتلك الأمل بفجر أفضل مثل أمريكا .. أمريكا متفرده فى جانب غرس الأمل فى نفس الأنسان ..

وبالمناسبة أنا سعيد جدا بهذه التجربة .. فتحت أبواب أمل للكثيرين أتمنى أن يجعلها الله فى ميزان حسناتنا و فى ميزان حسنات كل من قدم ولا يرجوا الا وجه الله وفى ميزان حسنات والدينا الربونا وعلمونا.

بريمة

سلامات Outcast
تجربتك ذى تجربتى بالضبط....البيت اللى الان under water ....التامين الصحى و السوشيال سكيورتى اللى بيشيلوا منك نسبه من دخلك..يعنى كلما ذادت ماهيتك كلما ذاد المقدار. و الحكومه اللى ما ح تديك (كف) حتى لو دخلك كان كبير نسبيا. و الحضانه اللى انتى بتشوفى انها اقل ما يمكن تقدميه لطفللك اللى انتى بعيده عنه طوال اليوم....و بعض السودانيين شايفين انك بس بتتفشخرى...و ما بيتوانوا انهم يسمعوك كلمه كلمتين عند اللزوم.
الفرق الوحيد هو انى اصريت اواصل شغل...و انا اعرف تماما ان (الان) شغلى ح يذيد علينا الضرائب بس. لكن بعد10 سنوات (اذا فضلت فى البلد دى) ح اكون عملت خبرة كويسه و كبرت فى شغلى و عندها دفعيه البيت الشهريه و باقى المصاريف ح تبقى حاجه بسيطه جدا.
انا بصراحة لو كانت شلت فكرة الرجوع للسوداان من راسى نهائى (على الاقل فى خلال ال 10 سنيين الجايه) اكيد كنت ح اكون فى بحبوحه كبيرة فى العيش. انا ادفع اقصى ما يمكن دفعه فى ال 401K يعنى بوفر لمعاشى اكبر كميه من القروش يسمح بيها ال system . لكن لسه فى بالى انى مفروض اوفر لبيت السودان و عربيه السودان و عيشه السودان. الواحد بقى عايش عيشتين...بيوفر لمعاش امريكا و معاش فى السودان...و ده هو اللى بيعمل احباط.
بجيكم راجعه ان شاء الله

سلام يا بريمة
و الله و الحق لله
امريكا دي ما تعبانين فيها الا البني كجة
الناس كلها حارقة تش
يازول و الله نحمد الله منقة و كبنقة
شد حيلك شوية و خليك كرييتيف
دي ما بلد ماهية و لا دكتوراه‘ بتعرف تبيع حالك بيمشي
داير الفنكهة بتمرق من التيم قبل الشوط الأول.

مرة كانت قاعد في مطعم في السوق الشعبي الخرطوم أستمع لإثنين من تجار السوق الشعبي يتونسوا. واحد قال للثاني (دخلي الحمد لله كويس لكن تصرفاتي كثيرة)

الحكاية ما أمريكا ولا السودان ولا القمر

الحكاية ما جغرافيا الحكاية إقتصاد

والمشكلة في التصرفات الكثيرة

والمشكلة في ناس ما بحسوا بإنسانيتهم إلا إذا كانو من (كبار) المستهلكين كما أرادت لهم الرأسمالية.

كنت أعرف واحد شغال زيو وزي الثانيين (سواقين تكسي وكدا) لكن كثير التشكي من الفلس. والسبب أنه مصر يركب عربية جديدة وكبيرة قسطها يقرب للألف شهريا وإيجار ما أقل من كدا. إذا دخل المطعم للفطور طارت منه 10 دولار. إذا إشتري جزمة ما أقل من 100 دولار وكذلك القمصان والبناطلين.

كل سنتين أشتري عربية ب 700 دولار (عمرها 10 سنين وماشة 130000 ميل) أركبها وأبيعها بعد سنتين بنفس المبلغ، لا أقساط ولا يحزنون. تمشي دكان العربي شوبنق في الشهر ب 100 دولار تملا الثلاجة ودواليب المطبخ ما لذ وطاب، كل 3 سنين تمشي الداون تاون البدلة كاملة وبقيمصها ب 50 دولار. وزولنا داك يخجل إذا قلت ليه بدلتي دي ب 50 دولار (يعني كان ما ب500 دولار ولا بعاين ليها)

زي ما قالوا الناس زمان: تشتري الما بملزمك بكرة تبيع البلزملك.

القوة في أمريكا أن (تقاوم) الإستهلاك وتقاوم الديون

وبعد داك تتنسم عبير الحرية

Quote: دكان العربي شوبنق في الشهر ب 100 دولار تملا الثلاجة ودواليب المطبخ ما لذ وطاب، كل 3 سنين تمشي الداون تاون البدلة كاملة وبقيمصها ب 50 دولار.

نصر سلامات معقول ارميكا دى رخيصه للدرجه دى . لكن كده قول لى ياأخوى باقى انا بحب التفاصيل
الشوبنق بتاعك ابو 100$ ده لكم نفر ( فى سمعى ماظنيتو ) انتو يا الحبان ما بتعرفو درب
السينما والمسارح و الرفاهيه والاجازات والحياه الحلوه ياحليلكم نحن كان كده مغشوشين فيكم .
بس لكن ابا بريمه ومعاه اوت كاست هم الفاهمين الفلم .

Quote: شوبنق في الشهر ب 100 دولار تملا الثلاجة ودواليب المطبخ ما لذ وطاب،

الكلام ده مستحيل!!!!
الا تكون بتشترى عدس و فول بس.....لكن "ما لذ وطاب" ده ما ب 100 دولار فى الشهر.
بعدين العربية دى ما قلت لينا بتصرف عليها كم صيانه???و ما بتكون خايف انها تعمل ليك (لا قدر الله) مصيبه فى ال hightway ???
بعدين البدله لازم تكون 50 دولار او 500 دولار....حاجه معقوله ما فى???
ذى ما قالت اوت كاست....المستوى اللى عاوز تعيش فيه بيحدد مصروفاتك.

Quote: الا تكون بتشترى عدس و فول بس.....لكن "ما لذ وطاب" ده ما ب 100 دولار فى الشهر

ياأخونى الزول مخير ياكل شنو بس هل اذا افترضنا عندهم ميز هل 100$ تكفى لذلك
واذا هو عدس وفول ساده يعنى مامصلح فى الشهر ممكن تكفى الواحد ...افتونا يا ناس USA فى الكلام ده ...

Quote: بعدين البدله لازم تكون 50 دولار او 500 دولار....حاجه معقوله ما فى???

smart_ana2001
البدله تطير يا اختى كده فى الاول نخلص موضوع الاكل ده وبعدين حا نجى نلبس الهدوم


انا امريكا ما بعرف اكله وشرابه بس طلب الفول عندنا هنا بى 3جنيه واذا كمان لو عاوز تغير ممكن تمشى لزيز ده لو حسبنها فى الشهر x عدد ثلاثه وجبات .......يازول قول خير

حسبة الميز الشهري دي لشخص واحد ولو في 3 ساكنين مع بعض كل واحد يدفع 100 دي تلمتماية أجعص بيت ما يكملها
للفرد الواحد كالآتي
خبز عربي ب 10 دولار بمعدل 6 عيشات في اليوم
فول مصري ب 10 دولار وذلك يعني 10 حلل برستو فول
عدس ب 10 دولار برضو 10 حلل
لحمة ب 30 دولار يعادل 15 باوند شوف دي كم حلة
كيس بطاطس 2 دولار يقضي الشهر وتدفق الباقي
خضارات 10 دولار
سلطة 10 دولار بتقضي الشهر وتفضل
جبنة 6 دولار أكثر من 2 باوند
طحنية 2 علبة ب 6 دولار
مربي 2 علبة ب 3 دولار
فواكه وحاجات متنوعة بباقي المية

أما البدلة أم 50 فهي نفس البدلة ب 500 بس قعدت في رفوف المحلات الكبري وما أتباعت ودايرين يصفوها لانا
Out of Fashion
كما يقولون. وتفتكري نحن عارفين الفاشيون ذاتو شنو ما هي بدلة سوداء ولا زرقاء ولا رمادية مرات ب4 زراير ومرات ب5 ومرات ب 6 زراير. مرات طويلة ومرات قصيرة مرات فاتحة من الخلف ومرات ما فاتحة.

في فرق بين تكون
Cheap
وبين تكون
Smart Shopper
أقلاها تشتري لمن يكون في
Sale
جزمة واحدة محترمة من إنجلترا ومعاه شبط وسنكيرز وجزمة رخيصة مش 10 جزم كل واحدة ب 100 دولار
وقس علي ذلك

Quote: حسبة الميز الشهري دي لشخص واحد ولو في 3 ساكنين مع بعض كل واحد يدفع 100 دي تلمتماية أجعص بيت ما يكملها للفرد الواحد كالآتي خبز عربي ب 10 دولار بمعدل 6 عيشات في اليوم فول مصري ب 10 دولار وذلك يعني 10 حلل برستو فول عدس ب 10 دولار برضو 10 حلل لحمة ب 30 دولار يعادل 15 باوند شوف دي كم حلة كيس بطاطس 2 دولار يقضي الشهر وتدفق الباقي خضارات 10 دولار سلطة 10 دولار بتقضي الشهر وتفضل جبنة 6 دولار أكثر من 2 باوند طحنية 2 علبة ب 6 دولار مربي 2 علبة ب 3 دولار فواكه وحاجات متنوعة بباقي المية

وده بما لز وطاب عندكم اللهم لا تحرم النعمه من الزوال يارب

Quote: في فرق بين تكون Cheap وبين تكون Smart Shopper أقلاها تشتري لمن يكون في Sale جزمة واحدة محترمة من إنجلترا ومعاه شبط وسنكيرز وجزمة رخيصة مش 10 جزم كل واحدة ب 100 دولار وقس علي ذلك

( جزمة واحدة محترمة من إنجلترا )يازول إنجلترا مره واحده طيب كده ما خربته التوفير بتاعك

Quote: انتو يا الحبان ما بتعرفو درب السينما والمسارح و الرفاهيه والاجازات والحياه الحلوه ياحليلكم نحن كان كده مغشوشين فيكم

مش كدة بالله ؟ .. يعني تشتغل السنة كلها .. تهمل بيتك و اولادك السنة كلها و تكون مستخسر حق الرفاهية و الحياة الحلوة فى نفسك و اسرتك ؟؟ صراحة انا ما بقدر على "النشاف" ده :-)
المشكلة انه حينما يكبر ابناؤك قليلا و تحاول ان تربطهم بالوطن و تبتدئ برنامج السفر للسودان لك و لعيالك .. my goodness عايز ليك على الاقل 5000-6000 دولار حق تذاكر (و غالبا بالكريديت كارد) وبرنامج الهدايا لاهلك هناك و ملابس لك و لاطفالك لانه فى الغالب هدومك و هدومهم حتكون اتقطعت للصيف الثاني (هنا مشكلة ان هناك فصول حقيقية للسنة يعني لازم يكون عندك ملابس صيف-شتاء-خريف- و احيانا ربيع و لازم تجددهم كل سنة .. خاصة الاطفال حيث تتغير مقاساتهم فى ظرف شهور قليلة) .....لازم كمان تكون شايل معاك كمية كويسة من الدولارات لتغطية مصاريفك فى السودان (الذي اصبح اغلى بقعة فى العالم) و عشان تجامل هنا و هناك و تعطي المحتاج من اهلك ..يعني 10000 دولار بكل بساطة بتروح منك فقط في اجازة السودان .. احيانا كنت اقول لزوجي ..تعال نفتح للسودان و نمشي نصيف فى هونولولو و جزر الموريشس .. ح ندفع اقل ,, ونستمتع اطنانا اكبر :-)

الاخت smart-ana صادقة أنت فى ان مشكلتنا اننا نعمل و ندخر لتوفير حياتين هنا و ما نعتقد انه المستقبل فى السودان....كويس انك ما زلت متمسكة بشغلك .. لكن بالنسبة لي بعد ان اصبح لدي اكثر من طفل تمكن مني الياس .. هذا لا يعني انني لا افكر فى العودة الى العمل لاني اؤمن بأن اليد العليا خير من اليد السفلى ,, وأنا اؤمن بان المرأة يجب ان تبحث عن الامان الاقتصادي لنفسها و لاتعتمد على زوجها (اصلي من انصار "يا مأمن الرجال .... عارفة البافي طبعا :-) خاصة حينما يتقدم العمر .. ربما لذلك اشعر بضيق شديد لعدم عملي منذ فترة .. رغم انني اقدم الكثير لاولادي و تربيتهم و العمل التطوعي لهم داخل المدرسة ... لكن برضو هناك دائما Aching Question عن المستقبل المجهول.

----
معليش يا بريمة .. كتبت الكثير فى بوستك .. لكن الموضوع دة حارقني و الله .. تحياتي لام العيال و بختها عندها صاحبات و خلان بالقرب منها .. على الاقل لا تحس بالغربة التي اشعر ....... و كلامك صحيح .. اغتراب امريكا فيه الكثير من الجوانب المشرقة التجربة كلها بتفتح عيونك و عقلك على نظام متطور بكثير مما اعتدناه فى السودان او الخليج .. و التجربة نفسها بتخليك تصبح اكثر نضجا فى نظرتك لكثير من الامور و توزن الاشياء بميزان العقل و المنطق .. المهم الا ترفض المجتمع الامريكي تماما ,, خذ ما يعجبك فيه و احتفظ بما يعجبك من موطنك السودان ....
الله يهون

عن الرفاهية
مرة في الأسبوع نمشي النادي وندفع 10 دولار
ومرة في الأسبوع نمشي السينما وندفع 3 دولار ونشوف نفس الفيلم بتاع ال 10 دولار لكن بعد شهر من طلوعه (فارقة كثير؟؟؟)
نمشي البيش مجانا إلا حق المواصلات
نمشي البارك للعب الورق والرياضة والرحلات مجانا
معظم المتاحق مجانا
عروض فنية وموسيقيةعلي الهواء مجانا
مرة مرة يجينا فنان سوداني ندفع 40 أو 50 دولار
تمشي المكتبة العربية تشتري كم كتاب ب 20 دولار يمسكوك الشهر كله
مشترك في أكثر من 10 مكتبات عامة تسلف الكتب والافلام والمجلات مجانا
لو عملت ميزانية ترفيه وتثقيف ب 100 دولار أكثر من كفاية
ما لذ وطاب دي شملت الفواكة (مافي داعي للتفصيل عشان ما نثير بعض الكلام المادايرنو) والخضار واللحوم والدجاج (الباسطة بالعسل بعملها في البيت الصينية بتكلف 6 دولار) والجبنة والطحنينية ولبن حامض ولبن عادي وتمور، نعم نحمد الله عليها كثيرا ونتمناهنا لأهلنا في السودان يا كريم يا مجيب الدعاء
جزمة
Clarks
ب 80 دولار من إنجلترا ما كثيرة بتقعد 3 سنين بمزاج
جزمة إيطالية من الداونتاون آوت أوف فاشيون برضو ب 20 دولار لزوم القشرة
أزي زول في مدينتنا دي بيعمل 2000 دولار في الشهر بيعيش مستور ومبسوط. ولكن لو عاوز الشو قروش بل قيتس ما بتكفيه

Quote: عن الرفاهية مرة في الأسبوع نمشي النادي وندفع 10 دولار ومرة في الأسبوع نمشي السينما وندفع 3 دولار ونشوف نفس الفيلم بتاع ال 10 دولار لكن بعد شهر من طلوعه (فارقة كثير؟؟؟) نمشي البيش مجانا إلا حق المواصلات نمشي البارك للعب الورق والرياضة والرحلات مجانا معظم المتاحق مجانا عروض فنية وموسيقيةعلي الهواء مجانا مرة مرة يجينا فنان سوداني ندفع 40 أو 50 دولار تمشي المكتبة العربية تشتري كم كتاب ب 20 دولار يمسكوك الشهر كله مشترك في أكثر من 10 مكتبات عامة تسلف الكتب والافلام والمجلات مجانا لو عملت ميزانية ترفيه وتثقيف ب 100 دولار أكثر من كفاية ما لذ وطاب دي شملت الفواكة (مافي داعي للتفصيل عشان ما نثير بعض الكلام المادايرنو) والخضار واللحوم والدجاج (الباسطة بالعسل بعملها في البيت الصينية بتكلف 6 دولار) والجبنة والطحنينية ولبن حامض ولبن عادي وتمور، نعم نحمد الله عليها كثيرا ونتمناهنا لأهلنا في السودان يا كريم يا مجيب الدعاء جزمة Clarks ب 80 دولار من إنجلترا ما كثيرة بتقعد 3 سنين بمزاج جزمة إيطالية من الداونتاون آوت أوف فاشيون برضو ب 20 دولار لزوم القشرة أزي زول في مدينتنا دي بيعمل 2000 دولار في الشهر بيعيش مستور ومبسوط. ولكن لو عاوز الشو قروش بل قيتس ما بتكفيه

California is more expensive then most cities, and I do not see how you could get away with spending so little on cost of living. It really does not make any sense at all.

Quote: لحمة ب 30 دولار يعادل 15 باوند شوف دي كم حلة كيس بطاطس 2 دولار يقضي الشهر وتدفق الباقي خضارات 10 دولار سلطة 10 دولار بتقضي الشهر وتفضل

اصلو ما لاقتنى لحمة فى امريكا ب 2 دولار للباوند....
كيس بطاطس ب 2 دولار????? و الله دى الا امريكا تانيه
بعدين سلطة شنو دى اللبتقعد شهر فى التلاجه??
انتو شكلكم عزابه و ممشين اموركم....لكن ما ممكن يكون عندى اطفال و ااكلهم الشهر كلو بطاطس....
وين العصير و ين اللبن (جالون اللبن ب3 دولار بيقعد عندنا نصف اسبوع). وين الزبادى..ااكل اطفال طحنية??? و ين البيض وين السكر و الشاى و الصابون و الفاكهة و دى براها ميزانية.
لو عندك طفلين و عاوز تسوقهم و امهم مرة وااحده فى الشهر لمطعم (نص...نص) ح تدفع 60 دولار فى الشهر.

الغالية اوت كاست...اى واحده فينا بتمر عليها فترة بتكون محتاجه انها تقعد مع اطفالها شويه...الفرق الوحيد هو متين تعملى كده...ده قدرنا...اخترنا نكون full time امهات و برضوا full time منتجات (خارج البيت). ....بقرا فى كلامك و كانى انا اللى كاتباه (سبحان الله)

Quote: اصلو ما لاقتنى لحمة فى امريكا ب 2 دولار للباوند....

اسمارت عليك الله الكلام ده فى امريكا موجود للمعلوميه كيلو اللحمه
عندنا هنا فى السودان ما بين 5 لى 7 دولار للكيلو فهل الزول ده كلامو فيه اي نوع من المنطق ....

محسن

الدنيا لو الزول عاش فيها يشوف العجب .. يا خى الزول نصر ما يقول قاعد يجيب الأكل النافق .. صلاحيته منتهية وبس .. !!!

يا نصر زمان فى اليونان عندنا زملاء كانوا أولاد راحات وحكومة الأنقاذ وقفت التحويلات .. فى واحد من الجماعة القلوبهم حاره قال لازم الجماعة ديل نأكلهم لما يتم العام الدراسى.. عارف كل دروب أثينا .. درب درب .. الصباح من طيور الليل يركب الدراجة ويجرى لأضخم كوشة .. الأكل صلاحيته منتهية يضعوه هناك للهوم لس .. صحبك أصبح من ناس الهوم لس يملى صندوق كامل .. يعبى الثلاجة لما تقول بس .. مشى أمور الجماعة لما السمستر إنتهى ولقى الشغلانه قال نكتم السر الدنيا ما معروفة .. صاحبك ظل يتحاوم بمحل التراش لما خرج أخر واحد فيهم .. وكلمهم كلهم بالقصة .. وقال ليهم أى واحد يبقى على نفسة عشرة .. !!

(باوند) بتاع لحمة ب 2 دولار !!! .. قسما إلا الضلوع بتاعت الماعز .. goats' ribs

بريمة

تعرف يا بريمه

انا واحد من الناس بقرأ أى حاجه انت كتبتها
بشبع شبعة خريف ابو سعن وببقا مارق
الليله جيت اقول ليك والله ضحكت كما لم اضحك من قبل
وسعدت ايما سعاده بالحراك الموضوعي لمشاغل الحياه
في بلاد العم سام ...

ياااااخ انت زول سمح بالحيل
وربنا يحفظك

يمكن تكون بلدنا رخيصة شوية
ما في أسرة سودانية من 4 أشخاص بتتعدي ميزانية أكلها وشرابها 300 دولار في الشهر( بنتلاقي كلنا في دكان العربي)
لحدي السنة الفاتت كان باوند اللحمة عندنا ب 2 دولار و4 أكياس رغيف بدولار وكيس الفول بدولار
علبتين لبن كبار ب 4 دولار دستة البيض بدولار (دي حاجات ما بنختها في الميزانية)
من السنة الفاتت الحاجات أرتفعت شوية
الفواكه ب10 دولار لحدي ما ندفقها في التراش
7 كيلو برتقان بدولار كيلو تفاح ب60 سنت
العصير جايبين خلاطة بنعملوا في البيت
كرهتنا الأكل برا والأكل المعلب (لأسباب صحية)
كل أسبوع باربكي يو

بقول ليك محتاج لشوية إقتصاد منزلي والحاجات بتتعدل
ويا حبذا لو إستعنت ب
Financial Advicer

دى اسعار من محل اكل (عادى...ما فخم....و الناس الشغالين ظراف و بيشيلوا ليك الحجات للعربية...ابدا ده محل عادى جدا) و دى الاسعر
__________________________
لحمة بقر الباوند ب $3.99

Red Roma Tomatoes ...الطماطمايه الوااحده ب $0.47/each

البصل الاخضر Onions Green $0.99 ربطه صغيره

كيس البطاطس ب $3.99

الفلفليه الخضراء الواحده ب $1.15/each

اللبن ..الجالون ب $2.99


وتقول لى خضار ب 10 دولار فى الشهر ???

بريمة سلام جاك..


الغريبة انتا عايش
ومحمد موسى في المجلد برضو عايش..
وعمك حريكة في الخرطوم برضو عايش..

كلكم عايشين ..
بس اخوانك ديل عيشتم بي مجهود اقلا ..وقرف اقلا.. ونفسيات اقلا ..ومن العصرية تجي بشمو هوا نضيف..


الجابرك شنو؟؟
انما العبرة بالحياة..

يعنى نحن ناس السعودية ديل نخت فى خشمنا جزمة قديمة وننتكتم!
عندك ريال واحد فى جيبك تمشى على البوفية وتقول للهندى بتاع البوفية ادينا سندوتش بيض !
يقول ليك تبغى كل شئ!
سندوتش بيض مسلوق او اوملت معاهو جبنة شيدار وطماطم وخيار وخس ومايونيز وكتشب ولو داير سكر ذاتو ما فى مانع!
ولو عندك ريال واحد تمشى تشترى تمانية رغيفات وفتة عدس البيت كله ياكل لمن يعرق وتشيل الريموت فى يدك زى السبحة تتفرج فى القنوات شرق غرب لا ضرائب لا يحزنون!
وكمان تسكن ليك فى شقة حدادى مدادى يرمح فيها الخيل حوالى خمسة الف دولار بتوقيت واشنطن موش زى زى شقق امريكا الدولاب مركب فى الحيطة والسرير كله ادراج وسرير الدبل المدام تحت والراجل فى السرير الفوق!
ايووووى ايووووى !
وقسط العربية كان اخرتو تلاتة شهور ما فى انترست لانه حرام!
والسوق رخيص والمواصلات فاضية وما فى رجال ونسوان بعملوا فى حركات بايخة فى الشوارع!
اللهم نعمة احفظها من الزوال
جنى

Quote: بعدين سلطة شنو دى اللبتقعد شهر فى التلاجه??

نصر.... حاول تكون منطقى لنه انا وغيرى الما شوفنا USA ديل بنبنى
على كلامك ده فهل انت جادى فى الكلام بتاعك ده بالنسبه للاكل
والشراب والله ده فرصه سعيده الليله انه الواحد سمع من شخص زو خبره
من ناس USA طيب كويس ممكن ناخذ فكره عن اسعار العقارت والايجارات ..(فى اي ولايه انت)

تقريبا الأسعار عندكم الضعف عن عندنا
لأنو كاليفورنيا بتمد أمريكا بأكثر من 50 في المائة من الخضار فالخضار عندنا رخيص
وكذلك اللحوم والفواكة والدجاج

ودا سبب مهم ترحلي بيهو لعندنا
وبنلقي ليك الشغل والبيت


وكمية من البورداب الظريفين

(وخلي الجو الحلو طول السنة يكون بونص)

ooooooooooooooooops
نسيت اقول ليك انو دى اسعار كلفورنيا

الإيجارات ما رخيصة
ممكن تلقي شقة بغرفة واحدة معقولة في منطقة معقولة بدأ من 750 دولار وحتي ال900 دولار
والشقة بغرفتين من 850 حتي ألف وهكذا
الكهرباء رخيصة وكذلك الموية
ميزانية التلفون 50 دولار شهريا
إنترنت 20 دولار شهريا
عربية بنزين وتأمين حوالي 120
أدي العربية في السنة 300 للأعطال
إذا سكنت مع عزابة فأدي ميزانية السكن 300 والأكل والشراب 100
وإذا حرصت وصرفت بحساب ممكن تعمل شوية مدخرات

وبالمناسبة أنا خريج إقتصاد وشغل محاسب وأسكن في جنوب كاليفورنيا

Quote: نصر.... حاول تكون منطقى لنه انا وغيرى الما شوفنا USA ديل بنبنى على كلامك ده فهل انت جادى فى الكلام بتاعك ده بالنسبه للاكل والشراب والله ده فرصه سعيده الليله انه الواحد سمع من شخص زو خبره من ناس USA طيب كويس ممكن ناخذ فكره عن اسعار العقارت والايجارات ..(فى اي ولايه انت)

loooooool
محسن

مرات تموت الزول بالضحك ..

بريمة

بسيطة يا بريمة
رسل لستك مريم الصادق تشوف ليك وظيفة في شركة ابوها قسم الجنجويد

موش قالت الجنجويد حقنهم؟

Quote: أنا محبط إحباط شديد من أمريكا .. بعد دا إلأ الواحد يهاجر للقمر عدييل!

او امشي الصومال

بالتوفيق

Quote: ( جزمة واحدة محترمة من إنجلترا )يازول إنجلترا مره واحده طيب كده ما خربته التوفير بتاعك

ياك الما عرسته .. جزمة واحدة بس !! .. وبدله ب 50 دولار!! .. ما تقول جايبها من ال Thirft Store


بريمة

Quote: بسيطة يا بريمة رسل لستك مريم الصادق تشوف ليك وظيفة في شركة ابوها قسم الجنجويد موش قالت الجنجويد حقنهم؟ Quote: أنا محبط إحباط شديد من أمريكا .. بعد دا إلأ الواحد يهاجر للقمر عدييل! او امشي الصومال بالتوفيق

لا سمح الله أمريكا دى مسجلة بأسم الجماعة البكرهو سيتى مريم ولا شنو!!

ولا أنت مدافع عن صحبك الضاربها كلها عدس 12 شهر ..

نصر وقع .. معاى وقعة !!

بريمة

Quote: او امشي الصومال بالتوفيق

إيش معنى الصومال بالتحديد !! .. أنا أخترت القمر ..

وبالله تورينا زعلان كده ليه .. الما عجبك شنو .. يعنى لازم أمريكا تكون هى جنة الله فى الأرض ولا شنو ..

يا أخى نحن قاعدينا نفرق هموم الدنيا .. بالله ما تزيدها فينا ..

بريمة

والله يا جماعة ولض أبا بريمة شكلو حساباتو فارقة بالجد ما دام حسبة ليكم بالسنتات معناها الشغلة دي وصلت اللحم الحي .. أعانك الله غايتو ..
والله يا بريمة لو تصدق كلامي دة واللا ما تصدقو بلدكم دي في ناس كتار رانكرات ساي لا قروا لا باروا الطلبة عملوا منها قروش زي الرز الله يزيدم ويدينا
زيهم ولا يجعلنا لهم من الحاسدين وزي ما قال الأخ تاج السر تندعك وما لازم تتفشخر وتجخ عيش على قد حالك واترفه في حدود المعقول وأمورك
بتمشي إن شاء الله ..

تحياتي

ول أبا بكرى

الأديب تاج السر .. قال لازم نكون creative والله أخوك بعد دا إلا يكون طرازان عدييل .. عشان الناس يعرفوا هو وصل فى الكريتفتى لحد وين.

يا أخى دى بلد منحوسة.

بريمة

..
.
يلا يا شباب ناس الساحل الشرقي باليمين
وناس الساحل الغربي بالشمال والمزارعين فى النص ..

دايرين واحد يجى يقدم بربوسال للمتوسط بتاع دخل الفرد
والمصروفات من لبن اسمارات انا لناس الترفيه ..


___________

ناس البزنيس ما معانا ولا المهاجرين
القدامى يعنى الراكزين ورونا بس الموظفين
وناس البيتزا دلفرى التكاسه وبالكتير موظفى الشركات

فيرى انترستنغ والله المقارنات دى :)

Quote: خبز عربي ب 10 دولار بمعدل 6 عيشات في اليوم فول مصري ب 10 دولار وذلك يعني 10 حلل برستو فول عدس ب 10 دولار برضو 10 حلل لحمة ب 30 دولار يعادل 15 باوند شوف دي كم حلة كيس بطاطس 2 دولار يقضي الشهر وتدفق الباقي خضارات 10 دولار سلطة 10 دولار بتقضي الشهر وتفضل جبنة 6 دولار أكثر من 2 باوند طحنية 2 علبة ب 6 دولار مربي 2 علبة ب 3 دولار فواكه وحاجات متنوعة بباقي المية

الأخ نصر والله حقو تفتح لينا محل هنا في الديسكشن بورد دا... أضمن ليك ناس امريكا و كندا ما يشتروا من زول غيرك. الظاهر بلدكم دي رخيصة بصورة ما عادية ولا إنت ما قاعد تعمل الشوبنق و ما جايب خبر ساكت. مثال بس الخبز العربي بمعدل ستة عيشات في اليوم دي يعني تلتين كيس الكيس عندنا في المخبز مش في المحل ب 1.75 دولار يعني الحسبة للشهر 52.5 دولار. حول لي امريكي بالضرب في 0.8 يعني 42 دولار... يعني أربعة أضعاف المبلغ الذكرتو يا نصر و دا تقريبا بينطبق على كل البنود الذكرتها.
تحياتي يا بريمة.

يا محمد عباس بالله بطل مبالغات....والله أسعارك دي ولا في الحلم....ما تطمع الناس يقوموا يجوا هابرين علي كاليفورنيا ساكت....التقول الواحد ما ساكن معاكم....تحياتي

راشد

ألأخ بريمة سلامات
متابع معاك وخاصة تعليقات الأختين (Iam family man, with 2 young ones)
نشوفكم بكرة فقد انتصف الليل عندناو بكرة شغل

..
و خليك من كلام (الدواس) ياخوى

التحية للأختين

أسامة سعد
Wisconsin

سلام يا محمد" نصر "

نفهم من كدا إنّو البدلة الجميلة و راقية اللقيتك " قاشر " بيها يوم زواج لمياء عبدالرحن أبو الروس و ياسر الباكستاني، إشتريتها فقط ب 50.00$ فقط. ( وجه ضاحك )
يا جماعة أنا من سكّان جنوب كاليفونيا، و أبصم جادّا بالعشرة علي كلّ كلمة قالها الأخ محمّد عباس. و اذهب ابعد من ذلك بأنّ اسعار الفواكه و الخضروات تصل أخيانا أقل كثيرا من الارقام التي اوردها الأخ محمّدز>. يعني مثلا البرتقال اخيانا بيصل سعره لثلاثة وثلاثين دولارا، و احيانا أقلّ من ذلك

طارق الفزاري
ود زينب

Quote: مرة كانت قاعد في مطعم في السوق الشعبي الخرطوم أستمع لإثنين من تجار السوق الشعبي يتونسوا. واحد قال للثاني (دخلي الحمد لله كويس لكن تصرفاتي كثيرة) الحكاية ما أمريكا ولا السودان ولا القمر الحكاية ما جغرافيا الحكاية إقتصاد والمشكلة في التصرفات الكثيرة

مع أنو نصر ضحك علينا كتير .. لكن الحته دى بالجد عجبتنى ..
واحد فى منطقتنا فى رستون .. أسمع عن قصته كثيراً .. "جيب" ذى نصر دا .. أول ما يشتغل يشوف أقرب عذابه لمحل شغله ويرحل معاهم .. الزول عشرة سنوات ما أشترى سياره عشان يمشى بيها الشغل .. ماشى كدراى .. عشان يوفر حق الرخصه والبنزين، وسعر العربية، وأوراق العربية ..

بالجد الزول عمل عمارة ثلاثة طوابق .. لكن قصته ما تسمع بيها إلا فى كتاب البخلاء للجاحظ.


------------
طارق لكن مسحت بنصر الواطا .. أرجو تصحيح سعر البرتقال .. 33 دولار دى لشنو؟

بريمة

برضو الحته دى من تبلدينا بالجد رائعة ..

Quote: انت امريكا دى ما فري كنتري نسواكم ديل ما يتعصرن معاكم فى الشيرنغ بتاع المصاريف دى .. غايتو انحنا هنا دا بقت لو ما شغاله ما بتقسم ولو كانت نؤوم الضحى ما بتغطى وعاطله ما بتجيب حقها .. معادلة ثابته

لكن حوار الأخوات أوت كاست وأسمارت أنا .. أوفى جوانب هذه المعادلة بصورة مقنعة .. وجود الزوجه مهم للأطفال .. ما عندنا لا حبوبات لا جدات .. والبلد كلها حرامية وإنتهازيين وشواذ.

بريمة

قبل من نجيكم بأسعار الساحل الشرقى فى الولايات المتحده

شاركونا همومنا بتاعت السودان .. هموم والله من عينة اغرب مما يحصل لنا فى أمريكا ..

هل تصدقوا نحن فى أمريكا ومتابعين أخبار المطر فى كردفان .. وكيف أخبار الخريف فى خور أبو حبل (الوادى كجار) وناس جنوب كردفان.

الخريف لو مانزل والموسم (ضرب) أكون أنا فى صداع مزمن ..

أقل حاجة (أنضرب) 5 ألف دولار فاتورة الدخن والفتريتا ..
تلقانى طوال الموسم أنا متابع السحاب شال ولا ما شال ..
المطر نزل ولا مانزل ..

وحاجة تانية .. خور أبوحبل ما يفيض زمن الحرث .. لأن كده المزراعين ما ح يزرعوا والموسم برضوا ببوظ.

ولو غير الخور مجراه .. أنا فى مشكلة مزارع البطيخ والطمام .. ح تفسد عن بكرة أبيها ..


بالله شفتوا البلاوى ككيف؟

بريمة

فساد موسم الخريف .. يجر مخاوف تانية ..

ما نسميها بالضرب المزدوجة .. "دبل حت" Double Hit
و"دبل حت" دى ناس أمريكا بعرفوها كويس ..

الطائره تكون فى الجو .. فى بعض الأحيان تمر الطائر بسرب طيور ..
ويدخل طائر فى محرك الطائرة .. تسمى Hit ضربة ..

لكن من الغريب أن يحصل للطيار أن تنضرب طائرتة فى المحركين فى نفس الزمن Double hits
حصل قبل فترة .. والطيار بجداره هبط فى مضيق هدستون جوار نيويورك

الأن الراجل .. celebrity من المشاهير .. أصبح بطل قومى.

وشخصى .. مرات كتيرة بطل لكن لم أجد أى قومية ..

الخريف يقطع فى كردفان عامين متتالين أو لإحد الأسباب السالفه ..

يكون أخوكم أنضرب مرتين .. Double hits

شفتوا مرات الأبطال القومين مغمورين ككيف؟

وهناك مئات من الأبطال ذى دا لكن ماكلينها وساكتين.

بريمة

..

Quote: طارق الفزاري ود زينب

مشتاقيين يا حبيبنا
وينكـ من شهور ..
غايتو لو دا مستوى معيشتكم
والله انتو فى نعيم ..
طيب الناس متكبه فى نيويورك وفرجينيا فى شنو ؟؟
ما يمشواالرخاء دا

__________

وانا اقول عاصم عايز يشترى شقة فى LA فى شنو ؟؟

Tabldina


Virginia and Newyour most of the people here


Low income and section 8


three bed rooms $400 only

and some times Free

Galal

جلال الدين

سلامات .. مشكلتى أنا وأوت كاست وأسمارت أنا .. ليس من ذو الدخل المحدود البتتكلم عليه أنت .. المشكلة الدولة تشيل من القليل القاعدين نجنوه بشق الأنفس وتديه للجماعة النايمين ساكت ..

بريمة

Quote: والبلد كلها حرامية وإنتهازيين وشواذ.

كيف كنت عايش وسط هولاء طيلة الفترة الماضية ؟

دينق

Quote: طيب الناس متكبه فى نيويورك وفرجينيا فى شنو ؟؟ ما يمشواالرخاء دا

رخاء شنو يا زول
ديل زلزال واحد يجيب خبرك
في زول نصيح يمشي يسكن مع المكاسيك ديل

كلفورنيا دي نحن ما معتبرنها في أمريكا زاتو

دي ولاية حاكمها بتاع سينما مهاجر, ما بعرف يتكلم إنجليزي حتى, و كمان جمهوري,
ولاية فيها البنقو مفروش في زنك الخضار و بالقانون كمان
و حاجات كتتتتتتتيرة

زلازل بس?
زلازل و فيضانات (و جفاف) و حرائق...و mudslides
و كمان غاليه.... اتخيلوا state sales tax حوالى 8.25% و لما تخت عليها ال local sales tax بتبقى % 10.25%
يعنى كلما تشترى حاجه ب 100 دولار بتدفع فوقها 10 دولارsales tax
_________________________________
لكن بتستاهل ده كلو

يأ إسمارت أنا، سلامات

حكاية الزلازل دي انا تطرقت ليها في ردي أعلاه لكوستاوي " الخردة.


الفيضانات دي نادرة الحدوث عندنا. أما ال Brush Fire فدي مغامرة دخل فيها بعض الأرستوقراطيين في كاليفورنيا اللي بيبنو منازلهم في مناطق جبلية يوجد بها غطاء بناتي كثيف, و معرضة للبرش فير بشكل دوري. لكن هؤلاء المقامرين و المغامرين لا يتعظون. نحن سكان الأراضي المستوية ربنا معانا" وجه ضاحك لكنه غير شامت " .
و صحيح نحن ال State Sale Tax تبلغ حوالي ال 8% فقط، لكن ما عندنا حاجة إسمها الlocal State Tax

إنت حاسدانا ساكت في معيشتنا.


ربنا يخلي ليك أطفالك و زوجك

طارق الفزاري
ود زينب

كوستاوى

Quote: رخاء شنو يا زول ديل زلزال واحد يجيب خبرك في زول نصيح يمشي يسكن مع المكاسيك ديل كلفورنيا دي نحن ما معتبرنها في أمريكا زاتو دي ولاية حاكمها بتاع سينما مهاجر, ما بعرف يتكلم إنجليزي حتى, و كمان جمهوري, ولاية فيها البنقو مفروش في زنك الخضار و بالقانون كمان و حاجات كتتتتتتتيرة

يا كوستاوى دا كلام عنصرى .. وح أكلم ليك اللاتين ..

شيل شيلتك ..

بريمة

كيف الكلام البتقول فيهو دا يا خردة؟

صحيح عندنا زلازل لكن ما بالمستوي المرعب المتداول بين الناس. اخر زلزال سبب صخايا كثر كان في سان فرانسيسكو في سبنعينيات القرن الماضي. هسع المنازل كلها مبنة من أساسها بتقنية مستحدثة تقي من لآثار المرعبة لوقوع الزلازل.
و يا خردة، كيف الكلام العنصري "و جه ضاحك " البتقولو دا عن المكاسيك؟ ديل أصحاب البلد الاصليين بعد " الهنود الحمر " أما تعلم ان كالفورنيا حتي عام 1815، علي ما أظن، كانت تابعة للمكسيك؟ و قد قامت ألإدارة الامريكية بتسيير جيش و خوض حرب ضد المكسيك، و ضم ولاية كاليفورنيا للولايات المتحدة الأمريكية؟ ولولا المكاسيك، و خاصة المقيمين بشكل غير قانوني منهم لما كانت أسعار الخضروات و الفواكه رخيصة للحد الدي نعيشه الآن.
بس "بأ: انا ما بختلف معاك في حكاية شوارزي(.........) دي. ربنا يكون في عوننا من جانبه؟ لكنها سحابة صيف و
بتعدي. كلها أيام و نتخارج منه.
أما حكاية النبقو دي فبالغت فيها تب. يعني فرجينياك دي مافيها الحاجات دي يا خردة.د؟
Wake up ya khurda, this is America


و إضافة لطقسنا الأجمل، نحن كمان بنمتاز عليكم بنسبة الجمال العالية وسط بناتنا. و كمان معظمهن شقراوات و جميلات يسرن الناظرين. و علي النقيض، قيل لي ان بناتكم شينات ..... الخميرة في العجين" وجه ضاحك "
و نحن كمان عندنا هوليوود. و اقتصادنا هو الأول في اليو إس أي، و السابع علي المستوي العالمي. و لولانا
لكنتم تتسولون العيش " وجه ضاحك "

طارق الفزاري
ود زينب

كيفك يا صالح؟
عمر الشقي بقي
سمعنا إنك بعد ما طلقت الخليج و عدت للوطن الحبيب أصبحت من أصحاب الاعمال، و قفلت لفكرة الهجرة للغرب. " و جه ضاحك "
أكرر" الشدة و حرف "الزال" لم يعودا يعملان في كي بوردي، لزا سأستغني عن الشدة و أستعير
حرف الزين في محل حرف " الزال " : كل ما زكره الأح الصديق محمد عباس سحيح. بل أن أسعار الخضروات، الفواكه، اللحوم في البقالات الشرق أوسطية و اللاتينية قد تتدني أسعارها بشكل كبير و في أحايين كثيرة عن القيم التي أتي بها الأخ محمد عباس " Nasr ". و زي ما قال محمد: كاليفورنيا هي سلة غزاء أمريكا. أكثر من نصف أحتياجات أمريكا للفواكه و الخضر " عدا البطاطس التي تنتج في ولاية أيدهو " تأتي من ولاية كاليفونيا. و طبعا لابد أن تكون عندك إستراتيجية زكية للشوينق كل محلات الفواكه و الخضر بيكون عندها
يوم واحد في الأسبوع محدد لل Sale . وقت زهابك لتلك المحال في زلك اليوم. و من المستحسن ان تمر علي إثنين أو ثلاث محال متجاورة لبيع الخضر و الفواكه في اليوم الزي يصادف ال sale في أكبرهم حجما، مرة كل اسبوع. و لا تتردد في شراء item تجده رخيصا بشكل معقول جدا في أول محل تزوره و تغض النظر عن شراء
item اخر أرتفع سعره في زات المحل، علك تجده رخيصا في المحل الاخر الزي تفكر في زيارته لاحقا.
أما الملابس فتحري فيها أيضا الsale وتحاشي ال Big Name Store . ذيل طبعا ال overhead بتاعم مرتفع و بينعكس بالتالي علي اسعار معروضاتهم. و الsale في تلك المحال بيكون دروي: مرة في الاسبوع، الشهر أو نصف الشهر, و العاملون في تلك المحال لاا يترددون عن إخبارك بتاريخ ال sale المقبل. و خلافا لما قال الأخ بريمة: السودانيون يأنفون من شراء ملابسهم من Goodwills و Thrifty Store . أنا إشتريت قبل أيام قليلة أقمصة في غاية الشياكة بأسعار تترواح بين سيعة لخمس دولارات للقطعة. و إشتريت بناطلين صوفية مصعنوعة في أيطاليا بإثني عشب دولارا,، و كمان إشتريت بدلة من صوف الكاشمير بنسبة 100% مصنوعة فيب ايطاليا بمبلغ
100$.
و أي إنسان بيكره البرد القارس و الجليد و بيبحث عنن تكاليف معيشة رخيصة داخل اليو أس أي انصحه بالهجرة لجنوب ولاية كاليفورنيا. بس كمان يا " تبلدينا " أنا لا انصحه بشراء عقار. العقارات عندنا مرتفعة
الأسعار، اما الايجارات فمعقولة جدا. نحن أربعة من الاصدقاء السودانيين ساكنيين في شقة نظيفة من غرفتين و
بها حمامين، و غرفة جلوس وهيطة و مطبخ يوجد به بوتوقاز و مغسلة أواني و jقع داخل ما يعرف ههنا بال
Gated Community Appartments في حي سكني امن و جيراننا " حلوين : - زي ما بيقولو المصريين، و بدفع فقط
1,100.00$ في الشهر. الان إيجار شقة مشابهة في زات ال Complex إرتفع ل 1,200.00$ شهريا و لم يشأ صاحب العقار ان يرفع إيجارنا الشهري لقيمته الجديدة.
و طبعا يا " تبلدينا " أن لا أنصح صاحبك عاصم أو غيره من خلق الله ان يشتري عقارا في كاليفورنيا و بالزات في الوقت الراهن لانو العقارات أسعارها مرتفعة في كاليفورنيا. فقط أنصحه و غيره بالأيجار. و طبعا الخطوة الأولي لكل من يرغب في الغنتقال لجنوبي ولاية اليفورنيا إزا كان يقيم داخل اليو إس أي ، خاصة إزا كانت لديه أسرة، أن يبحث أولا عن عمل، فإزا وجده بالشروط التي يرغبها أو قريبا منها، فليفكر إزن في إستجلاب
زوجه و أولاده.
أنا عندي رخصة لبيع العقارات في ولاية كاليفورنيا لكنني لم أستغلها حقيقة في كسب عيشي. كنت تحت التدريب في اول شركة عقار التحق بها حينما كان سوق العقار في كاليفورنيا في أوجه و سعر الفائدة في أدني مستوياته. و كان مالكو العقارات يتوافدون باعداد كبيرة لمحلات العقارات بغرض إعادة تمويل العقار الزي يمتلكونه بسعر الفائدة الجديد المنخفض " Refinancing " . وفي >ات الوقت كان هنالك مقيمون في الولاية يرتادون محلات بيع و شراء و إعادة تمويل العقارات السكنية بغرض الحصول علب منزل جديد. الامانة تقتضي من أمثالي العاملين في سوق العقارات أن اصرف أنظار الكثيرين الراغبين في شراء عقار جديد
لكنهم/ن غير مؤهلين له عن الدخول في تلك المغامرة الوخيمة العواقب. وأنا زول عندي clear conscious
فطبعا كنت في الحالات دي لا اتردد في كشف تلك الحقيقة و احيانا بصوت عال إزا وجدت شيئا من المعاندة من قبل المقبل علي الشراء إزا كان غير مؤهلا. لكن مدير المكتب لم في الشركة الأولي التي إلتحقت بها لم
يقبل بطريقتي النزيهة في التعامل مع العملاء، فقام بفصلي. يوجد كم كبير من المقبلين علي شراء عقارات للمرة الأولي غير مؤهلين ماديا لسداد ال mortgage الشهري " The Premium plus the Interest ". كان مدير المحل يحضني بالإكتفاء بشرح تفاصيل القرض، including the monthly mortgage , و أن أضع الحقائق أمامهم دون إستفاضة. يعني اخليهم براهم يصلوا للحقيقة المرة دي من واقع المعلومات التي أوضحتها لهم. كان بيحضني أن أقول لهم: These are the facts of the loan, and it is up to you to decide whether or not to go for it . لم يعجبني زلك التكنيك الزي يستخدمه أصحاب مكاتب العقارات، فقدمت أستقالتي من زلك الممكتب. و حدث زات الشيئ في تجربتي الثانية مع مكتب عقاري اخر. و لان أنا لا أمارس تجارة بيع العقارات. و كنت سمععت من كثيرين عن حرمة العمل في سوق العقارات باليو إس أي لتعاملهم بسعر الفائدة العالية، التي تكون في مقام التعامل بالربا في الإسلام. ما رأيك عزيزي القارئ في زلك؟

لزا أنا انصح الاخت: outcast بالنظر مليا في شروط قرضها، و ألقيام بالإحتياطات اللازمة قبل أن تضطر لعمل
Foreclkosure تفقد بموجبها منزل أسرتها الصغيرة و تفسد تاريخها الكريديتي، حتي لو إضطرهاالأمر للعمل
بارتايم to suppliment the income of her partner in life .

طارق الفزاري
ود زينب

أكرر الإعتدار لخلو نص مشاركتي أعلاه من " الشدة " و لكتابتي حرف :"الزال " زينا، بسبب مشكلة ما في كي بوردي

..
.
يا كوستاوى ..
يا زول الناس ديل ما قالو زلزالهم مره كل 10 سنوات
الباقى داك جكه خفيفه ..
بعدين فى ذمتكـ اللاتين ديل ما احلى من الافريكان الحولك ديل :)

Quote: بس كمان يا " تبلدينا " أنا لا انصحه بشراء عقار. العقارات عندنا مرتفعة الأسعار، اما الايجارات فمعقولة جدا.

اها يا فزارى والكالفورنيان دى بس فهمونى ليها
معادلتكم دى زى السودان الازمة فى السماء فى كل العالم نحن عقاراتنا تتفوق على
اسعار نيويورك ولوس انجلوس وارتفاع فى الضرائب!!؟
وكمان دى

Quote: و طبعا يا " تبلدينا " أن لا أنصح صاحبك عاصم أو غيره من خلق الله ان يشتري عقارا في كاليفورنيا و بالذات في الوقت الراهن لانو العقارات أسعارها مرتفعة في كاليفورنيا

يا جماعة ما سمعنا الفيلل السعرها 400 الف $ بقت بـ 150 الف $ ..
اها خلو خلق الله تستثمر يمكن الازمة تتراجع .. ويبقي ليهو دخل معتبر

Quote: و لان أنا لا أمارس تجارة بيع العقارات

طلعت ما بتاع بزنيس يا ود زينب
دى فرصة التفاتيح كان تكب مالك كلو فى العقارات وتنظر معالجات
اوباما والله كنت بقيت ترامب السودانى

____________

يا جلال بس خبرتى المتواضعة فى بلدكم ديك
سكشن 8 دا الا تشرحو لي .. نظام معونة ولا حاجة

الأخ الكريم بريمة:

إنت زول لبيب و أكيد فهمت إنو المقصود: 33 سنتا
أسف للخطأغير المقصود

طارق الفزاري
ود زينب

Quote: لكن بتستاهل ده كلو

إنتوا معانا ولا مع الخيانة

هسع بندق ليكم فيزة مغادرة بدون عودة
____________________________________
نحن بس محتلين مع أوباما دا

طارق الفزاري سلامات

Quote: و صحيح نحن ال State Sale Tax تبلغ حوالي ال 8% فقط، لكن ما عندنا حاجة إسمها الlocal State Tax

راجع الرابط ده http://en.wikipedia.org/wiki/Sales_taxes_in_the_United_States
و فتش كلفورنيا

Quote: إنت حاسدانا ساكت في معيشتنا.

حاسداكم???يا ريت...انا معاكم فى هم كلفورنيا ده

Quote: ربنا يخلي ليك أطفالك و زوجك

شكرا...ويخلى ليك اسرتك
انا ح اقول حاجه لكن ح تكون شويه Controversial
محلات العرب و اللاتينو د ى زحمة و ما نظيفه جدا...و القروش اللى ح اوفرها فيها ما قدر الوقت اللى ح اضيعه بحثا عن محل وsale.

Quote: هسع بندق ليكم فيزة مغادرة بدون عودة

Kostawi
لو كان عندكم مهندسين شاطرين ذينا ما كان اديتونا فيزا من الاول

Quote: و بالزات في الوقت الراهن لانو العقارات أسعارها مرتفعة في كاليفورنيا

بالعكس تماما ده انسب وقت الزول يشترى فيه بيت....اسعار البيوت فى الارض...و ما اظنها تنزل اكتر من كده...

طارق

Quote: غطاء بناتي كثيف

والله مرات بتبالغ فى نوع الخطأ ..

بريمه

مهندس بريمة
سلام
تعبتني تعب
اقرا من صبحت
واموت من الضحك
المهم نورتونا وثقفتونا

اعتقد الحال من بعضه
امريكا دي في الصور ما شفتها
لكن حكاية المنصرف بيزيد مع زيادة الدخل

اها انا من الناس اللي اتغشوا وجوا السودان سنة الفين
غايتو مرحلة كانت وما زالت صعبة جدا


كميات من الحر والتراب والفلس
والامراض وعدم التعليم الجيد وانعدام الحريات العامة والخاصة
ومسئوليات بيتية واجتماعية تنسيك احساس الحياة ذذاتو
ولكن رغم كل شيء نضحك ونامل بكرة احلى

وبعد كلامك دة كلو ساكين اللوتري
على الاقل الاولاد بقروا كويس وبنعيش في حتة نضيفة والباقي على الله

تحياتي
صفية

الأستاذه صفية

Quote: مهندس بريمة سلام تعبتني تعب اقرا من صبحت واموت من الضحك

العتب على أمريكا الورمتنا الوردم دا كله .. وتصدقى وتأمنى القصص دى بتصرف شديد ودا القابل للنشر ..
وأسمعى دى من حكاوى أمريكا التسويها فينا ..
جاء زملانا بعد يوم متعب .. وعملوا لهم صحن فته .. واحد فى أثناء ما بيعملوا فى الأكل نام ..
وهم عارفين أنه جعان عينه طالعه .. وبرضو عارفين أنه تعان منتهى ..
قام واحد هبشه براااااها عشان يشوف مستوى النوم بتاعو
صحى وجاء قعد يأكل وهو مغمض عيونه ..
إذا حاول الجماعة أن يتحدثوا يقول ليهم .. أسسسس
الجماعة سكتوا .. أكل لب لب بسرعة ودخل نام ..
بعد ما صحى .. سألوه . تأكل ومغمض .. لو أكلت ليك حشره ..؟
قال ليهم "أنا كنت ما عايز كلام وماعايز أفتح عيونى عشان عندى نومه ما تطير !!".
أتخيلوا بيأكل وعايز نومته ما تطير ..

وأنت بموضوع اللوترى دا شكلك ناويه على الراجل .. المسكين شايف الراجيه قبل ما يجينا ..

لكن بالتوفيق .. لكل إنسان تجربته فى الحياة .. على الأقل موت الكتيره عرس .. ذى ما يقول أهلنا الغبش.

تحياتى

بريمة

مرحب بيك دائما يا إسمارت أنا

بالرجوع لرابط ويكيبيديا الٍِِِْْزي:( معليش ما يزال مفتاحي حرف "الزال " و الشدة شلا يعملان عندي، و سأستمر في إستعمال حرف الزين في مكانه ) تفضلت به أعلاه، أود أن ابين بعض الحقائق لك و لقراء : "هزا" الخيط السايبيري.
أنا طبعا " زكرت " إنو الإستيت تاكس بتبلغ حوالي 8.00%، و طبعا الآن تأكد أنها تبلغ عل يوجه التحديد:
8.25%. و الحاصل إنو حدثت زيادة في الإستبيت تاكس مؤخرا رفعتها للنسبة التي أوردتها أنت علي وجه الدقة بحسب الرابط " الزي " دعمت به حيثيايتك.
و لا أظنه يخفي عليك ان الState Tax is very selective , و لا تسري علي الخصر، الفواكه، الألبان و اللحوم.
و أنت محقة في وجود ما يعرف بال Local State Tax علي مستوي القطر الأمريكي لكنها تضاف للإستيت تاكس
في حال شرائك بعض السلع غير الاساسية كالسيجائر و الكحول.
و صحيح إنو محلات العرب و اللاتينو مانشيفة جدا، لكنها ما تزال في مستوي طيب لا يضر بصحة زبائنها لكونها تخضع للتفتيش الصحي و تسحب من اصحابها رخصهم/ن " إزا " لم ترق محلاتهم/ن للمستوي الصحي المطلوب.
و زحمة محلات العرب و اللاتينو لا تكون في كل الأوقات أو في مستوي يمنع من إرتيادها.
و كما " زكرت " الSale يحدث في ايام يعرفها زبائن تلك المحال الدائمين، يبقي مافي " إزن " وقت بيضيع سدي.
و مرة أخري ربنا يديم عليك و علي زوجك و أولادك العافية

طارق الفزاري
ود زينب

California
At 8.25%, California has the highest state sales tax, which can total up to 10.25% with local sales tax included.[12] Sales and use taxes in the state of California are collected by a publicly elected tax commission. The statewide 8.25% is allocated as:[13]

8.25% - State
5.00% - State - General Fund
0.25% - State - Fiscal Recovery Fund
0.50% - State - Local Revenue Fund
0.50% - State - Local Public Safety Fund
1.00% - Uniform Local Tax
0.25% - Local County - Transportation funds
0.75% - Local City/County - Operational funds
On April 1, 2009 the state sales and use tax increased by 1% as a result of the 2008-2009 California budget crisis. The minimum sales tax statewide is 8.25%.[14][15]

Kostawi
this is for you
http://www.youtube.com/watch?v=eSM27eDO69w

الأخ عزان
سلامات ..

Quote: المشكلة هنا إنو الناس عارفين إنهم إتغشوا بس غالبهم يعترفوا وخجلانين يرجعوا تحياتى

طيب ناس البورد فى أمريكا .. مش على الأقل ينوروا الناس البرا .. من باب مالا ترضاه لنفسك لا ترضاه لغيرك ..
وعلى الأقل الناس البر يحكموا توقعاتهم .. وما يتفاجعوا .. حينما يحضروا.

أظرف حاجه فى أمريكا أعجبتنى بالجد فكرة المطاعم المفتوحه .. Self service تخش المطعم وتدفع سعر ثابت ..
وبعد داك تحوم المطعم الفيهو تلقى حتى لبن الطير ..

أنا ما خلت أخطبوط أو كربه أو أم قبرين .. حايمه إلا جربتها حتى لو من باب الذواقه ..
المدام لما جات كنا نقعد فى كراسى متقابلين بظهورنا .. عشان ما تشوف (اللغاويس) الأنا قاعد أكل فيها ..
فى النهاية هى ذاتها بقت تقع فى حاجات أنا كنت أقترب منها بتصرف ..

الببئة الجميلة .. والنظيفه .. شيئ أخر يلفت الأنتباه .. حيوان الجربوع Squrrel حايم بمزاج وسط الناس
فى كردفان لو ليقيناه والله يطعله مننا الشديد القوى .. سك سك نص النهار نقضوه معاه ..

معرفة التعامل مع الأخر .. قبل كده المدير بتاعنا واحد هندى من السيخ .. عنده عمامه لونها
أحمر فاقع .. أنا زهجان منها زهج .. أقول ليهو ممكن بس تغيرها بألوان هادئه شويه .. يقول This is my religion

هناك الكثير لكل إنسان .. محبى المسرح والفن والسياسة ونشطاء حقوق الأنسان والبيئة .. يعنى أنت لو بقيت شيطان أحمر
تلقى شياطين أحمر من لونك ..

المهم فى كل هذا يعرف الأنسان القادم هو بالضبط عايز شنو من أمريكا .. كما قال الأقتصادى حسين نوباتا ..

تحياتى

بريمة

up

و الله الخيط دة بقي جميل جدا ....
الاخوان Nasr و طارق الفزاري (ود زينب)

أعتقد ان جنوب كاليفورنيا ارخص بكثير من شمالها. أعتقد ان الاخت سمارت-انا هي من مواطني شمال كاليفورنيا (اقرب لسان فرانسيسكو و سان هوزيه) و هي من المناطق الغالية جدا مقارنة بكل امريكا.
كنت اسكن هناك حتى وقت قريب ,, والله ما في اجمل من عيشتها رغم الغلاء .. بالي كان اروق بكثير ,, وكذلك الاطفال كانوا اكثر استمتاعا بالمنطقة .. و التنوع العرقي و الثقافي من اجمل الاشياء فيها ..
--
سمارت انا: كلامك صحيح:
اللحم الضاني 4.99 للباوند
اللبن 2.99 للجالون (نستهلك جالونين فى الاسبوع)
الجبنة البيضاء 7.99 للعلبة (اسبوعين)
البصل 2.499 لباوند
وهناك ايضا بند ال cereal وهو بند مهم للكبار و الصغار
اما لو عندك عيال مثلي : فهناك شى اسمه الsncacks
مضيعه كل فلوسنا و ماخدة نصف الشبونغ مثل الريتز بيتس و ال cheetos
و اليوقرت بانواعه و كل انواع الcandy
---
الاخ Nasr : حقو ارسل ليك زوجي عشان يتعلم منك التوفير .. رغم انه بيتهموا المرأة بالتبذير .. لكن اعتقد ان المرأة اكثر قدرة ووعيا بالتدبير ...
الاخ ود زينب ,, موضوع الrefinance فيه الكثير من الالاعيب و المشكلة انه الدبوس حصل و مفكرين جديا فى بيعه .. هذا اذا كان الممكن فعل ذلك .....
---
بالمناسبة :: قد جربت عيشة السودان .. غلاء و تكاليف مدارس باهظة بدون مستوى و برنامج صعب للغاية .. لكن مشكلتنا كما قال آخرون هنا .. امريكا يجب ان تكون مهاجرا فيها .. وليس مغتربا .. يعني ترمي بلدك و اهلك ورا ضهرك عشان تعيش و تستفيد .. وهذا صعب بالنسبة لينا ...

المشكلة ايضا يا بريمة انه فى امريكا اذا ما اصحبت professional هناك شئ يسمى ال glass ceiling او السقف الزجاجي .. بتصل لحتة و ما تتزحزح منها و بعدها تحس انك زي تور الساقية .. المصاريف زائدة ..و العمل كما هو .. اصلوا الحكاية خاضعة لقانون ال diminishing returns كما يقول أهل الاقتصاد . بعد نقطة معينة .. العائد بيكون بالناقص ....و دة البسبب الاحباط و الضيق

الأخت أوت كاست
سلامات ..

Quote: وهناك ايضا بند ال cereal وهو بند مهم للكبار و الصغار اما لو عندك عيال مثلي : فهناك شى اسمه الsncacks مضيعه كل فلوسنا و ماخدة نصف الشبونغ مثل الريتز بيتس و ال cheetos و اليوقرت بانواعه و كل انواع الcandy

بالجد يا أوت كاست .. أنا محتاج لخبراتك فى الحته دى .. أولاً المدام ضاربانى كل أسبوع بحاجات أنا ما فاهمها
والحقيقة ما عندى زمن أفهمها .. كل مرة أسئلها يا مرة موديانى الول مارت فى شنو؟ تقول التصبيرة بتاعت الشفع Snacks
والغريبة تحضر حاجات كتيرة وتضعها فى المطبخ .. يبقى الأطفال طالعين نازلين الواحد مدخل يده وشايل منها حاجة ..

ثالث يوم فى الأسبوع يكون ال snacks أنتهى .. ومنتظرين نهاية الأسبوع .. موضوع شرك أم جيجى ..

كده ورينى الول مارت .. كوستكو .. سامسون كلب .. "الكلمة الأخيرة دى club" .. هل هى محلات مناسبة لل snacks أو الواحد يمشى وين؟

تحياتى

بريمة

Quote: (وخلي الجو الحلو طول السنة يكون بونص)

جو حلو؟؟؟؟؟؟يا ناس لوس انجلوس لقيتوا الجو الحلو وين؟؟؟؟
"جو حلو" دى يقولوها ناس ال Bay Area , ناس سانتاباربرا, ناس ساندياقوا....لكن لوس انجلوس؟؟؟....عندكم اكتر هواء ملوث فى امريكا. و زحمة يا دنيا زحمة. و صيفكم ؟؟؟اجاركم الله...صعب شديد.
بعدين موضوع الزلازل ده اسالونى منو انا....
المبانى دى ما مصممة عشان ما تقع فى الزلازل...مصممة عشان يكون فى اقل خسائر فى الارواح فى حاله حدوث زلزال.
________________________________________________________________________-
و كلام اوت كاست مظبوط ميه فى الميه..اجمل حاجه فى العيشه فى كلفورنيا هى التنوع الثقافى و العرقى...بتكون ماشى فى الشارع و ما بتكون حاسى انك غريب
و الشعب الامريكى عموما شعب لطيف جدا جدا و مجامل جدا جدا. انا ملامحى (من غير ملامح )...يعنى لما زول يشوفنى ما ييقدر يحدد انا من وين ...لكن واضح طبعا انى ما اوربيه او امريكيه بيضاء...فبيسالونى "انت من وين؟" و لما اقول انا من السودان ...و بيكون الرد: Wow. و بعد شويه بيسالوا and , where is Sudan . طبعا دى الناس البسيطه . لكن عموما اغلب الشعب الامريكى بيعرف السودان و ين و عاوزين بعرفوا عن درافور اكتر.

Quote: بالجد يا أوت كاست .. أنا محتاج لخبراتك فى الحته دى .. أولاً المدام ضرابانى كل أسبوع بحاجات أنا ما فاهمها والحقيقة ما عندى زمن أفهمها .. كل مرة أسئلها يا مرة موديانى الول مارت فى شنو؟ تقول التصبيرة بتاعت الشفع Snacks والغريبة تحضر حاجات كتيرة وتضعها فى المطبخ .. يبقى الأطفال طالعين نازلين الواحد مدخل يده وشايل منها حاجة .. ثالث يوم فى الأسبوع يكون ال snacks أنتهى .. ومنتظرين نهاية الأسبوع .. موضوع شرك أم جيجى ..كده ورينى الول مارت .. كوستكو .. سامسون كلب .. "الكلمة الأخيرة دى club" .. هل هى محلات مناسبة لل snacks أو الواحد يمشى وين؟ تحياتى

ضحكتني و الله يا بريمة .. كلامك مظبوط .. الاسناكس دي ما بتقعد يومين ..مرات فى الويكند ذاتو بتكون انتهت. احاول فى كثير من الاحيان الاقتصاد فيها .. لكن الاطفال هنا متعودين عليها شديد.. و حينما يحين موعد الوجبات يرفضون تناولها.. لذلك احاول الان ان احد منها ..
اما بخصوص احسن الاماكن أعتقد انه كل الاماكن الذكرتها مناسبة و بتجد فيها snacks رخيصة .. المشكلة فى Sam's Club و Costco انه بيبيعوا بالجملة .. ورغم انها ح تقع ليك ارخص كدة .. لكنها ايضا تعود الاطفال على الاستهلاك الخرافي .. عشان كدة اعتقد انه وول مارت افضل ...
------------
الغالية سمارت-انا ..ال Bay Area من احب المناطق الى قلبي ... و قضيت ايام جميلة شعرت فيها بالاستقرار و كما قلت .. لم اشعر بكمية الغربة التى اشعر بها فى الساحل الشرقي .. الناس اكثر لطفا .. و من السهلin to blend مع كل السحنات الموجودة من هنود وغيرهم....
الجو ايضا معتدل و ليست هناك كمية الرطوبة الخيالية الموجودة فى لوس انجلوس او الساحل الشرقي .....
بالتأكيد لاقتني بعض المواقف العنصرية هناك .. ولكن بصورة عامة بتحس انك فى سلام اكتر بكتير من السواحل الشرقية .. ربما لان كاليفورنيا ليست بها ماضي من حقبة العبودية .. بينما ولايات مثل فيرجينيا و ميريلاند كانت من اكبر قلاع الجنوب فى حقبة العبودية ....

أوت كاست

Quote: المشكلة فى Sam's Club و Costco انه بيبيعوا بالجملة .. ورغم انها ح تقع ليك ارخص كدة .. لكنها ايضا تعود الاطفال على الاستهلاك الخرافي .. عشان كدة اعتقد انه وول مارت افضل ...

هذه مهمة جداً .. ودا الكلام القاعد أقول فيه للمدام .. لازم نجدوا معادلة للترشيد لأنها بضر بصحتهم ..

تحياتى

بريمة

جيتكم ببعض الأسعار فى الساحل الشرقى للولايات المتحده
وأنا دوما أشترى من اللحمة من محلات اللحم الحلال Halal Meet والأسعار لمحلات Medina Market بتبع للأفغان وأنا زبون منذ عام 1999م
نبدأ باللحوم .. وأنا مستهلك كبيرة للحوم بسبب أن الأطفال عندهم حساسية من جميع أنواع البقوليات ..
الأسعار:
الدجاج

دجاج خالى عظمpack وزن 2.49 باوند بسعر 5.13 دولار
دجاج ًWhole بسعر 1.79 دولار للباوند (دى الدجاج مقطع كوار)
دجاج Breast بسعر 3.29 دولار للباوند
دجاج legs بسعر 3.29 دولار للباوند

الضأن والأغنام
leg بسعر 5.29 دولار للباوند
shoulder بسعر 4.99 دولار للباوند
ًWhole بسعر 4.79 دولار للباوند
chops بسعر 5.29 دولار للباوند

اللحمة العجالى:
leg بسعر 3.49 دولار للباوند
shoulder بسعر 2.99 دولار للباوند
ًWhole بسعر 2.69 دولار للباوند
chops بسعر 3.79 دولار للباوند

لحمة بقرى:
leg بسعر 2.79 دولار للباوند
shoulder بسعر 2.79 دولار للباوند
ًWhole بسعر 1.99 دولار للباوند
chops بسعر 3.79 دولار للباوند

الضلوع ribs بسعر 1.99 دولار للباوند

اللحمة المفرومة زنة 2.49 باوند بسعر 9.81 دولار (تقريباً كيلو بالسودانى).

جركانة زيت 27.99 دولار
عيش عربى (12 صغار) بسعر 1.59 دولار
كرتونة فول مصرى (24 علبه) بسعر 18.99 دولار

كيس بامية 2.69 دولار (فركه واحده بس لأسرة متوسطه)
كيس ملخية 3.60 دولار (فكرة واحدة بس لأسرة متوسطه)

الشبونق بتاعى بتاع الخضار والزيت وغيرها .. 96.37 دولار فيها 2.35 دولار ضرائب
الشبونق اللحمة نص كرتونه جكن وحاجات أخرى 67.88 دولار فيها 1.66 دولار ضرائب

الملاحظة .. الأسناكس واللبن والعصير .. وحاجات تانية حاميانى لسع ما جات .. ودورها غداً الأحد.

وبعد دا تجوا تقولوا أمريكا أبو الرخا .. ناس الخليج أرجو أن تدخلوا معنا Chimps in please


وللتوثيق .. هذه المداخلة بتأريخ يوم 16 مايو 2009

بريمة

وحتى تسهل المقارنة ..

الكيلو يعادل 2.25 باوند (رطل) .. يعنى أى حاجة بالباوند أضربها فى 2.25 لكى تحصل على قيمة الكيلو ..
مثلاُ
الضأن .. لحمة عظم الظهر chops تعادل 2.25ْX 5.29 تساوى تقريباً 12 دولار للكيلو
مثلاُ الضان .. لحمة الكتف تعادل 8 دولار للكيلو

وعلى هذا تخيلوا كيف البلد غالى .. وكيف مستوى المعيشة.

بريمة

جنى
والله كتر خيرك يا أخى مداخلة مهمة جد جد

Quote: يعنى نحن ناس السعودية ديل نخت فى خشمنا جزمة قديمة وننتكتم! عندك ريال واحد فى جيبك تمشى على البوفية وتقول للهندى بتاع البوفية ادينا سندوتش بيض ! يقول ليك تبغى كل شئ! سندوتش بيض مسلوق او اوملت معاهو جبنة شيدار وطماطم وخيار وخس ومايونيز وكتشب ولو داير سكر ذاتو ما فى مانع!ولو عندك ريال واحد تمشى تشترى تمانية رغيفات وفتة عدس البيت كله ياكل لمن يعرق وتشيل الريموت فى يدك زى السبحة تتفرج فى القنوات شرق غرب لا ضرائب لا يحزنون! وكمان تسكن ليك فى شقة حدادى مدادى يرمح فيها الخيل حوالى خمسة الف دولار بتوقيت واشنطن موش زى زى شقق امريكا الدولاب مركب فى الحيطة والسرير كله ادراج وسرير الدبل المدام تحت والراجل فى السرير الفوق! ايووووى ايووووى ! وقسط العربية كان اخرتو تلاتة شهور ما فى انترست لانه حرام! والسوق رخيص والمواصلات فاضية وما فى رجال ونسوان بعملوا فى حركات بايخة فى الشوارع! اللهم نعمة احفظها من الزوال جنى

جنى أمس .. فى أثناء ما مطلعين الأطفال عصر .. أشترينا سندوتشات من محلة مكاسيك

5 سندوتشات سعر الواحد 6.25 دولار .. يعنى لا أيدى لا كراعى دفعت 32.50 دولار
بنزين العربية حوالى 37 دولار ..

هنا ماكدولاندز .. سندوتشات عاملنها للغلابة الزينا .. سعر الواحد دولار واحد .. لكن أنا لازم أضرب 3 حتى أحس فى حاجة فى بطنى ..

عامر عمره 6 سنوات بضرب أثنين ذى العجب.

يعنى لما نشترى لكل زول 2 سندوتش لزوم التصبيرة .. وعصير متوسط وبطاطس محمر .. نكون دفعت 20 دولار ..


البلد دى طلعت زيتنا عدييل

بريمة

يا جني .. بغرتني عديل ....
لكن معقول يكون ايجار الشقة (مهما كانت واسعة) 5 الف دولار ؟ دي كتيرة مهما كانت الشقة واسعة و شرحة و برحة (زي ما بقولوا المصريين)

.. خليك قبلك .. لكن بس ان شاء الله ناس البلد يكونوا مستورين معاكم ..
مشكلتي مع السعودية اني اتعودت على "الدردرة" في امريكتنا دي الشعارها "Do it yourself" ,, و عربيتي ما مستعدة افرط فيها و اخلي زول تاني يسوقني :-) ....

انا الله مما خلقنى ما فارقت السودان اقصى حاجة خمسة شهور فقط من جاى لى جاى اشتريت لى ارض فى منطقة عشوائية شوية شوية بنيت اوضة سكنت فيها وكان عندى طفلين الحمدلله هسع البيت بفى كبير والاولاد بقوا اربعة ماشاء الله عملوا لينا كبرى وخططوا الحى بقى درجة اولى كل اصحى يافتاح ياعليم يارزاق ياكريم من جريدة لى جريدة بطلع حق يومى اغشى سوق بحرى اشترى خضارى ولحمتى وشوية فواكه واركب المواصلات وارجع البيت اتغدى واخد لى نومة اصحى استحمى واقعدفى التلفزيون يجى بتاع اللبن نشترى لبنا ويعملوا لى شاى المغرب اطلع بعد المغرب اركب المواصلات امشى اى منتدى من المنتديات العائلى دار فلاح راشد دياب اوندوة اومناسبةبعد حداشر بالليل اركب واحد من الهايسات وارجع البيبت افتح التلاجة والقى لى لبن فى كورية اقطع فيهو عيشةاتعشى وانوم فى الصباح ادى تلاتة من الاولاد كلو واحدخمسة جنيه للجامعة وفى واحد ممتحن الثانوى يمشى مع امو المدرسة وهى مدرسة تانى باقى لى عشرة جنيه كل اسبوع حق الكهرباء وخمستاشر جنيه بتاعت الغاز وبس الله كريم. عمار محمد ادم

Quote: البلد دى طلعت زيتنا عدييل

عبارة زي دي ما تستخدمها يا بريمة
في ناس قبل كده قالت "قرن ده عصرناه لغاية ما طلع زيت"
وطلعت كذبة - خايفين إنك تكون مطلع زيت أمريكا - بريمة يشهد الله في ناس مغتربة في بعض الدول العربية تأكل من أجل تعيش ولابسه قديم وما قادره ترجع - ماعندها البرجعها لأهلها - دي تسوي شنو- يبدو أن الأكتف تلاحقت بشأن هذا الاغتراب - ولا يوجد من لا يشتكي
يبدو أن المشكل الحقيقي ليست دول الاغتراب ولكن تغير بلدنا المفاجئ من بلد رخيص إلى أغلى بلد في العالم - صارت الدولة تتاجر في أي شئ حتى الأراضي ولا ندري هل هذا بياض أم غسول أموال - لدرجة أن أي شقة في الخرطوم وفي بعض الأماكن بالذات أغلى منها في سويسرا بل في قلب جنيف - ثم أن الخمسة الف دولار بتاعت الدخن الكنت زمان بتصرفها إذا الخريف جلى - بالله - دخن بخمسين دولار ما كان بكفيك - جزء من الأزمة غلاء بلدنا نفسها - ماذا تفعل لكي تمتلك بيت "فقط خمسة وسبعون الف دولار" - ممكن تلمها أنت في خمسة عشر أشهر في أمريكا - ناس التغرب والتتلتل في الدول العربية كيف يلموها

راجع المسنجر أرسلت ليك معلومات د. محمد - والشكر لكم
راجع المسنجر أرسلت ليك معلومات د. محمد - والشكر لكم
راجع المسنجر أرسلت ليك معلومات د. محمد - والشكر لكم
راجع المسنجر أرسلت ليك معلومات د. محمد - والشكر لكم

الحبوب عثمان
ألف شكر على الماسنجر .. لم أستطع أن أتصل بالدكتور بعد .. وسوف أرسل لك أيميلى فى الماسنجر وأوصله له .. يمكننى المساعدة بشيئ، بالذات فى إعادة كتابة السيرة الذاته .. أخوك والله قاعد يسوى نفسه "سبور استار" ومن خمسة نجوم كمان. والسيرة الذاتية أهم من أى شيئ أخر .. هى مفتاح الحل وتعلمت كتباتها من متخصصين أكل عيشهم هو كتابة السيرة الذاتيه ..

بخصوص الكلمة .. التى لم ترق لك .. صدقنى لم أجد غيرها .. فارمانا فرم .. ممكن تكون كتيره شويه .. لكن المهم أنكم عرفتم رسالتى.

من مصادر موثوقة فى أمريكا كل دولار يكسبه الفرد .. يمكن أن تدخر منه 10 سنات "يعنى بقروش السودان بتاعت زمان .. كل جنيه توفر منه عشرة تعريفات"

فى أوروبا .. كل دولار تكسبه يمكن أن توفير منه 20 سنت .. يعنى ضعف ما يدخره إنسان أمريكا ..

فى اليابان كل دولار تكسبه يمكن أن توفر منه 40 سنت .. وهذا يعنى 4 مرات ذى أمريكا.

بريمة

الأخ الأستاذ عمار
لك التحية

Quote: انا الله مما خلقنى ما فارقت السودان اقصى حاجة خمسة شهور فقط من جاى لى جاى اشتريت لى ارض فى منطقة عشوائية شوية شوية بنيت اوضة سكنت فيها وكان عندى طفلين الحمدلله هسع البيت بفى كبير والاولاد بقوا اربعة ماشاء الله عملوا لينا كبرى وخططوا الحى بقى درجة اولى كل اصحى يافتاح ياعليم يارزاق ياكريم من جريدة لى جريدة بطلع حق يومى اغشى سوق بحرى اشترى خضارى ولحمتى وشوية فواكه واركب المواصلات وارجع البيت اتغدى واخد لى نومة اصحى استحمى واقعدفى التلفزيون يجى بتاع اللبن نشترى لبنا ويعملوا لى شاى المغرب اطلع بعد المغرب اركب المواصلات امشى اى منتدى من المنتديات العائلى دار فلاح راشد دياب اوندوة اومناسبةبعد حداشر بالليل اركب واحد من الهايسات وارجع البيبت افتح التلاجة والقى لى لبن فى كورية اقطع فيهو عيشةاتعشى وانوم فى الصباح ادى تلاتة من الاولاد كلو واحدخمسة جنيه للجامعة وفى واحد ممتحن الثانوى يمشى مع امو المدرسة وهى مدرسة تانى باقى لى عشرة جنيه كل اسبوع حق الكهرباء وخمستاشر جنيه بتاعت الغاز وبس الله كريم. عمار محمد ادم

معروف أن القناعة كنز لا يفنى .. فى عام 1994 كنت أكملت دراسة ماجستير فى أوروبا وعدت إلى السودان .. وأثناء الدراسة فى اليونان كنت أخدم نهاية الدوام الدراسى وفى العطلات .. أشتغل أى حاجه .. عتيل البطيخ وحصاد البرتقال والزيتون والعمل فى المشاتل وغيرها .. فى نهاية الفترة الدارسة تخرجت بشهادة أميّز طالب وجمعت مبلغ من المال غير الهدايا ومصاريفى حوالى أربعة ألف ونصف دولار .. وعدت إلى السودان. قررت البقاء فى مناطقنا جنوب الأبيض منطقة الحاجز .. جنوب شرق مدينة الدبيبات .. هناك أستقبلى الأهل أستقبال حافل .. وقلت لهم أنا قررت أن أبقى معكم .. أختلفوا فى أن أذهب وأشتغل فى الحكومة أو أعود من حيث أتيت .. قلت لهم أعطونى مهلة سته أشهر لكى أثبت لكم إننى سوف أكون أفضل بينكم هنا ..

ذهبت أول سوق جمعة وأشتريت لى حمار (فوطاوى) ووضعت عليه بردعه وصريمه وسرج .. وأشتريت عصى خيزران .. ولبست عمامه كبيرة .. وبدأت فى تجارة البقر .. بدأت بشراء 15 رأس فى الأسبوع وفى خلال 6 أشهر تضائفت الرؤوس إلى 30 رأس فى الأسبوع .. أشتريها يوم الجمعة ويوم الخميس القادم أبيعها لشركة الرواسى الإسلامية .. أرباح طائله .. عشت فى عز عجيب .. لكن الأهل لم ترق لهم الفكرة وصاروا يضايقونى .. قلت ليهم طيب عائد إلى منفاى ..

تجربتى فى الحياة أوصلتنى إلى أن الرزق غير مرتبط بمنطقة بعينها .. فهو مكفول كفالة ألهية وما على المرء إلا الأجتهاد فى تحقيق الإرادة الألهية.

وهنا فى أمريكا أنا كل سنه عندى جوله لجبال الروكى بجورانا .. عايز ألقى لى مزرعه للايجار .. وإن وجدتها سوف أربى بها البقر والضأن والحصين وغيرها من الحيوانات .. وأنا متأكد تكن أفضل من أى تجربة أخوضها .. لكن مازلت لم أمن المنطقة .. بها جيوب فيها العنصريين البيض KKK خايف يسلو فولتى .. وأنا بقيت زول مسؤول عن رعية ..

تحياتى

بريمة

الأخ بريمة، يسعد صباحك أو مساك...

فور وصولي لأميريكا، أخترت مدينة واشنطون العاصمة وسكنتُ في 16th Street الذي يؤدي للبيت الأبيض ثم رحلتُ لشارع 19th Street المؤدي لفندق هيلتون الذي كاد أن يُقتل فيه رونالد ريقان، وكنت أعزبا آخذ باليمين وأسهر في شارع 18th Street وأختم الليلة الحمراء بميرلاند أو فيرجينيا عند أحد الأصدقاء. وخلال ثلاث أعوام من تلك الحياة، لم أوفر دولارا واحد. وعندما هممتُ بالزواج، سافرت لأهلي وأصدقائي بنيويورك فجمعوا لي مبلغا محترما سافرتُ به للزواج. وعندما عدتُ وجاءت زوجتي، إخترنا مدينة هايزفيلد بمقاطعة برنس جورج، حيث الجريمة تجري على قدمين وساءت أحوالي الإقتصادية لدرجة أنني وزوجتي كنا نجمع (التعاريف) الحمراء لتزويد سيارتي بالبنزين وكان هذا ما بين 1990-1999 مع أنني كنتٌُ أعمل في واحد من أكبر مكاتب المحاماة (الهجرة) لكنني وصلت لحافة اليأس والقرف من حياة واشنطون الغالية حيث كنا نشتري حبة واحدة من الطماطم بدولار في عهد بوش الأب...

الى أن حصلت المعجزة! فقد قررت ذلت يوم أن أشد رحالي للشمال البارد فأخذت ما خف وزنه من أغراض وقصدتُ مدينة بافالو في ولاية نيويورك، ولا تسألني الفرق بين هذه ومنطقتكم التي تعيشون فيها، يأأخي انا كنت ماخذ شقة بغرفة واحدة خجولة بمبلغ يقارب الألف دولار أما في بافالوا فقد أشتريتُ بيتا مبنيا في عام 1925 بحي متوسط بمبلغ 16 ألف دولا... أي والله العظيم بيت بهذا المبلغ. قمت بإيجار البيت الذي يحتوي على طابقين وأتيك ثم إشتغلت أكبر منظمة للآجئين في الساحل الشرقي بمبلغ 4 ألف دولار شهريا، وفرت مبلغا محترما وعدتُ للسودان وأشتريت قطعة وبنيت منزلا فخيما بعملي وتوفيري والآن أحمدُ الله كثيرا بأنني أصبحتُ أفكر في التفرغ للأعمال الأخرى من أدبية وغيرها وقد أمنتُ لنفسي ولأولادي مستقبلا مستورا، لا أقول بأنه فاخر، لكنه مستور مستور ولا أتمنى أكثر مما وجدته والحمد لله.

سقتُ لك هذا الحديث لكي أستحثك بالخروج من تلك الحفرة المسماة (المتروبوليتان) التي تأخذ باليمين وبالشمال ومن الأمام ومن الخلف ومن فوق ومن تحت. أخرج وشم العافية في ولايات الوسط حيث المزارع الشاسعة والهواء النقي أو عندنا في الشمال الشرقي. ولكي أكون أكثر عمليا يمكنني مساعدتك في شراء منزل محترم في حدود 30 ألف دولار في مدينة بافالو او نياقرافولز ولا يأتيني أحدكم ليستغرب من هذه الأرقام، ومن لا يصدقني يدخل ويجري بحث عن منازل في هذه المنطقة ما بين 20-30 ألف دولار، ويقولوا ليك الواطة في الخرطوم بمية ألف دور وهي ثمن خمس بيوت كاملة في مدينة البافالو وينقز والبافالو بيلز والشلالات الساحرة..

دمتم بخير..

القانونى الضليع الأستاذ زمراوى

تحياتى وكثير تشكراتى ..

Quote: ولكي أكون أكثر عمليا يمكنني مساعدتك في شراء منزل محترم في حدود 30 ألف دولار في مدينة بافالو او نياقرافولز ولا يأتيني أحدكم ليستغرب من هذه الأرقام، ومن لا يصدقني يدخل ويجري بحث عن منازل في هذه المنطقة ما بين 20-30 ألف دولار، ويقولوا ليك الواطة في الخرطوم بمية ألف دور وهي ثمن خمس بيوت كاملة في مدينة البافالو وينقز والبافالو بيلز والشلالات الساحرة..

وألف شكر لك لهذه الموقف النبيل .. ومن أسم زمراوى أنت من أهلنا النوبيين .. واضح .. وأقول ليك ليس جديد أن تجد نوبى يقف هذا الموقف .. فأنا حينما أتيت إلى أمريكا ليس ضعيفاً مادياً ولكن تنقصنى الخبرة بالبلد .. وقف معى أخوة نوبيين أعزاء أفتخر بهم وكل كلمة صديقى وردت فى هذا البوست ترد فى خلاصتها إلى أخ نوبى .. حتى عرفونى بالسودانين بالمنطقة ووجدت منهم كل مساعدة .. هناك من ساعدنى ودفرنى حتى دخلت كراعى فى مجال هندسة البرمجه ..
الحمدالله بفضله وفضل الأخوة وقفت على كرعينى بقوة وخبرتى متنامية ومرغوبة بشده .. فى شهر يونيو من العام الماضى صفت الشركة كل قسم التكنولجى وأرسلت وظائفنا لشركة هندية بحجة رخص العمالة هناك .. جلست فى المنزل لمدة أسبوعين وكان فى ذهنى أن أخذ مدة شهر راحة قبل أن أخطو خطوة بحث عن عمل .. ولكن بعد أسبوعين قلت كده نجرب ونضع السيرة الذاتيه فى موقع مونستر .. يا أخى شيئ يخبط الرأس، أكثر من أربعة وعشرين أرسلوا لى يريدون أن يتحدثوا معى .. قلت ما دام الأمر كذلك سوف أرفع السعر إلى أعلى سقف وأنظر ماذا يأتى .. أخذتنى شركة فى فلوريد ولديهم وظائف فى المنطقة التى أسكن فيها ودفعت لى تلت ماهيتى السابقة زيادة .. أشتغلت معهم موقتاً فى مكتبهم .. لكن سرعان ما تدخلت الشركة التى تستضيفنى بالأنابه عنهم وطلبت منى أن أكون معهم موظف دائم .. وواصلت ضغوطها علىّّ حتى قبلت مع تخفيض فى دخلى. مشكلتى هى هل أحقق دخل أفضل مما أخذ الأن فى أى مكان أخر بعامل مدة خبرتى فى المجال .. يبدو I am doing just fine ولكن هذه الحفرة .. حفرة واشنطن هى بير أم جب .. لا بتتملى ولا عندها حد. أرهقتنا لدرجه إننى فكرة جادى فى العودة إلى السودان.

لدى موضوع سفر واجب علىّ أن أسافره إلى السودان لرؤية الأسرة والأهل .. قبل نهاية هذا العام .. ثم بعده سوف أخرج إليكم بإذن الله .. لا يمكن يقول ليك ثلاثة أنفار أضانك ما فيشها ولا تهبشها .. يكون كلام مخالف للحكمة.

الأسرة الصغيرة هنا تعودت على المنطقة والعيش فيها وشعروا أنهم عندهم وطن بديل "نيو هووم" وكنت لا أغرب فى تغريبهم مرة أخرى. لكن الله غالب.

خالص تحياتى ..

بريمة

محسن ما تحاول تخمنا .. بيئتنا السودانية موسمية وهشه تأكلها التعرية .. والبيئة الأمريكية دائمة الخضرة ودا الفارق .. وأنا خريج موارد طبيعية قبل ما أقلب ..

no way يا أبا تجئ تقول أى شيئ هنا .. مع ذلك لدينا بئات جميله ولكن ليس هناك من يعتنى بها ..

تحياتى

بريمة

صباحات واشنطن ..

حتى نعود

بريمة

*****

بريمة

سلامات اخى بريمة
و تحايا للاخوة/ت المشاركين/ت

بوست جميل اخد معظم نهارى امس

هناك تعليق من احدهم لبريمة ان يعمل عمل اضافى بى 400 دولار فى الاسبوع

و انا بقول 400 دولار دى هنا ماهية شهر عديل

فيابريمة بطل الجرسة و اتواشك على ولايات الوسط زى مانصحوك بعض الشباب




تخريمة
قال بوب مارلى: (قطع شك لو بتقطع فينى, واحدا تانى بيقطع فيك)

Judge Not