ذكريات اللقيط فى مشروع الجزيرة ...

بقول غنوات .. بقول غنوات

فى البلد البسير جنياتها لقدام .. بقول غنوات .. بقول غنوات

وفى البلد البفر ضرعاتو وفى العرضة ويطير فى الدارة صقرية ..

بقول غنوات .. بقول غنوات

ولو السمحة تلت إيد و مدت جيد و زول شايلاه هاشمية

بقول غنوات .. بقول غنوات

يشيل شبال و ختة ريد .. وفرة عيد .. و غيمة روح .. وظلمة عين و عيدية

بقول غنوات .. بقول غنوات

وفى الولد البشيل مدقاق و قولة خير على القمرة

يقابل الجاية متحزم ويقابل الجاية متلوم

كلام فاسك على أرضك يبقى عديلة يا بيضاء ويبقى

زفاف وغنت ليه قمرية

بقول غنوات .. بقول غنوات

و قبال حول تغيم غيمة قبلية ترش الدارة و الحدبة الصعيد الحلة

يا مرحب حباب الصفقة فى النسمة الصعيدية

يا هجرت نهار الليل بدرية فحيح جنياتنا فى

الحدبة الصعيد الحلة

يا قمحاتنا هو لبلب

يا فمراتنا هو لبلب

و يا للوز الفتق فى الوادى هو لبلب

ويا سمحاتنا يا قمحاتنا هو لبلب .. ويا البحر الطمح مدادى هو لبلب

ويا حجواتنا يا دعواتنا هو لبلب

سألتك بالذى ركز الأرضمعبد وسوى الناس عليها مقام

سألتك بى حجى الأمات ودعواتنا

سألتك بى قميراتن و دمعاتنا

شليل وين راح ..

يكون ضله الخريف فاتنا

وشليل وين فات يكون ضله الخريف فاتنا

وزى برق السمات الجاية دغشية

وزى زغرودة للبطن الكبارية

مدق من شامة القمرة

بريتك بوداعة الله ومقدم بالعديل يبراك

أبشروا تعالوا ياجنيات

شليل ما راح .. شليل ما فات

شليلي عند المسور حرق بقالو حصاد

شليل فوق التقانت قام خضار و بلاد

شليل مشوار.. شليل مسدار

شليلنا أرضنا يا جنيات

شليل ما راح .. شليل ما فات

حرازنا شليل .. شليلنا دليب

شليلنا دليل على البلدات بعد درب التبلدية

شليل ما راح .. شليل نا فات

شليل قايم نصاص الليل يتمتم ليلة وردية

مزارع بات على عشقين تراب بلدو

وسماح فوق بت مزارعية

لم يبقى لكم الا الذكرى ...فتعالوا لتتذكروا
عل الذكرى تشحذ النفوس لواقع جديد ....

الله عليك يا محمد عبدالرحمن أخوي
كانوا يستعدون للقيط من وقت مبكر فور زراعة القطن ، يستقطعون قطعة أرض صغير وتظل جافة ولا تصل إليها الماء يطلقون عليها ( التقاة) ، وتنظف مرارا بعناية ويتم تسويتها كذلك ، بعضهم لزوم دلع القطن يضع عليها سورا من جوالات القطن القديم حتى يمنع تسرب الأتربة لهذا الذهب األأبيض ، في شهر يناير تقريبا تبدأ العملية ، وتجييش لها الجيوش من الجزيرة وخارجها ، كل نمرة تقريبا بمقربة منها كمبو ، وياسلام عندما ترى النساء والرجال يغزون الحواشة بنظام متناهي من أول ( إنقاية) لآخر رباط ، وياسلام عندما تغازل تلك الأيدي الكريمة زهرات و لوزات القطن التي تغزو تلك الشجرة المباركة في كل الآتجاهات حتى التي سقطت أرضا يتم رفعها بعناية ، وحركة لا تنقطع بين الإنقاية والتقاة كل واحد يفرز كومو لزوم الوزن ، طبعا أغلبهم يعملون بنظام الكوم الواحد وبنفس طيبة وراضية مرضية ، ورائحة القطن لها نكهة خاصة المغيرب ، وكلما تقدم اللقاط في غزو الحواشة كلما كبرت أكوام القطن ، حتى تصبح جبالا ناصعة البياض براقة وزاهية ، ومع نهاية الحواشة تبدأ عمليات الوزن وسداد حساب ( اللقاط) ويدخل المزارع في عملية ( الكبس) ولها عمال يجيدونها لزوم الوزن وهو بالقنطار ، وبعد الإنتهاء من ( الكبس) كنا نكتب أسماءؤنا ورقم المكتب على الشوالات المعبأة ، وبعدها في وداعة الله إلي أقرب محطة ومن ثم الوزن النهائي وتسليم إيصال التوريد .... ومن تلك المحطات ينقل بعناية إلي المحالج سواء في الحصاحيصا أو مارنجان قرشي أو الباقير .... وكل ذلك العمل العملاق نظير حفنة من الجنيهات ، بس كانت مبروكة بركة لأبعد الحدود .
ما أجملها وأروعها من مواسم خلت ... لعنة الله على من جعلها أحلام
أخوكم الشفيع إبراهيم

الشفيع حبابك ...

فى عهد نافع وقوش والشريف بدر لم يبقى لكم الا الذكريات ...
لااعلم كيف يفكر هذا النظام ...بيع المشروع وتشرييد ملايين
الاسر اين يذهب هؤلاء ؟ ...

لوزة القطن اليانعة السمحة و نضيرة
تتنى الحليوة في مشية أميرة
أجمل حب عندي في قلب الجزيرة


لوزة القطن اليانعة السمحة و نضيرة
تتنى الحليوة في مشية أميرة
أجمل حب عندي في قلب الجزيرة



أبو آمنة حامد

بنحب من بلدنا ما بره البلد
سودانية تهوى عاشق ود بلد
في عيونها المفاتن شي ما ليه حد
***
التوب المهفهف فوق أم الضفائر
و الخد المعطر زي أحلى الأزاهر
و الخطوة الأنيقة ترنيمة مشاعر
أنا بي كلو عمري بمشيلها و بسافر
***
مين في الدنيا دي أجمل من بناتنا
الليهن قلوبنا و الفيهن صفاتنا
الكامنات في روحنا و العايشات في ذاتنا
***
في حلفا البداية أحلامي و هنايا
أنا عايش لحبي المخضر برايا
النافرة الأليفة ست روحي و هنايا
***
أنا لي في كريمة شايقية في شلوخها
نعتز بي صفاتها ما نجهل تاريخها
ماها المابية ريدتي و مو ياها المسيخة
***
في شندي العظيمة تلقى بنات جعل
واحدات في المتمة في لون العسل
النايرات خدودهن زي فجرا أطل
***
في سنكات بنعشق بت سمرا و أبية
ترتاح في الضفيرة خصلاتها الغنية
عاشت في شعوري أحلى هدندوية
***
الوارثات جدودهن في الجود و الشجاعة
البظهر جمالهن من زمن الرضاعة
سودانية مية المية في ذوقها و طباعها
يا ناس أرحموني أنا قلبي في رفاعة
***
لوزة القطن اليانعة السمحة و نضيرة
تتنى الحليوة في مشية أميرة
أجمل حب عندي في قلب الجزيرة
***
لي في الغرب أغيد في دار حمر و البقارة
نحميها بسيوفنا تفاحها و نضارها
تسكرنا الليالي و تطربنا النقارة
***
لي في جوبا ساحر تسلم لي خدوده
يمرح في غاباته و يسرح في مروده
حبي الغالي ليه ما بعرف حدوده
***


تحياتي ياحبيب

محمد عبدالرحمن ... تحياتي ...

كانت الإذاعة - ونحن صغار - تساهم في حملة اللقيط. وكان هناك أغنية (لا أذكر مؤديها) تقول:

إيد في إيد تجدع بعيد
ياخوي خليك نشيط
يلاّك معاي .. نمشي اللقيط

____
كلام عجايز وكدة