حيوان صورته بكاميرا موبايلي مساء اليوم شرق نبتة (صورة)

قي طريقنا من الحاج يوسف الي ام القري اقترحت زوجتي عن طريق الهزار
اننا نجي بالطريق الخلوي البيمر غرب نبتة، قالت احتمال نلقي وحش، باعتبار
ان المنطقة دي هي البدت فيها ظاهرة الوحوش..
جنوب غرب نبتة لقينا تجمع من الأهالي في الفسحة، سالنا بعض الأطفال، قالو لينا في وحش.
اتجهنا لمكان التجمع ، لقيت حيوان مقتول، شكلو شبيه بالكلاب الأوربية..ضخم..ومغطي بصوف كتير..
وصدره اعتي من كلابنا العادية، وحجمو كبير، فاخدت ليهو الصورة دي:

It looks like a coyote which could be found throughout South Sudan. It is called Gol in Dinka.

هذا يسمى الذئب الابيض يتواجد في الاماكن الجبلية

Quote: سالنا بعض الأطفال، قالو لينا في وحش.

شكلو كلب عادي

الأخ علاء سلامات

Quote: قي طريقنا من الحاج يوسف الي ام القري اقترحت زوجتي عن طريق الهزار اننا نجي بالطريق الخلوي البيمر شرق نبتة، قالت احتمال نلقي وحش، باعتبار ان المنطقة دي هي البدت فيها ظاهرة الوحوش..

يا خوى زوجتك المصون كان معاها رشاش وله ما بتخاف وله الحكاية شنو؟

عديل كده تفتش على الوحش فى خلاهو

Quote: It looks like a coyote which could be found throughout South Sudan. It is called Gol in Dinka.

أظن التسمية هى قيوط يازكريا وطبعا الاسم والحيوان دا غير معروف على الاقل فى الخرطوم وماحولها ..

QUOTE]

Quote: It looks like a coyote which could be found throughout South Sudan

[/QUOTE.
اخ زكريا ، شكرا علي المعلومة والمرور، حقيقي هو حاجة اضخم من الكلاب العادية..


اخ امير

Quote: شكلو كلب عادي

فعلا شكلو كلب عادي، لكن ضخم، وما بيشبه كلابنا السودانية الجيعانة ديك،
المسافة بين جسمو وراسو طويلة شوية وضخمة، ومليان صوف كتير..

حسن حماد:

Quote: عديل كده تفتش على الوحش فى خلاهو

الشلاقة يا خوي..وانا اتابعها كمان...



اخ عبدون:

Quote: وطبعا الاسم والحيوان دا غير معروف على الاقل فى الخرطوم وماحولها ..

فعلا عبدون، انا شخصيا اول مرة اسمع بالأسم دة،
لكن السؤال بيكون:

من وين جات الحيوانات دي؟؟

بغض النظر عن نوعيتها..
انا لحدي يوم امس كنت بين شك وظن..لحدي ما شفتو (وجها لوجه)..

بتبقي مسؤولية منو متابعتها وومطاردتها واصطيادها؟
ووصلت الخرطوم كيف وليه، ونقدر نطردها كيف؟
ونمنع ظهورها تاني كيف؟

Quote: "التيار" كشف مدير إدارة الحياة البرية اللواء محمد سراج فضل الله عن أنّ الوحوش التي روَّعت مواطني ولاية الخرطوم مؤخراً مجرّد كلاب استوردها أحد التجار بغرض بيعها داخل البلاد، لكن العملية فشلت ولم يستطع التاجر إطعامها فأطلق سراحها. إلاّ أنّ اللواء محمد سراج لم يكشف اسم التاجر. وأضاف اللواء محمد سراج أنّ الكلاب الضالة لم تحدث إصابات في البشر إلاّ أنّها قتلت عشرين حيواناً أليفاً. واعتبر اللواء سراج أنّ وزارة الثروة الحيوانية مسؤولةً عن هذه الكلاب لجهة أنها حيوانات أليفة. جاءت تصريحات اللواء سراج في برنامج بثّته عصر أمس إذاعة ساهرون الناطقة بلسان حال الشرطة. وفي ذات السياق أكّد البروفيسور محمد عبدالله الريح مدير مركز البحوث بجامعة الرباط الوطني أن العينات التي فُحصت جميعها أبانت أنّ هذه فصيلة من فصائل الكلاب، داعياً وزارة الثروة الحيوانية بإلزام كلٍّ من لديه كلب أن يكون له ملف بالوزارة ويتم تطعيمه دورياً ومنعه من الخروج ، مناشداً المواطنين بالتعامل معها بحذر.

علاء الدين
حسب هذا الخبر الوارد في جريدة التيار يتضح أن هذه الكلاب مستوردة من قبل أحد تجار الكلاب
بس من أي دولة غير معروف وإسم التاجر الذي إستوردها كذلك لم يصرح عنه
الظاهر أن بعض الناس في السودان عملت ثروات ضخمة فأصبحت ترغب في شراء الكلاب المستوردة (محترفين) لحماية هذه الثروات لأن الكلاب المحلية غير مدربة التدريب الجيد

Quote: استوردها أحد التجار بغرض بيعها داخل البلاد، لكن العملية فشلت ولم يستطع التاجر إطعامها فأطلق سراحها

بس كدا !!!

كيف إستوردها؟ وعلى آي مواصفات ؟ ولماذا تم إستيرادها ؟؟

كيف أطلقها في الخرطوم كدا بدون ترتيب ولا تصديق ولا ............ ؟؟؟




نطالب بفتح بلاغ ومحاكمه شفافه في هذا الفساد على أعلى مستوياته ..

فترويع الآمنين في سماء الخرطوم لا جدال فيه ولا محسوبيه !

إنه الفساد الفساد الفساد ....

وآمنهم من خوف ) صــــدق الله العظيم



هشام

Quote: الوحوش التي روَّعت مواطني ولاية الخرطوم مؤخراً مجرّد كلاب استوردها أحد التجار بغرض بيعها داخل البلاد، لكن العملية فشلت ولم يستطع التاجر إطعامها فأطلق سراحها

أشكل خبر

طيب لو واحد قرر إستيراد قراد

شنو دور ومسئولية وزارة الثروة الحيوانية من مسألة ( قريص ) الجمال


ها ها ها

هو هو هو

سودان ده

Quote: يتضح أن هذه الكلاب مستوردة من قبل أحد تجار الكلاب

Quote: لكن العملية فشلت ولم يستطع التاجر إطعامها فأطلق سراحه

والله يا عبدالرازق دة الذ تبرير..
الله يستر واحد ما يستورد (أسود) وتقوم العملية تفشل...!!!!!!ههههه

تحدث البروفيسور محمد عبد الله الريح لقناة الشروق في أخبار التاسعة مساء الأمس حول هذا الموضوع، مؤيداً مقولة أنها كلاب من فصائل غير موجودة بالسودان ولكنها توالدت مع الفصائل المحلية وتولدت منها فصيلة هجين، وبسؤاله عن كيفية السماح بدخول الكلاب المستوردة للبلاد وعدم متابعتها بعد ذلك قال بأنه يعرف بعض الأشخاص الذين استوردوا كلاب من الخارج ولكنهم لم يتمكنوا من الاستمرار في تربيتها لأنها مكلفة كما أوضح بأنه يمكن أن تكون الكلاب مشتراة من الداخل من الشرطة حيث انه يتم بيعها لمن يرغب فيها، بافتراض صحة ما ذكر، يظل السؤال الذي كيف تمكنت كل هذه الكلاب من التجمع في مكان واحد والهجوم على العاصمة في وقت واحد؟ ولماذا لا تتم محاسبة من استوردها أو اشتراها من الداخل وتحميله مسئولية أي أضرار أو خسائر نتجت عن ذلك!

Quote: يظل السؤال الذي كيف تمكنت كل هذه الكلاب من التجمع في مكان واحد والهجوم على العاصمة في وقت واحد؟ ولماذا

عبدالرحمن سلامات..
انت قتل الكلاب..وكتين يفشلو في بيعها حرام؟؟
ما يقتلوها قبل ما تتحول لوحوش تقتل الناس!!
ولا خلاص الحنية قاتلانا؟؟

سلام أخي علاء الدين
بصراحة أصبح الإهمال واللامبالاة فضلاً عن التسيب ديدن الحياة في السودان، لاننا حتى إذا افترضن فعلاً صحة القول بانها كلاب أو غيرها ألا توجد جهة رقابية في العاصمة تتابع أي (تحركات)!! ألا يلفت نظر المسئولين سواء شرطة أو غيرها (تحركات) جيش جرار من الحيوانات و(غزو) العاصمة نهاراً وليس ليلاً، ولكن الشيء بالشيء يذكر وما (غزو) أم درمان ببعيد، لك الله يا وطني ورفع من قدرك حتى لا تتواصل سخريتنا امام خلق الله

بل اين هيئة المواصفات والمقاييس...؟
فالحين في قياس اسمنتينا؟؟؟
ومنعه من الدخول؟

هسي الكلب دا ما واضح مخالف لمواصفات الكلاب السودانية؟؟؟

وما هو دور شرطة حرص الصيد؟؟؟ أليس هو المحافظة علي الحيوانات البرية
من الصيد الجائر؟؟؟ وكلب اجنبي يقتل بدم بارد ناحية نبتة؟؟؟؟

وهل هذا الكلب القتيل مقيم؟ أي لديه اقامة سارية؟؟؟

كل هذه الاسئلة وغيرها نوجهها للمسئولين علنا نجد اجابات شافية؟؟؟


غير : ليس من اختصاصنا

Quote: وكلب اجنبي يقتل بدم بارد ناحية نبتة؟؟؟؟

هسي الجماعة يجونا طايرين

Quote: الوحوش التي روَّعت مواطني ولاية الخرطوم مؤخراً مجرّد كلاب استوردها أحد التجار بغرض بيعها داخل البلاد، لكن العملية فشلت ولم يستطع التاجر إطعامها فأطلق سراحها

انا كنت فاكر استوردها دكتور خليل كما اورد احد الزملاء هنا


امة ضحكت من جهلها الامم

استهتار بامن المواطن
يجب محاسبة المتسبب ...



اذا كان هنالك فعلا متسبب !!!

Quote: اذا كان هنالك فعلا متسبب !!!

Quote: انا كنت فاكر استوردها دكتور خليل كما اورد احد الزملاء هنا

تعرفو يا مساعد ويكوتش..
احلي ما في بلدنا (الدهشة)
تندهش بالحدث..
وبعدو تندهش بتحليل اسباب الحدث..
وتندهش بتحليلات المسؤلين..
وأكثر الإندهاش بيكون لمن المسؤول المفروض ياخد (آكشن)، يكون بيقترح..زينا زيو..
انتو بالمناسبة كاتب اغنية وردي (امتع نفسي بالدهشة) منو؟
قطع شك سوداني أصيل ما (هجين)..

شكرا ابومهند..
عليك الله وين اتكتل الذئب دة؟

علاء الدين
سلامــات
يعنى بكرة نتابع جريدة الدار ؟

السلام عليكم ورحمة الله جميعاً

Quote: انتو بالمناسبة كاتب اغنية وردي (امتع نفسي بالدهشة) منو؟

الاخ علاء الدين
كاتبها الاستاذ الراحل عمر الطيب الدوش




غايتو قصص الحيوانات المتوحشه دى ما جديدة
وبالضبط بالضبط كده من 89 شغالة قرف في
السودان .


والمثل :- البيلد المحن لابد يلولي جُهاِلن

صحي حيوان!

ارفعوا أقلامكم الحاقدة عن الكلاب الإسلامية المستوردة يا مناضلي الكيبورد...


بالمناسبة:
حقو نرفع شعار نتعامل بيهو كلنا في السودان مع ما يجري من أشياء مدهشة
من حولنا ونسميهو:
Take it easy
عشان ما نغلب روحنا ونحرق أعصابنا في البلد العجيب ده ونتقبل كل ما يحدث بصدر رحب..
دي بلد مرميّة ما بتترفع...

Quote: يعنى بكرة نتابع جريدة الدار ؟

معاوية لكن جريدة الدار اتملت صور

Quote: الاخ علاء الدين كاتبها الاستاذ الراحل عمر الطيب الدوش

شكرا نابري..لكن يكون كان بيعلم الغيب..
نتمتع بس..

.

يا علاء.

الشيخ فرح ود تكتوت قال: اخر الزمان السفر بالبيوت و الكلام بالخيوت.

تمامة كلامه الماعرفنها الناس: و يحكمونا العنكتوت و بالكلاب بنموت.

ما تسألنى العنكتوت دا شنو.



.

انشاء الله يكون واحد منها مسعور ويعضى لينا الطالح محمد الطالح!
جنى

..
..



ينبغي الاعتناء بهذه الحيوانات و قتلها اذا تم اثبات انها توذي أحد الناس بشكل رسمي... فأذا علمت جمعيات الرفق بالحيوان بذلك فسوف لن نفلت مِن المسألة القانونية.

الاخ علاءالدين
هذه النوعية موجدة في منطقة الخليج وتكثر في الامارات,, تحديدا هذه الصورة للذئب ماخوذة من موقع اماراتي تقول القصه انه قتل في احدى الامارات من كم شهر,,, ما بعيد يكون التاجر السوداني باعوها ليهو على اساس انها كلاب صيد او حتى دوبرامان .,,,لوووول

Quote: ما بعيد يكون التاجر السوداني باعوها ليهو على اساس انها كلاب صيد او حتى دوبرامان .,,,لوووول

شكرا علي المعلومة يا ابو مهند..
نحنا يا كافي البلا.. حتي في الكلاب يغشونا؟؟؟

Quote: لكن العملية فشلت ولم يستطع التاجر إطعامها فأطلق سراحها

التاجر دة أكيد تاجر غشيم كان ممكن يبيعها للصينيين أو يستبدلها ببراميل نفط (النفط مقابل الكلاب)
ولو طلب الكباب أو الشية إنخفضت أسعارها خلال الأيام القادمة في سوق ستة أو سوق أم دفسو
تأكدوا أن عددها كبير
الحذر واجب

شاهد العيان علاء الدين

كيفك

يبدو من الصورة التي التقتطها بان الشكل كالاتي ( يا كلب الله راضي عليهو يا مرفعين الله غضبان عليهو)

والله تحيرنا ذاتو






بالجنبة
بحكم انك جارنا وكدة اسعار الاراضي كيف عندكم في ام القري

الاخ علاء

تحياتى

ماشاء الله زوجتك عندها الحاسه السادسه

المره دى وحش وانشاء الله الجايه كنز بس ما تنسانا


مودتى

القناة السودانية تعرض قبل قليل مقتل (حيوان) بأمدرمان
بعد اعتدائه علي طفل.....


عااااااد لمتين يا خوانا؟؟