Post: #1
Title: الى قرفنا ....مع خالص التبجيل
Author: Tumadir
Date: 03-24-2010, 03:24 PM
شجرة ام سوسة حلفنا ندوسا
فى نصايص الليل وفى وانتظار الويل
فى حر النهار وفى وسط الغبار
وسط الناس الباكية وساكتة وما عارفة تقول لى منو
وسط الشفع والنسوان ..جنب العامل وجنب العاطل وجنب الشايل هم الاسرة وبس ما عارف يقول يامنو
فى عينو ووشو كلب الامن
فى عين البوليس وسلاحو
دوغرى كلامكم ما اتأخرتو ولا اترددتو وقلتو الحق
المسكوت منو ..والداسنو والناسينو ومتناسينو ما خليتو فرضا ناقص
نحن مدينين ليكم بنضالكم ..وبالحرية الشمسها كانت تحت الهم مدفونة وباكية
نحن مدينين ليكم بالكلمة ..وشرف الكلمة ..غلبنا نقولها ...
توقيتكم صاح
ومكانكم صاح
وكلامكم صاح
نحن مدينين ليكم بالصاح
وصحى قرفنا ...
قرفنا قرفنا
من ماتوا الشهدا ...وديل ما زحوا ونحنا قرفنا
من ما اتشردوا ناس دارفور وديل ما حسوا انحنا قرفنا
من ما شردوا ناس كجبار والموية اندلقت فى واديه الخصب قرفنا
من ما فتنوا الشرق فى بعضو ...وقرروا يقعدوا نحنا قرفنا
من ما دمروا كم مشروع ..وملوا جيوبهم منو قرفنا
من ما قامت اخلاق الفرد بدل الحلة .
.وصوت الفرد يعلو على الحلة
ومصالح الفرد بقت اكبر من مصلحة الحلة ..البلد القرية ..الوطن الغالى ...ونحن قرفنا
دوسوا الشجرة ام سوسة ...وخاطبوا وقولو كلامكم ..نحن قرفنا
قولو الما قدرنا نقولو ...وسووا الما عرفنا نسويهو
مددكم دافر وغمر ارواحنا
دموعنا انفجرت من عرفتكم والوعى المسئول ...للهم
..واسباب الهم الشايلو "الزول"
زول سودانى ...
مش مفروض يكون متكرم وجبهتو عالية يعيش فى بلادو من غير "هم"
من اجل الناس الماتو سلام
من اجل الغرقوا سلام
من اجل الاتعذبوا والاتشردوا ألف سلام
من أجل الساكنين فى معسكر
من اجل المشوا للمهجر
من أجل اللاكوا الحنضل
من اجل شباب واطفال وصغار وكبار باتوا جياع ودموعهم نشفت وضلوعكم ظهرت ...
ألف سلام
|
Post: #3
Title: Re: الى قرفنا ....مع خالص التبجيل
Author: Tragie Mustafa
Date: 03-24-2010, 03:34 PM
Parent: #2
تضمور الغاليه
والله من 5 دقائق كنت طارياك في سري.
تسلمي ويسلموا ناس قرفنا.
معزتي.
|
Post: #5
Title: Re: الى قرفنا ....مع خالص التبجيل
Author: Tumadir
Date: 03-24-2010, 03:38 PM
Parent: #3
Quote: تضمور الغاليه
والله من 5 دقائق كنت طارياك في سري.
تسلمي ويسلموا ناس قرفنا. |
القلوب شواهد
يسلموا والله خجلونا بشجاعتهم ...والخطاب المباشر
|
Post: #4
Title: Re: الى قرفنا ....مع خالص التبجيل
Author: Amani Al Ajab
Date: 03-24-2010, 03:35 PM
Parent: #1
Quote: من اجل الناس الماتو سلام
من اجل الغرقوا سلام
من اجل الاتعذبوا والاتشردوا ألف سلام
من أجل الساكنين فى معسكر
من اجل المشوا للمهجر
من أجل اللاكوا الحنضل
من اجل شباب واطفال وصغار وكبار باتوا جياع ودموعهم نشفت وضلوعكم ظهرت ...
ألف سلام |
الأخت الفاضلة المبدعة تماضر لك الشكر أجزله والتحايا...
يسلم قلمك ودمتي بخير..
حملة الدعم النفسي لمعتقل حركة (قرفنا)عبدالله مهدي
|
Post: #6
Title: Re: الى قرفنا ....مع خالص التبجيل
Author: Tumadir
Date: 03-24-2010, 03:39 PM
Parent: #4
شكرا أمانى العجب
وتسلموا انتو ...شباب الوطن المليان بالطاقات الناجزة
|
Post: #7
Title: Re: الى قرفنا ....مع خالص التبجيل
Author: كمال عباس
Date: 03-24-2010, 04:03 PM
Parent: #6
غابت دهرا ونفثت عطرا..... غابت دهرا وأشعت وهجا ونورا ووطنية!
...... تحياتي تماضر وعودا حميدا
وتراك عدتي بعدما قلنا خلاص "أعياك النضال" وصرفتك مشاغل الاسرة مؤقتا
عن التفاعل مع الهم العام خلال المنبر ولكن يقيني أن تواصلك مع العام
لم ينقطع ولكن ربما إنساب عبر وسائط وقنوات أخري .....
...... رسالة معبرة يا أختي - من مناضلة متمرسة لأخوتها الصغار السائرين في
درب النضال وسط الاشواك والالغام والعسعس والبصاصين والقتلة..رسالة
حوت وجمعت ما يصلح أن يكون برنامج مرحلة وخطة نضال مرسومة بقلم متوهج
بالإبداع والعطاء وحبر النضال وروح الصدام...........
|
Post: #8
Title: Re: الى قرفنا ....مع خالص التبجيل
Author: Amin Mahmoud Zorba
Date: 03-24-2010, 05:01 PM
Parent: #7
شكراً تماضر
الصاح صاح
وناس قرفنا هم الصاح
فهولاء الشباب
اخجلونا وشرفونا
___________
المهم الان دعم حركة قرفنا مادياً ومعنوياً
وأكثر في مادياً
لان الشغل ده محتاج لقروش كتيرة
اتمنى أن يساهم الجميع ولو بدولار في دعم مجموعة قرفنا
|
Post: #9
Title: Re: الى قرفنا ....مع خالص التبجيل
Author: BAKTASH
Date: 03-24-2010, 08:24 PM
Parent: #8
فوق
|
Post: #10
Title: Re: الى قرفنا ....مع خالص التبجيل
Author: Tumadir
Date: 03-24-2010, 10:01 PM
Parent: #9
كمال عباس
وزوربا
وباكتاش
كتبت لى طارق ابو عبيدة فى بوست بت زى الورد
الكلام ده وبعيدو ليكم هنا Quote: تعرف يا طارق ابو عبيدة
انا كنت بترجم لى يسرا بتى فى الكلام البتقول فيه نجلاء سيد احمد
ولمن وصلنا حتة الاطفال الببيعوا الاكياس
والله ويعلم رب الشمس والقمر ...اننى اجهشت بالبكاء حتى لم اعد استطيع أن اشرح نفسى
وكانت يسرا وهى منتظرة الباقى ...بتبكى معاى ....
كانت لحظة تعليم عالى بالنسبة لينا الاتنين ...لى طفلة بتعرف مأساة وطنها الماشافتو بى عينها ...ولى أم حتموت بالحسرة على وطن حبتو وماتت بحبو
شكرا لك يا نجلاء سيد احمد لأنك اهديتينا هذه اللحظة السامية الحضور ...ولانك بتهدى لى شعب كامل ...املو فى بكرة وبتهدى لى جيل كامل دروس مجانية فى البطولة والكرامة
بت زى الورد |
اهو ده الجابنى للمنبر
والله مشغولة حدا جدا ...وعندى ولد انضرب فى الكورة مشيلنى هم الدنيا والاخرة ...من ركبتو والعملية المنتظراه ده غير الشغل المتراكم لكن الحق حق ...والكلمة الواجبة بقولا
|
|