معتوقة ومعتقة ومنعتقة نوافير إنتشاء وحشمة وحَـمار العين .. تضحك كلما وقعت مصيبة تمشى على العجين وتلخبطو وترطن إذا جاها الحنين ************ يا بت بيوت الهجعة كيف ؟ غبار شوارعك ماشى وين زقاق يفتش فى زقاق كتمة وضلمة وإنعتاق أنا فيك لامونى المساجين سكاتك منازل حلال الحرام سكاتك على حين أهش الحمام سكاتك عليك لما تصحى المسام سكاتك عليهم سكوت و السلام *************** صوتك وكت قطع البحر قبال مراكب العمدة ضهر النيل عرق .. والشمس فوق حبل الغيوم شرت جلاليب النعاس ناشف غرب مبلول شرق والمطرة زى شفع العيد تدخل غرف كل البيوت حكمة الجوع الشرح للأرضة كيف تقرأ المرق قبال يقع فوقـك سقف إتنحنح الجالوص أمرق على مهلك .. مروق الحنة من ضفر العروس واصعد على مهلك .. صعود البذرة والروح والشموس
القصيدة ملئية بالصور الجمالية المعبرة الرمزية ظاهرة ولكنها واضحة ومفهومة نوعا ما
والتعابير مدهشة ككل نصوص عاطف خيرى
Post: #4 Title: Re: معتوقه ، معتّقـه ومُنـعـتِقه Author: بدر الدين الأمير Date: 12-28-2009, 05:37 PM Parent: #2
Quote: أمرق على مهلك .. مروق الحنة من ضفر العروس واصعد على مهلك .. صعود البذرة والروح والشموس
ود الحبر ونحن على اعتاب الذكرى الخامسة عشر لرحيل مصطفانا التحية للصديق العزيز الشاعر المطبوع عاطف خيرى ولعاطف نص اخر له حكاية مع مصطفي سوف احكيها لك لاحقا
Post: #7 Title: Re: معتوقه ، معتّقـه ومُنـعـتِقه Author: عمران حسن صالح Date: 12-28-2009, 06:52 PM Parent: #6
محمد يا طه يا حبر .. إزيكـ تعرف يا محمد في غُنا بنضف الزول .. بنضف أضانو وبنضف مفاهيمو وبنضف تعاملو بدون ما يشعر .. غُنا ( نتمطَق ) * تفاصيلوا حبه حبه .. غُنا كل كلمه فيهو غُنا .. كل مقطع فيهو غُنا .. غنا يخليكـ ترطن إذا جاكـ الحنين .. وغٌنانا يا محمد كلو حنين إلا مصطفى غير .. والكلام البغنيهو غير ..
Quote: والمطرة زى شفع العيد تدخل غرف كل البيوت
__________________ *( نتمطَق ) دي إلا تستعين بي صديق أربعيني ..
اسأل نفسك هل الاغاني التي غناها ولحنها الاستاذ مصطفي سيد احمد
اذا لم يغنيها ولم يلحنها تكون اشعار او كلمات تصلح للغناء؟؟
لا اظن ذلك
Post: #10 Title: Re: معتوقه ، معتّقـه ومُنـعـتِقه Author: عمران حسن صالح Date: 12-28-2009, 07:05 PM Parent: #9
Quote: اسأل نفسك هل الاغاني التي غناها ولحنها الاستاذ مصطفي سيد احمد اذا لم يغنيها ولم يلحنها تكون اشعار او كلمات تصلح للغناء؟؟ لا اظن ذلك
بل أظن يا محمد أنَ ما رسخ في أذهاننا هو الشعر الغنائي .. سهولة تلحينه أسمته الغنائي .. ولكن الفنان ( الملحِن) يفعل ما يريد في الكلام البيعجبو .. ومصطفى جمع كل الفن في اسمو
____________________________________ فن مصطفى يشمل حتى أخلاقه و نضارته وسيرته مع الآخرين
Post: #12 Title: Re: معتوقه ، معتّقـه ومُنـعـتِقه Author: محمد طه الحبر Date: 12-29-2009, 08:02 AM Parent: #8
باقي النص لاغنيه جالوص
********** مبنية مدن الخوف من طينة آخر الليل وانا فى سقالة الشوق قدح البصيرة تقيل فاتح زريبة الجوف تمرق تخش الخيل على كيفة كيف معلوف ضهر المظنة يشيل وانا ظنى ظنيـتـو .. فى النيل غريق فى النيل و الليل ولافى بالو ليل ساكت يغنوا على القمر واجعنى فى البحر السكات سكتنى فى الوجع البحر يا بت صباح الطير وين البلد ركت ؟ ما عاد هواك يفتح فى الكتمة شباك النزيف وين تكيتك فى الغيمة شطيف النجوم ريف الجسد صدرك سبلوقة اللبن الحريف داسينى فيكى نضر والأنبياء فاتوا والأنبياء بين بين قاعدين فى ضل النار داسينى فيك نضر فى غفلة جو الكفار وطارت حمامة الغار لاقونى ناشف ومر ما ذنب جلد الطار لو غنو بيهو شتر ما تخافى الله معاك وكل الملائكة سمر
شتتو من هنا الاستاذ قال عاوز جو هادي عشان ينداح ويشرح القصيده فبالله عليكم اقيفو لينا ورا المسرح ..
يلا يا كابتن محمد اتوكل وقول بسم الله وابدا لينا من البيت الاول .. خلينا نستفيد من علمك ومعرفتك فما يخرج منك احق ان يدون ويحفظ للاجيال القادمة ,جزاك الله عنا كل خير
Quote: اسأل نفسك هل الاغاني التي غناها ولحنها الاستاذ مصطفي سيد احمد
اذا لم يغنيها ولم يلحنها تكون اشعار او كلمات تصلح للغناء؟؟
هو (الإيمان) يامحمد الإيمان بالشئ وتوظيف وتسخير كل الطاقة لتحقيقه فأستاذنا مصطفى سيداحمد ـ فيض نور من الله يغشاه ـ كان من المؤمنين بالكلمة مُطلقَةَ فكان يوظف مقدرته الغنائية ليعّبر به عن إيماناته .. شأنه شأن العظماء .. فـ BOB MARLEY تجاوز مرحلة الشعر لتلحين خِطاب هيلاسلاسي في أفتتاحية دورة الأمم المتحدة .. رائعته الشهيرة War
Quote: وانا فى سقالة الشوق قدح البصيرة تقيل فاتح زريبة الجوف تمرق تخش الخيل على كيفة كيف معلوف ضهر المظنة يشيل وانا ظنى ظنيـتـو .. فى النيل غريق فى النيل و الليل ولافى بالو ليل
تحياتي محمد طه الحبر. كامات تسمر الواحد امامها تماما
