آ ناس خلونا أندوبي ،،،

Post: #1
Title: آ ناس خلونا أندوبي ،،،
Author: Asaad Alabbasi
Date: 03-16-2010, 09:19 PM
Parent: #0

بسم الله نبدا ، أحمد ود جاوى قال: أنا يا عبدو ساجعة البليب في دوحا** تنفي جناحا من حالي وتقلل نوحا** من ست الصبا الدخلت عوالي صروحا** أسرت قلبي بى نظره وشفني جروجا.... هلا هلا يا ود جاوى أمانه مو نمك سمح. أها آنا ناس واحدا عاجبو نمو يخش يجدعلنا دوبايا زين.

Post: #2
Title: Re: آ ناس خلونا أندوبي ،،،
Author: محمد على طه الملك
Date: 03-16-2010, 09:45 PM
Parent: #1

آزول دوبي..
بس لازماك ترجمة لغير الناطقين بها..
مرحب بالعود .

Post: #3
Title: Re: آ ناس خلونا أندوبي ،،،
Author: Asaad Alabbasi
Date: 03-16-2010, 10:07 PM
Parent: #2

ومرحب بى مولانا الملك والنمة الجاية هدية ليك. أبو العويلة قال: إنقلع الموتد واتوتد المقلوع** بيت المال فقر واستغنى بيت الجوع** الزول القبيل الجدو مو متبوع** بقيت أنضم معاهو كلامي مو مسموع!! بالله يا مولانا دا مو الشي الحاصل في البلد. بعدين كان ترجمنا ما بنخرب النمة؟.

Post: #4
Title: Re: آ ناس خلونا أندوبي ،،،
Author: Balla Musa
Date: 03-17-2010, 05:21 AM
Parent: #3

وين النمه ياعباسى
بعد ماراسنا اتقشط هموم ومآسى
من فرق الرباعه اهل قسايا وناسى
يلطف بيا من ختم الكتاب بالناس

Post: #5
Title: Re: آ ناس خلونا أندوبي ،،،
Author: munswor almophtah
Date: 03-17-2010, 10:08 AM
Parent: #4

يوسق البدرى قال

يا يوسف أخوى قمت الصبح لأصلى
لاقانى العجب من تانى دور متدلى
بريبة عسيب ديسك سدر متدلى
فله وشايله فله وفى قلوبنا تفلى

وعمر ود محمد ود حسن ودالبدرى قال

أغريها السلام يا خلى وحيات دينك
وحيات الوداد الباقى بينى وبينك
أجلس بى احترام خلى الحواجز بينك
وأوعى يطير سهم من عينا يقلع عينك

سلام يا أبو السعود أبوابك مغلقه بالضبه

منصور

Post: #6
Title: Re: آ ناس خلونا أندوبي ،،،
Author: Mohamed Abdelgaleel
Date: 03-17-2010, 10:40 AM
Parent: #5

Quote: وأوعى يطير سهم من عينا يقلع عينك

إن شاء الله يقدها قد

تحياتي .. يا لجمال ما تدوبون

Post: #7
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 10:53 AM
Parent: #4

أريتك زين يا ود موسى، أرجاني برجعلك، لكن دحين فسر لى مولانا الملك كلام المهجراوي إدريس ود القوز القال فيهو: مما قم سغير ما شل قلم لى كتابه**وقاعد فوق دواديب السدوهن غابه**إلموا الجماعه وجات هبوب وسحابه** إتقسى الطلق للقلبو فيهو رزابه..... دواديب:جمع دوداب وهو الطريق الوعر. سدوهن: السدو هو السرب المتتابع من ظباء وإبل وغيرها. الطلق:نهب الإبل.رزابه:خوف. دحين يا بلة ياود موسى بغلبك تشرح لى مولانا.

Post: #8
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 11:00 AM
Parent: #7

هلا هلا الدار عمرت بى ود المفتاح وود عبد الجليل أمانه ما النم يرقدلكم هبطرش.

Post: #9
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 11:16 AM
Parent: #8

شـكرا لصاحب البوست فقد هيـج الذكـري الاشـجان
وهـاكم دي فـي البنـوت

بكـيرة دنقـلا البالبلح كالفـنك
الحـور فـي البحـر بـجري عـلي ضـي سـنك
سمـعانين بالعيـا والمـولي يرفـع مـنك
يـا الجنـنتي الرجـال حتـي الحريـم عشـقنك

Post: #10
Title: Re: آ ناس خلونا أندوبي ،،،
Author: saif massad ali
Date: 03-17-2010, 11:16 AM
Parent: #8

هلاهلا هلا

عظام الرجال اتلاقو فوق ضهور

اسعد العباسي والمفتاح اهل الخير والرباح

اجدعو ساكت والله ياشيخ اسعد انا زول بادية جد تعرف عندي صداع شديد فكاهو ها البوست

يعني حبوب ماتنفع ينفع الدوباي

Post: #11
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 11:24 AM
Parent: #10

كـل الناس بعـرفوا طبوعهـا
تمـره وتمـرتين يمـكن يـعدا جـوعهـا
فـرشولهـا الحريـر الانتكـت بكـوعهـا
تـبكى مـدنقره والصـندليه دمـوعهـا

Post: #12
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 11:32 AM
Parent: #11

النـاس فـي ثبـاته وروقـه
وأنـا سـهران مـع الفـوق الفـريعات قـوقه
خـضـرة جلدك السـاقينـها بالسـبلوقه
لمحـات فـاطرك الـبرق أبـرعيدا دوده

هــــيع جـاينكـم نـاس هـجعه

Post: #14
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 01:13 PM
Parent: #12

أبوالحسن أخوي بعد السلام بقولك أنحنا راجنك لى الهجعة بى سكاكينا راعفة وبنا مدقوق وشايا مبهر وسمنا مخشوش وعيشا مدروش ودوبايا سمح زي قول الصادق ود أب كتف لمن قال في الشكر : جاموس لجة الوعر الكدادو مقرن**وجك منو حادمات الأسوده يترن**شرفنلو البنات شهقن حلوقن غرن**إت بتشيلا قلايلا جره ما بنجرن..... كدادو:الكداد شجر بعينه. وجك: بتشديد الجيم أي وجهك. حادمات الأسودة: يريد الأسود الحاضنة لأشبالها وهي شرسة. شرفن: تطلعن مشرئبات إشارة إلى جمال طلعة ممدوحه وشهرته. حلوقن غرن:يقال فلان غر حلقه للبن إذا اشتهاه. قلايلا: يعني أحمالا هي حاجات الناس.

Post: #13
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 12:19 PM
Parent: #10

إنشاء الله مابجيك صداع وما بترقد مغبون ولا ملتاع مادام دواك الدوباي يا سيف يا الجدك علي ومادام شاعرك المفضل عبد المحمود أب زنود راجل طابت وود نور الدائم ود سيدي أحمد الطيب ود البشير.... هيع أمانه مو دقش .

Post: #15
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 01:50 PM
Parent: #13

وين النمة يا العباسي**بعد ما راسنا اتقشط هموم ومآسي**من فرق الرباعه أهل قسايا وناسي**يلطف بيا من ختم الكتاب بالناس... بلة موسى ______________مايهمك بلة اخوي من هادي مآسي**أكتلا بالنميم واطرب بالكلام الراسي**ربعتك ربعتي واهلك ضرايا وناسي**ليمن ليك قريب حكمة من مجنونكم العباسي...!!___أسعد الطيب العباسي.

Post: #16
Title: Re: آ ناس خلونا أندوبي ،،،
Author: Balla Musa
Date: 03-17-2010, 02:16 PM
Parent: #15

اللحانى من الدوف وشيب راسى
سجع القمرى واللون خمرى والذوق ماسى
الزول السمح يا اسعد العباسى
ليهو دلقت مسدارى وغناى واحساسى

Post: #17
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 04:28 PM
Parent: #16

أصبرلى شوي يا ود موسى أنخم نفسنا ونرجع نصاقعك.

Post: #18
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 09:05 PM
Parent: #17

جيـناكم زي وزين يـا ودالعبـاسي

مـن قـومتن عصـير هـي وبت عمـا ليهـا
تمشـي القـيد حـرن والعـاج رطـن في إيديهـا
زي بت المـدير النـاس تعـاين لـيها
والمرضـان سنين يداوا مـن شفـتيها

Post: #19
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 09:13 PM
Parent: #18

الليله الصـعيد طـلق علـينا هـبايـب
النـاس دخـلوا البـيوت خـلو العـزب فـي مصـايب
يـا رب يـا كـريم جـيتك مصـلي وتـايب
تـجمع شـملي بالمربـوع وشـكله عجـايـب

هــيع قـولوا آآآميــن يـا العـزابه

Post: #20
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 09:22 PM
Parent: #19

يـا ودالعبـاسـي أخـوي تعـال نـوصـيك
مـا تاخد الخميله اللزمـان توريـك
عشـاهـالفليل لـما النـعاس يـرمـيك
وملاحـها مـلاح أم شـورلـو الكـيف ريـالة الديـك

Post: #21
Title: Re: آ ناس خلونا أندوبي ،،،
Author: أبوالحسن محمد نور
Date: 03-17-2010, 09:33 PM
Parent: #20

يـا ناس مـا زولا بـجادع
ونحن يـا دوب وطـاتناغـابت
وهـاكم دي

نـحن أولاد صـنـاديـدال نكتلـوا الدود
أنـحنا بنـخبر ألوكـرأبـدروبـا عـوج
يـا رب تـطول الليـل عـليـنا أنشـاالله الشـمس مـا تعـود

Post: #23
Title: Re: آ ناس خلونا أندوبي ،،،
Author: munswor almophtah
Date: 03-17-2010, 09:59 PM
Parent: #21

اللحانى من الدوف وشيب راسى
سجع القمرى واللون خمرى والذوق ماسى
الزول السمح يا اسعد العباسى
ليهو دلقت مسدارى وغناى واحساسى

اللحاك عقب تناها شتت باسى
والكان أمرو هين سوا كلو قواسى
السجع الشفتو داك حاليهو دافن داسى
واللهج البعشرق والطعم أنناسى

منصور

Post: #22
Title: Re: آ ناس خلونا أندوبي ،،،
Author: emad altaib
Date: 03-17-2010, 09:52 PM
Parent: #19

ــــ
مرّيوده من وكتين علي الكتيف ملفوحا
زينة ورزينة وفي سألها ماها لحوحا
شاحدربي الكريم يهون ليّ أطالع لوحا
ألقاها مقيدة تلات وليّ غيرما منكوحا

Post: #24
Title: Re: آ ناس خلونا أندوبي ،،،
Author: emad altaib
Date: 03-17-2010, 10:00 PM
Parent: #22

ــ
عفواً

Post: #25
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 10:23 PM
Parent: #24

دخلوها وصقيرا حام ده ما عماد الطيب يا منصور المفتاح أها ماشفت الجنون ديل شن بسووا ناس أبوالحسن وود موسى أنا والله شايفلي كترابتن شينة دحين هاكم الساروخ ده. أنا كان عندي والي ولا صاحبي صليح**كان جنزرني ما دام قلبي ماهو نصيح** بقيت في صلاتي بزكر هواها واصيح**أنم في الركعتين والباقي اتمو نويح.........!! ده مو كلامي ده كلام بشرى ود البطانة.

Post: #26
Title: Re: آ ناس خلونا أندوبي ،،،
Author: معاوية المدير
Date: 03-17-2010, 10:41 PM
Parent: #25

البرق البشيل عبادي وينو سماهو؟
وين ضُل غيمو للبهم القرن فوق ماهو؟
دى بت حلق الأرض من مويتو من مرعاهو
ضربنا الصي وِدِرنا وما عِرِفنا تخاههو
دغاي البِهيم الفي المجاعة رِبايتو
مِتِل دغاي حشاك الفوتوهو رُباطو
مطُر يا كريم صبّح للقعوي غوغايتو
بعد دِى الحالة اشوف فوق الجبل توتايتو...

ســـــــــــــــــــــلام يا ناس...

Post: #27
Title: Re: آ ناس خلونا أندوبي ،،،
Author: Asaad Alabbasi
Date: 03-17-2010, 11:32 PM
Parent: #26

أ ناس حرم الشبكة دخلا عجل . معاوية المدير بى زات نفسو جانا، إكرام الضيف واجب علينا ولا مو كدي يا أبوالحسن ويا ود موسى المدير جانا من المغرب الليلت فاس الما وراها ناس دحين خلوني النضبحلو بهيمة سمينة من مراح عمكم طه ود الضرير: بعد ما بقيت كبيرا جق ونايبي اتلولب**عقبان ساقي لى فرقان مهالك دولب**الدرعا التجادع بى المهيوي الهولب**أوجد مخي من نيران غرامها مقولب... أها ما قمنا بى واجب الضيافة؟!

Post: #28
Title: Re: آ ناس خلونا أندوبي ،،،
Author: محمد على طه الملك
Date: 03-17-2010, 11:53 PM
Parent: #27

هييييع..
الفحول ترسو درب النم..
اجدعوا يا عيال ..
لا تهموا نفهم شي ونجدع شي..
..
نوبيون عرب بيناتنا مو فرزه
في النوبات رجال أسيافنا بى غرزه
عيلنا التلب وكتين نحاس رزّ
اتحزم وقف ختف النصل هزه
كورك آ عيال دفر الخلوق لزه
في الحوبه أم عفار دفر الصفوف بزّ
شق الويل عديييل في لهيبه انغزّ
اندردقت الرؤوس ورقابها منجزه
..
اها يا ود العباسي أنفع أنافس?

Post: #29
Title: Re: آ ناس خلونا أندوبي ،،،
Author: عمر ادريس محمد
Date: 03-18-2010, 01:24 AM
Parent: #28

Quote: آ ناس خلونا أندوبي ،،

حرم ..كان تتفضل

وانا ياهو دا سوطى معلق فوق راسى
كل ما انطرب بفزع الفرسان
وكان مالقيت بجلد رقبتى براى

تحياتى

Post: #30
Title: Re: آ ناس خلونا أندوبي ،،،
Author: Balla Musa
Date: 03-18-2010, 03:52 AM
Parent: #29

Quote: اللحاك عقب تناها شتت باسى
والكان أمرو هين سوا كلو قواسى
السجع الشفتو داك حاليهو دافن داسى
واللهج البعشرق والطعم أنناسى

بعد ماكت مهود وقلبى قايل ناسى
يامنصور بهرنى ولحظو ليا يواسى
شوح روحى فوق جمرو ونقر اجراسى
عاودنى الوحيح والنوح وزاد وسواسى

Post: #31
Title: Re: آ ناس خلونا أندوبي ،،،
Author: أبوالحسن محمد نور
Date: 03-18-2010, 11:05 AM
Parent: #30

ودالعباسـي
ود المديـر
ود الطيـب
ودمـوسـي
صـبحكم الله بالخـير وإتصـبروا بلأمنـنيه دي لامن نشـتغلوا للحكـومه ونرجـع

الزول السـعيد أيـامو

بسـرح فـي مسـايرو ومـرايتو فوق قـدامو

قصـدي أبـقي جرسـون أشـتغل خـدامـو

بسـرعـه أحـضـر الليـفه وغـيـار حـمامـو

Post: #32
Title: Re: آ ناس خلونا أندوبي ،،،
Author: محمد على طه الملك
Date: 03-18-2010, 12:35 PM
Parent: #31

Quote: عاودنى الوحيح والنوح وزاد وسواسى

ياود بله وسواسك دحين مو قاسي
درب الريل ضهب خلبط مزاجي و راسي
كان شفت اللحاظ وكسن قليبي الحاسي
ضحكات وجنتن خلني ابرك جاسي
يامنصور ويا ود نور والعباسي
اندهو لي فقير يقرالي سورة الناس
وان صعب الامر شوفولي شيخ كدباسي

Post: #33
Title: Re: آ ناس خلونا أندوبي ،،،
Author: munswor almophtah
Date: 03-18-2010, 12:58 PM
Parent: #31

بعد ماكت مهود وقلبى قايل ناسى
يامنصور بهرنى ولحظو ليا يواسى
شوح روحى فوق جمرو ونقر اجراسى
عاودنى الوحيح والنوح وزاد وسواسى

أمسك فى الكريم الديمه طاعم وكاسى
ولحظ العين كعب كهربتو عالية ماسى
يا ود موسى أخوى فى الحضره أبقى سياسى
جيب ورد الكلام كان فاسى أو مكناسى

منصور

Post: #34
Title: Re: آ ناس خلونا أندوبي ،،،
Author: معاوية المدير
Date: 03-18-2010, 01:43 PM
Parent: #33

Quote: . أها ما قمنا بى واجب الضيافة؟!

حاشآك كان تقصِر يا وَلدة الفُراس
كباس الدُهم ساعت يجفلو الناس
يحواك الكريم من القدم للراس
ودِى المحرية فيك يا أسعد العباس...

Post: #35
Title: Re: آ ناس خلونا أندوبي ،،،
Author: Balla Musa
Date: 03-18-2010, 04:38 PM
Parent: #34

Quote: أمسك فى الكريم الديمه طاعم وكاسى
ولحظ العين كعب كهربتو عالية ماسى
يا ود موسى أخوى فى الحضره أبقى سياسى
جيب ورد الكلام كان فاسى أو مكناسى

ورد الكلام مو قاسى
النعمنو مجرود بى الجمالو اساسى
وارد نيلنا وزنو مغلب الرواسى
اصبح منو حوض عينى المسرف حاسى

Post: #36
Title: Re: آ ناس خلونا أندوبي ،،،
Author: Balla Musa
Date: 03-18-2010, 04:48 PM
Parent: #35

Quote: أمسك فى الكريم الديمه طاعم وكاسى
ولحظ العين كعب كهربتو عالية ماسى
يا ود موسى أخوى فى الحضره أبقى سياسى
جيب ورد الكلام كان فاسى أو مكناسى

شغل الحضره دروش بى ووهدب راسى
وقلت اسوى وردن فيهو يغلق ساسى
صحح حرفى يامنصور وتم كراسى
خلينى النصبح بالقوافى واماسى

Post: #37
Title: Re: آ ناس خلونا أندوبي ،،،
Author: Asaad Alabbasi
Date: 03-19-2010, 07:35 AM
Parent: #36

يا سلام عليك يا ود موسى وات بتزين بروفايلك بى صورة الدكتورة ناهد محمد الحسن. ما بهمها الجوع ما بهمها السلطان**ما بهمها السجن ما بهمها البمبان**طبيبة ناجحه وبتعالج العيان**شجاعه قاصعه وما بهمها النيران**شان القضية ما يلفها النسيان**وشان تقلع من بطون قططا سمان**حقوقا ضايعة من زمن وازمان**دي ناهد المعدودة أحسن الحسان.

Post: #38
Title: Re: آ ناس خلونا أندوبي ،،،
Author: Asaad Alabbasi
Date: 03-19-2010, 07:54 AM
Parent: #37

يا أبوالحسن على ذكرك لى بكيرة دنقلا أقولك عن بت خيل دنقلا الكلام القالو أحمد ود نجم الدين : بت خيل دنقلا اللماتا فوقا جماعه**ماتبعت هواها وقومزت لوباعه **آزيتي الخلوق بى نارك الولاعه**فمها مزرة اليلي البشيل لماعا......... أها شن رايك.

Post: #39
Title: Re: آ ناس خلونا أندوبي ،،،
Author: الكباشى البكرى
Date: 03-19-2010, 08:09 AM
Parent: #38

نحنا جدودنا اظهر من علم بينين
نحنا قلوبنا من فولاذ حديد ما بلين
نحنا العند عروضنا لئام وجبارين
بعرفنا الصبر يا الملكه صبارين

تحياتي اسعد.

Post: #40
Title: Re: آ ناس خلونا أندوبي ،،،
Author: الطاهر ساتي
Date: 03-19-2010, 04:31 PM
Parent: #39

..

Post: #41
Title: Re: آ ناس خلونا أندوبي ،،،
Author: أبوالحسن محمد نور
Date: 03-19-2010, 06:01 PM
Parent: #40

كـلامك سـمح والله يـا ود العبـاسـي

كـل النـاس بـعرفوا طبـوعهـا
تمـره وتمـرتين يمـكن يعـدن جـوعهـا
فـرشولـها الحـرير الانـتكت بكـوعهـا
تـبكي مـدنقـره والصـندليـه دمـوعهـا

Post: #42
Title: Re: آ ناس خلونا أندوبي ،،،
Author: محمد على طه الملك
Date: 03-19-2010, 06:07 PM
Parent: #41

بت ود الحسن الواعية مو ضهبانة
دي الدارسة العلم ومكملاه رزانه
في صف الحقوق رفعت عظيم تيجانه
قالت للمدير شغلك تملي خيانة

Post: #43
Title: Re: آ ناس خلونا أندوبي ،،،
Author: Asaad Alabbasi
Date: 03-19-2010, 07:08 PM
Parent: #42

حرم غلبتني يا مولانا الملك وأديت الدكتورة حقها تب،،،لكن دي من راسك ولا من كراسك!! أكان من راسك سولا واحدة تانية نعم إنو دكتورة ناهد بتستاهل ولا مو كدي؟

Post: #44
Title: Re: آ ناس خلونا أندوبي ،،،
Author: Asaad Alabbasi
Date: 03-19-2010, 08:49 PM
Parent: #40

الطاهر ساتي هنا يا ألف مرحب: مرورك ظريف وصفقتك جميله يا ود ساتي**زي البليله البتعاشي بيها وتاتي**الدوباي نميم في بوستو أوع تخاتي**ما بتقدر عليهو عل كان بقيت بعاتي!!!

Post: #45
Title: Re: آ ناس خلونا أندوبي ،،،
Author: munswor almophtah
Date: 03-19-2010, 10:56 PM
Parent: #44

شغل الحضره دروش بى ووهدب راسى
وقلت اسوى وردن فيهو يغلق ساسى
صحح حرفى يامنصور وتم كراسى
خلينى النصبح بالقوافى واماسى

دروشة الورد حضره ونصاح يا الراسى
ومهبوش العشق قيد حالو ممكون قاسى
الزول كان طبق فوق جسمو ستين شاسى
فد لحظة غرام زى سيف تشقو تواسى

منصور

Post: #46
Title: Re: آ ناس خلونا أندوبي ،،،
Author: الطيب شيقوق
Date: 03-20-2010, 06:39 AM
Parent: #45

مولانا ود العباسي

كيفك

Quote: ومرحب بى مولانا الملك والنمة الجاية هدية ليك. أبو العويلة قال: إنقلع الموتد واتوتد المقلوع** بيت المال فقر واستغنى بيت الجوع** الزول القبيل الجدو مو متبوع** بقيت أنضم معاهو كلامي مو مسموع!! بالله يا مولانا دا مو الشي الحاصل في البلد. بعدين كان ترجمنا ما بنخرب النمة؟.

الله يباركك ويديك الفي مرادك يا ود العباسي - الكلام دا بالحيل كيفني لا سيما وانو في حضرة المانجل الملك ذواق الادب في كل ضروبه -

ارجو ان تسمحوا لي بانزال حلقة كاملة مصورة بالفديو مع ريحانة مجالسنا في الدندر ابن عمنا أمحمد ود الطيب ود الضو المكنى بعينا
كانت الجلسة في قريتنا البردانة بمنزل ابن عمنا جاه ود اللمين ود شيقوق . كان لمة بالصدفة عندما كنت في اجازتي السنوية وسط الاهل وكنا نشرب في القهوة حينها جاء حاج أمحمد لتحيتي وحلفنا عليه ان يجلس معنا وبالفعل جلس وقد كان معه هذا اللقاء الذى صوره ابني الصديق الطيب مضوى شيقوق .
تسمعون في اللقاء ورود اسم مولانا امبلي (ابن عمنا) الذى كان وقتها يعمل رئيسا للجهاز القضائي لولاية سنار .

سوف يتم انزال الجلسة في شكل حلقات بنبدأ بالحلقة الاولي :-

http://www.youtube.com/watch?v=ta5yCAASJYc

Post: #47
Title: Re: آ ناس خلونا أندوبي ،،،
Author: الطيب شيقوق
Date: 03-20-2010, 07:05 AM
Parent: #46

http://www.youtube.com/watch?v=ta5yCAASJYc

Post: #48
Title: Re: آ ناس خلونا أندوبي ،،،
Author: Asaad Alabbasi
Date: 03-20-2010, 05:04 PM
Parent: #47

شكرا يا أبوالطيب على مداخلتك الفخيمة ولوأنني لم أستطع حتى الآن مشاهدة الرابط وسأعمل حالا على مشاهدته والتعليق عليه ولكني أسألك هل مولانا أمبلي هو نفسه زميلنا بجامعة القاهرة وكان يعمل أثناء دراسته موظفا بالهيئة القضائية _ يا له من عصامي _ أم أنني قد توهمت ذلك فحقيقة طال عهدي بمولانا أمبلي. على كل أهديك أخي الطيب شيقوق ما قاله غزلا الشاعر الشاب حسن الأمين المولود في أرض البطانة في قرية يقال لها الشيب، يقول: شدر الكترة أصبح ما يغني بليبو**يذكر عقلي تنكيد اليتيم ونحيبو**ظبي العنس الفتقن قعور محريبو**أبت تبقالنا تخلاتو وقلوبنا تسيبو !!

Post: #49
Title: Re: آ ناس خلونا أندوبي ،،،
Author: Asaad Alabbasi
Date: 03-21-2010, 10:24 AM
Parent: #48

أها آناس هاكم النمة أكان تفتح عيونكم ويصحيكم من نومكم. إدريس ود مصطفى قال في الغزل: في طبع الغرام آخد سنينا عده**ما زال مني شى بل زاد جديد واشتد**ال خلاني يابس لا نزز لا كده**حسسا جوه غايس لا انفجر لا انقد!!

Post: #50
Title: Re: آ ناس خلونا أندوبي ،،،
Author: محمد على طه الملك
Date: 03-21-2010, 12:00 PM
Parent: #49

مراحب شيخ العرب..
هيييع..
ديل سياد الشيء ذاتو..
وسعولم يا شباب..
بعد كدي انقعد فراجة..

مخارجة..
قربوا مربط النعامة مني
فاليوم قد نويت الشراد

قربوا مربط النامة مني
فقد جاء أهل النم والدوباي من عهد عاد.

(شغلة الوشوش دي ماني خابرها).

Post: #51
Title: Re: آ ناس خلونا أندوبي ،،،
Author: Asaad Alabbasi
Date: 03-21-2010, 06:12 PM
Parent: #50

من المتوقع دخول الملكة سمية بت الحسن عشان تجادعكم دحين فجولا.

Post: #52
Title: Re: آ ناس خلونا أندوبي ،،،
Author: سمية الحسن طلحة
Date: 03-21-2010, 11:17 PM
Parent: #49

أسعد العباسي
السلام عليكم ولضيوفك الكرام أطيب التحايا
تجدني جد حزينة لفقد الملهم بن الملهم
بل أفذاذ مواليد وادي عبقر
الشاعر / عمر طه أحمد محمد علي ودالشلهمة
المأسوف على شبابه الذي فقدناه الأسبوع الماضي

وكم كانت له صولات وجولات في مواسم الإنتخابات كهذه

ويا د.بلة موسى عجبني نمك في بوستاتك عن الإنتخابات
دكتورنا يابلة
دائرة مستقلة
أسلو حكايتي علة
العز ليس إلا

...
لما تنكشف الغمة وأنعل إبليس بعاودكم كان بقينا حيين .

Post: #53
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-21-2010, 11:59 PM
Parent: #52

Quote: الشاعر / عمر طه أحمد محمد علي ودالشلهمة
المأسوف على شبابه الذي فقدناه الأسبوع الماضي

لا حولا ولا قوة الا بالله العلي العظيم
رحم الله الاخ والصديق عمر طه احمد محمد علي ودالشلهمة
فقد تزاملنا في الدراسة في حلفا الجديدة الثانوية في
عام 1970 عندما تم تحويل فصلنا من الخرطوم الثانوية ليكون
نواة لمدرسة حلفا الجديدة الثانوية مع فصلين آخرين من حنتوب
ووادي سيدنا في بداية عهد مايو وبعد الثانوية انخرط الاخ عمر في
التدريس في منطقته في منطقة ابرق وبعد ان توفي والده الشاعر طه
احمد محمد علي اصبح ابنه الاخ عمر شاعر القبيلة حيث برع الاخ عمر في ذلك
واصبح شعره تسري به الركبان وعمر يا اخ اسعد مسمي علي عمه عمر ودالشلهمة الذي
سبق وان تناولته انت في دراسة بعنوان اعدام شاعر نشرت في هذا المنبر
وقد امتد التواصل بيني وبين الاخ عمر في مناسبات عدة وكنت
مهتما باخباره ومتابعا لصحته حتي فوجئت اليوم بخبر وفاته
رحمه الله واحسن اليه وتجاوز عنه وانزله منزلا مباركا مع النبيين والصديقين
والشهداء والصالحين وانا لله وانا اليه راجعون

وشكرا الاستاذة الاديبة سمية الحسن فان مثل فقد عمر يلجم الالسن
احسن الله عزاءكم وتقبله في الصالحين ان شاء الله

Post: #54
Title: Re: آ ناس خلونا أندوبي ،،،
Author: Asaad Alabbasi
Date: 03-22-2010, 04:54 AM
Parent: #53

كذلك أنا يا الشامي لم تضرب مسمعي هذه الفجيعة إلا الآن رحم الله عمر والبركة فيكم يا سمية و:-- خلاس يا دنيا عزلتي ومسخ باقيكي**ما خليتي زول إلا السويق في سريكي**خبك شايفو زاد أخر بطانو حويكي**رحل ود الشلهمة وفضل القطع طاريكي..

Post: #55
Title: Re: آ ناس خلونا أندوبي ،،،
Author: Asaad Alabbasi
Date: 03-22-2010, 12:27 PM
Parent: #54

لنعود من سيرة الحزن إلى عالم الشاعر الصادق ود آمنة وغزله الذي يقول فيه: أسهامك دقاق يا سمحة الخداد**وسالباني وعلي مرضا مطول عاد**البتقمحي البي شروكو والقصاد**تاتي المشية تلي الفوق خواصرك هاد...

Post: #57
Title: Re: آ ناس خلونا أندوبي ،،،
Author: singawi
Date: 03-22-2010, 01:32 PM
Parent: #55

شِـن دخلني دارك أسعـد العبـاسي
وشِن لماني بـي بلة البيجرح وياسي
ياود موسى طريتني ومتين كُت ناسي
هيجت المعذب مـن حبايبـي وناسي

بعـد ما قُـت نسيت الليلة شن ذكرني
وشِن طراني لي جرحي الزمان عورني
كل ما أقول شفيت مـن السنين كدرني
ينـزف مـن جديـد لا طبت لا ودرني

Post: #58
Title: Re: آ ناس خلونا أندوبي ،،،
Author: الطيب شيقوق
Date: 03-22-2010, 05:47 PM
Parent: #57

هيييييييييييييع شوفوا اهلنا البطاحين كيفن بتجوجوا مع النمة

ابشري يا سمية بت الشيخ الحسن - ديل عولك

http://www.youtube.com/watch?v=23RVWD6VwGw

Post: #59
Title: Re: آ ناس خلونا أندوبي ،،،
Author: الطيب شيقوق
Date: 03-22-2010, 05:47 PM
Parent: #57

هيييييييييييييع شوفوا اهلنا البطاحين كيفن بتجوجوا مع النمة

ابشري يا سمية بت الشيخ الحسن - ديل عولك

http://www.youtube.com/watch?v=23RVWD6VwGw

Post: #60
Title: Re: آ ناس خلونا أندوبي ،،،
Author: Asaad Alabbasi
Date: 03-23-2010, 06:41 AM
Parent: #57

دعني يا سنجاوي أعود إليك بعد أن أثبت هذا المربع الذي عبر فيه الشاعر الشاب سليمان عجيمي عن أشواق المحب بطريقة أذهبت عن نفسي ذلك الإحساس بخفوت وهج الدوباي وجمالياته في العهد الشبابي الجديد ، يقول عجيمي : الليل بوبا واتخافض نواح السقده**وحبل الريده رابط في الحناجر عقده**صقرا في القلب كل حين بياخد نقده**إسمو الشوق وما بخليك تضوقلك رقده..!

Post: #56
Title: Re: آ ناس خلونا أندوبي ،،،
Author: الطيب شيقوق
Date: 03-22-2010, 12:58 PM
Parent: #54

مولانا اسعد العباسي

سلام

Quote: شكرا يا أبوالطيب على مداخلتك الفخيمة ولوأنني لم أستطع حتى الآن مشاهدة الرابط وسأعمل حالا على مشاهدته والتعليق عليه ولكني أسألك هل مولانا أمبلي هو نفسه زميلنا بجامعة القاهرة وكان يعمل أثناء دراسته موظفا بالهيئة القضائية _ يا له من عصامي _ أم أنني قد توهمت ذلك فحقيقة طال عهدي بمولانا أمبلي. على كل أهديك أخي الطيب شيقوق ما قاله غزلا الشاعر الشاب حسن الأمين المولود في أرض البطانة في قرية يقال لها الشيب، يقول: شدر الكترة أصبح ما يغني بليبو**يذكر عقلي تنكيد اليتيم ونحيبو**ظبي العنس الفتقن قعور محريبو**أبت تبقالنا تخلاتو وقلوبنا تسيبو !!

بالحيل اخي اسعد هو مولانا امبلي بابكر ابن عمي والذى يعمل حاليا بالجهاز القضائي بود مدنى

شكرا على الابيات الجميلة والرائعة

لنا عودة

Post: #61
Title: Re: آ ناس خلونا أندوبي ،،،
Author: abuguta
Date: 03-23-2010, 07:17 AM
Parent: #56

الليل امسى,,,, والبل حررنه مشهين
عقبن موية والجبل اب قرود راجيهن
دا الخلانى فرض الخمسة ما مقضيهن
رزق الدنيا والمحن البصارع فيهن

ود شورانى

عباسى

النمة بقت غالية زى خرزة الماسة
وين تلقاها مع تكبيرالنويس للساسة
مجنون انا,, اشخبط فى الارض كراسة
حال البلد جاطت ,,,,والامور حساسة

ود ابقوتة

Post: #63
Title: Re: آ ناس خلونا أندوبي ،،،
Author: Asaad Alabbasi
Date: 03-25-2010, 05:39 AM
Parent: #61

النمة بقت غالية زي خرزة الماسه**وين تلقاها مع تكسر النويس للساسه**مجنون أنا أشخبط في الأرض كراسه**حال البلد جاطت والأمور حساسه.. ود أبقوتة.__ ود أبقوتة يا ضو البلد ويا سيد ناسا**معاك النمة بتتلقي وبنلقى أساسا**خليك من جوطة البلد وعواسة الساسه**ونم نمك واطربنا وجوهنا عباسا...

Post: #62
Title: Re: آ ناس خلونا أندوبي ،،،
Author: Asaad Alabbasi
Date: 03-23-2010, 07:25 AM
Parent: #56

شن دخلني دارك أسعد العباسي**وشن لماني بى بله البيجرح وياسي**ويا ود موسى طريتني ومتين كت ناسي**هيجت المعذب من حبايبي وناسي=أسامة بابكر)سنجاوي(......... وانا بقولو: يا ود بابكر يا اللصلك في الكرم راسي**أدخل الدار بى سماحة نمك المتواسي**بتلقى بله الفحل البيجرح وياسي**وود موسى جبل الفهود الراسي....

Post: #64
Title: Re: آ ناس خلونا أندوبي ،،،
Author: الطيب شيقوق
Date: 03-25-2010, 06:29 AM
Parent: #62

Quote: بتلقى بله الفحل البيجرح وياسي

هييييييييييييع ود العباسي

نان اكان سويتها كدا ظني تكون احلى يا العشاء

بتلقى بله التلب البيجرح وياسي

Post: #65
Title: Re: آ ناس خلونا أندوبي ،،،
Author: Asaad Alabbasi
Date: 03-26-2010, 01:40 PM
Parent: #64

إت يا ود شيقوق مادامك بتعدل ما تسو!!

Post: #66
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-26-2010, 03:00 PM
Parent: #65

إت يا ود شيقوق مادامك بتعدل ما تسو!!
وجيب نظما عديل خلينا نطرب او
قريحتك فيها الكتير ما برفعولو الضو
في الحسن والحسان خاتي اللكن واللو

........
نطرب او يعني نطرب كلنا

Post: #67
Title: Re: آ ناس خلونا أندوبي ،،،
Author: Balla Musa
Date: 03-26-2010, 04:08 PM
Parent: #66

Quote: شِـن دخلني دارك أسعـد العبـاسي
وشِن لماني بـي بلة البيجرح وياسي
ياود موسى طريتني ومتين كُت ناسي
هيجت المعذب مـن حبايبـي وناسي

ياسنجاوى ياصاحبى الصميم الراسى
ماشفت المقششششط بالتغنج كاسى؟
قمر دورين على كفلو المهدل كاسى
بى طيب فاهو كيف كل مزاجات راسى

مشرك ليهو بى قلبى وبكاى واحساسى
وبغنى ليهو كيف (تسلانى تصبح ناسى)
موسط ليهو منصور واسعد العباسى
و ايضا ساق دلالو وصد واصبح قاسى

Post: #68
Title: Re: آ ناس خلونا أندوبي ،،،
Author: Balla Musa
Date: 03-26-2010, 09:47 PM
Parent: #67

Quote: تجدني جد حزينة لفقد الملهم بن الملهم
بل أفذاذ مواليد وادي عبقر
الشاعر / عمر طه أحمد محمد علي ودالشلهمة
المأسوف على شبابه الذي فقدناه الأسبوع الماضي

وكم كانت له صولات وجولات في مواسم الإنتخابات كهذه

حليل شعرا السنين الولت
حليل ناس (عقدة الليل بالشعاع انحلت)
الموت حق وسيفو على رقابنا مصلت
وروحك ياعمر فى الجنه فوق اتعلت

بشوف بى فراقو ايد النمه تب انشلت
والقافيه البتبكى دموعا للتوب بلت
بت الشيخ حزنا عليهو يمشى متلت
يارب ارعى روحو الطاهره عندك حلت

Post: #69
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-26-2010, 09:55 PM
Parent: #68

Quote: حليل ناس (عقدة الليل بالشعاع انحلت)

يشير الشاعر بلة موسي الي ابيات نظمها الشاعر طه ود الشلهمة والد
الفقيد عمر وفيها يقول ود الشلهمة:

نومي وصبري بلين والمعاهن قلّت
وفاقد المنو ملسوع الفؤاد وانعلّت
احسّب في النجوم الطالعة والادلّت
لامن عقدة الليل بالشعاع انحلت

Post: #70
Title: Re: آ ناس خلونا أندوبي ،،،
Author: Balla Musa
Date: 03-26-2010, 10:08 PM
Parent: #69

انا يا الشامى قلبى مجلخ
بعد شدر المسادير بالفراق اتفلخ
النمه بتسكل وبالرديح تتملخ
ووجه القافيه بالدمع الغزير اتسلخ

Post: #71
Title: Re: آ ناس خلونا أندوبي ،،،
Author: Asaad Alabbasi
Date: 03-27-2010, 05:39 AM
Parent: #70

ومن أجمل ما وقعت عليه في فن الرثاء الشعري في الدوبيت مربع للصادق حمد الحلال يقول فيه : يا توب العرايا الهموا من البرد**يا حوض العطيش وين الضمايا بترد**الموت يا عظيم حقا مؤجل فرض**هجيمتك تفلخ الصخرة وتهز اللرض...

Post: #72
Title: Re: آ ناس خلونا أندوبي ،،،
Author: singawi
Date: 03-27-2010, 10:51 AM
Parent: #71

يا ود موسى تـاج راسي وأمير جُلاسي
ردك ليَ دشـدش كل سِنَـج مقيـاسي
بي طيب فاهو قُت كيف مزاجات راسي
وأيضاً ساق دلالو وصد وأصبح قاسـي

يا ود موسـى مـن طبعو الغزال جفَال
مشرَك ليهـو لكـن ما بتصيدو حبـال
كـل ما أقول أبلغو شـوق قليبي الطال
ألقى سلامي كيف عاملين وكيـف الحال

Post: #73
Title: Re: آ ناس خلونا أندوبي ،،،
Author: Asaad Alabbasi
Date: 03-28-2010, 05:20 AM
Parent: #72

إبداع يا سنجاوي إلا ني ما مذكور! على كل أود أن أستشيرك والمتداخلين هل يجدر بي أن أثبت هنا أشعار قالها الحاردلو وأخيه عبد الله أبوسن عن إنسحاب الخليفة التعايشي بعد واقعة كرري كما أثبتها الأستاذ الدكتور أحمد إبراهيم أبوسن في كتابه تاريخ الشكرية ونماذج من شعر البطانة أم أحجم عن ذلك مع العلم أنها مربعات قاسية صيغت في قالب فكاهي؟ أنا في إنتظار ردودكم.

Post: #74
Title: Re: آ ناس خلونا أندوبي ،،،
Author: زول ساكت
Date: 03-28-2010, 07:27 AM
Parent: #73

عوافي آآآآآناسنا هاكم دي من عكير الدامر وبنجيكم كان الله هون

سرورك ما بتم عاقباهو ديــــمة الفجعـــــــة

وظاهرك ليـــــنا سكر الا طعمك وجعـــــــة

كم طفشتي مرتــــــاح وقلبو مابي الهجعــــة

روحو تشابي وانت قطعت خـــط الرجعــــه

.....

تقابلك عروس تعشق معانــــي رقيصـــــــه

تملاك بالمحبة وتمشي نازله نقيصـــــــــــه

ما يغريك دلاله وتوب جمال بلقيســــــــــــه

عاين للقبور وبعدين سماحـــته بتقيســــــــه

...

بتقابلك جنينة تمتعك بي ثمــــــــــــــــاره

وترقد في امانا وتنهمك بعمـــــــــــــــارا

باكر تبقى ليك حنضل تشوفو دمــــــــارا

تسحب منك .... وتدق مسمـــــــــــــــاره

...

زولاً شاف رقاد العبروهو مشبــــــــــــر

والزول البرص فى الطوب ووشو مغبر

إتأكد دة بكرة مصير غير إتكبـــــــــــــر

إنسى الموت والمــــال والبنون إتبتــــــر

...

دى الغدارة دى الحقارة دى العقـــــــارة

كم قلبت زغاريد عرسه بي نقــــــــــارة

أعلِنا بالحرب قبال تشب الغـــــــــــــارة

وقبل الروح تغرغر وتبقى في الغرغارة

...

إتغشينا بي حبك لبسنــــــا عبايــــــــــــة

يا موية الرهـــــاب الما ملت كبايــــــــة

عجيب يا دنــــيا أمرك الا نحنا غبــــاية

عاشقين الجمــــال في لمعة الحربايـــــة

Post: #75
Title: Re: آ ناس خلونا أندوبي ،،،
Author: singawi
Date: 03-28-2010, 11:12 AM
Parent: #74

الحبيب أسعد العباسي

Quote: إبداع يا سنجاوي إلا ني ما مذكور

بالحيل مذكور بين السطور . الدار دارك ، والنم تحت شدرة مقيلك
أما بخصوص استشارتك الكريمة حول نشر أشعار الحاردلو وأخيه عبد الله أبوسن عن إنسحاب الخليفة التعايشي بعد واقعة كرري فإن كانت قاسية بالحيل في حق قامة في مقام الخليفة المجاهد الشهيد سيدي عبد الله ود تورشين التعايشي فأفضل عدم نشرها على الملأ ولكن ما تحرمنا منها ومن طلبها في الخاص [email protected] من باب العلم والإحاطة.

Post: #77
Title: Re: آ ناس خلونا أندوبي ،،،
Author: Asaad Alabbasi
Date: 03-29-2010, 00:43 AM
Parent: #75

الأخ سنجاوي المربعات بالفعل تقسو قسوة شديدة على الخليفة عبد الله التعايشي ونزولا على رغبتك فإنني لن أنشرها هنا إلا برضائك كما لا أجد مبررا لإرسالها لك دون الآخرين على أنه يمكنك ويمكن لغيرك الإطلاع عليها وهي تبلغ ستة مربعات بكتاب الدكتور أحمد إبراهيم أبوسن )تاريخ الشكرية ونماذج من شعر البطانة( بصفحتي مئتين وواحد وإثنين وستين الطبعة الأولى لسنة ألفين صدرت عن مطبعة التمدن الخرطوم.

Post: #76
Title: Re: آ ناس خلونا أندوبي ،،،
Author: Asaad Alabbasi
Date: 03-28-2010, 11:45 PM
Parent: #74

أخونا عباس مرحب بيك آ زول ما لك بدور تقلب علينا المواجع بي دوبيت عكير الله يعكر مزاجك! لقد كتبت كثيرا عن عكير الدامر بحب فقد أجاد هذا الرجل كل ضروب الشعر القومي وله إعجاز شعري غير مسبوق إذ أن قافيته الشعرية تجيئ دائما بلزوم ما لا يلزم وله في باب الرثاء نظم فريد فبالله عليك أنظر إلى مربعه الذي ورد في مرثيته لصديقه إبن حلفاية الملوك أحمد ود البيه الذي قال فيه: حلفاية الملوك الليله وينو حفيدك ** ود البيه البريد الضيف قدر ما بريدك ** في كوم الرماد الليله غطسي إيدك ** أمسحي جبهتك وبالفروه أربطي جيدك ....

Post: #78
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-29-2010, 01:16 AM
Parent: #76

Quote: فإنني لن أنشرها

حسنا فعلت يا اخ اسعد
فالابيات التي قيلت في حق الخليفة عبدالله
قاسية جدا ومهما يكن فقد اصبحت تلك الفترة جزءا من تاريخ السودان
والتبخيس لها ولرموزها مهما كان الخلاف معهم هو تبخيس لجزء من تاريخنا
ولكن هناك ابيات قالها الحاردلو لترئة الشيخ عمارةامام الخليف وقيلت
الابيات في حضرة الخليفة يعقوب وقالها الحاردلو وهو يجول ببصره بين الخليف
عبدالله ويعقوب وقد نجح ابوسن في تقديم مرافعة شعرية رائعة اسهمت
في النهاية في انقاذالشيخ عمارة من موت كان محققا ومن هذه الابيات يقول مخاطبا
الخليفة عبدالله:
انصارك كتار تامين عبرة الكيل
وزي نبت الربي وكتين ركوب الخيل
كان مو جور زمان وناسن نظرها قليل
شرك ام قيريدون كيفن بقبض الفيل
فكانت هذه الابيات كافية لان تضحك الخليفة عبدالله حتي تبدو نواجزه
ويعفو عن ابوسن رغم تحفظ الخليفة يعقوب

Post: #79
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-29-2010, 01:16 AM
Parent: #76

حذفت المشاركة للتكرار

Post: #80
Title: Re: آ ناس خلونا أندوبي ،،،
Author: على احمد النعيم
Date: 03-29-2010, 07:17 AM
Parent: #79

Quote: ياسنجاوى ياصاحبى الصميم الراسى
ماشفت المقششششط بالتغنج كاسى؟
قمر دورين على كفلو المهدل كاسى
بى طيب فاهو كيف كل مزاجات راسى

مشرك ليهو بى قلبى وبكاى واحساسى
وبغنى ليهو كيف (تسلانى تصبح ناسى)
موسط ليهو منصور واسعد العباسى
و ايضا ساق دلالو وصد واصبح قاسى [/QU

الاخ الكريم دكتور بله موسى
شكراً جزيلاً حد الثمالة على هذا النظم الجميل.

ثم شكرى بلا حدود لصاحب البوست الاخ المفضال اسعد العباسى الذى اتاح لنا هذه السانحة لنروى نفوسنا الظمأى من هذا المعين الذى لن ينضب.

والشكر ايضا موصول للاخ الكريم منصور المفتاح ولكل المتداخلين الكرام

وبعدين يا العباسى على الطلاق الما بخليك تدوبى إلا افتح فيهو قضية
ياخى نم قول وهاك دى :

ما بفوت على الدور بعرف الواقع
عواف للعكر ضايق شراب الناقع
العرطمتو زى تبر البطانة الفاقع
اصلو آخر المطر فى عريج بجيبلو صواقع

(هل تصدق انو قالها تلميذ فى الثانوى نسيت اسمه)

اكرر شكرى الجم والتحيات بلا حدود
وان نميتو بنم معاكم لامن لساننا يبقق

يا سلام يا بله موسى (نبيح الليل عليك صبّح لسانى مبقق) شوف الكلام القالو الولهان فى الزوله دى عليك الله

Post: #81
Title: Re: آ ناس خلونا أندوبي ،،،
Author: singawi
Date: 03-29-2010, 12:32 PM
Parent: #80

العباسي السلام جاك

كتر خيرك وبارك الله فيك على عدم النشر . لأنه كتير في حق الخليفة وعقابه . ونبش لجهويات تجاوزها هو عين العقل وفقه المرحلة .
أنا يا عشاي قلتلك ( ولكن ما تحرمنا منها ومن طلبها في الخاص ) وكان القصد ما تحرمني أنا في تولا دي وما تحرم من طلبها في الخاص من باب العلم وكدا) وقد سبق نشرها في هذا المنبر قبل كم سنة واطلعت عليها ولكني لم أحفظها والبقوقل مااا بتووووه . دارنا نحن قريبة ليييك ، انت ما مجبور علينا ، نحن مجبورين عليك .

تحياتي وأطيب أمنياتي

Post: #82
Title: Re: آ ناس خلونا أندوبي ،،،
Author: Asaad Alabbasi
Date: 03-29-2010, 05:28 PM
Parent: #80

ديا ود أحمد النعيم سلام وأهلا بيك لكن الصواقع الجايبا لينا دي شنو ..دحين هاك نمة راشد ود العمدة كرار اللطيفة دي. بقول : جاهل ظرفي لكني عارف ظرفو ** قلبي وقلبو ما بين بالحصل يعترفو ** ريدي أنا ليهو كان درسو وقراهو وعرفو ** زي شيك البنوك في أي لحظه يصرفو....!

Post: #83
Title: Re: آ ناس خلونا أندوبي ،،،
Author: الشامي الحبر عبدالوهاب
Date: 03-29-2010, 05:42 PM
Parent: #82

Quote: زي شيك البنوك في أي لحظه يصرفو....!

الكلام دا يا اسعد كان بدري قبل ما تظهر الشيكات الطائرة

Post: #84
Title: Re: آ ناس خلونا أندوبي ،،،
Author: Hassan Makkawi
Date: 03-29-2010, 08:06 PM
Parent: #83

Quote: إنقلع الموتد واتوتد المقلوع**
بيت المال فقر واستغنى بيت الجوع**
الزول القبيل الجدو مو متبوع**
بقيت أنضم معاهو كلامي مو مسموع!!

الزول القبيل الجدو مو مبيوع
فاتح خشمو ساااااى مستنظر المجدوع
والجادع أبى... قال ليهو غير مشروع
بس الزول إنتكس داير يفك الجوع

____________________

مرتجل رجالة يا عباسى

Post: #85
Title: Re: آ ناس خلونا أندوبي ،،،
Author: الطيب شيقوق
Date: 03-29-2010, 08:17 PM
Parent: #84

Quote: إت يا ود شيقوق مادامك بتعدل ما تسو!!

انا ما بعرف بسو يا العشاء لكن عندي المجس بجس وبعرف البضاعة السمحة

Post: #86
Title: Re: آ ناس خلونا أندوبي ،،،
Author: Hassan Makkawi
Date: 03-29-2010, 08:32 PM
Parent: #84

وجيناك يا سعيد يا خلفة العباسى
الزول الأصيل ما عمرو يصبح ناسى
دوبى...!! الدنيا دابت ودوبت كرياسى
الخوة إنتهت بقت الحكاية كراسى

_____________________________

مرتجل

Post: #87
Title: Re: آ ناس خلونا أندوبي ،،،
Author: Asaad Alabbasi
Date: 03-29-2010, 09:40 PM
Parent: #86

الشامي وشيقوق ومكاوي بدور أنملكم من خواتيم المسادير السعيدة، في نهايات مسدار القضارف صاغ الشاعر أحمد عوض الكريم أبوسن مربعا شعريا بدهاء وهو يعكس لنا ما همست به المحبوبة عند اللقاء بعد طول غياب. قال على لسانها: تقول لي يا ولوف طول غيابك ** تلاته شهور تمام معروف حسابك ** دحين وكتين حضر والمولى جابك ** أقيف لا تلجلج النوريك حسابك! برجعلكم تاني بى نهايات سعيدة زي دي دحين إتحضروا.

Post: #88
Title: Re: آ ناس خلونا أندوبي ،،،
Author: Asaad Alabbasi
Date: 03-29-2010, 10:37 PM
Parent: #87

وأحمد عوض الكريم يدهشنا عندما يرتاد المعاني التقليدية في نهايات المسادير السعيدة فبعد سفر طويل أناخ جمله عند أسوار منزل الحبيبة التي سارعت وأمرت بأن أن يحمل عن ظهر الجمل العتاد ثم أحضرت الغذاء للجمل بعد ذلك لنرى ماذا قال شاعرنا ود أب سن : قال لى زولو بالله دلي شديدو ** ميز عدتو وريح ضماير سيدو ** دخل الحوش رمى فيهو الملولب قيدو ** جابلو علوقو واتسلينا بالبنريدو!!

Post: #89
Title: Re: آ ناس خلونا أندوبي ،،،
Author: Asaad Alabbasi
Date: 03-29-2010, 11:15 PM
Parent: #88

ولود شوراني نصيب في النهايات السعيدة للمسادير وهي لحظات الوصال. قال في مسداره الطربان: ضراع واسع الصي اب عدار وشقوق ** هجم الراقي رايق طبعو مو ملقوق ** قلتلو أجلس خلي ذهوني تروق ** قال لي الليل طويل وكت الإنس ملحوق!!

Post: #90
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 04:05 AM
Parent: #89

ويقول ود شوراني أيضا : أخدنا الليل طرب بى تفنن غير عله ** تمتم كيفي تيس قنه أب حديدا شله ** أنا والديسو لى عند المتاني مدلى ** نومنا بقالنا من بعد الإمام ما صلى!!

Post: #91
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 04:39 AM
Parent: #90

أهل الدوبيت الأفذاذ يجيدون الوصف ويستحيلون عنده إلى شياطين شعر إذا ما استحال عليهم الوصف! قال أحد شياطينهم : غنايك وقف عند العيون غلبنو ** وعاقدات حاجبك آ الدرعه الكلام خلبنو ** مادام عقلي شلتي وقلبي ما في لأنو ** عندك من زمان عاد الوصف كيفنو!!

Post: #92
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 06:32 AM
Parent: #91

آناس مالكم من البارح مخلني آدوبي براي؟! ما عندي مانع ودحين أسمعوا القصة دي: مهالك جارية حسناء لم يخف شاعرنا أحمد عوض الكريم أبوسن إعجابه بها وهو إعجاب صار إلى غضب عندما رآها ترافق الرجرجة والدهماء{الأشاوات} فقال يعاتبها: سميتك رئيسة جيل وقلت مهالك ** أبت ما ترضى نفسك لى البليق بى حالك ** يا بريبة النقعة أم ضميرا سالك ** ماك حق الأشاوات يا جنيبة مالك.... وعندما تناهى هذا العتاب إلى مسامع صديقه الشاعر ود شوراني رأى أنه قد تحامل كثيرا على تلك اليافعة التي لا تقوى على مثل هذا العتاب فقال يخاطب ود أب سن: ود أبو ستنا الناس الرتوت وبعرفو ** ليش بتنبز الفي الصيف مخدر جرفو ** متين بلوموا متين قادوا ومشي القيد عرفو ** ومتين إتولف اللى الروح بردها كرفو!!

Post: #93
Title: Re: آ ناس خلونا أندوبي ،،،
Author: زول ساكت
Date: 03-30-2010, 07:04 AM
Parent: #92

ودشوراني ياشيخنا العباسي

شال برق البطين وقعن دبادبو ورشـُّو
وين النايرة يــــــا خـِلاَّي مراية وشـُّو
لونو العسجـــــد الصـُـياغو ما بنغشـُّو
نظرتو بترهـِب المجلس قويهو وهشـُّو

Post: #95
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 12:29 PM
Parent: #93

ود شوراني يا عباس يعتبر من شعراء المسادير يجري في ذلك في قرن مع شاعرنا أحمد عوض الكريم أبوسن ويبدو لي أن ما أوردته له هو مربع من مسداره النجوم والطوالع الذي ضمنه مربعه الرائع : دخل نفس الغفر سارق نسيم وهبيب ** جاي يعور الجرح القبيل مو طيب ** لجت عيني حار بيا الدليل يا مصيب ** من اللدعج الفوق ريدو أصحى واغيب!!

Post: #94
Title: Re: آ ناس خلونا أندوبي ،،،
Author: الطيب شيقوق
Date: 03-30-2010, 07:53 AM
Parent: #92

Quote: برجعلكم تاني بى نهايات سعيدة زي دي دحين إتحضروا.

نتابع وفي انتظارك

اقيمت محاضرة في بدايات هذا الشهر (مارس 2010 ) بنادي الجالية السودانية بمسقط كانت بعنوان (اضواء على الشعر السوداني ) وقد شارك في المحاضرة عدد من الشعراء العمانيين وقد كانت الاخت سمية الحسن طلحة من المشاركين في هذه المحاضرة وقد ابدعت ايما ابداع عندما تحدثت عن الشعر السودانى وقدمت عرضا عن الغابة والصحراء للنور عثمان ابكر .

اعجبني حقا عندما عرجت الاخت سمية لتحكي عن شعر البطانة مع بعض التركيز والتحليل على هذه الابيات من شاعر البطانة ود الشلهمة
نومي وصبري بلين والمعاهن قلّت
فاقد المنّو ملسوع الفؤاد انعّلت
احسب في النجوم الطالعة والادلّت
نامن عقدة الليل بالشعاع انحلّت

وفي معرض ردها على طلب احد المتداخلين افادت الشاعرة سمية ان هذه اللوحة تستوقف ارباب العقول من الشعراء والباحثين وقد تستوقف الفنان التشكيلي هذه الالوان (بياض النهار وسواد الليل) وايضا قد تستوقف علماء الاجتماع او علماء النفس
هذه العقدة ، كما تستوقف كثافة الظلام التي تحل بمحلول اقل كثافة وهو شعاع الضؤ المختصين في علم الكيمياء.

Post: #96
Title: Re: آ ناس خلونا أندوبي ،،،
Author: على احمد النعيم
Date: 03-30-2010, 12:38 PM
Parent: #94

هاك دى يا العباسى

قدمك يسعد الساحه الخدارها مشيط
كفلك عالى اردافك تفر وتخيط
دغمة خشمك الضحوى السحابو مبيت
التوب فى الصدر موجاً مقاصر الميت

تخيل معى عندما يثير الهواء موجاً خفيفاً فى بركة ماء جفاها التيار !!!

ولك ودى وتحياتى بلا حدود

Post: #97
Title: Re: آ ناس خلونا أندوبي ،،،
Author: هشام المجمر
Date: 03-30-2010, 01:02 PM
Parent: #96

كأنو الهمبريب الليلة غشانى خدرالحبيب

ذكرنى فوسيبة الخلا ام صدرا مهيب

ذكرنى الدرة الكلامها يطيب

لو ما الخجلة و العمل البعيب

كت نميت ليكم شيتا اشيب

Post: #99
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 01:24 PM
Parent: #96

آ زول آ ود النعيم آ شقي المربع ده نكتو من وين حرم صاقعة وموت عديل.

Post: #101
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 01:51 PM
Parent: #99

يا ود النعيم في شان المربع عجبني شديد عملت حوله بحث سريع فإتصلت بالشاعر الراوية الشكري مصطفى أبو الشيخ فقال لي أن هذا المربع للشاعر عبد الله ود حسوبة ورواه لي برواية تختلف قليلا عن روايتك فقاله لي كما يلي : صباحك إسعد الساحة الخدارا مشيط ** وفر بسمك البرق السحابو مبيت ** التوب فوق السدر موجا مكاض الميت ** كفلك عالي أردافك تفر وتخيت....

Post: #98
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 01:03 PM
Parent: #94

سمية دي يا شيقوق بى مية راجل وهي من الوجوه التي تشرف الوطن في المهجر، أرجو أن تكون قد تجاوزت أحزانها لترفد هذا البوست بإبداعها.

Post: #100
Title: Re: آ ناس خلونا أندوبي ،،،
Author: Balla Musa
Date: 03-30-2010, 01:46 PM
Parent: #98

Quote: يا ود موسـى مـن طبعو الغزال جفَال
مشرَك ليهـو لكـن ما بتصيدو حبـال
كـل ما أقول أبلغو شـوق قليبي الطال
ألقى سلامي كيف عاملين وكيـف الحال

ياسنجاوى ظبى النال
بعد خلاك تتمتم خلانى مشغول بال
درويش حضرتو الكل يوم ببيت فى حال
يقضى الفرض نايح والدموع انفال

Post: #102
Title: Re: آ ناس خلونا أندوبي ،،،
Author: Balla Musa
Date: 03-30-2010, 02:06 PM
Parent: #100

Quote: يا سلام يا بله موسى (نبيح الليل عليك صبّح لسانى مبقق) شوف الكلام القالو الولهان فى الزوله دى عليك الله

كل ما اقرا لوحو وفى صفاتو ادقق
يصبح منو توب صبرى النصيح متشقق
يا على ود نعيم المنو تب متحقق
اوراد اسمو بتعالج اللسانو مبقق

Post: #104
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 02:19 PM
Parent: #100

ويا ود النعيم وعلى وصف الكفل الذي ورد في مربع ود حسوبة قال الشاعر علي ود يس وكان القدر قد ألقى على دربه فتاة حبشية تدعى(تحنس) بعد أن بلغ من العمر عتيا: أف يا تحنس يا ام جمالا فرضه**ما لقيتك قبيل يا من بقيت عود أرضه**خدادك كهارب وحزمتك منقرضه**وكفلك عالي تمشي الفرده مابيا الفرده!!....أبو الزفت!!

Post: #106
Title: Re: آ ناس خلونا أندوبي ،،،
Author: الطيب شيقوق
Date: 03-30-2010, 03:27 PM
Parent: #98

Quote: سمية دي يا شيقوق بى مية راجل وهي من الوجوه التي تشرف الوطن في المهجر، أرجو أن تكون قد تجاوزت أحزانها لترفد هذا البوست بإبداعها

الله يخليك يا ود العباسي

الاخت سمية مشغولة هذه الايام بإمتحانات الاولاد وستعود للكتابة قريبا ان شاء الله

Post: #103
Title: Re: آ ناس خلونا أندوبي ،،،
Author: tahani abusin
Date: 03-30-2010, 02:14 PM
Parent: #1

العباسى السلام.
النم هيلك مو جديد بس لكن واللةيا اسعد ضحكتنى
(الناس فى شنو واسعد العباسىفى شنو)
سلامى

Post: #105
Title: Re: آ ناس خلونا أندوبي ،،،
Author: tahani abusin
Date: 03-30-2010, 02:29 PM
Parent: #1

العباسى سلام
النم هيلك يا اخوى ما جديد نم ساى
بس لكن واللة يا اسعد ضحكتنى جدا
(الناس فى شنو واسعد فى شنو)
هذا مع المودة

Post: #107
Title: Re: آ ناس خلونا أندوبي ،،،
Author: Asaad Alabbasi
Date: 03-30-2010, 05:17 PM
Parent: #105

حباب بت أبوسن جيدا جيتي لكن ما تضحكي علي عشان أنا بنم والناس في الإنتخابات النمة بتنفعنا وبتعالج الضغط وسياسة ها الأيام بترفع الضغط ولأن ما أشبه الليلة بالبارحة أود تذكيرك بما قاله ود رانفى بعد أن رأى بعيد الإستقلال ما آل إليه الحال واختلاط الحابل بالنابل وفوضى الإنتخابات والتردي السياسي والفوضى الشاملة وأراد تذكير الجميع بماضيهم وفرسانهم الأوائل الذين ضحوا بأرواحهم من أجل إستقلال هذا الوطن وعزته، قال : حليل أهلك البردوك قبيل**داهجين المدافع بى صدور الخيل ** قبال التصاويت والبهادل ديل**ما شافوا الأضافر في جوامع السيل.... أها يا تهاني ما كتلت ليك ضحكتك؟!