نادى السينما يقدم فيلم .. AVATAR

نادي السينما
بمركز الخاتم عدلان للإستنارة والتنمية البشرية
يقدم فيلم
AVATAR
الفيلم الأمريكي AVATAR فيلم خيال علمي من إخراج جيمس كاميرون مخرج الفيلم الشهير(تايتانيك) ، تم طرحه في قاعات السينما في الولايات المتحدة الأمريكية في 18 ديسمبر 2009. وهو من أكثر الأفلام ربحاً في تاريخ السينما. فاز بجائزتين غولدن غلوب عن أفضل عمل درامي وأفضل مخرج، كما حصل على ثلاث جوائز أوسكار .
مدة الفيلم: 157دقيقة .
الزمان: الخميس 25/3/2010م الساعة السابعة والنصف مساءً .
المكان: مقر المركز بالعمارات ش 57 من جهة شارع محمد نجيب جوار السفارة التشادية .
يعقب الفيلم نقاش .
مرحباً بكم .

كيف وصل الفيلم إلى السودان؟؟؟

سؤال بريء والله ،،

هل يمكن مشاهدة الفيلم الآن في دور السينما
كما كنا في السابق لا يفصلنا فارق زمني
عن اوربا وامريكا؟؟ مما يعني صحو مؤسسة الدولة للسينما من ثباتها العميق؟؟

كمان إن بقى الامر داونلود وقرصنة فلا يجب الاعلان عنه
هكذا ففي الأمر violation

سلامات يا عبد اللطيف
سؤالكـ ده

Quote: كمان إن بقى الامر داونلود وقرصنة فلا يجب الاعلان عنه هكذا ففي الأمر violation

سألته بي طريقة تانية
و لي يوم الليلة مركز الخاتم عدلان ما داير يجاوبني عليه
و سوف أواصل الي أن الاقي إجابة

نادي السينما بتاع مركز الخاتم عدلان ده قاعد ياخد إذن بعرض الأفلام دي ولا شغال كيري ساي ؟

بى نضارة ولا بدون نضارة؟


بخصوص الcopyright violation
سمعنا فتوى بجواز الفيوليشن مع الكراهة وذلك حتى لا يحرم اهالى امبدة وزقلونا وعشش فلاتة من الجديد...

Quote: سألته بي طريقة تانية و لي يوم الليلة مركز الخاتم عدلان ما داير يجاوبني عليه و سوف أواصل الي أن الاقي إجابة

الحبيب فيصل تحياتي ،،

وهذا عيب إعطاء جهات فرصة المشاركة في هذا المنبر
ككيانات ، إذ يصعب التحاور معها،،

أنا من هنا أناشد الدفعة والصديق العزيز الباقر العفيف
مدير المركز توخي الحذر فالأمر ليس بسيط كما يبدو ،والتعدي على
حقوق الغير أمر مشين ، والأسوأ الإعلان عنه في منبر عالمي،،
يعني الأدلة موجودة (لإرتكاب القرصنة)،،
==

أما صديقنا د. أمبدة فقد رقق قلبي بضياع فرصة المشاهدة لقطاع
كبير من أحبابنا الجد جد،،


==

مرة مرة وكأني ألمح مشاركات لود الصايم وحميدة ، ومرات طشاش
طشاش ، الحاصل شنو عندنا هنا ؟؟

سلامات يا عبد اللطيف
و نحمد الله علي كل حال
للأسف النقطة دي

Quote: وهذا عيب إعطاء جهات فرصة المشاركة في هذا المنبر ككيانات ، إذ يصعب التحاور معها،،

ما صحيحة
لانه مركز الخاتم عدلان ( الكيان) بيرد علي المشاركين في البوستات عندما يتم مدحه
و عندما يُسئل أسئلة شاكلة سؤالنا الفوق ده يتم تجاوزها .


_
القرصنة واضحة جداً خاصة بعد الإعلان عن الفيلم موضوع البوست ..
لأنه الفيلم لم يصدر في إسطوانات DVD حتي هذه اللحظة ..
و أعلاه إجتهادات و تلاقيط و قرصنة بإسم المركز من النت ليس إلا.

أضف الي ذلكـ مدة الفيلم و التي حددت بـ 157 دقيقة ..
هذه هي النسخ المتداولة في النت حيث يتم ضغط الفيلم فيها للحصول علي جودة أعلي و زمن أقل

Quote: القرصنة واضحة جداً خاصة بعد الإعلان عن الفيلم موضوع البوست .. لأنه الفيلم لم يصدر في إسطوانات DVD حتي هذه اللحظة ..

أضف إلى ذلك الفيلم حتى ولو حصلوه على DVD فإن إستخدامه في الأندية
وأماكن التجمعات يعتبر COPYRIGHT VIOLATOPN ،،
أضف إلى ذلك أن شرطة المصنفات الادبية يمكن أن توقف هذا العرض بموجب
مواد قانون المصنفات الأدبية والفنية المادة 17 (1) من الفصل الثالث:

Quote: الحصول على التصديق وإلغائه 17- (1) لا يجوز لأي شخص استيراد أو تصدير أو تسجيل أو طباعة أو نشر أي مواد مرئية أو مسموعة أو مقروءة كانت اسطوانة أو كاسيت أو فيديو أو فيلم سينمائي أو كتاب بغرض التجارة أو ممارسة العمل الفني لأي غرض آخر ،دون الحصول على تصديق من المجلس.

معا لتصحيح المسار ،،

يا جماعة الفيلم دة هنا في امريكا لسه ما قنعوا منو كبف وصل لي هناك؟؟؟





بالجد اعملوا حسابكم...
نصيحة: خلو اي واحد من المدعوين يحصروا في بيتم وبعدين اتلموا في المركز وناقشوا :)


والفيلم دة بدون نضارات ما عندو اي نكهه..لانو القصة تقيلدية جدا المتعة كلها في الاخراج بالـ 3D

ناس امريكا (و دبى) خلوا الناس فى حالها.
ساره الفلم لذيذ برضو ب 2D . و فى كتير جدا من السنمات فى امريكا عرضت الفلم 2D بس. يعنى فيه نكهة 2D.
__________________________________________
الموضوع معقد...انا صراحة ضد اكل اموال الناس بالباطل. يعنى الناس العملوا الفلم ده صرفوا عليه كتير جدا. و الان عاوزين قروشهم ترجع ليهم.
انا شخصيا ما قاعده حتى انزل افلام من النت فى كومبيوترى الشخصى و احضرها مع انها حكاية سهلة الان. لكن -صراحة- ما عارفه كنت ح اعمل شنو لو ما عندى اصلا خيار انى ادفع و اتفرج.
عشان كده يا ناس امريكا (و دبى) ...الناس فى السودان ما عندها خيار تانى.
و عندكم حق فى موضوع الاعلان -على الملا- عن الفلم. لان الموضوع كده شكلو سرقة.
معليش على البرى

أتفق تماما مع عبداللطيف و فيصل نوبى فى ضرورة إحترام الملكية الفكرية . فالمركز المعنى - كما أعتقد- مركز ثقافى
من المفترض أن يكون مركز توعية وشعلة تنير الظلام...
ومع قانون العقوبات الإقتصادية الأمريكية المفروضة على السودان فإنه من المستحيل الحصول على الفيلم بالطرق الشرعية
لذا تبقى شبهة القرصنة والسرقة (السرقة الأدبية) هى التفسير المعقول...

ولحين رفع العقوبات الإقتصادية يمكن للمركز أن يعرض الأفلام الصينية ( هناك الكثير من الأفلام الصينية الممتعة المليئة بالقيم
والمعانى الجميلة مثل فيلم hero ) كذلك الافلام الاتية من الدول الأخرى مثل روسيا , ايران, تركيا, (الهند big NO )..الخ...








وناس امبدة وزقلونا وعشش فلاتة ليهم الله ...

امبدة؟؟؟


الاخ دكتور ولا مخرج؟؟؟ :)



اسمارت..
ما دايرة معاك كلام ..الدي كير لو كان في الواق الواق كان وصلتيهو :)

سارة...ذى القطط تاكل و تنكر. يا اختى ضربت ليك بعد كده كم مرة و سبت رسائل يشهدوا عليها ناس AT& T

Quote: ناس امريكا (و دبى) خلوا الناس فى حالها.

سامعين يانوبي وسارة؟؟

=

الأستاذ عبداللطيف بكري أحمد

الأستاذ فيصل نوبي

الأستاذ العزيز أمبدة

الشكر أجزله لكم على تنبيهكم القيم والشكر عبركم لكل المتداخلين والمتداخلات في هذا البوست
أكتب لكم بوصفي جزء من أسرة مركز الخاتم عدلان للإستنارة والتنمية البشرية وأود أن أعتذر أولاً عن الكتابة المتأخرة وذلك بسبب فعالية طويلة في المركز انتهت منذ قليل حيث شارفنا الآن على منتصف الليل هنا في السودان ولم نستطيع متابعة هذا البوست منذ فتحه.

بالنسبة للفيلم موضوع النقاش أود أن أوضح للجميع بأن هذا الفيلم تحصلنا عليه بواسطة أحد أصدقاء المركز الذين يداومون على حضور الأفلام معنا، ولم نكن نعلم (لولا تنبيهكم) بأن هذا الفيلم غير مسموح بتداوله وأنه لم ينتج في أسطوانات دي في دي حتى هذه اللحظة (وهذا خطأنا الذي نعتذر عنه إذ كان يتعين علينا توخي الدقة أكثر). كما نطمئنكم بأننا، وبعد التحدث مع د. الباقر العفيف مدير المركز ورفده بملاحظاتكم، قررنا أن نوقف عرض الفيلم وأن نعتذر لكم عن هذا الخطأ مع مراعاة تفاديه مستقبلاً، كما لايفوتنا أن نشكر لكم حرصكم على أمر المركز ودوره في نشر الإستنارة.

وتفضلوا بقبول فائق الشكر والإعتذار

ملحوظة:
سيتم الرد رسمياً غداً من (حساب المركز) وسيعلن عن الفيلم البديل.


مدحت عفيفي
منسق نادي السينما بالمركز

..
.
شنو مجموعة ِAFMA وناس حقوق النشر والملكية الفكرية
والدفاع عن القوانين النطو لينا هنا ديل ..!!
والله قصة غريبة .. !!؟
الواحد ليهو شهرين يفكر ليهو فى سفره عشان فلم شغل
بال القاصى والدانى .. يجوا يقولو ليك قرصنة وما ممكن
وما ليكم الحق .. التقول عندهم نسبة فى ورنر بروزوز ولا كولمبيا ما عارف ..

اعتقد الواحد لمن اتيحت ليهو فرصة يحضر الفلم ويجى يتجدع لينا هنا
كل يوم AVATAR والشر والخير والاخراج وما ادراك يخلى 30 شخص فى يحضروا ..
لا عرفناهو حرص على ارباح الفلم ولا المبيعات ولا على المركز
لا لجنة مراقبة حماية اعمال وتراخيص ولا غتاته ساااى .. !!!!!!

والله يا مدحت انت زاتك بالغت مش بترسلو
ايميلات ؟؟ مالك ومال المنبر الملغم اليومين دى
ياخى مش كنت تعرضوهو من سكات ..
يعنى بتفتكر جمعية تسويق الافلام الامريكية دى
حتجى ناطه تقول نقصتو لينا نسبة المبيعات
ما ستين الف فلبينى وهندى يكون نزل الفلم ووزعوا
بقت علينا نحن ..!!

ما الاخت ندى واخرون حضروهو بنفس الطريقة اها بكره
لمن الواحد يعمل كوبي امشوا افتحوا بلاغ تعدى
على الاستخدام والنشر ...

امه غريبة .!! تتحكم حتى فى حرية وحق الاخرين
فى المشاهدة ..!!

-----------

ناس لا ترحم لا تخلى رحمه ربنا تنزل ..

..
.
د. امبده
سلام؛

Quote: وناس امبدة وزقلونا وعشش فلاتة ليهم الله ...

ياخى الله جاب ليهم الفلم فى عششهم ..
انتو قالعتوهم فى حقهم ..

Quote: ولحين رفع العقوبات الإقتصادية يمكن للمركز أن يعرض الأفلام الصينية ( هناك الكثير من الأفلام الصينية الممتعة المليئة بالقيم والمعانى الجميلة مثل فيلم hero ) كذلك الافلام الاتية من الدول الأخرى مثل روسيا , ايران, تركيا, (الهند big NO )..الخ...

قرقر قرقر قرقر
متين رفع العقوبات دى ..
انت عشان اتيحت ليك فرصة فى سفريتك الاخيرة
تحضر الفلم طوالى خشيت مع جمعية تسويق الافلام الامريكية ..

----------

قلت لى فلم هندى وصينى زى هيرو ..

سمح..!!

..
.
يا تيفا ..
احترامى

Quote: الحصول على التصديق وإلغائه 17- (1) لا يجوز لأي شخص استيراد أو تصدير أو تسجيل أو طباعة أو نشر أي مواد مرئية أو مسموعة أو مقروءة كانت اسطوانة أو كاسيت أو فيديو أو فيلم سينمائي أو كتاب بغرض التجارة أو ممارسة العمل الفني لأي غرض آخر ،دون الحصول على تصديق من المجلس.

قالو بغرض التجارة وممارسة العمل الفنى
دا مركز ثقافى .. وما تقول لانو مركز لابد من الالتزام
بحقوق النشر واحترام حق الغيروهلمجرا ..
لانكم بمداخلتكم ادخلتو حتى فى حقنا هنا ..


-------

يا عزيزى نحنا مسارنا فى السودان
يسير متوازيا مع المسار الامريكى
يعملو الدايرنو فينا ونعمل انحنا البنقدر عليهو
ان شاء الله نحضر افلامهم بالقرصنة

ناس امريكا ودبي..

اقرو الكلام دة...


اعتذار ونقد ذاتى .. وتوضيح مُلابسات عرض فيلم AVATAR





ــــــــــــــــــــــــــــــــــــــــ
البحر راااااااايق...الضيق في شنو؟؟

Quote: كما نطمئنكم بأننا، وبعد التحدث مع د. الباقر العفيف مدير المركز ورفده بملاحظاتكم، قررنا أن نوقف عرض الفيلم وأن نعتذر لكم عن هذا الخطأ مع مراعاة تفاديه مستقبلاً،

سلامات يا صالح

Quote: شنو مجموعة ِAFMA وناس حقوق النشر والملكية الفكرية والدفاع عن القوانين النطو لينا هنا ديل ..!! والله قصة غريبة .. !!؟ الواحد ليهو شهرين يفكر ليهو فى سفره عشان فلم شغل بال القاصى والدانى .. يجوا يقولو ليك قرصنة وما ممكن وما ليكم الحق .. التقول عندهم نسبة فى ورلد بروزور ولا كولمبيا ما عارف ..

ياخي شغل الفردة و بين الأصحاب ده ما زي لامن يطرح مركز ثقافي عرض فيلم عن طريق القرصنة
ولاحظ لثقافي دي كويس ..
و اذا بخصوص الفيلم يا صالح ممكن نديكـ نسخة DVD أول ما يطلع باليد لحدي عندكـ في الخرطوم.
قصرنا معاكـ يا صديقنا القديم !

السلام على الجميع..

وضعت القوانين، في الأصل، لحماية حق.. ولا ينكر أحد أن التعدي على حقوق الآخرين جريمة يجب ردعها بالقانون حتى لا نتحوّل الى غابة.
عملية الإنتاج السنمائي في أمريكا وفي أوروبا عملية طويلة العمر ومرت بمراحل متعددة ووضعت لها قوانين عديدة ومتطورة.
الجميع يتذكر الممثل الأمريكي "كلنت إستوود"، ولعل أشهر أفلامه "عندنا" في السودان فلمه الذي جسّد فيه شخصية"ديجانقو"، هذا الفلم قد عرض في "سنمات" السودان بالخرطوم ومدني والأبيض وكل ارجاء المليون ميل.. ولا زال الناس تتحدث عنه وتحكي، وتلك فترة نضرة من تاريخ السودان شهدت روائع السنما العالمية من أمثال (ذهب مع الريح) و (أحدب نوتردام) و (دكتور زفاغو) و (البؤساء) الخ..حتى أوصلتنا الإنقاذ الى مشاهدة (الهندي والصيني والهندي والهندي) كما تكرم أحد المتداخلين بأن نتوجه اليهما.. توجه ايه عزيزي الفاضل نحن أصلاً متوجهين غصبا عن عين أبونا الى التهافت والتفاهة والإنحطاط..
طوال تلك المدة التي استمتع فيها السوداتن بروائع السنما العالمية كانت إدارة السنما أو السنمات الخاصة تشتري الأفلام من وسطاء ووكلاء معتمدين للشركات الكبرى (وورنر برذر) و (كولمبيا بيكجر).. ولكن المفاجأة أن تلك الشركات كانت تسوق الأفلام في الشرق الأوسط والشرق الأدنى والأقصى ودول كثيرة ولا تعطي عائد الأرباح للممثلين.. هذا ما أشتكى منه "كلنت استوود" الذي لم يكن يعلم حتى مطلع الألفية الجديدة أن أفلامه تصل الى أفريقيا أصلاً!!
دعونا قليلا من نقطة القانون التي سنفصِّل فيها تفصيلاً مملا ودقيقا حتى يستقيم الأمر ولنأتي لنقطة حسن الظن بالنفس.. إن الظن بأن هناك من ينتبه لنا أو سوف يقاضي أي جهة سودانية هو من باب (حسن الظن) وكما تعلمون أن (بعض الظن إثم) وهذا الظن الحسن بالنفس هو من أفرع الظن الآثم عندي.. نحن أصلا لا يأبه بنا أحد.. وإن فعل فمن باب (وي آر ذا وورلد) ولو قيل ل (كولومبيا بكجر) أن هناك من يعرض فلما في السودان فسوف يقطب مديرها التنفيذي حاجبيه ويسأل (أين هذا السودان) فإذا قيل له (في أفريقيا) فسيسأل (هل هو قريب من جنوب أفريقيا) فيصحح له مرشده المعلومة ويهمس بالمصري (لا يا افندم... دول بتوع دارفور).. (آآآآه... هم موش عندهم حرب أهلية.. إزاي يحضروا أفلام من أصله) وعندها سيأمر جماعة (بوسطن ليقل) بفتح قضية ضد السودانيين مفادها (عدم إحترام الأزمة الدارفورية). مشاكل ايه وقانون ايه ياجماعة..

نجي للقانون..

Quote: - (1) لا يجوز لأي شخص استيراد أو تصدير أو تسجيل أو طباعة أو نشر أي مواد مرئية أو مسموعة أو مقروءة كانت اسطوانة أو كاسيت أو فيديو أو فيلم سينمائي أو كتاب بغرض التجارة أو ممارسة العمل الفني لأي غرض آخر ،دون الحصول على تصديق من المجلس.

طيب أول حاجة في الحق الخاص هو صاحب الضرر أي الشخص الوقع عليه الضرر وهو في الحالة دي (الخواجة) القبيل داك.. والخواجة عليه رضوان الله لو علم بأننا (نقرصّن) في أفريقيا لظننا مجرد صوماليين في البحر الأحمر، وما خطر في باله أننا من شعوب الله نمشي في الأسواق ونأكل طعاما من غير (ريقن).. ولو علم بأن فينا شغفا للسنما لأرسل "نسخة" أفيتار" لكل مواطن سوداني ومعها "دولار" لنشتري اللب والسوداني. أما اذا افترضنا غضبته التي ستجعله يتهور ويقاضينا فهو يعلم فساد قضاتنا الذي استلزم "أوكامبو" وسيرفع الأمر للمحكمة الدولية ونصير نحن والبشير في سرج واحد!! أما اذا كان (آثم) وأحسن الظن بقضاتنا فإنه سيحسبها صاح ويعلم أن له مشغولية أكبر في أوروبا الرأسمالية "زيو" والتي تقرصِّن على أفلامه سنوياً بنسبة تبلغ 22.9% سنوياً إذ أثبتت الدراسات أن هناك أكثر من ربع السكان بأوروبا يقرصنون على الأفلام سنوياً.. أها ديل عندهم سنمات وعندهم قروش.. وما عندهم "تبا لك" ولا سنسره البخليهم يسوو كده شنو غير طيارة العين!! لهذا فإن الخواجة عليه رضوان الله سوف يصرف النظر "اذا نظر" ولن يعرض قضيته للقضاء السوداني إطلاقاً..

لنكن واضحين تماماً.. نحن ضد التعدي على حقوق الآخرين.. ولكن في هذه الحالة فإن المعرفة نفسها صارت مضيقة علينا.. ونحن نشهد الله بأننا اذا اتيح لنا (مثلنا مثل خلق الله) بأن نتلقى المعرفة بطرقها الصحاح فإننا لن نألوا جهدا في الذهاب الى طرقها .. ولكن أن نبيت جوعى وجارنا شبعانا فتالله سنخرج للشوارع شاهري السيوف حتى لا يعجب بن أبي طالب كرم الله وجهه.

قولوا لنا: كيف سنشاهد أفتار؟!! نضع يدنا على خدنا وننتظر أن تأتينا نسخة من شخص قادم من الخليج.. أو من أوروبا أو من عند الخواجة ذاتو؟! .. ننتظر أن ترفع أمريكا الحظر لا بأس فلقد إنتظرنا عشرتين ولا بأس في أن ننتظر عشرة أخرى أو عشرتين!! وعندها سنخرج دون أن نحضر "ماتركس" أو "تايتنك" أو "فورست غامب" أو "كاست أوي" أو "بريف هارت" أو "أمريكان بيوتي" أو "هانيبال"... وعندما يتحدث الناس عن علائق وأفكار وحضارات وفلسفات ينقلها الغرب ويعرضها في أفلامه ويقيم عليها مناهجاً جديدة فلا بأس أيضاً من أن نتمحن وننتظر أن يشرح لنا الآخرين الطلاسم.. تالله هذا عينه منهج ماري إنطوانيت ولكن التطور الزمني والمواضيع صاحبهما الإختلاف.. ومالو ما يحضرو هندي!!
ومالو ما ناكل "جاتو"!! ما تقرصنو ومالو ما تحضرو يعني حاتموتوا.. أو ما تقرصنوا ومالو ما تنتظروا سنتين تلاتة.. سنتين تلاتة؟!! بس؟
طبعا السنتين في عمر الإنترنت بتعني عشرين سنة.. وأوروبا فايتانا بي (132) سنة بس لأنو دي الفترة الزمنية المنعت فيها التركية السابقة دخول الآلة الطابعة.
القانون السوداني ما بياخدنا.. لأنو نحن ما عاوزين نتاجر ب(أفيتار) ولا عاوزين نستورد ولا نصدّر ولا قاعدين ندفع لي ناس الخاتم عدلان عشان نشوف.. نحن عاوزين نشوف وبس.. طبعا هم ديل ما محتاجين لي قانون المصنفات عشان يتلككوا لينا.. ديل ممكن إقفلوا المركز ذاتو بي قانون الصحة.. أو قانون الأغذية أو قانون الدواء.. والقانون جا عشان يحمي الحقوق لكن هل من الحق إنو الناس تكون أغنى بمئات المرات من التانين وبرضو ما عاوزنهم يشوفوهم!!
وهذا حديث الإشتراكية.. ولأن مزاجي الآن لا يتفق وهذا فإني سأجمل فقط.. هذا الشره العالمي لإكتناز الثروات لا منطق من وراءه غير الطمع فقط.. وإذا كان القانون يجيز للدول أن تقاطع الحكومات (التي لا تتأثر أصلا بالمقاطعة، فلا قتلت صدام، ولا أماتت بتاع كوريا البنسى اسمو طوالي ده، ولا اصابت كاسترو بالخرف، ولا كسرت شوكة البشير وحزبه) الدول تقاطع الحكومات، ولكن المتضرر الأول هو الشعب لا غير.. وإذا كانت الدول صااادقة في دعواها فلقد نبحنا لها وكوركنا بالحس الملان:
أولاد ناساً عزاز متل الكلاب سوونا
يا يااااااابا النقُز يا الإنكليز ألفونا
ولكنهم بدلا عن السماع ذهبوا للمقاطعة، ثم أنهم عندما قاطعوا دهرا أدخلوا شركاتهم بمسميات أخرى فصارت السلعة تأتينا بأضعاف أضعاف سعرها، والمستفيد الأول (الحكومة الماقطَعة، والحكومة المقاطِعة) ونحن المغشوشين قاعدين نعاين ونقول (دي قرصنة).. قرصنة؟!! هسي أشرحوا لي بس عليكم الله نحن موش عندنا مقاطعة؟! طيب ورونا (الإنترنت) شغال عندنا كيف؟!!.. الإنترنت أبو كيبول العدييييل ده ما الستلايت.
غايتو في ما يخصني أنا موقفي كالآتي:
طال ما إنو في نظم رأسمالية وبتحتكِر السلع وبتبيعها لي بأضعاف أضعافها فأنا ضد الطريقة دي وبناهضها بالسبل القانونية طال ما انها بتنتهج القانون.. لكن في حالة سوداننا الحبيب وطن الجدود فهو فاقد للقانون منذ الجدود.. ولهذا وقت ما وجدت فرصة للتحايل على (شرعنتو الما شرعية) بغتمها وأنا مفتوح العينين عشان ما يلقى "الجدود" علي من سبيل.
وأفتار ده كان ناس الخاتم عرضو ولا ما عرضو انا بحضرو..
وقرصنة قرصنة حياة حياة.
محبتي للجميع
خصوصا نوبي

..
.
الاخ / قصى

Quote: لنكن واضحين تماماً.. نحن ضد التعدي على حقوق الآخرين.. ولكن في هذه الحالة فإن المعرفة نفسها صارت مضيقة علينا.. ونحن نشهد الله بأننا اذا اتيح لنا (مثلنا مثل خلق الله) بأن نتلقى المعرفة بطرقها الصحاح فإننا لن نألوا جهدا في الذهاب الى طرقها .. ولكن أن نبيت جوعى وجارنا شبعانا فتالله سنخرج للشوارع شاهري السيوف حتى لا يعجب بن أبي طالب كرم الله وجهه.

Quote: ولوا لنا: كيف سنشاهد أفتار؟!! نضع يدنا على خدنا وننتظر أن تأتينا نسخة من شخص قادم من الخليج.. أو من أوروبا أو من عند الخواجة ذاتو؟! .. ننتظر أن ترفع أمريكا الحظر لا بأس فلقد إنتظرنا عشرتين ولا بأس في أن ننتظر عشرة أخرى أو عشرتين!!

Quote: وعندما يتحدث الناس عن علائق وأفكار وحضارات وفلسفات ينقلها الغرب ويعرضها في أفلامه ويقيم عليها مناهجاً جديدة فلا بأس أيضاً من أن نتمحن وننتظر أن يشرح لنا الآخرين الطلاسم.. تالله هذا عينه منهج ماري إنطوانيت ولكن التطور الزمني والمواضيع صاحبهما الإختلاف.. ومالو ما يحضرو هندي!! ومالو ما ناكل "جاتو"!! ما تقرصنو ومالو ما تحضرو يعني حاتموتوا.. أو ما تقرصنوا ومالو ما تنتظروا سنتين تلاتة.. سنتين تلاتة؟!! بس؟

Quote: طال ما إنو في نظم رأسمالية وبتحتكِر السلع وبتبيعها لي بأضعاف أضعافها فأنا ضد الطريقة دي وبناهضها بالسبل القانونية طال ما انها بتنتهج القانون.. لكن في حالة سوداننا الحبيب وطن الجدود فهو فاقد للقانون منذ الجدود.. ولهذا وقت ما وجدت فرصة للتحايل على (شرعنتو الما شرعية) بغتمها وأنا مفتوح العينين عشان ما يلقى "الجدود" علي من سبيل. وأفتار ده كان ناس الخاتم عرضو ولا ما عرضو انا بحضرو.. وقرصنة قرصنة حياة حياة.

شكرا يا قصى قلت الدايرين نقولوا ..
بس منو البقول البغله فى الابريق


-------

ياخى امريكا ما جايبة خبر وقد تكون راضية
شن حشر .. حماة القرصنة .. يعنى من حرصهم
علينا واخلاصهم لامريكا ..

دى حساااادة وغتاته ليدعوا انهم سابقون من بالداخل
فى كل شئ .. وهم لا يعلمون ..

..
.

Quote: القرصنة واضحة جداً خاصة بعد الإعلان عن الفيلم موضوع البوست .. لأنه الفيلم لم يصدر في إسطوانات DVD حتي هذه اللحظة .. و أعلاه إجتهادات و تلاقيط و قرصنة بإسم المركز من النت ليس إلا.

طيب انت ما عارف الفلم ما زال بدور العرض العاليمة ولم يصدر فى اسطوانات

Quote: و اذا بخصوص الفيلم يا صالح ممكن نديكـ نسخة DVD أول ما يطلع باليد لحدي عندكـ في الخرطوم.

حتدينى نسخة متين 2011 ..ولا ما كدا ..!!
ياخى انحنا لو كنا بنستناكم فى اجهزة الآى فون والافلام والمسلسلات لمن تحضروها
وتجوا تونسونا بيها هنا كان والله بقينا ( تجٌم) وبره الشبكة ..
وتطلعاتنا دى تكون شمار فى مرقة ..
نحن هنا نسعى للحاق بالركب واحينا تجاوزه بمجهودات فردية متعددة وووسائط مختلفة
مش ننتظرها لقمة سائغة فى دور العرض او مراكز التوزيع _ ان وصل المعنى _

-----------

قصرت وكتير جدا .. فى انك تجى تفتى وتنظر ومعك اخرون
فى امر تعلمون تماما لا امريكا ولا جمعية حقوق التسويق
ستأتى لتسعى وراهو .. مجرد فلسفة منكم لا اكتر ولا اقل ...

..
.

Quote: البحر راااااااايق...الضيق في شنو؟؟

انا مضايق .. بسبب الناس البتهبش دى ..
دى عندكم فيها راى ..!!


-----------

انت يا البتصفق هنا وهناك
تعال ورينى كان حيصل شنو يعنى ...!!
قايل نفسكم عايشين ووين .. هوليووووود ..

شكرا مركز الخاتم عدلان على الخطوة الرائعة والتعامل
الحضاري مع ما طالب به بعض الإخوة هنا،،

الآن يزداد إحترامي لهذا المركز والقائمين عليه وعلى رأسهم
الدكتور الباقر العفيف الذي كان عفيفا مذ عرفته ولا يزال،،

شكرا أخي مدحت على توضيحك وإعلانكم الوجيه،،

حين إعتراضنا لم نكن نحرص على حقوق أمريكا أو
سواها : كان همي أن ما يصدر من مركز إشعاع فكري
يجب أن يأتينا كذلك مبرأ من كل شائنة أو منقصة أو
أن يوصف بالجهل بحقوق النشر وحقوق الملكية الفكرية
فذلك من صميم رسالة المركز ،،

الأخ قصي مجدي سليم،،

قولك فيه كثير من الحقائق المرةحول معاناة الشعوب
من المقاطعة التي تفرضها بعض الحكومات المتجبرة
على الضعاف من الدول ، خذ قطع غيار الطائرات
مثلا !!! هل توقفت طائراتنا عن التحليق؟؟ دائما
هناك طريقة للوصول،،
كلامك كلو كوم : و(فورست غامب) كوم تاني،،
المشكلة بعد حصولك على الدي في دي تأتي
موظفة في المطار وتصادره منك!!
‏=‏
مشكلة حقوق الملكية الآن أصبحت أكثر خططورة
فشركة مايكروسفت الآن لديها مراكز تفتيش في
المطارات الكبرى في العالم يخول لها تفتيش
البرامج الموجودة في أي لابتوب ولها أن تصادر
الجهاز في حال النسخ المضروبة من برامجها,,
‏(هذا حسب نشرة أصدرتها شركة أرامكو السعودية
لكل موظفيها بضرورة توخي الحذر حين السفر بأجهزة الشركة)
وهذا ما ظللت أحذر منه ابني خالد من أن يكون عرضة
لأي تساؤل من أي جهة كانت،،

المقاطعة جائرة دون شك ، ولكن القرصنة خطرر يتهدد
المبدعين ،، فيلم يدر الملايين على شباك التذاكر نأتي
ونشاهده مجانا ؟؟ يعني وكأني بنا ندخل مطعم سياحي
5‏ نجوم نملأ بطوننا وندعوا الناس (دعوة عامة) وننحاش
دون دفع قيمة الوجبة،،
‏(آسف للأغلاط فانا اكتب من موبايل)
سلام،،

يا صالح
القصة ليس دفاعاً عن حقوق الشركة الأمريكية ..
القصة ده مركز ثقافي و فكرة نشر ثقافة القرصنة ..

يا قصي لكـ من التحايا أضعاف الي حين العودة بمهلة .

Quote: القصة ده مركز ثقافي و فكرة نشر ثقافة القرصنة ..

دي حلوة شديد دي...يعني هي بقت علي الافلام الامريكية

Quote: انا مضايق .. بسبب الناس البتهبش دى ..

عشان ما تتضايق ........و لحدي ما تصلك نسخة dvd من فيصل نوبي

الفيلم بجودة نوعا ما كويسة علي الرابط
http://stagevu.com/video/uundfyswsxme

و علي الرابط ده الجودة اعلي

http://stagevu.com/video/bqhepeyjfmnp

نادي السينما
بمركز الخاتم عدلان للإستنارة والتنمية البشرية
يقدم فيلم
المناظرون الكبار
The Great Debaters






الفيلم من إخراج الممثل الأمريكي المعروف دنزل واشنطون (ديسمبر2007)، والفيلم يسرد قصة واقعية تدور أحداثها فى عام 1935 عن البروفيسور(الراديكالي) ماليفن تولسون، الذي كان يعمل فى كلية وايلي (الخاصة بالأفارقة الأمريكين أيام الفصل العنصري) بولاية تكساس. علّم تولسون طلابه الحرفية المطلوبة فى كيفية مواجهة خصومهم فى المناظرات، حيث إستطاعوا هزيمة جميع المناظرين الذين واجهوهم من كل الكليات، وأخيراً توجت جهودهم بهزيمة فريق المناظرين من جامعة هارفارد.
معظم أفراد فريق كلية وايلي أصبحوا قادة في حركة الحقوق المدنية في أمريكا التي إنتظمت بقيادة مارتن لوثر كينق في الخمسينات من القرن الماضي.
فاز فيلم "المناظرون الكبار" بالجائزة الأولى للمهرجان السنوي التاسع والثلاثين "للجمعية الوطنية لتقدم الشعوب الملونة" في لوس انجلس.
مدة الفيلم: 126دقيقة.
الزمان: الخميس 25/3/2010م الساعة السابعة والنصف مساءً.
المكان: مقر المركز بالعمارات ش 57 من جهة شارع محمد نجيب جوار السفارة التشادية.

يعقب الفيلم نقاش.

نتمنى أن نراكم جميعاً بيننا لبناء واقع أفضل يقوم على المعرفة ويستلهم رؤى وقيم الإستنارة.

مرحباً بكم في داركم...

أُسرة المركز

..
.
شكرا يا نيبلو على اللينك
الغريبة الواحد من نادى السينما سحب العرض
جاتو نسختين تضامن ساااى ..
الواحد ياجل السفرية ولا شنو ؟؟


---------

والله يا مدحت طلعتو ما عندكم كلمة :)
ياخى يخموكم بحقوق فكرية وما ادراك ..

مودتى باقية؛

فيلم The Great Debaters قيلم يستحق المشاهدة والمناقشة..إختيار موفق..
فيلم (The Great debaters) ... سجال العقل, القلب و الضمير
بوست قيم عن الفيلم (العام الفائت).. فى البوست مشاركة للعضو (رقم صفر) عليه رحمة الله..
ونتمنى عودة ابوذر عمر للمنبر ..



الشخصية الحقيقية التى جسدها الرائع دينزل واشنطون
Melvin B. Toslon
(1898–1966)

Quote: الاخ دكتور ولا مخرج؟؟؟ :)

سارا...

سبع صنايع والبخت ضايع..

تبلدينا,,

سلام

والله لم أشاهد افاتار فى السينما ..حتى فى الكمبيوتر شاهدت جزء منه فقط ومللت ولم اتم الباقى...

بعد المرافغة الطويلة لاخونا قصى..
لا نملك الا ان نقول : كامل الدعم لقصى

Quote: وأفتار ده كان ناس الخاتم عرضو ولا ما عرضو انا بحضرو.. وقرصنة قرصنة حياة حياة.

قصى
حالة صعبة شديد

Quote: الفيلم ده خلاني أدفع دم قلبي عشان أحضرو ثلاثي الابعاد .. عندنا (محمد) المشاغب و ما بيخلينا نحضر فيلم في السينما خاصة و أنه AVATAR ده ثلاث ساعات .. و بصراحة عندي ولاء لأم محمد و ما قاعد أحضر أفلام بدون مرافقتها .. فإضطررنا لنشتري شاشة ثلاثية الأبعاد في البيت .. و هكذا دواليكـ ..

يا ربي نوبي لمن حضروا في البيت كان قرصنة ولا ؟؟؟؟؟؟؟؟؟؟؟


الكلام الفوق مقطع من كلا م نوبي في البوست:

فيصل نوبى....استعد

..
.
وتانى اقتباس

Quote: الفيلم ده خلاني أدفع دم قلبي عشان أحضرو ثلاثي الابعاد .. عندنا (محمد) المشاغب و ما بيخلينا نحضر فيلم في السينما خاصة و أنه AVATAR ده ثلاث ساعات .. و بصراحة عندي ولاء لأم محمد و ما قاعد أحضر أفلام بدون مرافقتها .. فإضطررنا لنشتري شاشة ثلاثية الأبعاد في البيت .. و هكذا دواليكـ ..

Quote: يا ربي نوبي لمن حضروا في البيت كان قرصنة ولا ؟؟؟؟؟؟؟؟؟؟؟

شكرا يا زيكو
ينسى نوبي ان للمنبر ارشيف لا يرحم
وذاكرة لا تنسى ..

من جاء نوبي نظر وقال الفلم ما نزل فى الاسواق
قعدت افكر يا ربي انا قريت لمنو انو اشترى شاشة عشان يحضروا
فى البيت بصراحة استبعدت نوبي خاصة بعد تدخلاتو فى الموضوع
اعتقدت انه شخص اخر فى مكان ما .. ما خطر ببالى من يرفض مبرر القرصنة
يمارسها ..


---------

قال قرصنة ..
طبعا حيجى يقول ليك شتان بين عكا والإسماعيلية
دا مركز ثقافى ودا بيت ..!!

قرقر قرقر قرقر

الأخ زيكو
شكراً علي المتابعة و عذراً للتأخير في الرد
كانت الشاشة معروضة مع خمسة من أفلام الـ 3D ( Bundle Offer ) و من ضمن الأفلام فيلم AVATAR
و بهذا حصلنا علي نسخة الفيلم ..


_
أعلاه ما يخص الفيلم لكن هذا لا ينفي أنني أمارس بعض من القرصنة أحياناً