ايـــّاكم والدراســات الســفـلي :)

مقال بذات العنوان قرأته في احدي الصحف اليوميه في بدايات دراساتي ما فوق الجامعيه,
للأسف لا أذكر اسم كاتب المقال ولا اسم الصحيفه,
الا أني أذكر اسلوبه الساخر ووصفه الدرامي الكوميدي, لكل المصاعب و المصائب,
التي يمر بها طالب الدراسات "السفلي" -كما أسماها-, في رحلته الي الأسفل :)

ولأني كنت حينها ممن قال فيهم شاعرنا الراحل سيد عبد العزيز "صغير غرير الطرف حالم",
لم تتمكن قدرتي الاستيعابيه من اخذ كلمات الكاتب علي محمل الجد,
والهرب باكرا من شرك الدراسات السفلي,
كنت ممتلئه بالأمل والتفاؤل والاقبال علي الحياه,
حتي أن ذلك أعماني عن ضبابية الطريق الي الأسفل :)

ليتني احتفظت بنسخه المقال لمثل أيّام التململ هذه,
علّها تضحكني كما أضحكتني حينها,
بدلا عن (تعليق) المقال حينها بالتامر مع صديقتي الصدوق علي صدر بورد المعهد,
ليشاركنا المشرف السخريه من المقال,
ولنقهقه في مرح (لا يخلو من خبث) حين يطلق "السناير" من زملائنا زفرات حري ملؤها الألم,
وهم وقوف أمام البورد منهمكون في قراءة المقال :)

انفض سامر ذلك النهار دون أن نعي الدرس الذي يفترض أن كاتب المقال قد لقّنه لنا,
وأغرتني الدنيا حينها وحدثتني نفسي الأماره بالسوء بالاستمرار في الرحله سالفة الذكر,

ثم حدث أن ذكرني بذلك المقال رسم كارتوني لطيف لمحته اليوم في أروقة الانترنت,
يوضّح Curve مشابه جدا للذي رسمه صاحب مقال الدراسات السفلي ..



فادركت ضرورة احاطة المقبلين علي هذه الخطوه -غير محسوبة النتائج عادة- بمخاطر الطريق هبوطا :)
علّهم يكونوا أكثر حصافة منّا حينها, ويأخذون ما أكتب بقليل من الرأفه بالنفس والشفقه بها .. :)




----
سأواصل اذا صرف الله نظر مشرفي العزيز عن هذا الخيط :)

اذا كنت من محبي الحياه
(وماصدقت انك خلّصت دراستك الجامعيه واتفكّيت من ضغوطات الدراسه),
فالتحذير أعلاه موجّه لك -انت بالذات- علي سبيل الخصوص,
اعلم أنك مفارق وجه الحياه المفرح, الي وجه اخر ملئ بالهموم والغموم والمخاطر,
وقد تقضي العديد من الأيام -المهمه في حياتك- كيوم عيد ميلادك ويوم زواج شقيقتك, ويوم ولادة أول حفيد لأسرتك
بين الكتب وصفحات الانترنت الممله أو داخل المعمل وأروقته -الغميسه- ..
مثال صديقتنا أدناه:

وحينها ستبدأ تحسب سنوات عمرك التي قضيتها بين أروقة المكتبات وقاعات الامتحانات ومقاعد الدرس,
وتتأفف وانت تنظر من شباك غرفتك الي من يقضون أوقاتا حميمه مع الأصدقاء (بما في ذلك أسرتك),

ثم اعلم علم اليقين أن الدراسات السفلي طريق ذو اتجاه واحد,
ما أن دلفت فيه حتي تعذر عليك الخروج بدون مخالفه أو حادث !!

فانظر يارعاك الله الي ما انت مقبل عليه بعين اليقظه,
وتدبر وتفكر في نفسك وأمر محبتها للحياه ومتعها التي ربما تكون غائبه عنك الان,
ولكنها -ستتنطط- أمام أعينك ما شرعت في دراستك السفلي !!


الا هل بلغت.. اللهم فاشهد .. :)

أماني يا (صديقة)...
بطلي الجرسة وأمشي تمي بحثك..
لو في اي برامج ولا متع دنيوية بنحكيها ليك...

علاء ياصديق:

Quote: أماني يا (صديقة)... بطلي الجرسة وأمشي تمي بحثك.. لو في اي برامج ولا متع دنيوية بنحكيها ليك...

مالك ياعلاء ياخ؟ ما شفت ليك الزول القرايه غالباهو وقايمه بيهو؟
خلّيني "أفش خلقي" شويه ياقول اللبنانيين,

بعدين ما تحكوا لي ولا حاجه بعد شنو؟
خلوني بس قاعده هنا ده مقابله الجهاز ده الي مالا نهايه ..


حكمة اليوم: من ضحك في أخيه .....

مصر تعمل دراسات سفلي؟
ووصلت لانك قريت المداخله التالته في البوست ولسه عايز تعمل دراسات سفلي رغم كل التحذيرات أعلاه؟

طيب,

من هنا لقدام عليك أن تتحمل تبعات قرارك -المطرطش -
واعلم ان لم تكن من محبي -القرايه أم دق- والمكتبات والسهر,
أنك قد اتخذت القرار الخاطئ الذي ستندم عليه في مقبل السنوات ..
وأنك أدرت ظهرك للدنيا وأقبلت علي المصاعب,
وأنك لم تأخذنك بنفسك رأفه ولا شفقه ..
(لسه بحذّر فيك ملاحظ؟)

طيب ..

تبدأ رحلة الدراسات السفلي عادة باهتمامك بموضوع معين,
ورغبتك الجنونيه في اتخاذ خطوه جريئه بالبحث والتزود في ذات الموضوع,
فتندفع الي مشرفك معلنا رغبه لاتستطيع كبحها في اجراء بحث دراستك السفلي في ذات الموضوع,,

عزيزي المقبل علي الدراسات السفلي, اذا هذا هو ما يجول في خاطرك حاليا,
فاعلم أنك في الطريق الخطأ, وأن بدايتك غير صحيحه :(

ال Fund أولا يا عزيزي ..

الاهتمام قد يتطور بينك وبين العديد من المواضيع -المهمه- الي درجة المحبه,
الا أن المحبه وحدها لاتجلب ال Fund اللازم لاجراء البحث,
وسواء كنت تود اجراء البحث داخل أو خارج السودان,
فنصيحتي الذهبيه لك: ابحث عن الدعم المادي أولا ..
الحصول علي المنحه يجعل طريق المحبه بينك وبين الموضوع المطروح في المنحه أو أي موضوع -مهم- اخر ممكنا,
أمّا تعذّر الحصول علي الدعم قد يجعل المحبه بينك وبين أي موضوع في يدك, ضربا من ضروب الخيال !!

وللحصول علي المال (Scholarship- Fellowship- Grant) أو أيا كان شكله أو نوعه,
خلي دمّك تقيل ولا تيأس ..
كن واثقا في نفسك ولا تترد في طرح رغباتك ومقدراتك علي الجهات المعلنه للدعم ..
ومع ذلك اتوقع زي مية خطاب بتاع اعتذار ورفض لمؤهلاتك الرفيعه من كل الجهات الاتقدمت ليها ..
الخطاب رقم ميه وواحد عادة بيكون بتاع موافقه ..
لذلك لابد من المرور بالمية خطاب رفض بروح معنويه عاليه ودم تقيل واصرار عجيب


تمكنت من اقناع جهه ما بالوثوق في امكانيات والاستثمار في مستقبلك؟

مبروووك .. انت الان في أولي عتبات السلم الي الأسفل ..


---
تنبيه ما زال في امكانك التراجع ان شئت,
فانت مازلت خارج منحني الخطر المرسوم في المداخله الأولي ..

أماني ياخ وضحي كلامك
سفلي ناس الماستر والدكتوراه .. ولا سفلي بتاع فكي أب قنبور ؟

منتصر سلامات:

Quote: سفلي ناس الماستر والدكتوراه .. ولا سفلي بتاع فكي أب قنبور ؟

فكي منو؟

الاجابه رقم واحد, مع اني ماعارفه الفرق شنو لوووول

عزيزي المقبل علي الدراسات السفلي,
أثبتّ انك راسك قوي وما بتقبل النصيحه,
ومشيت في طريق الهلاك بقدميك الشليقتين ..

خليني أكلمك عن أهمّ شخصيه في حياتك المقبله: مشرف البحث الشهير بال Supervisor

وحديثي عن المشرف يطول ويطول,

اعلم مبدئيا أنك مقبل علي علاقه مع شخص من أهم الأشخاص في حياتك المقبله علي الاطلاق,
وهي علاقه ستزداد حميميه كلما طال أمد علاقتكما معا ..

هكذا تبدأ العلاقه:

ثم بعد عام واحد:

(تصبح أكثر حميميه) :) You Must Work Hard boy
وبعد ثلاثة أعوام :

تصبح حميمه للغايه : Can you hear me, you must work hard!!!


---
الصور من ايميل لطيف وصلني قبل عدة أشهر من صديقتي :)

بالرغم من علاقتك الحميمه مع المشرف,
خليك متذكّر انه أهمّ شخص في حياتك,
لكنك بالتأكيد لست بذات الأهميه:


لو حسيت انه واجباتك كتيره وما عارف تلحّق عليها,
خليك متذكر انه شلاقتك هي الوصلتك لما انت فيه رافسا نعمة التمتع بالحياه العاديه:


وأهم حاجه لو قال ليك كلام مافهمته تأكّد انه فهمك المحدود هو المنعك من ادراك ماوراء الكلام :



--
صدقني أنا في غاية الجديه في نصائحي أعلاه
وحديثي عن أهمّ شخصيه في حياتك المقبله في أوله جدا .. :)

الليلة يوم الجرسة

الظاهر تجربتك استثنائية ولا موضوع البحث استثنائي

ياخ البلد دي فيها حملة ماستر ودكتوراه أكتر من الرقشات بتاعة امدرمان

شكلك متجرسة زي ما قال قمر بوبا .. ولا بتخوفي فينا

بعدين متع حياة شنو البتفوت صاحب الدراسات السفلي .. ياخ في ناس بيحضرو

هروبا من الحياة زاتا ............. كامل متابعتي

الظاهر تجربتك استثنائية ولا موضوع البحث استثنائي

ياخ البلد دي فيها حملة ماستر ودكتوراه أكتر من الرقشات بتاعة امدرمان

شكلك متجرسة زي ما قال قمر بوبا .. ولا بتخوفي فينا

بعدين متع حياة شنو البتفوت صاحب الدراسات السفلي .. ياخ في ناس بيحضرو

هروبا من الحياة زاتا ............. كامل متابعتي

منتصر سلامات ..
شكلك مقبل علي طريق الهلاك البحذر منه من قبيل ..
لاحول ولاقوة الا بالله ..

Quote: ياخ البلد دي فيها حملة ماستر ودكتوراه أكتر من الرقشات بتاعة امدرمان

حتتعلم تحترمهم كلهم أول ما تدخل في الدراسه,
لأنك حتعرف انه حمل الشهاده مرحله لاتصل اليها الا بشق الانفس ..

عموما أنا ما جربت نظام الكورسس, لكن أخواني عملوها,
وشفت جرستهم فأيقنت انه كل الطرق محفوفه بالأشواك,
أما نظام البحث وهو ما أتحدث عنه هنا
فلو كنت من المفتين -بتوع الزمن ده- لأعلنته من المهلكات التي حرّم الاسلام رمي النفس فيها ..
(ولاترموا بأيديكم الي التهلكه) ..

لووووول

Quote: الليلة يوم الجرسة

ما أظنها جرسة يا قمر بوبا ...


اماني دي شكلها كدة - والله اعلم - في مقتبل حياتها .. ماعارفة الراجيها شنو قدام ..

بتحسب أيام حياتها منذ تخرجها منذ جلوسها في بنشات الجامعة ولسع ما حسبت الكتير الراجيها وإنه في اكتر من بنش منتظر جلوسها حتي تصل لحقيقة الحياة ...

مع إحترام وعيها وفهمها لكن بالجد عشان تمشي قدام لازم انصحها انها تتجاوز حتة ذكريات الجامعة دي وتشوف ما خلف بوابتها ،،،

صديقي حسن ابكر- الله يطراه بالخير - كان رغم إننا بنقضي إجازتنا مرات بكسلا حيث مقره لكن لا نلتقي إلا ما ندر .. سالته حينها :
مالك يا ود السرة ما عاوز الناس ؟!
قال لي :
يا حيدر انا مقتنع انه في الجامعة دي في علاقات حدها بوابة الجامعة .. وفي علاقات بتحددها درجتك العلمية داخلها .. وفي علاقات لا يمكن ان تنفصم بجامعة ..
خلينا من البداية نشوف الناس الحريصين انهم يسكوها برة الجامعة والناس الحريصين يظهرو بيها داخلها بعد داك نحدد نمشي وين !!


انا شخصياً الجامعة بالنسبة لي انتهت مما وصلت بوابتها ..

ــــــــــ

Quote: ياخ في ناس بيحضرو هروبا من الحياة زاتا

حيدر الزين ياصديقي ..

شكلك قريت البوست وانت نعسان هههههه

Quote: عشان تمشي قدام لازم انصحها انها تتجاوز حتة ذكريات الجامعة دي وتشوف ما خلف بوابتها

ياسيدي الجامعه بالنسبه لي ما ذكريات ..
الجامعه بالنسبه لي هي المكان البقضي فيهو متوسط تمانيه ساعات يوميا ..

وحاليا بحاول أتجاوزها بجديه لوووووول

ميرسي عالنصيحه,
بنشات الحياه أظنها: الدراسه ما قبل الجامعيه, التخرج, الشغل, الدراسه ما بعد الجامعيه (موضوع البوست), الزواج وتبعاته :)
صاح؟
مريت بيهم كلّهم ماعدا الأخيره :)

شكلك عايز تعمل لي زي ماما و أم البت دي :



لوووووول

ياقمر ..

Quote: الليلة يوم الجرسة

جرسه بي حمتها وحياتك :(

أماني إزيكـ


بعد خلصنا بسنة تقريبا جزو من شلتنا قرّر إقتحم الورطة دي

مع إنو مفروض أتورط معاهم بس زوغتا

وقلتّ ليهم يااااااااااااااكـ


كان ليكم

عارف الورطات دي بتوصل لي جنس ده

ــــــــــــــــ



يازولة إتفشي ساي وكبي الجرسة عسى ولعل تتخلصي من الوعكة دي وتواصلي بحثكـ



بالتوفيق

حسين ملاسي ..
أضحك الله سنّك ..

محمد الجيلي:

Quote: عد خلصنا بسنة تقريبا جزو من شلتنا قرّر إقتحم الورطة دي مع إنو مفروض أتورط معاهم بس زوغتا وقلتّ ليهم يااااااااااااااكـ كان ليكم عارف الورطات دي بتوصل لي جنس ده

انت اللي فيهم,
ناصح والله .. هههه

Quote: يازولة إتفشي ساي وكبي الجرسة عسى ولعل تتخلصي من الوعكة دي وتواصلي بحثكـ

والله يامحمد الجيلي كان جيت للجد,
فهي جرسه علي شكل وعكه صحيه عديل,
لكن ده ما ينفي اني أثبّت حقيقة اني بحضّر في مجال بحبو جدا,
مع مشرف من أفضل المشرفين علي الاطلاق,
وانه أموري موفقه ومشت بصوره جيده و الحمد لله, وعلي وشك ..

بس أهو مره مره لازم أتجرّس وأرفع شوية شعارات, عشان أستعدل زي ما قلت :)

شكرا وفكّر تاني في أمر التحضير, معركه وبتعدي وانت الكسبان :)

صباح الخير عزيزي المقبل علي دراستك السفلي,
نواصل ما انقطع من أمر الحديث عن طريقك الأغبر (المصر تمشي فيهو) ..

دي شوية نصائح علي الماشي لأني استيقظت بوعكه صحيه (حمي وصداع) بدت معاي من أمبارح,
واستفحلت قليلا صباح اليوم (شفت الدراسات السفلي بتعمل شنو؟) ..

المهم اليك بعض النصائح:
*اعلم أن بعض الكلمات ان لم يكن أغلبها تحمل معنيين مختلفين علي حسب الناطق بها,
فعندما يقول لك المشرف, عليك بتسليمي مسودة البحث "في أقرب وقت ممكن" ASAP
فانه يعني أنك يجب أن تقوم بالتسليم نهار البارحه

اما اذا قال لك المشرف أنه سيراجع ذات المسوده "في أقرب وقت ممكن" ASAP
فانه يعني أنه سيفعل ذلك في وقت ما في القرن الحالي .. فلاتتعجل !!


* السؤال عن موعد التخرج أو موعد الانتهاء من البحث وبالتالي دراستك السفلي,
سيكون من أكثر الأسئله ثقلا علي الاطلاق علي قلبك,
وسيحاصرك به أغلب أهل بيتك وأصدقائك ما التقيت بهم ..
"ماقربت تخلص؟ وصلت وين في البحث؟ موضوعك ده مالو طوّل كده؟ (حتي لو كنت بديت أمبارح)"
وقد تتعامل مع مثل هذه الأسئله بكل السبل, مرورا بالهرب من أفراد أسرتك وأصدقائك,
انتهاءا بقطع علاقتك بمن يطرح مثل هذه الأسئله عليك أكثر من مرتين في حياته ..

نصيحتي الغاليه لك, اذا شعرت بالضغوطات ممن حولك بخصوص هذه الأسئله,
فاياك ثم اياك من أن تدفعك الحماسه (والهرب من النقه) للتوجه الي مشرفك وطرح ذات الأسئله عليه,
فانها من نوعية الأسئله المكروهه في فقه المشرفين, ,
وقد تؤدي مثل حالة الهاشميه التي انتابتك هذه الي زيادة في حالة الحميميه بينكما
الي درجه تفضل علي أثرها مواجهة أسرتك وأصدقائك باحتمال قضاؤك عشرة سنوات أخري في رحلة البحث عن شهاده سفلي ..

سأواصل,,

Quote: سأواصل,,

في الدراسات السفلي؟؟ و لا في البوست؟؟
ههههههه


تحياتي و احترامي---- يا أماني
و بالتوفيق والنجاح يا رب..


__
ماتنسينا من الكرامة بعدين....

شُكراً ليكـ أماني على التشجيع بالشروع في الخطوة دي والفكرة مامرفوضة بس التوقيت هو البلزمنا بالتطبيق حسب المجال ومتطلباتو




جُمعتكـ مُباركة
وربنا إتمم ليكـ بقية خطواتكـ على خير



ـــــــــــــــ



أهمّ حاجة الإستشفاء كُلّّ حين


واصلي ومتابعين معاكـ

أماني نصيحة لوجه الله أمشي مكتبة التجاني سعيد .. حايديك وصفة سحرية

لأنو متخصص في البحوث نظام الكورسات .. ويدين له بالفضل

بعد الله سبحانه وتعالى الكثير من حملة الشهادات العليا.. بس ماعارف

حاتلقي عندو مراجع لي تخصصك ولا لا .. بعدين ماتنسي نظام الكورس فيهو

اجتهادات شخصية ونجر عدييل .. علم الله ده ماواسع .. ما شرط يكون كلو في المراجع

لازم تضعي بصمتك في البحث .. يعني ما كلو كوبي آند بيست .. ممكن تفكري في مشروع خيالي
يعني تقوم بتنفيذه الأجيال القادمة لأنو الدفعات القدامك عملوا كل المشاريع المتاحة والغير متاحة .... تقديري

كدي يا جماعة ورونا الجرسة دي فكت ولا لسه




سلام بالكوم أماني ..

الإختفاء علامة كبيرة من علامات الجرسة الصامتة.