أبلع: مركز كارتر ينفي المطالبة بتأجيل الانتخابات

يبدو أن تهديدات البشير جابت نتيجة وفورية
ح نطردهم اليوم قبل بكرة ، زي ما طردنا اخواتهم

Quote: نفى غراهام اليسون، المدير الإقليمي لمركز كارتر، أن يكون المركز طالب بتأجيل أو تأخير الانتخابات. وقال إنه أشار إلى عدد من المشاكل الفنية واللوجستية التي تتطلب بعض الحلول، وأضاف اليسون لـ «مرايا» أمس، ان المركز قدم نصحاً للمفوضية القومية لحل تلك القضايا قبل الموعد النهائي او تأخير الانتخابات لوقت قصير

.
مركز كارتر ينفي المطالبة بتأجيل الانتخابات

طيب وقتين جابت نتيجة .. زولك امس بيتكلم عن التأجيل (لاسمح الله) خبارو

Quote: مشددا على عدم وجود اي اتجاه للتأجيل

انت الكلام الفوق ده ما قريتو يا ود علم الهدى؟
ولا بس بتقروا العنوان و تلفحوا عممكم وتجوا جاريين

Quote: انت الكلام الفوق ده ما قريتو يا ود علم الهدى؟ ولا بس بتقروا العنوان و تلفحوا عممكم وتجوا جاريين

آ زول ها نحن القراية خليناها بقينا نسمع تلفزيون .. زولك كل يوم بي كلام يناقض القبلوا

ادريس
سلامات
بطلـوا خـــرخرة
واستنفـــروا قواعدكـــم ( ان كانت لكم قواعد ) للتوجه لصناديق الانتخابات 0
لــك ولاسرتــك والاخ الباشمهندس الشفيع كل السلام وأطيب التحايا 0

Quote: انت الكلام الفوق ده ما قريتو يا ود علم الهدى؟ ولا بس بتقروا العنوان و تلفحوا عممكم وتجوا جاريين

الشفيع كيف حالك ياخ

والله حيرتنا معاك إنشاء الله خير يا زول

لكن الظاهر انت ما لابس النظارة بتاعتك لفحت الكلام وجيت جاري مقوم الغبار

كدي ارجع وأقراء الاربعة كلمات الاخيرة في اقتباسك ده بس بعد ما تلبس النظارة


تحياتي

Quote: ان المركز قدم نصحاً للمفوضية القومية لحل تلك القضايا قبل الموعد النهائي او تأخير الانتخابات لوقت قصير

الأخ الشفيع
تحياتي و سلامي
لغاية ما زرت السودان آخر مرة كانت كلمة تأخير تحمل نفس معنى كلمة تأجيل فما قادر أفهم كيف غراهام دا نفى (أن يكون المركز طالب بتأجيل أو تأخير الانتخابات) و في نفس الوقت (المركز قدم نصحاً للمفوضية القومية لحل تلك القضايا قبل الموعد النهائي او تأخير الانتخابات لوقت قصير). ياخي الناس ديل بس ظريفين و ما دايرين يحرجوا البشير قال ليهم والله ما نأجلها قالوا ليهو خلاص ما تأجلها لكن أخرها شوية... لهفي على بلد حكمه ملوك النوبة و الفونج و المهدي و الأزهري و الصادق و يأتي اليوم ليحكمه أهوج يقرر في شأنه أثناء الخطب الحماسية و بين فواصل الرقص.

كيفك يا شيخو
يا اخوي الشغلة ما دايرة نظارات وااااضحة

العوض:
بتفرق كتيييير يا اخوي ولا ما كان قلنا ابلع
قدم نصحاً تفرق عن طلب مشروط بالانسحاب
تأخير الانتخابات لوقت قصير لحل بعض المسائل تفرق عن تأجيلها حتى نوفمبر عشان تستعد الاحزاب
طيب ماذا نفى غراهام؟
المعارضة حاولت ان تستغل المركز حجة للتأجيل وجاء ردهم واااضح

سلام
استغرب لهلع المؤتمر الوطني من تأخير الانتخابات لاسباب موضوعية ..
هل للخوف من ضياع تزويرهم وكم القروش الدفعوها للمرتشين والسبابة أم للخوف من تصحيح وفتح السجل الانتخابي أم خوفاً من الاجماع على مرشح واحد للمعارضة في مواجهتهم أم خوفاً من استمرار المعارضة في كشف وفضح فسادهم وسرقتهم للمال العام ورفع يدهم عن الصحة والتعليم وارهاق الشعب بالجبايات والرسوم وحماية الفساد والمفسدين أم جميعها؟؟
يا أخ الشفيع: المؤتمر الوطني مكنكش 21 سنة ويدعي أنه ضامن الفوز فما ضره التأجيل ثلاثة أو ستة أشهر؟؟؟
عليك الله قول الحقيقة التي في نفسك فأنا لم اجد سبباً لمن يدعي أن له الأغلبية في هذا الغضب العارم من الحديث عن التأجيل إلا الخوف على ضياع شئ ما، وهذا الشئ هو شئ دبر بليل..
بس ما تقول لي بسبب الاستفتاء أو نيفاشا فالبئر وغطاها معروفات في هذا الأمر..
اتمنى اجابة مقنعة ان كانت هناك وحتى الآن ما يقوله نافع والبشير ومشايعيهم ليس مقنعاً البتة لمن كنكش كل هذه المدة ويدعي أنه ضامن للفوز..
تحت تحت السبب الأنا مقتنع بيه حتى الآن،، هو خوف المؤتمر الوطني من قلب الطاولةعليه..

احتراماتي

وتزامنت تصريحات أوكامبو مع تأكيد الرئيس السوداني أنه حتى في حال تأجيل الانتخابات الرئاسية والبرلمانية في البلاد، فإن الحكومة الحالية ستبقى, ولن تتغير إلا وفق ما تفضي إليه الانتخابات.



المصدر الجزيرة

Quote: قدم نصحاً تفرق عن طلب مشروط بالانسحاب

أتمني أن تأتي لي باقتباس يقول ب (شرط الانسحاب) من أى بوست من البوستات التي أفترعت في هذا الخصوص.

ابيت يا عاطف يا ود مكاوي وما فاضي افتش ليك
ما الذي نفاهـ غراهام؟ هنا السؤال

>

Quote: يبدو أن تهديدات البشير جابت نتيجة وفورية ح نطردهم اليوم قبل بكرة ، زي ما طردنا اخواتهم

هيييييييع


ياخبر اليوم بفلوس بكره يبقى ببلاش....
ووقتها ما عارفين تودي وشك وين؟؟
ولا ما بتفرق...!!!
ما واحد وعشرين سنة في نسحل ونهرس ونضبح ونسلخ وتحت كراعي ويشم أباطي، و.و.و. بس أهلنا قالوا الكضب حبلو قصييييييييير ...
بالمناسبة مركوب جلد الكديس كيف؟؟

آية في القرآن الكريم تصف حال أهل الإنقاذ.

الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

Quote: او تأخير الانتخابات لوقت قصير

سلام ياحبيب .. فى تقديرى الكلام دا بتناقض مع عنوانك ,, ماهو الفرق بين التاجيل والتاخير

Quote: كيفك يا شيخو يا اخوي الشغلة ما دايرة نظارات وااااضحة

طيب يا حبيبنا وكتين واااااااضحة مالك داقي جرس

ولا كمان غيرتوا علينا المفردات حقتنا الزمان ديك

ونحن ما عارفين ( تأخير = تأجيل ) ولا ما كدي.

>

Quote: أبلع:

يا باشمهندس البلع القاصده زي ده ولا غيره:

Quote: جنوب السودان يرفض ان ينقل جيش الشمال بطاقات التصويت الخرطوم (رويترز) - اتهم الحزب المهيمن في جنوب السودان يوم الثلاثاء الشمال بمحاولة التلاعب في الانتخابات العامة التي تجري في ابريل نيسان المقبل بطلبه ان ينقل جيش الشمال بطاقات الاقتراع الى الجنوب شبه المستقل. والانتخابات الرئاسية والتشريعية التعددية القادمة في السودان هي أول انتخابات من نوعها منذ 24 عاما. لكن اتهامات التزوير تتصاعد بالفعل ويوم الاثنين هدد الرئيس السوداني عمر حسن البشير بطرد المراقبين الدوليين للانتخابات. وهدد الرئيس السوداني بذلك بعد ان قال مراقبون دوليون انه يتعين تأجيل الانتخابات المقرر ان تجرى في ابريل. وقال البشير في تصريحات اذاعها التلفزيون السوداني ان الخرطوم جلبت منظمات دولية من الخارج لمراقبة الانتخابات لكن اذا طلبت هذه الجهات تأجيلها فسيطردها السودان. وقال مصدر من الامم المتحدة ومسؤولون بحزب معارض انه كان من المقرر ان تنقل المنظمة الدولية بطاقات الاقتراع بطائرات هليكوبتر الى شتى انحاء الجنوب الذي دمرته الحرب لكن حزب المؤتمر الوطني الحاكم أخر اعطاء الطيارين تأشيرات دخول. وقال ياسر عرمان مرشح الحركة الشعبية لتحرير السودان في انتخابات الرئاسة ان حزب المؤتمر الوطني يعرقل مجيء طياري الامم المتحدة لانه يريد ان يسيطر على العملية الانتخابية كلها. ويسيطر حزب الحركة الشعبية لتحرير السودان وهي حركة متمردة سابقة على حكومة الجنوب. وصرح عرمان بأن نائب الرئيس السوداني علي عثمان محمد طه طلب من رئيس حزب الحركة الشعبية لتحرير السودان ورئيس جنوب السودان سلفا كير السماح للجيش السوداني بنقل بطاقات الاقتراع جوا الى الجنوب الذي يفتقر الى الطرق. وقال عرمان ان سلفا امتنع عن الموافقة ثم كتب ابيل الير رئيس المفوضية الانتخابية السودانية رسالة بنفس الطلب وهو ما يكشف التنسيق بين المفوضية الانتخابية وحزب المؤتمر الوطني الحاكم. ولكل من الشمال والجنوب جيش منفصل بعد أكثر من 20 عاما من الحرب بينهما ولا يثق كثيرا طرفا اتفاق السلام الذي انهى الصراع ومهد الطريق الى الانتخابات في بعضهما بعضا. وتجيء رسالة المفوضية في اطار سلسلة من الاتهامات التي وجهتها الحركة الشعبية الى المفوضية الانتخابية بالتحيز لحزب البشير. كما غضبت الحركة الشعبية ايضا حين اعطى حزب المؤتمر الوطني عقدا لطباعة البطاقات الانتخابية للرئاسة وحكام الولايات لشركة حكومية سودانية. وقالت المفوضية الانتخابية لرويترز ان رسالتها جاءت في اطار خطة طارئة لكن الامم المتحدة في سبيلها الان لنقل بطاقات الاقتراع الى الجنوب. وقال عبد الله احمد عبد الله نائب رئيس المفوضية الانتخابية لرويترز انه كانت هناك خطة طارئة تتمثل في امكانية طلب معونة الجيش بطائرات هليكوبتر في حالة عدم العثور على من ينتقل الى الجنوب لكن لا حاجة لهذا الان. ومن جانبه قال جيش شمال السودان انه لا علم له بالامر ولم يتسن على الفور الوصول الى حزب المؤتمر الوطني للتعليق. وقال مصدر الامم المتحدة الذي طلب عدم نشر اسمه ان مشكلة تأشيرات الدخول حلت في نهاية الامر وان المنظمة الدولية كانت على علم بطلب المفوضية الانتخابية السماح لجيش الشمال بنقل بطاقات الاقتراع وان هذا "غير منطقي وأوضحنا ذلك خلال مناقشاتنا." وقال مبارك الفاضل مرشح الرئاسة المعارض لرويترز ان حزب المؤتمر الوطني يريد ان يهيمن على العملية الانتخابية وقال ان الحزب يشعر بتوتر شديد وانه يريد التلاعب في نتائج الانتخابات. المؤتمر الوطني بيستهبل علينا ولا كيف؟؟؟

آية في القرآن الكريم تصف حال أهل الإنقاذ.

الشايقي

http://www.youtube.com/watch?v=WjNosdjuv7s

فاوضني بلا زعل

[email protected]
http://alkatwah.com

.

نفى غراهام اليسون، المدير الإقليمي لمركز كارتر، أن يكون المركز طالب بتأجيل أو تأخير الانتخابات
الكلام دهـ بالعربي ولا بالهيروغلوفي
دايرين تنفوا البلع ، أنفو إنو غراهام قال الكلام دهـ ، وبس

Quote: ان المركز قدم نصحاً للمفوضية القومية لحل تلك القضايا قبل الموعد النهائي او تأخير الانتخابات لوقت قصير

و غرايشن كمان بصرح عديييل كده انو ضد تأجيل الانتخابات
اها ح تقبلوا وين؟