فريع البانة كلمات الشاعر صالح عبدالسيد(ابوصلاح) غناء الكروان بادي محمد الطيب
************** فريع البانة... المن نسمة يتمايل حاكى.. المنقسمة نار قلبي بتوقد.. من وسمة تلمع في خديدها.. تفر بسمة الفم زي خاتم.. نص قِسمة يا الماك داريابي.. والغي قسمة **** **** نص وسطك خاتم.. بي زندو صديرك قائد.. والديس جندو كفيلك قلَّع.. من عندو أكتافك فوقو.. يا لسمحة بتسندو **** **** حبوب الفاطر.. درية وجهك يتلألأ.. من دون ريّا الجبهة تلاصف.. بدرية والحالة البي.. ماها مدرية **** **** الجيد الوافر.. كالجاما فاقت أعرابها.. وأعجاما المهرة العاصية.. في لجاما لقلوبنا لحاظك.. يالسمحة رجاما **** **** زبرجد لونك ..إخضرَّا ده الولع قلبي..ما ضرا أنا قلبي فدايتك.. ما ضرَّا لو كان يتدقدق.. يا روحي ويضرّا **** **** يا ريلة بزازك.. ما نوعا من خز أو عسجد.. مصنوعة قادت لي أعطافه..ا المرنوعه دي ثماري ولكن.. يا روحي ممنوعة
أستاذي المبجل أحمد القرشي عساك بخير دائما بتتحفنا بأجمل المداخلات الثرة الدقيقة
وأنا إقترحت علي معاوية الاسبوع الفات لو قدرت تعمل لينا كتاب تضع فيه كل مخزونك المعرفي عن الحقيبة وعن شعراءها وفنانينها وأنا أعتقد انك اكتر أنسان جدير بنقل الناس إلي ذلك الزمن الجميل وإبراز النواحي الجمالية في كل قصيدة
ألف شكر علي سؤالك عني حقيقي ياأستاذ أبحث عن مناسبة القصيدة دي وما لاقياها ياريت لو أكرمتنا بيها
الفنان بادي محمد الطيب أسطورة في عالم الفن الجميل وأنا أعتقد إنو أحسن من أدي هذه القصيدة غناها بإحساس عالي وسلاسة في مخارج الالفاظ الصعبة تخلي الواحد يقرب يطير وهو بستمع ليها شكرا ليك كتير
وربنا يرجع ليك بريدك الاليكتروني بالسلامة لوووول تحياتي
حبيبنا الدكتور احمد القرشي لك التحيه والتحيه مجددا لصاحبة البوست
Quote: اغنية فريع البانه هى الاغنية الوحيدة لابوصلاح والتى لحنها الحاج محمد احمد سرور
سجل الاغنية على الاسطوانات بمرافقة الربابه الفنان بشير الرباطابى
وكان معه فى الكورس ابن عمه احمد عمر وذلك فى سنة 1927
تعرف المعلومه دي يادكتور مفاجأه بالنسبه لي لانه حسب علمي انه سرور كان في التيم بتاع العبادي والشعراء سيد عبدالعزيز وعبيد عبدالرحمن اضافه لود الرضي اما التيم الذي يقف في الضفه الاخري والذي يتزعمه ابوصلاح لم اكن اتوقع ان غنى لاحدهم سرور .