لاموية تبل الريق ولا أملآ يطمئن أريت وطنى يبقى مروى وانا البى كلو هين..

Post: #1
Title: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-13-2010, 07:11 PM

فى إجازة قصيرة للوطن..لمدة ستة أيام..

والبلاد تستعد للأنتخابات وألطلبة يستعدون للأمتحانات..

فكرت ان أذهب لآرفع من معنويات أسرتى ومساعدة زوجتى التى تحمل أعباءآ كثيرة وافاجأهم بطلتى لمدة

قصيرة ولكن كبيرة فى معناها رغم عدم غيابى عنهم لفترة طويلة..

لم يخرب البرنامج إلا إنقطاع الماء..

سأواصل..بأذن الله..

Post: #2
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-13-2010, 07:16 PM
Parent: #1

أكرمتنى البلاد بيومين حلوين ..رغم أن موسم الصيف لم يحين إلا انى أستمتعت بحمام تحت الدش..

وبعد ذلك بقينا نبحث عن الماء حتى جاز لنا التيمم...

Post: #3
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-13-2010, 07:26 PM
Parent: #2

أحمد وصلاح من شدة الشطف بالخرطوش عشان يساعد الموتور قامت ليهم وجنات....

إلى متى سوف يظل هذا الحال...؟؟؟

Post: #4
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-13-2010, 08:09 PM
Parent: #3

اخي اسماعيل عباس

تحياتي والف حمد الله على السلامة

Quote: أحمد وصلاح من شدة الشطف بالخرطوش عشان يساعد الموتور قامت ليهم وجنات....

يا اخي حرام عليك دى كانت نفس مشكلتي التي شفقتني على اولادي

العام الماضي سافرت القاهرة وما لقيت فيها ارخص من الموتورات

موتور بلحس ليك الموية من سقط لقط قيمتو لا تزيد عن 250 الف جنيه سوداني بالقديم وبعديهو شديقات الاولاد رجعن زى ما كانن

معزتي

Post: #5
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-13-2010, 08:24 PM
Parent: #4

أخى الطيب,,لك التحية والتقديرعلى مرورك الجميل..

شكرآ على النصيحة ورسل لى ماركة الموتورألبجيب الموية من سقط لقط ده..ولك ألأجر إن شاء الله...معزتى الشديدة ..وتحياتى لآسرتك الكريمة...

Post: #6
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: خالد المحرب
Date: 03-13-2010, 08:44 PM
Parent: #5

الاخ اسماعيل اتمنى لك اجازه سعيده انا جيت يوم الاحد راجع من الخرطوم
لكن لفت انتباهى وجود بعض الاوساخ والطفيليات فى موية الماسوره مما اصابنى
ببعض الاطرابات فى المعده والمغص وقلبت جلود عديل كدا ولفت انتباهى طعم غير طبيعى فى مياه الشرب
ومن هنا ارجو من الله ان يعين الاطفال تحياتى لكل افراد الاسره

Post: #8
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: معاوية المدير
Date: 03-13-2010, 08:59 PM
Parent: #6

Quote: إلى متى سوف يظل هذا الحال...؟؟؟

اصبر وأحتسب أخي إسماعيل،
وإن كا بيدك فسيل وقامت الساعة فأغرسه.

إن شاء الله الوِليدات وأُمهن أرجوك طيبين.

لك مودتي وسلامي يا سمح يا زين...

Post: #7
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-13-2010, 08:53 PM
Parent: #5

Quote: شكرآ على النصيحة ورسل لى ماركة الموتورألبجيب الموية من سقط لقط ده..ولك ألأجر إن شاء الله...معزتى الشديدة ..وتحياتى لآسرتك الكريمة...

ات قايل اخوك بقرأ الماركات ؟ وحياتك بخمش ساى بس قاطع الشك انو ايطالي وقيمته لا تتجاوز 250 الف جنيه بالقديم ووحياتك عطش امبدات كلها لحس مويتها خلاهم على عجل الحديد .

ات وصى حد قول ليهو ايطالي وقيمة هكذا وانت وحظك

لو عايز الماركة من البيت بكرة بدق ليهم بجيبوها لينا

Post: #9
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: سيف الدولة كامل
Date: 03-13-2010, 09:13 PM
Parent: #7

العزيز السمح \اسماعيل عباس ,,, سلامات

البركة بي شوفة الاولاد ,,الحمام هين كان خفست البحر واخدليك فجة بترتاح.

المهم الاولاد وامهم بخير وعافية,, وربك كريم ان شاء الله يسهلها عليهم.

Post: #10
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الشفيع وراق عبد الرحمن
Date: 03-13-2010, 09:40 PM
Parent: #9

الله يطمنك يا ود عباس
انا نازل الشهر الجايي يعني الفح لي معاي موتور من حقات ود شيقوق
ما تقول نحن ناس امبدة وهي خلقة كده مويتها شوية وممحوقة
حمداً لله على السلامة وبركة الشوفة

---------------
عندك زول ممتحن شهادة السنة دي؟
اخوك مزنوق عندي جوز احمد اساس وعلاء شهادة وممتحنين local في السفارة هنا

Post: #11
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 09:00 AM
Parent: #10

أخى خالد السلام عليكم وألف حمدآ لله على السلامة...

Quote: لكن لفت انتباهى وجود بعض الاوساخ والطفيليات فى موية الماسوره مما اصابنى

أن تأتى بطحالبها خيرآ من أن لا تأتى....ممكن تتم معالجتها إذا هى موجودة...الله يكون فى عون أهلنا ...

Post: #12
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 09:21 AM
Parent: #11

الاخ الشفيع

سلامي

Quote: انا نازل الشهر الجايي يعني الفح لي معاي موتور من حقات ود شيقوق

عليك بشارع نجيب الريحاني في القاهرة المولدات فيهو هبطرش اخمش بس وتعال عشان تشوف خمشو في الموية

بس النار يوم القيامة قبض إيييييييييييد .

Post: #13
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 09:42 AM
Parent: #12

أخى/العزيز معاوية المدير...............لك التحية والود..

Quote: لك مودتي وسلامي يا سمح يا زين...

ولك أطنان من مودة ومن تقدير......نحن محتسبين والحمدالله...نسأل الله ان يسقينا شربة بيد حبيبنا المصطفى يوم القيامة لانظمأ بعدها أبدآ..

Post: #14
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الشفيع وراق عبد الرحمن
Date: 03-14-2010, 09:43 AM
Parent: #12

Quote: بس النار يوم القيامة قبض إيييييييييييد

يا زول نحنا عندنا خزان كبيييير وخرتوش اتنين بوصة كابي في الشارع 24 ساعة ، يعني بنشرب ونسقي الجيران ، بس كدي النلم في عضمها يا ود شيقوق
القاهرة دي بعيدة يا زول ، الرياض دي اي لعنة موجودة فيها ، انت بس اجدع لينا الماركة والموديل
تحياتي

Post: #56
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الرفاعي عبدالعاطي حجر
Date: 03-15-2010, 04:46 PM
Parent: #11

اسماعيل

حمداً لله على السلامة

وعلى كل حال لو شغلت عنه

نازعتك اليه نفسك العنوان بديع

وين التنمية والنهضة والنفرات الكدابة .

..............................حجر.

Post: #15
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Yousif A Abusinina
Date: 03-14-2010, 09:44 AM
Parent: #10

الاخ العزيز / اسماعيل

حمد لله على سلامتك

واحد ملقوف زى اتصلت عليك سكت الجوال فرت سكتة تانى مانطق تاريك كنت عطشان الحبيب

تانى يوم عرفت من الشياب بعد كم انك سافرت

الحمد لله على شوفت العيال وامهم والباقى مقدور علية بتدبر باذن الله

تحياتى ومودتى

وخليك من زول الجنى موتورات بالجيب الموية من سقط لقط كان شاطر وبعرف اجيبها ما كان نفد بجلدوا ههههههههه الكاشف اخوى شيقا

Post: #16
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Mohamed Abdelgaleel
Date: 03-14-2010, 09:52 AM
Parent: #15

اسماعين .. تحياتي،

يا زول الجاتك في مويتك سامحتك ..

إنه وطن جميل .. رغم أنو الموية بتقطع
وفيها حترب على قول ود المحرب ..

وفيهو النيل النيل الخالد ...

والانتخابات قربت .. هي الانتخابات بمويه يا لطيف
بدون مويه حتكون كيف؟!

Post: #17
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الامين موسى البشاري
Date: 03-14-2010, 09:52 AM
Parent: #15

الشفيف اسماعيل عباس

ســــلامي وتحياتي
Quote: فى إجازة قصيرة للوطن..لمدة ستة أيام..
فكرت ان أذهب لآرفع من معنويات أسرتى ومساعدة زوجتى التى تحمل أعباءآ كثيرة وافاجأهم بطلتى لمدة

نتمنى لك إجــــــازة سعيدة وممتعة بين الأهـــل
وهذه ســـتكون احلى مفاجأة لهم ....
حفظك الله في حلك وترحالك اخـــي

كن وأفراد الأســـرة بخير

Post: #18
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 10:10 AM
Parent: #15

أخى الشفيع...السلام عليكم....الله ينجح ألأولاد يارب...

Quote: الله يطمنك يا ود عباس
انا نازل الشهر الجايي يعني الفح لي معاي موتور من حقات ود شيقوق
ما تقول نحن ناس امبدة وهي خلقة كده مويتها شوية وممحوقة
حمداً لله على السلامة وبركة الشوفة

يا اخوى أنزل يالسلامة نحن عايشين على ألأمل وأملنا فى الله كبير..يعنى نحن احسن من الناس البتعانى هناك دى...

أنا وكثير من أهل المنطقة قالوا البوفر لينا الموية بنديهو صوتنا.. ..نحن ماعايزين غير حاجات بسيطة..وماطمعانين فى الدنيا دى...بس ما نموت بالعطش..والنيل جنبنا خجلة شديدة والله..

الله يكون فى العون..

Post: #19
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 10:45 AM
Parent: #18

الشفيع

Quote: يا زول نحنا عندنا خزان كبيييير وخرتوش اتنين بوصة كابي في الشارع 24 ساعة ، يعني بنشرب ونسقي الجيران ، بس كدي النلم في عضمها يا ود شيقوق
القاهرة دي بعيدة يا زول ، الرياض دي اي لعنة موجودة فيها ، انت بس اجدع لينا الماركة والموديل
تحياتي

ماركة شنو البعرفها ليك انا يا اللخو !! انا عارفو ايطالي ات بس امسك في ايطالي دى والحجم الكبير شوية مش بغطوهو بعباية دا ما بتغطيهو الا شملة او بطانية . وعلى اليمين تغفلوا - بعد يملأ الصهريج -- يشقق ليكم مواسيركم واحدة واحدة

شوف عيني لما يملأ الصهريج بكشح بعيد زى الشافع القام من النوم مش زى المايل داك بسيّل في الحيطة

ابو سنينة ات متابع؟ ولا سارح وحتك

Post: #21
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Yousif A Abusinina
Date: 03-14-2010, 10:56 AM
Parent: #19

Quote: ابو سنينة ات متابع؟ ولا سارح وحتك

ات آآآآآآآ المسنوح الموية فى المواسير مافى يلحسها من وين

سارح وين ا الكاشقف اخوى

والله يطمنكم نبيع ارض ام بدة ونشوف مكان تانى فية موية او نرجع لاهلنا اهل العوض

Post: #20
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: البشير دفع الله
Date: 03-14-2010, 10:56 AM
Parent: #18

الخال الجميل اسماعيل عباس

تحية وتقدير

حمدا لله على السلامه

وان شاء الله تكون لقيت الأهل طيبين

عموم آل فضل الله

بركة المشيت

وبركة الجيت

الموية هينة كفى الشوق الاتبل

مودتي

Post: #22
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 11:21 AM
Parent: #20

Quote: ات آآآآآآآ المسنوح الموية فى المواسير مافى يلحسها من وين

ات حاول جرب . قالوا مامهم تكون في المواسير المهم تكون الامية مدنكسة في موية البحر بس

اوع تجي تقول لي البحر برضو ناشف .

... ريقك

Post: #23
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: طارق ميرغني
Date: 03-14-2010, 11:48 AM
Parent: #22

حمد الله علي السلامه يا سمعه

بعدين عمنا الطيب شيقوق ده شنو قصة مطر الرشاش الرشه دي....؟؟

Post: #25
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: mahmed alhassan
Date: 03-14-2010, 12:22 PM
Parent: #20

الاخ اسماعيل حمدا لله علي السلامــة
الحـــل اوان موسـم الهجــرة للشمال
شــوف المويــة كيـــف في الصورة ادناه 0

Post: #24
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 11:52 AM
Parent: #18

أخى يوسف أبوسنينة..لك التحية وشكرآ على مرورك يا زول ياراقى..

Quote: الحمد لله على شوفت العيال وامهم والباقى مقدور علية بتدبر باذن الله

تحياتى ومودتى

نعم الحمدالله ودى نعمة كبيرة...الله يديم علينا النعم..

Post: #26
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: مرتضى احمد عبد القادر
Date: 03-14-2010, 12:34 PM
Parent: #24

سلام إسماعيل وحمد لله على السلامة
Quote: شكرآ على النصيحة ورسل لى ماركة الموتورألبجيب الموية من سقط لقط ده..ولك ألأجر إن شاء الله

الموتور دا أسمو في السوق (الوحش) او (موتور التحضير الذاتي) بيجر المويه ما من مواسير الحله وبس دا بيجر الموية من تلاجة الجيران عديل وانت ماشي عليهو عشان تشغلو بيصدر اصوات زي الكلب السعران ومربوط (ححححححححح) كدا

Post: #27
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 12:40 PM
Parent: #26

الخال طارق ميرغني

Quote: بعدين عمنا الطيب شيقوق ده شنو قصة مطر الرشاش الرشه دي....؟؟

عيييييييييييييييك ات متابع ؟ خليها على الله يا العشاء اب لبن

الاخ مرتضى

ايوا صحيح هو بحضر براهو واثناء التحضير بيعمل صوت زى نفخة الورل اششششششششششششششششششش

Post: #28
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 03:51 PM
Parent: #27

Quote: وهذه ســـتكون احلى مفاجأة لهم ....
حفظك الله في حلك وترحالك اخـــي

كن وأفراد الأســـرة بخير

فعلآ إجازة كنت حلوة ومفاجأة لهم..مع العلم ماكلمتهم إلا قلت لآحمد افتح الباب..أمهم بس العارفه وعباس أخوى وابوى...بحب المفاجأت الزى دى..

تسلم يأخى ألأمين يازول ياسمح يازين..وعقبال يجمعك بألأسرة يارب..

Post: #29
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 03:59 PM
Parent: #28

البشير ود اختى الجميل..تسلم على المرور...

Quote: الموية هينة كفى الشوق الاتبل

والله الحمدالله بلينا شوقنا بس الببل ريقنا شنو؟؟

وكمان قضينا ليلة جميلة يوم الخميس محتفلين ببيت الفنون مودعين الزولة الرائعة أسيا بت عم ربيع..كان الحفل أروع مايكون..شكرآ للأخت العزيزة منى عوض خوجلى لتواصلها معنا ودعوتى وألأسرة ولكل الحضور الجميل من بورداب الخرطوم...

Post: #30
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 04:01 PM
Parent: #29

أخى طارق ميرغنى...

الله يسلمك يازول ياجميل..لك التحية وألأسرة الكريمة...تقديرى الذى تعرف...

Post: #31
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 04:11 PM
Parent: #30

أخى الغالى محمد الحسن.السلام عليكم...

Quote: الاخ اسماعيل حمدا لله علي السلامــة
الحـــل اوان موسـم الهجــرة للشمال
شــوف المويــة كيـــف في الصورة ادناه

فعلآ الموية الفى الصورة سمحة...لكن البطبق ده فى ارض الواقع شنو؟؟؟كلما نشوف الصورة نعطش..ريقنا نشف..خلاص...

لك التقدير وألأحترام..

Post: #32
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 04:15 PM
Parent: #31

Quote: الموتور دا أسمو في السوق (الوحش) او (موتور التحضير الذاتي) بيجر المويه ما من مواسير الحله وبس دا بيجر الموية من تلاجة الجيران عديل وانت ماشي عليهو عشان تشغلو بيصدر اصوات زي الكلب السعران ومربوط (ححححححححح) كدا

أخى مرتضى..حلوة دى البجر الموية من ثلاجة الجيران..يعنى من الخرطوش للفم...باردة وحلوة..ما يوم يجر لينا عصير الجيران كمان خلينا فى عصرنا ده....تسلم على المرور...

وكتر من زياراتك....

Post: #33
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Yousif A Abusinina
Date: 03-14-2010, 04:40 PM
Parent: #32

Quote: ايوا صحيح هو بحضر براهو واثناء التحضير بيعمل صوت زى نفخة الورل اششششششششششششششششششش

شكيت محنك دة ما قرضتوا قرض الله يكفينا شرك وادينا خيرك شو العربيى المسنوح وصاف كيفن

اسماعيل اخوى اردوا من البحر قريب مو بعيد هههههههههههههه

بس اختوا الكاشف اخوى وقلوا لية الموية مشكلتها اتحلت .

Post: #34
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: احمد العمار
Date: 03-14-2010, 04:57 PM
Parent: #1

حبيبنا سمعه
تحياتنا و حمد لله السلامة و ان شاء الله الاسرة الكريمة بخير

غايتو الله يكون فى العون النيل شاقى البلد من اولها الى اخرها
والناس ما لاقين موية ، والله حاجة غريبة فعلا و ما لاقى ليها اى تفسير

أحمد العمار

Post: #35
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 05:02 PM
Parent: #34

أخى الغالى أحمد العمار...........لك التحية والتقدير وشكرآ لآتصالك الهاتفى....

Quote: غايتو الله يكون فى العون النيل شاقى البلد من اولها الى اخرها
والناس ما لاقين موية ، والله حاجة غريبة فعلا و ما لاقى ليها اى تفسير

نعم الله يكون فى العون....وناس الحكومة ذاتهم مالاقين ليها تفسير.....

Post: #36
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: عبدالله ود البوش
Date: 03-14-2010, 05:42 PM
Parent: #35

سمعة يا رجل يازين
حمدا لله على السلامة
ولعل العيال طيبين
.
.
خواجية مغرتبة في السودان سألوها قالوا ليها
ناس السودان يغتربوا في الخليج وانت تغتربي في السودان ؟
قالت الخليج بقى زي اوروبا
تفتح الماسورة تكب موية
تدوس زر الكهرباء تولع
حاجات روتينية ومملة ومسيخة

لكن في السودان
تفتح الماسورة تتوقع انها ما تكب لو كبت تفرح وتصفق وييييييييييي في موية
تفتح زر الكهرباء تتوقع ما تولع لو ولعت تفرح وتصفق وييييييييييي في كهرباء
اها كل يومين تلاتة القى لي فرحة بصفقتها
انه رائع وممتع عشان كدا حبيتو
وكلنا نحبو الجميل ومحير

Post: #37
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 05:44 PM
Parent: #35

استاذنا اسماعين

مساؤك خير

اسمح لينا خلينا نلعب حرت في صقيعتك دي

سنو

Quote: شكيت محنك دة ما قرضتوا قرض الله يكفينا شرك وادينا خيرك شو العربيى المسنوح وصاف كيفن

طبعا الورل مع شخرتو دي لو كجمك اصلا ما بفكك الا يجي واحد يقطع رقبتو بسكين

ات عارف قرمشة عضامو شن بتسو؟

Post: #38
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ود الباوقة
Date: 03-14-2010, 05:57 PM
Parent: #37

اخي سمعة ..

حمدا لله على سلامة وصولكم السودان والحمد لله

على ان الاسرة والاهل بخير ..

فعلا مشكلة كبيرة ان تكون الخرطوم بين نيلين

واهلها عطشى ...

لكن اظن ان الامور في طريقها للانفراج باذن الله ...

شيقوق..

الموتور البلحس الموية كان سالت منو عندنا هنا

في الرياض ماركة ( سمنان )

مودتي لك اخي سمعة ...

وحمدا لله على السلامة...

Post: #44
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ابو جهينة
Date: 03-14-2010, 07:20 PM
Parent: #38

تحياتي سمعة أبو العباس

أحمد وصلاح من شدة الشطف بالخرطوش عشان يساعد الموتور قامت ليهم وجنات....

أضحك الله سنك
و بلَّ ريقك .. و طمنكم و روى البلد و العباد

إلى الآن هناك قرى بيجيبوا الموية من النيل رأسا بصفائح على رؤوس النساء

كان الله في العون

Post: #39
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 06:25 PM
Parent: #37

أخى العزيز عبدالله ودالبوش..الرجل الراقى....تحياتى لك ولحسن واخوانه..

شكرآ على المرور ألأنيق...والحمدالله العيال طيبين..أبشرك...الخواجية دى مطموسة ساى ماعندها شغلىة تعمله....لآنها عارفة ما حاتقعد كتير عايزة تعيش المأساة عشان تتمتع بالرفاهية أكثر...

Post: #40
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: عبدالوهاب علي الحاج
Date: 03-14-2010, 06:34 PM
Parent: #39

حمد لله على السلامة يا ابونسب

Post: #41
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 06:42 PM
Parent: #39

أخى الجميل الطيب شيقوق....

Quote: اسمح لينا خلينا نلعب حرت في صقيعتك دي

لك ماتريد وأكثر..طلتك فى كل مكان تترك أثر جميل....خد راحتك الصقيعة صقيعتك.....

Post: #42
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 06:51 PM
Parent: #41

أخى ودالباوقه.......الزول الرزين..

Quote: فعلا مشكلة كبيرة ان تكون الخرطوم بين نيلين

واهلها عطشى ...

لكن اظن ان الامور في طريقها للانفراج باذن الله ...

ألأمل عند ربنا كبير..ولكن لكى تنمو الشجرة لابد من وجود الماء.............

Post: #43
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 07:04 PM
Parent: #42

أخى عبدالوهاب على الحاج........الزول الرائع...............

Quote: حمد لله على السلامة يا ابونسب

عندك همر.....هههههه؟؟؟

Post: #45
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-14-2010, 07:59 PM
Parent: #43

أخى الحبيب...............جلال...

Quote: إلى الآن هناك قرى بيجيبوا الموية من النيل رأسا بصفائح على رؤوس النساء

كان الله في العون

خلى النيل يكون قريب وما مشكلة نشيل الموية فى رؤوسنا..وبدون رسوم..هسى المتحصلين بجزا يقوا الباب عايزين حق الموية..نقول ليهم هى وينه المويه...

الله يكون فى العون فعلآ أخى...

Post: #46
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: محمد عكاشة
Date: 03-14-2010, 08:13 PM
Parent: #45

ياعمك
الكلام ده كده مابنفع تجى وتفوت سااااى كده..
نسمع بى ده فى الأسافير..
يازول مامشكلة مادام لقيت الشباب بخير
وفى مواجبات كتيرة عارفك مابتقصر
الموية حبيبتى الموية برنامج انتخابى
بلد عجيبة جد
ربك يهون

Post: #47
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-14-2010, 08:15 PM
Parent: #45

ابو السباع

Quote: ....خد راحتك الصقيعة صقيعتك.....

يجازي محنك ضحكتني نامن دموعي سالت

ود الباوقة

كيف يا عشاء البايتات جيت بجاى ؟ حبابك تعال ابو السباع طلق البوست طاب . اكان عايز تتجدع تعال ساى والزارعنا غير الله اللجي يقلعنا

Post: #48
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Yousif A Abusinina
Date: 03-15-2010, 07:26 AM
Parent: #47

Quote: طبعا الورل مع شخرتو دي لو كجمك اصلا ما بفكك الا يجي واحد يقطع رقبتو بسكين

ات عارف قرمشة عضامو شن بتسو؟

الورل انا بعرفوا كويس يا عشاء البايتات
بذكر قبل كم سنة دخلت معاها فى مطاردة ( رالى على الطبيعة لين جبتوا من ضنبة ) سلمتوا لواحد حبيبنا كان بالنسبة لية يوم مابعدوا يوم .

لكن يا اخوى من عمائلكم بهناك هجروا دياركم ورحولوا اغتربوا فى مناطق آمنة بعيدا عن الابادة الجماعية لانوا يوم اسود يوم ما اجى جارى ويقع فى عين واحد من حبايبك كان يحلوا الجليل الرحمن

نشكر بحرارة اخونا ابو السباع لاتاحتة الصقيعة الجاهزة ومفروشة

والى الامام دائما

وسلمى على الورل

Post: #49
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 08:40 AM
Parent: #48

أبن اخى الجميل محمد عكاشة..أبو الوزير...لك التحية وألأسرة..

Quote: الكلام ده كده مابنفع تجى وتفوت سااااى كده..
نسمع بى ده فى الأسافير..

قلنا نخليها من غير ميعاد والصدفة أحلى بعد مرات....جات كده سريعة..وعارف مشغولياتك الشديدة وفى ظل الظرف الراهن..لك التحية مجددآ

خالص مودتى....

Post: #50
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-15-2010, 08:52 AM
Parent: #49

ابو السباع صاح الخير

ابو سنينة

Quote: نشكر بحرارة اخونا ابو السباع لاتاحتة الصقيعة الجاهزة ومفروشة

بس خليك لعييب وابعدنا من مفردات ناس البندر

نحن ناس موليتة وتمليكة وعنكوليب - نشرب مويتنا من الحفائر ما بنكوسا في الموتورات والطلمبات

بنعاين للبرق اب وسيعة عشان يجيبها مطرة ليلية تترس الميع والحفائر

نشرب وندوبي ومحل رهيفة تنقد

Post: #51
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 12:10 PM
Parent: #50

أخى الطيب.......لك التحية ومن معك..يا اخى انا سعيد بيكم هنا شديد...

Quote: نشرب وندوبي ومحل رهيفة تنقد

ونحن بنشرب وننوم...لك التحية ياجميل..

Post: #52
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ادريس خليفة علم الهدي
Date: 03-15-2010, 12:27 PM
Parent: #51

يعني نقدم استقالتنا

سمعة سلام

Post: #53
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 03:27 PM
Parent: #52

أخى إدريس يا وزير الرى..لك التحية والسلام.......

Quote: يعني نقدم استقالتنا

سمعة سلام

يا اخى انت قادر على ان تروى الملايين فى بلدآ مافيها نيل..كيف تستقيل....لك الود..

Post: #54
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: الطيب شيقوق
Date: 03-15-2010, 04:17 PM
Parent: #53

الاستاذ ابو السباع

Quote: أخى الطيب.......لك التحية ومن معك..يا اخى انا سعيد بيكم هنا شديد...

بوركت يا الحبيب

الله يعمر ديارك

Post: #55
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: معتصم دفع الله
Date: 03-15-2010, 04:36 PM
Parent: #53

حمدالله على السلامة يا سمعة ..

تخيل كل هذا يحدث في بلد يتمدد فيه النيل بطوله وعرضه
حصلت نفس المشكلة قبل فترة وستحصل مره أخرى إن لم يكن هنالك حلاً ناجعاً ..
الكل في السودان يشكي من قلة الماء وعدمها ..
وفي نفس الوقت معظم الأمراض التي تفشت أخيراً مثل أمراض الكلى تأتي منها ..

لك الود وللأسرة الكريمة ..

Post: #57
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: يوسف السماني يوسف
Date: 03-15-2010, 05:17 PM
Parent: #55

Quote: أحمد وصلاح من شدة الشطف بالخرطوش عشان يساعد الموتور قامت ليهم وجنات
....

اسماعيل عباس
تحياتي
ربنا يحفظهم ويروي عطش اطفال السوداني في البوادي الذين يشربون من ماء المطر الذي تشرب منه الانعام .

Quote: إلى متى سوف يظل هذا الحال

حتي يقضي الله امرا كان مفولا ويحكمنا من يكرم الانسان ويهتم بة ويقضي علي زمرة الحاكمين باسم العطشي والجوعي

الحمدلله علي السلامة

Post: #58
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 06:38 PM
Parent: #57

أخى/الحبيب الزول الشفيف................معتصم..

بلدنا حلوة..فقط ينقصها التخطيط...لزومو شنو...نعمل عمارات ونتطاول فى البنيان ونحن نفتقد لمقومات الحياة....الصحة والتعليم والبيئة الصحية للمواطن من أولويات ألأشياء للمواطن المسكين...فى ناس قادرين ان يستحموا بماء صحة وناس ماقادرين يتحصلوا عليها للشرب...

الله على بلادى.......

Post: #59
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: د.يوسف محمد طاهر
Date: 03-15-2010, 06:42 PM
Parent: #57

السلام عليكم - اخي الفاضل : إسماعيل عباس
الحمد لله على السلامة ... وعلى زيارة الأهل , والأولاد ... مع خالص الدعوات بأن يفرج الله كربهم ...

Post: #60
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: أبو الحسين
Date: 03-15-2010, 06:53 PM
Parent: #59

صديقي الجميل سمعة سلامات...

حمداً لله على السلامة... وبركة الإطمنت على الأولاد...

نسأل الله يوفق الوليدات ويكتب لهم النجاح يااااااااااارب...

والجاتك في الميهيي سامحتك!!! يا صاحبي...

Post: #61
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 06:56 PM
Parent: #59

أخى يوسف السمانى.............السلام عليك وعلى اسرتك الكريمة.....

شكرآ على المرور وربنا يصلح الحال يارب....................................

Post: #62
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-15-2010, 06:57 PM
Parent: #59

د/يوسف..................

نورت البوست..الله يسلمك....الزيارة كانت خفافبة للأطمئنان والدعم المعنوى...لك جزيل شكرى وتقديرى...

Post: #63
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-16-2010, 09:59 AM
Parent: #62

أخى العزيز الغالى.......جمال..ليك مدة ما بنت..وللا ألأنتخابات شاغلاك...

الله يسلمك ياغالى وشكرآ على مرورك الجميل قواسيب مودتك.....ومودتى...

Post: #64
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-16-2010, 04:00 PM
Parent: #63

لحدى ألأن الماء لم تأتى...زوجتى إشترت برميل كبير قدر الليلة وبكر ة وياحسرة....حتى ناس الموية البببيعوها قامو إتعززوا...وتلف وتلف وريقق ينشف ولا تلقى من يعطف.......الله يعين...

Post: #65
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: Yousif A Abusinina
Date: 03-16-2010, 06:22 PM
Parent: #64

Quote: لحدى ألأن الماء لم تأتى...زوجتى إشترت برميل كبير قدر الليلة وبكر ة وياحسرة....حتى ناس الموية البببيعوها قامو إتعززوا...وتلف وتلف وريقق ينشف ولا تلقى من يعطف.......الله يعين...

ابو السباع

اهااااا جالك كلامى الجناااااا ود موتور ما بنفع لانو الموية الموية فى روحها مافى والله كان ينشف عروقك وبس

وانت آآآ المسنوح راج ليك خلى الصقية تفضى شوى والعصر الانا فية يخف شوية

مودة وتحية خاصة للجميع

Post: #66
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-16-2010, 06:54 PM
Parent: #65

العزيز يوسف....كلامك فى الصميم....الموية فى روحه مافى الموتور ده إلا يجيب لينا تراب.....تسلم يا غالى

Post: #67
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: عبدالله ود البوش
Date: 03-16-2010, 07:03 PM
Parent: #66

يا سمعة اوعا اكون لسع ما استحميت
.
.
.
.
قال ليهن ما بستحم .... اصلو هو عرس ولاعيد
اها العيد جاكن لبرودو

Post: #68
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-17-2010, 09:13 AM
Parent: #67

أخى الحبيب عبدالله ودالبوش.السلام عليكم...

Quote: يا سمعة اوعا اكون لسع ما استحميت
.
.

أبشرك أنا جيت هنا من ألأسبوع الماضى..وبستحمة وبتحمم لآولادى نيابة عنهم...

لكن الحمدالله اليوم إتصلت بالغاليه..لقيت ليك نفسياته فى السماء والصوت ليهو رنين...ما عايز اكتم فرحته لكن حسيت بأنو جاتهم شوية موية عبر الماسورة....قالت لى قمت بعد تلفونك داك وقت النباه شغلت الموتور..الموتور شخر زى شخرة موتور الطيب شيقوق ويوسف أبوسنينة..والموية فكت...قالت ليها واشريرى يايمه إنت تراكى من زمان مزنوقى..((طبعآ نحن ما شايقيه لكن أهلنا الشوايقه حنان))

زوجتى إستنفرت البيت كلو من الفرح..وطال ذلك الجيران..صلاح فك البيرك لجارنا عبدالله وجارنا خالد ناس ما بقصروا ساعة الشدايد وقال ليهم كان مويتكم ماجات جيبو خرطوشكم بالحيطة..خلوها محل التقطع تقطع أصلو ولد فيهو مروة شديدة الله ينجحو يارب وينجحهم جميعآ..

خالص تقديرى....

Post: #69
Title: Re: لاموية تبل الريق ولا أملآ يطمئن أريت وطنى يبقى مروى وانا البى كلو هين..
Author: ismeil abbas
Date: 03-18-2010, 09:08 AM
Parent: #68

اللهم لك الحمد... الناس ملت وسقت جيرانه..الله لا جاب لينا عطش تانى...حاجة صعبة...

بس يا ودشيقوق ما جبت الشخار......لكم التحية وواصلو فى صقيعتكم وكل زول بصقيعتو بفاخر.....