Post: #1
Title: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 07:44 AM
.........................
..........................
...............................
• كنت ح تلتزم بالمواعيد
• كنت ح تدفع قروش الطبيب أو اي زول قريبك أنجز ليك عمل .
• كنت قاضيت المهندس اللي خرب ليك بيتك
• كنت عملت مشروعك بنفسك دون محاكاة
• كنت بدأت دوامك في الموعد المحدد -
• كنت حتنطق حرف ال (ق ) و ال (غ) كما ينبغي
وما كنت ح تقول للتسعة ( تزعة)
• كنت ح تلبس شيك جدا عند ظهورك أمام التلفاز وأجهزة الاعلام
• كنت تتحدث بطلاقة وإنسيابية بدون أ أ أ أ أ أ وبتاع وهناي
ونواصل .... هناك المزيد
ابوشهد
|
Post: #2
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 07:46 AM
Parent: #1
......................
• ولو ما كنت سودانى كنت عرفت أن بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك ودرست الجامعة ولكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى اخنق فطس .. او لأنو ناس البيت عيزين كدا تقوم تخنق ابوك الغلبان .
• كنت ح تتصل بالتلفون قبل زيارة أحد في منزله قبل وقت كافي ، مش و أنت في خشم الباب، ده طبعا لو اتصلت .. وما جيت داخل زي قدر الله بدون حتي ماتدق الباب ، وتدقو ليه؟؟ مش في سلك تجرو وتدخل!!بدون مراعاة لحرمة البيت وكمان عامل الحالة واحدة دون مراعاة لحقوق الناس في بيوتهم والنسوان البغسلو في ملابس البيت .
ونواصل ..............
|
Post: #3
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 07:58 AM
Parent: #2
• ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وفتيش الواسطات والمداخل العجيبة.
• وكنت ح تنهر شفعك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعوجب لي اولادك ورافع لي ناس البيت الضغط والسكري...وفارض نفسك مأدب أولادك زيهم في الدنيا مافي .. وكمان موهوم بكلام مرتك البشكر في الأولاد بتاعنكم والناس كاره يومكم وجيتكم ليهم لكن مغلوبين .
• كنت ح تتوقع بحصل شنو لما ترقد طفلك الصغير بدون بامبرز في سرير في بيت ناس!! واولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بي دم قلبهم ..والطامة الكبري لو كان عندهم حوض سمك .
ونواصل
|
Post: #4
Title: Re: " تخيل كيف يكون الحال لو ما كنت سوداني ... كنت حـ .... :
Author: عمران حسن صالح
Date: 03-01-2010, 08:01 AM
Parent: #2
| Quote: والنسوان البغسلو في ملابس البيت |
في بنبر وبالطشت كمان 
|
Post: #5
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 08:44 AM
Parent: #4
العزيز عمران أبو محمد
| Quote: في بنبر وبالطشت كمان |
شفت الحكاية كيف ... ياخي الواحد ما يقدر يأخذ راحته داخل بيته
ولا مع أولاده .
عمران حمدا لله علي السلامة .... وزيارة مقبولة إن شاء الله
ابوشهد
|
Post: #6
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 08:48 AM
Parent: #5
.................
..............
• و كنت ح تتردد في أخذهم معاك المرة الجاية لنفس البيت، علشان يبهدلوه مرة تانية.. وأنت بميتة قلب قاعد تتونس وتضحك وناس البيت بالمغسة عايزين يتالوك .
• كنت ح تتردد في إعطاء رقم تلفون أو عنوان شخص ما.. دون إذنه أو حتي سؤاله إن كان عندو رغبة يتواصل مع الناس ديل أو مفهمهم انو ما عندوا تلفون من اصلو بدل تورطو وتحرجو كدة!!!.
• كنت ح تترد في زيارة شخص ما.. أنصاص الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي امل انك تمشي وتخليهم ينومو وانت برضو قاعد تبرأ فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!
ونواصل ..........
|
Post: #7
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 03:35 PM
Parent: #6
..........................
وكنت اتونست بصوت معقول بدل الجوطة العاملها للناس وإنت ما حسي بروحك تهنق زي الحمار ، خصوصاً عندما يكون الطرف الأخر قاعد جنبك في نفس الكنبة.. ويا حبذا لو الطرف الاخر ساكت ...كنت امتنعت عن التدخين في منزل شخص آخر،
ونواصل ....................
|
Post: #8
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 03:38 PM
Parent: #7
.................
• كنت ترددت في ارسال حاجات وزنها خمسة كيلو وما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس.
• كنت امتنعت عن زيارة احدهم في مكتبه، للونسة او مناقشة امور لا صلة لها بالعمل
ونواصل..............
ابوشهد
|
Post: #9
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 03:39 PM
Parent: #8
• كنت خجلت من عدد المسكولات التي تعملها، مش كمان تقول 'شنو يا فردة, خمسه مسكولات ما ترد عليها؟ والله الفيك اتعرفت'..
• كنت حا تقعد فى صالون الناس بدل تلوص فى البيت كلو.
• كنت ح تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر فى مخك ( لو كان فى يعنى)
ونواصل ... الجاية أقوي ....
ابوشهد
|
Post: #10
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 05:09 PM
Parent: #9
• كنت ما ح تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين اصلا ما شفت غيركم بتحاوم فى عنابر الولادة وكمان معاها هرجلة وإزعاج وبيسأل عن المرأة الوالده بإسمها على رؤوس الأشهاد .. ومرتك لما تلد تلوم الناس الماجوها ..اصلا انتو البوديكم شنو مستشفي الولادة؟؟ عشان تودو نسوانكم اوكي آمنّا بالله طيب اقعدوا في الاستقبال لزومو شنو الحوامة في العنابر يعني حبكت تباركو للام .. استنو لمن تطلع في البيت أما لو كانت اختك او زوجة اخوك يا ريت الزيارة تكون من طرف الاوضة وتتوكل علي الله .. في زول يقول لمرأة والده (( أها هسع كيف ))
ونووووواصل ....
|
Post: #11
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-01-2010, 05:30 PM
Parent: #10
• ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش. وبطلت كمان الطلوع بالجلابية الخفيفة وتحتها الهاف الصغير .. وكمان بتعاين لنسوان الناس ..
ونواصل .......
|
Post: #12
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-02-2010, 06:42 AM
Parent: #11
• ولو ما كنت سودانى كنت عرفت وين ترمي السفة وكيف تتخلص من الأكياس والأوراق والنفايات .ز بالله في زول يشيل الوساخة من البيت يختها في نص الشارع ؟؟
• ولو ما كنت سوداني كنت عرفت تسوق سيارتك في خط مستقيم،
• ولوما كنت سوداني كنت قدرت تجعل من السودان بلد بيهو نعتز،
ونواصل .......
|
Post: #13
Title: Re: " تخيل كيف يكون الحال لو ما كنت سوداني ... كنت حـ .... :
Author: محمد خليل إسماعيل
Date: 03-02-2010, 03:26 PM
Parent: #12
............
• ولو ما كنت سودااااااااااانى ما كنت سقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي احسن الاحوال لابسين طاقية ويوم تحبو تقشرو تلبسو مركوب شين وقديم مع جلابية عواليق.. ونسوانكم معنكشين بى دهب البيت كلو ولابسين الاحمر والاخضر والترتر وزفة الوان ما شوفناها حتي في اعتي صحن سلطة ده غير شباشب الظار البرتقالي والليموني وهلمجرا وشفعكم يكوركو ويتساككو ده غير التحنيس والدناءة عشان يمشو ليك الوزن !!!
ونواصل ..............
|
|