كلمات فى المنبر

البلع
كلمة ذات إيحاء سيئ..
إنتشرت حتى أن بعض الأخوات بدأن فى استعمالها بل وبكل ملحقاتها (مثل إزالة اللوز)
فى العرف الخواجاتى تقابلها deepthroat ومعناها واحد لاغير..

وقد سبق هذه الكلمة كلمة ظوووووووووووووووووووط التى درج عليها مشجعى الكرة..
والمنشأ والإيحاء واضح..

والآن وبعد أن تم تطبيع هاتين الكلمتين هناك كلمة ثالثة فى الطريق تجدونها هنا:
Re: حبل الوريد !!

Quote: أها ده كمان بلع ولا ( مص ) .

هذه الكلمات لو استمرت ستصبح طبيعية مثل كثير من الإساءات التى فقدنا حساسيتنا تجاهها.
وستكون تماما ككلمة استنكاح..
أو ستصبح كالمصرى عندما يقول لإبنه أمام بناته وزوجته يا ابن ال.........!!

كلامى هذا لايعنى أن من أتوا بهذه الكلمات غير مهذبين أو أتوا بها بسوء نية
ولايعنى من رددوها أو رددنها يقصدون إيحاءاتها الجنسية..
ولكن أعتقد أننا نحتاج للإنتباه حتى لاتفقد الكلمات الشينة الإحساس بشناتها وتتسرب الى خانة المقبول والجميل والفكاهى..

من يفتح بوست به خطأ ثابت للجميع نطالبه بالإعتذار لا البلع.

Quote: هذه الكلمات لو استمرت ستصبح طبيعية مثل كثير من الإساءات التى فقدنا حساسيتنا تجاهها.

شكرا د. بلة

الأستاذ شمس الدين السنوسى

لك السلام والمحبة

دكتور بله

مساء الخير

Quote: وقد سبق هذه الكلمة كلمة ظوووووووووووووووووووط التى درج عليها مشجعى الكرة..

وانا اول من يعتذر عن ترديدها

بس والله مقصود بيها....قووووووووووووووووووووون

بالمناسبة.....

شكلك صفوة

Quote: شكلك صفوة

هارون دياب
تحياتى
تعرف شكلك صفوة دى براى كدا جمعتها مع صورة البروفايل بتاعى والله ضحكت لما بكيت!


غايتو يا هارون البشوف أخلاقك العالية دى مايقول كنت لاعب كورة ههههههههههههههههههههه (عنف قانونى)

يا دكتور بلة
نحن من أنصار التشفير العالي الذي لايمكِن البسطاء- على حد وصف الريش- وغيرهم من الكسالى الذين يجرون خلف المعاني القريبة ويتركون المعاني البعيدة، فمثلاً المّص والظوووط والطُظ(ز)، كلها معاني قريبة، نتمنى من مستخدميها تشفيرها حتى لا تشنف أسماع الصنفين أعلاهما، وفي نفس الوقت لا تضر بالمعنى المراد..
____
لكن الطريقة دي سوف تضر بقراء الأستاذ أبو الريش..

طيب يا بلة ليه ما نكون إيجابيين و نعيد للكلمات العادية دي استخدامها الطبيعي بدل الإستخدام الغير مهذب ليها و الجاري في الشارع
كلمة زي (بلع) مثلا ما في داعي الناس تمشي للجانب البعيد فيها
وإلا كلمات كثيرة جدا و عادية حتكون مشكلة

Quote: بالمناسبة..... شكلك صفوة

بس عليييك زح البروفايل بتاعك ده بعيد
عشان ما نتحسس ...

وننادي ليك ناس حقوق الحيوان



د.بله
شكراً جزيلاً لانه لابد للجميع في كل مرحله من خطوات
تنظيم

وياود البشري
بتعرف قانون الخطأ الشائع

.
.

أتفق معاك تمام يا دكتور... بصراحة الكلمات دي أصلا ما خطر لي إنها ليها المعنى البعيد دا و هنا الخطر زي ما قلت يعني الواحد ممكن يستعملها ببساطة... ذكرتني مرة عندنا أستاذ اسمه محمد عثمان و أنا من ما خشيت المدرسة سامع الطلبة بقولو أستاذ جحا أستاذ جحا فافتكرت اسمه بالجد جحا بس يوم جانا رئيس شعبة اللغة العربية لقانا قاعدين ساي و مافي أستاذ سألنا حصتكم مع منو أقوم أتطوع ليك و أقول ليه مع أستاذ جحا طوالي الفصل صنَّ و أعاين ألقى الجماعة كلهم فاتحين خشومهم لأنه دي طبعا كان ممكن يكون فيها رفد بس ربك ستر و الموضوع مر على خير. طبعا برضو معاك في إننا ما بنشكك في سوء نية زول لكن لازم نتعاون كلنا في الحفاظ على بيئة البورد.

Quote: نحن من أنصار التشفير العالي الذي لايمكِن البسطاء- على حد وصف الريش- وغيرهم من الكسالى الذين يجرون خلف المعاني القريبة ويتركون المعاني البعيدة، فمثلاً المّص والظوووط والطُظ(ز)، كلها معاني قريبة، نتمنى من مستخدميها تشفيرها حتى لا تشنف أسماع الصنفين أعلاهما، وفي نفس الوقت لا تضر بالمعنى المراد..

دا الكلام يا ابوالياء
يابلة ياخي البورد دا محل للونسة والمكاتلات الاسفيرية شفت كيفن ؟
اي زول داير يستفيد وكدا يخش ليو جامعة ههههههه
بالجد يابلة البورد ماشي في الداون عليك الله كان ما ماشي في الداون البخلي الزي العمل البوست بتاع مسجد الشهيد شوفو في ربع ساعة مشاهداتو حصلت الف زي دا شنو البخليهو يكون قارئ ذاتو خليك من الكتابة دا من ناحية..
ومن ناحية تانية البوستات بتاعة المثقفين القصة والشعر ومش عارف ايه شوفة عينك البوست يدور الربع كلللللو بيكون عدد المتداخلين 15 والمشاهدات 14 دا معناهو شنو في عزوف عن النوع دا من البوستات ..خليك مننا هنا شوف ناس الفور اوول ذاتم مثلا شوف البوست بتاع الوزة مشاهداتو فاقت الـ 10000 مشاهدة وباقي بوستات نفس الكاتب كلللها مع بعض لم تتعدى الـ 500 مشاهدة دا ليه عشان بوست الوزة فيهو آكشن والجمهور بيحب الآكشن وهنا برضو بوستات الآكشن عالية المشاهدة .....
اها من اهم ادوات الآكشن يامعلم ياها جنس الالفاظ الانت محتج عليها دي . وبعدين قصة البلع دي شايفك أولتها وعملت ليها ايحاءات حكاية البلع المقصود الـ Swallowing العادي دا Orally يعني انا الجبت المصطلح دا ودا المقصود بيهو بصراحة شديدة



_____
للأسف يابلة انا شايفك حتبلع البوست دا بصراحة كدا

ساعدني بالشرح يا بصاص

..
.

Quote: بالجد يابلة البورد ماشي في الداون عليك الله كان ما ماشي في الداون البخلي الزي العمل البوست بتاع مسجد الشهيد شوفو في ربع ساعة مشاهداتو حصلت الف زي دا شنو البخليهو يكون قارئ ذاتو خليك من الكتابة دا من ناحية..

البوست بتاع مسجد الشهيد زول تلاعب بالالفاظ واستخدم علامة عاجل جدا
وعنوان خبرى مثير .. فكالب الجمع لمعرفة الخبر العاجل الفضيحة
ودى ماليها يا وهبة بالنقد البناء الذى اورد هنا ..

وحقيقة اتفق تماما مع د. بلة فى محاربة الكلمات السوقية بتاعت
الشارع الخلفى والغير محببه وبمعناها الرمزى الذى يورد هنا
قد تكون انت واخرون اوردها بحسن نيه ولكن تتاؤول التفاسير
والاستخدامات الى انت تصل للمرحلة الحدية
وهى مرحلة اعتقد من باب اللياقة والادب ان تكون فيها خطوط حمراء
لا يجب تجاوزها منا ولا من الاخوات .. مع اننى متاكد تماما لعدم
معرفة 25% منهن للمعنى الاخر _والله اعلم_

----------

انا شايف يا وهبة تتفق مع الجمع الكريم
وتعيد صياغة المصلحات الخفية كما اتفق القوم
وجيب معاكـ ود البشرى دا ..

شكرا د. بله

سلا م بلة

ده دليل علي أننا مرات بنمر بي مرحلة غيبوبة شعورية
يعني ما بنشعر بالكلمات النشاذ التي تتسرب الى لغتنا المتداولة
يتعطل جهاز الفلترة عندنا فتتدثر كلمة زي ( استنكاح ) بمعنى آخر مقبول
عبر مرحلة تداول تبدأ بالقاع وصولا للصفوة والنخب بل تتعدى ذلك الى اللغة
المكتوبة القصة والرواية والصحافة دون ان نتأمل في مصدرها أو الكلمة التي
اشتقت منها وبمرور الوقت تصبح كلمة أكثر من عادية .. لو حاول الخليل بن احمد
اقناعنا باستخدامها في غير ما أعتدنا عليه لما استطاع ذلك .. لكن عزائنا انها من المصطلحات
المرحلية سرعان ما تأفل وتأتي غيرها .. نتمنى اللا تكون أسوأ منها ............. تقديري

Quote: ساعدني بالشرح يا بصاص

ود البشرى اخوي

صباحاتك نديه

شايف صاحبنا الدكتور بله موسى شغال لينا المديده حااااره لكن اعمل نايم ونواصل مع بعض
في حديث اللغة والشائع منها و المعجمي وغيره من مما يتداعى من ذاكرة خربه بفعل المحيط
الذي لابد من ان نتاثر به شئنا ام ابينا ولننطلق على طريقة دكان ود البصير بس اصبر علي شويه
حا اوسع اللفه لانه الدريكسون بتاعي ما هيدوروليك سواقة كوامر ساي

تعرف ياصاحبي
انه اللغات يطرأ عليها ما يطرأ على الكائنات الحية من نشوء وتطور وموت كمان
لذلك ان المتفحص للكثير من المفردات في اللغة العربية لاغيرها يجد انها تندثر وتتلاشى
ولاتوجد الا لدى المشتغلين باللغة من المعجميون والنحويين وغيرهم ...
كما البيت العربي الذي مطلعه ( مدخشم بالاحطلين تخشرفت ) والذي سئل عن معاناه
احدهم عن معناه قال انه الجعلبط ... وتاااه السامعين وكأن على رؤسهم الطير

كما ان البيئات ايضاً تلبس المفردات معاني تختلف في كثير من الاحايين لذات المفردات في بيئات
اخرى فدونك كلمة (شكشوكه) من المفردات التي تصطك منها المسامع في البيئة اللغوية السودانية
لكنها مفرده ذات معنى محبب للكثير من البيئات اللغوية الاخرى حيث انها تشير لنوع من الاكل المحبب


" وعموما ان اللغة وهي أداة من أدوات التفكير ، إذ أن الإنسان يفكر باللغة
ويتمثل ذلك في نتاج ذلك التفكير والذي يكون على صورة تراكيب ملفوظة
أو مكتوبة ، وبدونها يعسر على المرء أن يعبّر عن الأفكار أو عما يشاهده أو يحس به
ويعسر عليه حتى التعبير عن الحاجات العادية .


واللغة وسيلة يستطيع المرء بواسطتها أن يعبّر عن عواطفه
من فرح وحزن وإعجاب وغضب وغير ذلك
كما يستطيع أن يجد في الآثار الأدبية التي تعالج العواطف الإنسانية
ما ينفس به عن مشاعره إن لم يكن قادراً على تصويرها أو نقلها بطريقة مؤثرة .


من هنا نلاحظ ان التطور الذي طال المجتمعات كان لابد ان يطال اللغة
فكانت هناك التجمعات المهنية والتقسيمات الفئوية فظهرت الحاجة الى
الى مفردات اصطلاحية او الباس مفردات معاني تتماشى مع المجتمعات
التي ينتمون اليها او من خلال عمليات تشفير تقوم بها فئات معينه من قاع المجتمع
من اجل الحفاظ على بعض الخصوصية لمجتماعتهم فظهر مايعرف (بالرندوك) المنطلق من

معنى في الغالب الاعم لمفردات عربية اصيله لكن صارت لها معاني غير معانيها الاصلية
كمفردة (مأسوره) التي يعف اللسان عن ذكر السياق النكته الذي اتت فيه
فصارت عندما تذكر تستدعى الحاله الحادثة في النكه كنوع من الاستعارات العادية ...
ومثلها الكثير من المفردات التي حرفت معانيها فصارت لها السطوه
اللغوية في مجتماعتنا بحيث عملت على ازاحة المعنى الحقيقي ...

هذا اذا انا اتفقنا ان المفردات ماهي الا مواعين للافكار فنجد انه
كما ذكرت اي من تلك المفردات التي سطت عليها ايادي المحتمعات الفئوية او المهنية
او المجتمعات النازعة للخصوصية والبستها معاني غير معاني الحقيقية فصارت لديها
بحكم المألوف هو المعنى الشائع الذي يتداعى للذهن ما ان تذكر لا ذاك المعنى الاصلي
ودوننا الكثير من الشواهد على ذلك التي علت فيها سطوة المعنى الاصطلاحي على المعنى اللغوي

اذن ما نريد ان نصل اليه في حالة المنبر هنا والتي اشار اليها الدكتور بله تجعلنا نتجاوز تلك المفردات
لنتسأل من له السطوه الثقافية في سودان اليوم واي مجمتع من المجتمعات والفئات التي تقطن البيئة اللغوية
السودانية ...
هل يمكننا ان ان نقول ان المثقف السوداني ينطلق من قاعدة هشة بالاستدلال لكمية المفردات المنتشرة في
الكثير من المواضيع الجادة والهزلية هنا ...

وهل يمكننا ان نتسأل من الذي يوثر ومن الذي يتاثر ؟؟؟؟

وهل.......

وهل .......

والي اي مدى نكا ابو ابو الريش الجرح
لان الحكم في الفعل الثقافي هنا يكون في نسبية المطروح مايتميز به
من صياغات ومفردات ووحده موضوعية وغيرها التي تميز المثقفين عن غيرهم
من سواد الناس ؟؟؟ ؟

وقيل قديما ان احد سواد الناس مر باحد الدارسين وهو يحاول ان ان يحفظ
عروض الخليل بن احمد الفراهيدي على شط نهر دجله فما كان منه الا قتله
ظناً منه انه يحاول ان يسحر النهر كي يغيض ...



كن بخير

البصاص

اضافة صغيرة معليش تقلت عليك .
انت شكلك طولت من البلد ... لو جيت قريب احتمال كل يوم تعمل مشكلة عارف في الفاظ كتيرة زمان كانت بتجيب دم عديل الآن دخلت في حكم السائد يعني عادي لو واحد مناكف وبيتهكم على الآخرين بطريقة تثير ضحكهم بيقول ليك فلان دا (م ع ر ص) خلاص البقولها بيقولها عادي والبقولوها ليو بيكون متكيف وبيضحك وهكذا .

يا وهبه
الكلمة الشتحت حروفها دي، في ناس استبدلوها بـ: "مع الرئيس"
___
وفي هذا ضرر بليغ بقراء أبو الريش..

على سيرة الفورأول و حكاية الكتابة بالنيات كمان في القراية بالنيات
بوست بتاع كورة وجا قون تتكتب كلمة زووووط بمقصدها الواضح هنا
أي زول يتحسس منها يراجع النية القراها بيها

Quote: على سيرة الفورأول و حكاية الكتابة بالنيات كمان في القراية بالنيات بوست بتاع كورة وجا قون تتكتب كلمة زووووط بمقصدها الواضح هنا أي زول يتحسس منها يراجع النية القراها بيها

بمناسبة النية دي ياصاحبي

سمعته نكتة المسطول الكان سايق ليهو عربية
ودخل ليهو في صيوان بكا وكتل منو زي عشره اشخاص

اها قام المتحري بتاع المرور بسأل فيهو كدي احكي لينا الحصل شنو
قام المسطول قال ليهو ياخي انا كنت سايق وفجأه وظهر لي واحد قدامي
وكان علي لازم اختار بين اتنين يااصدم الزول القدامي يا اخش الصيوان
فقلت اخير انقذ حياة الزول واخش الصيوان

وابقى عافيه


البصاص

Quote: الشتحت

هسع يا ياسر كلمتك دي زااااتا
دحين ما بينطبق عليها تصنيف أخونا د. بلة ؟؟


سلامات د. بلة وضيوفه

Quote: هسع يا ياسر كلمتك دي زااااتا دحين ما بينطبق عليها تصنيف أخونا د. بلة ؟؟

يا عاطف
بلحيل بتدخل في تصانيف أخونا دكتور بلة، وقد تدخل مبلولة كمان..
__
القراءة بالنيات لذيذة يا عاطف..

بجيكم برواقة
واحد واحد

بس والله نفسى أفتح بوست ويتشبكوا فيهو إتنين وازوغ منو واقرا العداد من بعيد.
هسع البصاص وود البشرى لو قالوا بسم الله بحققوا لى أمنيتى تماما ههههههه!

أظنك إنت يابله طبيب ,, وبتعرف إنو الدكاتره لما
يدوك حبوب بوضحوا ليك طريقة الإستعمال .
أها الحبوب فيها البنبلع وفيها البيتمص وفيها البنقرش .
( القرش ده لسه جاى فى الطريق ) ,, فيأخى إنت مشيت
بعيد خالص ,, الناس بتتونس يأخ ,, وزى ماقاليك عبد الوهاب
يعنى داير أبو الريش يرجع فى كلامو ,, يأخ ساعه لقلبك
وساعه لربك ,, وشكرا ليك إنك جبت مداخلتى نموذج .

هذا مع تحياتى والأسره الكريمه ,,

Quote: على سيرة الفورأول و حكاية الكتابة بالنيات كمان في القراية بالنيات بوست بتاع كورة وجا قون تتكتب كلمة زووووط بمقصدها الواضح هنا أي زول يتحسس منها يراجع النية القراها بيها

كلامك مية مية يا ودالبشرى
القراية بالنيات والسمع برضو بالنيات
ياخ الغنا بتاعنا دا كلو ايحاءات و تسدير
يعني يابلة ثنائي النغم لمن غنن :
زرعت لي حبة وفتقت في قد وردة
ووووووووب ياحبيبي كان مت ذنبي عليك
اجي اقول ليها القد دا قاصدين بيهو شنو
علما بانو ما في وردة فيها قد ذاتو شايف كيف ؟
وامثلة كثيرة لا يتسع المجال هنا لذكرها

..
.
كمال عباس دا داير _ يقرش _ ليك البوست دا

-------

وبذا دخل مصطلح اخر للقائمة
بالاضافة لما اورده ابوتفه

Quote: كمال عباس دا داير _ يقرش _ ليك البوست دا

كمال عباس دا منو
قصدك كمال سالم حبيبنا
انت يا تبلدينا الليلة مالك مصاقر المنبر دا
الفرن ما شغال ولا شنو ؟

Quote: زرعت لي حبة وفتقت في قد وردة

في قد وردة ؟؟؟ ..
وهبة .. !! بقيت تغرق ذمة الغنا كمان ؟؟
قالوا : ( زرعت لي حبة وفتقت بقت وردة ) .
الجاب القد للفتق شنو ؟؟؟


.......
شكرا يا بله ..
لكن القوم ديل خلاص .. أدوها سوط و اللي كان كان ..
و .. اللهم لا تؤاخذنا بما جعلنا أبو الريش فيه .

Quote: أي زول يتحسس منها يراجع النية القراها بيها

يبدو أن الدكتور ( إتحسس ) ياود البشرى .

Quote: وهبة .. !! بقيت تغرق ذمة الغنا كمان ؟؟ قالوا : ( زرعت لي حبة وفتقت بقت وردة ) . الجاب القد للفتق شنو ؟؟؟

عماد عبد الله بركة الجيت تلحق لينا عمو وهبة دا شغالين باصات هو وطيفور حيبقو البوست زي حيطة السينما
سلامات يا بله

Quote: ولكن أعتقد أننا نحتاج للإنتباه حتى لاتفقد الكلمات الشينة الإحساس بشناتها وتتسرب الى خانة المقبول والجميل والفكاهى..

حقيقه ياريت لو الناس تنتبه ليها ،
لا فض فوك أخى بله موسى .

سلام تبلدينا:
.

Quote: كمال عباس دا داير _ يقرش _ ليك البوست دا وبذا دخل مصطلح اخر للقائمة بالاضافة لما اورده ابوتفه

طبعا قصدك الاخ كمال سالم.......
ومرة تانية البركة فيكم ومعاها كمان مبروك عليك الشهادة العليا
ونرجع لموضوع البوست و كوبي أند بيست لكلام أخونا العوض:

Quote: طبعا برضو معاك في إننا ما بنشكك في سوء نية زول لكن لازم نتعاون كلنا في الحفاظ على بيئة البورد

.
وكلام بلةصاح : في مفردات تضرس وكلمات تثير التقزز ودي مفترض تكون
خط أحمر .......وفي كلمات حمالة معاني متنوعة وأخري مشحونةبدلالات جديدة
تختلف عن معانيها الاصلية وتانية ملغمة والنوع دا يجب إجتنابه والتعامل معه من باب الشبهات !!
وفي أساليب الغمز واللمز والتشفير (يفتح بمعرفة المرسل اليه_)
وفي المطاعنات وغير ها من الاساليب التي تسمم الوسط الأسفيري وتخرب العلائق
الإنسانية!!
المطلوب:
موقف مبدئي ينأي عن روح القطيع وعصبية الشللية والصحوبية وينزع الحصانة
من النقد التي يتمتع بها البعض في الوسط الإجتماعي
........ المطلوب موقف مبدئي يرفض ويتصدي للقبح.......
واللا كمان بكري يعمل ليهو منبر إضافي: إجتماعي ورياضي - زي بعض الاندية وزي أستاد
الكورة اللي بمشي فيه يستعد لسماع السمح والشين والالفاظ والمشاغلات
اللي بتفهم في وسطها وجوها وتؤخذ بلا حساسية -ويقال لمن ينفر منها إنت
الجابك هنا شنو?

Quote: (عدل بواسطة سارة علي on 05-03-2010, 09:21 م)

شكرا ياسارة على تعديل المداخلة.

ياودطيفور
يامك نحن شقينا
سلمنا وهبة قبال تجى تعزينا

نعم للتشفير الذكى وعام
ونعم للعبة الحلوة والعنف القانونى
بس لو ما تحسسنا كنانتنا مرة مرة ستنزلق الذخيرة على النار.

ود البشرى

بعض الكلمات تعدت مرحلة المعنى لمرحلة المصطلح
وبذلك رسمت لنفسها شكل بداخلنا وبالذات عندما تضاف لها بعض التوابل مثل ناشف وشيل اللوزات وهلمجرا..
بعدين الكلمات دى عندما تربط بين ناجريها ومن نجرت لهم بتقودك لمعانى أخرى وبتخترق حاجز البراءة عندك..
أما القراءة بالنية بتجى عندما تكون هذه الكلمات داخل رواية أو قصة قصيرة..
وبعد دا كلو محتمل تكون إنت من جيل حمور وتشوفا عادى ونحن نطلع من جيل لجنة شنو كدا ماعارف وناس التلب ونشوفا خادشا للحياء المنبرى.

البصاص

كيفك ياعمك

شكرا ليك وياريت تاخد لى ود البشرى دا مشوار مشوارين كدا..
العداد مهم يا بصاص والبوست دا ياداب فى الميتين.

Quote: القراية بالنيات

دكتور بله وضيوفه

قالو حاج مغترب رجع البلد بعد غياب 3 سنوات...ولما اولاده قابلوه في المطار بدأ بسؤالهم " اليوم صليتو الصبح حاضر ؟ الأولاد أجابو بنعم ثم أردف الحاج سؤاله قائلا والوالدة صلت معاكم ؟
أها يا جماعة الزول ده قصده داير يتأكد انو الأسرة مواظبة على صلاة الجماعة.
لكن لو الواحد قراها بنية وحشة ممكن يمشي بعيد خالص ويقول في سره " شتارة العدو ".

حكيمنا سلامات

شكرا و كلامك صاح

أبو حتحوت

خاص التحايا و كيفك و العيال - طولنا منك يا أخي

عزيزي : الكلام أيا كان مقروءا كان أم مسموعا له طريقة واحدة في طريقة فهمه و استيعابه يسميها علماء اللغة speech processing و تتلخص ببساطة أن الإنسان وعند سماعه أو قراءته لجملة ما تحتوى على مفردات مبهمة أو ذات معانى مختلفة حرفية أو بلاغية فإن المخ يقوم بتنشيط كل هذه المعانى المرتبطة بالمفردة تلقائيا أراد ذلك أم لم يرد و لكن المفردات المصاحبة the context أو السياق العام للجملة يجعله يغلب أحد المعانى دون الاخرى
عليه فإن حكاية القراءة بالنيات ليس لها أساس من الصحة .

الأخ الـحـبيـب الـحـبـوب،
الدكتور بلة،
تحياتي ومودتي،
***- عندي افتراح بعمل قاموس ونطلق عليه أسم (قاموس الكلمات والمصطلحات المحظورة بالمنبر العام). وكلنا نشارك فيه بغض النظر عن اتجاهاتنا السياسية والايدلوجية، ونقلب في مقالات الارشيف والمقالات القديمة والجديدة ونطلع منها ماهو غير مقبول ولامحـبذ قوله او كتابته، وارشـحك يادكتور تكون رئيس للجنة المهتمة بامر القاموس ده.

***- انا من ناحيتي مستعد امدك ببعض المصطلحات القبيحة والشاذة والتي خرجت من افواه البشير والنافع والطيب مصـطفي ودخلت (المنبر العام)!!!

***- أها قلت شـنو?!!

***- لك مودتي-

ملحـوظة: الالمان عنـدهم مثل غير متداول بكثرة بقول ( الكلام الشاذ والبذئ ملح اللغـة)!!!

خلاس يا جماعة .. بعد ما تتصرفوا في البوست دا
ما داير أقول (تبلعوهو أو تخللوهو أو تقرشوهو)
وروبنا دايرننا نقول شنــو وما نقول شــنو!




دكتور بلّة .. اسمح لي أقول ليكـ:
قــــوم لـــف .. وأدينا معاكـ نفس!

إنتو هسي ما شايفين الملافظ السعد المالية بوستات
السياسة والمثقفاتية وجايين علينا نحن المساكين ديل؟
هسّي قصة البلع واللوز ودي تعال وريني الشاذ فيها شنو؟

إنت قاعد تبلع بي وين يا شيخنا؟!

ياوهبه

Quote: (م ع ر ص)

في روايه اخري

مابين ال ( )

وبالامارة كده اسأل د الصايم....!!!!!!

بالمناسبة :

كاااااااااااااااااكـ

بتدخل ضمن المحظورات

ولا نواصل الاستخدام.....؟

Quote: في قد وردة ؟؟؟ .. وهبة .. !! بقيت تغرق ذمة الغنا كمان ؟؟ قالوا : ( زرعت لي حبة وفتقت بقت وردة ) . الجاب القد للفتق شنو ؟؟؟

هاهاهاهاهاهاههاهااا
شكيتك علي الله ياعمدة
الله يسألني لحدي ماقريت مداخلتك دي
حتى عرفتها فتقت .. ياخ معقول ؟!!
دي أزمة مخارج حروف بتاعة فنانين أسوي شنو انا ؟
لكن برضو انا اخير من ودخالتي البقول :
بتريد الفطام اسد الكزاز التام
وفي السلام الجمهوري بيقول : نشتري النجدة نجدة عديل كدا
شايف كيف ؟!!

Quote: يبدو أن الدكتور ( إتحسس ) ياود البشرى .

ما البركة الما زعل

بلة يا بلة اصبحت طيب

Quote: بعض الكلمات تعدت مرحلة المعنى لمرحلة المصطلح وبذلك رسمت لنفسها شكل بداخلنا وبالذات عندما تضاف لها بعض التوابل مثل ناشف وشيل اللوزات وهلمجرا.. بعدين الكلمات دى عندما تربط بين ناجريها ومن نجرت لهم بتقودك لمعانى أخرى وبتخترق حاجز البراءة عندك.. أما القراءة بالنية بتجى عندما تكون هذه الكلمات داخل رواية أو قصة قصيرة.. وبعد دا كلو محتمل تكون إنت من جيل حمور وتشوفا عادى ونحن نطلع من جيل لجنة شنو كدا ماعارف وناس التلب ونشوفا خادشا للحياء المنبرى.

شفت التحتو خط في الاقتباس دا العنيتو بي كلامي الاول
زي ما الكلمات العادية رسمت لبها شكل معين نتيجة الاستخدام الغير عادي في مجتمعات خاصة من الممكن هنا نرجعها لاستخدامها العادي - على الاقل في مجتمع البورد
اديك مثال حكاية الماسورة دي اصلها نكتة سفيهة لكن مع تكرار استخدامها وعلى مستوى الصحف و انتشارها صار للماسورة معنى آخر لا علاقة له بالاصل السفيه الورد في النكتة
وصار لا يتحرج من استخدامها احد
بعدين القصة ما قصة جيل فلان او اختلاف تفكير , هنا الناس مفروض اوعى من انها تتبادل التسدير و رمزية الكلمات بتاعة الابتدائي
كما انو الشتيمة مافيها مشكلة هنا ..الداير يشتم هنا ما في شي يخليه او يمنعو من الشتيمة الواضحة بكل الفاظها الما في اختلاف عليها
عشان يلجا للرمزية و استخدام كلام عادي بتاويلاتو

اسامة ود الفضل .. كيفك ياخ و اولادك

Quote: عزيزي : الكلام أيا كان مقروءا كان أم مسموعا له طريقة واحدة في طريقة فهمه و استيعابه يسميها علماء اللغة speech processing و تتلخص ببساطة أن الإنسان وعند سماعه أو قراءته لجملة ما تحتوى على مفردات مبهمة أو ذات معانى مختلفة حرفية أو بلاغية فإن المخ يقوم بتنشيط كل هذه المعانى المرتبطة بالمفردة تلقائيا أراد ذلك أم لم يرد و لكن المفردات المصاحبة the context أو السياق العام للجملة يجعله يغلب أحد المعانى دون الاخرى عليه فإن حكاية القراءة بالنيات ليس لها أساس من الصحة .

كلامك دا يا ود الفضل يدعم حديثي عن قراية النيات قول لي كيف؟
قلت العقل ينشط المعاني المرتبطة بالكلمة عند سماعها او قراءتها , طيب هنا المشكلة اننا ما بنتكلم عن معاني كلمات الحديث عن اصطلاحات و تأويل لكلمات عادية , كلمة زي ابلع ليس لها غير معنى واحد فتش قواميس الدنيا كلها ما ح تلقى غيرو
طيب الجاب اللبس شنو اهي دي النية هنا ظهرت
خليك من دا و لنفترض انو الاستخدام الاصطلاحي بقى في قوة المعنى لدرجة المخ اختزنو و استحضرو حال ورود الكلمة المعنية يجي هنا حديثك عن السياق العام للجملة وكيف ووين ومين القالها
هنا برضو النية - او قول التفسير - بلعب دور

لو مر الحبشي من هنا حيكتب استغرب مشاركة البعض في استهجان الفاظ و كلمات تحتاج للتأويل و التفسير و بها شبهات في حين يحتفوا بالكلام العديل الذي لا شبهة فيه ولا يحتاج لإيحاءات لمجرد ورودو في اعمال ادبية
الكوتات نجيب

قرصة جات في وكتها يا دكتور
تنبهنا انو السكين سرقتنا


تشكر

Quote: استنكاح

دي عيبها شنو يا دكتور؟
يا زول أنا باستعملها حتى قدام الحاج
هل ليها معنى تاني غير الاستهبال والغش والانتهازية والأنانية.. إلخ؟

المشكلة حتى لو طلع فيها قولان ما عندي كلمة (ما فيها قولان) مرادفة ليها تدي معنى الكلمات الفوق ديك مجتمعة

سعادة السناتور

وليد المبارك

Quote: قرصة جات في وكتها يا دكتور تنبهنا انو السكين سرقتنا

لا ياعمك....لاسكينة لامطوة.....!!!!

لكل مقام مقال

ياخي عداك العيب...بس ماتنسانا من السمينة.....!!!!

وكان ماصدقت....نرجع تاني لي ....ولي ياشفت

دكتور بلة وضيوفه السلام عليكم ورحمة الله وبركاته
شكرا يا دكتور على المبادرة الطيبة

Quote: لو مر الحبشي من هنا حيكتب استغرب مشاركة البعض في استهجان الفاظ و كلمات تحتاج للتأويل و التفسير و بها شبهات في حين يحتفوا بالكلام العديل الذي لا شبهة فيه ولا يحتاج لإيحاءات لمجرد ورودو في اعمال ادبية

تحيات يا أخانا محمد البشرى
هل تصدق قرأت مداخلتك هذه حينما كنت أفكر في جدوى التداخل هنا ؟
إنت قلت في أعمال أدبية يا محمد؟
لا لا لا ما أعمال أدبية !
الأعمال الأدبية نصوص مقدسة خلها الآن !
الكلام في حوارات عديل : أخذ ورد!
للأسف الروابط والكوتات ذات الصلة في اللابتوب في البيت !
بس لو عائز عينة سريعة راجع خيط : ألم نشرح لك صدرك في مكتبة الأخ حميدة !

Quote: والآن وبعد أن تم تطبيع هاتين الكلمتين هناك كلمة ثالثة فى الطريق تجدونها هنا:

ربنا يستر من الغريق يادكتور





وشكرا دياب للإعتذار ياراقي

Quote: أتفق معاك تمام يا دكتور... بصراحة الكلمات دي أصلا ما خطر لي إنها ليها المعنى البعيد دا و هنا الخطر زي ما قلت يعني الواحد ممكن يستعملها ببساطة...

العوض أخوى
أصلا التنبيه دا عشان الناس البستعملوها بحسن نية..
أما من يوهب وهو صايم فذلك حق فيه العذاب.

الشيخ الوقور عبدالوهاب أحمد الحاج
مقروء مع عماد عبد الله مقروء مع الأغنية إياها

الحمد لله الذى جعل بالمنبر أناس كانوا مع الشاعر لما كتب الكلمات..
بالمناسبة جيل الأربعينات والخمسينات دا هو ركيزة المنبر..

شكرا ليكم كبارنا.

Quote: وحقيقة اتفق تماما مع د. بلة فى محاربة الكلمات السوقية بتاعت الشارع الخلفى والغير محببه وبمعناها الرمزى الذى يورد هنا

شكرا تبلدينا
ولك التحية
الإتفاق بريح الواحد شديد.

***- تعرف يادكتور،
في اوائل سنوات الستينيات كان الفنان الكبير عبدالكريم الكابلي عنده ( رمية ) يقولها قبل الدخول لأغنيـة ياضنيـن الوعـد، وكان بقول فيها مع نقرشة العود:
جال ماءالشباب في خديكا
وتلألأ البهاء في عارضيكا
وكسي طرفك المكحل فؤادي
فصار رهنآ لديك لديكا
ياكثير الجمال والدل
حياتي ومميتتي بين يديكا

***- كل الناس كانوا معجبون شـديد الاعجاب وحافظيين الرمية دي عن ظهر قلب، وكنا بنرددها باستمرار، حتي اذاعة امدمان كانت بتبث اغنية ياضنين الوعـد ومعاها (الرمية) واتعودنا نسمعها في التلفزيون كمان.

***- وفجأة اتوقف الكابلي عن ترديد كلمات (الرمية) ويدخل طوالي علي الأغنية. الحكاية دي ماعـجبت ناس كتار وضايقوا الكابلي بالأسئلة ليه اتوقف عن ترديد (الرمية)?!!، وعرفنا فيما بعد، ان وزارة الاعلام منعت السماح ببثها.....لان كلمات (الرمية) من اشعار ابونواس الشاعر المشهور بالفسق والمجون... وكتبها في وصـف غـلام!!!

***- من اليوم داك في اعوام الستينيات وحتي اليوم، مابقينا عارفين وين الكلام المؤدب..... ووين الالفاظ البتخدش الحياء...وتشـابه علينا البقر!!