رأس السنة .. للرائع المبدع عزمي أحمد خليل

راس السنه
شعر عزمى احمد خليل

########
تسالنى كيف راس السنه وانا بى هنا
مليان شقا وشرقان ضنا
يابختك انت هناك سعيد متهنى بالعام الجديد
كلك فرح ودايب غنا
وتسالنى كيف راس السنه
#########
حليل بلدنا وياحليل كل الجميلات والفرح
وبلدنا بى رغم الظروف القاسيه والهم الطفح
ما فيش بلادآ تشبها ولا غير سماها كنار صدح
كل حاجه ليها طعم هناك حتى الحزن زى المرح
وحناننا ما زى كل حنان ولا ناسنا زى الناس هنا
وتسالنى كيف راس السنه
########
انا لى زمن ما حضرت عيد فى وطننا وله فرحته يوم
يوماتى شايلنى الاسى ويدينى بعدو كمان هموم
الليل يمر زى حول هنا القاهو من اصحى واقوم
وكتير ليالى تعدى بى من دون عيونى يجيها نوم
واهو ديه حال كل زول غريب الرجعه ليهو تكون منى
وتسالنى كيف راس السنه
##########
هنا لا فرح ولا عيد بيجى ولا بنعرف مروا كيف
كل الاماسى زى الصباح وحتى الربيع زى كل صيف
من عمرنا بيمضى الزمن وايامنا ماشه على خريف
وعيوننا جافاها النظر وحتى القليب قرب يقيف
والشوق خلاص كمل دموعنا واقدارنا مابيه تلمنا
وتسالنى كيف راس السنه
#######
بالله كيف ناسنا الهناك طبعآ سعيدين فى الوطن
الفرحه ما فرحة فلوس الفرحه احساس بالزمن
وزى ما بيقاسوا من الظروف اهو نحنا حاضنانا المحن
ومحنه فى بلدى العزيز فى الدنيا معدومة تمن
وظروفنا بكره بتتعدل ومن تانى بيزورنا الهنا
وتسالنى كيف راس السنه
#########
كل يوم يمر يابلدى فيك انشالله تقفزى للامام
وربوعك الخضره الجميله بالخير يغطيها الغمام
والناس تعود زى ناس قبيل لا فتنه لا جفا لا خصام
وتعودى زى ماكنت اول عش للعصافير والحمام
ونجيهو سوداننا الزمان وعليهو مانشيل همنا
وتسالنى كيف راس السنه

ترى كيف سيكون رأس عامنا القادم؟

نأمل أن يكون عام أخخخخخخخخخخخخدر

هوي ياعزمي داك المطار وديك الطياره
ما تجننا ساكت
بس القصيده حنينه

شكرا صلاح

الأخ العزيز الأستاذ الموصلي
لك التحية والود ووافر الإحترام
شكراً لمرورك، لك سلام حار من الأخ عزمي، وبيقول ليك، لا المطار بيحل ولا الطيارة بتنفع
مع خالص تحياتي
د. صلاح البشير

Quote: حليل بلدنا وياحليل كل الجميلات والفرح وبلدنا بى رغم الظروف القاسيه والهم الطفح ما فيش بلادآ تشبها ولا غير سماها كنار صدح كل حاجه ليها طعم هناك حتى الحزن زى المرح وحناننا ما زى كل حنان ولا ناسنا زى الناس هنا وتسالنى كيف راس السنه

وزى ما قلت ليهو شوقه للسودان تعبر عنه كلماته:
قدر فتشته ما لقيت لى شبه ساكت مقارب ليك
أتاريك بقساوتك ديك حنان الدنيا كلها فيك

وأضيف ليهو وأبضاً من غناء هاشم ميرغنى (وبتصرف):
فات الهنا .. من يوم بعدت عنك كم سنا

يا دكتور عزمى دا يا تودوه يشتى فى أريزونا يا السودان
ولو شتى فى السودان خايفو يشتت راجع!

تحياتنا لشاعرنا الشفيف و نحن نستمتع بمعاناته وحنينه للوطن
فيخرج لنا شعراً جميلاً... نتمنى من الله أن يرد غربته وغربتنا!

تحياتى لك يا دكتور و لعزمى

الأخ العزيز نادر الفضلي
لك التحية والود ووافر الإحترام
شكراً على مداومتك، نسأل الله أن يرد غربتنا جميعا. تعلم بأن الأخ عزمي ممكون بعشق البلد كان الله في عونه وهوننا جميعاً
مع خالص تحياتي
د. صلاح البشير

قربنا .. بكرة بث

كل عام وأهل السودان جميعهم على أتم خير وعافية

عام يحتضر وعام يحين مخاضه ونحن نراوح في المهاجر لا نملك إلا أن نقول كل عام وأهل السودان جميعهم على اختلاف منازعهم ومشاربهم بألف خير

بقى من الزمن تسع ساعات