بوست لتهنئه الفراعنه بكأس الامم الافريقيه فراعنه فراعنه حتى النصر

الفراعنه اهل كوره وبخدموها واهل فضل على مجموعه كبيره من اهل السودان
اكتر من اربع الف عقار فى مصر يمتلكه سودانيين واكتر من ما قيمته سته مليار من ودائع وحسابات فى البنك الاهلى المصرى لسودانيين بمعدل ارباح لايقل عن اطناشر فى الميه
كسودانى أدينى سبب واحد يخليك تشجع الجزايريييين ياخى ديل لهجتم زاتو مابتتفهم

السودانين دايما بقضو أجازاتم وبصيفو فى مصر يوم واحد ماسمعتلى بسودانى قضى اجازتو فى الجزاير

الاخ الكريم WAD ELGAALI#4


التحايا والسلام

Quote: كسودانى أدينى سبب واحد يخليك تشجع الجزايريييين

حاتكلم معاك كسوداني وهو ما نتفق فيه يا اخي الكريم قبل ان نبدأ بالاختلاف ،

في مباراة مصر والجزائر في السودان شجعت الجزائر لسبب مبدئي بالنسبة لي :

انو مصر بلد محتلة لجزء من الارض السودانية وترفض حتي رفع الامر للتحكيم الدولي ،

يعني انا كسوداني باشوف انو لا يستقيم بالنسبة لي تشجيع منتخب دولة بتحتل جزء من بلدي ،

وهنا خليني اطرح سؤال : هل لو كان الوضع معكوس هل كان المصريين ح يشجعوا منتخب البلد المحتل لارضهم ؟

المنطق بتاع بعض الناس البيقولو ليك دي كورة وشنو ما عارف دا غير مستقيم بالنسبة لي : نفس الناس ديل بيقولوا ليك المصريين ديل بحبو بلدهم ! طيب ياخي انت ما تحب بلدك

علي الاقل بعدم تشجيع المحتل !

او يقولوا ليك الانقاذ هي الباعت حلايب !

طيب هل دا سبب انو انت نكاية في الانقاذ تنسي الموضوع دا ؟ لاحظ انو هنا الناس ديل بيخالفوا واحد من اسباب اعجابهم بدولة الاحتلال : حب الوطن فيما قالوا !

Quote: واهل فضل على مجموعه كبيره من اهل السودان

طيب ياخي اذا سلمنا جدلا بالنقطة دي فهل دا مبرر للدونية من السودانيين - كتير منهم - تجاه المصريين ؟

وهل الفضل دا كان بلا مقابل ؟

السد العالي وتهجير حلفا واتفاقية مياه النيل وذيلية السودان وتبعيتو لمصر ووقوفو معاها في عدم مراجعة هذه الاتفاقية مثالا .

ثم ياخي ما السودانيين ديل ذاتم اهل فضل او بعض فضل علي بعض اهل الخليج مثلا ، في التعليم مثلا ، فهل الخليجيين بيعملوا معانا زي ما بعض السودانيين بيعملوا مع المصريين ؟

Quote: اكتر من اربع الف عقار فى مصر يمتلكه سودانيين واكتر من ما قيمته سته مليار من ودائع وحسابات فى البنك الاهلى المصرى لسودانيين بمعدل ارباح لايقل عن اطناشر فى الميه

ظني ان مصر هي المستفيدة هنا ، هل تظن ان هذه الاستثمارات السودانية ستبقي يوما واحدا لو احس المصريون بتهديدها لهم ؟

العقارات دي جزء منها قريت مرة انو بيملكوها بعض رؤساء التحرير في بعض الصحف عندنا ، لذلك يطبلون بحمد مصر ليل نهار !

Quote: السودانين دايما بقضو أجازاتم وبصيفو فى مصر يوم واحد ماسمعتلى بسودانى قضى اجازتو فى الجزاير

دي مسألة بتتدخل فيها عوامل كتيرة اقتصادية واستلاب ثقافي وغيرو ،

في الفترة الاخيرة كتير من السودانيين اكتشوا جهات اخري زي سوريا وماليزيا مثلا ..

Quote: ياخى ديل لهجتم زاتو مابتتفهم

النقطة دي يا عزيزي بتدخلنا في حتة ضيقة لأنو دا نفص راي العرب في لغتنا او لهجتنا بما فيهم المصريين نفسهم .

نقطة اخيرة ، بالنسبة للسودانيين مشجعي مصر ان شاءالله المصريين بتشجيعكم دا يغيروا رايهم فينا : دي السودان ما تعرفش تنظم عيد ميلاد ، او كما قال قائلهم ،

واحنا بنمووووووت كما قال احد مغنييهم ،

ثم : صحوا الرئيس ، في اشارة للرئيس السوداني عمر البشير !





وتقبل تحاياي .

( واهل فضل على مجموعه كبيره من اهل السودان)

(كسودانى أدينى سبب واحد يخليك تشجع الجزايريييين ياخى ديل لهجتم زاتو مابتتفهم)
______________________________________________________
الأخ /WAD ELGAALI#4

معليش شجع أنت مصـر وخلى الشعب السوداني فى حالوا ..!!
أنا شخصيآ بشجع أى فريق يلعب ضدها..

يادكتورالوليد ياخى كلامك دايما مليان ويخلى الزول يحترمك رغم الاختلاف مع ودى الاكيد والله فعلا اختلاف الراى لايفسد للود قضيه وناقولك كلام فى الكوره دى بالذات اناااصلو ما بذكر اى حاجه تانيه
والله الواحد يتمنى يلاقيك فى الصيف شكرا لنفسك البارد

يااحمدتحياتى وانشاء الله اناووتلاته اتلات الشعب نشجع المصريين يااحمد والله تمسك اى شافع فى ابعد حله تسألو اسماء عشرين فنان مصرى يجاوبكم مغمدوتسأل اجعص شافع حايم فى أرقى حى فى الخرطوم من الرئيس الجزائرى مايعرفو يا فى حب بالله ااكتر من كدا مع ودى

تستاهل يا ابوتريكه والله وتستاهل ياشحاته وكمان لو جبت الكاس يكون مابطال لكن انا والشعب المصرى كان الغجر ديل همنا الاول وبعداك حريقه فى الكاس

Quote: الفراعنه اهل كوره وبخدموها واهل فضل على مجموعه كبيره من اهل السودان اكتر من اربع الف عقار فى مصر يمتلكه سودانيين واكتر من ما قيمته سته مليار من ودائع وحسابات فى البنك الاهلى المصرى لسودانيين بمعدل ارباح لايقل عن اطناشر فى الميه كسودانى أدينى سبب واحد يخليك تشجع الجزايريييين ياخى ديل لهجتم زاتو مابتتفهم

ما هذا الهراء يا اخي ؟


ليس هنالك اي فضل لمصر علي السودان انما العكس فضل السودان علي مصر يفوق حد الوصف واقرب مثال لذالك السد العالي والذي من اجله غرقت مدينه كامله وحضارة عمرها الاف السنين من اجل مصر شرد اهلي من مدنهم وقراهم وهجروهم عنوا من ديارهم ,والكل يعرف فضل السد العالي لمصر . من اجل مصر سكت النظام السوداني عن مجزرة ارتكبها النظام المصري بحق الابرياء من اهل دارفور . من اجل مصر يتنازل النظام السوداني من حقه في مياه النيل . مصر تحتل جزءا من بلادي ,مصر تعامل السودانيين بكل احتقار وتنظر اليهم نظر الاستهزاء . مصر لا تعني لي شيئا عير انها تحتضن جزءا من تاريخ اجدادي العظماء

لك الود والاحترام

ياعمار كل زول ومصلحتو وانا مصلحتى مع الفراعنه وابتريكه زول صاحبى شديدووالله وهو اهم الاسباب البتخلينى احب المنتخب الاحمر
اما بخصوص اهلك فحقو توجه لومك لحكوتك اول شى
مع ودى الاكيد

دا حكم مرتشي حرامي ساااكت الله لا كسبو .. عملها ظاهره.

هارد لك الجزائر .. ولا مبروكــ للراشي و المرتشي.

انا من مشجعي الجزاير

الجزاير اضر بها الحماس الذائد

انا في تقديري الحكم كان شجاع جدا

المصريين لعبوا كوره حلوه واستحقوا الفوز

الف مبروك ليهم ودي كوره القدم فوز وخساره

والله يا farahat من الجميل جدا انك مامشجع الجزاير لانهم اصلا مابستاهلو زول يشجعوم بتاتا وشكرا على المرور الانيق

ودالجعلي تحياتي

بئس من تهنأهم

إن شاء الله ما ينفعهم، إنتو نسيتو قبل شهرين عملوا فينا شنو؟؟ ... أهني الجزائر على الصمود والأداء الرجولي لآخر لحظة في المباراة.

Quote: انا في تقديري الحكم كان شجاع جدا

الحكم ظلم الجزائر ابتداءا عندما اعطى حليش الكرت الأصفر الأول فى احتكاك اكثر من عادى مع الحضرى ,, ليخرجه بالكرت الأصفر الثانى فى مخالفة ضربة الجزاء فكانت الـ turning point of the game على العموم نصر مسيخ.

حليش داير يعمل فيها شفت يافاضلابى لاكن لقى الاشفت منوووبلعو لياقتو
والله من القلب مبروك ليكم يافراعنه وحتماكأسكم بلام منازع

يا ايمن والله مافى اى مقارنه لافى الكوره ولا فى الخلقه بين المصرين والفرناسه ديل

well said ya wad alhibir
you are entitiled to your own opinion
thanks for coming by

يااحمد بشير الجماعه ديل اصلهم بجو فى اللفه وطوالى بحرجو الناس

Quote: للكبار فقط د. إبراهيم السايح رغم فوزه التاريخي بترشيح الحزب الديمقراطي لانتخابات الرئاسة الأمريكية، خسر أوباما غالبية أصوات الناخبين المصريين وبصفة خاصة السادة أعضاء الحزب الحاكم والجماعة المحظورة. تعاطف المصريون مع أوباما في بداية معركته الانتخابية آملين أن يكون أول رئيس أمريكي يرفع راية الإسلام ويحرق قلوب وأعلام ومستوطنات الصهاينة في فلسطين الحبيبة السليبة! ولكنه - للأسف- خان الأمانة ولم يؤد الرسالة طوال المراحل التالية من الصراع الانتخابي الحزبي الطويل. أصيب الناخبون المصريون والعرب بأولي الصدمات «الأوبامية» حين فوجئوا بأن هذا المرشح ينكر شرف الانتماء إلي الدين الإسلامي الحنيف! كانوا يتعشمون في وقوفه كالطود الشامخ أمام كل الشعب الأمريكي وكل اللوبي الصهيوني قائلاً في إيمان وخشوع وصلابة إن «الدين عند الله الإسلام» وأن أمريكا الكافرة قد آن أوان دخولها في دين الله أفواجاً!! وكانوا ينتظرون دفاعاً أوبامياً لا يتزعزع» عن حقوق شعب فلسطين في العودة إلي كل الأراضي التي ضاعت منذ 15 مايو 1948، مع وعد قاطع من المرشح الأمريكي الأفريقي المسلم بالقضاء علي الصهيونية وإلقاء إسرائيل في البحر!! كان المصريون الشرفاء ينتظرون من باراك أوباما برنامجاً انتخابياً رئاسياً يتضمن الضغط علي جمهورية مصر العربية حتي تقطع العلاقات مع إسرائيل وتطرد السفير الصهيوني من القاهرة وتلغي معاهدة كامب ديفيد ثم تعلن الحرب لاسترداد فلسطين تحت إشراف ومساعدة الولايات المتحدة الأمريكية! وكان المصريون المعتدلون يتوقعون أن يراهن أوباما علي أصوات اللوبي العربي والإسلامي في أمريكا ويرفض مصافحة الأيدي الصهيونية الآثمة الملوثة بالدماء العربية والحقوق الفلسطينية المغتصبة! حتي إخواننا البوابون والسفرجية وأبناء الوجه القبلي الجنوبي والسوداني، والنوبي عدلوا عن تأييد باراك أوباما حين لمسوا تخاذله في مواجهة البيض ورفضه الانحياز لإخوانه الزنوج وعشيرته من الأشقاء الملونين والأفارقة. الأزمة الحقيقية بين العرب وأوباما لم تبدأ بعد، فلو نجح في الوصول إلي البيت الأبيض ثم استخدم العقل والمنطق في دراسة أحوال العالم العربي، فربما تقوده هذه الدراسة إلي تفويض الحكومة الإسرائيلية في إدارة شئون كل الدول العربية!!

اضافة لكلام الاخوان وليد وعمار اهديك هذا المقال اعلاه للغبى والعنصرى المدعو دكتور ابراهيم السايح وكما هو واضح من المقال هو مصرى ويحمل درجة الدكتوراة وفى اغلب الظن فى الغباء والسطحية والعنصرية كما هو واضح ايضا من المقال وهذا نموذج ومثال للعقلية المصرية تجاه كلما هو سودانى ونوبى واسود , وبعيدا عن السياسة والاثنية والانتهازية , عارف انو المصريين قبل كده شجعوا وساندوا التشادين بكل وضوح وقوة فى مباراة كرة قدم اقيمت فى مصر بين المنتخب التشادى والسودانى والا ما عارف؟
حتي إخواننا البوابون والسفرجية وأبناء الوجه القبلي الجنوبي والسوداني، والنوبي عدلوا عن تأييد باراك أوباما حين لمسوا تخاذله في مواجهة البيض ورفضه الانحياز لإخوانه الزنوج وعشيرته من الأشقاء الملونين والأفارقة.
امثالك هم سبب مسخرة وتطاول واطماع المصريين فينا !! لا نرفض التعامل مع المصريين من حيث المبدا , فقط نريد الندية المطلوبة التى تحفظ حقوقنا وكرامتنا وعزتنا وانسانيتنا , لكن فى ظل وجود امثالك فى الشعب السودانى لا اظن ان يتحقق هذا , وعلى الاقل فى الوقت الراهن!!!!

ياخالد شنو شابكنى امثالك امثالك ياخى دا رأى وانت رأيك حر فيهو انشاء الله تشجع غانافى النهائ بعدين ماكل المصريين ابراهيم السايح وكمان برضو خلى نفسك بارد يااخوى مااظنى استاهل غضبتك دى كلها صدقنى
مع تحياتى والتقدير

Quote: وناقولك كلام فى الكوره دى بالذات اناااصلو ما بذكر اى حاجه تاني

طيب اللى خليك تتذكر شقق السودانيين فى مصر وودائعهم فى البنوك المصرية وتصيفهم فيها شنو والا ده كلام العاجز؟!!!

Quote: بوست لتهنئه الفراعنه بكأس الامم الافريقيه فراعنه فراعنه حتى النصر

كجهم عليك الله

Quote: بعدين ماكل المصريين ابراهيم السايح

اذا فى مصرى فى غيرديدن ابراهيم السايح فهو شاذ , ونحن بيهمنا القاعدة وليست الشذوذ والقاعدة المصرية على ديدن ابراهيم السايح !
بس انت غافل او متساهل !

الف مبروك للمنتخب المصري و عقبال الكأس السابعة

الاعزاء حنوف وغباشى تحياتى والفراعنه ماحايخزلونا وكاس افريقيا ماغريب عليهم الغريب فى ناس خالد حاكم ديل البكرهو المصريين لا سيه لاقضيه وتلقاهو اجازاتو كلها مقضيها فى القاهره يازول زى ماقلت ليك انت حر تكرهم بنفس المنطق اناحر احبهم واشجعم حتى الكاس
ياغباشى خالتك دكتوربيان انشاء الله نجضتلك الموضوع
مع ودى لكل المتداخلين

تحياتي يا ود الجعلي و عذراً فقد فات علي ان احييك في الرد أعلاه
تعرف يا ود الجعلي و الله الناس لو مسكت موضوع الجزائر و مصر من منطق بتاع كرة قدم ساكت
والله المصريين يستاهلوا يغلبوا و الجزائريين انفسهم اعترفوا بضعف فريقهم و عدم انضباط لاعبيه في هذه البطولة (استديو الجزيرة) ما في زول فيهم اتكلم عن سؤ التحكيم
و للا بس عشان المصريين فازوا?? فما لكم كيف تحكمون!

Quote: انشاء الله نجضتلك الموضوع

لسة و الله , لكن التأخير ما من الدكتورة , أخوك العامل رايح
شكلي حأبقى معاكم انت و سعد الدين في الـ Black list

الجزايرين ياغباشى كان حالن يحنن والله والله انالمن جاالتالت التالت اتمنيت يجيبو قون يطعموبو خشيماتم لكن اولاد النيل مارحموهم ابدا

الدكتوره بتجيهك لو جديت معاها وكمان لو داير نصيحتى امسك فى عمتك دوما والله دومه دى امرأه من فئة الملايكه والله تعرسلك من جيبا لو قصدتهاوجديت معاها لكن ماتمش تدقس تقولها داير بتك دى داساها لليوم الاسودوومابتديها
بى اخوك واخوى
اما انا وسعد فاظن حكايتنا بايظه خالس

أخ منك طوووول عمرك فرعون سغير
مصر دي لو لعبت مع اسرائيل انا حا أشجع اسرائيل

يااااا وجن البت السمحه خلقه واخلاق مشتاغون والله والله هسى تلقى عندك شقه فى وسط البلد لكن المصرين يفوزوا كيف لو ماالناس الكج كلهم وقفوا ضدهم ماتقولى قاصد امين سليمان ولا امانى الامين ياخى دول اجدع ناس وحبايبنا كمان
شنو بقيتى تغيانه كدى ياوجن هل عشان رجعتى السودان ول عشان عرستى
مع تحياتى

ههههههههههههههههه
ضحكتني والله
ياريت والله تكون عندي شقة وياريت لو بعرف اكون تغيانه
لكن تصدق والله كان اتولدت عديل في مصر واتربيت وعشت هناك
وسمعت القالوا فينا الا اشجع ابليس كان لعب ضدهم غيرتي على بلدي أكبر من فللم وعماراتم وشققم
لكن بيني وبينك كده قالوا الشقق عندهم ابو الرخا يعني 50الف ريال تجيب ليك شقة في الاسكندرية 3 غرف بمنافعم
ال50 دي زاته في السودان أعمدة من الواطه ماتمرقه ليك اها ود أمي زي ماقال حسني في سبيل مصلحتى أتحالف مع الشيطان
وبمناسبة حسني دي هاك النكته دي عربون عدم طغى وكده قال ليك حسني جاء السعودية أها عبدالله قال ليه تنزل معاي في القصر بتاعي
ولا نستأجر ليك جناح في فندق حسني قال ليه لا انت بس اديني بدل السكن وأنا بنزل مع واحد بلدياتنا
ود الجعلي والله السودان مابناباها لكن البلد عاوزة قروش ومصدر دخل
ونحن يادوب بنقول ياهادي يعني بعد الغربة بنفتش للهجرة ساعدنا بالدعوات بالله
أها وشايفة صلعتك وبورتك دقت الدلجه أبقى مارق ابوي شيل عروستك وروح تاني آزول

تعرفى ياوجن الحاجه الوحيده الربناعفانى منها هى الصلعه صاح الضهر انحنا لكن لسه مافى صلعه اجازتى الفاتت حاولت افتش عليك مااتوفقتا بالمناسبه وين غدى واخبارا شنو
اها المره دى جاى مراقبة انتخابات انشاالله نلاقيك شهر اربعه
حسنى بعملا لكن ماللدرجه دى لكن والله كان كلامك بتاع الخمسين الف دا صاح انا انضربتاواحتمال كبير اقلب مع غانا فى النهاى لكن اشك انو السعر دا بنطبق على القاهره
لك تحياتى
لغير المالكين باسوردات ويريدون تهنئة الفراعنه مراسلة الايميل
[email protected]

روراوة يقر بأحقية عبور الفراعنة
اعترف رئيس الاتحاد الجزائري لكرة القدم محمد روراوة بأن المنتخب المصري كان الأحق بالفوز على نظيره الجزائري في المباراة التي جمعت بينهما أمس الأول الخميس في الدور نصف النهائي لبطولة كأس الأمم الأفريقية المقامة حالياً في أنغولا غير أنه جدد هجومه العنيف على الحكم البنيني كوفي كودجا متهماً إياه بإفساد المباراة ومطالباً بمعاقبته.
وأضاف روراوة في حديث خاص لمجلة (فرانس فوتبول) الفرنسية، نقلته وكالة أنباء الشرق الأوسط المصرية، أن المصريين كانوا يستحقون الفوز بالمباراة مهما كانت الأوضاع السائدة إلا أن ذلك لا يمنع أن الحكم البنيني أفسد المباراة تماماً لكونه حكماً "غير مسؤول"، كما اعترف بأن ما قام به الحكم لم يقلل على الإطلاق من أن مصر كانت تستحق الفوز بنتيجة المباراة مهما كانت الأوضاع السائدة.
من ناحية أخرى وصف روراوة مشاركة المنتخب الجزائري في بطولة أمم أفريقيا بأنها كانت "إيجابية للغاية" فيما يتعلق بالنتائج والإعداد الجيد لكأس العالم بجنوب أفريقيا وأضاف أن مجرد وصول المنتخب الجزائري للمربع الذهبي يعد شرفاً في حد ذاته ونجاحاً للكرة الجزائرية.

Quote: روراوة يقر بأحقية عبور الفراعنة اعترف رئيس الاتحاد الجزائري لكرة القدم محمد روراوة بأن المنتخب المصري كان الأحق بالفوز على نظيره الجزائري في المباراة التي جمعت بينهما أمس الأول الخميس في الدور نصف النهائي لبطولة كأس الأمم الأفريقية المقامة حالياً في أنغولا غير أنه جدد هجومه العنيف على الحكم البنيني كوفي كودجا متهماً إياه بإفساد المباراة ومطالباً بمعاقبته. وأضاف روراوة في حديث خاص لمجلة (فرانس فوتبول) الفرنسية، نقلته وكالة أنباء الشرق الأوسط المصرية، أن المصريين كانوا يستحقون الفوز بالمباراة مهما كانت الأوضاع السائدة إلا أن ذلك لا يمنع أن الحكم البنيني أفسد المباراة تماماً لكونه حكماً "غير مسؤول"، كما اعترف بأن ما قام به الحكم لم يقلل على الإطلاق من أن مصر كانت تستحق الفوز بنتيجة المباراة مهما كانت الأوضاع السائدة. من ناحية أخرى وصف روراوة مشاركة المنتخب الجزائري في بطولة أمم أفريقيا بأنها كانت "إيجابية للغاية" فيما يتعلق بالنتائج والإعداد الجيد لكأس العالم بجنوب أفريقيا وأضاف أن مجرد وصول المنتخب الجزائري للمربع الذهبي يعد شرفاً في حد ذاته ونجاحاً للكرة الجزائرية.

الف مبروك تستاهلو والله الغريبه فى ناس كتيره ظهرت على حقيقتا والدم عمرو مايصير ميه والحب كل الحب للاخوة المصرين

شحاته نجم المباراة الاول شكرا لعهدك الذى قطعته وانت اولى ان تكون صادق الوعد

مبروك يا ود الجعلي
الفراعنه يستاهلو الكاس ، كوره و أداء رجولي تكتيك عالي .

التحكيم كان نظيفا والحضرى كان حريصاووجدو ختمها حريفا

ياامين ياخى شكرا وماكان عندى شك انو حسن شحاته يرجع مبتسم ياخى هذارجل قليل وجوده فى مثل زمنادا الله يخليهو لبنياتو ويحفظهن له ياخى دايوم جميل


والله الواحد حاسد وداختك ابصلعه تلقاهو يدو فى الشعيريه لى هنا
كدا اطمنا عليك ياامين باقلينا اختنا امانى الله يلينا راسا

..
.
سلام يا ود الجعلى ..

المنتخب المصرى منتخب .. يستحق الفوز
بما حمل من حماس ووطنية وقتال
ندر ما نجدها فى الفرق العربية والافريقية ..

منتخب يحصل على الفوز السابع .. فى هذه البطولة
بكفاحه واجتهاده ..ونضاله

منتخب يحصل على الكأس ثلاث مرات على التوالى
فذلك ليس محض صدفة ..

الفريق الذى لم يهزم طوال الدورة
بل انتصار تلو انتصار .. يستحق فيها الكأس

منتخب يفوز على ابطال افريقيا
الكاميرون
نيجيريا
الجزائر
وغانا
منتخب لا يمكن ان نستهين به
فهو بطلا للابطال ..

___________

لولا كثرة البوستات الكروية لكنت انزلت بوست معنون للشعب السودانى بعنوان :
( ابــقوا مصــريين )
ابقوا زى المصريين :
بوطنيتهم
وحماسهم
وقتالهم
وكفاحهم
وبسالتهم
وحبهم لبلدهم..

يا ليتنا نبقى مثلهم بدل هذه الضجة
والاوهام وعدم حب التراب .. وكثرة التنظير
اها هم قلعو الاعلام والكاس وكمان حلايب
عملتو شنو ؟؟
لا مسيرة لا تصعيد فى الاعلام ولا حتى فرفرة
سوى ما نراه هنا

مبروك لمنتخب الحكام بفوزه علي بطل العالم للشباب

لك الود

ود الجعلي يا ظريف سلامات...

عليك الله هسع أنت مقتنع بكلامك ده؟؟؟

هسع بالله المصريين ديل أنت متأكد أنهم هم الفراعنة...

وهم البنوا الأهرامات زي ما بيقولو؟؟؟

يا أخي ديل أكضب شعب في العالم

إن شاء الله ما ينفعهم

ود الجعلي..

أنت قايل نحن سائلين في الجزائر ولا ما قاله رواورا ولا أسمه شنو؟؟؟

يا زول نحن قضيتنا مع أم الدنيا بما فيها أمريكا,,,

Quote: والله الواحد حاسد وداختك ابصلعه تلقاهو يدو فى الشعيريه لى هنا

ود أختي أب صلعه بكون هسي ما تفرزو من سكان المعادي !

استاذنااالمحترم جدا كمال كرار اولا لك تقديراعندى وموده خاصاجدا والله بس للهXالله كدا
بعدين بتفق معاك فى انو بعض المصرين دجالين لكن صدقنى دى حاجه عامه فى كل الشعوب انت بس انظرللبرايت سايد واقرا كلام تبلدينا دا بس بعين محايدة
وابعدممن امانى اللمين وبوستاتا لانها بتلم الناس الحاقده
مع تحياتى وكل التقدير

Quote: .. . سلام يا ود الجعلى .. المنتخب المصرى منتخب .. يستحق الفوز بما حمل من حماس ووطنية وقتال ندر ما نجدها فى الفرق العربية والافريقية .. منتخب يحصل على الفوز السابع .. فى هذه البطولة بكفاحه واجتهاده ..ونضاله منتخب يحصل على الكأس ثلاث مرات على التوالى فذلك ليس محض صدفة .. الفريق الذى لم يهزم طوال الدورة بل انتصار تلو انتصار .. يستحق فيها الكأس منتخب يفوز على ابطال افريقيا الكاميرون نيجيريا الجزائر وغانا منتخب لا يمكن ان نستهين به فهو بطلا للابطال .. ___________ لولا كثرة البوستات الكروية لكنت انزلت بوست معنون للشعب السودانى بعنوان : ( ابــقوا مصــريين ) ابقوا زى المصريين : بوطنيتهم وحماسهم وقتالهم وكفاحهم وبسالتهم وحبهم لبلدهم.. يا ليتنا نبقى مثلهم بدل هذه الضجة والاوهام وعدم حب التراب .. وكثرة التنظير اها هم قلعو الاعلام والكاس وكمان حلايب عملتو شنو ؟؟ لا مسيرة لا تصعيد فى الاعلام ولا حتى فرفرة سوى ما نراه هنا

ياتبلدينا كلامك دايما مليان والله مش المفروض يدوك القيد الصحفى مفروض يخلوك تدى الناس القيد الصحفى
مع ودى الاكيد

ـــ

Quote: إن شاء الله ما ينفعهم

الهادى وعماد انشاء الله ماينفعم لواكلوهو لكن الجماعه ديا حيختوهو جوا حدقات شعب كامل
شكرا للمرور ولانكم هنا

ود الجعلي... والله القلوب عند بعضيها....

أماني دي والله شايلها محبة السودان...

وعدم تقبلها لإحتقار المصريين لكل ما هو سوداني...

وأنت ذاتك يا ود الجعلي ما بتقبل حقارة المصريين

وإدعائهم حضارة النوبة ده كوم براه...

وبس يا ود الجعلي...

أماني الأمين أختنا يا ود الجعلي...

محبتي الأكيدة لكما ولكل ما هو سوداني

ياعمار كيفك ياخى مالك ماانضميت لحزب امانى اللمين
بعدين يااخوى فى زول منع ناس الجزاير يدفعورشوة للحكم والله جيويبم فيها عقارب

مبروك للفراعنه على البطولة ال7 والثالثة على التوالى وكانوا الأجدر لتمثيل أفريقيا فى كأس العالم .
مبروك لأحسن مدرب أفريقى أبن نادى الزمالك حسن شحاتة
مبروك لجدو هداف البطولة
ومبروك لأحمد حسن أحسن لاعب فى البطولة
مبروك لحسنى عبد ربه وحصوله على جائزة اللعب النظيف
مبروك للحضرى على حصوله أحسن حارس فى البطولة
فاز الفراعنة على الفرق التى تأهلت للمنديال
نجيريا, الكاميرون, الجزائر و غانا

وكانوا هم الأجدر لتمثيل القارة فى المنديال

ألف مبروك للمنتخب المصري لفوزه المستحق بكأس أبطال إفريقيا.
كان واضحا منذ البداية أن المنتخب المصري هو الأفضل من كل النواحي ..المستوى الفني ، اللياقة البدنية ، الروح القتالية السعي الجاد للفوز والالتزام الدقيق بتنفيذ تعليمات المدرب ، وفوق كل هذا لديه مدرب مقتدر وغيور على بلده ويعرف توظيف قدرات لاعبيه.
الشعب المصري حقا جدير بالاحترام ,,أما سفاهة وقلة أدب هالة صدقي وابراهيم حجازي وعمرو أديب فهي اسنثناء

والله يانبيل ماقلت الاالحق وانو الفراعنه اجمل افضل واحق بتمثيل القارة السمراء والجماعه ديل نجوم ويستحقو التكريم
تحياتى يانبيل ولايعرف مقدار الجمال الا كل جميل

الاستاذ جعفر تحياتى وزى ماقلت لكل قاعدة شواذ وكفى
تكرم ياسيدى مع ودى الاكيد

لسنا فراعنة ولكن كسودانيين نقول مبروك لأشقائنا في شمال الوادي
مبرووووووووووووك يا أبناء النيل