بزنس جامعة الخرطوم (بوست بنكهة الليمون)

شباب بزنس كتار فى المنبر دا ..بس عاملين حميل ...

بكرى الجاك
سامر حسن عثمان
صداح وراق
فتح الرحمن خلف الله (الشهير بقيقراوى)
مها عبدالله (رفاعه)
رحاب خليفه ...

أكيد بكون نسيت زول ...
...

تحايا وأشواق يا محمد وليك وحشه شديده ياخي قيقا مُنداح إندياح شديد بجاي !! عليك الله ألحقوا

" التنظيمات العاطفية " . . نشاط و اركان نقاش . . . ...تجربة جديرة بالتوثيق

جابتني ريحة الليمون راجعه لغاية ما أرسل رسائل بالمسنجر للشباب القلتهم فوق ديل مبالغه لكن !!

مها يارفاعه ..

الشوق نيلين و أبنوس و(كوب ليمون) ..او كما قال ...
اما اذا دار (محور سؤالك ) عنا فأننا نقضى اوقاتنا
فى مهاجرنا فى رتابه وروتين يحسدنا عليه اهل الروتين
ولله الحمد من قبل ومن بعد ...

مايخص بوست المدعو قيقراوى (فينبغى) ان يظل الطابق
مستور ولاداعى للنبش ..فا(لنبش بجيب الدقش ) ( مثل
اسفيرى متداول على نطاق محدود) ... و حفاظا على
انفسنا من الدقش نتحفظ عن الدخول فى مثل (هكذا)
بوستات ...
***


جيبى جماعتك وعودى مرة اخرى ايها المها

Quote: مها يارفاعه

ذكرتني يا محمد مها يار فاعه دي صديقتي وفاق وهي تدعونا من ( النجمه ) ( الصباحات البواكر)
لكي نصحوا من نومنا حتي نلحق محاضرة ( العميد ) وتُنادي بأسمائنا وكأنك في ( السوق الشعبي )
رقيه يا شندي ، مها يا رفاعه ، هبه يا مدني

Quote: مايخص بوست المدعو قيقراوى (فينبغى) ان يظل الطابق مستور ولاداعى للنبش ..فا(لنبش بجيب الدقش ) ( مثل اسفيرى متداول على نطاق محدود) ... و حفاظا على انفسنا من الدقش نتحفظ عن الدخول فى مثل (هكذا) بوستات ...

غايتو قيقراوي دا حيقبل عليك إلا يرحمك منو شهادتي بأنك خارج ( تصنيفات ) البوسته خاصته وأنك
تندرج تحت قائمة ( ضب قرايه ساااااااااي )!هههههههه

يامها ..

قيقراوى يعرف جيد فى اى موقع يمكن ادراجى ..
اذا حاول يعمل (جاى ولا جاى) بتعب معانا ..
الوثائق موجوده .... والتحميل فى الاسفير على (قفا
من يشيل) .. هذا فيما يخص قيقراوى .. ..بعدين
لازم تكون البتصحيكم وفاق ..مكملة الجدية ..
و عايشه دور الطالبة المجتهدة تماما ...

Quote: Quote: مايخص بوست المدعو قيقراوى (فينبغى) ان يظل الطابق مستور ولاداعى للنبش ..فا(لنبش بجيب الدقش ) ( مثل اسفيرى متداول على نطاق محدود) ... و حفاظا على انفسنا من الدقش نتحفظ عن الدخول فى مثل (هكذا) بوستات ... غايتو قيقراوي دا حيقبل عليك إلا يرحمك منو شهادتي بأنك خارج ( تصنيفات ) البوسته خاصته وأنك تندرج تحت قائمة ( ضب قرايه ساااااااااي )!هههههههه

انتو قيقراوي شقي الحال دا اتخرج من كلية غردون التذكارية ؟!
ما كنا في الامم المتحدة دي معاكم و قيل بعدكم ذاتو !
و الله كان ضب ما بعرف ؟!
دافننو سوا يا حبة
اها تجي و لا نجي ؟



------------

يا محمد يا عمك . . و عمك دي اسأل منها عثمان النعيم - مصر و ملح انك سنيري - توجد صور . . كيف معاك ؟

بعدين يا دقسة لستتك دي متأكد منها ؟
فيها اتنين اتخرجوا من الاحفاد
و نسيت كابتن بزنس و عضو البورد ياخ . . الدفعة جعفر سومي

تعظيم سلام لكل البزانسة
و التحايا لكل الهنا

الأخ/ محمد عبدالرحمن

والله ما عارف نبدأ شكرك من وين وإنت ضربتنا في أسفل المخيخ
وخليت الأيام الحلوة كلها تجي متدفقة.

الأخ/ فتح الرحمن (قيقراوي)

Quote: و نسيت كابتن بزنس و عضو البورد ياخ . . الدفعة جعفر سومي

لك التحية أولا وتشكر على الإفتكار والتحية عبرك لك أهل بزنس بالمنبر وأينما حلوا
واحدة من الذكريات الجميلة عن ليمون بزنس والكورة مرة من المرات الجماعة بتاعين
الكافتيريا طبعا كلهم من ضواحي أم روابة أهل زميلنا النور محمد عبدالله وكنا نسكن مع بعض في الداخلية
ومعنا الأخ بكري الجاك وعبدالرحيم محمد طه. المهم شباب الكافتيريا كان بلعبو مباراة كل يوم خميس في الميدان
الشرقي مع الحرس ولا مساعدين التدريس ماعارف وبتغلبو بعدد وافر من الأهداف. طبعا كانوا متابعين للنشاط الرياضي
بالجامعة. جيت على الكلية داير ليمون فدعوني للعب معاهم فوافقت على الفور خاصة وإنو ذلك الخميس كنت متواجد بالداخلية.
الحمد لله ربنا وفقنا وغلبنا ليك الفريق داك وكان إنجاز كبير جدا بالنسبة ليهم وأخذ بثأر قديم ومتكرر ومن ذلك اليوم
أصبحت لا أدفع ولا قرش متى ماجيت على محل الليمون أو الشاي. وطبعا كنت بحاول أبقى تقيل واتعزز ولكن في دواخلي بقول الله
يكتر أمثالكم.


الأخ/ بكري الجاك
والله مشتاقين كتير

Quote: التقيت بالاخ اسماعيل مرمار المقيم هنا فى امريكا و تحدثت مع الاخ سيف ابان تواجده فى امريكا

ما تنسى كذلك فقد تحدثنا عبر الهاتف عندما كنت بالقاهرة وكذلك بعد وصولكم إلى أمريكا وكان معك الأخ اسماعيل مرمار




.

محمد سلام

اخوك اول دفعه لعلوم إداريه

قبلنا كانت تابعه لإقتصاد

لك التحيه

نادر ابوكدوك ..تحياتى ..

من مداخلاتك كنت عارف انك درست الخرطوم وكنت مفتكرك
خريج اقتصاد ..اول دفعة فى بزنس دى (مفروض) يعرفوها
ناس قيقراوى وصداح وبكرى (كان مايعملوا رايحين) ...لكن
مبدئيا كدا ..نحن درسنا هشام الضو وطارق ومحمد عثمان
والنقر ..فما عارف دى اول دفعة ولا فى دفعة قبليها ...

ان شاء الله تكونو لحقتو ليمون الرضي .

طبعا نحن ناس - اقتصاد - ادارة اعمال . قبل ان تمد يد العبث للكليه . اتمني ان يكون اولاد بزنس حملو الرايه بعدنا .

يا الزبير ...تحياتى ..


يازول الليمون لحقناهو (لحقه جد) ...كما فاتكم (جبس بالجبنه والطماطم )
اسكت خليهو ساكت ...


شكرا يا الزبير والدار دارك ...

Quote: نادر ابوكدوك ..تحياتى .. من مداخلاتك كنت عارف انك درست الخرطوم وكنت مفتكرك خريج اقتصاد ..اول دفعة فى بزنس دى (مفروض) يعرفوها ناس قيقراوى وصداح وبكرى (كان مايعملوا رايحين) ...لكن مبدئيا كدا ..نحن درسنا هشام الضو وطارق ومحمد عثمان والنقر ..فما عارف دى اول دفعة ولا فى دفعة قبليها ...

هشام الضو قدامنا والنقر دفعه ورانا

ايامنا اذكر من الاساتذه

بروف احمد حسن الجاك

دكتور يوسف الخليفه

دكتوره امال الوكيل

العلامه المحسي

واخرين

لي عوده بإذن الله

Quote: بروف احمد حسن الجاك

ياسلااااااام على بروف الجاك ياخ ..احترامى لجميع الاساتذه الذين
ذكرت .. وسلام خاص وتحية لبروف الجاك الرجل الذى لايعرف انصاف
الحلول....

هلا هلا علي ام نخيل وهلا هلا تاني عليها ياخ...
وجميل يا محمد كونك تفتح لينا هذه النافذة علي البزنس مرتع الاصدقاء والصحاب
ناس ابوكدوك والصادق محمد عثمان ورتل من اروع الشباب الذين تقاسمنا معهم الايام الجميلة ومراتع البركس وكل احداث الجامعة بخيرها وشرها...
بزنس وليمونه التاريخي الذي وصف بانه ليمون ذو عالمية وتمثل كيمياء خلطة الليمون كما ينبغي لها ان تكون ...فقد كان يعلم الله متعة في شرابه وله رغوة مميزة تاني انا ماشفتها ولا ح اشوفها ...
..
تحياتي لكل الصحاب من خريجي بزنس واشواقنا الكثيفة لهم جميعا اينما كانو
وسيكون هذا البوست صديقا واساسي وحنتاوق فيه وبكثافة احتمال لمتكم دي تطلعوا لينا اسرار ليمون بزنس
العجيب داك

وتحياتي

ياكيكى ...


والله شكرا كتير على هذه اللغة الموغله فى الدهشة ...ومرحب
بناس غرب السنتر فى دارنا ....مع انكم كنتوا حقارين ومكملين
الحقارة ..

حبابك والله ....

ليمون بزنس و

Quote: جبس بالجبنه والطماطم

يا الله ... رجعتنا زي كم طاشر سنة كدا يا ابوحميد

لك التحية ولناس بزنس جميعا

Quote: لك التحية ولناس بزنس جميعا

هلا بود البشرى وسلامة العوده

طبعا إستلمت البوست بدون إستئذان

يا محمد الناس القرو في الـ BNT معاكم و لا نقعد فراجة ؟

حمد حبابك والله ...

بس انتو الجابكم ال بى ان تى شنو؟
البعرفو انها كانت مابتفضى اصلا ..لانها
القاعة الكبيرة الوحيدة فى الكلية ....طبعا ناس الاقتصاد
(قسم الاجتماع والانثربلوجى ) كانوا تقريبا يقاسمونا
المكان ..


لكن بينى وبينك ياحمد مافى فرق بين اقتصاد وبزنس
خاصة وان هتاف اهل الهندسة للكليتين موحد
(سكرتيرات بنات واولاد ) او كما قالوا ..فالمصير
المشترك يجمعنا ....

تفضل الدار دارك ...

Quote: ناس ابوكدوك والصادق محمد عثمان ورتل من اروع الشباب الذين تقاسمنا معهم الايام الجميلة ومراتع البركس وكل احداث الجامعة بخيرها وشرها...

هلا كيكي يا هندسه

مشرف البزنس اقصد البوست

محمد امسك في الباشمهندس كيكي ده قوي

عندو ذاكره حديديه

فرصه نفتح البوست لباقي الكليات

Quote: هلا كيكي يا هندسه مشرف البزنس اقصد البوست محمد امسك في الباشمهندس كيكي ده قوي عندو ذاكره حديديه فرصه نفتح البوست لباقي الكليات

وعايزين خليل برضو يانادر ..داك عندو زاوية شوف بتختلف
من الناس ديل كلهم ..يجيك بتنظير ماانزل الله به من سلطان ..

سلاااام ياخليل ياخ ...

Quote: سلاااام ياخليل ياخ ...

مرحب ب ابو القوق

ده براهو حكايه

Quote: بزنس و جبس بالجبنه والطماطم يا الله ... رجعتنا زي كم طاشر سنة كدا يا ابوحميد لك التحية ولناس بزنس جميعا

محمد البشرى تحياتى ...

ياخوى طاشر سنة معقول ؟! ...يعنى ناس كيكى وخليل ديل زى كم وعشرين
كدا .. تقعد مع خليل يديك احساس انو اتخرج السنة ا لفاتت .. ..هو بالله
ليهو عشرون عام و (نيف) ...

Quote: . تقعد مع خليل يديك احساس انو اتخرج السنة ا لفاتت .. ..هو بالله ليهو عشرون عام و (نيف

محمد

كيكي و خليل إتخرجوا سنة 90

احسب يا خوي

دي دايره ليها حسابه عديل كده

هلا ابوكدوك الله يسلمك
بوست بزنس اكيد زي الكلية مضياف ومرحب بالجميع

هلا ابوحميد كم طاشر والله ما هو انا ورا ناس خليل بشوية

Quote: خاصة وان هتاف اهل الهندسة للكليتين موحد (سكرتيرات بنات واولاد ) او كما قالوا

هههههههههه
بركة الجات منك يا بيت الله
من قبيل خجلان اقولها

أووووو قال ليك دي نوعية البوستات العاضة واللي ممكن اخونا حميدة يصنفها لينا إنها واحدة من بوستات فقيه أو دجاج دووو ونعم التربية لأنها بصراحة بوستات بيض جداً ..
السيناريو فيها بيكون عبارة عن طاشر واحد من الاعضاء يجي يشبكك يااااااااه يا محمد رجعتنا للزمن الجميل واحححححححي من الليمون والتلج بي فوق الكباية وااااااااه من تلك الجلسة مع اميرة الحسن علوية ما بين المين رود والاندر لاب ونحن بنشرب في الليمون إضافة لي زي كم واحد كده ضهب بكونوا جو زيارة جامعة الخرطوم بعد ما عزمتهم برلومة فرحانة بي دخول جامعة الخرطوم وبي ليمون بيزنس ويجي يقول ليك الله عليييك يا محمد عبد الرحمن وكيف لي أن انسى صديقتي محاسن وحينها كنا شباباً نرتاد الجامعات ونحتفل في المكتبة القبطية بالهادي الجبل ومصطفى سيد احمد ..
ياخ دي نوعية البوستات الممكن ما تفتحا وتقدر تعرف كلللللللل الردود اللي جواها عاملة كيف ..
لكن اقول ليك الصراحة ؟؟؟؟
فاجأتني بي شجاعتك والله وانت بترد لي مها رفاعة

Quote: مها يارفاعه .. الشوق نيلين و أبنوس و(كوب ليمون) ..

أتحداااك لف المنبر ده ارشيف ارشيف وبوست بوست وفتش لو لقيت محمد عبد الرحمن منداح جنس الاندياح ده ..
اتوفقت في العرس والله ..

تخريمة :
بالرغم من توفيقك في العرس ده إلا أنني أجد نفسي مضطراً تسليمك جائزة البيضة الأم ..

عمر الفاروغ

مرحب بمرورك

عليه الرحمه

ده الاستاذ محمد علي المحسي ، استاذ المراجعه .

Quote: Quote: العلامه المحسي رحمة الله عليه استاذنا محمد علي المحسي حي يرزق شكرا سيف بشير على التنبيه اعتذر من كل طلاب واحباب واصدقاء استاذي المحسي اطال الله في عمره

اخ محمد

تصحيح ( ليمون الضي ) .

(جبس بالجبنه والطماطم ) ده ما عرفتها ، شنو جبس بالجبنه و الطماطم .

اظنكم احنكشتو بي ورانا يا اولاد الاقتصاد .

بسم الله الرحمن الرحيم
جامعة الخرطوم
(7) مدرسة العلوم الإدارية



نبذة تاريخية
أنشئت شعبة إدارة الأعمال ضمن كلية الدراسات الاقتصادية والاجتماعية في عام 1958م.ثم أضيف إليها تخصص المحاسبة في عام 1965م بإنفصال كلية الاقتصاد عن كلية الآداب .
أنشئت المدرسة في عام 1986م بموجب النظام الأساسي رقم (28) وفقاً لأحكام المادة 15 (2) من قانون جامعة الخرطوم لسنة 1976م المعدل لسنة 1975م علي أن تنشأ في جامعة الخرطوم مدرسة للعلوم الإدارية كوحدة منفصلة داخل الجامعة ويكفل لها التمثيل المباشر في أجهزة الجامعة المختلفة ذات الصلة .
الموقع :
يقع المبني القديم شمال شارع الجامعة ويقع المبني الجديد شمال شارع الجمهورية والذي سوف تنتقل المدرسة بكاملها له في القريب العاجل بأذن الله .
رؤية المدرسة :
تسعي مدرسة العلوم الإدارية نحو التميز في التدريس والبحث العلمي لآداء دور حيوي في بناء القدرات وتطوير الموارد البشرية .
أهداف المدرسة :
تكون للمدرسة الأهداف التالية :
1. اعداد وتأهيل الطلاب الراغبين في دراسة العلوم الإدارية .
2. إتاحة فرص التدريب المستمر للإداريين والتنفيذيين .
3. القيام بالبحوث والدراسات التي تعني بالشئون الإدارية والتركيز علي الدراسات الميدانية .
4. تقديم الإستشارات في مجالات الإدارة المختلفة .
5. إقامة وتوطيد العلاقات مع القطاعين العام والخاص وكذلك مع المنظمات التي تعني بالشئون الإدارية المحلي منها والأقليمي والعالمي .
برامج المدرسة :
1. تقوم المدرسة بتنفيذ برنامج البكالريوس :
- البكالريوس العام في إدارة الأعمال .
- البكالريوس العام في المحاسبة والإدارة المالية .
- بكالريوس الشرف في إدارة الأعمال .
- بكالريوس الشرف في المحاسبة والإدارة المالية .
2. برنامج الدراسات العليا بالمقررات وهي :
- دبلوم ماجستير إدارة الأعمال .
- دبلوم ماجستير العلوم في المحاسبة والتمويل .
- ماجستير العلوم في إدارة الأعمال .
3. برنامج بكالريوس التعليم عن بعد :
- بكالريوس المحاسبة والإدارة المالية .
- بكالريوس إدارة الأعمال . الهيكل الإداري :
4. برنامج الدبلوم الوسيط :
- دبلوم قسم إدارة الأعمال
- دبلوم قسم المحاسبة وإدارة المالية .

الهيكل الإداري :
يتكون الهيكل الإداري للمدرسة من عميد المدرسة و رؤساء الأقسام و المسجل و المكتب الإداري و مساعد المراقب المالي .
أقسام المدرسة :
1- قسم إدارة الأعمال .
2- قسم المحاسبة والإدارة المالية .
إحصائية بأعداد الأساتذة :
عدد الأساتذة بالمدرسة 34 أستاذاً تفاصيلهم كالآتي :
قسم المحاسبة والإدارة المالية :
- عدد 2 أستاذ مشارك
- عدد 4 أستاذ مساعد
- عدد 9 محاضرين
- عدد 5 مساعدي تدريس
قسم إدارة الأعمال :
- عدد 2 أستاذ مشارك
- عدد 5 أستاذ مساعد
- عدد 2 محاضرين
- عدد 5 مساعدي تدريس

http://uofk-alumni.info/newsdetails.php?rsnType=1&id=42

يا الله

ما زالت رائحة الليمون في الخلايا

ولا زالت تلك الايام وحدها ((ما تبقى لنا....

انا من ناس اقتصاد دفعة 90-94

ولكن اقرب اصدقائي من بزنس وهو خالد حسن بشير الشهير بخالد كمية

يا لها من ايام ويا له من ليمون

Quote: ولكن اقرب اصدقائي من بزنس وهو خالد حسن بشير الشهير بخالد كمية

سلام يا ابو اللمين
خالد بعد الاكستيرنال بقى دفعتنا ، و هواصلاً من اولاد كوستي
خالد شاعر جميل




-----------

ما كنت قايل في زول عارف التسمية دي !

.
.

Quote: يازول الليمون لحقناهو (لحقه جد) ...كما فاتكم (جبس بالجبنه والطماطم ) اسكت خليهو ساكت ...

أيام لها إيقاع ، الصورة استدعت ذكريات أجمل أيام حياتي وكذلك كلمات محمد عبد الرحمن في الاقتباس أعلاه .

أكتر حاجة بتذكرها في بيزنس غير الليمون كان في مكتبة تصوير مستندات داخل الكلية ، وطبعاً أخوكم الأزهري كان ملك الزوغان من المحاضرات والغياب من الكلية ،وأول ماتقرب الامتحانات الجرسة تحصل وهاتك ياتصوير من دفاتر وكراسات الزملاء (مصروف الشهر كله بروح في التصوير)
يالتلك الأيام النضرة .

نكاد حين تُناجيكم ضمائرُنا
يَقضي علينا الأسى لولا تأسِّينا

حالت لفقدكم أيامنا فَغَدَتْ
سُود ًاً وكانت بكم بيضًا ليالينا

إذ جانب العيش طَلْقٌ من تألُّفنا
وموردُ اللهو صافٍ من تصافينا

وإذ هَصَرْنا غُصون الوصل دانية
قطوفُها فجنينا منه ما شِينا
ليسقِ عهدكم عهد السرور فما
كنتم لأرواحنا إلا رياحينا

لا تحسبوا نَأيكم عنا يُغيِّرنا
أن طالما غيَّر النأي المحبينا

والله ما طلبت أهواؤنا بدلاً
منكم ولا انصرفت عنكم أمانينا

شكراً جزيلاً لصاحب البوست وضيوفه الكرام .

.
.

اللة

ليمون البزنس والضى ومحاضرة محسى يوم الثلاثاء السابعة صباحا وأشياء لن تنسى . ليمون البزنس وعزومتنا لاصحابنا ناس الطب عصام حسيب ويحيى ابوقرين وناس كتار وخميس السجاير وشلتنا واحمد الطيب الماحى وماهرجعفر والفاضل عمر وحسن احمد على والرشيد الفيل الرشيد الطيب عادل قاسم واسامة البيسى ومحمد سرالختم و صلاح ابوزيدوالاكسبريس والطيب السمانى وبقال وادريس وووو وناس تانى حلوين بعضهم بقى حبوبات الان عثمان امين المكتبة والدكاترة الجاك والجعلى وعبداللطيف امام وتياجى و كليم اللة ومحسى وعزالدين جبال والقامة احمد عبدالرحمن وبقية عقد العلماء الفريد ويااولادى نحن ناس دفعة نادرة مرت على البزنس قبل ما تبقى سكول دفعة نادرة جدا وعندنا حدث ما أظنو غيرنا عملوا ( عندنا واحد دفعتنا أخونا أبراهيم تزوج وهو فى رابعة عملنا ليهو حنة ووبنات الدفعة حننوة فى نجيلة البزنس ) وزغاريد وغنى وحفلة راسها عديل لحدى الليت برمشن)
نحن ناس دفعة 83 وتحياتى لكم ولابناء دفعتى اين ما وجدوا
وكام مشتاق لى ليمون البزنس وكباية شاى وجلسة على المين رود

البرلوم ابو سنون محمد عبد الرحمن

سلامات و اشواق بنكهة ليمون بزنس و طعم لمة البزانسة فى ذلك الركن الصغير فى الكافتيريا خصوصا اذا كانت لمة شعر علي الهواء ( اظنك تعرف ان هنالك مجموعة متفردة من شعراء بزنس من بينهم حسن عثمان الحسن و خالد الشهير بكمية علهما بخير اينما اخذتهما منحنيات الحياة)

و يا مها يا رفاعة آفاق المحسية ما قصرت معاك تب طالما كانت بتصحيكم لمحاضرة MIS علي ما اظن فى الهجعة، طبعا انا كنت من ضمن الناس الما بكونو عارفين عدد الكورسات الماخدنها فى السنة الا قبل الامتحانات بشهر، اتحسنت شوية فى سنة رابعة و حضرت عدد مقدر من المحاضرات.

شايف فتح الرحمن (قيقراوي) نكت ليهو واحدة من الصور علي واجهة الكلية
لم اكن اعرف ان صداح وراق عضوا فى هذا البورد و ان يقرأ فله سلامي و تحاياي طالما ظلت سينه ثاءا و كم اتحفنا بسخريته اللاذعة
التقيت بالاخ اسماعيل مرمار المقيم هنا فى امريكا و تحدثت مع الاخ سيف ابان تواجده فى امريكا و يبدو أن البزانسة قد انتشروا فى الارض و عاسوا فيها محاسبة و ادارة و اتمني لهم التوفيق اينما كانوا من كل الدفعات و خصوصا الذين عاصرناهم من الذين كانوا قبلنا و الذين اتوا بعدنا.
طبعا قريت بوست التنظيمات العاطفية الذي هو ايضا تفرد بزانسة و متابع الي أن اجد السانحة للمشاركة

لا املك خيطا موحدا للتعبير عن ما يجيش بالدواخل و لكن ساظل اثرثر الي ان اعود.

تحياتي يا محمد لك و لكل من قرأ و مر علي قاعات بزنس و اتمني أن يسهم كل خريجي بزنس الاعضاء منهم و غير الاعضاء من خلال ارسال مشاركاتهم لاي من الاعضاء عبر الايميل و يمكن ماكتبتي عبر [email protected]

ابقوا بعافية جميعكم

بكري الجاك

يااخوانا عمر الفاروغ دا (حاج كجار )......
البعجب الناس مابعجبو ..والبعجبو مابعجب الناس ..
دا الله ودى حكمتو .. هذا من جهة ...من الجهة الاخرى
لانستنكر أن يغير الزواج منا ...ويجعلنا اكثر اندياحا
كما قال الفاروق ..لكن الزواج دا (اندياحاتو) دى مالا
ماشملتك ياعمر ؟!... هذا من الجهة الثانية ..


كلمة قبل الاخيرة ... (الله يقطع الدبلوم ويكفينا حقد أصحابو) ...
والكلمة الاخيرة ..عمر بالله تانى ماتجى داخل هنا ...المفروض
انا قاطعو معاك صاح ؟

**

شايف الحكاية سخنت وجابت ناس (لابده ) ليها سنين ..
مرحب بكل من مر هنا ..وترحيب خاص بالاخ بكرى الجاك ..
والكلام كثير لكن الزمن (ممحوق) ....


[email protected]


الفوق دا ايميلى .... بالله الشباب يكتبو لبكرى الجاك و(الشابات)
يكتبو على ايملى الفوق دا ......حركات السنائر دى بنعرفا كويس
يعنى الود جاى آخر الزول وعايز الجكس يكتب ليهو على ايملو ...

طبعا ياشباب نسيت الاخ جعفر سومى ..النجم الاول
فى منتخب بزنس ..وهو طبعا عضو معانا هنا .. ..واعتقد
انو مقيم فى اليابان ...اتمنى ان ارى مشاركاته ..

ليمون بس و ما اكتر........ قاشرين بيهو في السنتر


ليمون بس و ما اكتر........ قاشرين بيهو في السنتر


ليمون بس و ما اكتر........ قاشرين بيهو في السنتر

Quote: ليمون بس و ما اكتر........ قاشرين بيهو في السنتر

كوم تراب و لا آداب

كوم تراب و لا آداب

كوم تراب و لا آداب


كررها ثلاث حتى قلنا ليته سكت

طبع ما ح نردد : تلاتة لكاشر في الاسبوع . . داخلين الجامعة بدون مجموع . .

لاننا بنشارككم في شطرها



----------

سلامات يا اشرف

ومشتاقين ياخ


و الله ايام يا زمان !!!

هل من عودة تاني ؟ . . . يا ربي ؟

أولاد بزنس
كيف حالكم

بزنس لنا فيها ذكريات.
أنا أحب ليمون بزنس وناس بزنس وبس.
..
..

بكري الجاك.. مشتاقين ياخ
..
..

محمد عبد الرحمن.. كيف حالك يا رجل...
..
..
تحياتي لكل المشاركين

..
..

كتبت قبل أسبوع بوست عن جامعة الخرطوم أتمنى المساهمة فيه وهو امتداد للبوست السابق الذي كتبته عام 2005م.
.
.

بوعدكم بعد اكمل (المراسيل) ..نهاية الاسبوع يعنى ..برجع اكتب ليكم عن (الشخوص)
اى الشخصيات فى مجتمع بزنس ..طبعا انا متهم نفسى اننى من الممكن ان اكون
روائى او ناقد فنى بشيء من الجهد ...فلذلك حااحاول اتناول (الشخوص فى مسرح
بزنس وتأثيرها على الواقع الاجتماعى فى الكلية ) ..وبزنس غنية (جدا) بالشخوص التى تستحق
الكتابة عنها ... ماشرط الشخصية تكون مميزة او تمارس دور ايجابى حتى يتم الكتابة عنها
لا طبعا ..عادى جدا تكتب عن (الطاهر أرتولى ) على الرغم من انو مامارس فعل ايجابى
واحد فى حياتو ...

الله يكفينا شر العوارض و(المراسيل) ..

بجييكم ان شاء المولى ....

Quote: عادى جدا تكتب عن (الطاهر أرتولى ) على الرغم من انو مامارس فعل ايجابى واحد فى حياتو ... الله يكفينا شر العوارض و(المراسيل) ..

لا دي بالغت فيها البرلوم الطاهر ( أرتولي ) شخصيه معروفه ح أحكي ليك بعض من ( أفعاله الإيجابيه )
إبان ( إنتخابات إتحاد الطلبه العام 94-95 )
عند عودتي مره أخري للبوست
( كنا أنا والطاهر مراقبين في الإنتخابات ) دي إذا ما جاتك ( مراسيل بالقصه ) وعوارض ( جوا ناطين ليك )
في حلقك )

البرلوم اللذيذ الكتااااب محمد عبدالرحمن


تبكيني أنا شئت وتضحكني آونة الجدب كأنك تملك مصنعا للحزن حينا وللأفراح أحيانا

شباب بزنس الكبار وسغار ... حباً وأحتراما صغاراً مثلنا أو قل قدامى

موعودين بي صور كمية بس أبقوا قراب

قيقراوي

تندس لي معاك ...

محمد عبد الرحمن
انا موافق الجكس يكتب ليك و الجماعة الزينا يكتبوا لي
عساك بخير


اخونا و حبينا اسماعيل وراق

Quote: بكري الجاك.. مشتاقين ياخ

اشواق كثيرة علك بخير فقد انقطعنا يا صديقي

و قبل ما اغيب تحاياي يا محمد اشرف اتمني ان تكون بخير و كم كانت لنا وقفات فى تحت اشجار كافتيريا علوم التي اصبحت مقرا للنشاط لاحقا

اخونا سامر حسن
كيفك ايها الجميل اتمني ان تكون بخير و بركة انك ظهرت


ابقوا عافية

بكري الجاك

ترحيب خاص بضيوفنا ...

اسماعيل وراق
ومحمد اشرف ...

محمد اشرف حسب (قلة المداخلات ) وندرتها ..
اخمن انك رجعت للسودان ..

تحياتى ليكم ..

الله علي زمنا كان ليمون بيزنس بريال واحد

بجنيه بتعزم عشرة بنات

وشراب الليمون عندو تكنيك

ما تشرب الليمون في محل الكشك

تشيل الليمون ومعاك الجكساية وتمشي المين رود

بعدين ما تشفط مرة واحدة

جقمه جقمة وتعمل فيها سارح مع غرودة عيون

Quote: بعدين ما تشفط مرة واحدة جقمه جقمة وتعمل فيها سارح مع غرودة عيون

الله يقطع شيطانك.،

Quote: جقمه جقمة وتعمل فيها سارح مع غرودة عيون

ههههه

تذكر يا خلي بريال واحد تجكس ساعتين

الاخ قيقراوي..لك الود الجميل
خالد كمية اسم شهير جدا..خاصة في اوساط دفعتنا..
وهو فعلا شاعر له في الادهاش والخيال صولات..
مازلنا رغم كل شي نمد للتواصل جسورا
وان بدت الاشياء ليست هي الاشياء

اسماعيل وراق

في اول مداخله لي معك قبل سنتين كانت خشنه شويه
والله داير اعتذر ليك من زمن وما لقيت فرصه مناسبه

هنا في حضرة حبيبتنا بيزنس اعتذر لك من كل قلبي على تلك المخاشنه

هو طبعا ياالامين ... فتح الرحمن خلف الله دا ادانى احساس انو كان بدرس تربية ..
ياخ الجامعة كلها بتعرفو باسم خالد كمية ...بعدين خالد دا اتخرج معانا نحن...
و اخر مرة قابلتو قبل فترة وكان حينها موظف ببنك السودان ..خالد
دا من الشخصيات العايز اكتب عنها ...

واهم شي الليمون يكون معاهو

ساندوتش طعمية بالجبنة

واحسن مكان تعقد فيهو في المين الرود

تكون مقابل الexam hall


ممكن تطلع درر وتقنع اي جكساية

حتي لو كانت مني زكي

معقول ياخليل طعمية بالجنبة فى نهاية المين رود محل
الحناكيش ياخليل ..طعمة بالجبنة دى ممكن فى كافتريا قانون
وتجوز فى كافتريا اقتصاد مع الكراهه ..لكن فى المين رود
تحرم حرمة بائنة بينونة كبرى والله اعلم ..

خلي يا خوي ديل زمنهم كان بياكلوا

Quote: جبس بالجبنه والطماطم

تقول ليهم طعميه

اها هسع الجماعه عرفوك ديناصور

كده كويس

الأخ/ محمد عبدالرحمن

Quote: طبعا ياشباب نسيت الاخ جعفر سومى ..النجم الاول فى منتخب بزنس ..وهو طبعا عضو معانا هنا .. ..واعتقد انو مقيم فى اليابان ...اتمنى ان ارى مشاركاته ..

صحيح أنني الآن باليابان ولكن حان وقت الإياب



.

تحياتي لجميع الإخوه الأفاضل الذين مروا من هناوتحيه خاصه لسامر حسن وبكري الجاك ( عليك الله فرق التوقيت بيننا بيعمل كدا ) إتصل ياخي وليك وحشه شديده بالمنبر يا بكري ، بكري الجاك وفاق عليك الله هي محسيه غايتو لو سمعت الكلام دا ح ( تثحقك ثحقاً ) ههههههه
محمد عبدالرحمن
( بزنس ) تقترن ( بهندسه):: سلام وتحايا من البرلومه ( جيهان ) وزوجها خالد
وبيقولوا ليك متابعين البوست منذ الأمس واصل وخلي الباقيين يظهروا ، أما صور قيقراوي فهذه
تحتاج لباسوورد من بكري عديييل هههههههه.
يا محمد ياخي ( إنداح ) سااااي مش برلومتك و ( البنت ) الوحيده بهذا البوست ( ههههههههه )

قيقراوي :

Quote: اها تجي و لا نجي ؟

دي ذي محاضرة ( الهندي ) طبعاً إحنا كنا أكثر دفعة ( شلهته ) يوم ندرس في بي ن تي ويوم
نلاقي نفسنا ( ضهب ) في إحدي قاعات ( الإقتصاد ) أو الأداب ( مش بهدله دي عليك الله )
بس يا قيقا عاوزاك تحكي لي الصور دي لسه محتفظ بيها كيف ؟

يامها ..


التحيه عبرك لجيهان فداسى وزوجها صديقنا خالد على خليفه ...
خالد وذكريات المرخيات ...طبعا خالد على خليفه قريب قنبور ...
واعتقد انو قريب رشاد ومحمد عثمان ..واربعتهم درسوا بزنس ...
قنبور (اخوان) ..ورشاد ومحمد عثمان ... وجيهان عبدالملك برلومتنا
و قريبتنا (بالجيرة ) حيث لافاصل بين فداسى واربجى .....

تحيات ...

الاخ محمد احمد سعيد

مين ايامك . يا حليل البزنس الجماعه قلبوها حنكشه ( حبس بالجبنه ) يا حليل ايام البزنس لما الجماعه في الجامعه اتحاشو امرو بالبزنس خوفا من اولادها .

معاك

الزبير ود الجديد

الزبير بشير

السلام عليكم ورحمة اللة وكيفك ,اتمنى ان تكون بخيرين .
الشباب شكلهم اولاد دفع مع بعض فحكاية الم فيك دى محمدة كبيرة وشكلهم حقيقى فترتهم بتختلف عننا شديد واكثر شئ استغربت ليهو حكاية انو بزوغو من المحاضرات لانو على ايامنا لوغبت ثلاثة محاضرات لوركبت طيارة مابتلحق زملائك

حليل ايامنا وايام التوب لمن اقع من راس زميلتك حدرة شديدة واحدة التوب براهو من الرقبة يقوم اغطى الرأس خوفا من العين.

ايام لن تعود وهى متغلغلة ومتمكنة فى الذاكرة ولن نرى ايام مثلها ابدا

طبعا اولاد دفعتكم الورانا ناس حامد مصطفى واحمد عيسى والنور عجبنا والاسبوع الثقافى وانتو اول ناس جابو المرحوم الاستاذ مصطفى سيداحمد ليشدو فى البزنس

وخالص تحياتى لك

Quote: حليل ايامنا وايام التوب لمن اقع من راس زميلتك حدرة شديدة واحدة التوب براهو من الرقبة يقوم اغطى الرأس خوفا من العين.

ياابوحميد ..اخبارك ..

توب شنو ياخ ..خوفتنا عديل كدا ..انتو الكلية تاريخ تاسيسها دا (تسنين) ولا(ميلاد)
لانو اتخايل لى زمن التوب دا زمن ناس خالده زاهر ...

بعدين ياحبيب الناس ديل مااولاد دفعة واحده لكن اولاد فترة واحدة ..
خليك معانا وجودك مهم بجى زول بعمل ربط بين الفترتين ...

شكرا ليك ...

تحياتي محمد اربجي

يا اخي حرام عليك

خالده زاهر شنو . انت الناس الدرسوك كلهم درسونا .

يا اخي و الله العظيم عندنا ناس لما الواحده تجي الجامعه بالتوب تقول للشمس وخري عاوزه اجلس مكانك ( بدون ذكر اسماء ) .

يا حليلكم انتو في البزنس لقيتو موية الليمون ما لقيتو الليمون ذاتو .

اسكت يا جنا ما تقلب علينا المواجع و الله لما نسمع بزنس شعرت جلدنا كلها تقوم .( بتعرف الاواكس )

تحياتي لك مداخلي البوست .

محمدعبد الرحمن صاحب البوست

كيفك وعساك بخيرين

معليش استلمنا منك البوست وعينى قوت حبتين لمن عرفت انك من اربجى كمان

وحق الجيرة والاهل الكثيرين عندنا فى اربجى وحق البزنس الدرسنا فيها سويا بنتحكر فى البوست انا والزبير اخوى دا

لانو الزبير من الجديد الثورة وانا من ابوفروع خط واحد

Quote: لانو اتخايل لى زمن التوب دا زمن ناس خالده زاهر

التوب ما بعيد يا وداربجى لى قريب دا كان فى الجامعة فى

خالدة زاهر للاسف ما حضرناها

لكن تشرفت بالتتلمذ على يد اختها فهيمة درستنى Sociology وانا برلوم

تلقيت رسالة جميلة جدا وحميمية خالص خالص من
Dr. A K Altayeb (Bsc (Hon), MBA, MPhil, PhD)
College of Business Studies
Al Ghurair University
Dubai Academic City
وصراحة سعدت جدا جدا بهذه الرسالة ..والهادى رجل عصامى
استطاع ان ينحت الصقر وان يضع نفسه فى المقدمة ..وهذا
داب ابناء بزنس .. ولو ان صاحب الرسالة طلب نشرها هنا
لفعلت مع انو نحن نوهنا لانو الشباب يرسلو لبكرى الجاك ..
لكن نعمل شنو .. دا عبدالهادى وهو صاحب وضعية خاصة جدا ..
والهادى بجانب اسهامه الاكاديمى المميز واسهامه السياسى هو صاحب
نظرية (الصداقة المتقدمة) ..ودى ممكن يتبحر فيها اخونا فتح الرحمن
فى بوستو بتاع التنظيمات العاطفية ..مجمل الفكرة بتاعت الصداقة المتقدمة
دى ..هى علاقة اسيادها شايفنها اكبر من الصداقة وخايفين يسموها
(حب) لذلك (جهجهوها) بالاسم دا ..حتى يقضى الله امر كان مفعولا ...

وجاييك ياعبدالهادى برد فى الايميل برضو ...

يقول الاخ حسن عثمان الحسن فى كتابه (خبايا العاشقين ) ان الصداقة
المتقدمة هى فى الاصل (حب راسو عديل) ..لكن سيدو هارش ...

او كما قال .

اسكت يا جنا ما تقلب علينا المواجع و الله لما نسمع بزنس شعرت جلدنا كلها تقوم .( بتعرف الاواكس )

اسكت يا جنا ما تقلب علينا المواجع و الله لما نسمع بزنس شعرت جلدنا كلها تقوم .( بتعرف الاواكس )
ُEarly warning control Sytem
الزبير دى بالغت فيها عديـــــــــــــــل

Quote: سألتك بالذى اهداك مملكتى أمالك غير قلبى او شرايينى مكان؟ و مالك غير نبضى سكة ابدا و مالك غير اوردتى مسار ..؟ سألتك ... بالذى سواك من ازل القصايد كيف كانت دهشتى حين التقيتك لحظة فى زحمة الطرقات... ثم عبرتنى ... و تركتنى .. للريح ... و الشجن الاليم ... وذكريات ! الكلمات لزميلى الرائع حقا خالد حسن بشير زينت غلاف كتاب الخريج لمدرسة العلوم الادارية جامعة الخرطوم و الذى كانت واجهته تحمل صورة المبنى الرئيسى للجامعة (مدخل المكتبة المين) و كتب فى اسفل الصورة عبارة (نقوش على جدار الذاكرة) هى دعوة لتحسس هذة النقوش بوصفها و صفاتها استدعاء لتلك الايام الرائعة كما تقول صديقتى و بكلمات الشابى ايام كانت للحياة حلاوة الروض المطير !

ازيكم جميعا

المداخلة اعلاه كتبتها فى بوست سابق موجود فى مكتبتى و فيها بعض من الق زميلى خالد كمية.

بجيكم بمهلة سمح!

خالد حسن بشير ده ياهو الزول الجانا في البيت بصحبة القدال وقاسم ابوزيد
وقرأ شعر تمام وسجلت له شريط مازال بحوزتي لتراكيبه الكاربة
تحية له
وتحية لصاحب البوست الزميل الحبيب العريس محمد عبدالرحمن وضيوفه وزملائه

Quote: سلام قيقراوي وتحايا والصورة روعه واصل والله مستمتعين شديد

اهلين يا برلومة

الصور حالاتا داخلية ساي
اها هنا على نضافة حبة كدا :




اما فيما يخص صاحبنا بتاع ( بزنس جامعة الخرطوم (بوست بنكهة الليمون) )
فعندي ليهو هدية سغيييييييييرة :





ملاحظة حاجة في الصورتين ديل ؟
الكيمان مفروزة ؤ كدا .. لكن ما عاطفياً محايدين / تجمع


اها يا مها - يامها دي احسن ليك منها " مها يا رفاعة - وكت جابت جيهان و عبد الهادي خوجلي و سامر جاي متأخر ، و عاوز يـchـيتو ليهو قلنا ننقل المداخلة - بتصرف - بي هنا . كمان رشاد عثمان و حسن عثمان و تأبين بروف علي المك و " انت الحي الاوحد فينا " . . حضارات سادت ثم بادت او كما قال .
ها آناس نبدأ من وين اسي ؟

----------------

محمد عبدالرحمن يا برلوم شكلكم ما عارفين معنى الكلمة
د. عبد الهادي مشتاقين ياخ و الـ PhD ما بتعفيك من الصور - لابس فنيلتي فيها كمان - اها كان دايرا تحت تحت رسل هنا [email protected] . . و يا محمد اها نقسما الجكس يرسل ليك و العنقالة يرسلوا لبكري و حملة الشهادات العليا يرسلوا لي انا . اتفقا ؟

Salam Habeeb Mohamed
First of all am sorry to write in english, i do not have arabic key board,,,,
secondly the post is really very interested,,,, thanks for your initiative,,,,
please keep communicating,,,,, and send my regards to all our friends.

Please if you have Maha telephone in UK , please send it to me.

Mohamed Zain Adila
London






بالله شفتو البوست دا جاب كيف .....الحبيب محمد الزين آدم عديلة ..
الامين العام لطلاب حزب الامة بجامعة الخرطوم ورئيس مجلس الامناء لطلاب
حزب الامة بالجامعات السودانية فى تلك الفترة..طبعا المعلومة دى جديدة لنج وقد تكون
مفاجئة لناس فتح الرحمن خلف الله ..ماعايزين ندخل فى السياسة ...محمد الزين
(ضب قراية راسو عديل ) ...وعندو كورة (قاطعا من راسو) ..كورة (مهيرته كدا) ..
هو طبعا كورتو (الحبه ) دى يشكر عليها كثير...حصل سمعتو ليكم بلاعب ولا فريق
من مليط ؟ ..يعتبر محمد الزين آدم عديله رائد فى مجال كرة القدم فى منطقة مليط
(زى ناس بابكر بدرى وعبدالرحمن على طه بالنسبة للتعليم ) ...
لكن بالجد سعيد جدا بالبوست دا الجاب لينا ناس الهادى ومحمد زين ...مع التأكيد
انو دا آخر ايميل يجينى من اخ ..( عيبو لى ايميل بكرى الجاك دا ياشباب ) ...

يافتح الرحمن خلف الله ..نحن عندنا الوثائق بالكوم الطريق البديتو دا مابتقدر تواصل
فيهو ..احسن تتراجع ....وبعدين يافتح الرحمن لاحظت ودالزين ماسال من تلفونك
لا انت لاسامر لابكرى ..الحكاية شنو؟


تحياتى ليكم ياشباب والبوست بوستكم ...

يامحمد سعيد ...بحق الجيرة وبزنس البوست ملكية خاصة لك ..تحياتى لاهلى
ناس ابوفروع ...


ياالزبير حيرتنا بالاواكس دا ..ناس لابسه تياب (الاواكس ) ليها شنو ؟ ...

الآن فقط عرفت سبب تهدئة الليمون للاعصاب .



لست ادري ..
هل هو طعم الليمون ام طعم الانس الذي يجري ام طعم ايام الشجن.

غايتو انا متاكد من حاجة

(كنا في المدي طيفان سارا والزمان مغيب
وقد لبسا لوعدهما غلالة كوكب دري ).



بوست لطيف برغم من كلام عمر فاروق الفوق ده

زيكو .. خريج كافتريا كلية الاقتصاد

Quote: العلامه المحسي رحمة الله عليه

استاذنا محمد علي المحسي حي يرزق

شكرا سيف بشير على التنبيه

اعتذر من كل طلاب واحباب واصدقاء استاذي المحسي اطال الله في عمره

Quote: استاذنا محمد علي المحسي حي يرزق شكرا سيف بشير على التنبيه اعتذر من كل طلاب واحباب واصدقاء استاذي المحسي اطال الله في عمره

سلام يا نادر يا كبيرنا
و الله الحمد لله انك صححت المعلومة ، في الاول كيت انك بتتكلم عن محسياً تاني - المحس ما كتار كمان ياخ ؟! - اما استاذنا محسي بكامل صحتو و جمالو ، و كما العهد به وفاءاً و عطاء لمهنة المحاسبة ، ربنا يمد في ايامو و يفيد به .

Quote: جمعية المحاسبين والمراجعين القانونيين والمعتمدين، كانت قد سلمت السيد وزير العدل خطابا بتاريخ 31/5/2006م، تناول في احدى فقراته الحديث عن تقرير منظمة الشفافية العالمية عن الفساد والافساد.. وارجع الخطاب السبب الى اسر المهنة والتغول عليها طوال ستة عقود دون تطوير ودون وضع معايير للمحاسبة والمراجعة… سألت عن مدى صحة التقارير الصادرة عن مثل هذه المنظمات، فاجاب محسي قائلا «الشفافية الدولية ترصد اي مليم يخرج من مكان لآخر، وتأتيهم تقارير اولا باول، لذلك عندما تقول ان المكان او البلد الفلاني به نسبة فساد، فإن الحديث يكون بالارقام والاشخاص، والمعلومات التي لديهم الآن ان السودان من اسوأ البلاد من حيث الشفافية»..

http://www.sudansas.com/vb/showthread.php?t=67


--------------
يا ابو كدوك
نحن درسونا عبد الرحيم حسين ، و محمد سليمان عبد الله حجار - و هم الاتنين تقلدوا امانة المراجع العام - و استاذ الاجيال القاسم رزق الله ابو القاسم . . لهم التجلة . . و ربنا يديهم العافية كلهم

محمد زين الزين وكما كنا نردد أيام تشجيع فريق الكره ( بزنس )
زين زين محمد زين ، سعيده برسالتك وسماع أخبارك.

Quote: وبعدين يافتح الرحمن لاحظت ودالزين ماسال من تلفونك لا انت لاسامر لابكرى ..الحكاية شنو؟

دي طبعاً لأن الإيميل أُرسل لك يا محمد ( هههههههه )
التلفونات بالمسنجر أتمني ترسل لي إيميل ود الزين ورقم تلفونه كمان يا محمد عبدالرحمن
البوست جاب إقتصاد والعزيز ذيكو منور البوست وتحيه خاصه بنكهة الليمون
مافي خبر من خالد كميه أتمني يكون بيقرأ في البوست دا وبقول ليهو ( كميه من الشوق )
سلام إلي د. عبدالهادي بدبي وتحياتي لأسرته الصغيره

Quote: يافتح الرحمن خلف الله ..نحن عندنا الوثائق بالكوم الطريق البديتو دا مابتقدر تواصل فيهو ..احسن تتراجع ....وبعدين يافتح الرحمن لاحظت ودالزين ماسال من تلفونك لا انت لاسامر لابكرى ..الحكاية شنو؟

تهديدك دا زي لوح تلج الطيب عبد الله القرّب
اسي ليهو زي 18 سنة !! . . لوح تلج و لا قزاز دا ؟!!



اها د. هادي و ود الزين و كمية من الناس الزينين من د. عبد اللطيف إمام و د. ابو ذر الجلي مروراً بالمسجل و لي عند كمال اليمني
ما باقي لينا الا اسماعيل الخليفة و بت المنا و حواء .



--------------
ياخ احب المحاسبة
برضو وبنحب الإدارة . . بس ما شديد
و اموت ركن في بزنس


* " ارتولي " الجميل جاييك يا برلوم

تحاياي للبزانسة داخل و خارج الوطن (البورد)

يا محمد وصلتني رسالة من دكتور عبد الهادي و اخري من الاخ محمد زين و واحدة من الاحت خديجة الشريف

عشان ما تقول الناس متنظنشننا يعني

يا فتح الرحمن ما عايز اورطك لكن بيكون عظيم لو قدرت لما تنزل الصورة تقول لينا وقوفا من اليمين طارق كريمة و عبد الجليل هجو و خالد و غلام و الي اخر

انا بصراحة مرات اتذكر الاسم يطير مني الوجه و مرات اكون عارف الوجه و ابتسم و يطير مني الاسم بعدين يا اخوي نحن ما تخرجنا 2005 عشان تخت لينا صور و ديانا نتذكر نحن قاربنا ان نكمل قرن منذ تخرجنا و خلال هذه السنون ياما جرت مياه تحت الجسور فرأفة بنا ضع ما تيسر لك من الاسماء و خلي الباقيين يجتهدوا يكملوها

سلا م يا زيكو عجبتي حكاية خريج كافتيريا اقتصاد دي

ابقوا عافية

بكري الحاك

Quote: نحن قاربنا ان نكمل قرن منذ تخرجنا و خلال هذه السنون ياما جرت مياه تحت الجسور فرأفة بنا ضع ما تيسر لك من الاسماء و خلي الباقيين يجتهدوا يكملوها

الزهايمر ضرب برااااااك يا اخوي ! . . انا دفعة اريج الحاج و لي ورا

بالعكس يا بكري انابعاني من عدم القدرة على النسيان
بعض الذكريات مؤلمة حد الفجيعة . . كثير من التيمم ... قليل من الوضـوء
صدق لسه ما عارف كيف اتجاسرت و دخلت هناك و لا فارز كتبت شنو ؟
الحادثة الحكتا اميرة لسامر كانت سنة 1995 لسة بتذكر تفاصيلا الدقيقة الثانية بالثانية . . .
ياااااااااااااه اميرة خلفت كمية من الالم فوق الاحتمال . . و لسة بعتقد ما بكيناها كفاية . .
لا دمع يليق ياأميرة فاعذرينا في علياءك


جهد كبير يا سامر

منظمة أميرة كرار الخيرية للأطفال ذوي الإعاقة الذهنية - ...ك والموقع الإلكتروني

موقع : منظمة اميرة كرار للاطفال ذوي الاعاقة الذهنية


---------

في اقل من السنة و كأنو في سباق محموم نحو الضفة الاخرى ، حزمت وصال و قررت الرحيل ايضاً


فلنترحم على روحيهما
لكن جنات الخلد . .و لنا الحزن و صادق الذكريات . . ولا عزاء يليق

المشكلة يا خليل ويا كيكى ويا نادر ابكدوك

كلكم بتشربوا ليمون بزنس لكن مع بنات اقتصاد

وبتتموا الخلطة فى كافتيريا اقتصاد

وبعد ده فى الميدان الشرقى تقولوا لينا اولاد وبنات سكرتيرات

وتفكوا فينا ناس ابو سمرة ومحمد فاروق

كانت لنا ايام .. هل من عودة تانى

اها يا بكري

من اليمين : عبد الجليل هجو ( العربي الاصيل ) ، ابو عبيدة ( الشخيت ) ، عبد المنعم التهامي ، خليل بشير ، خالد اللمين ( العمبلوق ) ،و قفا عمادمبارك ( عماد خلفان )


اعتذار عن رداءة الصورة ، و هي قدام " الإكزام هوول "

بس عندي سؤال لدفعتنا - توجد جوائز للفائزين - الزول البين خالد الامين و عماد مبارك دا منو ؟


دي صورة فيها الاجيال ( الدفع ) التلاتة المنتشرين في البوست دا
حافظ رضوان ( ممثلنا ) ، الطاهر ارتولي ( المحتفى به ) ممثل محمد عبد الرحمن ( الشخصي ) . . اها يا رفاعة تعالي عرفي اولاد دفعتك ديل ؟
دفعتكم دي انا بعرف منها - غير دفعتنا الجوكم - اميرة كرار و ندى التنقاري و بقية شلتكم و سليمان مكادي بس

----------------

خالد اللمين معانا هنا و معاي في نفس الشركة ، خليل شيخ بزانسة جدة ، و اخيراً التحق بينا العربي عبد الجليل كمان .

Quote: "يا فتح, شفت موضوع ليمون بزنس قبل شوية في سودانيز اونلاين واتكلمتا الصباح مع مامون نافع اوفلاين. اها الليمون دا ذكرني قصة. لما فتحو كافتيريا النشاط الجنب قاعة القرشي ديك (كافتريا علوم), الجماعة الغمتو ليهم العطاء بدوا يعملوا في الاعلانات لجلب الزباين..واحد من الاعلانات كان طريف جدا ومكتوب بي خط كعب كدا ومعلق في سيقان معظم الشجر: "الان ليمون بزنس في علوم" ..ليمون بزنس كان سمح لمن استطاع اليه سبيلا شوقي اسماعيل"

طبعا انا ماحااعتذرعن الغياب بكثرة (المراسيل) حتى لااطعن فى أهليتى ..
فأحسن ادخل بدون اعذار ..المحيرنى الطاهر ارتولى دا مكرمنو فى شنو؟
طبعا الواحد حقو يعترف انو كان عندنا منتخب كورة من اسوا المنتخبات
فى الجامعة ...واضعف عناصر منتخبنا على الاطلاق هو حارس المرمى
اللهو الطاهر ارتولى .. انت بس عليك تشوت من اى اتجاه وخلى الباقى على
ارتولى ...تشوت كوره ..تشوت جردل ...تشوت (عنقريب) ..البتشوتو كلو
بدخل ...البمش على حارس مرمانا بجى جارى يهلل ورافع يديهو لى فوق..
لله الحمد من قبل ومن بعد ....لكن على الرغم من ذلك كان عندنا لاعب
من اميز اللاعبين فى الجامعه اللهو جعفر سومى ..غايتو كتر خيرو ...مرة
لعبنا مع هندسة ..واتبرع الاخ جعفر سومى بتدعيم الفريق بزى سبعة لعيبة
من الامير البحراوى ..اليوم داك ناس هندسة قربوا يجنو ,...متحيرين فى ناس
بزنس البسطروا فى الكوره ديل ..مباراة تانية مع هندسة كانت بالليل غلبناهم
فيها ..كانت مباراة جميلة ..أتالق فيها الشبلى على مااعتقد ..زول جرااااى كدا ..
وسبب من اسباب الانتصار كان غياب الطاهر ارتولى عن المباراة ...

فبالله يافتح الرحمن نرجو تنورينا بسبب تكريم المدعو ارتولى فى اللقطه اعلاه ...

***
عندى صورة لبكرى الجاك بدور عليها ومالاقيها ..دا غير صور فتح الرحمن
التى تعتبر وثائق ..

Quote: لعبنا مع هندسة ..واتبرع الاخ جعفر سومى بتدعيم الفريق بزى سبعة لعيبة من الامير البحراوى ..اليوم داك ناس هندسة قربوا يجنو ,...متحيرين فى ناس بزنس البسطروا فى الكوره ديل ..مباراة تانية مع هندسة كانت بالليل غلبناهم فيها ..كانت مباراة جميلة ..أتالق فيها الشبلى على مااعتقد ..زول جرااااى كدا .. وسبب من اسباب الانتصار كان غياب الطاهر ارتولى عن المباراة ... فبالله يافتح الرحمن نرجو تنورينا بسبب تكريم المدعو ارتولى فى اللقطه اعلاه ...

وجاهة ساي

يا محمد ياخ بزنس مالم و مال الكورة ؟
اصلاً بزنس دي حدادي مدادي وعبر تاريخها الما طويل ، ما فيها غير رياضيين اتنين انا و جعفر سومي . . الباقين كلهم متلصقين فينا ساي
اسي شوف جنس تِلِصق صاحبك ود الزين دا




-------------

غايتو جاي جاي - بحق الصحبة ساي - ممكن نقبل عارف قرنوف و علاء الدين شنكل ، د. محمد عبد العاطي ، محمود " الحاج يوسف " . . و الشبلي مع الكراهة . . اما ارتولي مع الوجاهة ساي

" ارتولي" اللبس من استنبول و الكورة من تمبول
" قرنوف " اللبس من ود اب زهانة و الكورة من غانا

يا قيقا صاحب الصورة موضوع السؤال عندو قصة لذيذة
أنو كان بختفي طول السنة وبجي يصور آخر الأيام ويتكسر في الداخلية لحد نهاية الإمتحانات ، أها جاء في سنة رابعة وقاعد مع أخونا عماد مبارك وكل شوية بجوا اتنين خالطين "مشروع جكس" وصداقة متقدمة .. قام صاحبنا قال لعماد مبارك :شنو يا عمدة ياخ طلعتونا من الدفعة دي بقد القفة ما لمينا في جكساية!!!" قام عماد رد عليهو بسرعته المعتادة:
دي برضو عاوزنا نصورا ليك يا....؟؟؟؟



الإجابة هو حبيبنا فائق

بس خايف الجائزة تكون تصوير شيت

Quote: البوست جاب إقتصاد والعزيز ذيكو منور البوست وتحيه خاصه بنكهة الليمون

تحية بنكهة (صفق البان) يامها ..


سعيد جدا بك وب بكري الجاك وبنادر ابكدوك

وبا سامر حسن (نحنا حانتشاوف قريب )

وسعيد اكتر بوجود رفيق (الاماكن المضاءة) الامين ود الدفعة

وخالد كمية (طالما انتهرتك الذاكرة في طيوف الاعتراب غضبا من انفضاض السامر)


البوست انعش ذاكرتي جدا ..

ويامحمد عبد الرحمن صدقني الاستفدتو من كفتريا اقتصاد اكتر من اللكاشر .

عارف مرة قابلت واحد معا صديقة عزيزة في الكفتريا

سلمت عليه وقلت ليهو برشاقة شديدة وخفة دم .. انا شايفك في حتة ..

ولم الاحظ قرصة صديقتي لي .

طلع دكتور كباشي بتاع الابلايد اكونومي


زيكو

زيكو

فتى بزنس الذي ضل خطاه فاحتفت به الإقتصاد

والرفيق الذي غازلته براحات الحياد فانسرب من قيود التنظيمات السياسية وأرخى حبال الوصل تجاه كل التنظيمات العاطفية والإجتماعية

أحبت بسببه رفاعة وعبدالرحمن وعلية رحمها الله ومها ووفاء وعمرابي وأمل وبنات أبوالريد واقتصاد ... دخلت الجامعة ذات مساء في العام 1991 قبيل استشهاد طارق بأشهر.... وجدته قرب كشك آداب عرفني به منير صديقي ومارست عليه جلاطة اعتدت عليها "فكيت الشكة" وكان متأنقاً كعادته ... أدهشني أدبه الجم ودماثة خلقه حين اعاد هندمة تفاصيله وقال لي: تاني لو عاوز فكها طالما انت من بركات وصاحب منير"

Quote: يا قيقا صاحب الصورة موضوع السؤال عندو قصة لذيذة أنو كان بختفي طول السنة وبجي يصور آخر الأيام ويتكسر في الداخلية لحد نهاية الإمتحانات ، أها جاء في سنة رابعة وقاعد مع أخونا عماد مبارك وكل شوية بجوا اتنين خالطين "مشروع جكس" وصداقة متقدمة .. قام صاحبنا قال لعماد مبارك :شنو يا عمدة ياخ طلعتونا من الدفعة دي بقد القفة ما لمينا في جكساية!!!" قام عماد رد عليهو بسرعته المعتادة: دي برضو عاوزنا نصورا ليك يا....؟؟؟؟ الإجابة هو حبيبنا فائق بس خايف الجائزة تكون تصوير شيت

خليك من تصوير الشيت
هو فائق دا في عضمو لو ما الصورة دي قدام الاكزام كان لمينا فيهو صورناو ؟

و الله فائق دا اكتر زول بفشل نظرية عقيل آدم النور عن بزنس !
عقيل رافع ليك بزنس مع هندسة الكتف بالكتف !! . . انها صعبة
كلو من عبد الهادي و حسين تميمي و كل الجكس بر فرز . . السنة كلها ضبضبة و كبكبة جد

Quote: اتشهقت و جبدت نفس طوييييل و انا امر بين سطور البوست الرائع. ضحكت مرارا، و تجرعت الاسي مرات اخري . استرجعت ذكريات شباب " كانو اخوان في الانسانية" و لسان حالي " لو أن لي كرَة". كل الشكر لخالد غلام على هذا الاهداء الرائع و أتمنى أن أكون جزءا منه... المحيرني يا فتحي أنا كنت وين لما أخدتو الصور دي. أكيد ماكنت في المكتبة مع حسين تميمي. حسين، أنا أنصحك بي شدة تتصل علي فتح الرحمن الزعيم فبل فوات الاوان (0557348436 ). راجع اللينك دا و حاتعرف. بزنس جامعة الخرطوم (بوست بنكهة الليمون) كمال خالد الرياض 00966500540758 [email protected]

تلفوني دا ساااااكت يا كيمو !!

----------------

Quote: يافتحي انت قيقراوي دي ناحتها من شنو انا ما عارف انت لمتين تخلي المناطحه دى والله مشتاقين والغريبة متابع كتاباتك المخستكة دي والاغرب انو احيانا فيه لغة متقدمة مابتشبه خستكتك دي بصراحة مرات بترتقي بمن يقرئك مسافة طبعا دا القرئ الذى لايعرفك انت هنا تجيد المخاتلة ياندل لك حبي

عديلة اووو . . . الخ
من زول ACCA . . بنعتبروا رأي فني ( محايد )

التشبيك ماشي على ودنو يا برلوم . . اضفنا للستة :

Quote: عارف قرنوف خالد غلام عوض محمد احمد ألتما جاري البحث عن أبو المليك و دكساوي

Quote: دي برضو عاوزنا نصورا ليك يا....؟؟؟؟

( انا كلما أقول التوبة يا ابوي ..
ترميني المقادير يا عين ..
واحشاني عيونو السودا ..
يا ابوي ومدوبني الحنين يا عين.)

***

الحكاية شنو يا ناس البلد الآمن اهلها ، السنة دي مما اصحبت علينا ، وجامعة الخرطوم بتاور فينا .. الحنين !

مرة من ذات المرات وكنت حينها قررت بعد الحاح من زميلتي ان ادخل ( لاب الحاسوب ) ، لانو حسب كلامها .. الــ ( attendance )
مهم شديد .. قلت ليها :ما تتندسي لي ياخي .. قالت لي : الدكتور بتتندس براهو .. وبمر فوقنا نفر نفر ..
قلت امري لله .. خلاص حامشي اشوف القصة حقت اللاب دي شنو ؟
طبعا الكلام دا ونحنا قاعدين في ليمون بزنس .. قصدي كافتيريا بزنس .. !

دقيقة اوصف ليكم الحتة البنقعد فيها بالضبط .. وانت جاي من المين روود .. بلاقييييك ممر طوووووويل .. الممر دا فاتحات فيهو حدائق صغار صغار ..
واحدة على يديك اليمين .. مربعة كدا وصغيرونة .. يتوسطها ممر بؤدي لوين ما بعرف .. اتخيل بودي لممر فيه مكاتب كدا ..
اتخيل لي البكان دا مناسب لناس الخلط .. بس .. اتخيل لي كدا ...

وعلى اليد الشمال في حديقة تانية .. ما حلوة زي الاولى ديك .. اتخيل لي بس الاقدام المتعجلة للوصول لليمون ..
والحديقة دي في نهايتها .. في بنشات .. اظنهما بنشين فقط لا اكتر .. او ربما اربعة .. المهم كنا بنقعد في البنشات دي .. يومي على الله ..

ما بنزهج ، ما بنكل ، ما بنمل .. ما في سبب بخلينا نتحرك من المكان دا الا لسببين :
الاول .....
التاني ......

الاول : مرة سمعنا صوت طلق نار مدوي فوق رأسنا .. قمنا جرينا
التاني : فكوا فينا ( بمبان ) ... لانو كان في مظاهرات في شارع النشاط ..

اها الكافتيريا حقت بزنس دي .. الذ كافتيريا مرت علي في تاريخي الكافتيري ..

مما تتدخل تجيك ريحة الليمون فايحة ، كأنه ليمون جاي من الجنة .. أخضر .. وعندو نكهة كدا .. يا سلام ..
لغاية هسة بتذكر الزول البعمل الليمون دا .. هم في الحقيقة اتنين .. واحد بكون بقشر في الليمون .. وقاعد ورا .. شوية ..
وشوف عيني .. بكون جمبو شوال ليمون .. بقشر الليمون دا .. وبناولوا لـــ ( بتاع الخلط ) ....
ههههه بتاع الخلط .. دا ذكرني واحد كدا بعرفو .. خلاص ما نقول عليهو بتاع الخلط .. يقوم يزعل الزول بتاع الكافتيريا دا

طيب الزول بتاع الخلاط بكون شايل ليهو مصفاة كبيرة ... وجمبو الليمون المقشر .. وهااااك يا رغوووة ..
بيضااااااا .. تسر الناظرين .. وكمية من الماركات تكاد تقعد ليهو عينو ....
اربعة ليمون ياخي ..
اتنين ليمون يا ابو الشباب ..
وتلج في الليمون ... موبالغة ..
مكسر دقاق دقاق ..

اها الليمون دا كووووم .. وساندويشات الـــ chips دا كووووم براهوووو ... بس برضو الليمون عنصر اساسي في الساندويش دا .. قولوا لي كيف ؟!

اها نرجع لـــ ( لاب الحاسوب ) .. وقمت مشيت .. بعد مريت الصباح على الكافتيريا .. ولقيت البطاطس لسه بقرشو فيهو ..
حتى الليمون لقيتو لسه ما اتقشر .. مريت وكاني بودع في حتة مني ..

وفوووووووووو مشيت .. دخلت اللاب .. وجا الدكتور .. ونضم ونضم .. وقالوا شغلوا الاجهزة .. وافتحوا داك واقفلوا داااك ..

بعد شوية جا .. نحوي .. ووقف جمب الديسك الكنت القاعدة الفيهو .. وسألني : بتقري وين ؟!

قلت ليهو : بقرأ هنا .. قال لي : وين هنا ؟!

قلت ليهو في الكلية دي ؟

قال لي : في اسكول ؟

قلت ليهو : ايوة

قال لي : ياخي انا قايلك في بزنس ؟

قلت ليهو : وانت الوداك بزنس شنو ؟!

قال لي : الليمون برضو !

***


والله دا بوست جميل ، يا محمد عبد الرحمن ،
وكان بتصدقني قبل يومين فكرت افتح بوست عن ليمون بزنس دا تحديدا ، يعني انت سرقت بنات افكاري .. عديل كدا ..

المهم عبر هذا البوست احي كل من عرفتهم في تلك الكلية :
وان شاء الله ربي يطراهم بالخير ..

وجدان خيري
سوسن الامين
سلمى مختار
سلمى الطيب
عبير مساعد
هناء بت الفتيحاب
نجلاء ابو العلا الحلبية
ماجدة بت الدويم
عمر قنديل
عمر عثمان
رشاد عثمان
الطاهر ارتولي
منتصر ( مونتي )
ايمان عبد السلام
فاطمة السمحة


وربي يتغمد الغالية / وصال بواسع رحمته .. ويغفر لها .. ويتقبلها القبول الحسن !

وانت موووش ياكا محمد عبد الرحمن ( القصير ) .. ؟!

المهم / شكرا على المساحة الجميلة دي ...


هبـــــــــة / بت اسكول

Quote: زيكو فتى بزنس الذي ضل خطاه فاحتفت به الإقتصاد والرفيق الذي غازلته براحات الحياد فانسرب من قيود التنظيمات السياسية وأرخى حبال الوصل تجاه كل التنظيمات العاطفية والإجتماعية أحبت بسببه رفاعة وعبدالرحمن وعلية رحمها الله ومها ووفاء وعمرابي وأمل وبنات أبوالريد واقتصاد ... دخلت الجامعة ذات مساء في العام 1991 قبيل استشهاد طارق بأشهر.... وجدته قرب كشك آداب عرفني به منير صديقي ومارست عليه جلاطة اعتدت عليها "فكيت الشكة" وكان متأنقاً كعادته ... أدهشني أدبه الجم ودماثة خلقه حين اعاد هندمة تفاصيله وقال لي: تاني لو عاوز فكها طالما انت من بركات وصاحب

تعرف ياسامر الشي اللاحظتو في بركات دي انو مافي صفار بيض. كلو اخضر زرعي
بخصوص الشكة هسة اخوك ضرب خلاص غايتو الا يشك في نفسو
عموما انا جاييك بالدرب اجدع تلفونك في الماسنجر اكان غيرتو

رحم الله الشهيد طارق
رحم الله الصديقة الشقيقة علية علي عبدالرحمن
رحم الله الشقيقة الصغري اميرة والابن الحبيب محمد
رحم الله كل من رحل من هذه الدنيا من اصدقاء هذه الجامعة الصلدة
جامعة الخرطوم علي حسن وحمزة موسي واميمة وآخرين .
في جنان الخلد والفردوس الاعلي


زيكو

مرحب حبابك ياهبه ...

يبدو انك كنت قريبة جدا منا ..فأغلب من ذكرتيهم هم ابناء الدفعة والشله ...
وفى تجوالك بين ردهاتها بحروفك وذاكرتك التى لاتنسى كان للوصال من
حروفك نصيب ..,وصال احمد محمد المحسية صاحبة القلب الذى يسع الجميع
الانسانة التى كانت تمتع نفسها بخدمة الآخرين ...يالهذا الحزن الذى لايرحل ..
ويالهذا الجرح الذى كلما تناسيناه ظل حاضرا ..وصال انقى الناس ..واحرص
الناس على التواصل ..كانت كالفراشة ..كانت تجيد صناعة الفرح بين الناس
اجادة صانع خبير ...رحلت هكذا دون وداع .. و دون وعد باللقاء ...
وكأن صلاح حين كتب عنها :


يامنايا حومي حول الحمى واستعرضينا واستطفي
كل سمح النفس بسام العشيات الوفي
الحليم العف كالانسام روحاَ وسجايا
اريحي الوجه والكف افتراراَ وعضايا
فاذا لاقاك بالباب بشوشاَ وحفي
بضمير ككتاب الله طاهر
انشبي الاظفار في أكتافه واختطفي
وأمان الله منا يا منايا
كلما اشتقت لميمون المحيا ذي البشائر .. شرّفي
تجدينا مثلا في الناس سائر
نقهر الموت حياة ومصائر

وصال كأميره كرار وكمجدى محمد عثمان حضور رغم الغياب او غياب فى الحضور ...
ومجدى محمد عثمان ذلك جرح آخر ... ارايتم تكالب الزمان علينا ؟

هنالك موتى ينامون في غرفٍ سوف تبنونها
هنالك موتى يزورون ماضيهم في المكان الّذي تهدمون
هنالك موتى يمرّون فوق الجسور الّتي سوف تبنونها
هنالك موتى يضيئون ليل الفراشات، موتى
يجيئون فجرًا لكي يشربوا شايهم معكم، هادئين

عفوا
هل قلت موتى ؟
لا موت هناك

هناك فقط تبديل عوالم))

يا الله ... على وجعي على وصال ..

وصال ..
التي كان صوتها ادفىء من نار ( الهيتر ) التي كانت تعد لنا فيه ( عصيدة رمضان ) ..
وصال ..
التي لم اعرف حتى الآن .. لماذا رحلت ؟!
ولماذا .. لم تدعنا نراها لمرة أخيرة .. قبل ان تغادرنا الى الابد ..
وصال ..
احن قلب .. صادفته ..
صاحبة الاراء الواضحة .. والحاسمة ..
كم أشتاقك يا وصال .
انا لله وانا اليه راجعون
..
..
..

يا محمد عبد الرحمن ..

وصال وزميلاتها .. استضافوني في غرفتهن .. كأحلى ما تكون الضيافة ..
كنت قريبة منهن .. ومن بزنس .. أكثر قربا من مدرستي الاسكول ..
حتى حين كانت ، سوسن يسوقها الحنين الى سنار ..
تتركني .. ادخل نيابة عنها .. قاعات الـمحاضرات .. واتندس ليها !
كنت اسمع حكايتهن عن كل شيء ..
فلانة .. وفلان .. قصة حب تعطر الزمان
فلان ... وفلان .. اجمل الاصدقاء .. مهما كان
فلانة وفلانة ... اصدق وانبل مما كان ..


والرحمة والمغفرة ايضا على روح الغالية / منال .. التي كانت اذا تمشى ترافقها طواويس وتتبعها ايائل !


والتحية عبر هذا البوست للوفي سامر عثمان .. والذي يعلمنا يوما بعد يوم . كيف يكون الوفاء الحقيقي !
والف رحمة ونور للغالية / اميرة كرار ...



سلامات يا زيكو ...
لاحظت انه بوستات جامعات الخرطوم مازلت تجمعنا .. كما جمعنا حوش الجامعة الكبير .. !

شكرا محمد عبد الرحمن ..

Quote: سلامات يا زيكو ... لاحظت انه بوستات جامعات الخرطوم مازلت تجمعنا .. كما جمعنا حوش الجامعة الكبير .. ..

سلام ياهبة ..

مثل اهتزاز نخلات بزنز .. تساقط ثمرها من قلبها مباشرة

زيكو

سمرية وعبدالرحمن قوي


كل سنة وانتو طيبين

13يناير2010

Quote: كتر خير سامر حسن .... وحافظ رضوان قرب ينكر صورته .... عموما يا الزعيم إتفقت مع سامر حسن نعمل scan لكل الصور طرفنا ( طبعا كميه ) "كميه دى لا ترجع الى خالد كميه" ... ولو أى زول عمل نفس الشى ح نعمل فولدر صور كبيييير لناس بزنس) .... بس تميمى كل الصور ضده .... عموما أضفت لكم هدى محمد أحمد ومعتز ألتى وحاظ رضوان ( يا كمال فتش فيصل فضل الله .... الما نصيح فى كتاباتو) ..... خديجه شريف ... الف سلام بعدين يا كمال : حسين تميمى كان مع شنكل... تذكر لما شنكل حاول يجاريهو فى القرايه ... وفى الاخر شنكل عمل فيها عيان وإستجار بالكلينك. خالد غلام

خالد غلام وقرشي عمر وحافظ رضوان بجبروا الواحد يقر بدفعتو الحقيقية مع انو الناس هنا قايلني خريج الالفية الثالثة

Quote: وصال وزميلاتها .. استضافوني في غرفتهن .. كأحلى ما تكون الضيافة ..

وصال و اهلها استضافونا في بيتهم بالشقيلاب . . كأحلى ما تكون الضيافة
و ( نا ) هنا تسع تقريباً مساااااااااااااافة . . تبقى قدر مسالك الريدة
دي ( نا ) بزنس كلها على امتداد الدفعات الخمس المتجايلة زمانئذ


الف رحمة و نور تغشاك . . و تبشبش الطوبة التحت راسك يا وصال
خلفتي ألم فوق حد الاحتمال

Quote: الشباب سلامات ,,, أولا يا ود غلام شكرا جزيلا و انت بتعاملنى كأنى واحد من دفعتكم الرائعة الكانت علاقتى بيها اكبر من علاقتى مع دفعتى البيلوجية و البركة طبعا فى رحاب اختى و الحقيقة انا فوق ليكم بى سنة بس الان سعيد جدا انى انزل السنة ده كان تشيل شوية من الحمل التقيل بتاع السنين ده ,,,, فتح الرحمن وينك انت يا راجل بتذكر زمان كنت فى خلا السعودية هسه انت وين بس واقع الحال بقول انك فى منطقة فيها كهرباء و شبكة صاح ... هدى محمد احمد سلامات و كيف البنيات سعيد جدا بمعرفة كيفية التواصل معاك سامر حسن ليك حقيقى وحشة لو بتتذكرنى انا معتز عوض تحياتى لى كل الشباب الفوق,

معتز ألتي يا سنيرنا
سلامات يامان
قالوا الخلا ولا الرفيق الفسل
اها زهجت من بيضنة "الطيب عبد الله " قلت نطقش الخلا دا

مواصل الزول دا ؟
سمعنا قالوا استقال و بقى يهجن في السعالي . . و العهدة على خالد الامين
و في رواية قالوا بقى بتاع لبن . . قال زيو زي ( كفيلو السابق ) ما داك ببيع اللبن برضو و مسميهو " كابو " . .


----------------

سلامات يا معتز و تحياتي لمعتصم العربي و الصديقة رحاب ( التي ) كانت الذ زول في دفعتنا

سلام للبزانسه أينما حلت بهم الديار ومساء الخيرات عليكم جميعاً المتداخلون الجدد
سمريه والإيميلات التي وصلت من البزانسه الأعزاء كمال خالد ود. عبدالهادي والذين يقرأون منهم /هنُ
تحيات وشوق للجميع
العزيز قيقراوي
مع مراعاة ( عامل السن ) يعني يا ولدي ( بتنكت ) في الصور دي ( وبتوجع ) قلوبنا ليه ؟
غايتو ( أرتولي ) حارسنا وفارسنا دا رسلوا لي إيميله بسرعه. ( عليك الله يا محمد ما تقول لي حارس مرمي فاشل ) حرام عليك ياخ أرتولي دا كا ن ( بيتقطع ) ( ويتشحطط ) ( ههههههه ) علشان طبعا ( الجكس )
بيكون حاااااااضر ( الماتش )
الصوره تضم الهادي الرزين ولدنا معاذ الجنيد برضو الصور الفوق فيها الصديق العزيز ألماظ
وأعتقد هو متابع البوست لأني رسلت ليهو ( اللنك ) وأيضاً الأخ الفاضل الرشيد ( ألماظ والرشيد ) قابلتهم السنه الماضيه بحفل البلابل بنادي الضباط . ,أيضاً العزيزة وجدان خيري قبالتها صدفه بالخرطوم.
كونوا بخير جميعاً
مها

الاخوان محمد عبد الرحمن و سامر و فتح الرحمن الاخت مها
اصدقاء البزانسة و مشاركيهم فى صناعة الذكريات سمرية و زيكو و بقية العقد

هذا البوست بقدر ما يفتح نافذة فى الذاكرة فهو ايضا فرصة للتلاقي
و صلني ايميل من الاخ نجم الدين احمد عبد الله و من الاخ احمد جدعة

سنبقي هذا الخيط حيا الي أن يخرج كل البزانسة من جحورهم و يا قيقا انتو عندكم فرصة تتواصلوا مع بعض الناس لانكم لم تنقطعوا طويلا عن المكان و الزمان اما نحن الذين ذهبنا الي مهاجر و منافي اختيارية فلم يسعفنا الحظ بسماع الكثير من الاخبار و طبعا الذ حاجة يجيك ايميل من صديق و زميل ( وزميل دي ما بتاعة الجيهة الديمقراطية يا قيقا) و يقول ليك عسي ان تكون بخير و الاسرة طبعا كل النس علوا اسر عدي اسماعيل مرمار و شخصي الضعيف و ربما البعض..
يلا نصحي باقي الناس النايمة و نجيبهم هنا...
و تحاياي للطيب عبد الله ان كنت علي اتصال به يا قيقا
فى الحقيقة احي كل الاصدقاء عبر هذا البوست ان كانوا يقرأون و يلا نتواصل

ودي

بكري الجاك

تتذكروا محمد نور الشايقي زول صديق أحمد؟؟؟؟


شغال معانا في التراكتورات السودانية ومتابع

مواقع الجكس:

منى معاذ في دبي
رشا الكاشف في واحدة من دول أوربا مع زوجها
فتوش في شمبات وشغالة محاسب في شركة بالمنشية
سلافتين الطويلة والقصيرة في الرياض
هالة الله جابو استاذة بجامعة الخرطوم( مع عثمان سعد وياسر موسى)
آمنة عوض في أمريكا جاهم لوتري من سنتين
نهلة الشفيع جات السودان وسكنت الحلفايا وجضمت الماجستير




ونواصل

الزملاء والزميلات طلاب مدرسة العلوم الادارية بجامعة الخرطوم ....
بنحييكم وبنقول ليكم ..نحن بندين بشدة محاولات قمع الراى الآخر والابتزاز التى
تعرض لها الزميل سامر عثمان من قبل المدعو فتح الرحمن خلف الله ... فى محاولة
لارغامه واثنائه عن نشر الصور التى وعد بها .... ومن المنبر دا بنوجه رسالة
واضحة ومحدده جدا انو نحن حانستمر فى سعينا لتحميل الصور ورفعها هنا ...
ولن تسكتنا محاولات ا لارهاب والبلطجة التى يمارسها فتح الرحمن خلف الله ..


ودمتم ....

بزنس ياتا؟ السبعة اولاد و تلات بنات ولا واحدة تانية؟

كلام يا عوض دكام..خمس سنين في الجامعة ما شفتا لي فريق بزنس.. الشئ شنو كنتوا بتلعبوا (جمع المسافر) ولا شنو يعني.. قال بزنس قال..!
(مع خالص الإعتذار لأخونا كابتن سومي)

و بعدين..

كان يا خليل ، في ايامنا، تحدث حادثة شاكوش فجرا أو ضحى أو بليل بهيم ، الساعة تلاتة ، مع عالم الرياضة و الظهيرة ، تسمع خبرها منتشر.. و منها حكاية الحنكوشة الأدت قريبنا شاكوش..و كان سببها أنو الشاب بيكمل ليمون بيزنس قبال ما يوصل المين روود ( على الأجانب مراعاة فروق المسافات و كده)..

ناس بزنس..

يا احلى جاره..يا احلى جاااااااااااااره
عطرتي كل الدنيا و انتي مارا
وحياة حرير خديك وحياة نضارة
سالمينا لو بالعين أو بالإشارة
أو كما قال..

اقرأوا السلام نيابة عني لكل اهالي بيزنس (وصوني أحب لسابع جار ..و انت اول جار)
و سلام خصوصي..للآتي:
يوسف مساعد (سيدنا يوسف)
هشام سنجه
هاشم الطويل..
ليلى محمد على ( الحاج يؤسف له)..
ابراهيم عمدة هجانة..

بالمناسبة: صورة النجيلة الجابها قيقراوي شهدت أول اجتماع لمحايدي و محايدات كلية القانون (رماد كانون ولا القانون.. أو كما قال)..

و تاني شنو؟..يخي كباية ليمون (دبل طبعا) مع عثمان حسين..؟؟؟.. متعة الحياة..!!
و هكذا كان ناس بيزنس حاجة براهم كده..

محمد عبد الرحمن حبابك يا صديقي..
و زي ما قال ليك عبد العظيم حركة ( انتا رجع لي رسايلي) بنقول ليكم رجعوا لينا اصحابنا و صاحباتنا الكانوا بيقروا ( حاجة فيك)..اوع واحد يجي يقول لي ما حضرت الزمن داك..!!

قيقرواي دايرين لينا ركن فك دبرسة كارب ياخ..!!


و دمتم..

كبر

اخواني في بزنس هذه بعض كلمات وجدتها فيما تبقى من (هلاهيل) الذاكرة
وهي لزميلكم خالد كمية...ربما تشبة تلك الايام..


هل طيراًً يرفرفُ في حوافِ الماء
كان يسلم الاشياءَ ذاكرةً ...ام الكلمات كانت قبل صنع البحرِ ،امراةً تفتش في فضاء الجرحِ عن لغةٍ تلملم شملها المتناثر الاشلاء..
أم كنا معاً كحمامتين تراقبان الامر من دون اكتراث ...
متكومٌ في غرفة التحديق ..كان يلف خاطره بجرحك..
لم يكن أبداً بعيداً عن منالك ...
اِنما ناولته طيفاً ومخيلةً ونافذةً وماذا؟؟؟
هل ترى حزناً..
أم الاجراسُ أعلنت اِنتصارك..
غنه موتاً وبعه لفافةً ..كفكف دموعك واحتسبه دعابةً..
كل الدروبِ اليمةٌ وجميعهم يتوجعون من الرحيل...

خالد حسن بشير ((كمية))

صديقنا
قرشي عمر لعامل السن لم يستطع قراءة البوست .... سأقرأعليه ما ورد واوافيكم بما سيمليه علي


كونوا قريبين

يا كبر سلام جاك من بزنس
ناس القانون عندهم مكانة خاصة فى صدورنا نحن البزانسة و عساك بخير فى ازمنة الصقيع هذي و طولنا الغيبة

و ردني هذا الايميل من اخونا نجم الدين احمد عبد الله و هو متابع

Quote: ى العزيز بكرى الجاك ليك وحشة وجميع الزملاء الأعزاء مرسل لك صورة ابنى مجتبى الذى يشبه صفوتكم ونقاءكم وسوف أرسل لك صوركم الجميلة فى الجامعة أرجو رفعها فى البوست , مشاركة منى فى ائراء روح التواصل بين أجمل دفعة. Nagmeldin Ahmed Abdullah Finance Div. almajal Service Master almajal G4S

طبعا ما نزلت موبايلاتك يا نجم عشان مسألة الخصوصية وما الي ذلك و ان سمحت لي سا قوم بانزال تلفوناتك و نشر صور صغيرك اللماح


يا محمد عبد الرحمن اهو فى وعد بصور كثيرة جاية ارجو ان نبقي نالر هذا البوست حية و بالمناسبة مبروك الزواج انا يادوبك عرفت امك يممت وجهك شطر امرأة تشاركك الفرح و الترح فاتمني لك حياة سعيدة


سامر يا صديق الكل
احييك علي الاخبار التي تنقلها عن ابناء دفعتنا و هي بحق عظيمة و مفيدة و كم تنقلنا فى بلدان كان يمكن ان نلتقي

و تحياي لاخونا قرشي فى "خرفه المبكر" و عشان قرشي ما يزعل فتح الرحمن من بدري طلعني من المصابين بالزهايمر فكلنا فى الخرف سواءا

استمر يا سامر

بكري الجاك

Quote: و تحاياي للطيب عبد الله ان كنت علي اتصال به يا قيقا فى الحقيقة احي كل الاصدقاء عبر هذا البوست ان كانوا يقرأون و يلا نتواصل

ما لك علي ياخ ؟!
انا من فكيت درب الطيب " تُمَن " دا دربي اتعدل ياخ
ياخ يتواصلوا معاهو بي وين بيضون دا ؟ لما مشيت السودان اوآخر 2008 م حلف بالتكتحو ما يسلم علي ساي رغم حناسة مامون نافع ، و تدخلات شنكل ! . .

ياخ لو الطيب عبد الله دا ( الاب ) الروحي للدفعة ، يكون مامون نافع ( الام الروحية ) للدفعة دي و " المشروبات الروحية " تكون خالة الدفعة لزم
لا بالجد الام الروحية محجوزة خصيصاً لـ " إخلاص ابراهيم "
يا سلاااااااااام ياخ بالجد " الطيب حنين جد جد ياخ . . لكن مأمون كمان قلبو قلب أم بس
تتذكر يا سامر لما الطيب ( تمنة ) اقصد الطيب عبد الله ساق مامون و مشوا يترمرموا ، و شربوا ليهم " حليب " بايت ، قام مامون اتسمم ! . . و نحن في الكلينك ، ياخ الطيب دا دمعتو ما وقفت اصلو


--------------



يا محمد عبد الرحمن ياخ انتو مش ( السماعات ) دي بصرفوها للبزانسة في سنة رابعة ؟

اسي كمال اليمني دا شالا من ياتو سنير عشان يكشف لدكتور عبد اللطيف امام ؟

Quote: فى الحقيقة احي كل الاصدقاء عبر هذا البوست ان كانوا يقرأون و يلا نتواصل

يابكري راجع هنا http://businessofkhartoum.ahlamontada.net/forum.htm

و لو زرتونا كمان في http://www.sudansas.com/vb/############.php?f=2 تجدونا الضيوف و انتو . . . الخ المقولة البيض




------------

كبر حبابك و الله . . . لكن النسألك ناسك ديل خريجين بزنس كلية غردون التذكارية مش ؟


يا عمك انا تخصصي تنظيمات عاطفية ساي
لكن البوست دا فيو كادرين خطابة من العيار التقيل ( سامر و بكري ) ، و واحد فالصو . . وزن الريشة كدا . . البرلوم دا بي ورانا بكون شات ليو ركن ركنين كدا

فتح الرحمن، سامر، البرلوم محمد عبد الرحمن و بقية البزانسة المتابعون عن قرب و عن بعد

تحدثت قبل قليل مع الصديق اسماعيل مرمار وهو مقيم بمنطقة تقرب مني حوالي الساعة نصف بالسيارة وتشاورنا حول تكوين موقع علي الانترنت لخريجي بزنس دفعة 1995 و فى نفس الوقت يمكن اضافة خريجي الكلية من كل الدفعات، الموضوع سهل و غير مكلف وكل ما نحتاجه مجهودات الشباب لرفد الموقع بالمعلومات و عناوينهم و يمكن جعله بمثابة كتاب للخريجين علي الشبكة و بمناسبة كتاب الخريجين اسماعيل مرمار بيسأل يا سامر عن ماذا حل بصور و فكرة كتاب الخريج طبعا اسماعيل بيسأل السؤال ده كانوا الموضوع ده كان الاسبوع الفات

المهم فى الامر اذا الشباب فى كل بقاع الارض مرحبين بالفكرة فبامكاننا بناء الموقع و تاسيسه بشكل مبسط و من ثم تحتاج الي متبرع ليقوم بادارة الموقع فنيا و يقوم بتحديثة من وقت لاخر

ارجو ان اسمع ارائكم فى هذا الشأن...

و يا قيقا اتفق معك ان الطيب عبد الله و مامون نافع و اخلاص ابراهيم (و بالمناسبة دي وين مامون وو ين اخلاص) كانوا اباء و امهات روحيين لدفعتنا و ربما يشاركهم فى هذا الشرف البعض اتمني ان يكونوا جميعا بخير اينما كانوا

بكري الجاك

ياسلاااام على قرشى ياخ ...تعرف ياسامر الحلاوين بحبوا المال حبا جما ..
حاول اعمل خلفيه للبوست تكون عباراة عن جنيهات ولاريالات وتعال
بعد داك شوف نظر الحلاوى يبقى ليك عشرة من عشرة ..أسالنى انا من الحلاوين ديل...

تحياتنا لقرشى ...جادى جدية مزعجه ..تلقاهو لى اسى يقرا ...
**



شكرا يابكرى الجاك على التهنئه ... و اؤيد مقترح الموقع ..بس مايكون دفعة
95 بس ..خلوهو يكون لكل خريجى بزنس واى دفعة يكون عندها صفحة فى الموقع ..
فرز العيشة ماسمح ...بعدين ماشاء الله شايف الشباب التزموا بارسال الايملات ليك ...
لكن (لليل) ماجانى اى ايميل من اى شابة ..الحاصل شنو ؟ ......الشىء نحن خريجى الاسلامية
وماجايبين خبر ؟

سامر حسن تطير عيشتو
قرب يبقى جد وبرضو تقول ليهو كتاب الخريج ... أنا لما عملتو حفلة التخريج كنت مغترب تب وبقبض بالريال :):)


بالأمس تحدثنا أنا وحافظ عن نفس الفكرة واتضح انو محتفظ بنسخة بيانات الدفعة يللا حركو يا شباب

نجم الدين ... تتذكر السعودي أول فيزا الحلف يمسكك البهايم

فتح الرحمن ... اللبن بتاع ناس الطيب كان جيييت عشان كده الطيب بكى


أخبار الجكس

سوسن مكي ... بنك قطر الإسلامي - ش11 العمارات
ندى السمحة ... في خرطوم الله والرسول
هالة شعنونة ... ما عارف عنها معلومة
أماني إبراهيم ... الدمام السعودية
د. سلمى سيدأحمد جامعة النيلين

أخبار الرياييل

دال فيها:

الكولا ياسر جلك قرنوف خالد الرضي الطيب عبدالله (مامون نافع مشى البرير) أمير دفع الله والطاهر
سيقا رشاد عثمان وعمر قنديل


سليمان الشريف وعماد مبارك وخالد غلام ساكنين في الفتيحاب
مبارك مرات بظهر علينا وشغال تمام وقريب من أستاذ التجاني
ألتما في مكتب المبارك للمراجعة بعد ما خلص الزمالة ودايما "بيزي"
شنكل في الإتحاد الأوربي مستقر بالديم

أدناه صور ذرية أخوكم أثناء سباق الخيول ال1800 متر حواجز " ما عندو علاقة بسباق الهجن بتاع ناس الطيب "



دي أسيل بنتي الكبيرة



ودي أميرة الصغيرة



وده أحمد الأسد النتر


ونواصل

Quote: فتح الرحمن، سامر، البرلوم محمد عبد الرحمن و بقية البزانسة المتابعون عن قرب و عن بعد تحدثت قبل قليل مع الصديق اسماعيل مرمار وهو مقيم بمنطقة تقرب مني حوالي الساعة نصف بالسيارة وتشاورنا حول تكوين موقع علي الانترنت لخريجي بزنس دفعة 1995 و فى نفس الوقت يمكن اضافة خريجي الكلية من كل الدفعات، الموضوع سهل و غير مكلف وكل ما نحتاجه مجهودات الشباب لرفد الموقع بالمعلومات و عناوينهم و يمكن جعله بمثابة كتاب للخريجين علي الشبكة و بمناسبة كتاب الخريجين اسماعيل مرمار بيسأل يا سامر عن ماذا حل بصور و فكرة كتاب الخريج طبعا اسماعيل بيسأل السؤال ده كانوا الموضوع ده كان الاسبوع الفات المهم فى الامر اذا الشباب فى كل بقاع الارض مرحبين بالفكرة فبامكاننا بناء الموقع و تاسيسه بشكل مبسط و من ثم تحتاج الي متبرع ليقوم بادارة الموقع فنيا و يقوم بتحديثة من وقت لاخر ارجو ان اسمع ارائكم فى هذا الشأن... و يا قيقا اتفق معك ان الطيب عبد الله و مامون نافع و اخلاص ابراهيم (و بالمناسبة دي وين مامون وو ين اخلاص) كانوا اباء و امهات روحيين لدفعتنا و ربما يشاركهم فى هذا الشرف البعض اتمني ان يكونوا جميعا بخير اينما كانوا بكري الجاك

سلام يا بكري
نبدأ بالقلبة
مأمون نافع بقى مدير كبير في البرير ( كنتري سيلس منجر ) . كان لحدت الـ 2008 م كان ASM ساي في الكوكاكولا زي ناس ( الحاج ) خالد الرضي - حج السنة دي - المذكورين كما العهد بهم الا بقى عندهم قروش كتاااااااااااار . . الناس دي كلها متزوجة و بي عيالا . . الحاج ود الرضي عايش بموطنو بجنوب النيل الازرق كاب لملاذ و محمد و تالتة ما لقطت اسمها . .
إخلاص ابراهيم . . كانت بعافية شوية في التاريخ اعلاه . . أسفت جداً اني ما تمكنت الاقيها لضيق و شحتفة الوقت و انمحاق طاقة الشباب الكانت . . ايييييه يا عمك !
ياخ أمومة مامون دي في انقى تجلياتها بتسحب لمقدمة الذاكرة ايام المذاكرة و الشلال . . ما شلال السبلوقة لا ياخ ! معسكرات المذاكرة كانت في ربك ياخ في بيت ناس مامون . . شلال ياخ . . شلال احمد الزين يا راقل . . او في رواية مجيدة " شلال احشي لي " . . ياخ تجي احشي ل دي محبطة حد التعب . . يا عمك هي كلها كماها ؟! . . يا الله يا الله تجيب ليها كم عيشة و حق الزيت و الباقي نتمو موية ! . . موية فول و موي جبنة و موية بيض . . ما في اي رصة لتيمم الموية حااااضرة طوالي . . اها نحشي ليك موية الحاجات دي كيف ؟
شلال من اشطر الناس في دفعتنا . . صدق رغم انو في ربك القريبة دي ما اتلاقينا بعد آخر امتحانات في رابعة !! . . يعني من 95

اما بعد بخصوص الملتقى او المنتدى ، اؤيد كلام البرلوم الفاهم دا ، يكون مفتوح لكل الاجيال و الدفعات منذ التأسيس في 1986 م ، و يوثق لكل المراحل و الفترات .
الحبيب عوض محمد احمد سعد كان اقترح و قاد زمام المبادرة كلآتي :

Quote: أحبابنا البزانسة هذه دعوة للم الشمل من جديد فهلا تفضلتم وبكم وبآرائكم النيرة ومشاركاتكم يمكننا ان نتطور لمنتدى يليق بنا نحن البزانسة هذا منتدى محاولة للم الشمل أرجو من الجميع المشاركة حتى نرتقي للقمم http://businessofkhartoum.ahlamontada.net[/red]

خلونا نقلب افكرة ونتداول كل الاراء
انا مستعد ادير الموقع و عندنا تجربة متواضعة هنا : منتديات جمعية المحاسبين السودانيين بمنطقة مكة المكرمة - جدة
و ممكن تاخدوا في حسابكم انو نخصص لبزنس منتدى فرعي بموقع الجمعية او لو حبيتو تفرزوا عيشتكم في منتدى براكم ، السيرفر المضيف متوفر ، و التصميم بلاش و كل لدعم الفني ح يتفكل بيهو الصديق وليد الحسين و منتديات الراكوبة ، وهو بالمناسبة خريج علوم دفعة ناس محمد عبدلرحمن

---------

يا شباب سؤال في الدين : انتو في ترهاقا في سنة البرلم كنا ساكنين اربعة اربعة ولا خمسة خمسة ؟ اها يا عوض عشان ما تغالط تاني ، صعدنا الموضوع لمحكمة لاهاي

المنتدى جيد ياخ . .بس شنو كلو عوض محمداحمد . . عوض محمد احمد . . عوض محمد احمد
ذكرتني اتحاد علي بابكر في كوستي . . و دا فريق كورة درجة تالتة من ما انشأو عمك علي بابكر - وهو تمرجي - و لي اسيو ح يظل ليوم الدين في الليق . الاتحاد اسم شائع في تسمي فرق الكورة اتحاد مدني ، الاتحاد القطري ، اتحاد جدة " الإتي " .. الخ لكنلاتحاد الوحيد المسمى باسم زول هو اتحاد كوستي . لانو عمك علي بابكر هو رئيس النادي ، و المدير الفني ، مدير الكرة ، و مدرب الحراس و مدرب اللياقة .
مرة اتأخر في المركز الصحي و فريقو - فريقو دي ما مجاز - الاتحاد كان لاعب مبارة مصيرية ، اها اول ما جا سألم النتيجة كم ؟ قلوا يو مغلوبين تلاتة ! قال ليهم كويس حافظوا لى النتيجة

سلام يا ابوعويض
اها كدا عوضنا عليك ؟

شكرا يا قيقا علي المعلومات عن مأمون و اخلاص اتمني ان يكونا بخير

انا اقرأ تداعياتك حول الفول و موية البيض اذا بوجه شلالي يطل فى ذاكرتي بابتسامته الرائعة و "سفته" التي لا تخطئها العين... عساه بخير فى منافيه الاختايرية بربك

و بالمناسبة كلام المنتدي و الموقع شكلو فكرة عظيمة لكن محتاجين نواصل العمل هنا حتي نستطيع ان ننبش اكبر عدد من البزانسة من قبورهم الحياتية و جحورهم البعيدة

و يا فتح الرحمن وليد الحسين البتتكلم عنو الدفعة الورانا وعمل خامسة محاسبة اعتقد شوف لازم تلمني فى هذا الوليد .. فاذا كان هذا هو المعني فوليد زميل دراسة وسطي و ثانوي بحنتوب و صديق قديم و نعرف اسر بعضنا البعض و اهالي و اقارب كل منا، معرفتي به تعود الي اكثر من عشرين عاما.. فالرجاء ان تبلغة سلامي و ان تذكره بانني علي رغبة فى التواصل معه و سماع اخباره..

الي ان نأتي بالمزيد من البزانسة

يا سامر ما اجمل هذه العناقيد اتمني ان تسعد بهم و تراهم يكبرون و يصنعون الجمال اينما حلوا


بكري الجاك

Quote: , Dear Gagrawi Assalaamu 'Alaykum Warahmatullaahi Wabarakaatuhu. It's absoultly awesome and very impressive to read your comments in Sudanese online.com, I hope you be reading this email in the best of health, I man, and unending spiritual flows. It's been quite long time and I do not know what happens to you man!!!

شكراً د. عبد الهادي على الرسالة الرقيقة

Quote: Enlighten me with your news and preferably if you give me your contact number, I will possibly contact you sometime latter.

الـ contact number يصلك على وجه السرعة . . انا لاقيك وين ياخ ؟
و الله ايام يا زمان !!! . . بجيك برواقة بهناك
لي وكتها مبروك البنية ذات الشهر . . تربى في عزكم ياخ

اما عنا انا و ابو السا فبقينا خمسة و اشتعل الرأس شيباً و صلعا و الحمد لله



دا فادي & وعد . . . وجن ( المستقبل ) * بتبحلق من البعيد


--------------

المستقبل دا مسقط راسهن . . دا اسم المستشفى بتاع صلاح ادريس في جدة

Quote: Enock Email address is added to the list and he is currently living in the USA. Please check it out ([email protected]). As ever, Hadi

لمن يهمه الامر
دا زول جميل ياخ
شكراً على الهدية يا دكترة

Quote: . Give my warm greetings to all the excellent people from business around you. Before I am off, Have you got any contact details for Ashraf Gazali? I will be grateful if you let me know

بالنسبة لاشرف غزالي ما متوفرة لي اي معلومات عنو بعد 2000 م وكتها كان بحضر للدراسات العليا في جامعة الملك فهد للبترول و المعادن

يا برلوم نعمل ليك إحالة لطلب د. عبد الهادي دا . . مع نسخة كربونية من ردكم لايميلي . . سامع ؟
اما التحيات فقد قمنا بإجراء اللازم مع فائق الشكر و التقدير و لكم تحياتنا

عنهم / الزعيم قيقا البيروقراطي

يافتح الرحمن ...

الدكتور ارسل ايميل مشابه ووعدته بالرد عليه كما وعدت ودالزين ووعدت
صاحبنا جوده بشرى برضو بالرد على ايميل ليهو قريب شهر كدا ..( شفتا الروحا دى) ..
و عندى زى (خمسطاشر) التزام سابق بالتواصل مع آخرين ولم اوفى بأى التزام
منهن ....

فأعذرنا ياهادى وتوقع تلفون طويل .....

ماشاء الله ربنا يحفظ الأطفال الحلوين الشرفوا ونوروا البوست

إيميل مهم من الصديق ألماظ :


والله مشتاقين وطبعا البوست دة لفت انتباهي ليهو واحد زميلنا في المكتب وبالجد متابع المجادعات بتاعتكم دي من حوالي اسبوع , وكنت اتمني انو يكون عندي اشتراك في المنبر عشان ندلو بي دلونا لكن العين بصيرة
فرجاءاً لازم تجيبي سيرة الكورال الضارب بتاع بزنس الكنا بنعمل بروفاتو في النجيلة, وكيف كان الموسيقار حسن عثمان بيموسق الالحان ومها ووفاق الناير طبيعي زايغات مننا لان عندهم مشوار ضروري

وطبعا الاغنية المختارة كانت (عازة في هواك) علي ما اذكر


ولك كل الود
ألماظ

العزيز ألماظ
جيب لينا ( الموثيقار الشاعر حثن عثمان ) وشوف الرابط الفوق بتاع موقع ( البزانثه )

في لمه فاقداك ( بث ) ح تكون يوم الأحد ( محمد زين والبرلومه جيهان ) معزوم معانا ولو في طريقة ( أخطف ) رجلك للندن وشرفنا.
( الكلام دا بلسان منو ؟؟؟ ) ههههههههه

أي كورال في الدنيا دي بيغني ( عازة في هواك ) لما عازه كرهت الهوي زااااااااتو ( هههههههههه )

Quote: السيد فتح الرحمن كيف الامور والحالة عموم والاولاد. شيفك يااخوي بقيت زول (اسفيري يعني الواحد لو فتح كمبيوترة يلقاك قاعد طبعا تابعت معاكم اجترار الذكريات في الايام السابقة وما قدرت اتداخل معاكم لاني كنت مشغول بترشيح نفسي لرئاسة الجمهورية يعني بلغ الشباب سنجعلهم مستشاريين كل في مجاله طبعا ده بعد الفوز في الانتخابات عشان بلغ اخونا عبدالجليل هجو قوليهو يا معلم المشاكل كلها ح تنتهي وما في داعي تاني للغربة مع خالص التحايا علاء الدين

ابو الشناكل يااا
It's absoultly awesome and very impressive to to hear from you after so long

و الله و لا لونق و لا شيتين - انت آخر زول لاقيتو في كل لشباب ديل - لكن قلنا ساي نغز عودنا في لانقليزي دا
ياخ بمناسبة الانقليزي دا ، متذكر ليك يوم رأس سنة 1996 م ، في بيت بشير الناطق الكنا ساكنين فيهو شبه غفراء كدا ! بون ايجار و بالتفاصيل الآتية :
- الطيب عبد الله . . خريج . . استاذ خدمة الزامية . . المرتب حوالي 12000 جنية بالقديم طبعاً، خالص الدمغة و الضريبة.
- علاء الدين شنكل . . خريج . . موظف بمنظمة أمل . . المرتب غير معروف ، و قيل بلاش عديل !
- فتح الرحمن الزعيم . . طالب خامسة . . مقشط و غير ملتزم بالذهاب اليومي للجامعة .
- الهادي خوجلي . . طالب خامسة . . برضو مقشط . . الا جادي جداً
مع الفلس دا ، و عشاء ذاتو ما متعشين كويس اذا بنا نصحو على :
Oooooooooh my god... happy new year
لما رفعنا روسينا لقيناك براك و مولع ليك شمعة !!
كلنا قلنا ليك يا شنكل قوم نوم ، و خلي المعط البتسوي فيهو دا ! . . هو من السنة الفاتت بايتين القوى تجي السعادة من وين يا حسرة ؟!!
لسة بتسمع سميرة دنيا كماالايام الخوالي ؟
ودي معطتك التانية . . ديامية النكهة ، و برضو العزابية و الفلس القاسم المشترك بينن و بينا
صاحبي شرف كيف ياخ ؟





دا شنكل يا بكري الجاك ( شوف فعل السنين !! ) . . و الجلابي المعاهو دا شرف الاهلية البلعلع فوق دا
انا و شرف دولابنا كان واحد . . لكن علاء الدين و د حمد دا كان دولابو و لا بنسد
شنكل شمعة تحترق من أجل الآخرين ياخ


شنكل و الصديق عضو البورد ياسر بيناوي

--------------

سعيد يا ابو الشناكل ياخ
لكن شوف تصنيفك - على اسكيل البطل - هنا : المقال على مسئولية قارئه .. وبيض مسلوق لكل مخلوق ! .. مصطفى البطل

Quote: الصنف الرابع من القراء، وهو القارئ المِعيان او القارئ السحّار، الذى يقرأ ليسحر الكاتب،

و شوف تصنيفك كمترشح رئاسي - على اسكيل آمنة مختار - هنا : متآمرون على الديمقراطية ..

Quote: مواطن صالح جداً لكن مسكين قدم اوراقو للترشيح للرئاسة ، اللجنة شافتوا كدا شكلو آسف قالو ليهو داير شنو يا زول ؟ قال ليهم : داير اترشح رئيس قالوا ليهو : انت مجنون ؟ رد باستغراب : ليه هو شرط ؟ يبدو انو شرط اساسي !

انت ما قلت ما ختيت ليها لقدرها لكن بتتعامل معاها بي ترف مش
يا عمك كذبت اغنيتي و صدقت الخريف ! . . يا ليتني صدقت اغنيتي و كذبت الخريف . . . او كما قال
الخريف كاذب و مخاتل جداً . . ابقى عشرة على اغنيتك
و كن كمامنتهى الجمال دوماً

فتح الرحمن قيقا

شكرا لابقائك نار هذا البوست حية و شكرا لايقادك لما انطفأ من رماد الذاكرة
علي ما اذكر انني زرت منزلكم فى الديوم بل انني متاكد من الواقعة رغم اني لا اذكر التفاصيل و الكيفية و الوجوه

و بما أن شنكل من القراء و المتابعين

يا شنكل عساك بخير و يبدو أن الزمن قد بدأ يفعل افاعيله فيك و قد بدأ النرجس يعتلي رأسك و اصبحت من الذين علي رؤؤسهم زهر ابيض و لكن كما قيل قديما هو محض مؤشر للحكمة و الوقار
وهذا ما يؤكد استعدادك للترشح لمنصب رئيس الجمهورية و صدقني ليس بمكن حكموا هذا البلد حتي الان بمن هم اكثر تأهيلا منك او اكثر وطنية منك بل علي العكس انت افضل منهم جميعا
علما و معرفة و التزاما باولويات الناس .
و سيروا و نحن من خلفكم سيدي الرئيس


يا برلوم البوست ده استلموه السنايرفزي ما انت شايف مها و قيقا و شخصي الضعيف مبرطعين فى غيابك

و سلام لكل البزانسة و يا قيقا لو عندك تواصل بوليد الحسين فمدني بمسالكه

بكري الجاك

Quote: فرجاءاً لازم تجيبي سيرة الكورال الضارب بتاع بزنس الكنا بنعمل بروفاتو في النجيلة, وكيف كان الموسيقار حسن عثمان بيموسق الالحان ومها ووفاق الناير طبيعي زايغات مننا لان عندهم مشوار ضروري وطبعا الاغنية المختارة كانت (عازة في هواك) علي ما اذكر ولك كل الود ألماظ

الماظ الجندي كيفك ياحبوب

يلا ندي ليك البرلومة مها رأس الخيط و خليها تلتقط . . .
صورة من تاريخ الكورال . . .



رشا الكاشف . . سامر حسن . . ايمن عائدون
و واحد متخبئ والناس ماشايفنوا ؟ . . .
يلا ساعدونا بالاجتهاد في كشف هوية المتخبئ



المصير
اهداءات الاغنية :
الاغنية : لرشا الكاشف . . لطالما ابدعت في اداءها في الايام الخوالي
و اداء سميرة دنيا : للحبوب ود الحِبيب علاء الدين شنكل نفحنا الله بعلمه و شنف آذاننا بسلامة ذائقته الغنائية و حسن اختياراته رفيقاً
و لروح الراحل المقيم عثمان حسين شآبيب الرحمة سابغة

Quote: و يا فتح الرحمن وليد الحسين البتتكلم عنو الدفعة الورانا وعمل خامسة محاسبة

الظاهر انو في اكتر من وليد الحسين واحد !
وليد صاحبي و صاحب ( منتديات الراكوبة ) خريج علوم ( سادة ) . . علوم الله و رسولو دي ، ما علوم إدارية
و بعدين هو من السوكي
هو في الحقيقة ( الحسين ) جدو الرابع . . فاميلي نيم ؤ كدا يعني
بس وليد الحسين ( محاسبة ) الدفعة الورانا دا ما قدرت اتذكروا
اها دا الزهايمر البنخاف منو ذاااااااتو



---------------

ظهر اليوم اتلقيت تلفون طويل و جميل من ابو عبيدة الشخيت من الامارات . . .
رشاد عثمان بهناك اليومين ديل
و حسن عثمان ح يشرفهم بكرة مع العائلة
بالمناسبة توفى والد حسن عثمان مؤخراً . . ابو عبيدة وعدني بارسال تلفونات حسن عثمان
ح ارسل ليكم تلفون ابو عبيدة على اللستة

يا قيقا
الزهايمر براهو هين لكن ما تبقي عليك و اشتعل الراس زهرا و زهايمرا

انا كنت بتكلم عن وليد حسين و يبدو انه تشابه اسماء

تحاياي للشخيت و رشاد

و احر التعازي لاخونا حسن عثمان فى فقد والده: التقيته حينما قضيت اكثر من ليلة فى منزلك الاسرة يالحاج يوسف.. اتمني ان يتقبله الله قبولا حسنا

بكري الجاك

لعمنا عثمان الحسن والد حسن الدعاء بالرحمه والمغفره وان يجعل الله
قبره روضه من رياض الجنة ..التقيته اكثر من مرة على مائدة افطار رمضان
بمنزلهم بالحاج يوسف ...والتعازى موصولة للاخ حسن والاسرة ...
**

يابكرى الجاك ...

البرلوم رايح روحة عدوك ...انها( المراسيل) ياصديقى لاتدع لنا وقتا ...
الغربة دى بقدر ماهى طويلة... زمنا برضو (ممحوق) ...و(ابشرك) زميلة
واحدة رسلت لى مافى ..لله الحمد من قبل ومن بعد ...

وفيما يخص منزل الديم وعلاء شنكل وشرف الاهلية ...فقد ارتدته فى يوم
جمعة من جمع الخرطوم (المملة) ..وذبح (عمبلوك) على شرف حضورنا
و(لا اصلو كان مضبوح ماعارف) ... و غنى لنا شرف كما لم يغنى من قبل
وخصنى بأغنية (بتجيد اللطام ) ..واعجبك ..عرضتا فيها كما لم اعرض من
قبل ..لولا ان الجوع كان قارس و ان عهدنا بالشيه و(الشطوط) قد طال
لقلت لك ان غناء شرف فى ذلك اليوم كان اجمل مافى ا لجلسة ...لكن اظن
ا ن الشيه قاسمته الجمال .... و بكون شرف طبعا (كره ) اليوم اللماهو فى علاء
شنكل .. اصبح كل من يريد ان يتزوج من ال بزنس يتصل بشنكل ليتصل
بشرف ليحيى الحفل ....وطبعا فنان معرفة ..يادوب كدا يطلع ليهو حق العازفين ..
وامتد الامر لاقارب ال بزنس ...وعندما اردت التجهيز لحفل زواجى بحثت
عن شرف ليحى الحفل واخبرونى انه هجر الغناء ..( يمين بالله عاقل ) ..
ياخ دا غنى لى اخت الطاهر وبت خالة الطاهر وللطاهر ذاتو ... وكل حفلات
ال ارتولى دى مابتكون غطت (حق حفلة واحدة ) ...

سلام مربع لالماظ الجندى ...واخر عهدى به بوكس كنانة والتوصيل الملح ...
طبعا بكون بقى مدير كبير لى اسى ...تانى حاجة الماظ الجندى زول حبوب ياخ
وغناى ..بس انت شوف اقرب جردل و اشتغل ليهو بتاع ايقاع واسالو بعد داك ...
سلااام ياااخ ...

للجميع :
محمد عبدالرحمن البرلوم، وفتح الرحمن خلف الله الشهير أسفيريا بقيقراوي ،وسامر حسن وبكري الجاك ،ومها عبدالله وزيكو ونادر ابوكدوك وللمتابعين ابوعبيدة الشخيت وابوالشناكل ومحمد الزين ونجم الدين ووليد وكمال خالد وقرنوف وعبدالهادي خوجلي والطيب عبدالله وآل نافع، والرحمة لعمنا عثمان الحسن والعزاء لحسن ، وللجميع لكم تحياتي واشواقي العطرة ونسأل الله ان يكون بوست البرلوم محمد نواة لقروب بيزنس علي النت ، ومتابعين معاكم


يافتحي : صورة الميدان الشرقي دي الناس قالوا لي دي بتشبه صور السبعينات زمن الشعر المنكوش والشارلستون.

Quote: لقروب بيزنس علي النت

فكره جميله

صداح إزيك وينك يا مان من ديك و عيك

يا أبوكدوك أزيك ومشتاقين، والله انا بقترح من هذا المنبر انو نخطو خطوة للامام فقروب بيزنس علي النت خطوة لتجميع الذكريات والشخوص والاماكن وحتي فرصة لتجميع الليمون وقشرو وأنا بأرشح الاخوان (والترتيب حسب السن )نادر ابوكدوك و فتح الرحمن خلف الله وابوعبيدة الشخيت ومحمد عبدالرحمن عشان يكونو نواة ويالها من نواة لهذا المشروع ولا ايه رأيكم ياشباب.

صداح وراق ياخ مشتاقين و الله
وينك يا رجل ؟
سائلين عليك و الله

Quote: يافتحي : صورة الميدان الشرقي دي الناس قالوا لي دي بتشبه صور السبعينات زمن الشعر المنكوش والشارلستون.

الحالة عفيناكم من صورة " دار العاملين "






-------------

جاهزين يا ريس لاي حاجة تتفقوا عليها بخصوص منبر البزانسة . . و على طاري القروب ، ممكن نضيف فكرة قروب في الفيس بوك
هناك بنضمن مشاركة اوسع
و لا كيف ؟

سلامات كتيرة يا مان

Quote: وعندما اردت التجهيز لحفل زواجى بحثت عن شرف ليحى الحفل واخبرونى انه هجر الغناء ..( يمين بالله عاقل ) .. ياخ دا غنى لى اخت الطاهر وبت خالة الطاهر وللطاهر ذاتو ... وكل حفلات ال ارتولى دى مابتكون غطت (حق حفلة واحدة ) ...

قال عاقل قال !!
برضو بحيي في سنن البرامكة لاحظ ( السبيل )


-------------

رحم الله عمنا عثمان الحسن رحمة واسعة و ابدله دار خير من داره الدنيا و اهل خير من اهله
عمنا عثمان قضى حياته عاملاً في السكة حديد عبر مشوار مديد و عامر بالتجارب و العبر ، ربنا يعوضو الجنة و يصبر آله و ذويه
و خالص التعازي للعزيز حسن . .
لمن لا يعلم الراحل شقيق كل من الحسين الحسن و د. تاج السر الحسن

كان في نهايات العام 2008 م ان انتقل الى جوار ربه العم د. تميمي والد حسين تميمي ، الف رحمة و نور تتغمد ارواحهم و اسكنهم الله عالى الجنان بقدر عطاءهم الممتد و اياديهم البيضاء . . و تبقى ذكراهم و البركة في ذريتهم و فيكم كلكم

اخبار جميلة يا بزانسة :
قولوا :

Quote: Dear Friends, I am writing to inform all of you that, today; I received the results of my final CMA exam. Al Hamdullah I passed. Proud to add the three letters of CMA to my name. All the best to all of you… Kamal Khalid, CMA

انا دا Proud بيك يا كيمو يا حبيب
هن تلاتة حروف نصاح ؟
عاين الموسيقى دي :
Kamal Khalid, CMA



و ادفر لي قدام