ورشة ضبط المصطلح في البورد ...

كل فترة تبرز للعلن مصطلحات و تعابير يتم تداولها بين الأعضاء
لكن من الملاحظ نوع من التباين في استخدامها من عضو لآخر ومن موقف لآخر
في البال أحد أقوى و أشهر المصطلحات في الآونة الأخيرة و هو مصطلح " البلع "
حسب فهمي له هو أن صاحب - و يشار له لاحقا بالبالع - البوست أو المداخلة موضوع البلع يُضطر لما أُصطلح على تسميته بلع البوست نتيجة لـ هجوم / إختلاف / تفنيد عدد مقدر من الأعضاء - أو حتى عضو واحد - لطرحه و تبيان خطله أو سذاجته أو حتى بياخته ساي , وأحيانا يضطر للجوء لعمك لسحب البوست أو يكبّر اللفة منو و يعمل رايح

في نفس الوقت يتم استخدام المصطلح للبوستات المسحوبة تعسفّيا - بوست علي بشير مثالاً المسحوب في لمح البصر
و تعليقه عليه بقوله " بلًعوني ليه " و افتكر الحالة هنا حالة سحب أو لحس بوستات عادية لا شبهة بلع فيها

من ناحية تانية نحتاج نتفق على ضبط قواعد حالات البلع لتجنب الغلاط ومتى يعتبر البوست جاهز للبلع وهل تم تبليعه أولريدي أم لا
فقد يتميز البالع بقوة الحجة - أو الفصاحة و طولة اللسان - و يقاوم هجوم المبلّعين و ينجح في تجنبه فعليا
في حين يظل يوصف بأنه بلع البوست


من المصطلحات الأخرى المهم الاتفاق حول استخدامها بطريقة صحيحة و مُوحدة و إزالة اللبس و التباين حولها:
- القراءة بالأذنين
- المثقف
- المبدع
- المثقفاتي
- رُشّو أو رَشّوه ..
و غيرها

فالورشة للنقاش و محاولة الوصول لإتفاق على تعريف و ضبط لقواعد المصطلحات المذكورة و غيرها

أبو حتحوت
بعد ده ممكن نقول ليكـ حمد الله على السلامة ..



* مالكـ ما عزمتنا في الأربعين ؟؟

هلا خلدون الله يسلمك
اللقيمات و الرز بلبن قسمناهم للجيران

_______________________________________________________

برضو من المصطلحات - أو التعابير - التي تحتاج لضبط حكاية التحكيم في البوستات
يعني قصة يكون في نقاش / غلاط / شكلة / وات إيفر مدوّر بين عضوين أو أكثر
يجي تالت معلنا بان النتيجة كذا - صفر لصالح فلان
الحتة دي محتاجة وقفة حتى لا تكون العملية هبتلّي ووفقا للهوى
مفروض تكون المعايير واحدة ومتفق عليها عشان ما يكون في فرصة للغلاط قدام المهزوم و التحجج بعدم عدالة و مهنية الحكم

Quote: القراءة بالأذنين - المثقف - المبدع - المثقفاتي

اضافة

البسطاء
ذوات الاربع

Quote: - المثقف

Quote: - المثقفاتي

سلامات يا عمك
يبدو فعلا انو في فرق بين المصطلحين ، المثقف و من هو المثقف و علاقة المثقف بالسلطة و المثقف العضوي قضايا شغلت اذهان الناس و اريق فيها حبرا كثيرا بالتأكيد.
هنا ساحاول فك الاشتباك بين مفهوم المثقف و مفهوم المثقفاتي:
المثقف هو من يعتمد على كونه مثقفا في آكل عيشه اي أن وظيفته تفترض أنه يؤدي عملا ذهنيا و فكريا، و هذا النوع من المثقفين في الغالب يكون مرتبطا بالطبقة السائدة و يعمل على تأكيد سيادة ثقافة هذه الطبقة على غيرها من الطبقات . في السودان طالما استخدمت الحكومات العسكرية مثقفين ليقوموا بتبرير افعالها و تحسين صورتها أمام الشعب و امام العالم الخارجي ، و قد لعب المثقفين هذا الدور بامتياز و نجاح منقطع النظير ، يكفي أن تلوح السلطة لاحدهم بمنصب دبلوماسي او اداري حتى يهرع باقصى سرعة مرتميا في احضانها قائما بأمر الدفاع عنها و عن سياساتها و مبررا لجرائمها.
اما المثقفاتي يا عمك فأظن أنه المثقف العضوي البيتكلموا عنو المثقفاتية ظاااتم و هذا "المثقفاتي" يكون منحازا للجماهير و على عداء مع السلطة و يمكن تمييزه عن غيره بأنه ليس سلفيا و لا ظلاميا و لا مرتزقا.

انفع و للا كيف؟

السرقة القوقلية وفض الاشتباك بينها وبين النقل بتصرف

Quote: السرقة القوقلية وفض الاشتباك بينها وبين النقل بتصرف

الشي ده بسموه "التناص" يا وهبه .

Quote: الشي ده بسموه "التناص" يا وهبه .

هو بالله دا التناص يادكتور ؟
حوامتنا الايامات الفاتت دي في الفور اوول
ما استفدنا منها اي حاجة

مرحب يا عمك والجميع..
وسعيدين بعودتك الي منصات الاسفير وبوعي اركلوجي ذاهب صوب التجويد والدقة..
رغم انو الحكاية دي صعبة والمصطلح في سودانيز (مميع) ودائما بكون مشحون بالرغبات النوايا
ومافي استانتدر...
دائما الزول بعد الدهشة والحلول التي قدمتها التكلونوجيا بعتقد انو الحلول قد تاتيي دائما من السوفت وير ولقدام الكمبيتر في خيال جامح ممكن يقدم ليها حلول في المعضلات دي و يعزلها من السمبلة..
يعني تدخل البوست في السوفت وير والسوفت وير يدور فووووووووو ورورورور
ويقول لينا ده مثقفاتي
وده مثقف..
ده عنقالي ساكت
البوست ده مبلوع
البوست ده كرور
البوست ده غير موقف
وممكن ايضا البرنامج يرسل مداخلات نتيجة الدشمانات ويعمل احصائية..
علي شاكلة
تعويق (اكس عوووق وااي 8 من عشرة)
وممكن ايضا يرسم ليك زهرة وغنمها في حالة وصول احد المدشمنين الي تلك الحالة وهكذا..
..........

Quote: فالورشة للنقاش و محاولة الوصول لإتفاق على تعريف و ضبط لقواعد المصطلحات المذكورة و غيرها

والله يا ود البشرى ورشتك دى بتكلفك الكثير ، وعايزاك تشييل المعايير الناتجة عن الورشة وتحوم بيها البوستات بوست بوست

وتبدأ تدمغ ، سيتم بلعه بعد حين ، عصى على البلع ، صاحبه عنده سوء هضم ، بوست مستفرغ - اى تم بلعه ثم استفرغه صاحبه -

ولا بالمرة تتفق لينا مع بكرى فى آليه لوضع علامة خارجية على البوست المرشح للبلع خشية الدخول فيه






ـــــــــــــــــــــــــــــــــــــــــــــــــــــــــــ
طبعاً أكيد حا يكون فى جماعة ناوين يبلعوك البوست دا ياود البشرى ، يازول سلام عليك . . .

هلا و مرحبا بالشباب ومشاركاتهم في ورشة ضبط المصطلح
كدي اولا رايكم شنو في عنوان الورشة ؟ بطلّعنا يا ربي من زمرة البسطاء المحتاج ابو ريش يسوط ليهم الكلام و ياكلو ليهم بالملعقة
طبعا شعار الربع دا الغير معلن " لست بسيطا لست قليل الثقافة " ح تلاحظوا كمية من الفلسفة و الحذلقة وتعقيد الكلام و استخدام مصطلحات معقدة ما انزل الله بها من سلطان ولم يشهدها تارخ البورد القريب
الله يجازي اللي كان السبب
ما علينا ...نرجع لموضوعنا
الفكرة إنو الناس تتكلم نفس اللغة و تتفق على معايير موحدة للمصطلحات , على الأقل للمصطلحات الأكثر شيوعا
وقواعد موحدة و متفق عليها في تطبيق المصطلحات دي للحفاظ عليها
بأخذنا لمصطلح البلع كمثال فشكلو انو بدا يضيع و يأخذ معنى آخر

طبعا المقصود مصطلحات البورد
يعني يا دكتور سيف شاكرين تعريفك ومقارنتك بين المثقف و المثقفاتي لكن كنت اقصد "المثقف " و " المثقفاتي " بتاعة البورد
والتي أؤمن أنها بتختلف عنها في الواقع أو خارج البورد
بمعني قولة فلان مثقف في الفور أول مثلا تعني كلامك - الغير بسيط بالمناسبة- أعلاه
لكن لما نقول فلان مثقف في سودانيز غالبا ما يكون المقصود فاكيها في روحو او شيئ من هذا القبيل


بريك و نواصل ...

___________________________________________

في سناكس و كوفي في اللوبي يا شباب

ودالبشرى ,,
سلامات
اول شئ الورشة دى عندك ليها تصديق?
وكدى بالمرة شوف لينا مصطلحات زى:
رشاشات
ماسورة وجمعها مواسير
سادومبا,, واعارة
دى كلها مصطلحات دايرين نأصلها بعد ماتسمكرها فى ورشة مجدى شمس الدين.

يُنظر ويفاد في هذه المصطلحات!

اخيراً

حمد علي السلامة , عفشكم شايفه وصل يادوب

متـــاوقـــه ســاكــت ..

الشكر لكل الأخوان المشاركين في الورشة

__________________________________________

كورتك فكّت

المصطلح دا من شدة فوضى استخدامه يكاد يفقد معناه
يعني اتخيل يجي من لا كورة له أصلا شايلو وحايم بيه يلصقوا كيفما و أينما أتفق
بلا فرز او دراية أو حد أدنى متفق عليه من قواعد الضبط

نيكست سيشن - بعد البريك - ح يكون نقاش حول النقاط أدناه :

- تفكيك و شرح مصطلح كورتك فكّت
- حديث عن الحالات التي ينطبق عليها المصطلح - مع ما تيسر من أمثلة
- متى و أين يصح استخدامه

مصطلح .. شكرا لمرورك الجميل ..

الرجاء تفكيك المصطلح مع مراعـاة البعد النفسي للمتلقي سواء أن كان المخاطب ذات نفسه أو المتلقي العادي ..

ياحبذا لو كان ثمة نماذج واحصائيات دقيقه فيما يتعلق بمصطلح البلع ..

كما أرجو تفكيك مصطلح (بيضه) .. اي حال ان ينعت الكائن (بالبيضنة) والاثر النفسي لذلك .. كأن يجيك واحد يقوليك دا شنو يا بيضة ..