Post: #1 Title: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) !! Author: نادية عثمان Date: 01-02-2010, 03:02 PM
عندما يتجرأ رجل سوداني من فئة ( المشاغلاتية ويعاكس امرأة أو فتاة أعجبته في الشارع ففي العادة يطلق عليه ( صعلوق بتاع مشاغلات)
والصعلقة في إبداء الإعجاب بكلمة غزل أو مشاغلة لا تعد سلبية تماماً بحجم صعلقة التحرش بالنساء لفظاً وفعلاً !
وفي الحقيقة وليس إنحيازاً لابن بلدي الرجل السوداني بقدر ماهي شهادة حق فالسوداني مهذباً حتى في صعلقته !
هذه حقيقة وبمقارنة موضوعية لشكل المعاكسات وكلمات الغزل التي يلقيها الرجل السوداني على مسامع الفتاة
في بلدنا وحتى خارجها وبين معاكسات بعض رجال الشعوب الأخرى ( مصر) مثالاً نجد أن الرجل السوداني يتسم بالتهذيب
في اللفظ والفعل ولا يتجرأ على المرأة بما يخدش إنسانيتها ويتسبب في جرحها وإهانتها بشكل بالغ !
مثلاً :
رجل سوداني يشاغل فتاة أعجبته فيستخدم عبارات مثل ( ما شاء الله تبارك الله) و( عيني باردة الله يحفظك)
و( يابت الناس بتكتلي ليك زول بسماحتك دي ) و( الحلاوة دي إلا في العلب) و( الموز ده إلا في السبايط )
و( ويييين يامنقة ) و( تسلم البطن الجابتك) و( سك سك سك وين ياحلوة) ومشاغلات على هكذا شاكلة وهي في مجلمها
ليس فيها مايجرح المرأة لفظاً أو فعلاً بشكل بالغ !!
وبحكم وجودي في القاهرة هذه المدينة التي أحبها من كل قلبي وجدت أن شكل المشاغلات فيها يختلف إختلافاً كبيراً
وللحقيقة تتسم المعاكسات هناك بشئ من قلة الحياء والالفاظ الجنسية المباشرة وبشكل فيه إهانة بالغة لكرامة المرأة !
أنا هنا أتحدث عن سلوك محدد لفئة محددة في مصر ( المشاغلاتية ) وليس كل المصريين ! فالشعب المصري فيهم أهل الحارة وأخوان فاطمة ومن يهبون لنجدة الملهوف
وكم من مرة رأيت بأم عيني من المصريين من يتصدى للشباب المعاكس بالزجر والضرب أحياناً !!
والسؤال هو :
هل فعل ( المشاغلة) وطريقتها يعتمد على ثقافة كل بلد وإسلوب بعض رجالها ( المشاغلاتية) في التعامل مع المرأة ؟؟
يتبع ,,
Post: #2 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-02-2010, 03:12 PM Parent: #1
مثال آخر
في السودان رأيت الكثير من الفتيات يشيروا للعربات في الشارع من أجل توصيلة
وفضل الظهر وكدا ( ورغم تحفظي التام وعدم إرتياحي للحركة دي) !!
إلا أنه كثير من الذين يلبون نداء فضل الظهر كما يسمونه هم رجال أولاد ناس وحتى المشاغلاتية منهم
لا يتواقحون على الفتاة أو يأخذون منها شئ دون رضاها !
أما في عدد من الدول العربية الأخرى فالرجل من فئة المشاغلاتية هو الذي يقف بسيارته ويلح على الفتاة للركوب معه
و
أهدافه محددة بالطبع !!!
Post: #3 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Hisham Amin Date: 01-02-2010, 03:54 PM Parent: #2
نادية عثمان
اول معايدة فى اول بوست فى 2010
انا بصراحة مسجل حضور علشان المنقة
لكن ممكن اتابع المقارنة وبشقف
اكيد التقدير
Post: #5 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-02-2010, 04:33 PM Parent: #3
هشام آمين أخوي
حبابك
Quote: اول معايدة فى اول بوست فى 2010
وكل لحظة وإنت بألف خير وعافية يارب والقابلة على أمانيك ,,
Post: #17 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Ahmed musa Date: 01-02-2010, 07:40 PM Parent: #2
Quote: أهدافه محددة بالطبع !!!
لاحول الله !!!! لا حول الله !!!! لا حول الله !!!! اللهم أهدنا فيمن هديت وبارك لنا فيما أعطيت وتولنا فيمن توليت
Post: #29 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 01:42 PM Parent: #17
مولانا أحمد موسى المحامي
حبابك أخوي
Quote: لاحول الله !!!! لا حول الله !!!! لا حول الله !!!! اللهم أهدنا فيمن هديت وبارك لنا فيما أعطيت وتولنا فيمن توليت
آآآآآآآآآآمين يارب العالمين ,,
Post: #4 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: تبارك شيخ الدين جبريل Date: 01-02-2010, 03:56 PM Parent: #1
فكرة "المشاغلة" فى مجملها فكرة جنسية بحتة ....
وقد تصير مدخلاً مبكراً لعلاقة جنسية قصيرة أو طويلة ... مصحوبة بعاطفة أو شهوانية بحتة ... مصحوبة بصك شرعية أو واقعة خارج مشروعية الدين (أى دين) ...
وقد تفشل فى جذب انتباه واستجابة الطرف الآخر ....
هنا (فى أمريكا) تحتفى النساء بـ "المشاغلة" انطلاقاً من فهم اجتماعى عام ببراءة ووضوح النية الجنسية المصاحبة لمحاولة كسر الحاجز مع الغريب ...
فالذى يشاغل ... يعبر عن إحساس إيجابى وغير عدوانى ... وإن لم يفيد ... فهو لا يضر ...
لذلك يجنح السودانى دون غيره من الشعوب للتهذيب الذى يستر نواياه التى لا تشبه الشعوب الأخرى ... فالمفاهيم الجنسية السودانية يمكن اعتبارها أوضح ملمح لأزمة الهوية السودانية والشرخ الإنفصامى الذى يعانيه السودانيين بين ما هم ... وما يعتقدون أن يكونوا .....
... المهم .....
Post: #6 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: الصادق صديق سلمان Date: 01-02-2010, 04:46 PM Parent: #4
موضيعك منقة يا مقنة (نذكرك بي ايام زمان) لوووول استاذه نادية هي فن ويعكس نوع من الاعجاب او الــ shock التي تصيب الرجل عندما يرى انثى جميلة فاتنة. نحن مهذبين والمرأة عندنا مكرمة حتى بنقوم ليها في الباص وفي صف العيش بندخلها قبلنا وكدا يعني زي ما انت عارفة. لا نحب ان نخدش حياءها وكبريائها
ابومجتبى
Post: #39 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 02:35 PM Parent: #6
الصادق أخوي
Quote: نحن مهذبين والمرأة عندنا مكرمة حتى بنقوم ليها في الباص وفي صف العيش بندخلها قبلنا وكدا يعني زي ما انت عارفة. لا نحب ان نخدش حياءها وكبريائها
حكاية تقوم ليها في الباص دي لي هسي في بالله ؟!
Post: #7 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-02-2010, 04:49 PM Parent: #4
في ماليزيا نهائي لا يوجد نوعية هذا السلوك
لما زاريا خلصت العالي مشينا السودان
يوم بتحكي لي عن انطباعاتها عن السودان والسودانين وبفرح شديد قالت انه الناس بتشكر الناس في الشارع وتعمل compliment قلت ليها كيف؟ قالت يعلقوا على لبسك وعلى شكلك يقولو ما شاء الله وانت حلوة
وعرفنا انه اي زول شاغلها قالت ليه شكرا مصحوبة بابتسامة واسعة وانحناءة للراس...
وضحكنا ضحك شديد عليها..
وكلمناها الناس دي بتشاغلك والمفروض تعملي التجاهل التجاهل اتجاهل حق عمك مصطفى محمود
عشات تثبتي لامة السودان انك مؤدبة وبت ناس..
Post: #8 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: فاروق أبوحوه Date: 01-02-2010, 04:59 PM Parent: #7
سيب سكتنا.. سكة مدرستنا..
ناديه كيفك؟
بجيك راجع
__________ اللييييييلا واللييييييلا
Post: #42 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 02:48 PM Parent: #8
فاروق أبو حوه
حبابك
في إنتظارك سمح؟
Post: #9 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: مريم عبد الله Date: 01-02-2010, 05:03 PM Parent: #7
ندوووش
بت حلتنا كل سنه وانتي بخير سنه سعيدة عليك
وعلى كل احبابك
اكيد المشاغلات او المعاكسات بتختلف تبعا لاختلاف انماط كل مجتمع
ودرجه تقبل الطرف الاخر وردة الفعل هل كانت استحسان ولا استنكار
في السودان عموما زي ما قلتي كبيرو البيقول يا عسل ويا سكر ( على ايامنا )
وما بعرف شنو صله الارتباط بين المعاكسه وتشبيه البنوته بالحلويات
اغرب معاكسه سمعتها قالها شاب لبنوته وهي سمحه شديد البت وتقيله
قال ليها انتي سمحه لامن حامضه
في اليونان الستات همفي الغالب البيعاكسن وبيسموها ( كااماكي ) ولما واحده تتعاكس
ما بتشاكل العاكسها بالعكس تتضحك وبتجي تحكي للدنيا كلها انها اتعاكست
غايتو كل ناس ورؤيتهم
موضوع جميل وهادف يا ندويه
Post: #10 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: قاسم المهداوى Date: 01-02-2010, 05:08 PM Parent: #9
Quote: والصعلقة في إبداء الإعجاب بكلمة غزل أو مشاغلة لا تعد سلبية تماماً
بالظبط كدا منقة وكمنجة كمان
قاسم المهداوى
Post: #44 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 03:01 PM Parent: #10
قاسم المهداوي
ياصاحب الكمنجات
تسلم على المرور بطعم المنقة
كن بخير
Post: #43 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 02:56 PM Parent: #9
مريومة بت عبد الله
بت حلتي سلام
Quote: اغرب معاكسه سمعتها قالها شاب لبنوته وهي سمحه شديد البت وتقيله
قال ليها انتي سمحه لامن حامضه
أيوة كلامك تمام وفي البيقول ( سمحة من غلط ذاتو) !!
والعجب لمن كان الماكنتوش موضة وبجي من السعودية كان أي بت حلوة ماكنتوش طوالي !
Post: #11 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: رغيم عثمان رغيم الحسن Date: 01-02-2010, 05:08 PM Parent: #7
Quote: وبفرح شديد قالت انه الناس بتشكر الناس في الشارع وتعمل compliment قلت ليها كيف؟ قالت يعلقوا على لبسك وعلى شكلك يقولو ما شاء الله وانت حلوة
وعرفنا انه اي زول شاغلها قالت ليه شكرا مصحوبة بابتسامة واسعة وانحناءة للراس...
نادية سلام
Post: #12 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: تبارك شيخ الدين جبريل Date: 01-02-2010, 05:31 PM Parent: #11
قال ليها:
you should be tired from running through my mind all day
أو ....
حايمة فى بالى اليوم كلّو .... لى هسة بتكونى تعبتى ....
... المهم ......
Post: #13 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: 3mk-Tango Date: 01-02-2010, 06:49 PM Parent: #12
سلام نادية كل عام وانتي بخير
قالو __ والله يكفينا من شر قالو وقلنا :) _ المساجين في سجن امدرمان طلعوهم ينضفو قدام السجن وجو بنات مدرسه امدرمان ايام العالي بلبس لبني وكانت واحدة شديده _ واحد من السمساجين عبتو خالص عاين ليها كدا وقا ليها : وين يا تتي حمامكم بدي ولا بعض ؟؟ البنت اتخلعت قالت ليو : سجمي انت مسجون من سنه كم ؟
حتي المساجين في النكت بتكون مشاغلتهم مؤدبه . :)
Post: #15 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Ahmed Alim Date: 01-02-2010, 07:13 PM Parent: #13
Quote: واحد من السمساجين عبتو خالص عاين ليها كدا وقا ليها : وين يا تتي حمامكم بدي ولا بعض ؟؟ البنت اتخلعت قالت ليو : سجمي انت مسجون من سنه كم ؟
والله يا تنقو انت بتجيب ليك كلامات قديمة خلاص.. أذكر انوا انا بسبب المشاغلة الفوق دي اخدت علقة ما حانساها ابداً.. ما كنت تجاوزت التاسعة وطلب مني احد اقاربي الكبار ان اقولها لموظفة جارتنا وهي قادمة لبيتها من العمل،، وطبعاً اخوك ما عارف الحاصل شنوا بس قولتها وجاتني ليك طوااالي وسألتني انت قلت شنوا وبكل فرح قلتها تاني وبعدها عينك ما تشوف الا نور..... وكنت مندهش الزولة دي بتدقني لييه
نادية وكل المشاركين كل سنة وانتم طيبين..
Post: #58 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 05:06 PM Parent: #15
أحمد عليم
Quote: وكنت مندهش الزولة دي بتدقني لييه
أها وأنا هسة مندهشة هي دقتك ليه ؟ ( وش مافاهم) !!
Post: #18 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: كمال ادريس Date: 01-02-2010, 07:50 PM Parent: #13
المشاغلة يانادية بترتبط بثقافة اهل البلد ففي اليمن مثلا اذكر ان المعاكسات لاتكون بالكلام.... الشاب المشاغلاتي يكون شايل دبوس ـ ايوة الله دبوس ـ يشك بيهو البتعجبو... لذلك نادرا ماتجد النساء يسيرن قريب من الشباب... وحضرت كتير من الخبت والضرب في شارع جمال وسط صنعاء جراء شكة الدبوس.
اما في السعودية فالحكاية منصبة في كيفية ايصال رقم الهاتف وهو مايعرف بالـ"ترقيم" يعني الحكاية كتامي وهنا الخطورة... ويبدا التفنن من كتبة الرقم على اليد ثم التلويح بها او في ورقة واسقاطها الى جانب "الهدف" خاصة داخل الاسواق المغلقة... وهناك الكثير من الطرق لايسمح المجال بذكرها.
في لندن اصلوا مالاقيت انسان بشاغل... مش كده وبس بل مافي زول بعاين للتاني .. حتى جوة القطار حيث مايعرف بجلسة عزيزي المشاهد... اي الكنبات متقابلة لكن القصادك اطلاقا لاينظر ناحية الاخرين... يعني لو في واحدة جميلة تعاين وتقطعوا في مصارينك.
Post: #59 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 05:17 PM Parent: #18
كمال إدريس
تسلم أخوي كيفك
Quote: المشاغلة يانادية بترتبط بثقافة اهل البلد ففي اليمن مثلا اذكر ان المعاكسات لاتكون بالكلام.... الشاب المشاغلاتي يكون شايل دبوس ـ ايوة الله دبوس ـ يشك بيهو البتعجبو... لذلك نادرا ماتجد النساء يسيرن قريب من الشباب... وحضرت كتير من الخبت والضرب في شارع جمال وسط صنعاء جراء شكة الدبوس.
عليك الله دي مشاغلة ولا تعكير دم هسي ؟ ( وش مندهش)
Quote: اما في السعودية فالحكاية منصبة في كيفية ايصال رقم الهاتف وهو مايعرف بالـ"ترقيم" يعني الحكاية كتامي وهنا الخطورة... ويبدا التفنن من كتبة الرقم على اليد ثم التلويح بها او في ورقة واسقاطها الى جانب "الهدف" خاصة داخل الاسواق المغلقة... وهناك الكثير من الطرق لايسمح المجال بذكرها.
غايتو أكتر حاجة خوفوني منها في السعودية عي جماعة البنغالة ديل قالوا لي بيخطفوا عديل .. صحي ؟!!
Quote: في لندن اصلوا مالاقيت انسان بشاغل... مش كده وبس بل مافي زول بعاين للتاني .. حتى جوة القطار حيث مايعرف بجلسة عزيزي المشاهد... اي الكنبات متقابلة لكن القصادك اطلاقا لاينظر ناحية الاخرين... يعني لو في واحدة جميلة تعاين وتقطعوا في مصارينك.
سلامة مصارينك لكن والله عدم المشاغلة والمعاينة دي شئ راقي وحضاري برضو ,,
Post: #55 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 04:19 PM Parent: #13
عمك تنقو ؟
Quote: حتي المساجين في النكت بتكون مشاغلتهم مؤدبه .
هو بالله إنت كنت ضابط في السجون ياسعادتك ؟ ( وش بيضحك)
Post: #51 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 03:37 PM Parent: #12
تبارك
Quote: حايمة فى بالى اليوم كلّو .... لى هسة بتكونى تعبتى ....
والله دي بلاغة وخيال عجيب ياخ !
كلام جميييييييييل !
Post: #47 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 03:23 PM Parent: #11
رغيم عثمان رغيم
حبابك أخوي وتسلم على المرور الحلو
Post: #14 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: هاجر التهامي ياسين Date: 01-02-2010, 07:04 PM Parent: #7
ندوية عنوانك زاتو منقة يهجم
لكن اتخيلي موضوع جميل ومفيد
ياريت الرجاله يورونا الواحد بشاغل ليه؟
طيب مرات بيكون في ناس جرئين بالذات في السوق الناس تعمل شنو في الحالة دي السؤال دا موجه للاخوة.
والعجب العجاب في السعودية.
طبعا الرجال هنا مابيشوفوا نساء خالص الواحد لما يشوف ليه كيس زبالة اسود بيتخيلة مرة يجري يسكه. ههههههههههههههههههههههههههههه
د. نجاة صاحبتك شعورها جميل الزمن دا في زول لاقي يشكروه.
Post: #16 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Dr. Salah Albashier Date: 01-02-2010, 07:32 PM Parent: #14
الأخت العزيزة الكنداكة نادية عثمان لك التحية والود وعاطر الياسمين بوست موفق، فقط "متحييييييييز شوية"، لأنه افترض أن المشاغلة صفة ذكورية فقط، آمل مراجعة الرابط التالي ، وسأعود بعد أن أرى رأيك فيما كتبن(الصفحتان 2 و 3 ). هل من المعقول أن تتزوج من امرأةٍ ثانية؟ .. دعوة للنقاش مع خالص تحياتي د. صلاح البشير
Post: #19 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Isa Date: 01-02-2010, 07:53 PM Parent: #16
ٍسلام يا نادية، أنا بس دايرة أأكد على كلامك عن المقارنة بين مصر والسودان؛ وهو ما حكته لي واحدة من أهلي أقامت في القاهرة لعدة شهور، وتقيم بصورة دايمة في أوربا وبتمشي السودان برضو في إجازات منتظمة مع أهلها،، لكن لامن سألتها عن رأيها وانطباعها عن الحياة في مصر كان ردها المباشر وبكل إستياء إنو الناس هناك: mentally deranged (handicapped( ودا بسبب طريقة المصريين في (المشاغلة) زي ما قلتي.. طبعا مع إحترامي لرايك الإيجابي عن الناس هناك..
Post: #63 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 06:07 PM Parent: #19
Isa
Quote: أنا بس دايرة أأكد على كلامك عن المقارنة بين مصر والسودان؛ وهو ما حكته لي واحدة من أهلي أقامت في القاهرة لعدة شهور، وتقيم بصورة دايمة في أوربا وبتمشي السودان برضو في إجازات منتظمة مع أهلها،، لكن لامن سألتها عن رأيها وانطباعها عن الحياة في مصر كان ردها المباشر وبكل إستياء إنو الناس هناك: mentally deranged (handicapped( ودا بسبب طريقة المصريين في (المشاغلة) زي ما قلتي.. طبعا مع إحترامي لرايك الإيجابي عن الناس هناك..
بت أهلك كلامها صاح لأنو المصري ( فئة المشاغلاتية) مابيعرف حتى يميز بين بت الناس المحترمة والطالعة للربا والتلاف !!
جد لغتهم سخيفة وتطلع الزول من طوره شديد !!
Post: #20 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Nasr Date: 01-02-2010, 07:55 PM Parent: #16
تسلم البطن الجابتك يا نادية (وجابت معاك وردي وإسماعيل حسن) وبالمناسبة دي هسع عليك الله الغنا السوداني ما كلو مشاغلة، بس عشان بوافقوا عليهو ناس لجنة النصوص بقي فن؟؟؟ وفن راقي؟؟؟ ريحتيني شديد لمن قلت أن الناس في بلادي ما زالوا وما برحوا وما أنفكوا مهذبين.
دي قصة من ثمانيات القرن الماضي قالت واحدة من بنات بحري: تجي شاقة سوق بحري، ناس الخضار: أصليييييييي، قدام شوية ناس الطبالي: حربيييييي، وبعدين ناس البكاسي: وين يا جوك
يعني حتي المشاغلات بتتطور؟؟؟
Post: #21 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: WAD ELGAALI#4 Date: 01-02-2010, 08:31 PM Parent: #20
Post: #22 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.يوسف محمد طاهر Date: 01-02-2010, 08:59 PM Parent: #21
لك التحية أختي : نادية (المشاغلة)جزء من موروثنا الثقافي , وهي فن قد لا يتقنه الكثيرون منا ... فما أي مشاغلة مقبولة , ولا أي فتاة بتقبل المشاغلة والألفاظ تتحدد حسب نوعية المشاغل والبنت المشاغلنها... فالكلمة التي أردها ل ( فلانة ) غير التي أقولها ل( علانة ) ... ففي بعض البنات ما بحبو المشاغلة . فإذا مرت بمجموعة شباب وهي تعلم بأنهم من الصنف المشاغلاتي , ما عليها إلا أن ترميهم بالسلام ... فكأنها صبت عليهم ماء بارد ... بردوا عليها السلام وما في واحد يقدر يشاغلها ... لكن في مشاغلة أكثر فاعلية من الكلام , ومنتشرة جداً في السودان قديماً , ولا أعلم إن كانت منتشرة الآن ولا لا ...المشاغلة بالعيون ...
Post: #23 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-03-2010, 02:59 AM Parent: #22
الاغنية من اغرب الاغاني السودانية فلتت من ناس "سكلتك" امك والتاصيل والمشروع الحضاري
على لسان واحد مشاغلاتي ما عنده قشة مرة معرسة ولا غيرو
Post: #24 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-03-2010, 03:14 AM Parent: #23
Quote: ملحوظه يادكتورة انتى وكت عندك بت عسوله وطيبه كدا مالك طيب بتوزعى فينى بالبوستات ماكان تشاوريها على والله جاااااهز وقالو البت ودخالتا اولى بيها قلتى شنو يازاريه
يا ود الجعلي دي بيعتها مع امها وابوهانقوم سوا ونقعد سوا لو بتقدر على انكم تبقو اربعة مافي مانع..
Post: #25 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Balla Musa Date: 01-03-2010, 03:18 AM Parent: #24
Post: #71 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 08:14 PM Parent: #25
د. بلة
حبابك إنت ذاتك والله
Quote: الأخوات المتداخلات حبابكن
إنتن مادام جريئات كدا البوست دا مابياتنوا مالكن؟
أها الكلام ده ليكن يا المتداخلات ردن سمح ؟ ( وش مدور) !
Post: #26 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: WAD ELGAALI#4 Date: 01-03-2010, 05:34 AM Parent: #24
يادكتوره والله لوبقيتو اربعين ماعندى مانع انالاقيكم وين اها شروطك ووافقنا عليها نجى ماليزيا ول تجو السودان وعشان خاطرك حقى الشرعى فى الشوفه متنازل منو اهاشاورى البت وابوهاوانامستنيك
Post: #27 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: الصادق صديق سلمان Date: 01-03-2010, 07:57 AM Parent: #26
نجاة بت عمي والله يا بت عمي طلب ودعمي دا ما يرجع أبداً ولو قلتو اي حاجة نحن جاهزين لي اي طلب
Quote: يادكتوره والله لوبقيتو اربعين ماعندى مانع انالاقيكم وين اها شروطك ووافقنا عليها نجى ماليزيا ول تجو السودان وعشان خاطرك حقى الشرعى فى الشوفه متنازل منو اهاشاورى البت وابوهاوانامستنيك
دي موافقة علي شروطكم يا دكتورة يلا ورينا جعليتك بعد دا
أبومجتبى
Post: #28 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: بكري عباس علي Date: 01-03-2010, 01:25 PM Parent: #27
نادية
ازيك
السودانيين ناس مؤدبين حتي في المشاغلة ( المغازلة ) وقاعدين يرفعوا معنويات البنات
لدرجة انو في بنات بيعجبن الكلام دا وهو في الغالب اطراء يسعد الانثي ويرضي غرورها
علي عكس المصاروة انا سمعت انه موخرا في موجات تحرش تصل للاعتداء الجنسي الجماعي في ايام الاعياد في شوارع رئيسية
Post: #30 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: داليا حافظ Date: 01-03-2010, 02:00 PM Parent: #28
ندوية ..
أزيك
Quote: رجل سوداني يشاغل فتاة أعجبته فيستخدم عبارات مثل ( ما شاء الله تبارك الله) و( عيني باردة الله يحفظك)
و( يابت الناس بتكتلي ليك زول بسماحتك دي ) و( الحلاوة دي إلا في العلب) و( الموز ده إلا في السبايط )
و( ويييين يامنقة ) و( تسلم البطن الجابتك) و( سك سك سك وين ياحلوة) ومشاغلات على هكذا شاكلة وهي في مجلمها
ليس فيها مايجرح المرأة لفظاً أو فعلاً بشكل بالغ
يا نادية النوع ده من المشاغلة لسة رايج ؟! في ذهني أمثلة كتيرة لمشاغلات ما بريئة ..لكن
خاااايفة ..أقول ؟
Post: #32 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: داليا حافظ Date: 01-03-2010, 02:08 PM Parent: #30
Quote: وللحقيقة تتسم المعاكسات هناك بشئ من قلة الحياء والالفاظ الجنسية المباشرة وبشكل فيه إهانة بالغة لكرامة المرأة !
أنا هنا أتحدث عن سلوك محدد لفئة محددة في مصر ( المشاغلاتية ) وليس كل المصريين !
أما المصريين (المشاغلاتية) ..كما سميتيهم ..هم في الحقيقة (مداهمتية) ..
Post: #77 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 09:40 PM Parent: #32
دلوش ؟
Quote: أما المصريين (المشاغلاتية) ..كما سميتيهم ..هم في الحقيقة (مداهمتية) ..
يابت إنتي جيتي مصر من ورايا ولا أييييييييييييه ؟!
Post: #33 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: nazar hussien Date: 01-03-2010, 02:16 PM Parent: #30
Quote: نادية النوع ده من المشاغلة لسة رايج ؟! في ذهني أمثلة كتيرة لمشاغلات ما بريئة ..لكن
خاااايفة ..أقول ؟
نحن غايتو زمنا ما كان فيه مشاغلة...
كلو من نوع (حاول يخفي نفسووو وهل يخفي القمر في سماه)
تامنو خيال سااااكت...
Post: #78 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 09:50 PM Parent: #33
نزار ؟
Quote: نحن غايتو زمنا ما كان فيه مشاغلة...
كلو من نوع (حاول يخفي نفسووو وهل يخفي القمر في سماه)
تامنو خيال سااااكت...
يعني إنت من زمن ناس سرور وكرومة ؟!!
Post: #73 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 09:08 PM Parent: #30
داليا حافظ ؟
دلوووووووووش ؟
Quote: خاااايفة ..أقول ؟
افوووووووو
عندنا بنات بتخاف كمان ؟ ( وش هيييييييييييع) !
قولي ياخ ماتخافي قولي مابتجيك عوجة إن شاء الله سمح ؟
Post: #72 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 08:29 PM Parent: #28
بكري عباس
حبابك
Quote: السودانيين ناس مؤدبين حتي في المشاغلة ( المغازلة ) وقاعدين يرفعوا معنويات البنات
لدرجة انو في بنات بيعجبن الكلام دا وهو في الغالب اطراء يسعد الانثي ويرضي غرورها
أيوة لو بقت المشاغلة من نوع :
( حفظك الله يا أختاه) و( رباه ماهذا الجمال يا أختاه) بيكون كويس وبرفع المعنويات صاح !!
Post: #70 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 07:37 PM Parent: #23
دكتورة نجاة بالغتي ياخ
Quote: الاغنية من اغرب الاغاني السودانية فلتت من ناس "سكلتك" امك والتاصيل والمشروع الحضاري
على لسان واحد مشاغلاتي ما عنده قشة مرة معرسة ولا غيرو
أها كدا يادوب ممكن ينتبهوا ليها بعد مداخلتك دي ويمشي يعدموها من مكتبة الإذاعة !!( ههههههه)
الله يستر بس !!
Post: #68 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 07:03 PM Parent: #22
د. يوسف محمد طاهر
حبابك
Quote: لكن في مشاغلة أكثر فاعلية من الكلام , ومنتشرة جداً في السودان قديماً , ولا أعلم إن كانت منتشرة الآن ولا لا ...المشاغلة بالعيون ...
أيوة والله
كان تلاقي الواحد يرفع حواجبو ويغمز بعينه ومعاها صوت بالفم ( سك سك سك ) صاح ؟!!
Post: #31 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: هاجر التهامي ياسين Date: 01-03-2010, 02:05 PM Parent: #21
ودالجعلي كيفك انشاء الله طيب
معليش البرلمة حاصلة , بس انت عينك الطايرة دي خليها تكنب في الواطة
البت الزغنونة دي مالها كربتها شنو؟
ومصيبة د. نجاة شنو التخليها تعرس لبتها راجل قدر ابوها.
مع تحيات البرلومة هاجر
Post: #35 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: طارق عبد اللطيف نقد Date: 01-03-2010, 02:22 PM Parent: #31
ندوية انت لسه برئية
البرائه في المعاكسة كان زمنا اما الان فربك الحافظ
Post: #79 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 10:13 PM Parent: #35
طارق نقد
سلامات
Quote: ندوية انت لسه برئية
البرائه في المعاكسة كان زمنا اما الان فربك الحافظ
فعلاً ربنا الحافظ يحفظ كل البنات يااااارب ,,
Post: #37 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: الحاج حمد الحاج Date: 01-03-2010, 02:33 PM Parent: #31
نادية عثمان تحياتي اتذكرت قصة طريفة عن المشاغلة ذكرت من قبل في المنبر و لكنها عكسية بنت شاغلت راجل: قالوا واحد قاعد في عربيتو الفارهة جدا جنب سوق سعد قشرة و هو قمة في الوجاهة و تجلس بجانبه زوجته و هي قمة في الجمال و بينهما طفلة جميلة جدا ، جو اتنين من بنات الشفاتيات شافو المنظر و أعجبو و بعد خطوتين واحدة من البنتين وقفت و قالت مخاطبة الرجل: انت شرط و مرتك شرط و بنتك شرط و عربتك شرط!!! و واصلو السير و هن فرحات للتعبير عن مشاعرهن
Post: #81 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 10:24 PM Parent: #37
الحاج حمد
حبابك أخوي
Quote: اتذكرت قصة طريفة عن المشاغلة ذكرت من قبل في المنبر و لكنها عكسية بنت شاغلت راجل: قالوا واحد قاعد في عربيتو الفارهة جدا جنب سوق سعد قشرة و هو قمة في الوجاهة و تجلس بجانبه زوجته و هي قمة في الجمال و بينهما طفلة جميلة جدا ، جو اتنين من بنات الشفاتيات شافو المنظر و أعجبو و بعد خطوتين واحدة من البنتين وقفت و قالت مخاطبة الرجل: انت شرط و مرتك شرط و بنتك شرط و عربتك شرط!!! و واصلو السير و هن فرحات للتعبير عن مشاعرهن
ههههههههههههه
والله ديل بت لذيذة عدددددددديل !
أكيد الرجل وزوجته وبنته إتكيفوا منها والله
Post: #38 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالله ود البوش Date: 01-03-2010, 02:34 PM Parent: #31
Quote: وين يا تتي حمامكم بدي ولا بعض ؟؟
ياعمك تنقو ( بالانقليزي الملخبت )
اول ما طلعت العبارة اعلاه حبيب الله ود الباع جملوا مسك بتو من ايدا وقال ليها اسمعي يا بت الليام دي الجنيات بقولوا للبنات يا تتي حمامكم بدي ولا بعضي كان في واحد قال ليك كدي قولي ليهو حمامنا بضبح جخخخخخخخخخخخخخ
تحياتي ندوش موضوعك شطة بس ومنقة مص سنة ولا اموت انا
Post: #84 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 01:56 AM Parent: #38
عبد الله ود البوش ؟
Quote: سنة ولا اموت انا
عيييييييييييييك
لقيتك أثري عديل ياخ ههههههههه
إنت من زمن المشاغلة دي بالله ؟!!
Post: #67 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 06:50 PM Parent: #21
ود الجعلي
سلام
زاريا الشنو العاوز تعرسا ياخ دي بت صغمبتوتة ياخ ؟!
انت عمرك كم ياود الجعلي بالجد كدا ؟ ( وش شمشار)
Post: #64 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 06:26 PM Parent: #20
نصر أخوي
سلامات
Quote: دي قصة من ثمانيات القرن الماضي قالت واحدة من بنات بحري: تجي شاقة سوق بحري، ناس الخضار: أصليييييييي، قدام شوية ناس الطبالي: حربيييييي، وبعدين ناس البكاسي: وين يا جوك
يعني حتي المشاغلات بتتطور؟؟؟
طبعا بتتطور لغة المشاعلات بحسب تطور لغة الشارع والمصطلحات الكل يوم طالعة دي !!
شئ عجييييب !!
Post: #62 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 05:56 PM Parent: #16
د. صلاح البشير
حبابك أخوي
Quote: بوست موفق، فقط "متحييييييييز شوية"، لأنه افترض أن المشاغلة صفة ذكورية فقط،
ماتحيز والله
لكن المشاغلة في الغالب بتكون من الرجال أكتر ولو بقت في المرأة فهي قليلة شديد ولا شنو ؟
ثم النساء بيشاغلن الرجال بيقولوا شنو ؟!
Post: #69 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Dr. Salah Albashier Date: 01-03-2010, 07:33 PM Parent: #62
الأخت العزيزة الكنداكة نادية لك التحية والود لا يا كنداكة المشاعر، لسة متحيزة، والقصة قلبت يبدو إنو ما بحثتي عن الموضوع، أرجعي للرابط تعرفي بيقولو شنو ولك حق النقل مع خالص تحياتي د. صلاج البشير
Post: #85 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 02:04 AM Parent: #69
د. صلاح البشير حبابك
Quote: لا يا كنداكة المشاعر، لسة متحيزة، والقصة قلبت يبدو إنو ما بحثتي عن الموضوع، أرجعي للرابط تعرفي بيقولو شنو ولك حق النقل
عاين
أنا عارفة إنو في بنات بشاغلوا ومامتحيزة ولا شئ والله وقريت المكتوب عندك
لكن هل ممكن وأحدة من نوع القعد تكتب ليك الكلام في الايميل ومن وراء ستار
ده ممكن تقوله ليك في وشك ولا قدام الناس في الشارع ؟!
أها الرجال فئة المشغلاتية ممكن يقولوا أكتر منو عرفت الفرق ؟!!
Post: #61 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 05:34 PM Parent: #14
هاجر اللذيذة العزيزة
Quote: طبعا الرجال هنا مابيشوفوا نساء خالص الواحد لما يشوف ليه كيس زبالة اسود بيتخيلة مرة يجري يسكه. ههههههههههههههههههههههههههههه
أكيد ده ما الرجل السوداني صاح ؟
كيس زبالة أسود ؟
بالغتي فوكا ياخ !!
ههههههههههه
Post: #41 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 02:42 PM Parent: #7
الحبيبة الغالية د. نجاة
غايتو براءة وجمال زاريا ماشفتو إلا في زاريا ربنا يحفظها لينا يارب ,,
Quote: وكلمناها الناس دي بتشاغلك والمفروض تعملي التجاهل التجاهل اتجاهل حق عمك مصطفى محمود
عشات تثبتي لامة السودان انك مؤدبة وبت ناس..
ههههههههههه
غايتو بالغتي يادكتورة يعني تجاهل د. محمود جات يوم حوبتها ؟
عايني :
زاريا دي كانت جات مصر إلا تجي لابسة كمامات في إضنينا عشان مايتخدش حياءها البرئ السمح ده ( وش مخدوش)
Post: #54 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: خالد أحمد شطة Date: 01-03-2010, 04:02 PM Parent: #7
Post: #88 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:02 AM Parent: #54
خالد شطة ؟
Quote: حيرتني ياست البنات يأريج الهيثم لقيتني كيف .
عاوز أتعلم من الأيام وتعرفي كيف يكون الريد ماتلومي البريدوا لأن الريد عزاب وبحر ممتد
والبت بتكون وصلت المحطة ولا بيتهم لحدي ماترص ليها الرصة دي ؟ هههههههه
Post: #34 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-03-2010, 02:19 PM Parent: #4
الأخ العزيز تبارك شيخ الدين
حبابك ملايين
Quote: لذلك يجنح السودانى دون غيره من الشعوب للتهذيب الذى يستر نواياه التى لا تشبه الشعوب الأخرى ... فالمفاهيم الجنسية السودانية يمكن اعتبارها أوضح ملمح لأزمة الهوية السودانية والشرخ الإنفصامى الذى يعانيه السودانيين بين ما هم ... وما يعتقدون أن يكونوا .....
ماعارفة لكن عندي إحساس إنك ( عصرت) على المشاغلاتي السوداني شوية !!
عاين :
بعض الرجال ماكلمهم لما بيشوفوا امرأة جميلة كأنما رأوا وردة جميلة فترى الواحد منهم يسبح بقدرة الخالق !
أها ده وعند رؤيته لتلك الحسناء للوهلة الأولى وبشكل خاطف كدا معقولة طوالي تفكيرو يمشي للمفاهيم الجنسية ؟
الموضوع ده موش بيكون عاوز ليهو شوية تركيز كدا في الأساس والمشاغلاتي نظرتو عابرة مابلحق يركز ذاتو ولا شنو ؟
Post: #36 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: داليا حافظ Date: 01-03-2010, 02:28 PM Parent: #34
ومن جهة تانية يا نادية في نوع تاني من المشاغلات في السودان ما بغرض المدح والتغزل في الجمال ..نوع
جارح جدا للنساء الأقل جمالا ..والشخصية السودانية(فئة المشاغلاتية ) بتميل للكلام الجارح والساخر
أكتر من الإيجابي ..
Post: #40 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالله ود البوش Date: 01-03-2010, 02:40 PM Parent: #36
قال ليها الاكس اندك ردت عليهو : ااكس رقبتك ااكسك الله
سلام ندوش وكسرنا كرونة هنا
Post: #45 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: baha eassa Date: 01-03-2010, 03:05 PM Parent: #40
وبعدين نشوف العنب العنب العيييييييييينب انتي في كسلا ولا شنو يانادية ؟
Post: #91 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:48 AM Parent: #45
بهاء الدين خال نادين
كيفك
أنا في الخرطوم
خلي بالك من نادين وأمها وأبوها ,,
Post: #46 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: جمال السنوسي Date: 01-03-2010, 03:13 PM Parent: #40
ندوية
موضوع جميل
وشيق
ولكن
لمذا لم تذكري مشاغلة النساء للرجال ( وهو موجودة في مجتمعنا وكل المجتمعات)
هناك نساء يعبرن بالمشاغلة عن اعجابهن بالرجال
والحكاوي كثيرة
ياريت تتناقش الفكرة من الجانبين
Post: #48 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: صديق الموج Date: 01-03-2010, 03:30 PM Parent: #46
ناديه اموت ركن وجه غامز عين واحده،،،
Post: #94 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:56 AM Parent: #48
صديق الموج حبابك
Quote: وجه غامز عين واحده
بطلوها غمزة العين دي هسي موش كدا ؟!!
Post: #49 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-03-2010, 03:30 PM Parent: #46
سلامات يا داليا بمناسبة الكلام الجارح دا
مرة اختي جاريةلاحقة محاضرة واحد جاري وراها يشاغل فيها قمات زهجت منه قالت ليه بس الاهبل دا قاليها هي يشاغلو ليك شنو ذاتو عكازين وربع كيلو لحم
Post: #50 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-03-2010, 03:35 PM Parent: #49
Quote: والله يا بت عمي طلب ودعمي دا ما يرجع أبداً ولو قلتو اي حاجة نحن جاهزين لي اي طلب
يا ود العم ود الجعلي دا ولد موية ساكت ندفق كلامنا ويزوغ مننا يلحق بتي مس هابيشام حقت قريت اكسبكتيشن ديك
Post: #96 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:59 AM Parent: #49
Quote: مرة اختي جاريةلاحقة محاضرة واحد جاري وراها يشاغل فيها قمات زهجت منه قالت ليه بس الاهبل دا قاليها هي يشاغلو ليك شنو ذاتو عكازين وربع كيلو لحم
أها دي إسمها قلة أدب عدددديل !!
Post: #92 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:52 AM Parent: #46
جمال السنوسي سلام
Quote: هناك نساء يعبرن بالمشاغلة عن اعجابهن بالرجال
بشاغلن بقولن ليكم شنو النساء ديل ياجمال ؟!
Post: #52 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: مريم عزالدين صديق Date: 01-03-2010, 03:37 PM Parent: #40
نادية إزيك يومى 15 و16 ديسمبر حضرت مؤتمر إقليمى عن التحرش الجنسى فى القاهرة مثلت فيه 16 دولة عربة نوقشت أوراق متعددة عن التحرش الجنسى وآثارة على المراة من بعض المداخلات هنا . آراء ذكورية نفسها قد ذكرت فى المؤتمر وهى أن بعض الرجال يعتقدوا أن المشاغلة ترفع من معنويات المراة والمعلومة دى دحضت بإستبيانات ومقابلات أكدت أن المشاغلة تشعر المرأة بالدونية وأن المشاغل شخص مستقوى عليها كما أنها تعكس عدم الإيمان بحق المراة بأن تعيش فى شارع تحس فيه بالامان والإطمئنان كما أن المشاغلة إزعاج وتحرش سمج قد يقود لمشاحنات وحتى عدم رد البنات إن كن راغبات فى الرد يعكس كبت سببة الاحساس بالاضطهاد أتضح ان المشاغلة موجودة فى جميع الدول العربية الا ان مصر اكثرها ممثلة اليمن قالت ردا على ان التحرش سببة البنات بما يرتدين من ملابس وبالخلاعة ووو قالت فى اليمن النساء يكتسين السواد ولا ترى منهن اى شىء وعلى الرغم من ذلك تتم معاكستهن بل المعاكسة فى اليمن معظمها (قرص) وأكدت ممثلة السعودية أنة على الرغم من العباءة والنقاب فالمراة السعودية تسمع نفس الالفاظ التى تسمعها المصرية والسورية والسودانية المركز المصرى لحقوق المراة قاد حملة ضد التحرش حيث نشر ملصقات فى المركبات العامة وفى الشوارع بعنوان شيل ايدك عيب وكان للحملة دور كبير جدا فى التاثير على الراى العام واثرت تاثير ايجابى على السلوك كما اتفق بين معظم المشاركات ان كبار السن اكثر المشاغلاتية وليس الشباب شارك فى المؤتمر حقوقيين رجال وتم اتفاق على حملات عربية ضد التحرش اللفظى والجنسى من اهم ما ذكر قصر القوانين عن حماية النساء من التحرش كما ان هناك ضعف فى ملكت رجال الامن فى الاثبات وهناك حالة مصرية مشهورة اذ تمسكت شابة تحرش بها شاب وهو يقود عربة وهى تسير راجلة فقد لمس شعرها وطبعا حركة السير مكنتها من القبض عليه ووجدت شهود فحكم القاضى على الشاب بثلاثة سنة سجن وكانت قضيه راى عام خطيرة جدا ساعد فيها زى ما قلت ان اشابة تمسكت بحقها والمنظمات الحقوقية دعمتها
Post: #53 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: مريم عزالدين صديق Date: 01-03-2010, 03:42 PM Parent: #52
المداخلة دى يا شباب باسم زينب بدر الدين الظاهر مريم عز الدين كانت قاعدة فى الجهاز وما عملت خروج وانا افتكرت الفاتح دا حسابىكدى نشوف دى بتتعالج كيف من مريم
Post: #57 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: khaleel Date: 01-03-2010, 04:50 PM Parent: #53
اليوغسلاف يشاغلون ويقول
اوووه مادسني يعني يا قطة
وناس ليبيا يقولون
احب كندرتك الجابا ليك ابوك
والسودانين يقولون
كبري شمبات مفتح بالجنبات
Post: #99 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 04:57 AM Parent: #57
خليل ؟
Quote: والسودانين يقولون
كبري شمبات مفتح بالجنبات
كيف يعني زول يشاغل بت يقول ليها كدا ؟ ( وش مهجوم)
بت مفتحة بالجنبات دي الله خلقني ماشفتها !!
وكوبري كمان ؟!!
ده سنة كم كان ؟
Post: #56 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: معتصم دفع الله Date: 01-03-2010, 04:48 PM Parent: #52
ندوية سلام .. وسنة حلوة عليك يا رب ..
هل المقصود من المشاغلات دي المداعبة أم تحرش .. لأنه كله أصبح محصل بعضه .. في مصر ومن وجهة نظري يعتبر تحرش مباشر وليس مشاغلة أو مداعبة لأن الكلمات تكون جنسية بحتة وفيها قلة أدب مبالغ فيها لذلك تكون ردة فعل الفتاة كبيرة وممكن تلم الشارع كله بردها على من يعاكسها .. لذلك يجب أن نناقش التحرش من كل جوانبه بما فيها المداعبة أو الملاطفة وممكن نقول المشاغلة .. ظهرت في السودان أيضاً ظاهرة مشاغلة البنات حتى البعض منهن ممكن ( تصفّر ) لشاب أمامها .. من النكات عن المشاغلات أيضاَ يقال أن هنالك 4 بنات ماشات في الشارع .. واحد أخونا قال ليهن سنة يا البلابل .. ردت عليه واحدة قالت ليهو البلابل تلاتة ونحن أربعة .. رد عليها وقال إنتِ العاديك معاهن منو ونكتة أخرى .. واحد أخونا مسطول راكب في الحافلة وفي الكرسي الخلف الباب طوالي .. جات واحدة سألته ويييييين في إشارة للسؤال عن وجهة الحافلة .. رد عليها المسطول وقال ليها .. نحن قاعدين إنتو الماظاهرين
Post: #100 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 05:06 AM Parent: #56
معتصم دفع الله أخوي الغالي
سلامات يازول يانقي
انت هنا ولا رجعت ؟
Quote: لذلك يجب أن نناقش التحرش من كل جوانبه بما فيها المداعبة أو الملاطفة وممكن نقول المشاغلة .. ظهرت في السودان أيضاً ظاهرة مشاغلة البنات حتى البعض منهن ممكن ( تصفّر ) لشاب أمامها .. من النكات عن المشاغلات أيضاَ يقال أن هنالك 4 بنات ماشات في الشارع .. واحد أخونا قال ليهن سنة يا البلابل .. ردت عليه واحدة قالت ليهو البلابل تلاتة ونحن أربعة .. رد عليها وقال إنتِ العاديك معاهن منو ونكتة أخرى .. واحد أخونا مسطول راكب في الحافلة وفي الكرسي الخلف الباب طوالي .. جات واحدة سألته ويييييين في إشارة للسؤال عن وجهة الحافلة .. رد عليها المسطول وقال ليها .. نحن قاعدين إنتو الماظاهرين
والله العظيم المسطول بالغ عددددددددديل !
هههههههههههههههه
ياخ دي سطلة بت لذينا عديل !
Post: #97 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 04:11 AM Parent: #52
الأخت زينب بدر الدين
تحيات وتقدير على المداخلة الثرة والموضوعية
Quote: من بعض المداخلات هنا . آراء ذكورية نفسها قد ذكرت فى المؤتمر وهى أن بعض الرجال يعتقدوا أن المشاغلة ترفع من معنويات المراة والمعلومة دى دحضت بإستبيانات ومقابلات أكدت أن المشاغلة تشعر المرأة بالدونية وأن المشاغل شخص مستقوى عليها كما أنها تعكس عدم الإيمان بحق المراة بأن تعيش فى شارع تحس فيه بالامان والإطمئنان
والله العظيم صدق إنو المشاغلات بتكره الواحدة المشي في الشارع
وتحسسها بعدم الأمان والإهانة والسخف الشديد !!
لكن النصيحة لي الله نظرة إذدراء وإحتقار وقرف للمشاغلاتي
ممكن تخليهو يخجل من نفسه أو يتحول ليهو إحساس الإهانة ده !!
Post: #90 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:43 AM Parent: #40
عبد الله ود البوش
Quote: سلام ندوش وكسرنا كرونة هنا
كرونة دي شنو كمان ؟ ( وش مافاهم)
Post: #89 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 03:34 AM Parent: #36
دلوش
Quote: ومن جهة تانية يا نادية في نوع تاني من المشاغلات في السودان ما بغرض المدح والتغزل في الجمال ..نوع
جارح جدا للنساء الأقل جمالا ..والشخصية السودانية(فئة المشاغلاتية ) بتميل للكلام الجارح والساخر
أكتر من الإيجابي ..
غايتو هنا في مصر ممكن تلاقي وأحد ثقيل يقول ليك :
إيه الوحاشة دي ؟
يابت ياسودة ( ماكتير)
أو
شيتا !!
أها هاتي ماعندك يلا !!
Post: #60 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: المعتمد Date: 01-03-2010, 05:27 PM Parent: #1
صعاليقنا زمان لما يقول لي البت سنة يا تيتي يكون بالغ فى الخروج عن الادب. حليل زمن ناس تيتي.
Post: #65 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: أسامه الكرور Date: 01-03-2010, 06:27 PM Parent: #60
ندويه ياعجوه معطونه بى عسل ..
لووووووووووول
أها فى واحد غازلك قدر دا ؟؟؟
موضوع شيق
........... أذكر فى التسعينات إثنين من أصدقائى مرت بهم طالبة طب تلبس الأبيض
الأول قال ليها : أهلاً يادكتوره
ردت : دكتوره فى عينك
التانى رد : عينو بس ؟؟؟ عيونا الإتنين
ابتسمت ومضت فى طريقه
..........
أعتقد أن نسبه كبيره من المشاغلات بالسودان هى أعجاب لا يتعدى ذلك
Post: #66 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: مريم عبد الله Date: 01-03-2010, 06:45 PM Parent: #65
ندوش الراقيه
وكل ضيوفها المتداخلين
مرة يا ستي في بنوتين ماشات في الشارع بتاع المدارس الفي بحري في ولد متفن
في اللستك وهم جوا مارات بقا اقول سكسك حبيبي ياللابس البيبي
المهم البنتين ولا عبروه قام لما اتغاز قال ليهم لكن شديدة الفي النص وهم 2 طبعا
تاني في مشاغلات غريبه علا يامنا ( هوي انا اول دفعه طبقوا فيها نظام تامنه ) وش كزاااااب ونخرتي وصلتك من الكزب صاح
-- يا حلاوه ناس
-- اموت ركن واندفن زاويا
-- في السلك وشرط الشرط شرط للارض
-- البت دي بقاقه او يا نجفه
--وووب علينا الما قرينا
-- كوراره ( ولي يوم الليله المعنى ما مفهوم لكن كانت دارجه )
لكن يا جماعه نحن كشعب نحب المنقه ونعزها عشان كده كلمه منقه دي وبلا منازع كلمه بتصلح للمشاغله في كل زمان ولكل الاجيال
ومافي اي تفسير الا انه المنقا هي منقا( اوووبس انا باشاغل في المنقا ولا شنو ) وياسلام لما يجي واحد يشاغل بكلمه المنقا ويقفل ليك عين وينفجل التانيه ويكشكش النخرة
ويقول فلانه المنقه او يا منقا لامن تحس انه في لحظتها انه شايف ليهو كبايه منقا الكبايه بتاعت القزاز ام شلوخ وتكون منقا تقيله سكر زيادة
واحد راكب فى الحافلة وركبت جنبو بت سمحة جد ومالاقى اى مدخل للونسة معاها وفى لحظة فتحت شنطة المدرسة وطلعت قلم رصاص وبدات تكتب . صاحبنا هنا طوالى راح قال ليها ممكن استيكة امسح بيها احزانى .... لو سمحتى فردد عليه... مدخلك بايخ وثقيل
وراجع ليك
Post: #105 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:00 AM Parent: #74
ياسر السيد
حبابك
Quote: واحد راكب فى الحافلة وركبت جنبو بت سمحة جد ومالاقى اى مدخل للونسة معاها وفى لحظة فتحت شنطة المدرسة وطلعت قلم رصاص وبدات تكتب . صاحبنا هنا طوالى راح قال ليها ممكن استيكة امسح بيها احزانى .... لو سمحتى فردد عليه... مدخلك بايخ وثقيل
صراحة بايخ وثقيل فعلاً !!
ههههههه
في ناس مابعرفوا حتى يشاغلوا وبقوموا يهبلوا روحهم ياخ !
Post: #75 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Ahmed musa Date: 01-03-2010, 09:20 PM Parent: #66
في القاهرة وفي الكورنيش كنا نسير وصديقي مرت فتيات وكان هناك مصريين شباب أحدهم قال لإحدي الفتيات (ده فيه منو رجالي)؟؟؟؟ فضحك أصدقائه بسعادة وتبسمت الفتاة وصويحباتها (بغنج) وسرنا أنا وصديقي بغباء !!!!!
ـــــــ كانو قاصدين شنو يا نادية ؟؟؟؟ في المسنجر ممكن !!!!
Post: #106 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:04 AM Parent: #75
مولانا أحمد موسى حبابك والله
Quote: في القاهرة وفي الكورنيش كنا نسير وصديقي مرت فتيات وكان هناك مصريين شباب أحدهم قال لإحدي الفتيات (ده فيه منو رجالي)؟؟؟؟ فضحك أصدقائه بسعادة وتبسمت الفتاة وصويحباتها (بغنج) وسرنا أنا وصديقي بغباء !!!!!
ـــــــ كانو قاصدين شنو يا نادية ؟؟؟؟ في المسنجر ممكن !!!!
Post: #76 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: حمد إبراهيم محمد Date: 01-03-2010, 09:31 PM Parent: #66
الأستاذة نادية - سنة جديدة وسعيدة ليك والمعاك
شفتي الدكتور صلاح البشير دا - رجل لطيف وظريف وحريف (تكسير تلج) بعرف كيف يجذب البورداب لبوستاته البعملها، واصبح البقروها جلهم من أخوات الكنداكة هههههههه كدي شوفي في واحدة بتغازله في بوست - هل من المعقول أن تتزوج بمرة ثاني ....) بتقول ليه في رسالتها:
Quote: الدكتور صلاح البشير كما تقول لك التحية ووافر الإحترام وبرضو سلام عليك الف وعلى أهل سودانيز اون لاين، والله يا دكتور عجبتني جنس عجب كدى قول لى اتا البتفتش عليها دي دايرا تكون كيف باين عليك بتعرف تدخل قلوب البنات غايتو عثل يا ناث هسه عليك الله يادكتور اتا براك كدى ما عندك مره ولا كايس تدبل انا غايتو جاهزه مرة تانية ولا تالتة ولا عاشره مافارق معاى كان بلقى زول زيك لكن ما اكضب عليك يا دكتور كا بقيت ليك اولى بكتلك كان عرسته فيني عليك الله يادكتور نزل لينا صورتك زي ما كتير من ناس سودنيز اون لاين بعملو عايزين نشوف العثل ده عفصت قلوبنا ياخ واتكسرنا ده حالتو ما شفنا العثل وحياة كا البتعزهم نزلا خلينا نملى عيونا منها يمكن وبث المخلصه أ . ح
أها دا واحد - وأمشوا عديل للرابط حقه بتشوفوا العجب من المشاغلات...
شكرا على هذا الطرح أستاذة نادية
سلمتي
Post: #80 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: WAD ELGAALI#4 Date: 01-03-2010, 10:22 PM Parent: #76
هاجر ياخى مالك دايره تبورينى سوقنا براهو واقف مش اهلكم زمان قالو الراجل عيبو جيبوووالله وحات خوتك ومعزتك دا ماعيبى وزيدى كمان عليهو انى بقدس الحياة الزوجيه واخليهابرنسيسة زمانا وأخلى امها ملكه دا مخسوس لى نسيبتى الدكتوره انتى بس ياهاجر بطلى حساده لكن كان خاته عينك على ممكن اعزرك واقول انك ماحاسده بعدين انازمنى داكلو مامرمى قدامك هسى عشان لقيت البرفكت ماتش بتاعى بقيتو تجغلبو انتى وندويه بعدين ياناديه اناعمرى اربعه وتلاتين جد وحات خوتك لكن زى ماقلت لى هاجر جاااااهز بس انتو بطلو حسادهاانتو لاترحمو لاتخلو رحمة ربناترحم بعدين يادكتور ماتشبكينى مويه وتلج وبتاع شاور البت يمكن تكون رضيانه
Post: #82 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: هاجر التهامي ياسين Date: 01-03-2010, 11:16 PM Parent: #80
Quote: هاجر ياخى مالك دايره تبورينى سوقنا براهو واقف
يعني نبور برانا , ونجي انت تعرس بت د. نجاة الزغنونة دي, حسادة كدا نبور كلنا
لو عمرك بقى 64 ما بنحلك ياود الجعلي
Post: #83 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عادل نجيلة Date: 01-04-2010, 00:10 AM Parent: #82
أختنا العزيزة نادية ...
غايتو بوستك ده كان أجمل وأطرف إفتتاح للسنة الجديدة .. والله ضحكت من تعليقات الزملاء و من طافتها و بالذات تعليق عم التنقو .. والله فكيتو قرفتي وإيضآ تعليق دبيان حول ما حدث لبنتها وتعليقها على أغنية أبوعركي (شفت التوب) لشاعرها الراحل عوض جبريل والذي وصفته بأكبر(مشاغلاتي) .. ولقد تغزل قبله إيضآ التجاني سعيد حينما كتب (من غير ميعاد) وهو طالب في سنة أولى ثانوي بمدرسة المؤتمر بأمدرمان و غناها وردي وشوفي غزل التجاني ده يا ستي وكلامه العجيب والذي لا يقوله سوى زول مانصيح: من غير ميعاد واللقيا أجمل في الحقيقة من إنتظار صحيتي في نفسي الوجود ورجعتى لعيوني النهار (أبو الزفت) و تعالي شوفي
كل الطيوب الحلوة يا مولاي و الجيد الرقيق واللفتة والهدب المكحل ولفة التوب الأنيق خلتني عايش في صراع يعبر رؤاي إحساس عميق
حنانيك التجاني سعيد ولك و للأستاذ وردي أجمل التهاني بالعام الجديد .
ولعل من أشهر المغازلات نسبت للراحل الشاعر و المغني عمر البنا .. وقيل أن أعجبته إحدى حسان أبروف فتابعها من بعيد حتى دخلت منزلهم .. وصار يتردد كل يوم ويقف على البعد لعله يحظى بنظرة من تلك الحسناء ودامت جميع محاولاته للفشل .. وبعد عدة أسابيع من الترقب هداه تفكيره لخطة تمكنه من رؤية محبوبته .. فذهب و نادى على الصبية الذين كانوا يلعبون في الشارع فناداهم و منحهم مبلغ من المال وطلب منهم أن يصيحوا بأعلى أصواتهم ( النار النار قامت) وبدأ فعلا الصبية يتصايحون وذهب ودالبنا ووقف قبال باب منزل الفتاة .. وماهي ألا لحظات وأن إنفتح الباب و أخرجت الفتاة رأسها لترى خبر النار .. فبدأت تتلفت قائلة (وين النار) فرد عليها ود البنا (النار في قلبي).
شكرآ نادية و كل عام و أنت بخير
Post: #86 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Mutafa Gasim Date: 01-04-2010, 02:15 AM Parent: #83
العزيزة نادية عذبي و جهجيه و....
اخ عزيز بيشاغل في البنية الماشة قدامه
و عصر عليها خالص البيت قداما طين برشاقة كده زاغت من الطين صاحبنا السارح في ملكوت الله وقع في الطين
البت قبلت عليهو و قالت ليهو ( وقعو في الطين و حميه )
تسلمي
مصطفى قاسم.
Post: #87 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: د.نجاة محمود Date: 01-04-2010, 02:48 AM Parent: #86
صباح الخير
عندنا صاحبة من بنات المعهد كان بتمارس اسلوب الصدمة ذي بشاشة لو الزول شافها تديك انطباع انه الغنماية تاكل عشاها بعدين ضعيفة وناعمة شديد لكن جن مصرم
عندها مئات القصص جزء لنشر وجزء ما للنشر
مرة راكبين الحافلة جاين المعهد في قصر الشباب هي وزمبلتها من الجنوب هي بتشبه الارترين شبه شديد ولكن حلفاوية.. اها في ولدين قصادها في الحافلة بتكلمو بالرطانة الزميلة الجنوبية الكمساري جاها دفعت ليها وللاخت وصلو المعهد نزلوا الاخت مشت اتكلمت مع الولدين بالشباك بالرطانة الاولاد والعهدة على الراوية عيونهم كانت عايزة تقع من الهجمة والحافلة اتحركت اهاالاخت الجنوبية سالت الزولة دي انت بتعرفيهم دي بكل بساطة قالت ليها ما بعرفهم اولاد قليلين ادب صعاليق
تصوري واحد قاليه البت دي سمحة التاني قاليه لكن صعيفةو معصعصة يل الاخت الجنوبية قات لهاقلت ليهم شنو انت قال قالت ليهم بالرطانة مافي مشكلة في الضعفة لو السماحة في لما اعرس واشرب الموص بسمن................ (سنسرة)................(سنسرة)
اها اختنا الجنوبية آمنت انه زولتنا دي صعلوقة يجب الحذر منها..
Post: #93 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: العوض المسلمي Date: 01-04-2010, 03:55 AM Parent: #87
سلام استاذة نادية
اول خليني ادفا شوية من البرد وارجع
Post: #114 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:34 AM Parent: #93
Post: #122 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: MOHAMMED ELSHEIKH Date: 01-04-2010, 09:45 AM Parent: #93
التحية للأخت نادية و ضيوفها الكرام
معروف في الخليج يتم مشاغلة السودانيين بيا زول و آآآآآآآآآي . انا في عمان كنت برد: " اهلااااااااااااااااااان يا خلفان" لكن مرة فوجئت بتلاتة بنات راكبين عربية قربوا لي و التلاتة مع بعض " آآآآآآآآآآآآآآآي يازووول" الجمتني المفاجئة و لكن رديت بسرعة " اهلاااان يا موووزة"
نادية مازال خالد في انتظار هااااارموني
Post: #127 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:05 PM Parent: #122
محمد الشيخ
حبابك
Quote: لكن مرة فوجئت بتلاتة بنات راكبين عربية قربوا لي و التلاتة مع بعض " آآآآآآآآآآآآآآآي يازووول" الجمتني المفاجئة و لكن رديت بسرعة " اهلاااان يا موووزة"
والمشاغلة بتاع آآآآآآآآآآآآآآى يازول دي حركة كويسة ولا للإستهزاء ؟
باقي في ناس حقارين هناك !
Post: #124 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: الحاج حمد الحاج Date: 01-04-2010, 11:58 AM Parent: #93
Quote: بشاغلن بقولن ليكم شنو النساء ديل ياجمال ؟!
عندي صاحبي وجيه جدا مما يعرضو لبعض المعاكسات النسائية في مرة حكى لي قال لي زميلة في المكتب بتشاغلني قلت ليها أنا متزوج شوفو الشباب الما متزوجين ديل ردت عليهو: انت لو عندك عربية و عاوز تديها سواق بتديها لي سواق بي رخصة و الله سواق مجهجه!!!!
Post: #128 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 07:05 PM Parent: #124
الحاج حمد
حبابك
Quote: عندي صاحبي وجيه جدا مما يعرضو لبعض المعاكسات النسائية في مرة حكى لي قال لي زميلة في المكتب بتشاغلني قلت ليها أنا متزوج شوفو الشباب الما متزوجين ديل ردت عليهو: انت لو عندك عربية و عاوز تديها سواق بتديها لي سواق بي رخصة و الله سواق مجهجه!!!!
ههههههههههههه
بالغت والله دي زولة لذيذة عدددديل
موبالغة !
غايتو في بنات بيفلسفن مسألة الزواج من ( راجل المرا) دي عشان يطبقوها بأي طريقة !
هههههه
Post: #131 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: أبو عبيدة البصاص Date: 01-04-2010, 09:02 PM Parent: #93
. . . ياخي والله انتي المنقه
واحد من اهلنا الادروبات مباري ليهو واحده وشابكه ليك ..ياجمال المشيه ...ياجمال التوب ..ياجمال الطله صاحبتنا صدقت قبلت عليهو لقى نخرته طويله قام طوالي قال ياجمال عبد الناصر ........................................... (وش مصدوم)
مدخل للخروج لي ناس زمان انو قصت يوم الزيارة بتاعت المستشفى دي شنو ؟؟؟؟
البصاص
Post: #132 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 09:57 PM Parent: #131
أبو عبيدة البصاص
Quote: واحد من اهلنا الادروبات مباري ليهو واحده وشابكه ليك ..ياجمال المشيه ...ياجمال التوب ..ياجمال الطله صاحبتنا صدقت قبلت عليهو لقى نخرته طويله قام طوالي قال ياجمال عبد الناصر ...........................................
هههههههههه
دي زكرتني وأحدة لابسة كعب عالي وماشة في الشارع في مصر هناك
وطج كج كج بالكعب العالي ووأحد ماشي وراها شابكها ليك .. ربنا يديك الصحة .. ربنا يديك الصحة .. ربنا يديك الصحة
قبلت بوشها عليهو لقاها شينة قال ليها ... ربنا يديك الصحة وياخدها منك تاني ( وش لووووول)
Post: #142 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالعزيز الفاضلابى Date: 01-05-2010, 05:28 PM Parent: #93
استاذة نادية تحية طيبة. رأيك شنو فى مشاغلة الزول ده. قال لها: شفتك ماشة مدرستك تفوح احلى العطور حواليك زهور مدرستك اليانعة تنتشى وتفرح لمجيك بشوف التوب عليك خايل تقول يالرايقة منسوج ليك والفستان تريّح ونام لابد فى ضميرا فيك.
Post: #95 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالرحمن إبراهيم محمد Date: 01-04-2010, 03:57 AM Parent: #87
بتنا نادية عثمان
سلام
يقال أن عمر بن عبد العزيز خليفة بنى أمية العادل وحفيد عمر بن الخطاب (رضى الله عنه) كان وسيما معجب بنفسه مزهوا بها.
وكان قبل توليه الخلافة وزهده يتطيب بأغلى الطيب وأجمله ويلبس أثمن مطارف الخز والإزارات التى يضاهى ثمن الواحدة منها عشرات المطارف والإزارات.
ثم يمشى في طرقات المدينة بخيلاء متكبرا متبخترا بمشية يتصنع فيها التقصع والتكعب فتتلذذ لها جواري المدينة ويقلدن تلك "المشية العمرية".
وتتبارى الحسان فى محاولة لفت نظره؛ فتقول الواحدة منهن بصوت مسموع له دون ذكر إسمه: "ليتنى أهلك إن لم يمر بى فيعيرنى نظرة أوأشتم رائحة الجنة فيه."
فيتبسم هو من الخيلاء دون النظر ألى أى منهن، ويتمادى فى تمايسه وتقصعه.
فلما قرأت قصة عمر بن عبدالعزيز وكان ذلك فى مكتبة جامعة الخرطوم أيام عزها وكنت يومها طالبا، طافت بذهنى مفارقة واحد من أظرف ظرفاء الخرطوم بحرى:
جيمس "أسكوب". وسمى بذلك إما لحبه للسينما، أو لإجتذابه الأنظار كما كان يدعى هو.
وكان يبالغ فى تزيين عجلته بخيوط البلاستيك الملون والمرايات المضيئة البراقة
ومثبت فى العجلة جرس وبورى وراديو ترانسستور مفتوح بأعلى صوت.
ويلبس البنطلون الشارلستون والقميص البوليستر المخطط اللماع رافعا لياقتة كجيمس دين (الذى كان يدعى بأنه هو أقيف منه)،
ويتسرح بعلبة فازلين كاملة،
ويتطيب بروائح نفاذة؛
ثم يقنص بجوار مدرسة الأميريكان للبنات وقت إنتهاء اليوم الدراسى.
وبالطبع لايجد من تهببه له كعمر بن عبدالعزيز فيبدا فى المشاغلة التى يجيدها:
"موت وفا أنا يالذيذ"
"ياخ أدونا نظرة بى جاى"
"ياخ ماقول إزيكم"
"ياخ إن شا الله قول ينعل أبوك"
فتتضاحك الفتيات فى إستساغة لهذا السيناريو الذى يتكرر كل يوم.
وحينما إختفى جيمس لفترة أقسم أحد ظرفاء بحرى بأن "أسكوب" نقل نشاطه إلى مدرسة اليونتى بالخرطوم
والعهدة على الراوى
Post: #98 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: غباشي Date: 01-04-2010, 04:42 AM Parent: #95
سلامات يا نادية موضوع المشاغلات دا حاجة طبيعية لانو لما تجي بت (بُقاقة) يعني سمحة شديد الشباب بينبهروا شديد و بعد داك ردة الفعل بتكون حسب جرأة ابو الشباب المنبهر دا في نوع بيعلِّق و بيعمل نايم بعد داك و في نوع بيكون راجي الرد و في نوع عينو قوية بيتمادى في الموضوع شديد لكن في كل الاحوال الموقف لا يخلو من الطُرفة و ان كانت العواقب مختلفة بتذكر زمان شديد (كنت في رابعة ابتدائي) جات بت في نفس مرحلتنا ماشة لابسه بنطلون و مسرحة (ضنب حصان) و اخر استنضاف المهم اسمع ليك من الناحية التانية ولد قدرنا بيشاغل قال ليها (نوَّرتي الشارع .... الله ينوِّر قلبك ياخ) ... عليك الله هسع دي ما دعوة حلوة ملحوظة: يا جماعة دا ما انا الشاغل البت
Post: #101 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالرحمن إبراهيم محمد Date: 01-04-2010, 05:11 AM Parent: #98
بت بحرى الأستاذة نادية:
ســـلام
كان من أشـهر المشاغلاتية فى السودان الفنان الكحلاوى
فكان يقوم بمسح شامل بعيون تتحرك كماسحتى المطر على زجاج العربة
وكان يشاغل بجرأة كل من ترقص ومن تجلس بحركاته ونظرات عيونه مستغلا كلمات الأغانى وسيطرته على الميكرفون.
وقد أدى ذلك فى يوم من الأيام أن شقيق شابة طعنه عدة طعنات.
ولما شفى عاد إلى سابق عهده.
فحذره بعضهم فقال لهم "الصاقعة بتقع مرة واحدة بس. لكن الحنبك دا نسيبه كيف"
Post: #121 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 09:12 AM Parent: #101
أستاذنا عبد الرحمن
حبابك ملايين المرات
Quote: كان من أشـهر المشاغلاتية فى السودان الفنان الكحلاوى
فكان يقوم بمسح شامل بعيون تتحرك كماسحتى المطر على زجاج العربة
وكان يشاغل بجرأة كل من ترقص ومن تجلس بحركاته ونظرات عيونه مستغلا كلمات الأغانى وسيطرته على الميكرفون.
وقد أدى ذلك فى يوم من الأيام أن شقيق شابة طعنه عدة طعنات.
ولما شفى عاد إلى سابق عهده.
فحذره بعضهم فقال لهم "الصاقعة بتقع مرة واحدة بس. لكن الحنبك دا نسيبه كيف
الصراحة الكحلاوي مابالغ لكن بالغ الحنبك !!
هههههههههه
Post: #120 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 08:29 AM Parent: #98
غباشي ؟
Quote: بتذكر زمان شديد (كنت في رابعة ابتدائي) جات بت في نفس مرحلتنا ماشة لابسه بنطلون و مسرحة (ضنب حصان) و اخر استنضاف المهم اسمع ليك من الناحية التانية ولد قدرنا بيشاغل قال ليها (نوَّرتي الشارع .... الله ينوِّر قلبك ياخ) ... عليك الله هسع دي ما دعوة حلوة ملحوظة: يا جماعة دا ما انا الشاغل البت
من رابعة إبتدائي يامفتري ؟!
هههههههههه
قال ما أنا قال !!
Post: #116 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 07:37 AM Parent: #95
أستاذنا عبد الرحمن إبراهيم
حبابك ومنور البوست والله
Quote: يقال أن عمر بن عبد العزيز خليفة بنى أمية العادل وحفيد عمر بن الخطاب (رضى الله عنه) كان وسيما معجب بنفسه مزهوا بها.
وكان قبل توليه الخلافة وزهده يتطيب بأغلى الطيب وأجمله ويلبس أثمن مطارف الخز والإزارات التى يضاهى ثمن الواحدة منها عشرات المطارف والإزارات.
ثم يمشى في طرقات المدينة بخيلاء متكبرا متبخترا بمشية يتصنع فيها التقصع والتكعب فتتلذذ لها جواري المدينة ويقلدن تلك "المشية العمرية".
وتتبارى الحسان فى محاولة لفت نظره؛ فتقول الواحدة منهن بصوت مسموع له دون ذكر إسمه: "ليتنى أهلك إن لم يمر بى فيعيرنى نظرة أوأشتم رائحة الجنة فيه."
فيتبسم هو من الخيلاء دون النظر ألى أى منهن، ويتمادى فى تمايسه وتقصعه.
سبحان الله !!
شاهدت المسلسل العملوه المصريين لعمر بن عبد العزيز بطولة نور الشريف وفعلاً عرفت الكثير عن شخصيته
وفيها كثير مما ذكرته بعاليه !
يعني أيضاً الرجل الوسيم تعجبه نفسه ويتباهى ويسعد بمشاغلة النساء له !
Post: #112 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:25 AM Parent: #87
د. نجاة الحبيبة
Quote: اها اختنا الجنوبية آمنت انه زولتنا دي صعلوقة يجب الحذر منها..
النصيحة لي الله زولة ( شفتة) ههههههههه!!
Post: #111 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:21 AM Parent: #86
مصطفى قاسم أخوي
Quote: البت قبلت عليهو و قالت ليهو ( وقعو في الطين و حميه )
يستااااااااااهل !
هههههه
Post: #110 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:17 AM Parent: #83
عادل نجيلة
صباحك خير
Quote: من غير ميعاد واللقيا أجمل في الحقيقة من إنتظار صحيتي في نفسي الوجود ورجعتى لعيوني النهار (أبو الزفت) و تعالي شوفي
كل الطيوب الحلوة يا مولاي و الجيد الرقيق واللفتة والهدب المكحل ولفة التوب الأنيق خلتني عايش في صراع يعبر رؤاي إحساس عميق
عليك الله لو المشاغلات كانت بالأناقة دي كان في زولة زعلت منها ؟ ( وش بحب الكلمة المهذبة)
Post: #113 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:28 AM Parent: #82
هاجر صحبتي
Quote: يعني نبور برانا , ونجي انت تعرس بت د. نجاة الزغنونة دي, حسادة كدا نبور كلنا
لو عمرك بقى 64 ما بنحلك ياود الجعلي
يازولة بس لو عمرو اربعين بخارج معاك شيلي طوالي ! ههههه
Post: #109 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:13 AM Parent: #80
ود الجعلي
Quote: ياناديه اناعمرى اربعه وتلاتين جد وحات خوتك
بس ؟
كان كدا كبير على زاريا وصغير على هاجر ولا شنو ياهجورة ؟ ( لووووووووووول)
Post: #108 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 06:08 AM Parent: #76
حمد إبراهيم
حبابك أخوي
Quote: شفتي الدكتور صلاح البشير دا - رجل لطيف وظريف وحريف (تكسير تلج) بعرف كيف يجذب البورداب لبوستاته البعملها، واصبح البقروها جلهم من أخوات الكنداكة هههههههه كدي شوفي في واحدة بتغازله في بوست - هل من المعقول أن تتزوج بمرة ثاني ....) بتقول ليه في رسالتها:
لكن تفتكر نفس الزولة دي ممكن تقول للدكتور كدا في وشو ولا بتشاغلو بس من وراء حجاب بالجرأة دي ؟!
Post: #104 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 05:40 AM Parent: #66
مريومة بت حلتنا
Quote: مرة يا ستي في بنوتين ماشات في الشارع بتاع المدارس الفي بحري في ولد متفن
في اللستك وهم جوا مارات بقا اقول سكسك حبيبي ياللابس البيبي
المهم البنتين ولا عبروه قام لما اتغاز قال ليهم لكن شديدة الفي النص وهم 2 طبعا
تاني في مشاغلات غريبه علا يامنا ( هوي انا اول دفعه طبقوا فيها نظام تامنه ) وش كزاااااب ونخرتي وصلتك من الكزب صاح
-- يا حلاوه ناس
-- اموت ركن واندفن زاويا
-- في السلك وشرط الشرط شرط للارض
-- البت دي بقاقه او يا نجفه
--وووب علينا الما قرينا
-- كوراره ( ولي يوم الليله المعنى ما مفهوم لكن كانت دارجه )
غايتو لقيتك مشاغلاتية كبيييييييييرة
هههههههههههه
انتي قريتي في شارع المدارس الشعبية بحري ؟
Post: #103 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 05:32 AM Parent: #65
أسامة الكرور أخوي
حبابك
Quote: أعتقد أن نسبه كبيره من المشاغلات بالسودان هى أعجاب لا يتعدى ذلك
والله كمان لو إحتفظ الرجل بالإعجاب ده داخل نفسه دون مشاغلة بيكون كويس جداً ولا شنو ؟
Post: #102 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 05:19 AM Parent: #60
المعتمد أخوي
حبابك
Quote: حليل زمن ناس تيتي
تيتي دي شكلها كانت بت محترمة وجميلة لأنو حتى الفنان غنى ليها :
( حني حني علي أنا ياتتي والحاصل بي سببو إنتي ) !!
Post: #107 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Yassir Tayfour Date: 01-04-2010, 06:07 AM Parent: #102
يا ندو المشاغلة "المحترمة*" فن يحتاج لمهارة وجرأة ومنطق ودهاء وخبث في بعض الأحايين، وصبر، ولكن الأهمّ هو تقديرك للخطوط الحمراء، حيث تتفاوّت الخطوط الحمراء من فريسة للأخرى، فهم البيئة والمحيط احد عوامل إنجاح العمليَّة، المشاغل الحصيف هو الذي لا يحرج نفسه ولا يضايِّق الفريسة.. ___ محترمة تعني القانونيَّة و التي لا تُصنّف من قبل أي مُتحجِج بانها تحرُش..
Post: #115 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: ALZOLZATOO Date: 01-04-2010, 07:30 AM Parent: #107
ندوية
يقول احد ظرفاء المدينة والعهدة عليه ان المشاغلة زمان كانت فظيعة وعند سؤاله عن تبرير كلامه
ذكر ان معظم اغاني الحقيبة كتبت في الحسان ويبدا الشاعر بوصف حسنها من شعر راسها مرورا بشارع النص
حتى تقاطع شقلبان وبعد ذلك يتوقف عن الوصف ويكمل القصيدة بي اهوي هوي ياليلى هوي لووووووووووولز
وذكر نفس المصدر انه ذات يوم قال لاحدي الحسان مشاغلا الغزال ده الا في الجنينة ويبدو انها لم تفهم المقصود فردت عليه الجزم دي الا في باتا فاقسم على نفسه الا يقول كلام جميل لاي غزالة
ويابنات بحري قالوا لي بتحبو تعالوا حبونا لووووووولز
تحياتي
زاتوووو
Post: #118 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالله ود البوش Date: 01-04-2010, 07:53 AM Parent: #115
Quote: عبد الله ود البوش
Quote: سلام ندوش وكسرنا كرونة هنا
كرونة دي شنو كمان ؟ ( وش مافاهم)
سلامات ندوش الشرح بفطسا لكن برضو معاك حق لانها مشاغلة ناس المنطقة الصناعية الكرونة دي في العربية لمن تنكسر الكرونة تاني العربية مابتتحرك نهائي والمقصود قاعدين هنا وما ماشين اي مكان تاني
. . واحد سقيل سقالة شديدة خلاس داير اشاغل واحدة قال ليها : الساعة كم بالله ردت وهي زهجانة منو : الساعة واقفة ومعاها مدت بوز . قال ليها : واقفة فوق كم بالله ؟ . .
واحد راكب حمار شاف رباطابية وقال اول مرة اشوف لي رباطابية سمحة ردت دون تردد أول مرة اشوف حمار طابقين
تحياتي
Post: #135 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-05-2010, 03:34 PM Parent: #118
عبد الله ود البوش
Quote: واحد سقيل سقالة شديدة خلاس داير اشاغل واحدة قال ليها : الساعة كم بالله ردت وهي زهجانة منو : الساعة واقفة ومعاها مدت بوز . قال ليها : واقفة فوق كم بالله ؟ . .
ثقيل ثقالة عجيبة ياخ !! ههههههههههههه
Post: #133 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 11:18 PM Parent: #115
الزول زاتو
حبابك
Quote: وذكر نفس المصدر انه ذات يوم قال لاحدي الحسان مشاغلا الغزال ده الا في الجنينة ويبدو انها لم تفهم المقصود فردت عليه الجزم دي الا في باتا فاقسم على نفسه الا يقول كلام جميل لاي غزالة
ههههههههههه
موبالغة !
تسلم ياخ على الضحكة الأهديتها لينا جد
Post: #117 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: محمَّد زين الشفيع أحمد Date: 01-04-2010, 07:42 AM Parent: #107
نادية كيف حالك ، عساك مبسوطة . وشكرًا ليك في تناولك لهذا الموضوع بطريقة فَكِهَة وخفيفة الظِّل ، كما أنَّهُ لا أحد يستطيع نسيان تلك الْمُعاكسات الَّتي تَعْكِسُ واقعنا الّذي عِشناه ولَمِسناه ، وكُنّا ضمن مُعطياته الْجريئة ، والْمُعاكسة كانت عند بعضنا مُتنفَّسًا يعكِسُ فيها الواحدُ منَّا إعجابه للفتاة ، مردِّدًا فيها مفرداتِ بيئته الَّتي تَعْكِسُ هَمَّـه ، وكثيرٌ من الأُدباء عند رؤيته لمنظرٍ جميلٍ تجده يكتفي بكتابة قصيدة ، أو قصّة قصيرة وما إلى ذلك من الأجناس الأدبيّة . أمَّا " الْعَنْقالة " الزَّيَّنا كِدَة فكان لهم نهجٌ آخر ، وغايتو يا نادية الله يغفر لينا بس ، الله يغفر لينا بس ، غايتو بَدِّيك بعض المُعاكسات الَّتي كُنَّا بردِّدها وكذلك يُردِّدها الشّباب زمان :
- " أحييييي أنا وقلبي يضيع عَنَا " . - " شَتِّتـو وأنا بلـقِّطو " . وطبعًا النوع دا من المُشاغلات يا نادية أنا ذكرتو في إحدى كتاباتي على هذا المِنبر ، أها يا سِتِّي قامتْ الْبنيَّة ردّت علي زولنا البِشاغِل فيها دا وقالت ليهو : ( أها لَقَّطناهو ) ، أها وبعد داك زولنا تاني ما قال إبِّغِمْ ، وانصرفتْ البت إلى شأنِها . تاني عندك من المُعاكسات الزّمان يا نادية : - " السّمِح سَمِح أكان قايم من النّوم ، والشّين شين ولو بستحمّ كلّ يوم " . - " سنا يا ناس فريق قِدّام " ، هو طبعًا ما بكون عارف البِتْ ساكنة قِدّام ولا يحزنون ، لكين بس بقول ليها كِدَة من باب المُعاكسة والمُشاغلة. - " دكْترة ومَقدرة " . - " شِــدَّة وغسيل عِدّة " . - " التَّقاعيد والْخَبيز الْبرا عيد " . وطبعًا الفوق دا كانو بقولوهو للبت البتكون متفلسفة وشايفا روحَا ، ولمّن تشاغِلا تقوم تعاين ليك بس بي طرف عينا ، ترفع حاجب عينا الشّمال لأعلي ، وتنزل حاجب العين اليمين لأسفل . ( وبيني وبينك نحنا زاتو نستاهل ، ههههههههه ) . أها تاني شنو : - " سَنَا ياللابس البمبي " . - " لكين ما قفّلتي العربي " . وطبعًا كلمة ( مِقَفِّلة عربي دي ) أكان الشّباب بيقصدو بيها إنُّو البت كُرعينا سُمان . - " باللهِ شُوفُونا وقَدِّرو ظروفنا " ، هههههههههههه ، طبعًا دي من الحاجات القديمة البتذكّرا ليكم الآن ، وأكّان لقيت لَيْ فَرَقة بجيكم راجعْ تاني .
لكِ التّقديرُ وللعابرين بدوحكِ أجمل التّحايا ، واللَّهُمّ اغفِرْ لنا ما قد كان منَّا آنفًا ، وما قَدْ سَلَفَ من ماضينا .
تحيَّتي كاملة .
Post: #119 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: محمَّد زين الشفيع أحمد Date: 01-04-2010, 07:57 AM Parent: #117
Quote: واحد سقيل سقالة شديدة خلاس داير اشاغل واحدة قال ليها : الساعة كم بالله ردت وهي زهجانة منو : الساعة واقفة ومعاها مدت بوز . قال ليها : واقفة فوق كم بالله ؟ .
ههههههههههه .
واللهِ يا ودّ البوش قطّعت مصاريني بالضحك .
Post: #123 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبد اللطيف بكري أحمد Date: 01-04-2010, 11:39 AM Parent: #119
أها دا من نوع مشاغلات ناس مصر ، بس بالشعر ، جاطت المنتديات بالبكاء على الغزل البريء ، وضربوا مثلا قصيدة الفراعنة في عصرنا أن الأمر تخطى حدود المعقول،،
نص القصيدة
دثريني يامنيره زمليني يامنيره يامنيره في فوادي فرخ عبدٍ طق زيره من هنوفٍ صوبها راع الهوى يشعب بعيره سيدة سادات قومٌ سادةٌ أبناء ساده
من بهاها يامنيره ويش أوصف ويش أخلي في جبين الطهر منها بدر سبتين متجلي هالةٍ دون المصلى أخلفت وجه المصلي في محاجرها عقيد القوم يومي به جواده
الحجاج هلال ماهو في أهلتنا مقيّد من يشوفه قبل لا يبدي هلال العيد عيّد لا متى والموت حدر رموشها السود يتصيد لا متى ذبح البشر عند العيون السود عاده
دوب يانع وردها في روض لبتها تفتق في سحر منطوقها صرفٍ من الراح المعتق وكن ظفايرها على الغره ليا قامت تنتق خدم أسودٌ وقوفٌ حو ل بنت البيه غادهٌ
ياوجودي يالزباد الزبد يالبيض المقشر يوم حازت من أمامي عمد وأحمر المؤشر ما أنا إلا أخـو عــقــمٍ بمــولودٍ مبشــر من سروري يوم أعانق طيفها فوق الوساده
كن أصابعها من العناب أو بسرٍ عراقي أو غلا أحشامٍ مجفف أو قناني خمر ساقي وكن ترايبها صحاف الترك حمران الطواقي في سنا نور رقبتها ذابت أكثر من قلاده
فتنةٍ من شافها في جو سابع عرش عرّش كاد ناعم ثوبها في جسمها الغض يتحرّش مرحبا يامرحبا يامرحبا بالطش والرش بالحرير الحر والغرو الغرير الغر عاده
كل ما تكبر تزين وكل ما تقدم تجدد كن نحرها من وراء بوابة الثوب يتهدد حجم ناحل خصرها في ردفها لاجيت أحدد حجم نقطة نون داخل نون ما تقبل زياده
بين خصرٍ إشتراكيٍ وردفٍ رأسمالي ويل ويلي شيب عيني طر جيبي ويل حالي كل غضٍ في نحرها شايفٍ نفسه معالي والثنينين بصراحه يستحقون الإشاده
كن عايم صدرها في وقفته قرمٍ ينادي في خضم المعركه هل من مبارز أو معادي من غروره يعتبر كل ما نقوله فيه عادي يامصابيح الرواهب من بياضه في سواده
من مزاج الزنجبيله في شفاه السلسبيله أورد الساعي كليبٌ حتفه نظم الجليله جمرةٍ في روح تمره ضيعت أبو دليله قايدٍ حاذاه قايد ريم وأنساه القياده
من ليونتها كأن ماله ولا عظمٍ جسدها ومن نعومتها تخاف خدودها من لمس يدها ومن كثر ما مشيها جذاب ما تمشي وحدها ومن كثر ما جلدها صخيفٍ تحب اللبس ساده
ويش يسوى المسك وأبو المسك مع ريحة عرقها يوم ذبت شالها وأهتز في ال ملعب حلقها ما كأن الله مثل باقي مخاليقه خلقها فتنةٍ كانت طقوس القصر تعبدها عباده
دثريني يامنيره زمليني يامنيره يامنيره في فوادي فرخ عبدٍ طق زيره من هنوفٍ صوبها راع الهوى يشعب بعيره سيدة سادات قومٌ سادةٌ أبناء ساده
Post: #125 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: محمد أبوالعزائم أبوالريش Date: 01-04-2010, 01:31 PM Parent: #123
نادية سلام .... بدون ذكر للزمن الحدثت فيهو القصة دي ... كنا مجموعة موظفين بنطلع من المكتب للفطور في الدكان الجنب المصلحة، وفي يوم بعد ما دنكلنا صحن الفول قعدنا حول الصحن، وكل واحد قاعد في (حَجَر). جات واحدة ساكنة في نفس الحي، فقام واحد مننا قال ليها (إتفضلي)، ردت وقالت: هو صحن فول خاتينو في الواطة وقاعدين في حُجار، وكمان فاتحين نفسكم وتعزموا؟ قمنا قلنا ليها (طيب ما تجيبي لينا موية باردة ننزل بيها الفول من حلوقنا) ... البنية ما قصرت .. مشت البيت وجابت الموية. ومن يومها بقينا كل يوم ندنكل الفول ونكورك ليها بالحيطة (يا .....) رسلي الموية ... تقوم ترسلها مع أخوها الصغير. الجميل إنو الحكاية بقت معرفة بكل أفراد البيت (أكيد لأنو الحوار كان برئ).
Post: #126 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: khaleel Date: 01-04-2010, 02:33 PM Parent: #125
طيب يا نادية
المصريات ايضا بشاغلو الاولاد
بكلمة الود دا مز
والمصريين بشاغلو البت بكلمة صاروخ
اسمعي ما عارفة ليك بنات بشاغلو الاولاد
عشان تكون القصة عادلة
Post: #130 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: Raja Date: 01-04-2010, 07:54 PM Parent: #126
الحبيبة نادية..
سلامات وكل عام وأنت وإيمي بألف خير..
أولا ومن عنوانك: (صعلقة) و(مشاغلاتية) أثبت أن الموضوع كله غلط.
أحس بالإهانة الشديدة لما (صعلوق) يوجًه لي أي تعليق سواء في مصر أو السودان أو بلاد الواق واق.
منو البيدي الحق للراجل البيشاغل في إنه يتجرأ ويشاغل..؟
البيحيرني البيوقفو العربات أو يقعدوا يبحلقوا فيك وكأنك جاية من كوكب تاني (المريخ مثلا.. لووووول)
* المصيبة أنا يوم وفي الخرطوم شاغلوني بنات (وش مخلوع خلعة عدوك).
تحاياي
Post: #140 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-05-2010, 04:44 PM Parent: #130
رجوية الحبيبة بت العباسي
بفرح لمن أشوفك بألف عافية وخير ياغالية
Quote: البيحيرني البيوقفو العربات أو يقعدوا يبحلقوا فيك وكأنك جاية من كوكب تاني (المريخ مثلا.. لووووول)
المريخ المعروف ده ؟
وحاتك البحلقة بتخليني أتحسس وشي أقول ياربي عندي نخرتين ولا تلاتة عيون ولا طلع لي وش تاني في وشي ( لوووووول)
والله إتعلمت الشكل بسبب المشاغلات وكان مارديت بكلمة توجع المشاغلاتي برجع البيت بطني فااااااايرة هههههههه
Quote: * المصيبة أنا يوم وفي الخرطوم شاغلوني بنات (وش مخلوع خلعة عدوك).
أها دي بقت تحصل هنا كتييييير لمن فقدت القدرة على الإندهاش لوووول
كوني عافية ياعزيزة ,,
Post: #147 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: أبو عبيدة البصاص Date: 01-06-2010, 03:44 PM Parent: #130
Quote: المصيبة أنا يوم وفي الخرطوم شاغلوني بنات (وش مخلوع خلعة عدوك).
ياها دي القعده
قلت لي بتكشحو موية الغسيل بتاعتكم متين (وش كاتلو الصبر)
هههههه
عفواً لحظه :
رحم الله الراحل علي المك فقد قال سيدتي ذات يوم : (الشقي شقي من كان مثلي في رقتي وشفافية حسي)
وآآآآآآآآآآآآي في شباب مارقين للربا والتلاف لكن كمان في ناس محترمين لكن شفافين لابعد الدرجات وهؤلا سيدتي يعانون من الجمال الصادم فمنهم من يقطعا في حشاهو ومنهم الذي لايطيق لذلك سبيلا ...
يعني هسي انتي في تقديرك الزوله القالت لي صاحبنا بتاع بحري انت شرط ومرتك شرط وبتك شرط وعربيتك شرط حقو تكون مطروده من كل الرحمات الانسانية
لكن في تقديري انا انها تقدر الجمال وتتفاعل كما تتفاعل جميع المركبات الكيميائية ومن قال ان الجمال ليس له خواص الكيمياء ومع ذلك سيدتي هنالك ايضاً الغازات الخامله واللا فلزات التي تدعى التفاعل
وهولاء هم الشتر وهم من يسببون الاساءة للناس الشفافين
اها قلتي كيف
ولا اقول ليك تاني انتي خليك مننا نحنا لو جات واحده ماره جنبك وكانت نضيفه زي ( حبة الترمس المقشره ) وكمان ناجحه كل المواد عربي انجليزي وفرنسي وحتى المواد الاختياريه
يعني حاتقولي لي ما حا تعلقي
اها من النقطة دي بيبدا عمل الجدول الدوري الكبير بتاع الكيمياء البدي كل ماده او معدن او غاز خواصه البتشبه
ومن هنا تنوع عنقود الادباء من لدن عنتر وقيس الذي قال اسكتي ياليلى حتى لاتشغلني عنليلى مروراً بالشريف الرضي قطع مصرحاً انا الذي لاتملك الحسناء قلبه ولو شملتها رقة وجمال وحتى الطيب الدوش الذي عندما تاتي سعاد تكبر رجله لتصبح نص في الارض ونص في النعال
سامعاه بقول راسمالية وإشتراكية ده علاقتو شنو بمنيرة ؟
القصيدة دي عاطفية ولا سياسية ؟
Post: #136 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-05-2010, 04:01 PM Parent: #117
العزيز محمد زين الشفيع
حبابك أخوي وتسلم يارب
Quote: السّمِح سَمِح أكان قايم من النّوم ، والشّين شين ولو بستحمّ كلّ يوم " . - " سنا يا ناس فريق قِدّام " ، هو طبعًا ما بكون عارف البِتْ ساكنة قِدّام ولا يحزنون ، لكين بس بقول ليها كِدَة من باب المُعاكسة والمُشاغلة. - " دكْترة ومَقدرة " . - " شِــدَّة وغسيل عِدّة " . - " التَّقاعيد والْخَبيز الْبرا عيد
لقيتك لاعب محترف في فريق المشاغلة الدولي يامحمد ( هههههههه)
مداخلة شحمانة أشكرك شديد ووريتنا كلامات أول مرة أسمعها كمان .. تسلم وحضورك مفرح في كل وقت ,,
Post: #129 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-04-2010, 07:49 PM Parent: #107
ياسر طيفور ؟
لقيتك بروفسير عديل والله ( وش مندهش ومبسوط)
Quote: المشاغلة "المحترمة*" فن يحتاج لمهارة وجرأة ومنطق ودهاء وخبث في بعض الأحايين، وصبر، ولكن الأهمّ هو تقديرك للخطوط الحمراء، حيث تتفاوّت الخطوط الحمراء من فريسة للأخرى، فهم البيئة والمحيط احد عوامل إنجاح العمليَّة، المشاغل الحصيف هو الذي لا يحرج نفسه ولا يضايِّق الفريسة.. ___
شكلك كدا أبو الفنون بكل إحترام وصبر كدا تمام !
Post: #134 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبد اللطيف بكري أحمد Date: 01-05-2010, 03:16 PM Parent: #129
أها ودي كمان مشاغلة الناس المتيمة !! الأديب محمد محمد خير ،! شيرين هذي ستعيش فقط يرن في أذنها هذا الابداع إلى الابد!!
==== أبحث في كل معـاني اللغة العربية
عن معني كلمة شيرين
أبحث في المنجد في مختار الصحاحّ
وفي قاموس الطبري
في طبعة بولاق
وفي قاموس المصطلحات الأدبية
في ( دكشنري ) مايكل وست
أبحثُ في باب الشين المعلولةٍ بالياء الوسني
ثم أسأل معتذراً من إلحاح ضراعاتي
يارب الأسماء القدسية
هل شيرين أسم من أسماء الأفعال الحسنى؟!
أبحث في النون الظاهرة على آخر شيرين
وفي ياء يقبني
كوني مصبوباً فيها كالتنوين
بالشوق الظاهر في ولهى
وبحركة إعرابي علمُ ذكرُ
معتلٌ بفحيح الشين
ومكسور بالحرف الطاعن في قلبي
وعلامة كسري شيرين !!
كسرتني الفتحةُ مثل مؤنثهن السالم
فأعتليت شفيفاً
كعبير كتبته تاءُ التأنيث
وأتاني الطلقُ
وأخطأني التكوين
وتماوج موتُ في عينيّ
فمتُ طويلاً
وبسر النون
تذوقت بموتي طعم الياسمين
والموتُ إشتعل على ناري
والنار المصنوعة من لهبي سألتني هل من شيرين !!
يا كل جموع التكسير المنصوبة أرماح في عينيها
يا ألف التأنيث المقصورة مثل النجوى في قلبي
أبوح الآن بسر اللغة العربية قبل سنين
كان البحر يسّمى شيرين
وكان النيل ظلالاً في خصلتها
والملكاتُ العجميات إذا أحسّن الملك
فضمير الملك يعود لبرق التاج ويقول لها التاريخُ الملكي ( شي ريند )
وأنا في الظلمة محموماً
قالت أمي حين رأت قمراً يترنح ثملاً بالنور
لقد ظهرت شيرين
وفق ذاك الحين
كانت أقراص علاج الحُمى
تُصفع من رعشة بسمة شيرين
فإذا ما مرض الناسُ قديماً
جرت العادة
أن تبلع قرصاً من رعشة بسمتها
تلك الأقراص
تعالج أيضاً آلام التسنين
كانت أنثى النخل بشط العرب تسّمى شيرين
ولرمسيس الأول بنت تشبه شيرين
وكان اسم بلادي قبل ظهور النعرات القبلية شيرين
كل اُسم في السودان به شيءُ من شيرين
وانا بي برقُ منها
إلا إسمي
فجموع التكسير المنصوبة أرماح في عينيها
تغمدّت الإسم بأضيق زاوية من رحمتها
صار إسمي الشعبي بكاء
والرسمي أنين
Post: #141 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-05-2010, 04:51 PM Parent: #134
عبد اللطيف
محمد محمد خير رجل تخشاه الحروف وتعشقه فهو يشكلها كيفما يشاء
Quote: كل اُسم في السودان به شيءُ من شيرين
وانا بي برقُ منها
إلا إسمي
فجموع التكسير المنصوبة أرماح في عينيها
تغمدّت الإسم بأضيق زاوية من رحمتها
صار إسمي الشعبي بكاء
والرسمي أنين
إنا لله !!
Post: #143 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالعزيز الفاضلابى Date: 01-05-2010, 05:32 PM Parent: #141
استاذة نادية تحية طيبة. رأيك شنو فى مشاغلة الزول ده. قال لها: شفتك ماشة مدرستك تفوح احلى العطور حواليك زهور مدرستك اليانعة تنتشى وتفرح لمجيك بشوف التوب عليك خايل تقول يالرايقة منسوج ليك والفستان تريّح ونام لابد فى ضميرا فيك.
Post: #144 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادية عثمان Date: 01-05-2010, 05:54 PM Parent: #143
لكن في طالبة بتلبس توب ولا الزول ده كان بشاغل في الناظرة ؟ ( ههههه) !!
Post: #145 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: عبدالعزيز الفاضلابى Date: 01-05-2010, 06:26 PM Parent: #144
Quote: إنت قريب د. علي الفاضلابي الساكن في شمبات جنوب ؟
بينى وبين الدكتور على رحم واجبة الوصل
Quote: لكن في طالبة بتلبس توب ولا الزول ده كان بشاغل في الناظرة ؟ ( ههههه) !!
ممكن تكون بتقرأ فى الفرع ,, ايام الدنيا بخيرها. واحد كان طالب فى مصر ,, ماشى مع اخوانو الطلبة السودانيين ,, مرت بهم واحدة منقة ,, اخذوا فى مشاغلتها,, واخونا ده كان قاموسه خاليا من مفردات المشاغلة ,, قال ليهم: ياسلام ,, والله فيها إضنين!
Post: #146 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: محمد أبوالعزائم أبوالريش Date: 01-06-2010, 08:36 AM Parent: #145
Post: #149 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: انعام حيمورة Date: 01-06-2010, 10:51 PM Parent: #146
بوست لذيذ ...
عارفة يا ندوية عندي بت خالي زي بت دكتورة نجاة ..
بتقول والله اي زول يشاغلني بشكره لانو عبر عن مشاعره تجاهي (هههههه)
ودائما بتقابل المشاغلات بابتسامة عريضة ..
--- بت خالي سمحة سماحة قاطعة هههه
Post: #150 Title: Re: صعلقة (المشاغلاتي) السوداني بالمقارنة مع صعلقة (مشاغلاتية ) الشعوب الأخرى !! توجد ( منقة ) Author: نادر الفضلى Date: 01-09-2010, 02:46 PM Parent: #149
اليوست دا فاتنى .. ظريف جداً
يعنى يا نادية أخلص من كلامك أن المشاغل السودانى رومانسى .. و المصرى حسى وطبعاً البنات بحكم ما يتعرضن له من مشاغلات أدرى بذلك وأقدر على المقارنة وباين عليك نابك و مازلت كثير من المشاغلات ..
ما رأيك والزميلات فى مشاغلات زملاء الدراسة أو العمل الأسلوب والمداخل والتعبيرات .. الطرائف فيها ,, مقبولة وهل تعتبر مشاغلات أم لها مسمى آخر؟
وماذا عن هذا المنبر .. هل فى مشاغلات .. أو إبداء إعجاب هل فيها تفاوت .. فى المقبول .. وفى السخيف المرفوض؟
Quote: المهم البنتين ولا عبروه قام لما اتغاز قال ليهم لكن شديدة الفي النص وهم 2 طبعا
المشاغلة دى ذكرتنى قريب وصديق رحمة الله عليه كان مبتكر فى المشاغلات تجى البنتين ماشات ويقول ليهم .. سمحة البطرف .. أو سمحة الفى النص تصيبهم الدهشة ويتلفتن لبعضهما ثم تضحكان!
كيف تشاغل يابانية: كنت فى كورس تدريبى بطوكيو باليابان. لاحظت أن الجيل الجديد لليابانيين مفصوم بالغرب ويقلده فى اللبس والمظهر .. رغم أن العيون المدفونة والمشروطة والملامح ما بتغباك .. و فى إحدى الزيارات التعريفية عن اليابان، كانت لمحلات شعبية. منها محل لبيع الزى الشعبى الكيمونو للنساء. وكانت هنالك فتاة يابانية فى غاية الجمال تلبس الكيمونو وتقف كالصنم أو الموديل الصناعى لعرض الملابس. جعلتنى وزميلى الأردنى نتشكك هل هى صنم أتقن صنعه اليابانيين؟ ودرنا حولها و تكلمنا معها (بالإنجليزى ما يابانى) لم يتحرك لها رمش! وبعد طول محاولات .. كانت المفاجأة عندما تحدثت مع الأردنى متعمداً إسماعها "هذه الفتاة تشبه فتيات غرب أوربا وأمريك! .. فجأة فصلت اليابانية وتحول الصنم لبنت آدم طايرة من الفرح و لبلبة فى الكلام تحدثت معنا بإنجليزية ممتازة .. سألتنى بفرح .. أشبه فتيات أى دولة فى أوربا؟ .. لم اتردد أن أقول لها .. الفرنساويات .. (لإشتهارهن يالجمال) .. فإبتسمت إيتسامة عريضة وأشرق وجهها فرحاً .. وقالت لى .. أنا عشت فترة من حياتى فى فرنسا .. كيف عرفت ذلك!! .. إدعيت الخبرة والفراسة قائلاُ .. هذا ظاهر من ملامحك ... إزداد فرحها و تجاذبت معنا أطراف الحديث .. وإن لم ننفع المحل بشراء الكيمونو الباهظ الثمن! .. وفى رحلة عودتى على الخطوط اليايانية تم تحويلى من البزنس كلاس للدرجة الأولى .. وكانت المضيفة اليايانية بالدرجة الأولى ملكة جمال . فلم أتردد بان أقول لها .. تشبهى الأوربيات والأمريكيات .. فحظيت بخدمة ٍٍVIP ممتازة طوال الرحلة الطويلة!
